رواية مأساة بلا دموع -4
سعد قام بسرعة وجلس جنب منصور : احــــــلـــف..؟؟؟!!!!!!!!
منصور : أذلـــــــــــــف...!!!!!!!!!
هشام : صدق والله ....؟؟؟
منصور : هههههههه والله .. والخميس الملكة...
مهند : لا عاد... هذا اللي ضد العرس... هاه..؟؟؟
منصور : لا الله يهديك.. الاهل لزمو علي..
سعد بنص عين : الاهل.... هاه؟؟؟؟؟؟
منصور : وش فيكم ؟؟؟ والله الاهل... وبعدين الواحد وده يريّح ويستقر..!!
سعد رافع حاجب : يستقر ( يقلده ) ...!!!! قول... قول من الاول...!! ومن بنته هاللي بتخليك تستقر..؟؟
منصور : بنت عمي...
مهند : أيــه.. قل من البداية... ( ويغير نبرة صوته.. ويغمز بعينه ) شايفها...
منصور بابتسامه واثق : اكييييييييييييييد..!!
الشباب كلهم انفجرو ضحك...والكل قام يسلم عليه ويبارك له.. وقررو يطلعون بدون منصور... اللي بيلحقهم الجمعة...
الجزء الرابع
عفاف كانت فرحتها اليوم ما توصف.. اتصلت في وفاء وعرفت عن خبر رجوع عبدالعزيز... وبعدين فرحت ان العنود صحتها تمام وبتجي بكرة للكلية بعد مرضها اللي خلاها ما تداوم ثلاث ايام... وبعد ريم بنت عمتها جت لهم.. ريم اللي تموت فيها عفاف... وفي رقتها وانوثتها... واللي يشوفها.. ما يقول بنت في الثانوي.. بالعكس سوالفها وطريقة كلامها تخلي الواحد يعتقد انها في الجامعة.. مثقفة وعاقلة وما تحب تحش في اعراض خلق الله مثل باقي البنات.. ومطلعه وتحب تقرا.. وهذا اكثر شئ يعجب عفاف فيها... ودايما تحسها قريبة منها...
بعد ماراحت ريم... والبنات تفرقو كل وحده في غرفتها.. نزلت عفاف تحت فرحااااااانه بتقول لامها وابوها عن خبر رجوع عبدالعزيز... عبدالعزيز اللي يحبه ابوها ويعزه ويعتبره واحد من عياله...
.
.
.
بعد ما قفلت من صديقتها... وتكلمو عن زواج صديقتهم حصة... وترتيبهم للروحه.. كانت غادة ما بعد فصلت فستان.. وعهود تلح عليها يلبسون مثل بعض... لكن غادة رفضت.. ما تدري ليش..؟؟!!! لكنها رفضت وقالت كل وحدة تلبس على ذوقها احسن...
جلست غادة تعيد كلام عهود... عن سعود وتفكيرها فيه...
معقولة حبي لسعود يكون مجرد اعجاب..؟؟
اويمكن يكون من طرف واحد..؟؟
معقوووولة..؟؟
لالالالالا مستحييييييل..
اصلا حبه في قلبي من وانا صغيرة نما معي.. وكبر في داخلي..وظل معي طوال هالسنوات.. وفي الاخير يطلع مجرد اعجاااب..!!! لالالا...وبعدين مي عارفه... واكيد قالت له..
وهي على هالحال... رامية نفسها على السرير.. وتفكر.. حست باحساس عمييييق... صوت من داخلها..
" عفاف ".. اكيييد عفاف فيها شئ...
و قامت بسرعة وطلعت من الغرفة... متجهه لعفاف...
.
.
.
توها بتدخل للصالة... ووقفت متصنمة وهي تسمع الكلام الداير بين امها وابوها... وما تدري وشلون توقف على رجليها...
ابو يوسف يصوت عالي : كلمة وحدة وما راح اثنيها...
ام يوسف تقاطعة : بس الله يهديك.. هذا مو وقته.. والبنت لازم ناخذ رايها...
ابو يوسف بعصبية : قلت لك.. سامي رجال وما ينرد..!!! اعرف ابوه زين ما زين..!!!
ام يوسف : ما قلت شئ فيه... بس مهما كان.. لازم البنت توافق اول...
ابو يوسف : وعفاف وين بتلقى واحد مثله..؟؟
ام يوسف : بس..
ابو يوسف : لا تقعدين تبسبسين لي... سامي بياخذ عفاف.. يعني بياخذها.. وانا عطيت الرجال كلمة... وما راح اتراجع عنها..!!!
ام يوسف سكتت.. وما عرفت ترد عليه.. صوته كان عالي.. وهي ما تبغاه يعصب زيادة ويقلب البيت فوق تحت...
ابو يوسف يقوم بيدخل ينام...وقف والتفت : اسمعي..تراه علمٍ يوصلك ويتعداك....!!!!!!!
وراح...
ام يوسف جالسة مكانها متسمرة.. " وش يقصد...؟؟ الحين انا اللي باقوي بنتي عليه..؟؟ انا اللي ابغى لبناتي الستر.. يقولي هالكلام...؟؟ ورفعت راسها تداري دمعتها..وهي تدعي ربها انه يطمنها على عيالها..وخاصة بنتها... مهما كان هذي عفاف.. الغــالية... ومستحيل تتزوج بدون موافقتها..
.
.
.
عفاف... ما كانت مستوعبة لكل اللي سمعته... ما تدري اهي في حلم ولا حقيقة... معقووولة.. صرت رخيصة عند ابوي..؟؟ لهالدرجة صارت الامور بس مادة..؟؟ وكأننا في مزاد..؟؟
ابوي.. ووقفت لحظة تستعيد هالكلمة.. " ابوي " ياللــــه.. خلاص ما عادت لي قيمة..؟؟ كذا يابوي هنت عليك.. صرت كأني سلعة.. تباع وتشترى..!!!
انا اتزوج..؟؟
وعبدالعزيـز...؟؟؟؟؟ يا فرحتك فيني.. يوم ترجع وتحصلني صرت لغيرك..!! يوم تقول لوفاء انك لـــي وانا لـــك..!!!
التفت بتطلع الدرج ووجهها مليان دمووووع ويالله تقدر تشوف... وتحصل غادة قدامها... ارتمت في حضنها... وصارت تشهق بصياح يقطع القلب.. طلعت فيها غادة لغرفتها.. وجلست تهدي فيها..
غادة : خلاص فوفو حبيبتي.. للحين ما صار شئ وانتي كذا.. اجل لو يصير الكلام صدق.. وش راح تسوين...؟؟؟
عفاف رفعت وجهها لغادة ودموعها تنزل بدون توقف وكأنها تقولها " وشلون عرفتي؟؟؟ "
غادة وهي تمسك يدها بحنان : عفاف انا سمعت ابوي... وعرفت اللي صار.. عشان كذا اقولك لا يهمك..!! اذا الله كاتب لك هالزواج بيتم.. ولاّ ( وبابتسامه ) مستحيل يتم لو اجتمع له كل اهل الارض..!!!
عفاف كانت ساكته وما ينسمع منها الا انات تقطع القلب..
فترة مرت...
قطعتها عفاف بصوت يالله ينسمع : غـ..اا..دة.... الله يـخلــيك... قولي لهم ما ابيييييييييييه.. ما ابيييي اتزوج....!!!
غادة : عفاف.. حبيبتي.. انتي عارفة انه ما احد يقدر يجبرك على شئ ما تبينه...
عفاف وعيونها في حضنها : وعبد العزيز..؟؟
غادة وكأنها فهمت اختها جت جنبها على السرير: اذا لكم نصيب بتاخذونه...وبعدين يوسف مستحيل يرضى... انتي نسيتي عبد العزيز وش يعني له..؟؟
عفاف هزت راسها بايجاب...
غادة : يالله فوفو.. حاولي تنامين.. وان شاء الله ما يصير الا اللي يرضيك..!!
وطلعت من الغرفة بعد ما سكرت الباب..
عفاف ظلت وقت تطالع الباب اللي تسكر وراء غادة... وتفكر في كلام اختها... ودموعها للحين ما وقفت وهي تشوف نفسها مطعونه من ابوها... اللي ياما حبها... وفضلها على الجميع... وكانت الغاليه عنده... لهالدرجة رخصت عنده..؟؟ آآآآآه يالزمن...؟؟ وش مخبي لي بعد..؟؟ الله يعيني ...؟؟
بعد فتره.. قامت وتوضت وراحت تصلي التهجد.. اللي من عرفت العنود وهي ما تركته.. لكن هالمره كانت لذة المناجاة احلى بكثير.. وهي تستشعر قربها من الله عز وجل.. وكأنها بنجواها تطرح همها على واحد احد.. بكت في هالليله وهي تدعي ربها يكتب لها اللي فيه خير.. وييسر لها امورها.. ويوفقها في حياتها..
استمرت لفترة تصلي وتدعي.... وما انتبهت لنفسها الا و النوم يغالبها... وكأنه منقذ لها من هالتفكير..
ونامت وهي ما تدري وش بكره مخبي لها.....؟؟؟!!!!!!!
.
.
.
وش ذا الكلام يمه..؟؟ معقولة انتي تفكرين كذا..؟؟ "
كان هذا صوت هدى وهي معصبة على طريقة تفكير امها... ومحاولاتها الفاشلة للسيطرة على العائلة... وفي الاخير تبي بنتها تتزوج يوسف عشان تضمن الحلال.. على قولتها..!!!
ام معاذ وهي تجلس جنب بنتها : بس وطي صوتك لا احد يسمعنا...
هدى : لا خلهم يسمعون وش قاعدة تخططين له..!!!
ام معاذ وهي تقرب من بنتها وتكلمها بهدوء : الله يهديك بس.. الحين انا اللي ابي مصلحتك صرت اخطط...
هدى بتوتر : أي مصلحة من وراء هالزواج...؟؟ انتي عارفة يوسف اكبر عني بكم سنة..؟؟!!!
ام معاذ : ما هو مهم العمر... اذا الرجال ما يعيبه شئ.. ( وتطالعها بعين حمرا) وبعدين تعالي.. انتي وين بتحصلين لك واحد مريش وولد نعمة مثل يوسف.. هاه.. ما تقولين لي..؟؟
هدى : اووووه يمه.. اللي يشوفك يقول هذا هو واقف بالباب ينتظر الاذن..!!!
ام معاذ : ما عليك... انتي بس وافقي... وخلي الباقي علي...!!!!!
هدى بنظرة استغراب : أي باقي يمه..؟؟
ام معاذ بقلق : هاااه... وشّو باقيه.. لا قصدي انتي ما عليك منه... بس اهم شئ توافقين..!!
هدى بضيقة : اذا جا يصير خير...!!!!
وقامت وطلعت لغرفتها قبل تسمع الرد... وتاركة امها وراها تغلي من غيضها وقهرها على بنتها اللي ما هي راضية تطيعها في اللي تبي تسويه...
************
اليوم الثاني الصبح.. الكل تجمع على الفطور..
ام يوسف تكلم امل : اشربي حليب احسن لك من هالشاهي..
امل : عارفة.. بس ما احبه.. وش اسوي..؟؟
ابو يوسف : خليها على راحتها...( ويلتفت على ام يوسف ) الا وين يوسف ما شوفه جا يفطر..؟؟
ام يوسف : طلع مبكر.. يقول اليوم عندهم رحلة للطلاب وهو بيطلع معهم..
نزلت سارة وصبحت عليهم... وجلست...
ام يوسف : وين خواتك ما نزلو يفطرون..؟؟
سارة : شفت غادة من شوي راحت لغرفة عفاف.. اكيد بينزلون بعد شوي...
.
.
فوق وبالتحديد في غرفة عفاف كانت غادة جالسة تقنع عفاف تنزل تفطر... وتنسى اللي صار ولو شوي..
غادة : يالله عاد عن السخافة... قومي خلينا ننزل نفطر..والله ميته جووووع
عفاف بملل : روحي احد رادك..
غادة : يووه منك... الحمد مكلفه على نفسي اجي لعندها وتطردني... بس ما عليه مقيوله " خير تعمل..شر تلقى " وقامت بتطلع..
عفاف تلومت في اختها وقامت بسرعة عشان تلحق على غادة قبل تنزل..وتحاول تكون متماسكة باي طريقة.. وفي داخلها.. براكين تغلي.. لكن ما في يدها حيلة..
.
.
مهند : يالله انا طالع.. توصون على شئ..؟؟
ام يوسف : ما راح تاخذ بسام معك..؟؟
مهند : ليش وينه الحين...؟؟ اكيد نايم الاخ ولا على باله..
ام يوسف : باروح اشوفه لك..
مهند : لا تعبين نفسك يمه.. هذا نومه ثقيل.. وعلى بال ما يصحى ويلبس وينزل يفطر.. باكون انا وصلت الجامعة...
ام يوسف : الله يحفظك يا وليدي ويوفقك.. وعن السرعة وانا امك.. ترى ما فيها بركة..
مهند ويحب امه على راسها : ابشري يالغالية.. ما يصير خاطرك الا طيب.. مع السلامه..
طلع مهند من هنا.... ودخلو عفاف وغادة من هنا...
غادة : السلام عليييييكم...
عفاف : صباح الخير..
الكل : وعليكم السلام..
عفاف لاحظت عدم وجود ابوها.. ارتاحت نسبيا.. وسمت بالله وبدت في الفطور..
غادة استانست يوم شافت اختها تاكل.. كانت تحبها.. وتخاف عليها.. لان عفاف محبوبة من الكل باخلاقها وصفاتها الطيبة... و ارتاحت اكثر يوم شافتها تبتسم لامها وخواتها اذا كلموها...
.
.
.
في السيارة
غادة وعفاف مع السواق اللي دايما يمر على وفاء بنت عمهم ويوصلونها معهم.. بعد ما نزلو امل وسارة وهم في طريقهم لبيت عمهم.. التفت غادة على عفاف..
غادة بتردد : اقول عفاف..
عفاف : هلا غادة فيه شئ..؟؟
غادة : لا.. بس حبيت اسألك.. مزاجك تمام..؟؟
عفاف وحست بقلق اختها عليها : شوفي ياغادة انتي اختي صح..؟؟ وتعرفين عني اغلب طباعي وتصرفاتي.. لكن اللي ما تعرفينه.. اني انسانه ما احب احد يرحمني.. او حتى ينظر لي بنظرة شفقة بما فيهم اهلي..
غادة : بس انا مو قصدي..
تقاطعها عفاف : انا فاهمتك.. يعني لا تخافين ما احد راح يحس باللي صار..
غادة بابتسامه : تعرفين ياعفاف كنت متوقعه غير كذا.. ومجهزه لك خطبه طول بعرض.. بس زين اختصرتي علي الله يعااااافيك..ههههههه
عفاف : ههههههه
بانتهاء حوارهم اللي ما طال.. كانو واصلين لبيت عمهم.. ووفاء تستعد تركب معهم..
وكملو طريقهم باتجاه الجامعة..وكل وحده بامال عريضة ما تدري كيف الايام بتمر واللحظات بتنقضي...
***************
بعد ما طلع الكل..رجعت تنام لها كم من ساعة..وعلى الساعة عشر طلعت من غرفتها.. طبعا البيت فاضي.. اللي في الدوام.. واللي في الجامعة او المدرسة..
وصلت للصالة وفتحت التلفزيون.. وظلت فترة تطالع بدون ادراك للي يعرض.. تفكر في حال زوجها.. من فترة مو طبيعي.. صاير عصبي وملول.. وعلى كل كلمة يتنرفز.. وفي الاخير يبغى بنته تتزوج غصب... استغربت اكثر من تمسكه الشديد في هالشخص.. واصراره على زواج عفاف من سامي.. بالرغم من انه ابدا ما يرضى عليها.. هي الوحيدة اللي يخاف عليها ويحبها اكثر عن خوانها.. ومستحيل ترخص عنده بهالسهولة..
قطع تفكيرها الخدامة تسألها عن الغدا.. ووش تسوي فيه..
عصبت عليها.. مو منها بس من الضيقة اللي فيها ومسكينة الخدامة جت الضيقة فيها : والله فاضية..!!! احنا من متى نسوي الغدا من الحين.. اذلفي عن وجهي لاوريك شغلك..!!
راحت الخدامة المسكينة.. ورجعت ام يوسف لتفكيرها.. بس مزاجها تعكر زيادة.. قامت للتلفون ودقت ارقام بيت امها.. في محاولة منها للتخفيف من توتر اعصابها..
ام يوسف : السلام عليكم..
ام خالد بصوت عفا عليه الزمن : وعليكم السلام..
ام يوسف : هلا يمه.. وشلونك..؟؟
ام خالد بفرحة : هلا يا بنيتي.. والله الحمد لله ما نشكي باس..
ام يوسف : الحمد لله يمه وشلون صحتك ان شاء الله احسن.. عساك تاخذين الدواء وتاكلين زين..
ام خالد : يالله لك الحمد والشكر ياربي افضاله مغطيتنا.. والله يا بنيتي هالخدامة ماهي مقصره معي الله يجزاها عني خير..
ام يوسف : الحمد لله
ام خالد : وشلون عيالك طيبين..؟؟ وابو يوسف عساه بخير..؟؟
ام يوسف : كلهم بخير ما عليهم..ويسلمون عليك ( وتحاول ما تجيب طاري العريس ) .. الا يمه ماودك تجين عندنا هالاسبوع.. والله البنات ودهم بشوفتك..
ام خالد : يا بنتي تعرفيني تعيبانه.. ومالي بالروحه والجيه.. والمشاوير وانا امك تتعبني.. الا انتو اللي تعالو عندي الربوع والخميس..
ام يوسف : باشوف العيال كان ما وراهم اختبارات..
ام خالد : ايه وانا امك خلكم تتونسون شوي وتوسعون صدري بعد..الا يابنتي اختك وشلونها ما تشوفينها..؟؟
ام يوسف : الا وهي تسلم عليك.. بس زوجها مشغول شوي هاليومين ويالله تطلع..
ام خالد : ايه.. قوليلها تجي بالعيال معك هالقاطعة.. من اول رجلها والحين اهي..
ام يوسف : ههههه.. ان شاء الله يمه باقول لها..
ام خالد : ايه.. الله يهديهم ويصلحهم..
ام يوسف : يمه وشلون جارتك ام سالم..؟؟
ام خالد : ما عليها جعلها سالمه من كل شر.. هذي الغالية الله لا يخليني منها..
ام يوسف ( تضحك على امها ) : ههههههه..امين.. وش فيك يمه كأنك ما صدقتي اسألك عنها !!
ام خالد : من غلاها يا بنيتي علي.. والله انها ما تقصر علي في شئ.. الله يحفظها ويخلي لها عيالها..
ام يوسف : امين يارب.. الله يخليكم لبعض..
ام خالد : ودعتك الله يابنتي باروح اصلي الضحى..
ام يوسف :الله يحفظك.. واهتمي بعمرك يمه..
ام خالد : ماعلي شر ان شاء الله .. فأمان الله..
ام يوسف : مع السلامه..
*******************
البنات في كليتهم في طريقهم لقاعاتهم ...
هند : يا ربي زهق هالدكتورة ماخذها في نفسها مقلب.. مدري وش عليه..؟؟
العنود : يا عمري ما شفتي اللي قدام كيف يمدحون فيها.. وهي مصدقة ان كل هذا فيها..هههههه
هند : لا عاد كل شئ ولا هذيك اللي كل يوم والثاني طالعة بامر جديد...
وفاء : مين...؟؟
العنود : ومين يعني غير سارة.. اللي مع كل محاضرة فاتحة موضوع جديد.. ومطوله السالفة.... وش نسوي في البحث..؟؟ ومتى..؟؟ وكيف..؟؟ واللي يسمعها يقول حافظة كل ادوات الاستفهام...ههههههه
هند بنقمة : لا.. واللي يقهرك.. اذا جت الدكتورة تطلع قالت وتقلد حركات مريم باسلوب مضحك.. " دكتتتتوووورة لووو سمحتي " هههههههههههههه
البنات : ههههههههههههههههه هههههههههههههه
وهم يضحكون شافو شلة جميلة جاية لهم فوقفو وكل وحدة تطالع الثانية...
جميلة : هــاي صبايا...
هند : اهلين..
وعفاف تطالع فيها لكنها ساكته..
جميلة : العنود ممكن شوي..؟؟
العنود وهي تمشي لها : هلا جميلة... بغيتي شئ...؟؟
جميلة تبغى تذل العنود : لا سلامتك.. بغيت أناديك عشان اتفرج عليك...؟؟ هههههههه
وكل شلتها صارو يضحكون معها بشكل استفزازي.. العنود ما تحب هالاسلوب بس قالت نشوف وش آخرتها معهم..
العنود وهي تلف بترجع لمجموعتها وتبغى تقهر جميلة : خلاص اجل اظن يكفي اللي شفتيه...
جميلة وبسرعة ردت : المجموعة بتجتمع نهاية الدوام عشان نشوف وش نسوي في الاعمال والبحوث خلي عندك فكرة...
العنود ومعطيه ظهرها لهم : وين..؟؟
جميلة مقهووورة منها قالت وهي تعض على شفايفها : وين يعني..؟؟ في مكاننا المعتاد في آخر طاولة في زاوية الكافتيريا..
العنود : يصير خير ان شاء الله .... ومشت عنهم..
جميلة انقهرت بالمرة وجلست تتحلف للعنود ان ما ردت لها هالحركة.. وتقول في نفسها تو ما خلصت من العلة عفافوه... تجيني اعل منها... اففففف ومشت بسرعة مع شلتها اللي ضحكهم شايل المكان....
.
.
عفاف كانت تطالعهم وهي في داخلها مو راضية عن اللي قاعد يصير...تعرف هالشلة مشبوهة... ولازم الواحد يتعامل معهم بحذر... وهي تخاف على صديقتها منهم...
بعد ما رجعت العنود.. البنات راحو لقاعاتهم لان عندهم محاضرات.....
في الشركة..
كان ابو يوسف جالس على مكتبه ويطالع في الاوراق اللي قدامه ويوقع عليها... والسكرتير ينتظره ينتهي منها..
بعد دقايق...
دخل مهند المكتب بابتسامه على وجهه.. وراح لابوه وحبه على راسه...
مهند : مساك الله بالخير يبه...
ابو يوسف يرفع راسه لولده يناظره : مساك بالنور.. هلا بولدي.. هااه وش عندك اليوم جاي مبكر..؟؟
مهند وهو يجلس مقابل ابوه على الكرسي : افا والله ابو يوسف.. يعني ما تبيني اجي..؟؟؟
ابو يوسف وهو يسلم الملف للسكرتير ويلتفت على ولده : وانا اقدر اقول شئ...؟؟ بس غريبة..!!!
مهند : هههه... لا غريبة ولا شئ الله يحييك.. بس خلصت محاضراتي قلت امر الوالد... فيها شئ ذي..؟؟؟!!
ابو يوسف : هههههه.. الله يقطع سوالفك يا مهند.. وحياك الله بيننا..هههههه
مهند استانس على ابوه اللي على غير العاده اليوم مبسوط..ويضحك.. وهالشئ فرح مهند..
جلس مهند مع ابوه شوي.. يناقش المشاريع ويراجع الملفات.. بما انه يدرس اخر سنة في كلية الهندسة.. فكان وجوده ضروري جدا في شركتهم.. وخاصه انه يتحمل جزء من المسؤليات عن ابوه.. او حتى عن اخوه يوسف اللي يشتغل نائب المدير العام بالاضافة الى شغله في التدريس... ظل مهند وقت بعدين استأذن من ابوه عشان يطلع يشوف واحد من المشاريع...
***************
كانت ملاحظة ان صديقتها مو طبيعية.. اليوم بالذات مع انها مو من النوع اللي يوضح عليه شئ.. الا انها حست بشئ فيها.. سحبتها بهدوء وطلعت تتمشى معها..
كانو يمشون ويديهم في يدين بعض.. بشكل يلفت الانتباه.. كانو رووووعة في كل شئ.. وخاصة العنود.. اللي كان كل من يشوفها ينهبل على نعومتها ورقتها.. ولا جمالها اللي يذبح.. كانت طويلة وبيضــااااء.. وملامح وجهها حلوة.. ما شاء الله.. وشعرها طويل تقريبا لاخر ظهرها.. واشقر..وهالشئ يخلي الكثير يسأل عن جنسيتها.. " مو من قلة جمال في السعوديات ما شاء الله... بس وش نقول...؟؟؟؟!!!! " وكان ابوها يحبها ويموت عليها.. وهذا دافع ثقتها في نفسها.. واعتزازها بها..
وعفاف بعد كانت حلوة.. لكن مو مثل العنود.. عفاف طولها حلو.. وملامحها تشبه ابوها.. عيونها كحيلة.. ونظرتها حادة جدا.. وشعرها اسود صابغته.. يوصل لتحت كتفها..
وقفت العنود والتفت على عفاف.. وقالت لها بسرعة..
العنود : وش فيه الحلو زعلان..؟؟
عفاف تطالع العنود : هاااه...؟؟
العنود : هههههه.. وش هاه بعد..؟؟
عفاف : لا.. اقصد وش قلتي..ما انتبهت لك..؟؟!!!
العنود : اقول وش فيك اليوم متغيره..
عفاف : ههههههه.. بـــــس ...؟؟!! وانا على بالي عندك سالفه..؟؟
العنود : لا من جد عفاف.. وش فيك..؟؟
عفاف بكبرياء : ما فيني شئ.. ولا اقولك.. ( وبابتسامه ).. كل شئ في وقته حلو.. لا تستعجلين..!!!
العنود وما صدقتها بس تركتها على راحتها : مقيولة.." يا خبر اليوم بفلوس.. بكره يبأى ببلاش " ههههههه
عفاف : هههههههههههه
*******************
" والله ما قلت شئ... احلف لك.."
ابو فارس : لا والله.. تلعبين علي انا..؟؟
ويمسكها من شعرها.. ويشدها بكل وحشية...
ام فارس : آآآآآي.. شوي خلني افهمك ... آآآآآآآآآي..
ابو فارس ( وهو يضربها بقوة ) : وبعد نتفاهم.. على ايش يا حظي.. على فلاحتك.. يا وكالة الانباء..!!!!!!
ام فارس ( تبكي بالم وحسره ودموعها تطيح قدامه لكنه ما رحمها لو مرة وحده ) : اقولك فكني.. تكفى اتركني.. حرااام عليك... والله ما سويت شئ..
ابو فارس ( بنقمه ) : حرام علي هاه..؟؟ طيب...!!!
ويعطيها كف خلاها تطيح على الارض من قوته.. وفكها ينزف من قوة الالم....
ونزل بيرفعها يكمل عليها.... لولا ان جواله رن في هاللحظة..
ابو فارس وهو يستعيد انفاسه بعد ما شاف رقم المتصل ويجلس على السرير : هلا وغلا حبي....!!!!!!! الحين...؟؟ من عيوووني.. دقايق وانا عندك...!!!!!!!!
وقفل وراح بيطلع.. لكنه وقف وقال من طرف خشمه : اسمعي..!! لو ادري انك فتحتي ثمك بكلمه.. ما يردني عنك الا المووووت....!!!!!!!
وطلع بعد ما سكر الباب بقوة.....!!!!!
ام فارس.. جلست تصيح من قلبها... وبقوة وهيستيريا.. وكأنها ما صدقت يطلع..عشان تفرغ شحنة الالم والحسرة اللي قاعدة تعيشها كل يوم.. وكل لحظة مع زوجها..اللي ما رحم ضعفها وتعبها..استقبلها بمجرد وصولها من المدرسة... لكنها للاسف.. مثل كل مرة تعيش الموقف لوحدها..وما فكرت في أي مره انها تقول لاحد عن اللي قاعد يصير..وعشان عيالها قررت تعيش هالالم بصمت.....
**************
بعد ما انتهو البنات من محاضراتهم..
قالت لهم العنود انها بتروح لشلة جميلة طالبينها.. وطبعا زميلاتها ما قالو لها شئ..
راحت العنود للكافيتريا.. لما دخلت ما حصلتهم على الطاولات الامامية.. فكانت واقفة وتتلفت تبغى تشوف وحدة منهم.. فلما شافت نفسها طولت في الوقفة.. قالت في نفسها " باجلس على وحده من الطاولات لحد ما اشوف وحده منهم " فجلست على طاولة فاضية.. وكان معها دفترها المحاضرات.. جلست تفتح فيه صفحات وتقرأ التعليقات والسوالف اللي يكتبونها في اثناء المحاضرات.. وكل ما تقرا شئ تبتسم..!!
....... : ان شاء الله دوووووووم هالابتسامة يارب....!!!!!
العنود ( رفعت راسها باستغراب.. وعيونها مفتوحة بقوة وتطالع مصدر الصوت : ............!!!!!!
هناء : ما عليش اكيد روعتك..!! بس شفتك هنا والشلة جالسين هناك ينتظرونك..( وتأشر على مكان محدد ) فقلت اجي اقولك...
العنود ( بارتباك ) : لا عادي.. بس انا ما شفت احد.. فقلت اجلس لحد ما تجون..!!
هناء : طيب يالله نروح لهم.. تراهم جالسين ينتظرونك..
العنود ( استغربت وش هالاهتمام المبالغ فيه.. اكيد وراه شئ..) : زين..
وراحو لهم.. وطبعا جميلة وباقي البنات ما قصرو معها في الترحيب.. فالعنود زاد شكها فيهم.. لانهم كل مره يشوفونها ما يرحبون فيها ولا حتى يهتمون منها..لكن اليوم شئ مختلف فيهم..فما حبت تستمر في الافكار وقالت نشوف وش اخرتها معهم..
جميلة ( بمياعة ) : اهلين العنود.. حياك.. تفضلي..
العنود ( بعفوية ) : هلا فيك..وينكم وش هالمكان البعيد..؟؟
جميلة : لا بعيد ولا شئ كلها لفة وحده بس.. مثلك عارف ازعاج البنات في السوالف.. فاحنا ما نحب احد يزعجنا..!!
هيفاء ( بدلع متصنع ) : كيفك العنود..؟؟ ان شاء الله تمام..؟؟
فاتن ( بسخرية ): اقول العنود.. ليش تأخرتي..؟؟ ليكون ضيعتي الطريق..ههههههههه
الشلة : هههههههههههههههههه هههههههه
العنود ( منحرجه منهم ) : الحمد لله انا تمام......... وسكتت..
لان فيه صوت جوال يرن.... فهي كانت مستغربه من هالحركة..!!!!!!!
جميلة : جوال مين هذا...؟؟؟؟؟!!!!!!
فاتن : جوالي... ما قلت لكم..؟؟
هيفاء : لا .. بس وش هو له جايبته..؟؟
فاتن : مو اللي بالي بالك بيدق علي نهاية الدوام..!!!!!!!!
جميلة ( بخبث ) : ليكون بتطلعين معه اليوم......؟؟؟؟!!!!
فاتن ( بابتسامه اخبث ) : اكيييييييد ياعمري.. واعدني بغداء ما حصلش....هههههه...
هناء : وين ..؟؟
فاتن : في الفيصلية طبعا..!!
جميلة : وااااااااو.... والله وقدرت عليه.... احلى يا قوية..!!!
العنود من الصدمه.. ما انتبهت الا على صوت جميله وهي تعطيها دفترها اللي طاح منها وهي ما حست....
جميلة : دفترك.. يا حلوه...
العنود : هاااه.... ايه شكرا..
جميلة : وش رايك......؟؟؟؟؟؟
العنود : رايي في ايش......؟؟؟؟؟؟؟؟؟
جميلة : في اللي شفتيه....؟؟ مو حركة قوية...؟؟
العنود من الصدمة ما عرفت ترد.. فقالت تغطي صدمتها : انتو متعودين على كذا......؟؟؟؟؟؟؟!!!!!
جميلة : ههههههه.. واكثر بعد.. عادي.. خليك كووووول...
العنود كملت الجلسة بصمت بس عشان تخلص اللي هي جاية عشانه.. وبعد عشان تسلم من السنتهم اللي كلامها مثل السم..
بعد ما انتهو رجعت العنود لصديقاتها..جلست بين هند ووفاء وكانت عفاف مقابلتها.. وملاحظة التوتر عليها... بس قالت كذا العنود تحب تكبر السالفة..
هند : عفاف ما رحتي للمشغل ..؟؟
عفاف ( بعد ما انتبهت ) : لا.. للحين ما رحت.. انتظر غادة تخلص امتحانها.. وبنروح..
وفاء : ليش وش عندكم..؟؟ مو توك رايحه..ما امداك؟؟
عفاف : هههههههه.. لا غاده عندها زواج وحده من صديقاتها..وباروح معها..
هند : ههههههه.. قاطّـه الاخت..ههههههه
البنات كلهم يضحكون على هند.. الا العنود اللي مكبره الموضوع.. وحاسه بضيقه..
وعلى نهاية الدوام.. مسكت عفاف العنود وهي منتبهه لشرودها وسرحانها....
العنود ارتاعت من مسكة عفاف لها....
عفاف : وش فيك...؟؟
العنود : هااااه...؟؟ لالا ولا شئ...!!
عفاف : شوفي الحين باطلع السواق وصل.. بس بتقولين لي بعدين...
وطلعت عفاف وهي تحمل هم فوق همها.... بترجع للبيت بهم جديد.. وهي اللي طلعت منه وفي داخلها انها راح تنسى موضوع الخطبة.. لكن الظاهر انها بتبدى بهــــــم جـديــد.. وبألـــم أشـــــــد....!!!!!!
**************
دخل بيته راجع من عمله.. كان تعبان ومنهد حيله.. بس يدور السرير عشان ينوم ويريح جسمه.. لكن من يرتاح وعنده حرمه مثل حرمته... ما شاء الله ما تخلي موقف ولا لحظة الا تقوله عليها.. وصايره مثل المنشار طالع ماكل ونازل ماكل..
ابو معاذ : السلام عليكم
وراح يمشي بسرعة عشان ما يسمع أي كلمة من حرمه المصون.... لكن آماله تبخرت على صوتها النشاز وهي توقفه..
ام معاذ : وين رايح.....؟؟
ابو معاذ ( بقلة حيلة ) : باروووح انوم تعبان وحيلي منهد...
ام معاذ : لالالا... تعال عندي موضوع باكلمك فيه...
ابو معاذ : وهالموضوع ما يتأجل يعني ..؟؟
ام معاذ : لالا.. ما يتأجل.. لازم الحين اقوله لك.. قبل العيال ما يجون...
ابو معاذ ورجع بيجلس معها..
ابو معاذ : هاااه... وهذي قعده.. وش عندك.....؟؟
ام معاذ وتوها بتتكلم.. والا البنات داخلين عليهم..
هدى : السلام عليكم..
ابو معاذ ويبتسم وكأن جيتها انقذته من المأزق : وعليكم السلام..
وبعدين جلسو معهم شوي... الى ما حطو الغدا والكل راح يتغدى.. وابو معاذ يشكر ربه في داخله ان حرمته نست السالفة...والمسكين ما يدري انها قاعدة تخطط لشئ اكبر من عقليته.. واكبر حتى من كلمته اللي مستحييييل تمشي عليها.. لو مهما حاول.. لانها خلاص سيطرت على كل ذرة في داخله.. وملكت شخصيته اللي ما عاد لها أي قيمة.. وطبعا المدام قاعدة تخطط وترسم عشان تمدد نفوذها على كل العايلة.. وكل فرد من افرادها....
الجزء الخامس
بعد الغدا... قالت ام يوسف لعيالها عن الروحه لبيت امها.. طبعا الكل وافق.. منها تغيير جو.. ومنها زيارة لجدتهم..
بعد العصر راحت غادة بتتصل في مي وتقول لها.. اتصلت عليها وقالت لها.. وبعدين رجعت تجلس مع اهلها اللي مجتمعين بعد العصر.. جلست بين عفاف وساره ..
يوسف : لا.. توني صغير..
ام يوسف : وين صغير.. عمرك 27 سنة... خلاص وش تنتظر..؟؟
سعد باستهبال: لا الله يهديك.. وش 27 الحين ما يعرسون الا بعد الثلاثين...
مهند يجاري سعد : ايه وبعد العروسه 19 وتحت ..
ام يوسف : بس انت وياه.. ادري بسوالفكم..
يوسف : ههههههه.. وش مستعجله عليه.. لاحقه علي..
ام يوسف : بس وانا امك ودي افرح فيك.. واشوف عيالك..
يوسف : ابشري.. من عيوني.. بس... بعد تونا شوي...
سعد : تاااارى رررراااا... فيلم هندي.. نسيتو الدموع... اقين...
مهند : ون... تو... ثري... اكشن...
وتدخل عليهم امل تصارخ وتتذمر : ماااااامااااااااا..
مهند وسعد استغربو من المشهد : هههههههههههههههههههههههه
ام يوسف : خير وش عندك بعد ..؟؟
امل تصارخ ووجهها احمر من العصبية: قسم بالله لو ما ربيتي ولدك لاوريه شغله...!!!
مهند وسعد طالعو بعض... بعدين انفجرو ضحك... وامل تطالعهم بنقمة..
يوسف : شوي شوي.. وانا اخوك لا ينفجر فيك عرق..
امل وشوي بتصيح : اصلا انتو ما تحبوني...!!! بس تحبون عبسي.. الدب...
سعد : لا افا عليك بعد نحب عدنان...!!!! هههههههه
مهند : لا انا احب لينا.. ههههههههه
امل : مااااماااااااااااااا...
يوسف : ههههه... ( ويحاول يسكتها ) خلاص روحي ناديه وانا باقول له..
..... : السلام عليكم....
الكل التفت على الباب...
امل وهي تركض لليلى.. وتسلم عليها وتاخذ شهودة من الخدامه..
مهند وسعد من بعيد يضحكون على شكل امل وهي ناسية اللي صار لها من شوي...
سعد : قسم بالله هالبنت تحفه.. نست وش صار... بزرااان..هههههههه
وقام الكل يسلم على ليلى.. وهذي زيارتها لهم بعد ما جت من الشرقية..
قعدو يسولفون الى المغرب... بعدين طلعو الشباب... وجلسو البنات يسولفون.. وطبعا سوالف البنات ما تخلص......
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك