رواية انا الضحية وانا الجلاد -43
أللي أقصده... إن أنتي تقبلتي عبدالعزيز وإحترمتيه.... بيعطيتس عمره....
وإن أنتي تعاملتي معه كذا برفعه خشم وبتصيد زلات, وفرض أرآء ترا مب خاسر إلا أنتي... لأن عبدالعزيز إنسان هادي ومسالم لكنه ماينسى...
فلا تحطين حرب بينكم أنتي مب قده...
ليلى: حشى!!
بندر: إيه.... إن عاندتيه ورفعتي خشمتس عليه ماراح يزعل... بس بينسحب بصمت...
وأعتقد أسوأ شيء بحياة المرأة إنه تعيش مع رجل بجسمه بس....
وإذا إكتشفتي ذاك اليوم إن عبدالعزيز طاردتس من قلبه....
إنسي تقدرين تدقين قلبه مرة ثانية...
لأن قلوب الرجال بقفول .... إن قفلت ما تفتح....
ليلى: ..................كلامك يحير...
بندر: لا يحير ولا شيء.... بس تذكري إن الرجال قصور ماتدخل إلا من أبوابه...
_تتأمل ليلى بندر وهو يتجه لباب الغرفة , تلمح بعينيه ذات الشرود رغم أنه أفضى عن ما يقلقه, وحين أمسك بندر بعروة الباب ليخرج, صرخت ليلى قائلة_:
بندر....هيه!!
يلتفت بندر ويهز رأسه مستفهماً...
ليلى: تعال أبقول لك شي...
تعال...إجلس... أنا سمعت لك بس أنت ما سمعت لي...
بندر_وهو يعود_: ومالوه ليش مانسمع.....
ليلى: أكيد تعتبرني أختك...تو قلت....؟
بندر_ينظر لها بإستغراب_
ليلى: ودي أقولك شي.... إسمع إذا أنت تحب نورة قل لنجلاء تقول له...
بندر_قطب جبينه_: خيــــــــــــــــــــــــر حنا مصاريه !!
ليلى:لالا... لا تفهمن غلط... يعني لمن تتقدم لنورة وأنت بس خاطب...
غير لمن تتقدم له وأنت عاشق...
بندر_يقف ليخرج_: منهبله أنتي!!
البيت ما يطق إلا من أبوابه!!
ليلى: لا.... خل نورة تستانس إنك تحبها ترا ما فيه شعور يساوي شعورك لمن تحس إن أحد يحبك....
وااااااااااااو حاسد نورة شوية فرحه مع خجل أنثوي!!!
بندر_وهو يخرج_: أقول تصبحين على خير... مير دخلي البنات لا تخلينهن بالحديقة...
ليلى: تعال إصبر أنا أتكلم جد!!!
طلع ذا!!
إخس يالرومانسي الخلوق... الحين هذا من جده يحب نورة ولا يستهبل!!
غريب... بس أنا اللي بقول لنجلاء... وخلك يا بندر تعرف تطلع وأنا أتكلم معك...
هين....
_ترفع سماعة الهاتف وتتصل بجوال نجلاء_:
ألو... نجلاء... قولي لعبير بندر يقول تدخل الحين....
وتعالي أبيك بموضوع خاص....
إيه أنتي ... أكيد لحالك ... لا تجيبين الشلة...
يالله أتحراك...
**********
"في الفندق"
يدخل عبدالعزيز الغرفة ويضع باقة ليلى على أقرب طاولة , تتبعه ليلى بهدوء, جلس على الأريكة, وسحب شماغة وعقاله مع الطاقية بفوضوية ورماها على السرير وإلتفتت على ليلى التي كشفت عن وجهها , بدت وكأنها حورية , وجهها المتلألأ وشفتيها الصغيرتان والممتلئان, أنفها الأشم وعينيها الواسعتان والمكحولتان بعناية, مع كل رمشة تبدو بشكل أجمل عما سبق, أشاح عبدالعزيز عنها وحك شعره محاولاً أن لا يبدي إعجابه بجماله الباهر وهو يقول_:
وش تنتظرين.... تبين أجي أطرق عباتس بعد... علقي عباتس على المعلاق ولا خليه عليتس إذا تبين... و...صح وش تبين عشاء...؟
ليلى:!!!!!!!!!!!!!!!!
عبدالعزيز: أكيد جوعانه.... انا متعشي... بس ما أدري عنتس؟
ليلى_تبتسم_: إمممممم.... أبي مويه....
عطشانه...
_تخلع عبائتها وتعلقها على العلاق القريب منها, وتجلس على الأريكه وتتأمل عبدالعزيز الذي إتجه للثلاجه وأخرج منها قارورة كبيرة, متوسط الطول ذو بشرة تميل للسمرة أسود الشعر, بضع من الشعرات قد إكتست البياض, عاد وهويلعب بالقارورة, يرميها لأعلى ويمسكها بحركة سريعه, وحين إقترب من ليلى صرخت وهي تبعد:
يمه... يمه... راسي أبيه ... إمسكها...عبدالعزيز!!
_يمسك عبدالعزيز القارورة ويمدها لها وهو يضحك_:
بسم الله عليتس... تخافين على راستس!!
ليلى: يوووووووووووه كنك حركات سعود... الله يرحمه ...
عبدالعزيز: إيه سعيدان الله يرحمه يحب الإستفزاز....
تدرين كد مرة سطح مفتاح سيارتي فوق الملحق , وقال لي رح إجبه والله لو ما تدخل عمي ناصر إن ساويته بالأرض!!
ليلى_تنظر بخبث_: ساويته بالأرض ولا هو اللي كان بيساويك لوما تدخل جدي!!؟
عبدالعزيز_يضحك ويفتح القارورة_: هههههه بديت أنا وهو ما قصر بس عمي فكنا...
بس والله أنا أول جلدته...عطيته مخمس ملكي...
ليلى: وبعدين؟
عبدالعزيز_يحك شعرة وهو ممسكاً القارورة_: ما أدري شلون صار راسي تحت ورجليني فوق....
ليلى: إيه الله يهديه ... قصدي يرحمه... كان دايم يشقلبنا!!
وأمي تصارخ عليه" ياإبني الله يهديك خل البنات بحالهن".....
الله يازين ذيك الأيام...
عبدالعزيز: وجع طاحت يدي!!
خوذي إشربي وإلا بشرب أنا....
ليلى: شلون أشرب!!
عبدالعزيز: كذا..._ويشرب من القارورة مصدراً صوت من حنجرته_
ليلى: مافيه كاس!!؟
عبدالعزيز: خوذي إشربي... وشو لوه كاس!!
ماتدرين من مغسل كيسانهم... إشربي!!
ترا أبكمله...
ليلى_تنظر للقارورة وبدت مترددة_: طيب...
عبدالعزيز: ولا ماتشتهين عقبي؟
ليلى: لا.... عسل...
عبدالعزيز_يحمر وجهه_: إصبري أبجيب لتس كاس...
ليلى: لا... ما أدري من مغسله....
حاسدني العسل يعني...
عبدالعزيز: والله العسل أنتي..............
***********
"في الحديقة"
فاتن تمسك بجوالها , بدت غاضبة, إتجهت لزاوية بعيده وإتصلت
ألو...منوه يالكلبه!!
منى: وعليكم السلام يمه...
فاتن: مانيب أمك!!
منى: يوووووووه إذا مانتب أمي ليش متصله علي عيل !!
أوووووووف...
فاتن: أنتي ما تخافين ربك...
أنا أمك تكلميني كذا!!
منى: هـــــــــــــــــــــو مو أنتي من شوي تقولين آني مو أمج!!
فاتن: كولي تبن...
منى: شتبين أنتي إخلصي علينا!!
فاتن: لاحول ولا قوه... والله إني كنت ما أرفع صوتي على أمي..
منين أنتي جايه ما أدري!!
منى: جايه من بطنج...
فاتن: ليتي ما جبت أم محمد تعاوني بالشغل وأخذت إجازة عشان ما تطيحين...
ليتك طحتي كان أنا بخير... كان ما تفشلت ...
كلن يسألني عنك ... إستحيت ... شقول زواج بنت خالتها وما تحضر!!
منى: شسوي لها ذي ... كل يوم معرسه شكل...
أنا فاضيه أيي!!
فاتن: لا قولي منقهره إنها خذت طليقك قوليها... عادي... ترا كل الناس قالوها...
منى: خلهم يقولون اللي يقولون....
أنا مب زي بنت أختج الهبله اللي ترقص بعرس حبيبها عشان تسكت الناس...
وليت الناس سكتت... شافو الدم يوم سال من يدها... تستاهل ...
وعقبال ما يسيل دم معاريسكم اللي فرحانين فيهم بحادث... يتقطعون تقطع...
وبجمع قطعهم بيدي والله ما بذرف ولا دمعه...
فاتن: .................................
منى: يمه؟
فاتن: أنا مب أمك... أنتي مو بنتي.... شلون تقولين كذا عن بناتي...
قلبك أسود... أسود... حسبي الله ونعم الوكيل...
منى: أي بناتج....ذولي بنات فرح!!
فرح اللي دايم شايفه حالها عليج وحاسدتج شربة الماي..
فرح اللي حشت راس عبدالعزيز علي....
تدرين ليش؟
لأنها تبيج أنتي دايم بذيلها... دايم تبي تصير إهي المتفضله عليج...
ماتبيج تناسبين .........
فاتن: بس...بس.... يكفيني طعون... حرام عليج...حرام...
هذي أختي ولا تبي لي إلا كل خير....
عمرها يوم ما فرقتني عن نفسها وعن بناتها....
إذلفي ما أبي أسمع صوتك... ما أبيك... ما أبي سواد قلبك...
الله لا يبارك فيك قولي آمين...الله لا يبارك فيك...
_بعد إسبوع_
"في الصالة"
أم عبدالعزيز: تو مكلمة عزوز... ياحبي له... يقول يبيني أجهز له المطبخ....
أم عبدالله_تكتم صوت التلفزيون_: وشو؟
أبو عبدالعزيز: مب عزوز بيسكن ببيتنا اللي بالخبر...
يبي أمه تجهز له المطبخ... أغديه تروح بكرا مع طباختهم وسلمان...
يشوفون وش ناقص... يكملونه...
أم عبدالله: وش بينقصه ؟
مير دلع لازم يجيبون كلش جديد... فسق الله لا يبلانا...
أم عبدالعزيز: لا والله يا خاله ... حنا نجيه طرقيه... وهم بيسكنون فيه...
يبي لهم... مير متى بنسافر عشان أشوف كم معنا وقت...
أم عبدالله: وه... رجيلاتي توجعن.... مانبي نروح مطاليا.. ولا مسانيا...
كله مرافع ومطامن... خلونا على دندل أحسن...
سلمان: يبه.... الحين مطاليا إيطاليا ومسانيا وشي؟
_يعض أبو عبدالعزيز شفته ليسكت سلمان_
نورة: لا تطنز على أمي نورة.... مسانيا إسبانيا...
أم عبدالعزيز: خالتي صيري بالعربيه.... ماعلى رجيلاتتس باس...
سلمان: يبه.. ترا عندي شغل ما أبي أروح مع أمي للشرقية...
أم عبدالله_تضربه بالعصا_: هر!!
يا إبن الحمار!!
بس تطنز ولامن جاء النفع ما تنفع!!!
أبو عبدالعزيز_يلتفت على نورة_: ناه أمي... تسبن وأنا بوه...
نورة: عادي... تحدث في أكبر العوائل...
سلمان: يمه عاد ... وش ذا!!
ورا ما يروح مجيد الدلخ...
أم عبدالعزيز: لا تقول عن أخوك الكبير كذا!!
أبو عبدالعزيز: هذولا ربات الشيبان!!
قوموا تقلعوا.... يالله نورة... روحي جيبي لابتوبي على المكتب بغرفتي...
شوي شوي تركدي... ما أبيه يجي كسر...
أم عبدالله: بعدي النوري... ركادتن تمشي على الأرض...
نوير ما تكسر شي... ثقل بنيتي.. بعدي والله... يا حبي له تسمع الكلام...
_تضم نورة جدتها وتقبلها_: الله يخليتس يمه ... طالعتن عليتس...
سلمان: يمه نورة تراه تسبتس.... طالعتن عليتس.... لو أنتي مثله كان ما جبتي أحد ...
يطيحون من شهر الحمل الأول من زود الركادة...
_لم تلتف الجده لسلمان, وأخذت تتأمل نورة التي تصعد الدرج وحين ذهبت إلتفت عبدالله على والدته قائلاً:_
هاه... يمه وش أرد على الناس... فشله منهم...
أم عبدالله_دون أن تلتفت _:أقول لا...
أم عبدالعزيز: الله يهديتس يا خاله....!!
الرجال يخطب ونفرط حنا بوه... بندر ... منهو أبوه ومنهو هو...
عقل وثقل وأخلاق... وماسك حده...
وش تبين بعد!!
لا تخربين على البنت...
أم عبدالله: البنت بنتي....
أبو عبدالعزيز: إيه يمه البنت بنتس... بس...
أم عبدالله_تستند على عصاها وتقف بغضب_: الحين أنت جاين تشاورن!!؟
أبو عبدالعزيز: إيه يمه....
أم عبدالله: وأنا أقول لا... وبس...لا ترد الكلمه...
_أقفت وهي تسير بغضب ويصدر عصاها صوت على البلاط_
سلمان: يبه... ليش هي معصبه....
أبو عبدالعزيز: ماتنلام.... قلبه يتقطع... خايفه...
سلمان: ليش خايفة؟
أبو عبدالعزيز: خايفتن يصير لنورة مثل ماصار للطيفة أختي الله يرحمه...
سلمان: عمتي لطيفة اللي مايته من قبل ما تولد نجود؟
_يهز أبوعبدالعزيز رأسه , تلتفت أم عبدالعزيزوهي تضرب كفيها ببعضهما_وتقول:
طيب ... الزمن إختلف... ورجال الحين مب مثل رجال أول...
وبندر أكيد مب مسوي سوات رجل أختك!!
سلمان: وش سالفته!!
مب هي ماتت بولاده؟
أم عبدالعزيز: لا.... وإيه...
سلمان: شلون يعني؟
أم عبدالعزيز: الله يرحمه.... كانت تشبه نورة... ماتقول إلا إن نورة بنته...
بس سبحان اللي خلق وفرق...
***********
***********
"الجزء الخامس والأربعين"
"في الصالة"
عذبة تتكلم بالجوال
مجيد إسمع... الولد صغير على الشغل بالشركة..
أقل ماهنا يكمل الثانوي...
عبدالمجيد: ألحين أبعرف ... من قالتس ؟
عذبة: موب شغلك من قال لي... شغلي تخلي هالبزر اللي أنت ضافه يكمل دراسته
عبدالمجيد: وش دخلتس بوه... أنتي أمه...
عذبة: حرام يضيع مستقبله...
عبدالمجيد: أقول عاد لامن كمل الثانوي الوظايف تحراو...!!؟
يحمد ربه... وظيفته ذي مايحصله واحد دافن عمره خمس سنين بالحاسب...
عذبة: يعني أنت تقوله...هو مو مؤهل...
عبدالمجيد: إسمعي يا مرة...
عذبة: إسمي عذبة لو سمحت...
عبدالمجيد: والكووووبة...
عذبة: مجيد إذا ما إحترمت نفسك لا تلومن إذا غلطت عليك...
لسانك طايل هاليومين...
عبدالمجيد: إسمعي يا عذبة...
الولد يتيم... وشاطر بالحاسب... شاطر مرة... حتى المهندس اللي بالشركة مرة مدحة وقال إن مستواه أحسن من مستوى اللي قبله... واللي كان متخصص حاسب...
حنا محتاجينه...
وهو محتاج الوظيفة ... يكد على خواته حرام عليتس تقطعين رزقه...
إحتسبي بوه الأجر... يتيم ويكد على أيتام...ما لأهله غيره ولد!!
عذبة:...................
عبدالمجيد: وش قلتي أفنشه!!
عذبة: لا... بس يجي للشركه بعد المدرسه...
عبدالمجيد: خير!!
عذبة: خلن أكمل... يجي للشركة ويسوي شغله بس وهو يدرس...
وبالعطل يجي دوام كامل, وراتبه يمشي زي ماهو بالعطله ولا بالدراسه...
وأنت أقنعه إننا ما نقدر نعطيه وظيفة ثابته إلا إذا تخرج من الثانوي بمعدل..
عشان الشركة تدرسة بأي جامعة تناسب تخصصه ويكون موظف معه شهاده...
ويصير متعاون معنا وهو يدرس بالجامعة...وإذا خلص الجامعه يجي عندنا بوظيفة ثابته...
عبدالمجيد: نكد على عميان حنا!!
خلاص موب مشتغل يذلف... موب بعد ندرسه على حسابنا... أخاف يورينا بياض رجليه ويفرك...
عذبة: مو ب يتيم ويكد على أيتام ... نحتسب بوه الأجر..
_دخلت نورة من الخارج شاحبة الوجه, إتجهت للدرج مباشرة دون أن تلقي التحيه على عذبة_
عبدالمجيد: طيب... باقي شي ثاني؟
عذبة: هاه!!
إيه... لاعمرك تغيفلن وتلعب من وراي... ولا تغلط بالكلام...
سلام..
_أغلقت السماعة وهي ترقب نورة تصعد الدرج, بدت قلقه عليها_
***********
"في غرفة نجلاء"
نجلاء منكبة على السرير, تجرب جهازها الجوال الذي إشترته للتو..
ينفتح الباب بقوة, تدخل نورة وترمي نفسها بجانبها, إلتفتت نجلاء بذهول ونظرت لنورة الشاحبة والتي إغروقت عيانها بالدموع, شفتيها ترتعشان
نجلاء: جنب!! وش بتس؟
نورة: أمي نورة ,,,,أمي نورة معيه آخذ بندر...
نجلاء: طااااعووووووش!!
ليه؟
نورة: ما أدري...تقول ما أبي يصير له زي بنتي لطيفة...
نجلاء: لطيفة !!
اللي مايته من زمان!!؟
وش جاب طاريه,,, ولا على حظتس تذكرت عمتي إن له بنتن مايته!!
نورة: ما أدري وش جاب طاريه...ما أدري...
بس اللي أدري عنوه إن أمي معيه...
نجلاء: طيب وش سالفة عمتس!!
نورة: أنا أدري عنه!!
أبي أدري... سألت نجود وقالت ما أدري...
نجلاء: خن نسأل عذبة!!
نورة: وش إيدري عذبة!!
نجلاء:كل تاريخ العايلة تعرفه... حتى أهلي تعرف عنهم أكثر مما اعرف...
أبوي ناصر كان دايم يقرق عليه...
نورة: توقعين تدري ليش؟
نجلاء: أكيد ... أفا عليتس... وبعدين لو ما تدري أسأل أمي عذبة..
ولا عمتي مها...
نورة: لالا.. أخاف يدرون إني أبي بندر...
نجلاء: وإذ دروا!!!
وين كلامتس عن الحب والتضحيه...
يوم طق بابتس ما تبين أحد يدري!!
نورة: لا.. لا تسألين عذبة
_دخلت عذبة بهدوء ووقفت بجانب نورة وقالت_:
وشو اللي ماتبينه تسألن؟!!
نورة: بسم الله منيل طلعتي؟
عذبة: عاد أحد غيرتس يسأل هالسؤال.... وش بتس؟
.نورة: مابي شي....
عذبة: متى بتسافرون؟
نورة: الأسبوع الجاي يمكن....
عذبة: يمكن!!
نورة: وه ما أدري لامن قالوا يالله مشيت...
نجلاء: عذبة ... وش سالفة لطيفة عمة نورة؟
عذبة: لطيفة!!!
ليش تسألين الحين وش جاب طاريه؟
نجلاء: لقافة .... نورة تبي تدري عن عمته...
عذبة:أها.... لطيفة بنت عمي...
سالفته سالفه الله يرحمه....
نجلاء: وشي؟
عذبة_تقطب جبينها وتنظر لنجلاء بريبة_: طيب وش جاب طاريه الحين؟
نورة: حرام الواحد يبي يعرف عن عمته؟
عذبة: لا... بس...
نجلاء: عذبة بلا ملاغه تكفين قولي لنا السالفة....!!
عذبة: طيب....
*****
________________________________________
ينزل عبدالمجيد وهو يحمل جواله, بدى غاضبا, قابله فيصل قادماً من المطبخ وهو يحمل كوب من الشاي, نظر عبدالمجيد لفيصل وإنفجر غاضبا وهو يصرخ:
الحين ذي وش سالفته!!
كل شي لازم يمر من تحت مناخيره!!
ذبحتنا ما تخلي اللقافه عنه....
والله حااااااااااااااااااااله!!
كلش يوصل له...
أكيد هالشايب اللي تقوله بابا ماهر!!
مصدق إنه أبوه...
أستغفر الله العظيم..
فيصل_يرشف الشاي ويهز رأسه قائلاً:
أح حااار..لطع لساني...
منهي ؟
عذبة؟
عبدالمجيد: ومن غيره!!
شف لي حل معه ياخي!!
_يعرض فيصل ذاهبا للصاله الرئيسية حيث يجلس سعد وأبوعبدالعزيز وهو يقول_:
لو بشوف لك معه حل ... أشوف لنفسي أول....
موب؟!!
عبدالمجيد: شفلي وشف لك!!
فيصل: أقول تعال تقهو مع عمانك وبرد ...
ترا الحرارة تجيب الضغط والسكر إسأل سعد...
سعد: هه..هه.. تطنز!!
إيه ماتدري يمكن ربي يبلاك..
فيصل: لا ... أنا يمكن يجين السكر هالحين..موب لامن طقيت الخمسين...
أنا ومجيد بتمرضنا عذيب....
"في غرفة نجلاء"
عذبة: وكانت دلاله عمتي أم عبدالله ... أنا ما أعرفه... ماتت بعد ولادتي بكم شهر...
وخطبه واحد معروف بمرجلته وسمعته واصله آخر الدنيا...
عاد أبوي ناصر كان هو ولي أمره لأن عمي عبدالعزيز كان متوفي قبله بسنتين...تقريباً..وعيا قال أخاف ماتمشي معه...
لأنه مدللـه وماتشيل القرطاسه من الأرض وتدخل على ذا أربع وعشرين ساعه ذبايح وعزايم... بس عمتي ركبت راسه..تقول الرجال لامن صار سنع ما يضر البنت لو تعلم..حتى هي كانت من راي أمه...
وبعدين تزوجته وما مر أقل من سنه إلا وهي تعرف تطبخ الذبيحه ... ودايم عنده عزايم, وعيا تدخل بيته شغاله ...
نورة: طيب .... والمشكله وين ... وش اللي موته طبخ الذبايح؟
عذبة: لا... يقول أبوي ناصر الله يرحمه إنه كانت حامل أول حمل له وكانت بالشهر الخامس.. الظاهر الخامس... وكان الحمل موب ثابت... راحت تراجع وقالوا له لا تتحركين... وطلعت من المستشفى وجت للبيت وجاء رجله ضيوف وذبح الذبيحه ودخله عليه, قامت المسكينه وبدت تشتغل وهي تعبانه...
ويوم شالت القدر اللي فيه اللحم بتحطه على ذاك اللي يطبخون عليه على الأرض...
ما أدري شيسمونه...
نورة: اللي هو...بعدين..؟
نجلاء: إبلعي تسبدتس!!
خليه تكمل...وه..
مشتبه أم عبدالله....
عذبة: وه لاتهاوشن!!
إيه هي شالت القدر الثقيل وهي أصلاً حمله موب ثابت, جاه نزيف مره قوي,
وداه زوجه للمستشفى ومالحقوا عليه نزفت واجد وماتت...
وهذي السالفة...
نجلاء: أكيد عمتي أم عبدالله متقطع قلبه... أكيد تحس إنه هي السبب بموت بنته...
ياحرام....
_نهضت نورة دون أن تنبس ببنت شفه , خرجت مسرعه, وأغلقت باب الغرفة بقوة_
نجلاء: هيه النوري!!
وين بتروحين؟
عذبة: وش به موب مظبوطه؟
نجلاء: والله .....
عذبة: وش سالفته؟
وش جاب عمته لطيفة الحين على باله؟
نجلاء: أمه نورة معيه تتزوج بندر خايفه تموت زي بنته اللي ماتت...
تبي تزوجه ولد صديقته أم هشام....
عذبة: هشام ولد أم هشام ماغيره!!
نجلاء: ليه تعرفينه أنتي؟
عذبة: لا... بس لا تقولين له شي... خطب ليلى بس عييت...
نجلاء:والله أنتس خبله وش جابوه لمشاري....
بس فيصل أحسن منهم كلهم...
عذبة: أقول ليلى!!
نجلاء: معليش...سمعت غلط....
عذبة: صح هشام بيعيشه مثل عيشة أهله بس.... ما أدري أحس إن بندر أحسن منه...
بندر أرجل منه... بندر موب عشانه أخوي... بس مافي مثله...
تبين الجد والله لو هو موب أخونا كان خطبته ليلى ولا لتس...
نجلاء: ليش ماتخطبينه لنفستس؟
عذبة: هــــــــــــــــــــــــو!!
وفيصل وين راح؟
نجلاء: أها.... والله ما أدري عنتس أنتي وياه...
عذبة: طيب..نورة وش رايه؟
نجلاء: بيني وبينتس نورة من زمان وهي تبيه... وبندر بعد يموت على ترابه...
بس هالعجوز شكله بتنشب لهم...
عذبة: لا والله!!
يموت على ترابه!!
بندر!!
معليش لو أحد ثاني... بس بندر ما أصدق...
نجلاء: وه كان دايم يتحايل ويسأل عنه بطريقه غير مباشرة...
كنت لازم أجيب طاريه عنده... وما أدري ليش...
وإكتشفت بالآخر إنه هو اللي يجرن وأنا ما أدري ...
لا ومسوي ثقل ولا يهتم ولا يلتفت وأنا أتكلم عنه...
بس ليلى فضحته...
خخخخخخخ
عذبة_تعض إصبعها_:بس مو من حق أحد يحرمهم من بعض....
لازم أحد يقول لعمتي لا...
نجلاء_بسخرية_: منهو؟
تعرفينه ما تكسر له كلمه...
من أولهم لآخرهم بس سمع وطاعه...
من اللي بيجي الحين وبيقول له وقفي أنتي غلطانه..
عذبة: أنا,,,,
بندر غير منصور!!
نجلاء: مين منصور؟
عذبة: رجل لطيفة الله يرحمه..
نجلاء: تقدرين؟!!
عذبة_تبتسم_: قدرت أوقف بوجه عياله كلهم ما أقدر أواجهه هي...
وبعدين وقفت بوجهه يوم كانت بتغصبن على ولده...
نجلاء: هه...وقفتي بوجهه!!
إلا قولي خليت أمي وأبوي ناصر يفكونن منه...
نسيتي شلون طيرت أمي الله يرحمه...
عذبة_أشاحت بوجهها_: بس... أنا الحين أقوى ...
نجلاء: العجز شياطين....
عذبة:هههههههههههه
لا.... أعرف شلون ألف راسه...
*********
"في الصالة"
سعد: لا مايصير!!
فيصل: أنت ما أيست منه للحين!!
للحين تفكر بفلوسه وطمعان به... ماتنب محلصن من وراه هلله...
عبدالمجيد: هدو أصواتكم شباب!!
أبو عبدالله: بس والله ظلم... أنا بيوم العرس عيا يجين النوم...
حنا ظالمينه وبالذات أنت يا فيصل...
لو كانت بنتي مارضيت تصير معلقه سنتين...
والله ماجد ما يرضاه لبنته...
فيصل: بنته راضيته لنفسه...
سعد: لا ما رضته.... وش بتقول يعني... بنت وتستحي.. وبعدين من تقول له...
من بيفزع له... حنا وأهلك ويكفي اللي صار قبل...
أكيد إنه خايفه إننا نحسبه تبي ترجع لمشاري...
لازم تشوف حل...
فيصل: ماعليكم من أنا وياه....
**********
"في الفناء الخلفي للبيت"
أقبلت عذبة تضع "شرشف" على رأسها, دخلت المطبخ وتسللت عبر الدرج الجانبي, قطعت الصالة نحو جناح أم عبدالله وتسلل لمسمعها صوت جدال الأخوه بالصالة الأرضية...
أبو عبدالعزيز: طيب لا ترفع صوتك علي... أنا أبوك!!
فيصل: لا غلطان... أنا أبوي مات... أبوي عبدالعزيز بالأسم.. وأبوي اللي عرفته ناصر... لكن عبدالله _ويؤشر عليه_اللي أعرفه أبو عياله وبس...
سعد: مو وقت تصفيه حسابات..... يارجال تتزوج عذبة قبل نهايه العطله...
يا رجال تفكه من شرك وتخليه تشوف مصلحته...
كل اللي كبره متزوجات... ماترحمه أنت!!
فيصل_ينظر لسعد نظرة إستحقار وسخرية_: لاااااه... إسمعوا من اللي يتكلم بالرحمه...
_يبتسم_أستغفر الله...والله شر البليه ما يضحك...
أبو عبدالعزيز: فيصل لا تطنز حنا جادين!!
إسمع أنا أبكلم البنت وأبسأله ... إن قالت إنك مزعله بشي... بفركش الخطبه...
وأبعلنه للناس... البنت موب مخطوبه...
سعد: لا والله!!
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك