رواية انا الضحية وانا الجلاد -39
عبدالمجيد: شلون أثبت له ... وهي ردتن ووافقت على تروك .. اللي نكبه بالآخر...
نورة: أصلاً..._يرفع عبدالمجيد يده لفمه مشيرا لها بأن تصمت ويرفع صوت المذياع حيث يستمر الشاعر بإلقاء أحد قصائده...:
تـــخـــيـــلـــوا..!!
إن الـقـصيد إلـلـي كـتبت ..
كـــــل الــقـصـيـد..
أصـــبــح كـــــذب..
تـــخـــيـــلـــوا..!!
أصــدق إحـساس فـزماني..
يــصــبـح كـــــذب..
تـــخـــيـــلـــوا..!!
إنـي مـاكنت الوحيد في قلبها..
تـخـيلوا ..!! إنـي الـوحيد..
إلـــلـــي أبــــــد..
مـا قـد سـكن فـي قـلبها..!!
والغريب .. أحبها .. إلى هلحين ..
أحـــــبـــــهــــا..
تـــخـــيـــلــوا ..!!
_
وتعلو هاله من التصفيق, تغلق نورة المذياع بغضب_ يلتفت عبدالمجيد قائلاً:
كنت أظن الشعار كذابين... بس ليه كل ما ألتفت حولي أشوف قصايدهم واقع...
يمكن صايره لهم... بس مستحيل... كيف قلوبهم تتحمل كل هالعذاب...
خيانه المرة طبع متأصل بالبشرية...المرة خاينه وما تستاهل أحد يحبه..
نورة_بغضب_:
وش تقصد مجيدوه... إفهم زين... نجلاء... ما تحب تركي أوتكرهك...
بس تصرفات تركي تختلف عن تصرفاتك.... تركي يبدي مصلحتهن على مصلحته..
وأنت لا... مصلحتك الأول وبعدين عاد الناس.. وياما حذرتك...
وعلى فكرة ترا أنا كنت موجوده يوم نجلاء تقول لنواعم إنه ما تبي أخوه...
قبل لا نواعم تقول له إن تركي فركش...
عبدالمجيد_ينظر لنورة بغضب_: طيب ليه يالبرميل ما قلتي لي!!؟
مخليتن أحترق!!
نورة_ببرود تعود لدفترها وتشغل المذياع_: ببساطه لأنك ما سألتن...
وبعدين ... لو تبي نجلاء جد حاول مرة ثانيه...
عبدالمجيد: بدوية وراسه يابس!!
نورة: سبحان الله... وش لك أجل بوجع القلب والبدو.. ليش تحبه مادامه بدويه..
عبدالمجيد: أنا ما أحبه... ما أحبه... إرتحتي!!
نورة: لا... ودي تتزوجون وتنتهي كل الحكايات الحزينه من حولي نهايه حلوة..
ودي.. والله ودي...
عذبة حبت مشاري ومشاري طلقه...
فيصل حب عذبة وعذبة تركته ويوم رجعت له خانه...
وليلى حبت الزفت الحيوان مؤيد وبالآخر طلقه شر تطليقه...
نجود حبت سعود وسعود مات...
ومين بعد؟
إيه أنت حبيت نجلاء ونجلاء ما بغتك
و...._تلتفت فلم تجد أحد بالغرفة فتكمل وهي تشير لنفسها_
وأنا حبيت بندروة ونجلاء تقول إحلقي رمشي إن أخذتيه...
يا نعنبوا بليسنا عايلة!!!!
القرادة لاحقنا من عمي ناصر وعجوزه عذبة!!
******
"شقة فيصل"
_لندن_
عبدالعزيز يصف كتبه في كرتون , وفيصل يساعده في ترتيب الكتب..
فيصل: تدري إنك نذل؟
عبدالعزيز: أفااا....
فيصل: والله نذل...
عبدالعزيز: مقبوله منك عمي...
فيصل: ما ودك تدري ليش أنت نذل؟
عبدالعزيز: إذا سمحت...
فيصل: ليش جيت عندي قبل لا ترجع للسعودية؟
عبدالعزيز: إيه.. شسوي العجوز حقت الشقه ركبت راسه تأجر سنه...
وأنا منب قاعد إلا ثلاثة شهور بالكثير... وبعدين شقتك وسيعة... حرام أدفع حق سنه وشقتك مليانه غرف للهواء والشمس..
فيصل: شمس!!
ليت بوه شمس غلقة وضيقة خلق... أووووف
عبدالعزيز: وش حادك على الغربة ووجع الراس...
فيصل: اللي حدك عليه ثمان سنين...
عبدالعزيز: أنا أبني مستقبلي بس أنت وش لك بذا؟
لا دراسه ولا عراسه..
فيصل_يبتسم_: إيه... أنا مثل ما تشوف.... لي شغل بذا...
عبدالعزيز: معليه بصير ملقوف... وش هالشغل؟
فيصل: يعني أطقطق يمين ويسار... أبني نفسي وأستقل عن فلوس عمي واليتيمات
وعن إخواني..
عبدالعزيز: جايز
فيصل: أحلا... بتاخذ ليلى... يا ما قلت لمجيد خذه..مير مجيد مطير قلبه بنجلوه..
عبدالعزيز: هههه..
خفيفة دم نجلاء...
فيصل: هيه حجي.. لا تتكلم عن البنت الحين صارت مرة..
عبدالعزيز: طيب...
فيصل: الله يعين على روحتك... زهق..
عبدالعزيز_ينظر لفيصل بنظرة ذات معنى_: منت من حالي الحين...
فيصل_يرتبك_: وو..وش تقصد؟
عبدالعزيز: ولا شيء...
"في بيت سعد"
نواعم تجلس على الأرض وتسند ظهرها على الكنب الفاخر, تهز قدميها بتوتر,
يأتي تركي ويسلم..
نواعم: وعليكم السلام
_يجلس تركي ويمد يده لإبريق الشاي فيصب بياله وهو يقول_: وش عند نعومتي؟
نواعم: تو أبوي متصل... من فرنسا مع الست هانم...
تركي: طيب الله يهنيهم... عسى بتلزقين به مع مرته الجديدة...
والله بلشه... إذا أعرست بتنشبين بحلقي!!
نواعم: ولا بعد... يقولي تبين تسلمين عليه!!
تركي: طيب زين سلمتي عليه.. هذي خالتس...
وبتجي تعيش معنا... بتصير وحده منا!!
نواعم: تخلخلت حنوكها!!
تركي: أووووف... ذكرتين لدعاوي امي نورة....
نواعم: لا... وبيقعدون شهر كامل وأسبوع...
تركي: نواعم!!
وش فيك؟ خلي أبوي يستانس... أنتي بيجي أحد ويونسك...
إلا مير شخبار أمي... أسمعه تو تكلمتس...
نواعم_تنفجر باكيه_: تركي ودي أمي وأبوي يرجعون زي أول...
_يضمها تركي ويقول_: أصلاً هم من زمان وهم مو متفاهمين..
بس كانوا مضحين عشاننا... خلهم يشوفون حياتهم...
نواعم: تركي أمي بتتزوج....
تركي: وشـــــــــــــــــــــــــــــــــــــــــــــو!! !
نواعم: بتتزوج واحد إسمه حسين... كان ولد جيرانهم... والحين هو طبيب جراح
تركي: من...من قال لتس!!
نواعم: تو كلمت وقالت لي... بتتملك بكرا..
تركي: ليــــــــــــــــــــــــــــــــــــــــــــــه تتزوج!!
عليه قاصر بشي!!
وأنا طرطور...مو ولده... بتتملك بكرا وأنا آخر من يدري!!
نواعم: تركي... أمي خايفة تزعل..
تركي: وحقي أزعل!!
ليش تتزوج... ليش!!
وتتزوج حسين ولد جيرانهم!!
وع!!
والله فشيله.. فشيله.... عقب هالعمر تتزوج!!
نواعم: يا سلام... تو تقول حق أبوي يشوف حياته..
وأمي .. أحسن خل أبوي يندم إنه طلق أمي وتزوج...
تركي: أمتس هي اللي طالبه الطلاق...
بس.. أمي وش محتاجه... وش محتاجه!!
نواعم: ولا أبوك وش محتاج!!
كلهم كل واحد ماهمه إلا نفسه!!
تركي: أبوي رجل!!
نواعم: وأمي مرة... وش تفرق... كل واحد يبي يشوف حياته.. مب تقول لي!!
ولا أزيدك من الشعر بيت... أمي بتترك الوظيفة...
وبتتفرغ لتربيه عياله إثنين منهم صغار توفت أمهم... شفت عاد...
تركي: والله شي!!
حنا تربينا الناني ولا أم عبدالعزيز... وهي تربي عيال ولد الناس!!
أخ يا دنيا... بس أمي.. شلون تتزوج!!
نواعم: تركي عاد لا تصير سخيف.. وشلون تتزوج... بيجي المملك.. وبعدين بيحطون عرس وطقاقات وزفه محمد عبده بعد... وبيوزعون بطاقات على الشرقيه والرياض كللللللللللللللله
تركي: لا عاد!!
بعد بتحط عرس وطقطقه!!
لا... أمي إنهبلت... عجوز وتصابت... يافضيحتنا!!
نواعم: هههههههههههه
أمزح عليك لا بيحطون زواج عائلي...
تركي: أشوا... بس وشو له تتزوج أصلاً!!
******
"في الحديقة"
ليلى ترسم بقلم الرصاص, ونجلاء تجلس على كرسي الخيزران وترشف الشاي بصوت مسموع, تلتفت ليلى بغضب...
ليلى: أوووووووووف يالمزعجة!!
نجلاء: صدز!!
أزعجتس!!... والله لو صوتي دريل!!
ليلى: لا والله!!
خليني أخش جو!!
نجلاء: تخشين جو!!
هع هع هع... وشو أخش !!
ولا هذي بقايا كلمات مؤيد الكفته!!
ليلى_ترتبك وتقضب حاجبيها_: نجلاء.... لا تقولين كذا...
خلاص مؤيد مرحلة وإنتهت...
نجلاء: آسفه ما قصدت أجرحتس...
بس أبسألتس... اللي أعرفه إن الوحده إذا تطلقت تكره اللي طلقه...
لكن أنتن يا بنات ماجد حالتكن غريبه...
كلكن ما كرهتن رجالكن ما أدري مطلقيكن..
ليلى_تنتهد وتجلس على الكرسي _: ليش أكرهه؟
نجلاء: والله يا أنتن بتجيبن لي الصمرقع!!
نعنبوا بليستس جلدتس وهك عليتس وبالآخر تقولين ليش أكرهه...!!
ليلى: نجلاء... مؤيد ما خدعني...
مؤيد كان جد يحبني بس ما كان يثق فيني...
وهذي غلطة كلنا نتشارك فيها ...
ليش أكرهه وأنا سبب باللي صار بيننا...
نجلاء: بالله يحبتس يصك عليتس بالشقة ويحرمتس من الدراسة
وبالآخر يجلدتس!!
ليلى: مهو لأنو يحبني سوا كذا...
هو يشك إني ببيعه ولو إنه ما يحبني كان طلقني من أول المشوار
بس لأنو يحبني صك علي...
مثل الشي الغالي على قلبه وما يبيه يضيع...
نجلاء: هرطقة!!!
ليلى: هههههههه
حلوه هالكلمة بس أدري إنها من كلمات نورة....
نجلاء: جد والله سخافه منطق...
وشو يحبن يصك علي !!
ليلى: أجل ليش كان أبوي الله يرحمه ما يبينا نطلع للمدرسة
إلا مع أحد كبير...
وما يخلينا نجلس لحالنا بالبيت!!
إلا إنه يحبنا... ويخاف علينا...
نجلاء: هيــــــــــه يا آنسه !!
مدري مدام...
فرق بين إنه يخاف على ويخاف من!!
ليلى: ما تفرق واجد...
نجلاء: لا حبيبتي تفرق فرق السماء عن الأرض...
أبوي كان يحبنا ويقول أخاف عليكن...
ما يقول أخاف إنكن تواعدن ولا تطلعن!!
عمره سأل وحده منا من تكلم !!
زي ما يسوي الخبل مؤيدوه...
ليلى: لأن أبوي كان يعتقد إننا بزران...
نجلاء: لا....
كانت عذبة مراهقه....
كان يقول له قبل لاتطلع...
ديري بالتس من المهبل.. ولا تمشين إلا بالشوارع الرئيسيه...
ولا تتركين يد كاميليا...
تذكرين الكلام اللي كان يقوله لكاميليا!!
عمره ما قال إنتبهي لا يروحن البنات...
يقول له إنتبهي لأحد يتعرض لهن... لا أحد يتكلم معهن ..
بس إذا كنا معه نتكلم مع الناس كله ولا يمنعنا أو يسمع حنا وش نقول..
الأهم إننا نكون حوله وتحت نظره...
لأنه فعلاً يخاف علينا ويثق فينا...
ليلى: تخيلي لو اللي سويته بوجود أبوي وش سوا؟
نجلاء: اللي سوته عذبة بيطلع بأقل الخساير...
خسارة زواج ولا خسارة سمعه وشرف...
ليلى: بس بيأثر في تعامله معكم...راح تهتز الثقه الللي يعطيها لنا...
نجلاء: أبوي يعطينا ثقه... بس ... بحدود...
صح ما كان يفتش أغراضنا لكنه كان قريب هو وأمي منا...
يدخلون غرفنا دون ما يستأذن... يسولفون عن كل شي ويراقبون كل شي...
لو كنتي تجلسين بغرفتس طول هالوقت تتوقعين بيسكتون!!
لا.. بيعرفون السبب بطريقة أو بأخرى...
أما عذبة إنشغلت بالمشاكل عنا...
صح هي حاولت تحافظ علينا من الناس...
بس ببعده عنا ماقدرت تحافظ علينا من أنفسنا!!
صح...؟
ليلى: والله إن جيتي للحق... أنا المسؤلة عن الغلط مو عذبة...
نجلاء: هو صح أنتي الغلطانه... بس عذبة تتحمل جزء من المسؤليه...
كلكم راع وكلكم مسؤل عن رعيته...
ياما قلت لها إن مقابلك النت أربع وعشرين ساعه مو طبيعي..
كان عالأقل تقربت تعرف وش فيه...
كان يوم شافت فيه شي مو طبيعي دورت... وهنا يجي الخوف الصحيح...
الخوف عليتس مو منتس... لكن يوم إكتشفت الحقيقة ومتأخرة ما لقت بيده إلا إنه تتعامل بمدأ الخوف منتس...مو عليتس وطبعا بسبب عنادتس وإصرارتس...
هي كانت عارفة إن الزواج محتوم الفشل وسمحت فيه مضطرة لأنه خافت منتس تشوهين سمعتس وسمعه العايلة كله وما تنلام ...
ليلى: يوه... ما أبي أعيد التجربه.... تعبت منها... أقسى درس تعلمته بالحياة...
نجلاء_وترشف الشاي_: وشو الدرس اللي تعلمتيه؟
ليلى_تتنهد_: آآآآآآآآآه مثل ما قال الطنطاوي الله يرحمه...
نجلاء_تلتفت_: يا حبي له!!
تذكرين أمي فرح ماتبيع ولا تشري فيه... والله إن سواليفه وناسه... إيه صح مير...
وش قال الطنطاوي....
ليلى: يقول إن الزواج اللي يبنى على الحب مثل العمارة اللي تبنى على أساس من الملح في مجرى الماء....
نجلاء_تنتهد_: إيه... الله يرحمه...بس الحب حلو بالحياة بين الزوجين...مب؟
ليلى: صح هو حلو... بس ما يكون أساس...
يعني لمن تحبين واحد تنعمين عن كل عيوبه...
وتوافقين...بس بعدين تتورطين وتكتشفين إن الحب كان نظارة قاتمه أخفت كل جوانب السوداوية فيه...
نجلاء: توقعين الحب أقوى قبل الزواج ولا بعده؟
ليلى_تبتسم_: ما أدري... بس إذا الزوج فيه كل الأشياء اللي تبينها..
وأهلك عاجبهم ورجل صح....
تجمعين بين الثنتين حب وزواج متين...
وحتى الحب اللي بعد الزواج عاده يكون أمتن من اللي قبله...
سبحان الله... الله قال إنه جعل بينهم موده ورحمه...
تلفتي وشوفي حولتس...شوفي نجود مثلاً هي وخالد...
لا يعرفها ولا تعرفه... بس الحين ... ما شاء الله عليهم...
نجلاء_تضع رجل على رجل وتبتسم_: إيه ما ندري عن التجربه الجديده؟!!
ليلى: إممم ما أدري... بس أكيد ما راح يكون زي مؤيد...
نجلاء:شلون؟
ليلى: مؤيد يموت فيني... تصدقين إنه كان يغسل المواعين معي...
وهو اللي علمني الطبخ.. ويدلعني... بس....
نجلاء: شوفي ما من وراء عزوز تدليع...
صح هو رجل.. وماعليه عيب.. بس والله تراو دغري!!
مافيش دلع ولا خراط...
هذا مب كنه عايش برا بالجو والطبيعة إلا كنه جاي من البر...
نعنبوا بليسه ما يهزه شي...
تخيلي ..تخيلي نورة ذاك المرة بتطلع وعيا عليه يقول وشو لوه تروح لناس ما نعرفهم...
وما كان فيه غيروه بالبيت هو ومجيد ...
وتصيح.. وتصيح تبي تروح لجمانه ويلقعه ولا يلتفت...
مجيد رحمه قال "خلاص إنفضحت تسبده من الصياح خله تروح..."
ولا حتى يرد عليهم...
والله مجيد حول يصيح معه... تفحط وتفحط ولا كن الجدار يسمع...
ليلى: وعيا عليه؟
نجلاء: وش رايتس.... ؟
إيه لحد ما جت 911 وقالت خير ومن متى وأنت تومر على بناتي!!
وخلته تروح... بس ياهو خزه بعين... وماصار يكلمه...
ليلى: يؤ!!
الحين جت عمتي أم عبدالله... وخلتها تروح ... وزعل عبدالعزيز!!
نجلاء: إيه... ورجع لبريطانيا وهو ما يكلمه...
الله يعينتس عليه زعووووووووووول وخثقه...
ليلى: أغدي شدته على خواته بس... ترا كثير مبهذلين بخواتهم ولامن تزوجوا تغيروا...صح؟
نجلاء: ما أدري!!
***********
"في المستشفى"
تركي يسير في ممرات المستشفى وتعلو وجهه تقاسيم الإحباط , تمر إحدى زميلاته الطالبات...
الطالبه: Hi … oh are you sad?
تركي_يبتسم بسخرية_: no… I'm so happy..
الطالبة_بدلع_: really.. I can not see that !!
تركي:
Sure... because your face cases all the sadness in the world
الطالبة_بدهشة_: أفااااا دكتور ...ليش؟
تركي_يسير خارجاً_: شوفي ذيك المراية وتعرفين ليش...
_ضحكت إحدى المراجعات والتي كانت تراقب الموقف وغضبت الطالبة بينما تركي لم يعير أحداً إنتباهه وخرج من البوابه الزجاجية الكبيرة وجلس على كرسي الحديقة وأخرج جواله وإتصل بوالدته_
تركي: ألو .. يمه...
منيرة: هلا والله تركي... شحالك؟
تركي: أنا طيب بس جان خبر يسم القلب...
منيرة: بسم الله عليك عيوني... وشو؟
تركي: لا تسوين نفسك ماتدرين!!
منيرة: إيه خبر زواجي..؟
تركي: وأنا آخر واحد يعرف!!
منيرة: أنا وقررت .... وأنت متى ما عرفت ما فرقت يعني إنت بتتزوج معي!!
تركي: من حقي أعرف ... ولا أنتي مو أمي!!
منيرة: ولأني أمك أنا اللي أقرر...
تركي: لا!!
أنا حقي أعرف منهو الزفت اللي بياخذ أمي... أنا المسؤول عنك...
منيرة: عشتوا!!
الحين ربيتك عشان لامن كبرت تكسر خشمي!!
تركي: ماعاش اللي يكسر خشمك... بس أحب أقولك شي... أنتي ما ربيتني...
أنتي رميتيني للناني تربيني... حتى الحليب اللي كنت أرضعه ما كنتي تعرفين إسمه...
صح!! تذكرين يوم تجي أم عبدالعزيز وتسأل الناني عنه ولقت إنه ما يناسبني...
وأنتي إيقالك طبيبه ووخر بس.. ما دريتي عني ولا هميتك...
منيرة: إيه وأم عبدالعزيز فرحانه لقت علي شي ....
وأنت تعينها إنها تتطمش علي!!
تركي: هي ماقالت إلا الحق... ولولا أم عبدالعزيز بعد الله ما صرنا شي...
أنتي همك دراستك ومؤتمراتك وأشياءك اللي تشخصين فيها عند الناس...
وأم عبدالعزيز اللي تلمزينها بين وقت والثاني إنها مو مثقفة ولا تعرف تتكلم زين...
أهم شي عندها تشخص فيه عيالها... وفعلاً هي اللي نجحت وأنتي اللي فشلتي!!
منيرة: وأنت مكلم عشان تعاير أمك!!
تركي: لا والله بس حبيت أوضح لك الصورة...
وأبقول لك شي... أنا ولدك صح صرت طبيب زي ما تبين لكني ما صرت رجل...
منيرة: تركي!!
أنتا أرجل الريايل!!
تركي: لو أنا رجل ما كان عرسك خبر من عرض الأخبار اللي تنقل لي من الناس...
لو كنت رجل كان عملتي لي حساب وقلت للي يبي يخطبك رح لولدي خله يقابلك...
لكن أنتي ما طلعتي رجل تعتمدين عليه بزواجك صح!!
منيرة: تركي... مو هذا قصدي بس ... أنا وافقت عليه بناء على شروطي...
ما أبي أعيد تجربتي مع أبوك...
تركي: أبوي!!
وش خسرتي أنتي من تجربتك مع أبوي!!
أبوي هاللي ما ملى عينك حبك من قلبه وحب لك الخير ...
يمكن إهو ما إختارك لكن يوم تزوجك عزك ولا هانك بيوم...
وحتى يوم طلبتي الطلاق طلقك... لأنه يحترمك...
وعلى فكره أنتي كنتي مقصره مع أبوي مو هو اللي مقصر معك!!
أبوي طلع من بيت المره فيه تقدس زوجها وتقدره...
وبالمقابل هو يحترمها ويكد عليها ويعتبرها أغلى ماعنده...
أبوي عاملك بمثل ما رجالهم يعاملون حريمهم لكنه ما إنتظر منك تعاملينه بالمثل...
طول عمرك سفريات وروحات ومؤتمرات وخرابيط
وبيتك وزوجك وعيالك آخر شي عندك...
وكله بكوم ويوم طلبتي الطلاق كوم ثاني...
بدل ما تقولين له شكراً ... حطيتيه المذنب...
وهو ما زال يعطيك وما يقصر... لأن غلاتك من غلات عيالك اللي أبد ما تموت بقلبه...
منيرة: وغلاته من غلات عيالي!!
تركي: لا... غلاته مو من غلات عيالك... غلاته من غلاة مركزك الإجتماعي...
والوظيفه ....وآخر ما فكرتي فيه عيالك...
ويوم مليتي من الوظيفه والتشخيص إنك مرت سعد رجل الأعمال المشهور.. خلاص ماله داعي بحياتك... سعد صار من الأشياء اللي مالها لزمه...صح يمه!!
والدليل إن الوظيفه الحين بتتركينها عشان تربين عيال الناس...
وعيالك راميتهم للخدم ولحماتك تصدق عليهم بشويه حنان وإهتمام...
منيرة: تركي... انا ما أبي أعيد غلطتي بزواجي الأول...
تركي: لا... أنتي بتجربين تجربه جديدة... يمكن هي غلطه...
بس كان الأولى إنك تكفرين عن غلطتك بحقنا وحق أبوي...
مو تكفرين عنها بحق الزوج الجديد... وتجرمين بحقنا زود وزود..
وعلى فكره ... إذا عندك نيه تجيبين عيال منه... أنا لازم أعرف منهم اللي بيصرون إخواني.... أظن هذا من حقي... أو إذا أنتي ما تبيني أتدخل فأنتي تتبرين مني بشكل غير مباشر...
منيرة: أنت ولدي!!!
تركي: وأنا ما أبي يصير لي إخوان ما أعرف من أبوهم ولا أصلهم وفصلهم...
منيرة: كلم خالك محمد... هو اللي سأل عن الريال...
تركي: ماني مكلم واليوم أنتي بتتملكين!!
وش له داعي... يعني عجبني الرجال أو ما عجبني متزوجته متزوجته!!
منيرة: صعبه أأجل الملاك...
تركي: والأصعب تخسرين عيالك...
منيرة: تتخلى عن أمك!!
تركي: أمي هي اللي ما تبيني شسوي بنفسي أنا !!
منيرة: طيب... أبرد عليك ... إذا رضى.....
تركي: مو شغلي يرضى ولا لا... خير إن شاء الله انتي تترجينه!!
صيري ثقل... لامن قال ما أقدر قولي ما أقدر....تبيني ولا إذلف باللي ما يردك!!
منيرة: طيب..طيب لا تصارخ!!
مع السلامه خلني أكلم محمد...
تركي: الله ياخذ هالمحمد كل البلاء من تحت راسه!!
منيرة: يمه هذا خالك!!
تركي: مع السلامه يمه....عندي شغل...
**********
"الجزء الثالث والأربعين"
"القصيم"
خالد: نجيده... هاه نجيب من برا؟
نجود: خالد...حبيبي الله يخليك...ما تقدر تقول لأخوك...
والله تعبانه...
خالد: ياحياتي شايفن إنتس تعبانه... بس صعبه أقول لأخوي مرته مدرسه...و..وساكن ببريده..صعبه على أهلي ينزلون ببريده همن يجون ..
صعبه.. أمي وعمتي وأبوي تعبانين بيصيرون....
أنا منب مكلفن عليتس... أجيب كلش من برا...
نجود: خالد... _تمط شفتيها وتشيح بوجهها_
خالد_يمسك بكتفيها ويشدهما نحوه_: نجيده قلبي... عشاني ...هذولا أهلي ما أقدر أتعبهم وهم كبار... حنا شباب نتحمل... بس هم...
_يرفع وجهها بيده ويقبلها_
خلاص يا نجيده... بس أنتي سوي القهاوي... وبوه الشغالة تساعدتس...
نجود: وأنت أصلاً مشاورن!!
خلاص ... خلاص...
أنت تفصل وأنا ألبس..
_يدخل أصابعه بشعرها وينكشه وهو يضحك_
خالد: بعدي والله...كذا الحريم السنعات....
**********
"في غرفة نورة"
يرن الجوال , تتلمس نورة الجوال وترفعه بتثاقل قائلة:
أووووووف يا النشبة ذي!!
_ترفع رأسها وترد بصوت ناعس_:
ألو...
نجود: هلا والله!!...
نوير نيمه للحين!!
وجع ما تشبعين أنتي... بيذن العصر... إيه هذي الفضوه..
نورة: يالله صباح خير!!
نجود: وأي صباح والساع ثنتين ونص...
نورة: إنجزي ... وش عندتس؟
نجود: نورة إحمدي ربتس ماتزوجتي...
نورة: أفاا... قط خلودي مزعلتس... ؟
نجود: لا... بس خالد مايراعي إني أتوحم...تخيلي بكرا بيعزم خواته الكبار
وأبوه وعماته بيطبون من مكه عندي...
وأنا رجلن بالصاله ورجل بالحمام...
وه شلون الرجال أنانين ومايهمهم إلا مصلحتهم...
نورة: أوف...أوف!!!
أناني!!
مرة وحده...لا ماله حق...خلودي عودتس الدلال وخربتي...
نجود: نورة عاااااد!!
أنا أتكلم جاده...
نورة: طيب ... هو سألتس...؟
نجود:إيه... يسأل ويسوي اللي بباله...
نورة: هههههه هذولا الرجال... بس أنتي وش قلتي له؟
نجود: قلت له لا... خلهم عند مرت أخوك...
بعدين ركب راسه... ويقول لا تسوين شي...
أبجيب من برا...
وخطط وفصل ولا بعد إيقالنه مشاورن...
نورة: يالخبله... وأنتي قلتي لا!!
تعبانه ... خل مرت أخوك!!
نجود: إيه وش تبين أسوي!!
نورة: يا ملحتس لامن صرتي غبيه...
إسمعين يالخبله... أنتي عارفتن إن خالد أهم ما عليه أمه وأبوه...
نجود: مب أمه ... عمته...
نورة: وه... بس هي اللي مربيته... ماتفرق..
إسمعين وخليتس مره... إكسبي الرجل بأهله...
خلتس ذربه وسنعه...
وش بتخسرين يعني لو قلتي له أبشر من عيوني أهلك إن ما شالتهم الأرض تشيلهم عيوني... وش تخسرين.. أنتي عارفتن إنه عنيد وبراسه موال بيغنيه...
يعني هم جايين جايين... كان كسبتي قدر عنده .. بدل ما تزعلين وتقولين مرت أخوك ومرت خالك!!
نجود: هــــــــــــــــــــو!!
مافكرت به ذي... بس هو المفروض يشوفه من نفسه..
نورة:خلينا من المفروض تعاملي مع الواقع مب مع اللي مفروض يصير...
هو شايف إنه صعبه يحطهم عند أخوه...
وأنتي بدل ما تراعينه وتسايرينه تزعلتي والمفروض ومالفروض..
ترا بيحط بقلبه لو ما بين...
هو يمون عليتس مالا يمون على أخوه..
أو إن أهله ما يبون مرت أخوه ذي...
أو أي شي يخليه يصر على رايه.. بس هو ما يقدر يقول لتس...
نجود: طيب...
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك