رواية يمسح الدمعة بشكوى -5
سمعنا صوت ينادي مريم وقمنا مفزوعين
رايد بهمس = اذا عرفت تلفون الاستراحة كيف اعطيك اياه ؟
مريم بهمس = ماتقدر تمرني مرة ثانية ؟
رايد = مدري ... عمي متى يصير ماهو موجود ؟
مريم = الوقت هذا مناسب .. يصيرون هم مشغولين بالغدا
وركضت مريم لباب الملحق والتفتت لي
مريم بخوف = انا ابروح قبل يجي احد ويشوفك ...
رايد = انا ابطلع الحين وابمر مرة ثانية عشان اخذ الكرت
مريم بصوت باكي = انتبه على نفسك رايد
رايد = حبيلي دانه
هزت مريم راسها بايه وطلعت
التفتت للصحن اللي جابته مريم .. جوعان بس مايمديني اكله ... لازم اطلع الحين اخاف احد يجي ويشوفني
طلعت من الملحق واخذت نعالي وفتحت الباب بشويش وطلعت ورحت لسيارة عمر ووقفت عندها احتري عمر وانا مهموم
باع بيتنا ... املنا الوحيد نطلع من هالعذاب ... وش اسوي الحين
تعبت وانا احتري عمر .. وحسيت بدوخة من حرارة الشمس والجوع والوقوف
رحت بتعب متوجه لظل احد الجدران وجلست بالارض ومددت رجولي بتعب
مدري كم مر من وقت ... بس حسيته سنه لين اخيرا شفت عمر يطلع من بيت جده وفتح سيارته
قمت اترنح لين وصلت السيارة... انتبه لي عمر وسألني
عمر مستغرب = رايد ! ... من متى وانت تحتريني
مارديت عليه .. لاني اذا تكلمت اببكي .. وانا مابي ابكي قدام عمر
فتح عمر السيارة وركبنا وحرك عمر متوجه للاستراحة
عمر = وشفيك رايد ( والتفت لي )
التفتت للدريشة اللي بجنبي اجاهد دمعتي بس غصب عني طلعت دموعي
عمر = ماشفت اخوانك بعد ؟
مارديت عليه وبكيت اكثر منقهر من عمي اللي حرمني من كل شي بعد ماكان عندي كل شي ... بيتنا ... راتب ابوي .. دراستي ... حتى اخواتي حرمني منهم
.. مريم تغيرت بسببه .. صارت ماتفهم بسرعة
حسيت بيد عمر على كتفي ... التفتت له وتوني انتبهت انه موقف السيارة على جنب
عمر = ماسمع الا مشاهقك ... قلي وش فيك ؟
رياد وانا ابكي = عمي اخذ منا كل شي
وانحنيت على المركى اللي بيني وبين عمر وبكيت
حسيت بالسيارة تمشي ... وانا افكر بهمي وشلون اسوي ومريم تقول يمكن عمي مايعطينا كرت العايلة ... ولا عندي بطاقة احوال ... وين اروح ... ابي اعتمد على نفسي واخذ اخواتي ونطلع بس وشلون نطلع وماعندنا بيت
حسيت بيد عمر على ظهري
عمر = حنا قدام مطعم الحين ... انزل تغدى
رفعت راسي وانا احس بدوار من البكا والجوع وحرارة الجو والهم
رايد بصوت باكي = مابي شي ..
عمر = شكلك تغديت .؟
رايد = مابي شي ... مابي غدا ( ومسحت دموعي بيدي )
نزل عمر ودخل المطعم وشوي وجا ومعه كيس و حط الكيس بحظني
عمر = هذا لك
وخرت الكيس عني وحطيته بين المرتبتين
رايد = مابي شي اقول ( وكملت منقهر ) رح عطه عمي ترا بياخذه اذا عرف انك شريته لي
ضحك عمر مني ومن اسلوبي وحرك السيارة رايح للاستراحة
شوي واخذ الكيش ومرره على خشمي
عمر = شم ريحته حلوة
ابعدت الكيس عني بضيق وانا ساكت
عمر = شف ترا شريت الغدا لاني خفت تموت علينا ونبتلش فيك .. والا انا ماعمري غديت احد على حسابي ...
سكتت عنه وانا اطالع الدريشة اللي بجنبي وسرحان
وصلنا الاستراحة ونزلت من دون ماخذ الكيس ورحت لغرفة التلفزيون وانسدحت على الكنبة
جاني عمر ومعه الكيس وجلس على الطاولة الطويلة اللي قدامي ونزل الكيس بجنبه
عمر = قلي شفت اخوانك والا لا ؟
رايد بحزن = شفتهم
عمر = اجل وش فيك ؟
رايد = عمي باع بيتنا بدون ماادري ( وبكيت ) وحارمنا من راتب ابوي ومن دراستي ومن كل شي
عمر = بيتكم وينه ؟
رايد بحزن = بالرياض
عمر = جبت كرت العايلة حقكم .. يمكن تتوظف ماحد يدري
بكيت اكثر وغطيت وجهي عن عمر
ونمت وانا مادري
اخر العصر
قمت من النوم مصدع ولقيت قدامي كيس الغدا على حاله الفتت لعمر ولقيته نايم على الكنبة
اخذت الكيس وطلعت من الغرفة ... جوعان ماني قادر اصبر
جلست على العشب وبديت اكل
بعد ماخلصت رحت وصليت العصر وقومت عمر بس ماقام
طلعت وخليته وجلست على العشب افكر بحالي لين اذن المغرب
صليت ورحت للمسبح وجلست على طرف البركة مهموم
= رايد !
التفتت لعمر اللي دخل بدون ماحس فيه
عمر = ليه ماقومتني
رايد بحزن = قومتك بس انت ماقمت ( والتفتت اطالع المسبح وحركات الماء اللي احركه برجلي )
جلس عمر بجنبي وسألني
عمر = كم عدد اخوانك ؟
تذكرت اخواني كلهم
رايد بحزن = كانوا خمس
التفت عمر لي متفاجأ
عمر مستغرب = كانوا ؟
هزيت راسي بايه
عمر = والحين كم ؟
رايد بحزن = ماتوا ثلاث وبقي ثنتين من اخواتي
اخذنا شوي وحنا ساكتين
عمر = عمك ليه طردك .؟
رايد بحزن = بس لأني طلبت منه راتب ابوي ... عيا يعطيني اياه وتهاوشنا وطردني
عمر = يعني انت الحين ماعندك الا اختين بس ... يعني مالك اخوان ذكور ؟
رايد = ايه .. اللي بقوا بس 2 اخوات
عمر = ووشلون عمك معهن .؟
التفتت لعمر مافهمت سؤاله
رايد = كيف يعني ؟
عمر = يعني عمك يضربهن
طالعت البركة يوم تذكرت مريم ... مدري مريم دايم داخل بالبيت وانا طول اليوم بالملحق برا البيت ... اللي اعرفه انهم يشغلونها اما الضرب مدري ....
رايد بحزن = مرة عمي اشوفها تضرب اختي الصغيرة عمرها 4 سنين ( وسكتت احاول اجاهد دمعتي ) اما اختي الكبيرة اشوفهم دايم تشتغل .. وماخلوها تكمل دراستها مثلي
عمر = ليه اختك الكبيرة مثلك مادخلت الثانوي.؟
رايد = هي تخرجت من الثانوي ... بس ماخلوها تدخل الكلية .. حتى الوظيفة عمي مايبيها تتوظف ( وسكتت لما تذكرت تغير مريم ) اختي الكبيرة تغيرت واجد ... صارت ماتفهم ( وبكيت )
اخذنا شوي ساكتين
عمر = تغديت ؟
هزيت راسي باية وانا امسح دموعي
عمر = طيب رايد انا مضطر اطلع وماني راجع الا بكرة العصر
التفتت له مستغرب
رايد = ليه
عمر = عندي امتحان بكرة ... وهنا ماقدر اذاكر اذا جوا الشباب .. ابروح لبيتي اذاكر .. لا تعلم احد من الشباب اني بالبيت ... اوكي
سكتت مستغرب من عمر ... اذا كان عنده بيت ليه دايم ينام بالاستراحة
رايد = انت ليه دايم تجلس هنا وانت عندك بيت ؟
سكت عمر شوي وهو يطالعني
عمر = جالس على قلبك ؟ ( وقام ) لا تعلم احد اني بالبيت ... ابي اذاكر مابي احد يزعجني
وعطاني ظهره بيطلع
تذكرت رقم تلفون الاستراحة
رايد = عمر
التفت لي وهو ساكت
قمت واقف
رايد = الاستراحة لها تلفون ؟
عمر مستغرب = مدري ... اعتقد لا ... كل الشباب معهم جوالهات مانحتاجه .. ليه تسأل ؟
رايد = ابي اعطي رقم الاستراحة لاختي الكبيرة عشان اقدر اكلمها
طير عمر عيونه فيني وعصب
عمر بعصبية = خبل انت .. تبي تعطي اختك رقم استراحة كلها شباب ... صدق انك بزر
وراح
الساعة 9 بالليل
اجتمعوا الشباب كلهم .. وفعلا اسألوني عن عمر وقلت لهم مدري ... حتى مشعل ماعلمته وينه
رحت لغرفة التلفزيون اتهرب من الشباب وقعدت اقلب في القنوات احتريهم يرحون
فجأة دخل علي نايف الغرفة وجلس بجنبي
نايف = انت هنا و انا ادورك
سكتت ومارديت
نايف = امممم اقول رايد انت ماتدرس ولا شي .. صح ؟
هزيت راسي بايه
نايف = طيب ليه طردك عمك .؟
سكتت ومارديت
نايف = شف رايد ابي ارسلك ولك ميتين ريال اذا رحت
التفتت له مستغرب من العرض
رايد = ميتين ؟
ناين بابتسامة = ايه ميتين ... ابي ارسلك لعامل بنقالي بحارة قديمة ببريدة ووقله انك من طرف نايف وسعد وهو بيعطيك شي وهاته لي على طول
رفعت حواجبي مستغرب .. عمي دايم يرسلني ولا عمره عطاني فلوس على تعب الروحة
رايد مستغرب = بس
نايف = ايه بس هذا كل شي
رايد = طيب عطني الميتين الحين عشان اتأكد
نايف = ايه طبعا ( وطلع بوكه) .. هذي ميتين وهذي الفلوس عطها العامل
اخذت الميتين فرحان فيها وقمت واقف واخذت باقي الفلوس اللي للعامل
وبعد ماخذت العنوان من نايف
رايد = طيب عطني سيارتك
نايف مرتبك = لا لا ... الا سيارتي ... لا تاخذ سيارتي ولا سيارة سعد ... خذ أي سيارة من سيارات الشباب .. قل لهم انك تبي دكان ... مطعم .. سوق أي شي .. المهم رح لا تتأخر علينا
سكتت مستغرب وطلعت ورحت لمشعل بس مالقيته كالعادة
تلفتت ادور من الشباب اللي ماخذ عليه شوي عشان اطلب سيارته
ولقيت منصور جالس على العشب مع احد الشباب يسولفون
رحت له و طلبت سيارته
منصور = ليه وين بتروح
رايد = نايف مرسلني .. ابي سيارتك شوي بس
طير منصور عيونه فيني
منصور =.تعال اشوف
وقام ومسك يدي وجرني معه للمسبح بس لقينا شباب يسبحون وطلع وهو الى الحين ماسك يدي يجرني ورحنا لطرف الملعب
منصور = اسمع يارايد نايف وسعد لا تطيعهم باي شي يبونه .. تفهم .. انتبه منهم
رايد مستغرب = ليه
منصور = عطاك فلوس عشان تجيب لهم شي من العامل .. صح ؟
رايد = ايه
منصور معصب = ياخبل العامل يبيع على نايف وسعد خمر والهيئة شاكين فيهم .. لا يورطونك معهم ... انتبه لنفسك
طيرت عيوني بخوف
منصور = رجع الفلوس له ولا تروح
هيئة وخمر .. انا وين قاعد .. ياربي مامداني افرح بالميتين
نزلت راسي بحزن .. يافرحة ماتمت مابي ارجع الميتين ... محتاجهم مرة
منصور = رح رجع الفلوس ومثل ماقلتلك لا تسمع كلام نايف وسعد
رجعت لنايف ورجعت له فلوسه
نايف = ليه مارحت ... وش غير رايك
رايد = انت تبي تخدعني ... تبي اجيب لك من العامل خمر
طير نايف عيونه وسكت
نايف = طيب طيب وش رايك اعطيك اربع مية وتروح ؟
رايد = لا
نايف = ابعطيك ألف بس رح
شهقت .. واااااااااااو ألف لي انا
بس من الخوف من الهيئة عييت
رايد = لا
سكت نايف معصب وراح
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
فاصل إعلآني ^_^ / ..
جميع الحقوق محفوظة لي .. لا احلل مسح اسمي مع على الرواية ..
تجميعي : ♫ معزوفة حنين ♫..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
* الجـــزء الثامن *
* عمر *
الاحد .. في الجامعة
دخلت الكفتريا وانا متضايق من امتحاني اليوم ... مدري وش فيني امتحاناتي كل يوم خايسة
جلست على الطاولة من دون مااطلب وحطيت يدي على خدي ... البارح طوال الليل احاول اذاكر بس التفكير برايد وحالته اشغلتني
يقول عمه باع بيتهم ... واخذ راتب ابوهم ... وفوق هذا مانعه من الدراسة ... ليش عمه مانعه من الدراسة عشان المصروف والا فيه سبب ثاني ...
والمشكلة الحين يبي وظيفة ... هو صح محتاج للوظيفة بس مين بيوظف بزر بالله ...
انتبهت لنفسي .. انا ليش افكر فيه ومشغل بالي ... كيفه يدبر عمره ... قمت وطلبت قهوة وجلست على الطاولة انتظر مشعل
ربع ساعة وجا مشعل ومنصور عندي بالكفتريا ... وبعد السلام والسؤال ... التفت منصور لي
منصور = وينك امس اختفيت ؟
عمر = رحت للبيت اذاكر ... لو اذاكر عندكم بالاستراحة عز الله ما ذاكرت شي
مشعل باستهزاء = عاد يقالك حليت زين بالامتحان ؟
عمر = ههههههههههه لا تبي الصدق ماحليت هههههههههههههههه
مشعل = ايه انا ادري هههههههههه
منصور = امس طوال الوقت اتصل عليك ... ليه ماترد علي
التفتت لمنصور
عمر = اشوفك تتصل بس مالي نفس ارد ( وتنهدت بحزن ) بيتي كئيب ... تتعب نفسيتي اذا دخلت البيت ... موحش ماني قادر اصبر
منصور = الله يعينك ...
طالعت منصور
عمر = ليه وش كنت تبي امس متصل ؟
منصور = رايد
قطبت حواجبي مستغرب
عمر = وش فيه ؟
منصور = البارح جاني رايد يبي سيارتي معطيه نايف 200 ريال عشان يجيب لهم الهبال اللي يشربونه ...
طيرت عيوني
عمر مصدوم = صاحي هذا والا مجنون ... ياخي نايف وسعد بينكبوننا ... الهيئة شاكه باستراحتنا .. بدل مايخففون الشراب يرسل بزر محتاج .. ياخي ودي اطرد نايف وسعد عنا قبل نتورط معهم
مشعل = عمر نبيك تنتبه لرايد
التفتت لمشعل مستغرب
عمر = كيف يعني انتبهله ؟
مشعل = انت معه اربع وعشرين ساعة ... ونخاف يجونه نايف وسعد من ورانا ويرسلونه يجيب لهم
عمر = وليه ماتنتبهله انت ... مين اللي جابه للاستراحة انا والا انت
مشعل = انا ... بس انت معه بالاستراحة طوال اليوم ... انا عندي اهلي اروح لهم
عصبت على مشعل
عمر بعصبية = وش قصدك ... تقصد انا مالي اهل ... شكلك شايف نفسك علينا
طالعوا بعض منصور ومشعل مستغربين والتفتوا لي مرة ثانية
مشعل مستغرب = وش فيك عمر ... ماهو هذا قصدي ... انا اقصد انك قليل تروح لبيتكم
التفتت عنه متضايق مدري وش فيني عصبت عليه ... حسيت بغيرة شوي يوم قال اهلي ...
منصور = وش فيك عمر شبيت على مشعل ...
نزلت راسي وهمست
عمر بحزن = مافيني شي ( ورفعت راسي اغير الموضوع ) المهم مافيه وظيفة تصلح لرايد ... الولد يبي يتوظف ويعتمد على نفسه
منصور = ومن بيوظف واحد توه تخرج من المتوسط ... لعب بزارين هو
عمر = قلتله ... بس الولد مثل مانت شايف محتاج وماعنده حتى ريال واحد .. ماتعرفون واسطة شي ؟
سكتنا شوي نفكر وبعدها رد مشعل علي بحماس
مشعل بفرح = صح تعااااالوا .. خله يقدم على الضمان الاجتماعي ... يصرفون له راتب وبالراحة بعد
عمر مستغرب = الضماان الاجتماعي ؟
منصور بفرح = صح جبتها ... من شروط الضمان الاجتماعي يصرفون للولد لين يجي عمره 18 وللبنت لين تتزوج ( والتفت لي ) خله يجيب اوراقه الثبوتيه
ابتسمت
عمر بابتسامة = يعني رايد واخواته كل واحد يصير له راتب ... اجل رايد بيصير اغنى منا ههههههههههه ... ( والتفتت لمشعل ) انت بنفس حارتهم علمني وش كبر اخواته عشان اخذ رايد للضمان الاجتماعي يقدم عليهم
مشعل وهو يفكر = اممممم شفت اخته دانه صغيره عمرها 4 او 5 سنين .. واخته الكبيرة مادري كم عمرها بالضبط بس ماهي متزوجة ... كلهم ينطبق عليهم شروط الضمان
منصور = خله يجيب اوراقه الثبوتيه وشهادة وفاة ابوه وامه على ما اعتقد
جلسنا شوي نسولف وبعدها كل واحد راح لمحاظراته
الساعة 12 الظهر
طلعت من الجامعة ورحت لبيتي عشان ابدل
وصلت عند بيتي ولقيت سيارة عمي واقفة قدام البيت ... ابتسمت امي وعمي هنا
دخلت وفعلا لقيت البيت فيه حركة ولمباته والعه وريحة امي اللي اميزها داعبة انفي
سكرت الباب بصوت عالي عشان امي وعمي يعرفون اني جيت
ومثل ماتوقعت طلعت امي من المطبخ اول ماسمعت صوت الباب
امي = هلا بوليدي عمر ... جيت ؟
عمر = هلا فيك ( وقربت عندها وسلمت على راسها ) يمه مايحتاج تتعبين نفسك البيت والله نظيف ... اصلا مافيه احد يوسخه
امي = البيت اتركه اسبوعين ارجع القاه على حاله بس مغبر ... وسريرك على ترتيبي له ... ماتعلمني انت وين تنام ؟
عمر = انام باستراحة الشـ ( وسكتت شوي يوم شفت اللي طلع من المطبخ والتفتت لامي ماسك اعصابي ) هذا وش جابه هنا ( واشرت على معاذ اللي طلع من المطبخ ومعه موزة ياكلها )
التفتت لمعاذ وصارخت عليه
عمر معصب = هييييه انت وش دخلك هنا
رفع معاذ يده يغيضني
معاذ = هاااااي ( وراح للصاله متجاهل كلامي )
مسكت امي ذراعي
امي = معاذ هو اللي جايبني
التفتت لامي معصب
عمر بعصبية = ومالقيتي الا هذا يوصلك
ورحت للصاله وشفت معاذوووه جالس على الكنب و معه الريموت ويغير بالقنوات
عمر = هييييه انت تحسب نفسك ببيتكم ... مكانك مجلس الرجال وماتتعداه
معاذ وهو ياكل = لا يكون لك اخوات بالبيت وانا مدري ...
عضيت على شفايفي منقهر ... فعلا مالي اخوات ولا زوجة يخلون هالاشكال تحترم نفسها وماتدخل بيوت الناس
عمر بصراخ = خلاص وصلت امي اقعد بالمجلس لين تخلص والا رح لبيت جدي ياخي ... لا تقعد تتمشى ببيتي من غرفة لغرفة
ضحك معاذ يغيضني
معاذ = ههههههههاااي حلوووووة بس لا تعيدها
عصبت اكثر وهجمت عليه وعطيته بوكس بردت كبدي شوي ... مسك معاذ يديني الثنتين وجلسني على الكنبه غصب وجلس علي وردلي البوكس
جت امي وهي تصارخ علينا باسامينا
لفيت يديني حولين خصر معاذ ودفعته عني وطرحته بالارض وطحت معه على الارض فوقه ... اعتدلت جالس على بطنه بس سمعت صرخت امي علي
امي بصراخ = عممممممممممممر بس خلااااص قم عنه ( وحسيت بضربة امي الخفيفة على ظهري ) قم عنه ( ومسكتت ذراعي تجرني ) بس انت واياه مالي حيل افرقكم
قمت عن معاذ عشان امي بس
عمر = والله لولا امي لوريتك شي ماشفته
قام معاذ وجا بيرد علي بس صارخت علينا امي مرة ثانية
امي معصبه = ماكأنكم عيال عم ... خلني اسمع صوت واحد منكم
وراحت للمطبخ معصبة
طالعنا انا ومعاذ بعض بحقد .. وجلس كل واحد على الكنب بعيد عن الثاني
حطيت يدي على فمي لما حسيت بدم ببرطمي .. فجأة حذف معاذ علي قرشت الموزة اللي كان ياكلها وطاحت بحظني ... اخذتها وحذفتها عليه .. رجع معاذ وحذفها علي
فجأة دخلت علينا امي واخذت قرشت الموزة من يدي
امي = اللي بالابتدائي اعقل منكم
وراحت وهي الى الحين معصبة ... طالعت امي وشفتها متوجهه للدور الفوقي قمت واخذت شماغي الطايح بالارض بسبب الهوشة بس انتبهت ان الشماغ لمعاذوه رميت الشماغ بعيد ورحت للشماغ الثاني الطايح بالارض ورحت ورا امي فوق
عمر = يمه ...
التفتت لي امي ووقفت
عمر = يمه ابروح لجدي تروحين معي احتريك ؟
امي = لا ... ابروح الحين لبيتي ... عمك مسافر وبكرة عندي موعد بالمستشفى وابي ارتاح شوي قبل اروح للموعد
عمر = ليه يمه سلامات
ابتسمت امي وسكتت شوي وبعدها ردت
امي بابتسامة = مواعيد عادية وانا امك ...
وراحت ... وقفت مستغرب اطالعها وهي رايحة ... مافهمت كيف يعني مواعيد عادية
ربع ساعة وطلعت امي والزفت اللي وصلها رايحين لعنيزة
رحت للمطبخ واخذت كيسه كبيرة وحطيت كالعادة كل الاغراض اللي بالثلاجة اللي تجيبهم امي معها عشاني
من يوم دخل رايد الاستراحة قضى على كل اللي بالثلاجة خلال يومين بس
ياكل واجد وفوق هذا ماهو مبين عليه ... عصاليك شوي ويختفي
دخلت الاستراحة وانا احط يدي على جبهتي ... مدري وش فيني اليوم احس حرارتي مرتفعه
دخلت المطبخ ولقيت رايد فاتح الثلاجة وماسك بطنه
واول ماشافني فرح .. او بالاصح اول ماشاف اللي بيدي فرح
جا واخذ الكيس مني وفتحه
رايد = جوعااااااااااااااااااااان مرة
عمر = وانت اصلا متى قلت ماني جوعان ... من يوم عرفتك وهذي كلمتك
وطلعت من المطبخ ورحت لغرفة التلفزيون وجلست على الكنبه تعبان
تبعني رايد ومعه الكيس وجلس على الارض وبدا ياكل من الفواكه
عمر = هيييييييييييييه انت ود الكيس للثلاجة وخذ منها اللي تبي ... مو تجيب الكيسه كلها هنا
رايد = مافيه غدا جوعان .. اليوم مافطرت ولا تغديت
عمر = تعشيت امس مع الشباب ؟
رايد = ايه
عمر = خلاص يكفي اجل .. المهم رايد انت تقول تبي وظيفة صح ؟
التفت لي رايد بلهفة
رايد = ايه ابي
عمر = يقولون الضمان الاجتماعي يصرف لك راتب لين يوصل عمرك 18 سنة ولاخواتك لين يتزوجن
قام رايد فرحان وجا عندي
رايد بفرح = والله ... يعني بيصير لي راتب بدون ما اشتغل
عمر = ايه بس لازم كرت العايلة ... وانت ماجبته لي يوم طلبته منك
ارتبك رايد شوي ونزل راسه وسكت
عمر مستغرب = وش فيك ...
رفع رايد راسه والتفت لي
رايد بزعل = عمي يمكن يعيي يعطيني كرت العايلة حقنا
رفعت حاجب واحد
عمر = الحمد الله والشكر مب على كيفه ( وقمت واقف ) انا ابروح لجدي الحين قم معي اوصلك لبيتكم تاخذ اوراقك ... قم يله تأخرت عن جدي يحتروني
طلعنا من الاستراحة ورحنا لحارة جدي ... وطوال الطريق وانا افكر كيف اكلم جدي عن موضوع الزواج ... اخاف يعيي علي لين اتخرج ... باقي لي ثلاث سنين على التخرج ماني قادر اتحمل الوحدة ثلاث سنين
دخلت الحارة بالسيارة وانا افكر اقول لعمتي مها تكلم جدي والا اكلم جدتي احسن ... والا اكلم امي اشوف رايها اول وبعدين اكلم جدتي
= هذي دانه
انتبهت من سرحاني على كلمة رايد والتفتت له مستغرب
لقيته يفتح الدريشة وطلع راسه وصاح
رايد = دااااااااااااااااااانه ( والتفت لي ) وقف وقف ابنزل
وقفت بسرعة بنص الحارة ونزل الاخ على طول
عمر = هييييه وش فيك
بس مارد علي .. ركض متوجه لبنت صغيرة تبكي
عمر بهمس = وش فيه هذا انجن
مشيت بالسيارة ووقفتها قدام بيت جدي ... نزلت وتوجهت لرايد والبنت الصغيرة اللي شايلها وقربت عندهم
عمر = مين هذي ... اختك ؟
رايد = ايه هذي اختي دانه ( والتفت لها ) وش مطلعك الظهر وليش تبكين
تكلمت دانه وهي تبكي بس ماميزت من كلامها شي
عمر = وش تقول ... وش فيها ؟
رايد بقهر = تدور فلوس ضاعت منها .. تقول عمتي مرسلتها للدكان بس ضيعت الفلوس بالشارع
دانه وهي تبكي = انا خايفة تضربني ( وغطت وجهها برقبة اخوها تبكي )
راح رايد يتلفت ويدور الفلوس تحت السيارات وهو شايل دانه
حطيت يدي على جبهتي دايخ من حرارة الشمس ... مدري وش فيني اليوم تعبان
رحت لرايد بملل
عمر = وعمتكم مالقت احد ترسله الا اختك
التفت رايد لي
رايد بحزن = ماشفت شي
عمر = قلها وش تبي عمتكم من الدكان ؟
سألها رايد نفس سؤالي
دانه وهي تبكي = حليب
طلعت من جيبي قيمة الحليب ومديته على رايد
عمر = رح هات من الدكان حليب وعطني دانه لين تجي
اخذ رايد الفلوس وعطاني دانه وراح يركض للدكان
شلت دانه بين يدي ... وابتسمت هذي اول مرة اشيل بنت صغيرة ... حبيتها على خدها ... كم قالوا عمرها ... صح تذكرت اربع سنين .. تأملتها وانا ابتسم .. شعرها قصير وناعم بس واضح انه مبهذل شوي
رحت لسيارتي وركبتها ودانه معي
عمر بابتسامة = خلاص لا تبكين الحين يجي رايد ومعه حليب تعطينها عمتك
طالعتني دانة بعيون دامعه وساكته .. تشبه رايد شوي ومعصلكه مثله ... تحسست اكتافها وظهرها بيدي ... ياربي وش هذا .. البنت عظام .. احس بمفاصل عظامها شوي وتتقطع .. مثل اخوها بالضبط .. رايد احس بعظامه اذا لمسته
عمر = وانتي تبين شي من الدكان ؟
دانة = انا جوعانه
رفعت حواجبي ... وش قصتهم هذولي مع الجوع
عمر مستغرب = ليش ماكلتي شي ؟
دانه = اكلت شوي بس ( واشرت بيدها ) بندر شرالي من المدرسة
عمر = مين بندر ؟
سكتت دانه وماردت علي
رفعت راسي وطالعت بيت عم رايد ... جيران جدي ما اعرفهم زين ... بس كأني مرة سمعت جدي وهو يتكلم عن احد جيرانه وكأني سمعته يقول ابو بندر بس وقتها ماهتميت
فجأة فتح رايد الباب علينا
رايد = يله دانه روحي للبيت ... ولا تطلعين مرة ثانية لحالك عشان ماتضيعين
نزّلت دانه من الباب اللي عندي وراحت لرايد واخذت الكيس منه وتوجهت لبيتهم
نزلت وقربت عند رايد
عمر = عمك وش يقاله ابو من ؟
رايد = ابو بندر .؟
عمر = ووش كبره بندر ؟
رايد = برابع ابتدائي
عمر = طيب يله رح هات كرت العايلة حقكم عشان نروح للضمان الاجتماعي تقدم عندهم .. وانا ابروح لجدي الحين
ورحت متوجه لبيت جدي ... التفتت على رايد قبل ادخل البيت ولقيته يتسلق جدار بيتهم
معقول عمهم حارمهم حتى من الاكل .. ياخذ فلوسهم ويبيع بيتهم نقول تحصل كثير اما يمنعهم من الاكل مو معقول مايدخل العقل ابد ... ودي اسأل عمتي مها وش قصة هالعايلة
دخلت بيت جدي ولقيتهم يحتروني على الغدا
مها = اخيييييييييييييرا شرفت ... ليش تأخرت
رحت وسلمت على جدي وجدتي وانا احس براسي يعورني وجلست بتعب
عمر = مريت بيتي شوي وجيت
بعد الغدا كل واحد راح لغرفته يقيل ... رحت فوق لغرفة مها وفتحت الباب عليها على طول ولقيتها جالسة على سريرها و تطقطق بالاب توب
عمر = مها ( وجلست بجنبها على سريرها ) وانا داخل الحارة شفت بنت صغيرة تبكي اسمها دانه تعرفينها ؟
التفتت مها لي
مها مستغربة = دانه ! ... ايه هذي ياعمري عليها ساكنها مع عمها الكلب ... بس ليش تبكي ؟ وهي بعدها بالشارع ؟
عمر = لا دخلت بيتهم
مها مستغربة = ليه تبكي ؟
عمر = مدري بالضبط بس تقول مضيعة فلوس عطتها عمتها تجيب لها اغراض من الدكان ... مها انتي تعرفينها بالضبط
مها = دانه واخوانها يكسرون خاطري انقهر لما اسمع حالتهم ... هذا الله يسلمك بنتين وولد جوا عند عمهم بعد ماتوفى ابوهم وامهم ... بس الله لا يوفقه عمهم بخيل عليهم وعمتهم بعد قشرا معهم ... هذي البنت الكبيرة صايرة خدامه عندهم ودانه مهملينها حسبي الله عليهم والولد اسمه رايد ... ابوي امس جا معصب على ابو بندر حسبي الله عليه
عمر مستغرب = ليه ؟
مها = ابوي يقول الولد ضايع مايدرون وينه
رفعت حواجبي
عمر = كيف يعني ضايع
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك