رواية بصدري وجع كنت احسبه نام يا صدري -38
ابتسم فهد : طلعوا ..
مساعد : بكلمها ..
فهد بعده مبتسم : خذ راحتك ..
تقدم مساعد وتكثرت له عمته بالخير وركبت قدام بسيارة فهد .. وأسيل ركبت مع أخوانها عبدالعزيز وعزام ..
مسك كفها وفهد واقف لانها ماسكه بثوبه ومبتسم آوضاعهم صعبه ..
: اجلسي معاي ولك اللي تبينه ..
ابتسم فهد خاصة بأنها تبي تحط الغطا لان مافيه غير مساعد وأخوانها ومساعد ماتركها وهي تشد بثوب أخوها ..
قربت أكثر من أخوها شكثر تحس بالامان وفهد قربها .. حولها عينه عليها .. آمان ماتحس به غير بوجوده ..
:لا ..
مساعد يترجاها: طلبتك لمار .. تكفين خلاص انسي كلها كم شهر ويخلص بيتنا ..
حست شوي وبتصيح وفهد حس بهالشي ..ولافاتت مساعد عيونها اللي تبي تحقق مطلبه وقلبها وعقلها اللي متقاسمين حول هالرأي .. وكان الاتنصار واضح لـ عقلها ..
بضيق مجنون : خلاص لمار روحي ..
فهد : خلاص آبوي اركبي السيارة فتح لها الباب ركبت وصك ..
رجع حط يده على كتف ولد عمه : ترى معها موعد عقب كم يوم للحمل كان تبي تجي توديها ..
للحظه تغير ضيقه آهم شي فهد تقبل بأنها تطلع معه وبعد يبي يراجع معها للدكتورة ..
: متى الموعد بالضبط ؟
فهد : منب متأكد لكن الظاهر عقب باكر .. وسمعتها تقول راح تقدمه لبكره ..
ابتسم : الساعة كم ؟
فهد : الصباح على الثمان ..
ابتسم : ماراح آنسى لك هالخدمة ..
ابتسم فهد : يلا عن آذنك ..
مساعد : الله معاكم ..
ركب فهد سيارته وحرك ..
امه : وش كان يبغى ولد عمك ؟
فهد يأخذ مطب بهدوء قبال بيت عمه وناظر آمه للحظه : ابداً يبي الغالية تجي معاه وتنتهي السالفة ..
امه : هالمساعد مافيه مثله لكن الشيطان الله يخزيه يدخل بين الحليلين (الزوجين)..
فهد ابتسم : وش رايك يمه بالسالفه ؟
آمه : ودي ترجع له .. الليلة لو شفته كل شوي يجي لنا ويناديها وأختك قامت مره والمرات الثانية ماطاعت الله يهدي بنات هالوقت من عنادهن ..
ابتسم لامه وسوالفها ..ولافاته اللي وراه وشكلها تبكي : لمورتي عيون أخوك دامك ماتبين ترجعين منتيب راجعه ..
امه : الله يصلحك ي فهد ..
ضحك : الله يخليك لي يمه ..
ضحكت آمه : ويخليك لامك عزوه وسند .. لكن أختك لين راسها ترجع لـ رجلها ..
: إن شاء الله ماطلبتي شي ..
ضاقت لمار من تلبيه فهد للطلب ..وسكتت وهي مقرره تكلمه وتحكي له كل شي عن شخصيه مساعد وخوفها من هالشي الغريب ..
طلع فهد جوالها لما وقف قبال آشاره ودق على عبدالعزيز : هلا وينكم ؟
عبدالعزيز : بندخل البيت ..
فهد : الله يهديكم من اللي يسوق ؟
ابتسم عبدالعزيز : عزام ..
فهد : الله يهديه تركدوا عن هالسرعه ..شوي وبنجي ..
عبدالعزيز يضحك : فهد ترى عزام قطع إشاره
ضحك وهو يسمع هواشهم كالعاده ..: بجي وبتفاهم معه هالولد ..
ضحك عبدالعزيز وصك الجوال وهو يحرك مع فتحتة الاشاره ..
.
.
.
بريطانيا ..
كانوا واقفات على قبال السياج المطل على النهر ويناظرون ..
رتيل : ي الله شوفي هذاك شكل حاله مثل حالنا وأردى ..
سلطانه : اللي لابس تشيرت وحاط الجاكيت جنبه ؟
رتيل : آييه ..
: الله يعينه .. محد خالي من الهم ..
كانت تناظر وضعه وهو يتأمل النهر : يؤ رتيل ذا مصعب ..
تأكدت أكثر : الا مصعب ..
رتيل : ي قلبي سوس روحي له ..
سلطانه بنظره: ليه إن شاء الله ؟
رتيل تناظرها بقهر : سوس ترى هالانسان نعمه لاترفسين النعمه بيدينك ورجولك..
سكتت ولفت تناظر للنهر ..
رتيل : روحي له حرام شكله متضايق ..
سلطانه : ريتو خلينا نروح نتعشى ..
رتيل بقهر : سخيفه
ضحكت ومشوا ..
رتيل : طيب ترى حرام
سلطانه : ماغلطت بحقه ..وبعدين يمكن بيي يجلس وحده
رتيل : واضح عليه متضايق وأكيد يبيك تكونين معاه .. سوس لما كنت اتضايق كان طارق يجي وبرغم شي خارجي بأني ودي اجلس وحدي بس بداخلي كنت افرح بـ اهتمامه فيني ..
سلطانه : تونا مملكين وشوله آقط الفيس عنده .. خليه براحته وبعدين هو اختار البحر متنفس له وأكيد دامه جا لـ هنا يبي يكون وحده ..
رتيل : عمرك ماراح تقتنعين ..
ضحكت : احترمه جداً بس حالياً خليني آقدر عزلته واتركه براحته..
دخلوا للمطعم وجلسوا ..
سلطانه: الحين تتعشين فاهمه
ضحكت: آوكككي ..
رتيل ناظرت للحظات : آععع عساف هنا يتعشى ..
سلطانه: جد
رتيل : آيييه .. متأكده كان يراقبني
سلطانه بغرابه : لا عاد شدعوه
رتيل بحسره : تفكيره كذا .. قومي نغير المطعم انفاسي تختنق
وقفت سلطانه وطلعوا ..
نزل الملعقه بضيق وكلم سواقه لاجل يجهز السيارة ..حط الحساب وطلع ..
ركب السيارة وصك الباب : حرك للفيلاً
صرخ من الالم براسه ولف السواق والمرافق ..
المرافق بخوف : طال عممرك ..
عساف يشد على آطراف راسه وراص على راسه : مافيني شي ..
سكت وكل شوي يناظره ..
وصلوا للفيلاً وطلع لـ جناحه أخذ حبوب علها تخفف هالصداع ..
وقت طويل مر عليه وهو يحاول يتماسك من الالم ويشد عليه بالمخده لاجل يخف ماقدر ولاله قدره بالتحمل .. مسك جواله وهو يدق على دكتوره الخاص .. شوي وجاه عطاه أبره ولحظات وهو يترخي ونام عقب آجهاد عصبي ونفسي واضح عليه..
.
.
.
الرياض ..
بيت آهل لمار ..
دقت الباب : آدخخل
فهد وهو يعلق ثوبه ويلبس ثوب النوم ابتسم لاخته : هلا لمور ..
ابتسمت لاخوها : آهليين ..
جلس على الصوفا وجلسها قبالها : مانمتي للحين غريبه ؟
حطت المخده بحضنها وهي متردده : بسولف معاك ..
ابتسم : أبرك الساعات .. سولفي لي ..
:مم عن مساعد ..
ب اهتمام : شفيه ؟
لمار : مدري فهد بس شخصيته فيه شي غريب ..
ب استغراب أكبر خالطه خوف : شلون ؟ فهميني عن السالفه ..
وهي تفرك أصابعها وبضيق وتناظر آخوها : مم لما نكون بالشقه وحدنا يكون مرآ طيب معي وحبوب بس لما ننزل لاهله تتغير شخصيته تماماً ..
: شلون ؟
لمار: يعني يصير يكلمني بعصبيه ونظرات بعضها تدل بأني ولاشي .. ويتأمر بأني آقوم آسوي واساعد خواته حتى لو توني جالسه يعني مساعده خواته ..
فهد : يعني معاك الرجال حمل وديع وقبال آهله وحش
ابتسمت غصب على تعليق أخوها : يب ..
فهد تنهد : طيب ليه ماعطيتيي خبر من قبل ؟
لمار : مدري على بالي راح يتغير لان هالشي من بداية زواجنا ..
فهد : والليلة قلتي لي لاجل مارجعك له ..؟
: يمكن من ضمن الاسباب هالاسباب
فهد : مشكلته مشكلة وأنا أخوك ..
لمار : تعبت معه ي فهد آوقات كثيره ماقدر آنام الليل من تفكيري بهالشي..
: أفداك نامي واطمئني بشوف مشكلته ..
لمار ترددت بهالسؤال : مممم طيب فهد افهم بإن مساعد مايعاني من آنفصام شخصيه ..
: لالا .. ترى هالمشكلة منتشره بمجتمعنا خبرك فرض الشخصيه قبال الاهل مهم للرجل خاصة لما يكون يبي يثبت شخصيته قبالهم ويلاقي ضغوط ..
لمار : لافي يقهر دائما لما نجي نطلع آسمعه يكلمه ويقول لا تعال اطلع معاي ..
عصب فهد : وش يحس به لافي يومه يتدخل ومساعد ليه يطاوعه.. خليهم ي أخوك علي أنا ..
لمار : الله لايحرمني منك ي فهد ..
لعيونها ابتسم : ولامنك يالغاليه .. تدرين اتفقنا على ملكة عبدالعزيز ....
مامدى يكمل الا جوال لمار يدق : غريبه فجر ..
استغرب وهو يشوف الساعه متأخره : عساه خير ..
ردت عليها ..كانت تبكي وواضح عليها متضايقه ..وتتكلم مع لمار عقدت حواجبها بغرابه : ماتبين عزوز لييه ؟!
فجر : السبب يخصني وحدي .. بليز لمار خلي عبدالعزيز يكلم أخواني ويقول بأنه مايبني ..
لمار بضيق : فجر معليش راح تحرجين عبدالعزيز كذا مع أخوانك ..ماعتقد راح يوافق الا يجي الرفض من جهتك وقبال أخوانك ..
فجر تبكي : مساعد رفض لانه يقول السبب تافه ..
لمار : طيب وش السبب لاجل آقوله لـ عبدالعزيز ..
حست للحظه بالسبب التافه بس بعيونها لا مهوب تافه لان شافت معاناه لبعض البنات بخصوص هالشي : أخوك جميل جداً وأنا موب مثله ابداً ..
ماتوقعت هالسبب لاهي اللي لامتها ولاهي اللي ماحملته شوي من اللوم : فجر وش هالتفكير توقعتك تمزحين لما قلتي هالحكي ببيتكم ..
كان فهد يناظر وساكت يبي يعرف وش السالفه لكن استهدى بالله إلين تخلص لمار من مكالمتها ..
فجر : لا مامزح .. بليز بلغي أخوك ماترضين لي أكلم أخوك واقوله هالحكي ..
لمار : خلاص فجر راح آشوف السالفه بس ترى بالحيل مستهينه بنفسك .. ولو ماعجبتي أخوي كان رفضك بنفس المجلس وانتهت السالفه ..
فجر : بلغيه بليز ..
لمار : إن شاء الله .. صلي الوتر لاجل تهدين شوي وتبعدين هالتفكير عنك ..
فجر : إن شاء الله .. مع السلامه ..
صكت منها ..وقالت لـ فهد اللي سألها ..
ضحك : مهيب صادقه ..
لمار : مدري طيب عزوز شلون آقوله ..
فهد بحيره : صحيح عبدالعزيز يوزن الامور بعقلانية ..لكن هالامر جارح له ولاينلام ولو إن السبب بصالحه ..
دخلت أسيل وهي تبكي وقف فهد بسرعه لها : أسييل شفيك ؟
بكت أكثر وهي تحط راسها على صدر أخوها : جابت لي صديقتي نسبتي ومو حلوه
فهد ضاق وهو يلمس شعرها بحنان : وشلون جابتها على آخر الليل
تبكي من لهجه حنانه أكثر : آمها بالمدرسة معنا وكانت تدق من العصر بس كنت مشغولة والحين قالت لي بالمسن ..
لمار ضاقت : طيب كم ؟
أسيل وهي على صدر أخوها مسحت دموعها : 90
عزام كان واقف ويضحك لانه كان معها يبي يأخذ السماعات من عندها : طيب جبت بثاني ثانوي 87 وثالث 90
فهد : وفرحان فيها
ضحك : دخلتني للجامعه والا ؟
فهد : الا دخلتك للجامعة لكن للقسم اللي تبيه ؟
عزام : ماقد حطيت قسم معين براسي ..
فهد ترك عزام وباس راس أخته : نسبتك حلوه ..
تبكي : لا أنت تقول تبي فوق 95 %
فهد : صح كنت آبيها لكن تونا .. والترم الثاني بأذن الله تشدين حيلك أكثر وتجيبين فوق 95 %
مسح دموعها : لاتبكين فديت دموعك وأسيل اللي همها أخوها لايزعل..
دخل فيها لـ للحمام بغرفته وغسل وجهها وهو يمازحها ..
عزام : بنات آخر زمن ..
فهد يبعد شعر أخته عن وجهها وناظره : تعال هنا ورى هالسرعه وقاطع آشاره ..
عزام تروع : ها
فهد : اللي سمعته .. تراها سيارة وأنا أخوك ..
عزام : طيب .. تصبحون على خير
فهد : بكرة الصباح بصحيك لاجل تجي معي للشركة
عزام فتح عيونه زود وهو ماسك السماعات : ليييه
فهد فيه الضحكه عليه وماسكها : أبيك معاي كم شغله وأبيك تتطلع عليها ..
عزام بتذمر : طيب متى ؟
فهد : على 8
عزام برفض: لا سلامات .. شف الحين كم الساعه قريب 2 الفجر وبشوف فليم راح يخلص قبل الفجر وبصلي وبنام .. مايمدي
فهد : فليم .. استح على وجهك والصباح بصحيك ..
: خلها عقب باكر
فهد : لا بكره ..
عزام : طيب وين عبدالعزيز .. خل يروح معاك ؟
فهد : عنده بكره شغل خارج الشركة ..
عزام : ي ليل .. خلاص طيب
مشى وهو يتحلطم ..
ضحك فهد : الله يصلحه ويبعد عنه عيال الحرام ..
لمار: آميين ..
أسيل فيسها أحمر من البكا : فهد موب زعلان ..
فهد باس خدها : لا .. لانك بذلتي الجهد والله كتب هالشي ولالنا على المكتوب اعتراض ..
طلع معها ومع لمار ..
لمار : تصبحون على خير ..
فهد |أسيل : وانتي من اهله ..
دخل أسيل لغرفتها : وضي وصلي الوتر الحين وبأذن الله تنجلي كل ضيقه ..
أسيل : آوكي ..تصبح على خير ..
باست راسه وهو مبتسم لها ..
صك باب غرفتها وطلع لغرفتها وهو بـ هم جديد سالفة شخصيه مساعد وسالفة عبدالعزيز ورفض فجر ..
حط راسه واستعاذ بالله من الشيطان الرجيم لعله ينام ..
اليوم الثاني ..
بيت أبو سطام ..
آمه : آيييه البنت عند صديقتها تعبانه ..
طش الكوب بعصبيه إلين انتثر على الطاولة : منيب حممار لاجل تطلع متى مابغت طال عمرها ..وحتى ليه تسمحين لها يممه ؟
امه وقفت : سطططام وش هالعصبيه الزايده ..!
بعصبيه أكبر : زوجتي تنننام برى وعادي يممه هالوضع عندك ..!!
آمه : سططام وبعدين يعني .. زوجتك بالمستشفى وظرف صديقتها حدها تنام عندها..
آمجاد تناظر عصبيته وخافت ..
سهى : طيب عادي ..
سطام صرخ فيها : أنتي مالك شغل ..يمه أي مستشفى ؟
امه وهي تناظره : مدري ..
نادات الخدم لاجل ينظفون السفره : لاتعصب على نعمه الله .. وزين أبوك مهوب هنا ..
سحب نفسه وطلع بعصبيه من البيت ..
جلست آمه : كبر وكبر همه معه .. غلطتنا عطيناه الدلع والحين قاعدين نأخذ الثمار..!
.
.
.
المستشفى ..
كادي : الحمدلله بأن اليبي تمام ..
الجوري : بجد .. ربي يحفظه ..
سافهه جوالها تماماً وهي تشوفه يدق وحاطته صامت ..
كادي : متى راح يجون البنات ؟
الجوري: مدري .. تقول سلطانه على حسب مود رتيل..
كادي : تدرين لما كلمت رتيل تقول جالسة تجهز لـ سوس من لندن وهي ماتبي ..
ضحكت الجوري :آيييه تقولي صراحه رهيبه هالبنت ..
دخلت الدكتورة وكتبت لها خروج لان الحين صحتها وصحة البيبي تمام .. حمدت الله على الخروج لان المستشفى كئيب ..
دقت على الجوري على عمتها وقالت لها راح ترسل السواق ..
كادي : خالي يقول راح يمرني ..
الجوري : الوليد ..؟
كادي : آييه ..
لمت كل أغراضها الخفيفه ولبسوا وطلعوا ..
شافت خالها وسلمت على الجوري ومشت .. انتظرت شوي وحبت تتطمن على نفسها لان معها إلم يروح ويجي جا سواقها وطلعت للمستشفى اللي ملفها هناك ..
دخلت على طبيبه عامه وحولتها لاخصائي غدد ..
مانتظرت كثير ودخلت وارتاحت بأنها دكتورة : مم حاسه بضيق تنفس يبجني بأوقات والوزن متذبذب ..
الدكتورة:وأيش بعد ؟
الجوري : مم آوقات تجيني كأبه وبعد تعب وخمول وإلم بمنطقه الحنجره ..
الدكتورة : كل الاعراض تدل على غدد ..
قامت الدكتورة من مكانها وشافت آنتفاخ بسيط .. تألمت الجوري ..
الدكتورة : ليه ماجيتي من بدري ؟
الجوري : ليه فيه شي ؟
الدكتورة : راح آعمل لك تحاليل وبعضها زراعه وعقبها آسوي لك آشاعه.. ونشوف هي تحتاج علاج أو لا ..
الجوري : طيب دائما آحس بضيق تنفس ..
الدكتورة : حالياً ماقدر أعطيك أي علاج ..بس حاولي تبعدين عن التوتر والعصبيه وعقب آسبوعين راح تطلع نتيجه الزراعة ونشوف شاللي تحتاجينه .. هل الورم حميد أو لاقدر الله خبيث ..
الجوري راضيه بكل مالله يكتبه لها: الحمدلله على كل ماكتب لي وبالنسبة للتحليل إن شاء الله ..أقدر احلل الحين ؟
الدكتورة : آيييه .. بس مأكله شي من قبل كذا ؟
الجوري : لآ ..
الدكتورة : حلو ..
راحت معها الممرضه ونزلت عملت التحليل غمضت عيونها بشده على السحب للدم..
سحبت كم عينه عنها وقامت ..مشت للاستقبال عطتهم البطاقه وسحب المبلغ ..حمدت الله بإن عندها فلوس من ورثها من أبو مصعب وعندها عماره سكنية كبيره تدخل الايجارات بشكل سنوي لها ..
طلعت وهي حاسه بدوخه من سحب الدم مرت الكفتريا بالمستشفى أخذت لها عصير طبيعي وأخذت للسواق معها رحمة فيه واتنظاره لها ..
عطته ورجعت ظهرها وهي تشرب العصير ..نزلت جنبها وشوي بوصولها للبيت..
سلمت على عمتها وتالي طلعت لـ غرفتها لاجل ترتاح وتنام من التعب الحاسه فيه ..
.
.
.
بيت آهل الجوهره ..
جمعت كل أغراضها لاجل تروح لبيتها .. فكرت كثير دامها غيرت شكلها هالحين لازم تغير ريان بداية تتركه يحافظ على الصلوات بالمساجد و يترك التدخين ..
أمها : من بيوديك ؟
الجوهره : رائد ..
آمها : الله يسعدكم ..طيب وشغلك وش قال عليه ؟
الجوهره : عارف من فترة وقبل زواجنا وحتى كتبت بالعقد راح آشتغل ووافق على هالشي ..
آمها : حتى يابنتي خذي رأييه الحين ورضاه ..
الجوهره : آييه عارفه يمه ..
جا رائد : جوهير ودي تقعدين معنا ..
آمه : خل آختك تروح لـ بيتها .. لاتخرب عليها..
ضحك : من حبها بقلبي ودي تجلس معنا ..
: فديتك ي رائد .. لاتخاف بقط هنا دائما ..
شال شنطه أخته وشالت الثانية وعطت الشغاله شنطه الكريمات والمكياج ..
ريتال : بتجين قريب ؟
الجوهره : أكييد بأذن الله ..
نزلت وشافت أبوها يقرأ الجريدة وقف لها وسلم عليها : الله يحفظك يابوي ..انتبهي لنفسك ورجلك وسلمي عليه ..
الجوهره تبوس كف أبوها : من عيوني ..ترى بتجون لـ شقتي وتتقهون عندي وتتعشون بعد ..
ضحك أبوها : ماعدمها اللي كبرت وتزوجت وتعزم أبوها لبيتها ..
ضحكت مع أبوها وسلمت على آمها وريتال وسمر خواتها عقب مالبست عبايتها ..
آمها : غيرتي عباتك ؟
الجوهره مبتسمه وهي تصك الازارر : آيييه اللي قبل مهيب مسكره واقعد امسك فيها بس الحين آزين ..
عدلت نقابها وهي تحط الشيله عليه وعقبها حطت عبايتها على راسها وطلعت لسيارة أخوها ..
بسيارة أخوها ..
رائد : تبين نمر نفطر ؟
الجوهره : وش ورانا ..
مر رائد لمطعم ونزلوا ..
رائد : يدري ريان ؟
الجوهره مبتسمه : لا .. خليها مفأجاه
سألت أخوها : رائد تغير شكلي ؟
وهو مبتسم : ب الححيل .. طالعه خالعه
ضحكت : آهم شي .. طيب تهقى يعجب ريان ؟
رائد : أكييد راح يعجبه ويفهي بعد ..
ضحكت : أدري الله مير يخليني
ضحك أخوها وكمل فطور ..خلصوا فطورهم وطلعوا ..
رائد : بنت عندك مفتاح لبيتك ؟
الجوهره : آكيييد بالشنطه لان ريان عطاني آياه من وقت ..
رائد : طيب ماراح يبني بيت ؟
الجوهره : مدري ماسبقت وتكلمت معه بهالموضوع ..
وقف قبال العمارة وشاف عامل وناداه لاجل يساعده بالشنط وطلعوا ..
فتحت الباب ودخلت .. عطى رائد العامل فلوس وصك الباب ..
دق صديقه : تمزح راح تمشون لمكه .. هههههههههههههههههههههه بعدي قدددام ..
صك من خويه : جوهير ربعي راح يسافرون لمكه وبسافر معاهم ..
الجوهره : سيارة ؟
رائد : أكييد ..
الجوهره : طيب لاتسرعون ..تكفى يارائد ..
ابتسم وهو يضم أخته : إن شاء الله .. توصين على شي من مكه ..
عيونها ملمعه : ترجع لي بالسلامة ..
: بأذن الله .. يلا بروح يمدي آحضر كم لبس واستأذن من الوالد والوالدة ..
الجوهره : استودعك الله الذي لاتضيع ودائعه أنت وربعك ..
ابتسم أخوها وطلع ..
مشت دموعها وهي تستودع الله فيه وهي تمشي وتدور غرفه النوم شافتها وسحبت الشنط ودخلتها وهي تبدئ بترتيبها .. ابتسمت على كسلها لانها حاطتها بالعلاق وبس تعلقها بالدولاب ..
عقب ماخلصت رتبت الكريمات والعطور والمكياج بمكانهم .. سمعت الاذان صلت الظهر وعقبها رتبت الغرفه وهي تشوف حوسه ريان ..أخذت ملابسه حطتها بـ سله الغسيل وجمعتها وعقب غسلتها .. دخلت للمطبخ شافته فاضي الا من آشياء بسيطه لبست عبايتها وأخذت البوك ونزلت للسوبر ماركت تحتهم أخذت أشياء بسيطه للبيت ولاجل الغدا ..دخلت للشقه ونزلتها وهي تنزل عبايتها وتالي دخلت الاغراض للمطبخ ورتبيها وبدأت بتسويه الغدا وهي تناظر الساعه لان دوام ريان يختلف من وقت لـ وقت خاصة لما يكون عنده جولات برى مكتبه يجي بدري ..
دخلت تأخذ لها شاور خلصت وطلعت وهي تشب الجمر ..قطعت السلطه وعقبها الفواكه إلين خلص الجمر بخرت نفسها وشعرها والبيت ..
فلت شعرها اكثر وهي تشوف غرتها عدلتها بالسراميك شوي ..حطت ميك آب خفيف تكلم نفسها : ماله داعي بلاشر هع
رشت العطر ودخلت للمطبخ لاجل تأخذ جوالها ودقت على كادي لاجل تتطمن عليها وتالي صكت على صك باب الشقه ..
استغرب وهو ينادي وينزل لابه وأغراضه : يممه (على باله آمه جات لاجل ترتب الشقه له لانها تربتها بين فترة وفترة)
دخل للمطبخ على طلعته منها : هلا ..
ماصدرت منه أي ردة فعل غير نظرات مدلولها آعجاب الصوت صوتها والملامح هي بس متغيره بالحيل : الجوهره ..
وهي مبتسمه وتمشي للصاله : ماغيرها ..
لفها له : جوهره
وهي تناظر وعاضه على شفتها بشكل مبرز غمازتها بشكل اكبر : آيييه ..
أخذها لصدره : آححح منك وعليك (همس اكثر وهو يضمها يد على خصرها والثانية على رقبتها) ومخفيه هالجمممال لييه بس ؟
حمر وجهها والحرارة اكتست كل جسمها من ضمته لها وهمسه ..وقفت عن الحكي وخاصة بأنه مندق وهي توصل لصدره ..
: آششتقت لك آششتقت لك آشششتقت لك واللي خلق الخلق ..
وخرها شوي وهو يناظرها بـ آعجاب : الجوهره بججد جممميلة ..
حمر وجهها أكثر وهي حاطه آصبعها بطرف فمها مسك كفوفها وباسها : متغيره بشكل ..
ضحك وهو يجلس ويجلسها بحضنه : ادري خوفتك وبتقولين مفجوع بس مشتاق لك..
وهي تبعد الاحراج : بقوم آحضر الغدا ..
باسها وتركها عقب وهو يوقف .. نزل شماغه ومن قلب : عليك آسم الله من عيون من اللي مايخاف خالقه ..
دخلت للمطبخ وهي تتحس رقبتها ونحرها ووجهها أحمر : أف ف ف ي آحراج..
عدلت غرتها والسلسال وهي تودي السلطه والفواكه للصاله ..وقف وقام يساعدها : متى جيتي ؟
تحاول ترجع لطبعها وصوتها بس حركاته ونظراته ماتركتها تسوي شي من طبعها : قبل صلاة الظهر ..
ماتركها تحضر الغدا وهو ماسك يدينها ومندق من وراها : مع رائد ؟
:آييه ..
: كان دقيتي علي كان جيتك برسم الخدمه ..
:عادي آخوي جابني .. ريان بحضر الغدا ..
ابتسم وتركها وهو يضحك : مفجوع أدري أدري
ابتسمت على جنونه ..
فتح الثلاجه وأخذ العصيرات واللبن ومشى ..
حضرت الغدا وجابت له كأس ..
جلس قبالها : آيييه وشخبار الجوهره ؟
رفعت حاجبها ورجعت لـ شوي من طبعها : ماعليها ..
ابتسم ي حبه لـ جرائتها وعنادها وشخصيتها وطبعها السمح : عسساه دوم.. بلغيها عن ريان إنه مشتاقها بالحيل
ابتسمت له : وهي أكثر ..
بـ عتب غريب بهاللحظات : واضح ..
ناظرته واختفت ابتسامتها : تبيها عتب ي ريان ماعندي أشكاليه ..
بسرعه : لاآآ.. آقول جوهرتي تسلم لي يمينك طعم الغدا يرد الروح عقب آكل المطاعم وغثاها ..
فكر للحظه : البيت كان فاضي شلون؟
ابتسمت : نزلت للسوبر ماركت وأخذت الاغراض بس المغرب راح نمر ونأخذ أغراض البيت كامله ..
: تدرين لما آشوف شخصيتك وتصرفاتك آحسك من حريم آول الواحد يفخر فيك بجد..
اكتفت بـ ابتسامه ..
ريان : آيييه وآخبارك ؟
ضحكت : ريان تغدا ..
ضحك وهو يأكل وكل شوي يقط كلمه وهي تناظره وتضحك ..
خلصت غدا وقامت ..غسلت ورتبت المطبخ شافته يدخل ومعه الصحون ..راحت أخذت الباقي وغسلت وهو جالس يناظرها ويسولف معها ..
ريان بضيق: ماعندي حالياً فلوس خبرك الشقه وتأثييها آكل الراتب والملبغ اللي قبل..
الجوهره تمسح كفوفها وتحط كريم مرطب : طيب عادي عندي ..
: ماحب هالحركه..
الجوهره تنزل الكريم : ريان الظاهر بأننا زوجين وكل واحد مننا يكمل الثاني..
:لا .. راح آستلف من أي واحد إلين يجي الراتب ..
الجوهره : ريان نبدأ بالديون لا .. خلاص زوجتك واللي عندها عندك ..
طلعت من المطبخ وقام وراها : جوهرتي مهوب القصد ..
الجوهره بزعل : تترك زوجتك وتأخذ من الغير .. وش هالمنطق ريان ؟!
ريان بضيق : الجوهرة لاول مره بحياتي كلها تكون محفظتي خاليه لو من الريال..!
التأثيت والسيارة آقساط والايجار آكلت الراتب والمبلغ اللي مجمعه .. صرت من البيت للشغل ومن الشغل للبيت ..حتى جوالي مافيه شحن ..
ضاقت عليه وهو يشكي وطلعت منها : حبيبي عادي الفلوس تجي وتروح ..المهم أنت ماتتضايق..
ريان : الضيقه وصلت حدها ..
جلست قباله : حبيبي تضيق لاجل وسخ دنيا .. وتكدر خاطرك .. راح تنفرج بأذن الله..
كان ساكت ..جابته لحضنها وهي تمرر كفها بهدوء بشعره ..فكت آزارر ثوبه العليا وهي تقرأ عليه المعوذات حست به نام ابتسمت للحظه الكنبه ضيقه وهو نايم وعلى صدرها وراسه تحت نحرها سحبت من الطاوله جنبها الريموت وهي تدور قناه حطت بدايه ومبتسمه على حكي البنات وكل وحده وهمها ..وشوي تناظر اللي نايم بحضنها وضاق خلقها من شكواه ..
.
.
.
بريطانيا ..
أخذها بالقوة وهو يركبها السياره معه : ولاكلمه ..
حرك السواق للفيلا ..
رتيل ترص على آسنانها : حقيير
: ولاكلمه فاهمه .. كم مره حذرتك ماتصكين بوجهي .. آقولك تجين لي يعني تجين آما آنك تعاندين برجع لك وجهي الثاني ..
:لانك منافق كل شوي لك وجهه ..
خزها بنظرها : انطمي ..
: كل تراب ..
صفقها إلين صك وجهها بالقزاز .. عضت على شفايفها وهي تناظره : وتبي آنسى طارق .. آنساه شلون بس ..
بهمس وتهديد يروع : شوي وننزل الفيلا ..
لفت وجهها للقزاز وهي تحس بنزف بفمها وقفت السيارة ونزلها معه ..دخل للفيلا وطلع ودخل يجرها للمخزن وهي تصرخ وتحاول تفك نفسها منه رماها للأرض : خليك هنا إلين تموتين وقتها برمي جثتك..
وهي تصرخ فيه : كلبب من يومك وخاين وحقيير ..
:تفو عليك وعلى هالتربيه ..
تزيد وصوتها معتل : وعلى تربيتك اللي خلتك تأخذ بنات الناس من بيوت أزواجهم تتتفو عليك ي تعبان ..
رجع عليها بسرعه وقطع حكيها إلي نحست روحها بتطلع من ضربه لها ..
رماها على الارض وهو يأخذ جوالهاوصك الباب وطلع ..
استفرغت دم وهي تشهق من البكا ومن حظها الردي اللي قطها بيدين هالادامي..!
.
.
.
الفندق ..
بتجن تدق عليها ماترد .. جاها مسج من جوال رتيل (أنا مسافره للرياض)
نزلت جوالها وتأكدت بأنها مجبره .. رتبت كل أغراضها ودمعت وهي تشوف الاغراض اللي جابتها لها رتيل وتجهيزها للعرس .. حتى الفستاين للزواج وهدايهم لصديقاتهم..
حطتها كلها بالشنطه .. أأكدت رحلتها للرياض على آن اللي تعنت لاجلها سافرت وهي محبوسه وتنزف بدل دمعها دم ..!
أخذت جوالها ودقت ..
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك