رواية انا الضحية وانا الجلاد -32
بعطيك فلوسك ودبل عليه ... بس أبطلب منك طلب...
أبو ياسين جيب السيارة...
بسرعة ...
كاميليا جيبي عباياتنا
وجوالي والشنطة...
_ركضت نحو الهاتف وإتصلت_:
ألو..
تركي: أوهو.. وش تبين بعد؟
لا تقولين نواعم ترا أبصيح...
أمس مقومتن من عز نومي عشان نواعم ما ترد!!
و..._تقاطعه_
عذبة: تركي... إسمع.. الحقير ضرب ليلى جت وطاحت عندي...
وين أوديه... ووش أسوي به..
تركي: ضربه!!
والله لأموته الحمار...
خذيها للمستشفى ... جيبيها عندنا ... الحين تو بيخلص دوامي...ماني رايح
أبنتظرك... أنا واقف برا...
عذبة: يالله...
_لبست عبائتها, وأسندت ليلى على كتفها بمساعدة كاميليا وأبو ياسين وأركبتها السيارة, وقبل أن تركب إلتفتت على الشاب السعودي, بدى عليه الإرتباك,
نظرت إليه .. صغير السن ومرعوب, تبدو عليه ملامح الفقر وشظف العيش,
أخرجت من حقيبتها 3 أوراق من فئة الخمس مائة ,ومدتها له قائلة_:
مشكور أخوي على الفزعة... الله يجزاك خير اللي وصلته لبيته..
والله لو ما الله ثم فزعتك ما أدري وش صار لأختي...
الشاب: ماسويت إلا الواجب بس خلوني أروح!!
عذبة: لا تخاف... ماراح يصير لك... بس أبي رقم جوالك...
وخل الحارس بعطيك رقمي...
أبكافئك على اللي سويته وألف وخمس ما تعدل شي...
_تصرخ كاميليا_:
مداااااااااااااااام بسرعة...!!
عذبة_وهي تركب_: كم رقمك..
الشاب: *******055
الحارس: ياست هانم... أديه الرقم بتوع جوال البيت ولا الشغل!!
عذبة_والسيارة تخرج : أكيد حق البيت...
أبتصل عليك رد علي...
************
"في المستشفى"
تركي: أخ.. بس لو أمسكة لأشرب من دمه!!
يحسب بناتنا لعبه...
_يقترب من رأس عذبة ويهمس_
تستاهل ليلوه... بس كنه كود شوي؟
عذبة: تركي... !!
ليلى: عذبة... ليش طلبتي تقرير؟
أخ... مو وقت دراسة... تراي تاركة الجامعه من تزوجت..
عذبة:إيش!!
وليش أنا آخر من يعلم!!
كان قلتي لي.. ليش تركتي الدراسة.. لا تقولين مؤيدوه غصبتس؟!!
تركي: كان يوم عيا تدرسين كلمتين أجي أتوطا ببطنه...
شارطين عليه تكملين دراستك!!
ليلى: أي... يدي توجعن... عذبة.. خفت من المشاكل لا تزعلين علي..
تركي: طيب... أكلم الحمار ذا!!
عذبة: لا... بناخذ التقارير ونكلم السواق حق الأجرة ويجي يشهد معنا...
عشان نقدم الأوراق للمحكمة ونفتك منه...
ولا وش رايك؟
تركي: والله نعم الراي.. بس أخاف من عمي يزعل..
ليلى: أخاف أروح للشرطة!!
عذبة: ليول.. خايفه تروحين تشتكين للشرطة ولا خايفة تروحين تشتكين مؤيد؟
تركي: إيه.. قولي للحين تحنين عليه؟
ليلى: لا ... الله ياخذه..
بروح أشتكي.. بس.. أخاف... الناس وش بيقولون؟
عذبة: أجل ليش حطوا مراكز شرطة لو الناس يستعيبون يروحون له..
كل الناس يروحون...
تركي: هاتي رقم السواق..
عذبة: تركي.. تراه صغير وخايف...
لين له الكلام وخله يحس بالأمان..
أخاف يفرك عاد وين بنلقاو!!
تركي: زين.. هاتي الرقم..
_مدت عذبة الجوال لتركي وأخذت تقلب التقارير والأشعة ثم ضربتها على الكرسي_:
كسر بالذراع الأيسر .. شعر بالكتف...
رضوض وكدمات في نواحي متفرقة من الجسد..
جرح بسبع غرز بالرأس..
ياسلاااااااااااااااااااااام
هذي نهايته معك يالـ......
تركي: عيب يا عذبة !!
عذبة: أوه عذراً...
"في سيارة مؤيد"
أخذ يقلب الجوال بعد ما فك شفرته, همس:
مافيه إلا أرقام عذيب وشغله...وصورهم
يووووووووووه وأنا طقيتها....
ياربيه شلون أبرضيها... فعلاً عيشة ما تنطاق...
أنت يا مؤيد حطيت نفسك بهالموقف...
ليش تتزوج وحدة وأنت مو واثق فيها...
لو متزوج وحدة ما أعرفها كان أحسن ..
يووووووووووووه...
ليلى... أحبها... بس أحسها تخوني...
ياربيه... عسى ما تكون تضررت مرة من علقتي..
وش يفكني من أهلها...
_نزل من سيارته ودخل الشقة وإذ بالباب مفتوح وعليه المفتاح_
ليلى!!
شردت... وين راحت هالوقت!!
الساع أربع .. يوووه... ربي إحفظها...
_يخرج وهو يركض ويقابله تركي ومعه عبدالمجيد عند باب الشقة_
تركي: فين أبو الشاب؟
مؤيد: أنت... !!
عبدالمجيد: لا مو هو أنا!!
مؤيد: شتبغون؟
عبدالمجيد: حابين ندردش معاك.... وودنا نروح داخل..
أظنك ما تمانع... البيت بيت بنت عمنا وماله غيرنا..
يعني حنا أهله..
مؤيد: وين ليلى..
تركي: جايين نسألك يا باشا...
طلع ليلى لأطلع روحك...
مؤيد: أقسم بالله .. ماأعرف.. شردت من البيت!!
أنتم تعرفون وينها... لاتلعبوا فيني..
عبدالمجيد: زين الحين نوريك شلون نلعب بك..
أمسك عبدالمجيد بذراعيه ولواهما بشده فيما أخذ تركي يسدد لكمات متتالية على وجهه,رماه عبدالمجيد على الأرض وإنهالوا عليه ضربا ولكما حتى خر مغشيا_
تركي: أخ ... ما بغى منا كثير...
عبدالمجيد: خكري... خخخخخخخخخخ
زين الكاميرا مثبته...؟
تركي: أكيد... مثبتها زين ... أول ما مسكته شغلتها...
عبدالمجيد: توقع يمسكوننا الشرطة؟
تركي: ما أدري... بس أنا عندي إمتحان عملي..
تتوقع الشرطة يعطون عذر؟
عبدالمجيد: والله من زين العذر لو أنا الدكتور كان أرسبك بالإمتحان..
تركي: يالله يا شيخ .. خل نهج لا يصير الرجال مات ولا شي..
عبدالمجيد: يستاهل أكثر من كذا..
بس... قهر .. ضعيف ما تحمل.. كان ودي أفش خلقي زود..
تركي_وهو يشغل السيارة_: مجيد إركب... لا يأذن ويطلعون..
عبدالمجيد: لحظة_ويخرج من جيبه جوال_.. هذا مو كنه جوال عذبة !!
إلا هو... الصورة ذي ملزقة ناصر..
تركي: خخخخ أخذته..والله يا أنت حنشول..
**********
"بعد يومين"
ليلى تجلس على السرير وتضم ركبتيها لصدرها, بدت صامته وحزينة, تدخل نجلاء بسرعة وتقف عند السرير ثم تضع يديها على خصرها وهي تقول:
ليلوه... مبسوطة؟
ليلى:..............
نجلاء: الحين ودي أفهم أنتي ليش ضايق صدرتس؟
ليلى: نجلاء خلين لحالي...
لو سمحتي ..
نجلاء: ....طيب وش قلتي باللي سووه العيال؟
ليلى: وشو بعد!!
نجلاء: يعني ماشفتي التصوير؟
ليلى: أها .. تعنين طقهم لمؤيد؟
بس ذولا رجال مو عيال!!
نجلاء: أي شي.. إنبسطتي...؟
ليلى: أكيد إنبسطت... ولو إنها طريقة همجيه... لكن حسيت إن وراي سند..
حسيت إنهم ....
بس...
نجلاء: زين... الشيخ كلم أبو عبدالعزيز...دريتي؟
ليلى: أي شيخ؟
نجلاء: مؤيد الكلب!!
ليلى: أها.... إيه قالت لي عذبة إنه بيطلق بدون مشاكل...فيه الخير...
نجلاء: بيطلق وهو ما يشوف الجادة...رجالن مكوفن مرته!!
هذا لو عذبة ما أدبته كان دودلتس بهدب عيونتس!!
عذبة مشتكيه عليه الشرطة!!
حيوان!!
ليلى: ..............بس مجيد وتركي طقوه...
لو هو يبي المشاكل كان كبر السالفة...
وما طلب يشوفني عشان يعتذر...
لا.. نجلاء.. مؤيد.. وإن غلط علي... إنسان محترم...
بس طريقة زواجنا هي الغلط..
نجلاء_تشد شعرها بهستيرية وتقفز وهي تصرخ_: تبين أكمل عليتس يالحيوانه!!
أنتي ماتحسين... ماعندتس كرامة!!
رجال أهانتس ورماتس بعرضتس وتسكتين له.. وتتنازلين عن الشكوى
وفوق هذا تقولين محترم!!
فعلا نفستس هاينه عليتس... لو أنتي كنتي حاشمه نفستس من الأول ما تجرأ عليتس..
بس أنتي اللي خليتيه يهينتس...
ليلى: نجلاء... خلين لحالي...
نجلاء: يعني إنقلعي بطريقة أخرى!!
ليلى: تكفين نجلاء إطلعي... حرام عليك اللي فيني مكفيني...
_ووضعت كفيها على وجهها وإنخرطت في البكاء_
نجلاء_تقترب منها وتضمها_: بس .. بس يابنت ماجد ما عاش من يزعلتس..
لا يا روح أمي أنتي... لا تصيحين... مافيه شي يستاهل دموعتس الغالية..
أنا آسفة يا عمري... يمكن أنا بدويه.. وكرامتي أبدى علي من كل شي...
يمكن... بس ... ما أدري... هذا الطبع بكم بعد...
هذا عذبة ما تنازلت تسأل مشاريوه وهو حبيبه...كله عشان كرامته..
وسعي صدرتس... ولا تهنين نفستس زود...
معليه يختي صيحي بالغرفة.. وصيحي... بس إطلعي برا وهيصي...
تعالي معي أنا ونورة... مسوين حفلة هبال مع بنات المدرسة يحبه قلبتس ببيت نورة..
يالله تلبسي وإنزلي ولا تدرين إنزلي ببجامتس... لالا بوه العيال بالخيمة...
تعالي إلبس أي شي... بنات فله ... هبال... رقص.. هيصه.. اللي تبين..
يالله يالله!!
_وتجر يديها_
ليلى_تبعد يديها_: نجلاء مو رايقة لك!!
مابي ... روحي... مابي...
وين عذبة... خلي عذبة تجيني..
نجلاء: هههههههههه.. إخس يالبرنسيسه..
عذيب مشتطة هالأيام عشان المشروع بيسلمونه قبل وقته ...
ما تجلس بالبيت يا بالمكتب وقافلة على نفسه... يا عند مجيد ونجود...
يا تدور بالسيارة... تبينه تفضى للبرنسيسه ليلوه....
أقول قومي وخلي عنتس الدلع ...وشو عاد..يا زود(هالـ....ي) يا نقصه...
********
"في السيارة"
عذبة تعمل على المحمول, بدت متوترة .. رن الجوال..
ترفع الجوال وهي تضحك..:
هلا فنو...وش أخبار الكرشة؟
أفنان: وه قرف... تعب مرة... والله إني أدعي لأمي كل ما أقوم وأقعد..
عذبة: إي والله ... الأمهات ما يلحق جزاهن... مير أنتي وش أخبارتس
وش مسويه...
أفنان: على حالي بموت من ضيقة الصدر... زهق!!
عذبة... وش صار على ليلوه؟
عذبة: أرسل ورقته أمس... فكه...
أفنان: مستانسه؟
عذبة: لا... وإيه...
أفنان: يوه يا عذيب ترا كرشتي قدامي متر... مالي خلق فلسفة زايدة!!
عذبة: طيب... بسم الله أكلتين بقشوري...
فرحت إنه إفتكت من الشك وضاق صدري إنه تطلقت...
أفنان: لا فكها ربي... إلا أنتي وفيصل وش صار عليكم؟
عذبة: أقول إسكتي لا أصك الخط...
من زينه الحيوان... كل الناس إستحت على وجهه إلا هو...
أقول إسكتي بس شبت تسبدي..
أفنان: غريب والله... انا أول أقول لا مب قصده.. بس عقب سالفة الضرب وأنتي مريضة ولا حتى إعتذر ولا تأسف...
عذبة: أبو عبدالعزيز بلحيته يصيح عند راسي...
وعقب ما طلعت من المستشفى يوميا يتصل ويتأكد ويرسل مرته...
وللحين وهو يرحمن... ويحن علي... حتي سعد... هاللي مغسول وجهه بمرق
حس وراح يدور على مستشفى أحسن و حاول بي كم مرة ينقلن برا أكمل العلاج..
أفنان: فيصل...ماعقب اللي سواه معك و مشاري شي...
عذبة: مشاري أقول يغار وبينتقم لكرامته... ولا أي شي..
بس اللي سواه وأنا مريضة ولا يهودي يسويه...
وسافر أول ما ليلى تزوجت ... جاء قدام الناس يعني إني مهتم بنات عمي...
أفنان: غريب هالإنسان... يالله الله يعفو عنا إغتبنا الرجال..
عذبة: إي والله عطيناو حسناتنا وهو ما يستاهل...
أفنان: أخ... وه تبين الكرشة؟
عذبة: لا يا شيخة أنا أبي الولد..
أفنان: إيه يسمح لك صالح.... يحسب الأيام للولده...
عذبة: إيه وش وراو بيجيه الولد بارد مبرد لا حمل ولا ولادة!!
أفنان: إي والله صدقتي...
********
"في الصالة"
عذبة تنهي مكالمتها: الله يسلمك خال... سلامتك يا قلبي..
لا ... إيمان بعيوني...ولو غاليه بنت الغوالي... أمس كانت عندي..
ولا يهمك... الله يسلمك.. إتفقنا.. الله لا يخلينا منكم...مع السلامة
_تغلق السماعة وإذ بالطباخة تقف خلفها وهي تمسح دموعها_
عذبة: ميرنا!!
وش بتس؟
الطباخة: خلاص عزبة طفح الكيل... ما بئي فيي أتحمل أكتر!!
عذبة: وشو؟
الطباخة: إختك ليلى... نازلة فيا صريخ وغطرسة...
مو عاملة حساب لعمري... أنا بعمر أمها...
أختي أنا متلي متلا... شو كلنا مسلمين وعرب...
وأنا جايه أشتغل شغله حلال... وزيفة مو عبودية...!!
أنا حرة إهي ما إشترتني منشان تتعامل معي هيك..
عذبة: ليلى!!
وش صار بالضبط؟
الطباخة: اليوم الصبح... بعد ما إلتي لي إبعت الفطور لغرفتا...
إتصلت علي وصارت تغلط بالحكي ..
عذبة: طيب ليش؟
الطباخة: مرة ما عجبها الفطور... ومرة دسم.. واليوم بتئول إني أبعت لها البائي من فطوركون أنتي والآنسة نجلاء...
شو هالحكي مدام عزبة.. من شان الله... يا أشتغل بهالبيت محترمة يا بطلع منوه ومابدي مصاري... أنا عربية وكرامتي أهم علي من أي إشي تاني!!
عذبة: زين ... مدام ميرنا... أنا آسفة... أنا اعتذر عنها..
أنتي تعرفين نفسيتها تعبانه بعد الطلاق...
و...
أكيد أنتي أم وبتقدرين موقفها... أرجوك تعاملي معها على أنها بنتك..
طولي بالك .... وحقك يرجع لك...وكرامتك وكرامة أي شخص تحت مسؤوليتي من أهم أولولياتي...
عشاني بس هالمرة وإذا قللت أدبها ثانية... أعطيك راتب الثلاث شهور الباقية...
وأضمن لك تعويض...هاه وش قلتي؟
الطباخة: حاضر مدام... والله من شانك هه...
عذبة: الله يخليك يا ميرنا... قلبك أبيض..
يالله أنا بروح أتفاهم معها...
*********
"في غرفة ليلى"
الغرفة مظلمة , والنوافذ والستائر مغلقة, في ركن قصي من الغرفة رسمة وردة ذابلة تحيط بها هالة سوداء قاتمة, تركتها ليلى لتجف, اللون الأسود منسكب على السجادة الفاخرة, والفرش تناثرت تحت اللوحة, ليلى منزوية على كرسي صغير بجانب مجسم رخامي ضخم...
دخلت عذبة , تلفتت يمنه ويسرة , هرولت نحو الشرفة وفتحت الستائر ثم فتحت بابها على مصراعيه, ذهبت للنافذتين من الجهه الأخرى وفتحتهما, إلتفتت على اللوحة ثم وقف أمامها تتأمل وسألت :
ليلى... أمي ماكانت تسمح لتس تجيبين الألوان هنا.. فيه بالقبو مرسم خاص..
وفيه الحديقة...ليش ترسمين بالغرفة؟
ليلى: ما أبي اطلع...
عذبة: ليش؟
ليلى:.............
عذبة: ولمتى بتظلين على هالحال!!!؟
من إسبوعين ... من إستلمتي ورقة طلاقتس وأنتي قافلة عليتس الباب...
ليلى:.............
عذبة: أنتي لازم تطلعين من هالسوداوية اللي قاعدة تعيشينه...
إطلعي شوفي الناس... الحياة مو لون أسود ولا لون أبيض!!
يامبسوطة يا تعيسة.. فيه ألوان ثانية... جربي تعيشينه...
ليلى: أنا ... ما أبي أطلع... خلين بالسواد... عاجبني...
عذبة_إلتفت لها ونظرت إليها نظرة تحدي ثم صرت أسنانها وظهرت إبتسامه خبيثة _:بس أنا ما عجبتن!!
_إنحت وأخذت اللون الأبيض وفتحته ثم إلتفت لليلى قائلة_:
شوفي... أبجرب مهاراتي اليوم..
ليلى: لااااااااااااااااااااااااااااااااااااااا
_ركضت ليلى نحو عذبة وحينما أمسكت بيدها مدت يدها الأخرى لتنشر اللون الأبيض على اللوحة وهي تضحك_
ليلى: حرام عليك... خربتي لوحتي!!
ليش... ليش!!
عذبة: بس...أنا أكره اللون الأسود...
ليلى: أنتي وشو أنتي ما تحسين!!
انا مطلقة ... وقاعدة أعبر عن نفسي بهالوحة... وتجين ببساطة تخربين شغلي عليها!!
أنا ما أبي أطلع... ما أبي... انا قمامة.. ما أحد طايقني بهالبيت...
أنتي ما تحسين باللي بي... شعور المطلقة ما يوصف...
أنتي قلبك ميت... أنتي وشو... كثر المصايب خلت عندك برود...
أنتي قالب ثلج... أكرة الثلج اللي تحاولين تدخلينه بالقوة بحياتي..
عذبة_تمسك بيديها المصبوغتان بيدي ليلى وهمست_:
أنتي تعرفين إن فيه انواع من الثلج تحرق أشد من النار!!
ليلى: ...................
_تترك عذبة يدي ليلى ثم تفرك شعرها وتحك وجهها وكأنها تحاول أن تقول شي يصعب قوله, وضعت يديها على خصرها, ثم عضت شفتها وإدارت ظهرها لليلى ومشت خطوتين , توقف فجأة ثم إنحنت لتقترب من ليلى قليلا وهمست_:
أنا مطلقة... مثلي مثلتس... نسيتي... طلاقتس هذا أنتي طلبتيه..
لكن طلاقي كان صدمة لي وأنا توي ما صحيت من سكرة ألم موت أهلي...
نسيتي ... ولا مازلتي تعتقدين إني انا مخططة للطلاق؟!!
ليلى: عذبة..أأ.. أ......
عذبة: هس..._وتشير لليلى بأن تصمت وتشيح بوجهها عنها ثم تسير مبتعدة خطوات قليلة وتلتفت ثم تضحك قائلة_:
أنا وقته ... كنت مصدومة...مقهورة.. منهانه... وفوق هذا كله مجرووووووووووحة...
الشي الوحيد اللي يجمع بين طلاقي وطلاقتس شي واحد...
_همست _الشماتة... كلنا تشمتوا بنا الناس يوم تطلقنا صح!!
وأعتقد إن هذا أسوأ شعور ...
لكن_صرخت_ ما صكيت علي الباب يا هانم وقعدت أصيح!!
مارحت أصرخ على الطباخة وأحط حرتي به!!
مارحت سويت لي عالم أسود ... وضربت على نفسي حداد...
قمت .... وكل جروحي تنزف.. تحاملت على نفسي...
واجهت الناس... وقلت لهم بطريقة عمليه إن الطلاق ما يعني نهاية حياتي...
في ذاك الوقت انا أكبر كذابة... وأكبر مجرمة بحق نفسي...
تعذبت... عشان ما أحد يتشمت بي....
ووقفت عشان ما أحد يدوسن...
ما أبي أحد يشوفن ضعيفة ومكسورة...
لأنه أخاف يجي يوم... وأنهان زيادة بسبب ضعفي...
ليلى...
أبقولتس سر... ما بحته لغير أفنان... وماما أمينه...و....
_تتنهد وتنظر للأعلى_
ليلى... أنا أحب مشاري للحين... وعرفت السبب اللي خلاه يطلقن..
وعرفت كل شي... بس... عشان ما أبين ضعيفة ومكسورة جناح
تحاملت على نفسي وسكت...
ما أبي أحد يقول عن... ضعيفة... أخاف يجي منهو يتجرأ علي بعدين..
ليلى...
أنا لمن أتذكر الأيام الصعبة اللي مرت علي... أصفق لنفسي وأقول برافو عذوبة..
كذا الواحد يصير قوي... وما يخلي مصيبة ولا ألف مصيبة تنهيه...
مدام ربي كاتب لي يوم بهالدنيا أبعيشه... طوله وعرضة... ولا أستسلم...
ليلى:عذبة... أنا آسفة.. أنا.. أدري إني حقيرة... أدري... إني أستاهل اللي صار لي..
أدري إني ظلمتك معي.. وبدل ما أكون لك عون... خذلتك...وإتهمتك
أدري... بس أنا ما أقدر أشوف نجلاء ولا أشوفك...
أنا ما أبي أي شي يذكرني بالماضي.. بغلطتي...
ما أبي أطلع.. ما أي أشوف نورة وتركي ومجيد ...
فيصل وزعله مني عشان العايلة.. عايلة مؤيد ما عجبته...
كلش كلش كان غلط وانا أصريت عليه...
و.........
عذبة: بس... خلاص... أنتي مو أول وحدة تخطي ولا آخر وحدة...
أنا أحبتس ومو منتظرة منتس تجين تعتذرين...
أللي أبيه منتس إنتس تصيرين قوية وترجعين للجامعة...
ليلى: الجامعة لا....
عذبة: هذي حياتس... بس الشهادة أهم شي... الشهادة سلاح..
ليلى: شهادة فنية... هه وين بتنصرف معه...
عذبة: براحتس... من بكرا بنروح للمحكمة الصبح عشان أفرغ لك أملاكتس..
و... يرجع لتس حلالتس بعد ما راح مؤيد.... حقتس ولازم يرجع لتس..
وو.. إيه خالي بيجي بكرا عنده شغل بالرياض...بيمرتس... أحس لو تروحين عنده تغيرين جو... أحسن من القعدة هنا...
ليلى: ........................ فيه شي ثاني؟
عذبة: إيه.. الحين تروحين لميرنا وتعتذرين منه... جت لمي تصيح...
ليلى: أووووووووووووف
عذبة_بغضب_: زين تحملي أغلاطتس!!
ليلى: طيب... أبشري..
عذبة: ليش اللون على السجادة!!
خير... السجادة غالية... نعنبوا بليستس يالبثرة!!
جيبي تنر وحاولي تمسحينه... ولا ترا أبخصمه من مصروفتس...
ليلى: أمي عذبة الثانية... وبعدين وش مصروفه؟
عذبة: إيه ما قالت لتس نجلوه... ترا مافيه لعب بالفلوس...
مصروف محدد.. واللي بيزيد يجي يكلمن ويقنعن ... إذا وافقت ولا... مافيه..
ليلى: عذبة..جد والله للحين تحبين مشاري..؟
طيب قولي لي وش سبب الطلاق؟
عذبة: ليلى... إنسي الموضوع...
*********
"الجزء الثامن والثلاثين"
"بعد يومين"
"في الخبر"
عبير وأحمد في الصالة يستعدان لمشاهدة فيلم أجنبي , عبير تغلق الستائر وتزيد من درجة التكييف, فيما شغل أحمد بتشغيل جهازه المحمول, وتوصيل السماعات..
أحمد: عبير روحي نادي ليلى كان تجي تتابعه معنا...
عبير: لا ... ليلى تقرق هي وإيمان...
أحمد: شفتي إيمان الخايسة!!
عبير: وش به بعد!!
أحمد:تقول لي... إسبح ريحتك خياس!!
بالله بالله عبير تشمين بي ريحة؟!!
عبير: ههههههههههه
مسكين.. تحمل...
عادي .. المسيكينه توحم .. شف هاجتن عن رجله.. تقول يحوم تسبدي..
طول بالك عليه..
أحمد: لا والله!!
رجله تتفاهم هي وياه ...
وبعدين هو المستفيد.. بيجيه ولد!!
أنا وش دخلي تتوحم بي!!
الله ياخذه!!
فشلتن عند ليلى..
عبير: هههههه
ليلى تعرف حركات الوحام.. وبعدين ليلى تشم..
مابك ريحة.. وسع صدرك.. أقول متى بيشتغل ذا؟
أحمد: هالحين.. بس أقول...
عبير: نعم؟
أحمد: وين الشاهي والفصفص!!
عبير: قلت لك ... شاهي إيه فصفص لا!!
تملي البيت كله قشور..
لو أنت ذرب وتحط قشورك بالصحن كان ميخالف..
أحمد: أحط قشوري بالصحن!!
أجل وشو له أنقم حب إذا حطيت القشور بالصحن..
إن ما تفيته بكل مكان ما أتطعم به...
عبير: أجل .. مافيه..
أحمد: أقول عاد مالتس كلمة...
بوه شغالة إيمان.. جيبيه تكنس..
يالعجازة..
عبير: أقول أحمد.. تبي فصفص رح للملحق..
أحمد: يوووووووووه... أقوم أنا أجيب...
عبير: والله ترا ما أنظف..
مالي دخل .. يمه...يمه...
أحمد: كولي تبن... أنا أكنس بس جيبي..
عبير: كذاب ذاك المرة أنت وبندر قلتوا لي أبشري...
وقمتوا طلعتوا وخليتوه وانا اللي كنسته..
مير بندر راح لدوامه أنت المفروض تكنسه!!
أحمد: أقول أها... تعذرين لبندر خايفتن منه..
والله أبنقم وأتفه على راستس...
عبير: يمـــــــــــــــــــــه...
يمه تعالي شوفي أحمدوه...
*********
"في غرفة نجود"
عذبة: أهوه ياستي جيت وش تبين؟
نجود: ......................عذبة......
عذبة: أقول نجيده أنا وراي شغل الدنيا... إخلصي علي..
نجود: مبروك ما جابت أفنان...
عذبة: ههههههه ياشيخة جايبتن من بيتنا عشان تباركين ولدة أفنان!!
الله يبارك بتس... توي جايتن من عنده وليده يهبل... ماشاء الله... كنه خاله سلطان..
نجود: عذبة.....
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك