رواية انا الضحية وانا الجلاد -49
عذبة: وحده ثانية شتبي بوحده مثلي يتمينه ضايعة هايته.. طول عمري بنيت سور على همومي ومخاوفي ما بحت لأحد مثله هي ...
كتمت همومي وحبي وخوفي وفرحي .... عن الناس كله إلا هي و... وبالآخر تصير عمتي!!
نواعم: عذبة... أنتي تصيحين!!؟
عذبة: إيه أصيح.. أصيح من الحرة من القهر... ليش تسوي بي عمتي كذا...
نواعم: مو أكيد يمكن مو هي!!
عذبة: أكيد هي بأمريكا!!
نواعم: إيه... بس كلولورادو كبيرة وكثير عايلات سعوديه هناك!!
بعدين أنتي غلطانه شلون تبيحين بأسرارتس لأحد ماتعرفينه ولا تثقين فيه...
لو كانت طيب من ربع سعود!!
الحمدلله إنه بأمريكا وبعيده..\
عذبة: محتاجه أحد أشاوره يا نواعم.. أحد يقول لي هذا صح وهذا غلط!!
نواعم.... أنتي ... لااااااااااااااا
نواعم: شبتسوين؟
عذبة: ما أدري.... ما أدري...
نواعم: من رايي إسكتي.. سوي نفسك مادريتي عنها... عشان فيما لو رجعت ما تتكلم معك بأسرارك وتتجرأ تسألك عن غيرها... صح؟
عذبة: ما أدري... ما أدري....
**********
"دبي"
يتعالى صوت مشاري بغرفة ويظهر صوت راشد محاولا تهدئته... تأتي شمس وهي تضع لفافات كبيرة على شعرها, تطرق الباب....
راشد: شمسوه ذلفي..
شمس: فضحتونا بالجيران!!!!
راشد: آني قلت ذلفي....
شمس: طيب وش فيه...
مشاري: وش فيه!!
وش أكبر من اللي صار!!
كيف قوى قلبها ... والله لأموتها .. والله ما أنساها لها...
شمس: شو صار؟
مشاري: ياربيه... شلون أصلح غلطتي... شلون... أربع سنين ظالم هالمسكينة... لاه... ما أدري أذبح نفسي ولا أذبحها...
راشد: مشاري تعوذ من بليس...
مشاري_يخرج من الغرفة_: أبتعوذ من بليس... إلا هي بليس بكبرها...أخ..أنا.. ياربيــــــــــــه...
راشد: وين تروم ؟
مشاري: موب شغلك.. موب شغلكم....
**************
"في بيت عذبة"
_الصالة الرئيسية_
بندر: عذبة وين البنات؟
عذبة: نجلاء ونورة طالعين وعبدالعزيز وليلى...رايحين يتعشون برا....
ونواعم جالسة مع أفنان... توه جايه من بيت أهله..
بندر: وأنتي ليه ماتروحين تجلسين مع أفنان... أنا البيت بيتي...
عذبة: أخاف تسرق....ههههههههههه
بندر: زين أنا بروح للغرفة أبنام... أناظر التلفزيون شوي...
عذبة: معليش يا باشا... الغرفة اللي فوق ممنوع من التعتيب عليه...
بندر: ليه؟
عذبة: لأن الغرفة اللي جنب غرفتك به نواعم... وبما أن البيت بوه بنات موب محارم...
بندر: يتحتم علي إن أنام بالملاحق اللي برا صح؟
عذبة: عليك لمبتين.....
بندر: بسيطة.. بقوم أروح.... بس عساكم مشغلين المكيف...
عذبة: يؤ نسيت أقول للشغالات.... بروح أقول لهن يجهزن الغرفة وأجيب لك عشاك بذا...
تعش وناظر التلفزيون بذا... على بين ما تبرد الغرفة.... خلاص؟
بندر: طيب....
_تقوم عذبة وتتجه للمطبخ, تقف أمام المرآة الطويلة بجانب الدرج ونظرت لشعرها, خلعت المشبك وأخذت تحرك شعرها يمنه ويسره , وهي تنادي الخادمة,
مسحت قليلاً من ملمع الشفاة على فكها الأسفل ونظرت لعينيها و رأت بندر يراقب تصرفاتها فإلتفتت محرجة قائلة:
مدام ميرنااااااااااااااااااااااااا......
_أقبلت الطباخة_
عذبة: الله يعافيك قولي لريتا ترتب الملحق الأيسر بينام فيه بندر, وقولي ليه تشغل المكيف عالآخر وجهزي عشاء لبندر...الحين بجي آخذه..
الطباخة: مدام... شو حليانه كتير... والله لايئ اللون الوردي مورد وشك... بس لو تزيدي الآي لينر من فوق بيكون أحلى...
عذبة: المرة الجاية...هههههههه شكلي بجي لتس تمكيجنن...
الطباخة: أهلا وسهلا... بس انا عالأولد ستايل.... ولي نسيت الطنجره..وااااااا
_ركضت نحو المطبخ_
عذبة_تتجه نحو الدرج_: بندر ... بروح أجيب جوالي نسيته فوق....
بندر_يتأملها مبتسماً_:....................ز
عذبة: وش بك؟
بندر: تعالي....
عذبة_تتجه نحوه وتقف عند قدميه_: وش عندك؟
بندر: تشبهين نورة... بس ممكن تنتظرين حد ما تجيب العشاء... مالي خلق تقرق على راسي...
عذبة: إخس مسوي فيها محترم... ولا عشاني أشبه نورة.. يالله نجلس..._تلتفت نحو الباب الذي طرق بخفة_ من عند الباب ... شكله رجل؟!!!
بندر: من؟
يمكن فيصل.. أبقوم أشوف...وخري عن الباب شوي..
_يفتح الباب ويلتفت نحو عذبة ينظر لها بريبة ثم يلتفت على الباب_
عذبة_بوجل_: من؟
بندر:...........................................
صوت من الخارج..."بندر... أبي أكلم عذبة"
جمدت عيني عذبة وإرتجفت شفتاها, تنفست بصعوبة, وإلتفتت نحو بندر ثم إبتسمت بصعوبة هامسة " مشاري..صح...مشاري...!
خله يدخل..."
بندر_يهز رأسه_: طيب تغطي...._أخذت عباءة أفنان المعلقة بجانب الباب ورماها على عذبة التي تغطت بصعبة وبيدين مرتجفتين_
_أشاح بندر بوجهه مترددا برهه ثم دفع مشاري الباب ودخل يجر خطواته, ووقف أمام عذبة ثم همس" سامحين يالغلا...."
عذبة: .................................
" الجزء التاسع والأربعين"
نظر بندر نحوه باستغراب وقال:
مشاري متى جيت؟
ووش تبي الحين بعد هالسنين.......!!!!
مشاري: يوم عرفت الحق جيت... وجيت أصلح اللي إنخرب ...
_يلتفت على عذبة بعنين دامعتين_
سامحيني ياعذوب... سامحيني....
_بدأت عذبة تنتفض تحت العباءة, حاولت أن تنطق ولكن صوتها لم يبارح حنجرتها_
بندر: مشاري... إطلع .. أخاف يجون وأنت هنا..
مشاري_بإنفعال_: منهم؟
خلهم يجون... خلني أشوفهم وإن كانوارياييل ينطقون بحرف...
أنا ييت هني لجل شي واحد... ييت لأجل عذبة وأبراضي عذبة ومايهمني اللي يصير...
سامحيني يا غلاي... آدري إني غلطت وايد بس والله ....
الله يسامح اللي كان السبب...
طلبتج... مو عشاني...عشان الحب اللي كان بينا... عشان الأيام الحلوة اللي جمعتنا...
واللي يرحم والديج... لجل رضى أمج سامحيني....
_ظهر صوت عذبة مبحوح ومرتجف_: على إيش أسامحك....؟
_رفع مشاري بصره نحوها, بدى غير مصدق_: يعني أنتي مو زعلانه علي؟!!
أنتي عارفة باللي صار... عارفة بالجريمة اللي إرتكبت بحقنا!!
عذبة_صمتت طويلاً ثم قالت_: أسامحك على إنك نكثت بعهدك معي... وطلقتني وأنا محتاجتن لك.. ولا أسامحك على كذبتك على وإنك خليتني أنا اللي طالبة الطلاق... ولا...._صمتت وخفت صوتها قليلاً_ على إنك تخليني أكلم خطيبتك وأقنعها إنها تتزوجك ولا... أحضر زواجك... ولا إنك خليت إختك تقول لزينب إني وحده خاينه لزوجها وماقصروا الناس بتقطيع لحمي ولا على إيش.. أنت حدد بس... بعد أربع سنين جاين تقول سامحين ... وش تبي أسامحك عليه... ؟
بندر: مشاري.... إطلع... عذبة تعبانه.. كلمه بالتليفون أي وقت... لكن الحين لا..
مشاري: ماني طالع من هنا حد ما أقول كل شي... وعشان تعرف إني ما تخليت عنها بكيفي.... أنا مادريت حتى إنك مكلمة هيفاء وماكان ودي إنك تحضرين الزواج... هذي منى.. منى إللي قصت عليج وقالت لج... والله إني برئ منها براءة الذيب من دم يوسف.... أنا شلون أطلب منج هالطلب وأنتي مالك فاقدة أمك وأخوك أربع شهور...
بندر: أنت طلقته وهي ماله فاقدة أهله شهر.....!!!!
مشاري: لا يا بندر.... أنا مو بيدي... والله مو بيدي....
كله من منى...منى وسعد إهما اللي فرقونا عن بعض....
عذبة: منى!!!!
سعد!!!!
سعد ولا فيصل؟!!!
مشاري_يرمي نفسه على الأريكة ويتنهد_: هذي قصة غدر من أقرب الناس لنا ياعذبة... سمعيني أقولج السالفة كلها....
هذا يوم ماتزوجنا ومنى تتصل فيني وتقول لقت رسايل بين هدومك اللي بغرفتنا... بهدومك اللي أرسلتيها قبل الزواج مع أمج....
تتذكرين... كان منها كرتون أحمر مشمع...
عذبة: منى فتحت الكرتون حقي!!!
مشاري: مو جذي... كلمت على وقالت لي إنها وهي ترتب الغرفة طاح الكرتون وإنفتح وطاحت منه رسايل.... وقالت إنها رسايل غرامية من فيصل... وإنها جديده.....
عذبة: ..............................
مشاري: بالأول خاصمتها وقلت لها ماتفتح أغراضج الشخصية... وكلمت أمي وقلت لها تقفل الغرفة وتاخذ المفتاح من منى....
بندر: شكلك مطول أبو الشباب.... الحين يجي عبدالعزيز!! عالأقل قم رح لمجلس الرجال....
عذبة: إسكت يا بندر... البيت بيتي ولا لأحد كلمة لا عبدالعزيز ولا غيره...
وبعدين شصار؟
بندر:!!!!!!!!!!!!!!!!
بس... ما.....
عذبة_تقاطعه_: قلت بيتي... بتجلس إجلس... ولا أنادي أفنان ومالك لزمه إذا خايف....
بندر:أنا خايف عليكم ...
مشاري: وش بقي ماصار لنا!!؟
عذبة: ماعليك منه... مادامك ما صدقته بالبداية ليش صار كل اللي صار؟
مشاري: بعدين توفت خالتي وسعود وتعرفين قطعنا السفرة وردينا... وبالمطار شفتك مع فيصل... كنتوا مو عيال عم وبس.... كأنه أخوك... أو عمك.... وهو ولا معبر إني فيه... يجي ويكلمك ويوم طحتي كشف وجهك وصار يهف عليك ويرشك الماي... أنا ما أدري أصرخ فيه وأبعده عنك ولا أهديك...
هني بديت أشك إن فيصل له مصلحة باللي سمعته... بس قلت إنتي لا... مستحيل تخونني.. أقنعت نفسي إن فيصل ذكرك بأخوك و... إنه كان عايش وياكم....و... حاولت أنسى اللي صار...
لكن.....
يوم رديت الإمارات جابت لي منى الرسايل, وكانت كلها من فيصل لك.... قلت أكيد فيصل إهو له مصلحه باللي يصير... سألت منى وحلفتها بالمصحف وحلفت إن كل اللي فيه لقته بالكرتون الأحمر...
كانت الرسايل تقول إنه تنازل لك عشان ترضين أمك .. وبعدين بتسوين مشاكل وتردين مطلقة... وإذا رديتي مطلقة أمك بتوافق تتزوجينه... وتكونين أرضيتي أمك ...
عذبة: صدقت السخافة هذي!!
أنت عارف إن حبي لك أكبر من أي شي ثاني!!
وبعدين شلون آخذ معي شي زي كذا .. يعني ما أخاف إنك تشوف الرسايل!!
مشاري: إلا... لكن قالت لي منى إن هالكرتون جاء بالغلط... وإنك كلمتي شمس وطلبتي منها تحفظ الكرتون عشان ماحد يشوفه...
عذبة: كلمت شمس إيه... وقلت لها تحفظ الكرتون لأن فيه صور ملكتي وفيه معي صديقاتي بالصور والصور جات بالغلط..
مشاري: أنا سألت شمس وقالت جذي بس بعد ماسمعت نص مكالمة من طرف سعد وهو يكلم أخوه فيصل إنه يتركج بعد ما توفت أمج... وكان الصوت من جهه سعد بس...
وكان يقول البنت سفيهه وتزوجت حرام تجي تخرب بيتها...
وكان من ضمن الكلام يبين إنك متفقه ويا فيصل... وكان سعد يكرر كلمة إنها اللي بتخون زوجها بتخونك....
قالت لي منى إنها أخذته من منيرة بنت عمي زوجه سعد... تقول إهي إنها عطته إياه...وإن منيرة سجلته وعطته منى وحرصت عليها ماتخبر أحد..تخاف تخرب بيتها لو يعرف سعد إنها فضحت عايلتهم...
عذبة: منيرة بعد!!!!!
لا ما تسويه منيرة...ماتسويه...
مشاري: هي ماسوتها... اللي مسجل المكالمة سعد بنفسه ومعطيها منى...
وهو بعد اللي معطيها ورقة مكتوبه بخط فيصل... عشان تعطيها رفيجتها تقلد خطه على الرسايل...
عذبة: سعد!!!!!
لاااااااااااااااااااااه......وفيصل.... وش بقى لي ...
وأنت صدقت........................!!!!
صدقت إني أخونك!!
وأخون أمي.....
_وضعت يدها المرتجفه على رأسها_
طلقتن وبس عشان مكالمة ... ورسالة!!
مشاري: لا... عذوووب... سمعين ... أنا والله ما صدقت....
ما صدقت... ومستحيل أصدق...
أنا شفتك مصره تعيشن بين أهلك... قلت لج إن ولد عمج مايعتب البيت... تذكرين ؟
قلتي لي البيت بيته ولاهوب أنت تمنع عيال عمي من بيت عمهم...
تتذكرين؟
عذبة: ...................
مشاري: ويوم قلت لج إذا شفت فيصل ياي لبيتكم مايصير لج طيب....
ومامداني وأنا أتكلم وياك إلا أسمع صوت ريال ... تتذكرين؟
عذبة: قلت لك كان مع جدي!!
مشاري: كل يوم مع جدك!!!
هذا اللي خلاني أطلقك... ونطرتج تدقين تسألين.. تبينين إنج مهتمه... لكن... ماسويتي شيء... بالعكس كأنك تقولين جت منه أحسن!!!
مو؟
عذبة: أنا... أنا.. بندر قله... إذا هو ما يعرف طبعي ....قله... إني أموت وما أذل نفسي لأحد... بندر.. بندر تسمع!!!
بندر: هو يعرف طبعتس.... مافي داعي أقوله..
مشاري: ياعمري أنا أعرف طبعج... بس حطي نفسك مكاني....
عذبة: وشو مكانك!!!!
كذبتوا كذبه وصدقتوه....!!!
مشاري: أنا ما صدقت... والله ماصدقت قلبي ما صدق لكن عقلي..عذبة الرسايل اللي لفقت... مكالمة سعد... تصرفاتك معاي... تصرفات فيصل... كلام منى ...
بندر: طيب... مادمك ما صدقت... ليش أجل طلقت!!؟
مشاري: يووووه بندر... أنت ريال بتحس باللي أنا أحس فيه... أنتا واحد لقيت ويا مرتك رسايل غرامية .. والكل يعرف إنها قبل معطاه لهريال...وبعدين تشوفها وياه تحاول تقنع نفسك إنهم قرايب وربوا ويا بعض ترد تسمع مكالمة من أخوه وبصوت أخوه.. يعني فيه أخو بيضر أخوه وبنت عمه وبيشوه سمعتهم...أنا طلقت... كنت أبيها تقول ليش.. تسأل أقدر أواجهها..
عذبة: حقـــــــــــــــــــــــير!
_وقف ثم صرخت_ إطلع برا... إطلع عن بيتي وقلبي... إطلع...
ياخسارة كل لحظة تمنيتك به تكون جنبي... ياخسارة كل لحظة أحسن الظن فيك.
يا خسارة... _بدأت تنتفض غضباً_ قلت كل الناس يتخلون عن إلا مشاري...
قلت كل الرجال كذابين بحبهم إلا مشاري...
قلت...وقلت...وقلت... وليتي سمعت كلام أمي عذبة...
_إرتمت على الأرض تبكي بحرقة_
_خرجت الطباخة مسرعة_
الطباخة: شــــــــــــــــــــــــو!!
مين هي الرجال!!
لعمى ... عززبة ليش بتبكي... إنتا إطلع برا ماتسمع... وإلا والله لإفتح لك راسك بالطنجرة!!
بندر:هيه... إنقلعي داخل.....
الطباخة: ولي... أهلي سموني ما تئول لي هيه....يا باشا...
بندر_بزرت عيناه وصرخ بها_: قلت إنقلعي!!!
الطباخة_وهي تركض للمطبخ مهروله_: ولي... شو هي رجال!! لعمى... مرعب...
بندر: خلاص مشاري.. إطلع أنت الثاني..
سمعت كل شي...
مشاري: لسه الكلام ما خلص...وأبي الغلا تسمعه كله..
بندر: خـــــــــــــــــــير!!!
الغلا ..ياعمري ...عذوووب.. حنا وين!!!
لاهيب مرتك ولا تحل لك.. إنقلع تكفى...
مشاري: لازم تعرف إني ما طلقتها وسكت.. أنا كنت مقتنع ببرائتها...
عذبة... والله ما سكت... فكرت إن كرامتك ماتسمح لج...
عذبة: خليت أمك تتصل وتهزء..
مشاري: تعرفين إن أمي وأبوي هم أكثر من تضايق من طلاقنا....
أنا .... سألت راشد ... سألته عن طبع فيصل ..
راشد أصر إن فيصل مستحيل يسويها.... وقال لي إن فيصل رجل بمعنى الكلمة وهالكلام اللي صار ما يطلع منه... أنا يوم حسيت إن الموضوع فيه لبس....
كلمت جدك...
عذبة_وضعت يدها على فمها_: أبوي ناصر!!!!
لـــــــــــــــــيه... أبوي ماكان ناقص؟
حبيبي أبوي أشقيته معي... ما يكفي إنك غلطت عليه يوم كلمك يسأل عن الطلاق..ليش تكشف له المصايب....ليــــــــــــــه...ليه أبوي ماكان يقوى على الشقاء....ليه...ليه يامشاري...
مشاري: أنا كنت مضطر... دق علي وهو معصب وقال لي منت كفو من يعطيك بنته... شتبيني أسوي... قلت له كل شي...
عذبة: شقال؟
مشاري: قال تجيب لي كل شي عندك... وعشان أقدر أرد عليك....
أنا يوم جيت له الشركة ومعي بعض الرسايل والشريط لقيت فيصل... فيصل كان وياه بالمكتب.. توقعت إنه بيواجهه بيسوي شي... قال فيصل خذ الأوراق.. وأخذهم فيصل وقال لي جدك زين أبرد عليك بعدين..
طردني من مكتبه.... أنا ما تلفضت عليه ما غلطت بشيء...
عذبة: فيصل أخذ الرسايل!!!!
مشاري: مو جذي وبس... بعد يومين إتصل علي وقال لي.. " إستر على البنت .. البنت بنتي والولد ولدي... ماقدر أسوي شي.. وحقك يوصل لك...مهرك وفوقه خمس ميه ألف حق صكة أثمك"
عذبة: هااااااااااااااااااااااااه!!!
أبوي ...لا ..مستحيل... أبوي... شلون!!!
فيصل شلون يكذب على جدي بعد!!
شلــــــــــــــــــــــون!!
أنت تكذب..
مشاري: أنا إنسحبت ومارضيت آخذ إلا مهري... وأنا بصك ثمي عشان خالتي مو عشان فلوس....
بس اللي أنا عرفته اليوم ... إن منى إتفقت ويا سعد لجل يخربونها بينا وإن فيصل وأنتي مالكم شغل باللي صار...
منى أرسلت لي راشد... دخل علي آخر العصر... أنا يوم دريت بالموضوع شلت روحي للمطار.. والحمدلله تيسرت لي وقدرت أجي...
أنا يا عذبة أغليك.. بس الناس اللي ماتخاف ربها..
عذبة أنا ماتكلمت بعرضج..حتى الناس يوم يسألنوي ليش طلقت أقول لهم إهي طلبت الطلاق.. والله ياعذبة.. والكلام اللي وصلج مو مني..من مني..حتى أبوي مايعرف ليش طلقت... أبوي يشك إننا صايبتنا عين.. يقول لي دايم ليش ماترقي نفسك... ماتعرفين كيف كانت حالتي صعيبه....
رحمت أمي ورحمت أبوي... ورحمت نفسي قبلهم...
عذبة: بسألك سؤال واحد بس.... إنت سكت عالموضوع بعد موت جدي ليش؟
خايف من أهلي يفنشون أبوك...
ولا مصدق إني فعلاً خاينتك!!؟
مشاري: أبوي مو طايح لأهلج... وبعدين لو فنشوه مايضيع لأن وراه ريايل... أنا سكت عشان خالتي... وسمعت خالتي سمعه أمي...
_إقترب منها بضع خطوات_
وأنا الحين ييت أبرجع لك... ونرد غصبن على الكل....
وش قلتي..؟
عذبة_كشفت عن فمها ثم بصقت بوجهه_:
هذي من ماجد هديه....
يعني مصدق إني خاينتك وأنا بنت ماجد!!
إطلع...إطلع برااااااااااااااااااااااااااااااااااااا
ما أبي أشوفك.. مابي طاريك....
مو عذبة اللي تخون ...
مو بنت ماجد...
وأنت عارف هالشي...
براااااااااااااا
_مسح مشاري وجهه وهو يقول_:
عذبة... أنا مقدر صعوبه الموقف عليك... أنا...
عذبة: برااااااااااااااااااااااااااا
برااااااااااااااااااا... بندر إقلعه عن وجهي... برااااااااااااااااا
_ودخلت بحاله هستيرية_
برااااااااااااا..برااااااااااااااااا...برااااااااا اااااااااا
_يمسك بندر بيد مشاري ويسحبه للخارج, يمشي مشاري وهو يلتفت نحوها ويحاول أن يتحدث ولكن صراخ عذبة يبتلع أي محاولة_
****************
" غرفة نورة"
نورة تجلس على الأرض وفيصل متمدد على كرسي مساج بالقرب من التلفاز, عبدالمجيد يمسك بأوراق ويقرأها بتمعن...
نورة: يازين الشاهي يخرط العشاء, نجلاء بس تطلب وأنا اللي أبلع آخر شي إنتكيت , وآخرته تقول أبنزل ببيت أمي عذبة, مها نايمتن عنده هي وهيله بتجي الصبح...عاد أنا دخلت من الباب منا عالمطبخ منا , قلت أبي شاهي ينظف معدتي, عم تبي شاهي؟
فيصل: لامانع... بس شلون أشرب وهذا يرقل!!_ويؤشر على كرسي المساج_
عبدالمجيد_يرفع بصره نحو فيصل ويبتسم_: قصره شوي.. ولا إنزل وإجلس...
نورة: الحين ليش عمي سعد بيرجع؟
فيصل: خبل....
عبدالمجيد: بس موب زين يقطع علاجه ويرجع...
نورة: بعذره برا طفش..
مير زين وفر عليكم الروحه.... عمو فيصل متى بترجع للندن؟
فيصل: ما أدري.... بس قريب... حد ماترتاح أمي وتطمن على سعد همن أروح..
بس تهقون تروك بيعرس أول مايجي...
عبدالمجيد_يبتسم_: أخفي لاو هو اللي شابن على أبوه...
نورة: سخيف...
عبدالمجيد: ترا بيجيتس طراق محترم...
نورة: لابط على تسبدي وآخرته تعطين طراق!!!
فيصل: لا تهاوشون....
وش بتسوين أنتي لامن أعرس مجيد؟
نورة: بموت من الزهق...
فيصل: شفت!!
عبدالمجيد: بعد أنا بموت من الزهق ..
فيصل: خلاص يالله تسامحوا...
نورة: وحنا متزاعلين!!!!
عادي كل يوم كذا...
عبدالمجيد: فيصل.. خذ.. شف حامد اللي بالحسابات دايم يخطي... شف وش أسوي لوه؟
فيصل_يأخذ الورقة ويعتدل بجلسته_: وه عجزت أقرا...هالكرسي يرقلن لامن ركزت برقم نط بي للي قبله.... نورة طفيه...
_يفتح الباب وتدخل نجود تضع يدها على بطنها وتتألم_
نورة: نجود.. وش قومتس من النوم؟
نجود_تتنفس بصعوبه_: نورة... روحي نادي أمي.... شكلي أبولد.
فيصل: ياساتر....!!
قم مجيد... خل نوديه للمستشفى....
نورة: ثواني وأجيب أمي من رجلينه....
عبدالمجيد: إجلسي طيب..
_نجود تتألم بشدة بحيث لم تستطع أن ترد عليه_
فيصل: أشوني موب مرة....
مجيد كلم رجله... خل يلحقنا للمستشفى....
عبدالمجيد: وين جوالي!!
يؤ... ثوبي بالخيمة....
******************
"سيارة بندر"
بندر: مشاري... وسع صدرك...
مشاري: أخخخخخخخخ
وظلم ذوي القربى أشد مضاضة على النفس من وقع الحسام المهند...
سنين وأنا ظالم ومظلوم بوقت واحد...
بندر: الحمدلله اللي بان لك الحق..
مشاري: والله كنت حاس...حاس إن في الموضوع شي غلط... أنا ظنيت نفسي غبي .. كنت لمن أحاول أقنع نفسي إنها مظلومة ألاقي كلشي يدينها... شبيدي أسوي...
بندر: تبي الجد... لو كنت مكانك سويت اللي سويته... الخطه كانت محكمة..
الله على الظالم ... وش إستفادوا.. هذا معاق وهذي بهذل به رجله وأخذ عياله..
مشاري: والله يا بندر مابردت كبدي منها... واللي سواه زوجها فيها قليل... والله قليل بحقها..
بندر: مشاري... لا تضيق صدرك ... إحمد ربك الحق لك موب عليك...
مشاري_يبتسم بمرارة_: والله ما إهو الحق لي ولا علي..
بندر: إسمع... أنت ما بانت منك الشينه.. أنا صح كنت زعلان منك يوم بالشاليه بس كنت أحسبك شاك بالحرمة بس.. لكن يوم عرفت التفاصيل... ماتنلام وكبرياء عذبة بعد ورفعه خشمه زاد الطين بله.. وهذا بكوم وإعتراف جده بكوم ثاني وكان فيصل معه.. أنا نفسي أعرف ليش سكت الشايب لسعد ولصقه بظهر فيصل وبرضى فيصل بعد... والله شي يطير المخ...
بس عموما.. أنت رجل... سترت عالموضوع بطيب أصلك .... ما أدري إمكن لو كنت بموقفك ما أقدر أصبر عالخيانه...
مشاري: أبي زوجتي... أبي أرجع لعذبة... إحنا مالنا ذنب إن زواجنا مو مرغوب فيه من منى ومن سعد... ياخي أقنعها...
بندر:.............................
مشاري: شفيك ساكت!!؟
بندر: ما أدري.... بس اللي صار لعذبة مو سهل إنها تنساه..
وأنا موقفي صعب لو أجي الحين وأقول له ترجع لك...
دور غيري...
مشاري: أبوس يدك... أبوس راسك.... بندر... إحنا رفجه عمر..
بندر: ...............بس...............زينب.. أنت عارف السالفة اللي صار.. وكيف زينب صارت تتكلم فيها بالمجالس.. أنا...مالي وجه مرت أخوي شهرت به...
مشاري: بندر.... بس أنا مظلوم....
بندر: .......................... أنا أعرف عذبة... لو بفتح معه الموضوع بتقول لي (.....) وتطردن...
مشاري: شدعوه!!
عذبة ماتقول هالكلام!!
عذبة...أصلا......... عذبة تخاف منك كيف تتجرأ..
لا... ما يطلع منها هالحجي...
بندر_يبتسم_: يابوي .... عذبة تغيرت... أنت تعرف عذبة الوديعة الهادية الخجولة...لكن عذبة بعد موت سعود وأبو ماجد صارت شي ثاني...
عذبة صارت ماتخاف من أحد... ولا تعبر أحد... واللي يرشه بالماء ترشه بالدم.. صارت غريبة.. لو تشوفه شلون تتكلم مع عيال عمه ماتقول هذي عذبة اللي تستحي تقول لا.. ترد الكلمه هالكبر ولا يهمه من تكون... صارت لبوة وما تهتم إلا لخواته .... عشان كذا... أنا ما أقدر أحط نفسي بموقف فيه مجال تغلط علي فيه..
مشاري:مسكينه شتسوي... كل الناس إما وقفوا بوجهها ولا تخلوا عنها... ماتنلام..............
_تسود لحظات من الصمت_
بندر: قربنا من المطار.... مازلت مصر تجلس هناك حد ماتلقى لك رحلة؟
مشاري: ماللرياض حلا وأهلها زعلانين...
حبيت كل شي بالرياض لخاطر عذبة...
وإذا خاطر عذبة شايل علي... ما بالرياض لي داعي..
ماكنت أدري إن الزمن يغير الناس بظروفه...هقيت إن الناس بتم إهي الناس... الحب إهو الحب... والأهل إهما الأهل... بس...
تدري.... أنا كنت أتعذب لجل عذبة وظروفها, تعبت أبي أجي وأسامحها عاللي صار أو كنت أظن إنه صار, بس كرامتي ورجولتي ماسمحت لي ....
بندر: مثل ماكرامة عذبة منعته تسألك ليش حتى طلقتها...
مساكين حنا يالسعوديين , نحب بس... كرامتنا هي الأولى, بس لو نهجر الحب كله..يكون أحسن,...
مشاري: ليتي ماحبيتها... ولا حبتني... عذبتها وعذبتني.. ولا نلنا شي...
آآآآآآآآآآآآآآآآآآآآآآآآآآآآآه يابو راشد....
_وقف بندر أمام بوابة المطار , نزل مشاري بعد أن ودعه وداعا باردا وهو يترنح من الألم والحزن, سار خطوات متوجهاً للداخل, رن جواله , أخرجه ونظر إليه ثم همس_
وه... راشد ذبحتني..
_وضعه على الصامت وراشد مازال يتصل به, لبث فتره حتى توقف الرنين أخرج الجوال فوجد رسالة من راشد _:
شحالك أخوي... طمني عليك بالي مشغول وياك... وين سرت أجي يمك!!
ماتبي تقول لي ... رد علي لو مسج تعبت أحاتيك ..
خبرني ش إستوت أمورك عليه؟
_كتب مشاري رداً على راشد_
متألم, مما أنا متألم؟
حار السؤال وأطرق المستفهم
ماذا أحس؟ وآه حزني بعضه
يشكو فأعرفه وبعض مبهم
بي ما علمت من الأسى الدامي وبي
من حرقة الأعماق مالا أعلم
بي من جراح الروح ما أدري وبي
أضعاف ما أدري وما أتوهم
وكأن قلبي في الضلوع جنازة
أمشي بها وحدي وكلي مأتم
أبكي فتبتسم الجراح من البكاء
فكأنها في كل جارحة فم...
البردوني (فلسفة الجراح)
_مسح دموعه التي إنهالت على خديه, ورمى نفسه على أقرب كرسي, متحاشياً نظرات الاستغراب التي ظلت ترمقه ممن حوله_
***********
"في غرفة عذبة"
أفنان: عذووووووووووب.. أفهم ش السالفة أول!!!
عذبة: مصيبة.... شي يحير.. شلون..لالالالا
أنا أكيد كنت بحلم..لا كنت بكابوس!!!
تخيلي... تخيلي تو جاء مشاري.... مشاري جاء!!!
أفنان: شيبي ذا!!!
عذبة: تخيلي .. فيصل ماله دخل بسالفة طلاقي...
بس.. أبوي ناصر....يووووووووووووووه... يا أفنان أبي أفهم الموضوع ..شلون أبوي يرضاه علي شلون!!
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك