رواية انقلبت الموازين -2
سالم:ولد عمج كان هايس بشغله لدرجه انه احيانا كان يبات بالمكتب...واحيانا بالاسابيع ما نشوفه...حتى ابوي كان دوب يحن على راسه ويقوله ارحم عمرك..بعدج ما تبينه يصير مدير
ريم:انا ابى افهم هذا موليه مسفه بالاوادم..اشلون يمشي الشغل..الله يعين الي يشتغلون معاه
سالم:اصلا كل الي بالشغل يحترموه ...وهو صح قليل الكلام..بس مره ممشي امور الشركه
ريم:بتخبرك هو شو مشكلته بالحياه
سالم:كلنا ندري الي مر عليه مب سهل..مب سهل انك تحس نفسك عاله في بيت احد وعلى الطالعه والنازله الوالده متامره ومتمننه عليه...من غير الضرب الي كان ييه والوالد بره...اصلا يكفيه الحرق الي بيده...
ريم:يشكر ربه اني امي خلته يعيش ببيتها...
سالم:قصدج بيت عمه
ريم:الي هو
سالم:تدرين لو عليه هو من زمان مودر البيت وعايش بشقه..لولا انه ابوي حالف عليه اذا طلع من البيت ..ينسى انه عنده عم
في نفس الوقت رن تلفون سالم ..ولمن شاف المتصل ..قال لا حول ولا قوة الا بالله
سالم:تصدق زوجتي الي هي زوجتي ما تتصل بي شرواك ....غثيتني
ناصر:اقول كل تبن
سالم:وانت سير بيع دانجو
ناصر :والله ..تعال ساعدني انا ابيع وانت سولف معاي
سالم:حتى في هذه تباني اكون معاك..حشى بنيه
ناصر:تسكت والا اجيك
سالم:احلف
ناصر :هذا الناقص احلف علشانك
سالم:نويصر شو تبى
ناصر:نويصر طل بعينك...اقول سلوم معزوم على العشاء..سرينا
سالم :سلوم ..بعينك بعدين انا ما حد عازمني..ليش ارز ويهي
ناصر:يا ذا العلم..انا عازمك تعال
سالم :سيري لاه
ناصر :تقوم والا ا اجي اخذك من كشتك
سالم:الله يسامحك يا ابوي يوم انك خلتنا نكون جيران ناصر
ناصر:كثر منها
سالم :مب ياي
الجزء السابع
سالم:يا خي تعبان ..وبعدين اريد اروح بيت اهل زوجتي ..اشتقت لعيالي
ناصر:اشتقت لعيالي...بدري صراحه ..توك بس اشتقتلهم
سالم:ناصر فيك شي
ناصر:ضايق شوي ..
سالم:جوري
ناصر :يا ليت..هذه ميعاد الخبله عكرت مزاجي
سالم:سير تعشى وي ربعك...وبعدين مرني نمشي صوب البحر
ناصر:تمام...علنا ما ننحرم منك يا سالم
سالم: امين يا الوالده
جوري راحت تشوف ساره...واول ما دقت الباب..شافت ساره حاضنه ميعاد..وميعاد قاعده تبكي بحضنها...سكرت الباب وطلعت هي تعرف انه اكره شي عند ميعاد حد يشوفها تصيح
جمان كانت تقرا مجله ...لمن ياها مسج على جوالها..واول ما بطلته شافته رقم غريب..لمن قرت المسج عرفت من عند منو...قالت موت حره ماني موافقه عليك
جوري راحت لغرفتها ...كانت تبى ترقد..حاسه بالخنقه ..هي مب مستوعبه لسه انها راح تروح للندن ...يا ربي بدل ما هو يركض وراي انا الي يالسه اركض وراه...وحاولت تتذكر ملامح زياد ...ما شاء الله عليه كان وسيم وجميل ماخذ جمال ابوه...واتذكرت ابو ناصر ..وكيف كان جميل ..حتى لمن كان يوصلني للجامعه البنات كانوا يتخبلوا عليه...يا ترى صرت احلى اللحين ..ونفس تربيه ابو ناصر ..ولا غيرتك الغربه.. ...
قررت تغير من روتينها ....وقالت خلني انام من وقت علشان اصحى بدري... اسوي الفطور بنفسي
وتذكرت كيف كانت تسوي الفطور لبو ناصر لمن توفت ام ناصر...اه يا يمه وايد مشتاقتلك..تذكرين يمه لمن كنا نصحى من وقت علشان نسوي الفطور للابوي لانه ما كان يرضى ياكل من يد الشغالات ...ودايما تاخذين بخاطرج لمن اقوم من وقت واي اساعدج..وتقولي يا بنيتي سيري رقدي ..وكنت ارد عليج ...يمه ابى اساعدج ويلست تدعي لام ناصر وبو ناصر
اما عند ريم ...الاخت محتشره تبى تسري عند جمان..وامها مب راضيه..تقولها هل البنت ما منها فايده..عيل حد يرفض ولدي انا...
ريم (وفي خاطرها):يا الله متى نرتاح من هذه السالفه
يمه فديت روحج بس خمس دقايق اخبرها اني وافقت العرس يكون بالشهر الياي
ام سالم:وليش ما تدقي عليها..
ريم:لالالا يمه انتي مب فاهمه..لازم اشوف تاثير القرار عليها
ام سالم:والعثره....صايرين تمثلوا على اخر عمركم
ريم:يمه الله هداج اي تمثيل واي خرابيط..فديتج يمه ..خليني اسري..ترى ما راح يجيني الرقاد
ام سالم:سيري بوي..لا تموتين علينا
وريم ما صدقت خبر ..على طول ركض لبيت جمان..وجمان حشرت الدنيا ..وعلت على صوت المسجل ..وحشرن الدنيا بالرقص
اما عند ساره وميعاد...
ساره:بس حبيبتي ليه تسوين جي بعمرك..كل هذا علشان ناصر صرخ علي
ميعاد:اقول ساره ..قلبي ويهج
ساره:خخخ..انزين خبريني شو الي مزعلج
ميعاد:ما نسوا السالفه..كلهم بعدهم يتذكروا سالفه فاطمه...ما حد راضي يفهمني
ساره:فديتج يا ميعاد..ليش تعذبي نفسج جي
ميعاد:ساره والله اني كنت مراهقه..هي جت لعندي وقالت انه ولد ريل امها يتحرش بها..وكانت تصيح بصوت عالي..رحمتها..عطيتها كل الحلول وما رضت ..كله تقول اخاف ما حد يصدقني..خفت عليها..ويلست طول الليل افكر فيها ..لحد ما وصلت لحل اني اخبر اخوها ..هو كان اكبر عنا بسنه..وكنت دايما اشوفه لمن اروح بيتهم..بس طلع هو مسافر من يومين ..يدرس بره..
فما كان يدامي غير اني اخبر امها..ويا ليتني ما خبرتها..قلبت الدنيا على راسي ...وانتي تبي تخربين بيتنا ..ويالسه تتبلين على بنتي..وطردتني من بيتهم..واليوم الثاني ..اتصلت بفطوم..اتخبر عنها..بس ما كانت ترد علي...وانقلب كل شي على راسي..كلهم لاموني ..والله ما كنت ادري انه ولد ريلها كان يسمع الي اقوله..راح خبر ابوه ..انه فطوم تتعرض له...والمسكينه فطوم زوجوها بواحد عيوز...على قولتهم يبون يتسترون عليها...صدقيني انه قصدي كان شريف..يمكن سويت هذه الحركه علشان الفت انتباه امي لي ..هي ما قصرت معانا..بس كنت وايد اغار من جوري..وبعد تعرفي مراهقه ومحصله تكون بطله وتنقذ وحده...بس والله فطوم كانت اكثر من اخت لي ...اول ما شفتي دموعها ..قلت لازم اسوي شي
ساره:فديتج ميعاد..صلي على النبي..هذا كان نصيبها..وكلهم عازرينج
ميعاد:عليه الصلاة والسلام..المشكله يا ساره انه فطوم صدقتهم ...رسلت مسج تقول فيه..اني كنت مستقصده واني وحده ما يأتمن لها..حاولت افهمها ..بس بعد شو بعد ما راحت وي ريلها لمنطقه بعيده
ساره:الي راح راح يا ميعاد..وانتي قصدك كان شريف...واذا عن ناصر تعرفيه لمن يعصب ما يثمن رمسته..اصلا انتي ادرى بغلاج عند ناصر
ميعاد:انا بسير غرفتي اريح ..احس راسي بينفجر
ساره:سيري توضي وصلي وان شاء الله بترتاحي
ميعاد:ان شاء الله
طلعت ميعاد من الغرفه على دخله ناصر..
ناصر:خيبه ...كل هذا صياح
ساره:مب زين عليك الي سويته فيها
ناصر :اشلون
الجزء الثامن:
ساره:ليه زعلتها..تراها صاحت لحد ما قالت بس
ناصر:هي الي طلعتني من طوري
ساره:وليه تذكرها بسالفة فاطمه
ناصر:اباها تتعلم من اخطاءها..الي صار مب كان هين مسكينه فاطمه سيرتها صارت على كل لسان..لدرجة انه اخوها ما رضى يرجع للبلاد ...انا متاكد انه قصدها كان تساعد فاطمه ...مستحيل اشك فيها..هذه تربيه بو ناصر..بس الناس لها بالظاهر...وبعدين تعالي...قصورج تشتكين عند ميعاد
ساره:من القهر الي فيني..عنبو دارك..هست ساعتين بالصالون علشانك..وفي النهايه تقول ..كم مره اخبرج ما احب الشعر القصير
ناصر:وانا الصاج..ساره القضيه مب قضية شعر..اباج تتعلمين انك تمشين على شور ريلج..ترى ما يصير الي تسوينه..مطنشه ولدج وبلعناه ..وكل يوم والثاني هايته وي ميعاد..تراج مره متزوجه..صدقيني يا ساره انا لحد اللحين ماسك اعصابي..فبسج هياته وجابلي ولدج
طلع سالم من عندها وسار العزومه...
اما ساره يلست تفكر ..وتقول بخاطرها..انا من قالي اعرس ..انا وين والمسؤوليات وين..انا وحيدة امي وابوي ومدلعيني على الاخر ...اصلا حياتي كلها كانت هياته وموضه ..انا اصلا لمن اروح بيت امي ..ما تخليني المس يمان ..كله هي تهتم فيه...يبالي اروح المكتبه واتشرالي كتب عن تحمل المسؤوليه
اما عند جوري..فهي حست بانفاس حد ومن غير ما تبطل عيونها عرفتها...بس سوت نفسها راقده..لحد ما طلعت من الغرفه
يلست تفكر وتقول يا ربي جمان متى بتبطل هذه العاده عندها وسواس وخوف من الموت..على بالها اني مب داريه عنها..اعرف انها كل ليله تيي غرفتي وتتاكد اني لسه اتنفس ..خايفه اني اتركها مثل ابوها وامها..ياربي اشلون اخبرها اني راح اسافر..اخاف تسوي بنفسها شي..وانا مب باقي على سفري الا كم يوم..اي تصدقون ما خبرت حد بخليهم جدام الامر الواقع ..ما فيني على الصراخ والصياح..اصلا مقرره اخبرهم نفس ليلة سفري..الله يعيني بس
نرجع لعند ناصر..بعد ما خلص من العزومه اتصل بسالم واتفق وياه انه يحصله عند الشاطي
ناصر يالس يفكر وهموم الدنيا فوق راسه ..يفكر كيف يقول لجوري عن زياد..سمع خطوات سالم بس ما لف
سالم:الي تسويه غلط ..تراها متزوجه..وزوجها اخوك
ناصر :والغم هنا..ماخذه اخوي الي ولا داري عنها..تصدق جم مره ملمح لي انه يبى يطلقها
سالم:انساها يا ناصر ..انت عندك عايله..لا تضيع حياتك
ناصر:حاولت يا سالم..بس والله مب بيدي..ما ادري ابوي ليه زوجها لزياد..والله اني كنت بنفس الليله كنت اريد افاتحه بموضوع الزواج..على الاقل انا كنت مخلص الثانويه..
سالم:خلاص يا ناصر ..شو تستفيد من التفكير ..خلاص انت متزوج وهي متزوجه
ناصر:لاني متاكد انها ما راح ترتاح مع زياد
سالم :ليه تقول جي
ناصر:لانه الاخ المصون متصل علي امس وخبرني انه يبى يتقدم لبنت خالي
سالم:شو
ناصر:تصدق...عيل هذا الهرم يستاهل جوري
سالم:لا تقول جي...يمكن لمن يشوفها راح يغير رايه..بعد هو معذور ..تخيل واحد متزوج بوحده من 8 سنوات ولا شافها طول هذه الفتره
ناصر:كل ما اذكره بسالفة زواجه احسه يتهرب مني ..يقولي انا مشغول ولا يقول عندي محاضره اللحين والطلبه ينتظروني..اخاف يجرحها ويبهدلها معاه..ما حد يعرف زياد كثري....تخيل انه كان معجب ببنت خالتي من هي سنه اولى جامعه ..واللحين هي معيده معاه بنفس القسم..هو اصلا ميت عليها ..بس على قولته ينتظر الفرصه المناسبه ويتقدم لها
سالم:خليها على ربك..انت ما تدري وين الخيره
ناصر:الله كريم
سالم:ناصر حاول تنساها...كل ما يت في بالك ..امحي صورتها وحط صورة ساره بدالها..ترى ساره والله طيبه وعلى نياتها..
ناصر:بحاول... اخبارك انت سالم..
سالم:ما شي يديد..ننتظر المولود اليديد...تدري ناصر وايد خايف عليها..صح انه البيبي الثاني بس عندي احساس غريب ..ودايما احاول ابعده
ناصر:تعوذ من ابليس..وانت دايما تقول انه كل شي تمام من بعد ما تردوا من المراجعات
سالم:والله ما ادري يا سالم..بس انا احساسي ما يخيب
ناصر:تعوذ من ابليس...وان شاء الله خير
سالم:عسى خير...تعال شكلي عطيتك ويه زايد عن اللزوم...سرينا ورانا رقاد
ناصر:ضحك عليه ناصر..ومشوا رادين للبيت
على الصباح...جوري قامت من وقت وزهبت الريوق وراحت ترتاح..على الساعه 10 الكل اجتمع على طاولة الافطار ...ولمن شافوا الاكل خمنوا انه جوري اهي الي مسوته
جمان:شوي وتصيح..جوري ذكرتيني بابوي
ميعاد :الله يرحمه
ساره:الله يرحمك يا بو ناصر..جوري تدرين نفسج مره حلو بالطبخ
جوري:اخجلتم تواضعنا
ميعاد بصوت واطئ لازم امها هنديه..ما حد سمعها الا ساره..قرصتها ساره بريولها
اما ناصر يلس يتذكر لمن توفت امه ...3 ايام ابوه ما كان ياكل شي الا نادرا ..لانه ما كان يحب ياكل من يد الشغاله..وميعاد وجمان ما كانوا فالحين بالطباخ..وجوري كانت بحالة صدمه...اهي اصلا ضلت بغرفتها ما كان حد يشوفها الا جمان ..كانت توديلها الاكل ويا ليتها كانت تاكل بعد..وفي اليوم الرابع كلنا استغربنا لمن شفنا الريوق وعرفنا انه جوري اهي الي سوته
ناصر :الله والريوق حد يسمع
جوري:اصلا من وين تحصل حد يسويلكم الريوق شرواي
ناصر:الله يخلي المطاعم بالبلاد
جمان وميعاد وساره قالوا بنفس الوقت:بسكم
وبما ان اليوم اليمعه ..ساره وناصر قاموا يتزهبون بيسرون صوب اهل ساره..وطبعا يمان كان حاشرهم يبى ييلس ويلعب مع جمان
اما ميعاد راحت غرفتها تدرس القضيه الي عندها وراها مرافعه باجر
اما جوري ..طبعا جمان ما خلتها بحالها ..حشرتها بالدراسه..مع انها توها مخلصه المدرسه
بس الاخت دحاحه ..على قولتها تبى تستعد للجامعه
قوم هم ناصر كانوا نازلين وشافوهم..
ساره:جمان رحمي عمرج امي
جمان:يا ناس عن الحسد
ساره:متفيجه احسدج انا..وايد ماخذه على عمرج مقلب
ناصر:اقول سرينا
يمان:ماما هذه عمو جمان مب امج
ناصر:اشلون
الجزء التاسع:
ومضى باقي اليوم عادي على الشعب...وطبعا الاخت ريم كانت محتشره تكتب الاغراض المفروض تشتريهم للعرس
على يوم السبت....
طبعا ناصر راح لشغله ..وهو كان يشتغل دكتور
جوري..قامت من وقت وراحت تشوف سالفة السفر وتخلص بقية اوراقها
نيي لميعاد...بعد ما خلصت المرافعه ..وهي كانت طالعه شافت ..ريال واقف لابس بالطو المحاماه ...كانت تكلم نفسها وتقول ..يا ربي انا هذا الريال مب غريب علي انا شايفتنه في مكان..اول ما اقترب منها الريال عرفته هذا سيف اخو فاطمه...طبعا هي من الصدمه الاوراق طاحوا من يدها وراسها كان يدور ...ومب قادره تيود عمرها تحس نفسها خلاص بيغمى عليها من الصدمه
سيف :سلمتي
ميعاد وبصوت مخنوق:مشكور اخوي
سيف:اخبارك ميعاد
ميعاد:الحمد لله اخباركم انتوا
سيف :الحمد لله
ميعاد..من الصدمه ما قدرت تتكلم سلمت عليه ومشت..وفي مكتبها يلست تصيح...يلست تتذكر فطوم ربيعتها ..واتصلت بساره ...الي حاولت تهديها وطلبت من عندها ترجع البيت
ميعاد على طول لمت اغراضها وسارت البيت ..ما قدرت تتحمل ...وكانت خايفه تسال سيف عن فاطمه..
حمدت ربها انها ما شافت جمان بالصاله ..عاد من بيود فمها ..ملقوفه شرى ربيعتها..وعلى طول قفلت باب غرفتها وحتى من غير ما تفسخ عبايتها ...قامت وفتحت البوم الصور ويلست تشوف صورها هي وفطوم ..وكملت صياحها
ساره ردت من دوامها من وقت وتقول بخاطرها...انا متاكده بيطردوني من كثر ما اشرد وسارت صوب ميعاد ..وتقول خبلتبي هل البنت ....كل يوم سالفه
ويلست ساره تسمع لميعاد وحاولت تهديها ..ونصحتها تسال سيف عن فطوم..علشان يرتاح ضميرها
اما عند ريم ...ظهرن هي وجمان وخالتها وساروا صوب المولات يتشرن اغراض عرسها
ولمن خلصوا ريم اتصلت باخوها حمد يمر عليهم...طبعا جمان حشرت الدنيا بس ما حد عطها ويه
وفي السياره الوضع كان هادئ الا من صوت المسجل ..كلهم تعبانين من تمشاية المول..الا الاخ الهايم طول الوقت وهو يناظر بجمان..وطبعا جمان ولا على بالها
واول ما نزلت جمان من السياره ..
حمد:جمان ممكن دقيقه
جمان:اختصر
حمد:ليه جي اسلوبج معاي
جمان:السموحه الشيخ ...
حمد:جمان ممكن اعرف سبب رفضك لي
جمان:انت ادرى بالسبب
حمد:يعني بسبب الوزن..بوعدج اني بنزل وزني..بس انتي عطيني الامل انك توافقي عقب
جمان:يصير خير...طبعا الاخت ولا على بالها طنشت السالفه وسارت صوب غرفتها
اما عند حمد..رد البيت وهو متضايق ..سعود كان نازل اول ما شاف حمد راح لعنده..علاقة سعود وي حمد مره قويه..سعود يعزه كثير
سعود:حمد ...اشقايل ما تسلم علي
حمد..والله ما شفتك
سعود:شو فيك
حمد:ما شي... متضايق شوي
سعود:شو الي مضايقك ..وانا موجود بالهدنيا
حمد:الله يحفظك يا رب...سعود ابى اخف وزني ..واباك تساعدني
سعود:شوف اذا انت تبى تنزل وزنك راح اساعدك ..بس صدقني اذا تبى تنزله علشان جمان..تراها ما تستاهل... وحده مثل هذه منظورها غلط للحياه..الواحد يشوف للاخلاق مب للشكل..وانا احس انها ما تبادلك نفس الشعور
حمد:بخليها تغير نظرتها للحياه عقب ما نتزوج...سعود اباك تحس فيني ..وحده كانت معاك طول طفولتك ..حبها نمى بقلبك من وانت صغير ..صعب اني انساها
سعود:انا بساعدك ومن باجر نسوي نظام غذائي يديد ..ونروح مع بعض الجم..جم حمد عندنا بالدنيا
حمد:طبعا واحد ..اللي هو انا
سعود..ضحك عليه
حمد:سعود مشكور
سعود:مب بينا انت اخوي قبل ما تكون ولد عمي...عيل انا بسري صوب الجم ...انت الحقني عقب
حمد:خلاص تقدمني وانا بييك
طلع سعود من الغرفه ..وحمد يلس يفكر به ..ويقول ما ادري ليه امي وريم ما يدانوك مع انه والله ماشي اطيب منك..اه يا جمان متى يحن قلبج صوبي..ادري انج تعامليني شرى اخوج...بس صدقيني راح اخليج تموتين علي ..بس خلينا نعرس قبل
نزل حمد للطابق الارضي ..وشاف ريم فارشه اغراضها
ام سالم اول ما شافت حمد..طنشت ريم وقامت ترحب وتهلل بحمد
ريم:يى دلوع امه
حمد: الي يغار يدق راسه باقرب طوفه
ريم:عدال ..عدال ..الله يحفظ لي عمراني
ام سالم:شو ذا المنكر بعد..عمراني..مضيعه السنع
ريم:يمه ..تراني ما غلطت ..هذا زوجي
حمد:صدق ..انه ذي البنت مضيعه السنع
ريم:طلعت لسانها لحمد..وسوتله بيدها..سير لاه
حمد ضرب راس ريم على الخفيف ..وراح قعد حذا امه
ريم:سخيف
ام سالم:مسودة الويه...اشقايل تقولين لاخوج جي
ريم:عيوزنا جنه الا دسنالج على طرف
ام سالم:ذلفي من ويهي ...وسيري زقري الشغاله لا بارك الله بعدوينج
ريم سارت تزقر الشغاله..اما ام سالم يلست تسولف وي حمد
ام سالم:حمد ما تبانا نخطب لك يا ولدي
حمد:افا يمه تبين الفكه مني
ام سالم:يا ولدي ابى اشوفك معرس..واشوف عيالك
حمد:قريب يا يمه
ام سالم:يعني تبانا ندورلك على عروس
حمد:العروس موجوده
ام سالم:لا تكون تقصد جمانوا
حمد:وما باخذ غيرها
ام سالم:تراك مسود الويه..اشقيال تركض وراها ..وهي بايعتنك برخيص
حمد:القلب وما يهوى
ام سالم:شو ذا المنكر بعد...يا ولدي الي باعك بيعه...وخلني اخطلبك شيختها
حمد:ما ابى شيختها اباها هي...
ام سالم:اقول حمد...قوم من ويهي ..قوم..لا بارك الله في عدوينك
حمد:افا والله وزعلت عيوزنا..وهذه بوسه فوق الراس
ام سالم:الله يهداك يا ولدي ...انا بزعل من الدنيا كلها وما بزعل منك...بس يا ولدي انا ابى مصلحتك..اخاف الى نهايتك بيكون بيدها ...
حمد:الله يخلينا لج يا عيوزنا ...انا بترخص بسير عند سعود
ام سالم:عافانا الله من الطاري
حمد:لا تعليق
ام سالم:سير توكل...ما اعرف ربي متى يريحنا من ذا الطاري
حمد(وفي خاطره):احسن نسكت ...ولا بتزفنا العيوز
وفي نفس الوقن يت ريم..وشافت حمد ساير صوب الباب....وقالت:وابونا ..والقهوه
وطبعا حمد ولا عطاها ويه
حمد شاف سالم وناصر داقين سوالف عند الباب
حمد:انتوا ما تملون من كثر ما تقابلون ويوه بعض
ناصر:اقول حمد...كل تبن
سالم:قوية صراحة
حمد:افا بس افا يا سالم...بدل ما تدافع عن اخوك تدافع عن هذا الهرم
ناصر :شو
الجزء العاشر
وفي اليوم الثاني....
ميعاد لمن نشت من الرقاد ..قررت تشوف سيف..قالت بخاطرها انا لازم اطمن على فطوم..علشان ارتاح من تأنيب الضمير
كانت متاكده انها راح تحصله بالمحكمه..علشان جي ما راحت لمكتبها مع انه ما كان عندها مرافعه..ولمن وصلت سالت عنه ..خبروها انه عنده مرافعه..وضلت تنتظره وتضرب اخماس باسداس ..يا رب شو صار على فاطمه..جم عندها اللحين...
وفجأه انفتح الباب وظهر سيف
سيف اول ما شاف ميعاد عطاها ذيك الابتسامه الي تدوخ...وهو كان عارف اصلا انه ميعاد كانت معجبه بيه من ايام الثانويه
ميعاد..اول ما شافت ابتسامته ضاعت علومها..ما رامت تكون جمله وحده على بعضها حاولت تسال عن فطوم بس وايد كانت خايفه ..وفي النهايه سالت سيف:
ميعاد:احم ..سيف حبيت اسال عن فطوم
سيف:اول ما سالته عن فطوم تغير ملامح وجهه وقال:شو رايج ناجل هذا الموضوع لبعدين
لكن ميعاد حنت على راسه..الا وتعرف اخبار فطوم
سيف:شو رايج اخبرك بمكان ثاني ..ترى وقفتنا غلط
ميعاد:ارجوك سيف..انا مب قادره من تانيب الضمير
سيف:فطوم... فطوم توفت
ميعاد مب مستوعبه هو شو قال..
ميعاد:شو انت اكيد تمزح ...انت شو تقول..فطوم ماتت..يعني خلاص ما راح اشوفها..يعني ما راح تسمع لي..ما راح تسمع لمبرراتي وكانت تصارخ جنها مينونه..حتى الناس الي بالممر كانوا يطالعونها..ومن غير سابق انذار ..اغمى عليها..
سيف ما عرف شو يسوي ..وشاف بنات بالممر وطلب منهم يساعدوه يودونها السياره..ولمن وصلوا الطوارئ..دخلوها على طول الغرفه وقام الدكتور يجيك عليها..سيف كان واقف بالممر .. شاف ناصر وعرفه على طول ..ناصر لمن شافه شبه عليه
ناصر:سيف
سيف من الخبصه ما رد عليه وعلى طول خبره عن ميعاد ...طبعا ناصر ركض راح لغرفة اخته يطمن عليها..الدكتور الي كان مناوب بالطوارئ طمنه ..وقاله انه شكلها متعرضه لصدمه
ناصر راح لعند سيف يساله شو صار
ناصر:شو استوابها...
سيف:سالتني عن فطوم ..ونزل راسه وقال خبرتها انها توفت
ناصر:لا حول ولا قوة الا بالله...الله يرحمها
ناصر: بس انت اشقايل تخبرها كذا الله هداك انت تعرف كيف كانت تعز فطوم
سيف:هذا الي صار
ناصر:لا حول ولا قوة الا بالله...مشكور سيف ما قصرت ..سير يابوي ارتاح
سيف:خير ان شاء ..عيل انا بسير الله يقومها بالسلامه
ناصر:امين
ناصر اتصل على ساره وجوري وخبرهم عن ميعاد..طبعا ساره حشرته ..شو فيها ..وليش استوابها ...ناصر يله يله قدر يسكتها
وبعد ربع ساعه..جوري وساره وجمان ..كانوا بالمستشفى ..وساره حاشرتنهم بصياحها
ناصر:ساره فضحتينا الله هداج..قلنالج يا بنت الناس ما فيها شي
ساره:اشقايل ما فيها شي ..وهي ولا تحس بنا
ناصر:لا حول ولا قوة الا بالله
جوري:شو الي صار يا ناصر..شو الي وصلها لهنا
ناصر:سيف يابها
جوري وجمان:من سيف
ناصر :سيف يكون اخو فاطمه..جوري شهقت بصوت عالي
جمان:منو فاطمه(طبعا جمان ما تدري عن السالفه اصلا)
جوري:فاطمه ..فاطمه
ناصر:وهو خبرها انها توفت
هذه المره ساره هي الي شهقت وقالت توفت ...الله يعينج ويصبرك يا ميعاد...امس كله تقولي انها مشتاقه لها ..وانها بتروح تستسمح منها ولو طردتها
جوري:انا لله وانا اليه راجعون...الله يصبرك يا ميعاد
جمان:مثل الاطرش في الزفه...فهموني ...منو فاطمه
محد عطاها فيس..كلهم يفكروا بميعاد
ناصر:يله انتوا سيروا البيت ..انا بيلس معاها
ساره:مستحيل اسري واخليها
ناصر:ساره..لا تعاندي هي اصلا ما راح تحس بج..سيري يمان تو بيرد من الروضه
ساره:مب سايره..جمان وجوري بيشوفون عليه
ناصر:براييج
جوري وجمان ساروا البيت ..وجمان كلت راس جوري ما خلتها تركز بالسياقه..لحد ما خبرتها سالفة فطوم
جمان اول ما وصلت البيت ..سيده ركض لبيت ريم....راحت تخبرها عن ميعاد..ما تقدر تيود نفسها ويلست تصيح عندها لمن هدتها ريم
جوري بعد ما بدلت نزلت تشوف جمان..يلست تناديها بس ما حصلتها الا بنفس الوقت ينفتح باب الصاله ..وشافت جمان وعيونها محمره ..جوري بطلت ايدينها وهي على طول ركضت لحضنها ويلست تصيح وجوري تقرا عليها..وصلتها لغرفتها وضلت عندها لحد ما رقدت
اما عند ريم..بعد ما طلعت جمان من عندها ...سمعت دق على بابها
قامت تبطل الباب شافت حمد وحالته حاله وباين عليه الضيقه والخوف
ريم:حمود بلاك ابوي..شو مستوي فديتك..ليه متضايق
حمد:شفت جمان طالعه من عندج وعيونها حمر..شو بلاها
ريم:اها قول من الاول انك شفت جمان...ما حد يعفس حالك غيرها..ويا ليتها تحس
حمد:انا وين وانتي وين..اقولج بلاها
ريم:ميعاد بالمستشفى
حمد:بسم الله عليها ..شو ياها
ريم:سالفة طويله عريضه
حمد:شو سالفته بعد..قولي مب وراي شي
ريم:حتى لو وراك شي ..انا متاكده راح تلغي كل مواعيدك اذا السالفه تخص جمان
حمد:سيري لاه... بروح اسال جمان بنفسها
ريم:تسويها والله حمودي ..ما منك امان
حمد:حمودي بعينج اصغر عيالج انا
ريم:افا ولا تزعل ..يا الشيخ
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك