رواية انا الضحية وانا الجلاد -48
تركي_يقبل رأس والده_: موب كثير يبه... ماسويت شي عند الي أنت سويته لأبوك...
سعد: وش يدريك باللي سويته لأبوي...ماسويت له شي..
تركي_يغمز بيعنه ويضحك_: علينا!!
ترا كل شي ينعرف.. عمي عبدالله قال لي..
قال لي كل شي..
سعد: وش قال لك؟
تركي: يبـــــــــــــــــه!!
قال لي إنك جلست معه بالمستشفى سنتين كامله ماتطلع إلا ساعة وترجع..
حد ماات أبوي عبدالعزيز.. وقال إنك ماكنت تسمح لأحد يغير له ولا ينظفه..
كنت أنت اللي تسوي له كل شي..
ومات وهو يدعي لك..
سعد_ينظر لتركي وقد إغروقت عيناه بالدموع_: بس أنا غيرك..
أنا كنت مبلشن بأبوي بشبابي موب مثلك...
تركي: يبه الأمور بخواتيمه..
سعد: والله إن ... أبوي الله يرحمه هو اللي يشقي عمره..
ويبين أمشي بالسانتيمتر ... وأنا .. الله يغفر لي.. ما كنت أحب أحد يتدخل بي..
وهنا تصير المشاكل...
كان أبوي يبين أصير طبيب.. وأنا ماحبيت الطب.. وقلت أبروح أدرس طب.. بس رحت ودرست أدب فرنسي... ويوم جيت بالشهاده بغى يموت من القهر.. يالله عمي أبو ماجد فكن منوه..
تركي: ههههههههههههههههه ... والله يبه منتب سهل!!!
سعد: كان دايم يقارنن بماجد.. دايم يقول ماجد رجل وأنت رخمة..
مع إنه يوم حنا صغار كان دايم يقول لعمي إعرس جب لك ولد ترا ولدك ذا ما هناش..
ودايم كان يقول ولدي بيصير دختور وبيعالجك..
ولده اللي صار دكتور .. وأنا فشلته..
تركي: لا يبه .. مافشلته.. شلون تدرس شي أنت ما تحبه..
الطب موب سهل ولا ينفع أحد يدرسه موب باغيه..
وبعدين جدي الله يرحمه على ما سمعت عنه كان صارم.. ويتدخل بكل شي..
مايصير..
سعد: يوم مات أبوي وجيت أنت نذرت على نفسي أخليك على كيفك.. أنت تختار الطريقة اللي تبيه.. والحياة اللي تبيه.. وصرت أرجل الرجال..
تركي: الله يخليك لي دوم.. _يخرج جواله_ يبه أبروح أكلم.. تبي أجيب لك شي؟
سعد: من؟
تركي_يبتسم_: من اللي أطلع عشان أكلمه؟
سعد: أدري... أدري.. رح.. أكيد بتجي أم عيون زغر... الله يعين بس..
تركي_ينحني ويقبل رأس والده_: يالله يبه.. موب مطول..
سعد: لا طول وخذ راحتك... الله يرضى عليك..
***********
"بيت عذبة"
ليلى تتمدد على أريكة بالصالة, مصفرة الوجه وبدا عليها الإرهاق, عذبة تبرد أظافرها ونجلاء تلعب ورق مع نواعم...
نجلاء: لااااااااااااااااا والله غشاشة!!
نواعم: والله!!
كل ما أغلبك تقولين غشاشة!!
عذبة: وه إقصرن حسكن.. فقعتن طبلت إذني..نواعم.. خلي نجلوه عنتس وإبردي لي أظافري..
نواعم: قولي ليليوه..
ليلى: إنقلعي إنتي وياه!!
رايقتن لكم.. ياربيه.. ليت أمي بوه..
نجلاء_وهي تصف الأوراق على الأرض_: وأنتي ما تذكرين أمي إلا لامن صرتي تعبانه ولا متضايقه؟
عذبة: ماغابت أمي عن البال لحظة... نجلاء.. نجلاء!!
نجلاء: نعم.. نواعم خوذي تراهن.. مثل حقاتي...
عذبة: نجلوه...
نجلاء: نعموه... _تنظر لعذبة_ ذبحتين وش تبين؟
عذبة: هاتي جوالي جنبتس..._وتؤشر بعينها لها أن تصمت_
نجلاء: أبشري... _تكمل اللعب_
عذبة: نجلااااااااااااااااااااااااااااااااااااااااء!!
نجلاء: بسم الله وش تبين؟
عذبة: جيبي الجوال...هه من جاء؟
ليلى: واااااااو ماما أمينه...
_تقفز ليلى وتتجه صوب الباب وتضم الدكتورة أمينة, وهي تبكي..
ليلى: والله مشتاقين لك ماما...
د.أمينه: وأنا أكتر حبيباتي..إيش أخباركم؟
ليلى صحيح الكلام اللي قالتوا لي عزبة؟
ليلى: إيه.. بالشهر الثاني..
عذبة: ماتوقعتس تجين مامي..
نجلاء: ليلى وخري عن ماما أمينه ترا حجبتي الرؤية الأفقيه..
د.أمينة: والله أجيت من المطار عليكم على طول.. ليلى .. بشريني بتتغزي مليح؟
الحامل تحتاج فيتامينات.. وكالسيوم.. روحتي راجعتي طبيبة توصف لك فيتامينات وكالسيوم وكبسولات حديد؟
عذبة: ياحبيلتس.. ما قصر عزوز .. موديه للمستشفى قبل لا يجيبه لنا,...
_تجلس د. أمينة على الأريكة وقد إلتفن حولها البنات, ووضعت ليلى رأسها على فخذها وتمددت فيما أخذت د. أمينة تمسد شعرها بلطف_
د.أمينة: نواعم.. شو أخبار أبوكي؟
نواعم: الحمدلله ... بس إنه الحين مشلول نصفي... عاد هو اللحين مع تركي بألمانيا يسوي علاج طبيعي.. الحمدلله يتحسن..
د.أمينة: وأنتي ليش مابتروحي عندو.. بعتقد إنوا لمتكن عندو بتساهم بالعلاج أفضل..مو؟
نواعم: أنا ودي أجلس معه.. بس هو قال لي روحي عشان الجامعة.. رفض إني أعتذر.. يقول يخاف أتعود البطالية...
د.أمينة: له... والله تبغي الجد صادق.. ولدي أخذ إجازة من شغلو وجاء معي للسعودية والله جنن فيا ما رضي يعوّد لشغلو... أنتوا شباب الحين لمن تبطلوا شغل ودراسة ما ترجعوا بالساهل..
إيوه.. وخبريني عنك مدام ليلو شو أخبار عزوز معك؟
ليلى: لاااااااااا..حتى أنتي بعد تقولين عزوز!!!
إسمه عبدالعزيز..
عذبة: إخس.. عزوز..عزوز..
نجلاء: عزوز فتح البزبوز ياويله من العجوز!!
نواعم: ههههههههههههه .. يبتنتحر ليلى...
ليلى: إيه هين ... خل يجي رجله.. أوريها فيه..
د.أمينة: ههههههه والله أنتم ما تفكو خناق!!
نواعم: لا.. من جيت عندهم وهم يتطاقون.. حتى أنا دخلت بالدرجه معهم.. أعاني فراغ خناقي.. تروك موب بوه.. ولقينا هنا مخانقيه واجد..
د.أمينة: بشريني بنتي ليلى _تنحني لتقترب من إذنها لتهمس_ رومانسي متل ما تمنيتي...؟
عذبة_تبتعد وهي تضحك_: لالالالا.. مامن ورا عزوز رومانسية..
د.أمينة_تقرص عذبة_: عمى يا ملقوفة!!
ما سألتك أنا.. أنتي عشتي معو.. مايبين الرجال إلا مع مرتو؟
ليلى_تهز رأسها نافية_ ....
د.أمينة: شو؟
متل ما قالت؟
ليلى_تهز رأسها موافقة_: قبل لآ نجي الرياض.. أول ما جينا من السفر.. شبيت شموع ونثرت ورود وقعدت أنتظره.. إلا يدخل وقبل لا يقول السلام عليكم قال: طافي الكهرب...؟ قلت : لا قال:أجل طفى الشموع كتمينا!!
أنا طاح وجهي ودي اعطيه كف..قهرني...
د.أمينة: هههههههه شو !!
لاه.. مبين خفيف دم زاف..
نجلاء: إلا مبلم زاف..
د.أمينة: ما تيأسي.. يحتاج أكمن سنه تايتعلم رومانسية شوي..
عذبة: اللي ما إنولد رومانسي ما يصير رومانسي فور إيفر...
نواعم: لا مو شرط... أبوي الله يقومه بالعافيه طلع له علوم مع سارة..
د.أمينة: صحيح الرجال بيتغيروا ... بنات تغديتوا؟
أنا هالكة جوع...
عذبة: يالله أقول لهم يحطون الغدا...
نجلاء: أقول .. ليلوه قومي... تعبتي المرة..
د.أمينة: شو أنتي غيرانه؟.. خليها بنتي..
نجلاء: بس هي بنتس؟
د.أمينة: لا والله كل أولاد فرح ولادي... الله يرحمها كانت أكتر من أخت.. كانت ماليه لي دوناياي كلها.. الله يجمعني فيها ياربي.. شو إشتقت لها...
ليلى: حتى أنا إشتقت له... وإشتقت لأبوي..وأبوي ناصر.. وسعود...آآآآآه..دنيا!!!
"ألمانيا"
تركي_يتحدث بالجوال_: شخبارتس؟
هيلة: أنا طيبة بس بشر عن خالي؟
تركيك والله بهذلوا به.. قطع قلبي..
هيلة: ليه ؟
تركي: التمارين الحين صعبه عليه.. تعبت أشوفه يتعذب ولا نيب قادر أسوي له شي..
هيلة: الله يقومه بالعافية..
تركي: آآمين.. هذي الدكتورة جت.. والله ياهي مليغة!!
هيلة: شلون مليغة؟
تركي: يعني قمر...
هيلة: وتقوله بعد!!
تركي: ليه تغارين.؟
هيلة: لا...
بس عاد ماتقوله كذا بسعة وجه...
تركي: طيب طيب لاتصيحين.. الحين كل التعصيبة وأنتي إيقالنتس ماتغارين لو تغارين وش بتسوين؟
هيلة: كان أجي أذبحة..
تركي: أجل ليتس تغارين...
هيلة: لا عاد تركي جد هي حلوة؟
تركي: يووه والله يا أنتي بعد تكابرين.. الحين ماتغارين ليش تسألين ؟
هيلة: ملقوفة..
تركي: وسعي صدرتس.. ياملقوفة هانم.. مافيه أحد بهالدنيا أحسن منتس بعيني..
هيلة: أجل ليش تقول عنه قمر؟
تركي: أستهبل.. مليغة يعني ثقيلة دام..مالغة..
هيلة: أشوا..
تركي: هماتس ماتغارين؟
هيلة: أنا ما أغار.. بس.. لازم أصير مرة وأبلش بخطيبي,,
تركي: هذي نصايح نجلوه الماصلة صح.؟
هيلة: هههه لا..نجلاء تقول لي دايم لا تبلشين بوه حرام عند أبوه..
تركي: طيب وأنتي ورا ماتسمعين كلامه..
هيلة: أنت قايلن لي لاتسمعين كلام نجلاء...
تركي: هيله... ما إشتقتي لي؟
هيلة: وأنا شفتك بغير الملاك؟
ولا تنسى إنك سببت لي رعب..
تركي: أنا رعب!
وش قالوا لك دراكولا!!
تراه بوسة ..بس بوسة!!
هيلة: بعد وش بتسوي أكثر من بوسة؟
تركي: ماتعرفينن زين ولا كان ما سألتي هالسؤال..
هيلة: هاااه..جد وش بتسوي؟
تركي: أبلفعتس طراق..
هيلة: جنب!!
تركي: بس إذا صرتي مؤدبة.. تراي حليل..
هيلة: والله ما يندرى عنك بديت أخاف منك..
تركي: تدرين المفروض إني ما أكلمتس..
هيلة: ليه؟
تركي: لأن ... ضايق صدري...بنفقع من الضيقة ..آآآآآآآآه
هيلة: ليه؟
تركي: أبوي...
هيلة: وش بوه؟
تركي: مابوه شي.. بس... كل أمس يون مانام.. تعبان.. وأنتي إذا دقيتي لازم أطلع وأخليه..
هيلة: .............يعني أنا أزعجتك؟
كنت.. أبوسع صدرك.. خلاص.. ماراح أدق..
تركي: لالا.. مو قصدي أزعجتين.. أنا أصلاً أبي أكلمتس.. لو ما كلمتي أنتي أنا دقيت.. هيلة مو قصدي.. والله..
ياربيه..
هيلة: عادي تركي,... أنا ما زعلت.. لا يضيق صدرك..
تركي: والله ... ؟
هيلة: والله ما زعلت.. أنت مشغول موب فاضي.. وحتى أنا الحين عندي دراسة.. وبعدين أنا أشوف إتصالااتك وأنا بالمدرسة وأدق عليك.. مو إني أبي شي..
لا تدق علي ولانيب زعلة...
تركي: يالبى قلبك.. أنتي .. بصراحة ما أدري شقول.. بصراحة ياهيلة أحلى صدفة جابتن لبيت عذبة عشان أشوفتس...
هيلة: زين تركي إنتبه لنفسك ولا تخلي أبوك دقيقة.. تراه محتاج لك..
تركي: أبشري.. والله إني حظيظ بتس..
**********
"غرفة نجلاء"
نجلاء تتحدث الجوال:
إسمع بندر .. لا تطوله معي وهي قصيرة... مجيد ماراح آخذه.. وقايلتن لعمي هالكلام.. واللي موب عاجبه يطق راسه بالجدار...
لا أسمعك ولا شي.. ما أبيه..ما أبيه.. ياخي فكون.. تراكم ذبحتون أمس مكلم فيصل واليوم أنت ما صارت هذي!!
واللي يقصر منكم تكمله نورة وأم عبدالعزيز وليلى بعد!!
لااااااااااااااااااا ما تسمع...
لا..لا..لا.. مع السلامة..
_تغلق السماعة بغضب وتلتفت على مها التي جلست على الأريكه تتأملها...
مها: وأنتي ليش ماتبينه؟
تتجه نجلاء نحو الباب وتفتحت وتشير للخارج وهي تصرخ_:
إطلعي من غير مطرود إذا جايه بتحاولين تقنعينن. قرارماراح أتراجع عنه تفهمين؟
مها: أوف..أوف... لا... يعني أنتي مستحيل تاخذينه؟
نجلاء: إيه..
مها: ليه؟
نجلاء: إنقلعي مهوه!!
برااااا..برااا_تتجه لها وتشدها من جيب قميصها القطني_
مها: وجع شقيتي فنيلتي!!
نجلاء: فنيله!!
مها: أللي هي.. بس وخري..
نجلاء: لا تجيبين طاريه!!
مها: طيب.. أنا جايتن بقول تس شي...
نجلاء: وشو؟؟بسرعه..!!
مها: طيب روقي..
نجلاء: روقنا.._تجلس على الأريكة الأخرى_
مها: تعرفين مساعد...
نجلاء: من مساعد؟
مها: مساعد..أخو فهد..
نجلاء: إيه..
اللي (..) على نفسي بسبته!!؟
مها: إيه...
نجلاء: وش بوه.. لا تقولين لي دوري لوه مره.. ترا ذوقي بالحريم خياس..
مها: لا... المرة موجوده بس نبي موافقته..
نجلاء: منهي .. ؟
مها: العصلاء المصلاء أم لسانين اللي قاعدتن قبالي..
نجلاء_ترمش بعينيها بسرعة_: أنا؟
مها: نعم..
نجلاء_تنفجر ضاحكة_: هههههههههههه موب صاحي..
أصلاً أهلي ماراح يوافقون.. يقولون أمه أجنبية.. ماراح يوافقون مستحيل..
مها: ماعليتس من أهلتس.. أنتي موافقة مبدأيًا؟
نجلاء: خخخخخخ إذا وافقوا أهلي أنا ماعندي مانع... بس أهلي,.. موب موافقين..
مها: موب شغلتس أهلتس..
نجلاء: تشوفين إن ما عييوا..
مها: والله مساعد رباتي يحلمون يجيهم مثله...
نجلاء: ياشين الثقة الزايدة ومدح النفس...
مها: هين من الحين بديتي تشيطنين علي؟
نجلاء: والله يا أنتي أخذتن بولدكم مطب....
بس لومهما صار ... أمه أجنبية...
مها: أنتي ماتبينه عشان أمه أجنبيه!!؟
نجلاء: لو أمه كافرة ماعلي منه ... بس أهلي ماراح يوافقون!!
مها: يختي الولد انا اللي مربيته.... من تزوجت وهو عندي .. ورجل صالح وعاقل وأمه ما شافه أبد ... إلا قبل سنتين لقى رقمه وراح يسلم عليه...
نجلاء: ألله!!!!
الحين أمه ما إشتاقت لوه.. وهو اللي قعد هالسنين يدور رقمه!!
والله لو أنا منه إن ما أعتب عليه.....
مها: هذي أمه.... وبعدين مافي أم تترك ولده كذا... أهله هم اللي واقفين بينه وبينه عشانهم تهاوشوا مع أبو فهد الله يرحمه عاد جو أخذوا بنتهم وغابت شمسهم وفهد ماخلى شي يدور لهم رقم ولا لقى حد قبل سنتين جاء شاب شامي لم فهد بالمكتب وعرف نفسه إنه رامي إبن مدام صباح وإنه يبي يتعرف على أخوه ويعرفه على أمه...
نجلاء: بعد هالسنين... يوه وش كان شعوره... أحس ماراح يحس به... وبعدين تعالي يالجحود دايم أقولتس ليش مساعد مايروح لأمه تقولوين ما أدري وراح لمه وشافه ولا علمتين!!
وأنا كلش أخره لتس زيــــــــــــــــــــــــــــــــن تشوفين!!
مها: والله جيت وقلت السالفه بس أكيد أنتي موب بوه!!!
********
"القصيم"
تستند نجود على الجدار و وتمسك بيدها على بطنها وباليد الأخرى تسد فمها, إعتصر وجهها ألماً, حاولت أن تكتم صوتها عن خالد المستغرق بالنوم على السرير, حرج صوت خافت وخارت قواها لتجلس عى الأرض, إنكبت على الأرض وهي تتألم بشده, فتح خالد عينه بتثاقل ثم وثب نحوها وأمسك بها وهو يقول:
نجيده.. وش بتس.. تعبانه...
_وضعت نجود رأسها على صدره وأخذت تبكي _
خالد: حبيبتي أوديتس للمستشفى.. قومي إرتاحي على الكنب بجيب عباتس.. أكلم أمي تجي معنا؟
_أشارت بيده رافضه_
خالد_ضمها بقوه وهو يهمس_: موب ولاده إن شاء الله..
باقي إسبوعين... بس لازم نروح للمستشفى ولازم تجي أمي.. أنا ما أعرف أخاف يعطنتس شي مايصلح!!
نجود_تهدأ قليلاً_: لا... خالتي تعبانه.... ماتتحمل تروح معي المستشفى.. خالد لا تخاف مابي شي.. عادي دايم يجي .. بس أبي أروح للرياض أبولد هناك...
متابعه هناك وبروح للدكتورة اللي أنا متابعة عنده...آآآآآآآآآآآآآآآآآآه
خالد: مافيه روحه للرياض قبل مانروح للمستشفى...
نجود: خالد... أبكلم أمي...
خالد/: طيب قومي معي .. يالله حبيبتي خلينا نروح للمستشفى ... وكلمي أمتس بالطريق....
نجود: خالد أنت تعبان.. توك جاي من الدوام واليوم وراك طريق ..إرتاح وقبل مانمشي للرياض أمر المستشفى..
خالد: أقول راحتس أبدى على من أي شي.. يالله قومي غيري لبستس وأبروح أجيب عباتس.. يالله ...
نجود: خالد... مابي شي... أنت زاد وش قومك!!
خالد: قلبي قومن...
نجود: الله يخلي لك قلبي .. يصير لي لحالي..
خالد: والله يا أنتي أنانية!!!
نجود: آآآآآآآآآآآآآآآه.... لاه اليوم موب طبيعي ....
خالد: قومي ... يالله لا تولدين علي بالطريق!!
***********
"غرفة نورة"
نورة: عبدالمجيد... الله يرحم والديك... خلاص...
عبدالمجيد: نورة فكري بعقلتس....
نورة: وأنا أفكر بعقلي...
عبدالمجيد: لا.. أنتي تفكرين بقلبتس... رضى أمي نورة بصير إذا شافتس مبسوطة.. وبندر رجل والله إني متمنيه من قبل لوحده منكن... والحمدلله إنه خطبتس...
نورة:يا خي إنقلـــــــــع يا (.................)
عبدالمجيد_يمسك شعرها ويرفعها على السرير_: يا كلبه... من زينتس... لسانتس ذا أبمكعه عشان تعرفين تتأدبين... نورة ..فكري زين.. العجوز بتفطس وأنتي بتقعدين به!!
_يدخل فيصل ويركض نحوهما ويبعد عبدالمجيد عن نورة التي صمتت ولم ترد أو تتألم وهو يصرخ_: وخـــــــــــــــــــــر عن البنت!!
مهبول_ويمسك برأس نورة ويضوقه بذراعه وهو يصرخ على عبدالمجيد_:
أنت تبيه بالعافيه تاخذ بندر عشان يزوجك نجلاء!!!
لا..حد هنا وبس... عذبت البنت....
عبدالمجيد: أصلاً موضوع نجلاء مو بيد بندر ولا جد بندر.. بس أنا أبي مصلحته وهي غبيه وبتطقه ندامه... ماأبيه تتحسف بعدين..
_يخرج غاضباً ويغلق الباب خلفه بقوة, يلتفت فيصل على نورة الصامته ويجلس بجانبها, أمسك وجهها الذابل بيديه فتدحرجت دموعها , ضمها وإقترب من إذنها هامساً_:
نورة... أفهم اللي تحسين بوه... أنتي تحبين أمي وبتبيعين روحتس عشان ترضينه... وعارفه بنفس الوقت إن راحتس مع بندر...
_إزداد نحيب نورة_
نورة... أصعب شعور بهالدنيا إنتس تضحين ولا أحد يفهم هالتضحية... إنتس تهدمين سعادتس بيدتس عشان تسعدين اللي تحبين...صح؟
أنا جربت هالشعور وجربت بعد إن ما أحد يفهم ليش أنا أسوي كذا... لو هم يشوفون الدنيا بعيوننا صدقين ماراح يلومننا على اللي نسويه...
نورة: عم... مو بس مجيد ... أمي وأبوي وسلمان... بس نجلاء ونجود اللي مراعين موقفي... بس محد من الرجال متفهم علي واللي يقصر من أمي يكمله مجيد ويقعد يقول لي شلون بندر ضايق صدره علي... أنا بعد أشد علي إن بندر يبين.. ليته ما حبن ولا بغان... أنا منب قاصره منب قاصره وجع قلب...
مجيد يقول بتموتين إذا شفتي مرته بعدين ولا إذا تزوجتي واحد ما تبينه بعدين...
تعبت عمي تعب.. خذني معك بريطانيا حد ماينسون السالفه...
أبي أبعد عنهم... أبي أروح... أبي أنسى كل شي...
فيصل: النوري.... الهروب موب حل... تهجين عنهم بس تلقين نفستس تعيشين بوسطهم تفكرين بكل لحظة بهم ماتقدرين تنسين مشاكلهم وهمومهم ويزيد حزنتس لأنتس ماتتذكرينهم إلا بزعلهم عليتس.. و كلامهم الجارح اللي قالوه لتس... مايالغربة حل يا بنت أخوي...
نورة: أجل ليش أنت هجيت....؟
فيصل: عشان ما أضعف وأخرب اللي سويته...
نورة: ههههههههههه والله ياعم تضحكن وأنا ضايقن خلقي...
فيصل: أدري بتقولين إنك تجي وتعفس الدنيا وتروح!!
نورة: .....................
فيصل: عشان كذا .. أبعد بشري وخيري أصرف...
************
"الشرقية"
_شقة منى_
راشد: إيه سعد بيتم معاق طول العمر....
منى: .........................
راشد: يوم أقولج ربي يمهل ولا يهمل........
منى:..........................
راشد: أنتي شفيج تسمعين..؟
منى: إيه....
راشد: زين ردي..أنا أرمس ويا منو!!
منى: شتبيني أقول!!
راشد: شو هالرمسة!!
منى: راشد... مافيه كلام أقوله...
راشد: يعني شبتسوين؟
منى: أدري إن غلطت وايد.. بس ما أقدر أصلح غلطتي...
راشد: أحين أنا جاي الشرقية أروم تروحين وياي ونكلم مشاري وتخبرينه كلش...
منى_تتنهد_: اللي أنا سويته مو شوي.... وأنتا عارف زين مشاري ماينلام لو ذبحني... وبعدين آني بغلق جوالي وبروح أنام ببيت رفيجتي عشان ما يوصل لي... خايفة منه وايد...
راشد: مشاري عاقل...
منى: بس آنا خربت بيته...
راشد: كل طيحه سعد بركة إللي فتحت عيونج...
منى: الله يسامحني من اللي غلطت بحقهم وعذبتهم....
زين راشد موفق... رح كلمه... وتسامح لي منه... وأنا أببعد حد ما يهدى الوضع شويه...
راشد: الله يعيني... ولو إنه مو بصالحي.... بس إدعي ربج ييسر لي....
**********
بيت عذبة
"إحدى غرف نوم الضيوف"
تدخل عذبة على نواعم المستغرقة بالعمل على الحاسب المحمول, إلتفتت نواعم وإبتسمت لعذبة,
عذبة: شتسوين نعنع...
نواعم: شوي وأخرب بيتهم...
عذبة:!!!!!!!!!!!!!
نواعم: البنات الغبيات ... غباء مطلق وثقة عمياء...
عذبة: مافهمت...
نواعم: راسلتني وحده عالخاص تترجاني أخترق حاسب خويها وأخربه عشان صورها بحاسبه... وهذاي قاعده... أيوه خلصت...
وش رايك.... مو يستاهل؟
عذبة:!!!!!!!!!!!!!!!!!!
نواعم:ههههههههه حلو وجهك... كل التعابير تنطق به..
حبيبتي.. أدخل جهازه وأدمره عشان يعرف مرة ثانيه يخترق حاسب أحد ويههده بعد...
عذبة: أنتي هاكر!!؟
نواعم: خطير بعد... بس لا تبوحين بالسر...
تذكرين ذيك الحمله اللي سووها الشباب على مواقع الفساد كنت عضو بالمجموعة..
بس تعبنا والله ... لكن بالنهاية خربنا بيتهم واحد ورا الثاني....
عذبة: أحسه حرام هالشغلة...
نواعم: شوفي انا ما أتطفل على أحد إلا إذا كان غلطان أوريه شغله.. والبنات الغبيات دايم ضحيه اللي يخترقون كمبيوتراتهم ويهددونهم بالصور والمقاطع...
وشو له يحطون صورهم الخاصة ومقاطعهم عالكمبيوترات...
حتى أحيانا يتسلطون على الشباب مو بس البنات....
عذبة: طيب هم يعرفونتس؟
نواعم:لالالالالا... انا ولد... أدخل بإسم ولد... عشان لو دروا إني بنت مارحبوا بي بينهم... يفقدهم رجولتهم....ههههههههه
عذبة: ألبي مش مطمن خالص!!
نواعم: أووووووووووووووو... تدرين تروك يعرف إني هكر وماقال لي شي.. وأنتي تعبط وجهتس... هو وهو رجل ماقال شي!!
ولابعد أقدم له خدمات..ههههههه
والله كان بطران ... بس من تخرج وهو صايرن مالغ....
عذبة: إمممممممم نواعم...تقدرين تطلعين لي الإيميل من وين...
نواعم: تبين تدرين من وين يتكلم اللي بالمسن؟
عذبة: آآآآآآآآيوه..
نواعم: شوربة!!
تعالي إجلسي ........
************
"في غرفة نجلاء"
نورة: والله لو مادخل فيصل كان قلع فروتي...
نجلاء: صايرن عنيف أخوتس...
نورة: آآآآآآآآآآآآآآآآآآآآآآآآآآآه... بموت... دعيت أموت وأرتاح...
نجلاء: وش يدريتس إنتس بترتاحين... يمكن تعذبين عشانتس تأخرين صلاة العصر..
نورة: وجع ياحيوانه!!
يمه.. لا... ربي كريم...
نجلاء: الله كريم بس شديد العقاب...
نورة: أقول إسكتي...
نجلاء: نورة... منقرضة...
نورة: ما أنام لا ليل ولا نهار... ضايق خلقي...
نجلاء: أدري يا قلبي... تعالي إجلسي عندي خلتس زي نواعم جت وسكنت عندنا..
نورة:أمي ماترضى....
نجلاء: طيب قومي نروح نتمشى بالحديقة بقول لتس شي خطير...لا..صح بيجي بندر اليوم..
نورة: لا تقوليـــــــــــــــــــــــــــن!!!
نجلاء: أصلا ما تغيب عينه ... دايم عنده شغل بذا..
بس ياهو غثن يبين آخذ أخوتس...
نورة: لا لا تاخذينه الحيوان..
نجلاء: لا توصين... إنخطبت..
نورة: وشــــــــــــــــــــــو!!
لا.. ومجيد حرام!!
نجلاء: لا والله مجيد حرام... وبندر ألف وحده تتمناه!!
نورة: نجلاء أنا ما عييت آخذ بندر عناد زيتس... أنا عشان أمي نورة... موب بيدي أسوي شي.. بس أنتي بكلمه إيه تفكين أزمات...
نجلاء: والله لو على قطع رقبتي ما أخذت أخوتس عشان أبوتس يقول لي البدوية..
أنا مليت من طنازتهم وأنا بحسبه بنتهم وتبينن بعد آخذ ولدهم...!!
وع
نورة_تضربها بقبضتها_: ذولا أهلي يالعنز!!!
************
"غرفة نواعم"
تلتفت نواعم على عذبة المتمدده على السرير تقرأ ديوان شعري,
نواعم: عذبوة... وفاء خليفة تكلمك من أمريكا...
من ديرة عمتك...كولورادو
عذبة_تجلس_: وشو؟
نواعم: من أمريكا,,... يمكنه من صديقات عمتك أو يمكن صدفة...
عذبة: متأكدة أنتي؟
تو شفتي يوم أكلمه تقول لي لندن عندنا مطر....
نواعم: يمكن ماتبغى تعرفين منهي..
عذبة: ليش تكذب علي!!
لا... آخر من توقعت عمتي ريم...!!
لااااااااااااااااه
كنت أشك إنه تعرفن... تسألن دايم عن خواتي وعن حالي..\
دايم أهاوشه وتطول اعصابه علي...
بس...
بس ليش تهك علي طول هالسنين!!
كلش قلته له... لو كنت أدري إنه هي ما قلت كلمه وحده!!
قهرررررررررر...قهرررررررررررر
نواعم: طيب إحمدي ربك... إنه مو أحد كارهك بيفضحك ولا يسوي لك شي..
وبعدين مو شرط هي... يمكن احد معه بنفس المدينة...
عذبة: وحده ثانية شتبي بوحده مثلي يتمينه ضايعة هايته.. طول عمري بنيت سور على همومي ومخاوفي ما بحت لأحد مثله هي ...
كتمت همومي وحبي وخوفي وفرحي .... عن الناس كله إلا هي و... وبالآخر تصير عمتي!!
نواعم: عذبة... أنتي تصيحين!!؟
عذبة: إيه أصيح.. أصيح من الحرة من القهر... ليش تسوي بي عمتي كذا...
نواعم: مو أكيد يمكن مو هي!!
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك