رواية انوثة خيالية بالرغم من الملابس الرجالية -21
الجده : ايه يا بنتي نامي هنا عند صالح ..وخليني اشبع منك ... الا متى بترجعون الامارات ..
نوره " تضغط على عيونها ": يوم السبت ...
الجده : يا بنتي احس انك مو بخير ..فيك شي انتي مريضه والا شي ..
نوره "بارتباك":..لا لا ما فيني شي ... بس يمكن ارهاق وتعب من السفر...
ام سعود : قومي ارتاحي يا نوره ....
نوره بدون اعتراض ...طلعت لغرفة سعود ومعاها شوق ... اللي طول الوقت وهي جالسه جنب امها وكانها مو مع الناس ..
الساعه 1 بالليل كان الكل تقريبا نايم ... ما عدا عمر اللي بينام على الكنبة بالصالة قريب من سرير سعود .. وسرير عبير... بسبب وضعهم الصحي ...
دخل عمر .. المطبخ يشرب له مويه ... وفجأة يسمع صوت صراخ ... جاي من فوق ... بسرعه رمى الكاسه من يده ..... وطلع الدرج درجتين درجتين بسرعه وهو مو عارف يركز من أي غرفة جاي الصوت ...بس كأنه شاك انها من غرفة سعود .. فتح الباب بقوه ...وشاف امه حاضنه شوق وهي تبكي .. وشوق يغطيها العرق .. وترجف خوف ... وماسكه في امها بقوه ...
عمر "تجمد لدقيقه يطالعهم ..وقرب منهم بخطوات بطيئه .. وعيونه على امه ":.. امي وش فيها شوق .... وش فيكم ....
نوره "تبكي وهي حاضنه شوق ":.. آه يا عمر ... وش اقول لك ..
عمر : يمه قولي لي وش فيها شوق ...
نوره "تاشر على شنطتها ":... عطني العلاج من الشنطه ...
عمر " لف بسرعه على الشنطه فتحها ...واعطى امه الحبوب"..
نوره .. رجعت شوق تنام بعد ما اعطتها العلاج .. وحكت راسها حتى ونامت ....
عمر : ايش هالحبوب .. شوق تعبانه ...؟!
نوره "لما تاكدت ان شوق نامت .. لبستها .. وسحبت عمر .. وطلعوا في الصاله الفوقية وعلى الكنب جلسوا ":... عمر اللي بقوله لك ما يطلع لاحد فاهم ...بس انت اخوها الكبير ولازم تعرف .. لان علاجها لازم يكون بيننا كلنا ... هذا كلام دكتورها النفسي ...
عمر :دكتور نفسي ...؟! بسرعه تكلمي يا امي تكفين ...
نوره "بتردد": شوق ... شوق تعرضت لتحرش ... من سواق الباص اللي كان يوديها المدرسه ...
عمر "فتح عيونه ..مصدوم":... ايششششششش... كيف ومتى .؟
نوره "بحزن": .. من قبل اسبوعين ...
عمر : لاحول ولا قوة الا بالله ...
نوره : بس تطمن الحمدلله ما وصلت للاغتصاب ... ولحقوا عليها شباب شكوا في وضع الباص وبلغوا عنه ...
عمر"يحيك راسه مو مصدق ":ياربي ...مو مصدق .. كيف يصير لها كذا " وبعصبيه".. يما وينك انتي وابوي ..وينكم عنها ...ليه تركتموها ...عمرها 10 سنوات ويصير فيها كذا حرام عليكم ...
نوره : ما تركناها يا ولدي ... ومو ذنبنا ... ربي يعلم قد ايش احنا مهتمين فيها ... بس هذا امر الله ...
عمر "ترددت كلمه مو ذنبنا في باله كذا مره ... وغصب عنه تذكر منى .. وقف وهو منهار .. وطالع في امه بنظرات حزينه ..حاول يهرب منها ": ... تصبحين على خير ...
نوره : وانت بخير يا ولدي ...بس لا اوصيك لا يطلع الخبر لاحد ..
عمر ...نزل بدون ما يرد عليها بس رفع يده لها بمعنى لا تقلقي ما راح اقول .. كان نازل من الدرج وهو يشوف صورة منى في كل درجه ... يتذكر دموعها وإحساس الذل اللي كان يستمتع فيه وهو يوطي راسها .. تذكر سعود وهو يقول له الا أعراض الناس لا تتكلم فيها ... جلس عمر بكل ثقله على اخر درجه ... وهو حاس ان هواء البيت صار يخنقه مو قادر ينفس...وتذكر كلمه منى حسبي الله ونعم الوكيل ..." .. آه يا امي انا عرفت ذنب مين بسببه اغتالت براءة اختي وطفولتها ... كله مني ... فضحت بنت الناس اللي أمنت لي على سرها .. وما رحمت نظراتها المكسورة ولا ضعفها ... حتى توبتها ما صدقتها ... يارب تستر على اختي ..وعلى بنات المسلمين ... يارب توبه اتكلم مره ثانيه في عرض أي وحده وشرفها ...تو و و به ...تو و و و و به"... وجلس يبكي بصوت مكتوم ..خوف ان عبير وسعود يصحون ويسمعونه ...بس يمكن تأثير العلاجات المسكنة اللي يستخدمونها كان لها مفعول في انهم ما ينتبهون لصرخه شوق ..ولا ندم وبكى عمر .....
....................................
يوم الخميس يوم الملكه.........اليوم المنتظر .....
سمر من الصباح وهي في فله عمها ابو سعود ... استأذنت من عمتها ام سعود .. اللي عطتها الضوء الأخضر في انها تسوي اللي تبغاه بالبيت وفي عبير .. وبدأت سمر في عمل الترتيبات...ولكن أولها انها طلعت عبير فوق في غرفتها ...
عبير"في غرفتها":.سمر وش عندك مطلعتني هنا ..على بالك بانزل انزف انا وهالرجلين المجبسه ...
سمر "بلا اهتمام ":.. انتي اسمعي كلامي وبس... وكلتوني اني أدير ملكتك انتي و وائل ..خلاص خلوني اسوي اللي براسي...
عبير: ياخوفي من اللي براسك ...
سمر : المهم...... الحين جاية الكوافيره ..وبتطلع عندك تسوي لك ..أقنعه للبشرة ... و بديكير ومنيكير... اوكي
عبير: وشو أقنعه...لا انا ما ابغى ....
سمر : مو على كيفك ...." وطلعت من الغرفه .. مطنشه كلام عبير واسئلتها اللي ما تخلص .."...
وائل ..اتفق قبل الملكه بيومين هو وسمر انهم يسوون ملكه حلوه لعبير ..لانها ما تقدر تسوي شي وكمان امها مشغولة فيهم ... فتكفلوا بكل شي ....
سمر اتصلت على مصممه كوشات ... واختارت الصاله للزفه ...لان الصاله كبير ... حطت الكوشه في الركن .. مع طاولات بكراسيهم متوزعه في الصاله.. غطتهم بلون احمر وذهبي ...
على الساعه 6 كانت الصاله احلى ما يكون وكانها قاعه فخمه من شدة تناسق الالوان وفخامة التوزيعات ...
وما نسيت سمر تكلم صديقات عبير في مدرستها القديمه اللي بالرياض قبل تنقل الشرقية ....
عند الرجال .. الكل مستعد .. وينتظرون الشيخ اللي راح يكتب عقد القران ...
<<<<<<<<<<<<<<<<<<<<<<<<<<<<<<<<<<<<
الجزء الثامن عشر(والأخير)
<<<<<<<<<<<<<<<<<<<<<<<<<<<<<<<<<<<<
عند الرجال .... بعد ما كتبوا العقد ... ووقعت عليه عبير ... والكل بارك لوائل ... وللعم ابو سعود ........
الجد "يطالع في سعود اللي كان متمدد في الركن .. ": ..ربي سلم وائل منك هالمره .. ما تقدر تسحبه برا وتقول له يقرا ويسمي .. ويستخير ..
الكل "تذكر موقف سعود يوم ملكة وائل وشيماء":..ههههههههههه
سعود"بحرج":.. ياجدي الله يستر عليك استر علينا ..."طالع في وائل ".. وبعد تضحك انت و وجهك ...
وائل " فاطس ضحك":.. انا مالي دخل ..هذا جدي اللي تكلم ....
"طلع جواله "...
خالد : اكيد بيكلم امه ... مستعجل
وائل "والجوال على اذنه":..طببببببببعا ... اجل بقعد معكم ...الوو سمر ....
.......................
البنات عند عبير بغرفتها ...
انتهت الكوافيره من تسريحه و مكياج عبير .... وطلعت مررره رووعه وخاصة انها اول مره تتصلح عند كوافيره ....
عملت لها المكياااج ذهبي على احمر ... وروج احمر صارخ ... وشعرها اختارات لها التسريحة الرومانيه ... والورده الاكسسوار على جنب ... ومسكتها تشبه العصا السحريه بلون ذهبي ..
وفاء : ماشاء الله مررررره روووووعه شكلك يا عبير...
شيماء : جد جد فضيعه...
نجوى : اول مره اشوف شكلك كذا ...
عبير"انحرجت من تعليقاتهم": مشكووورين ... وتراكم احرجتوني ...
دخلت سمر بسرعه .لغرفة عبير .. و وراها شغالتين والكرسي المتحرك ...
سمر "بحماس":..يالله عبير جاهزة تنزلي ...
عبير "ارتبكت": .. يؤ .. وائل دخل ؟!
سمر : هههه ... لا لا تخافين ما دخل لسى ... الافضل يدخل وانتي على الكوشه والا ايش رايك ...؟!
عبير: ايه ايه .. "وتطالع في الشغالات".. وش فيهم هذولا وراك ..
سمر: عشان ينزلونك وانتي على الكرسي ...
عبير"بتوتر": طيب قولوا لي .. مجلس الحريم مليان والا لا ...
نجوى "متسرعه كالعاده":.. محد بمجلس الحريم الكل بالصاله ..
عبير"متعجبه": بالصاله ؟!... وليه ؟!
سمر "طالعت في نجوى بقهر":... ولا شي يالله يالله تاخرنا ....
عبير"تكلم شيماء":.. اعطيني شال الفستان من الدولاب ...
سمر : لا ...الشال ممنوع ... وقلت لك ليه ...
عبير ... باستسلام جلست على الكرسي المتحرك ... ومشيوا معاها البنات لبداية الدرج ... اللي بس طلت عبير.. اشرت سمر لمسئولة الدي جيه ... اللي شغلت آهاات رومانيه ... وبداو الشغالات بحمل كرسي عبير ... ونزول الدرج .. وعبير كانت مصدوومه من شكل الصاله اللي تغير ... وكمان لمحت صاحباتها .. وبنات خالها اللي يأشرون لها ... كانت تبتسم مو مستوعبه والصدمه مع الفرحه كانت واضحه على ملامحها ........وصلوها للكوشه ... اللي انبهرت من شكلها .. وكانت عبارة عن تل احمر ... وذهبي ....و ورد احمر .. مع شرايط ذهبي ... وكنبه متصله ... وعلى جنب الكوشه موجود التورته عبارة عن ثلاث طبقات .. وكاستين عصير.. وبعدها كان موجود العشان البوفيه ...
عبير جلست في الكوشه .. ونظراتها تدور في كل مكان . وفي كل الوجوه ...لحد ما استقرت نظرتها في عيون سمر ... اللي ابتسمت لها ونادتها ... وقربت منها سمر ....
سمر" تقرب من اذنها":.. ايش رايك ..؟! مثل ما كنتي تتمنين ..؟!
عبير " وكان دموعها تجمعت في عينها ... وابتسمت.. وهزت راسها بمعنى ايه ".... واكثر ...
سمر : لا لا ما نبغى دموع الحين وائل بيدخل ... وركزي على زفته طيب ...ترا هو اختارها ....
عبير "اخذت نفس .. وبدأت ترجف .. وترتبك "....
سمر ... والعمه نوره ... والعمه ام وائل ... وقفوا عند باب الصاله ينتظرون دخول وائل ..بعد ما الحريم لبسوا عباياتهم ...ودخل وائل ..
وائل .. كان حالق سكسوكته وتارك شنب خفيف .. غيرت شكل كثير للأحلى .. وصغرته بعد ..وكان لابس ثوب ابيض ناصع ... بغتره بيضاء فيها خطوط زرقاء بأطرافها ... وساعة زرقاء .. وكندرة زرقاء ...
استقبلوه الحريم بالزغاريد .. وقف وائل ... وهو مركز نظرة على الكوشة ...وبدأت زفته ..
حـبـيـتـك مــن قـلـبـي .. ومـا أنسـى أيـامك
نـار الـشـوق عـامـيـنـي .. وأنت بتـروي حـالي
شلون أصبر وأنت الماي .. ماظـنـيـت تـنـسـانـي
أنــا الـيــوم أتـرجـاكـ .. وأطـلب مـا تنسـانـي
كان يمشي وائل بخطوات معتدله .... لحد ما بدا شكل عبير يوضح بالنسبة له كل ما قرب منها ... حس ان قلبه بدا يدق بقوه ... أسرع بخطواته اكثر وخاصة ان عبير وقف تستقبله بصعوبه بمساعدت امها ..... قرب منها بسرعه ووقف جنبها ... ومسك يدها الثانية .... وباس جبهتها ...
عبير كانت منزله راسها و وجهها احمر ... وائل ... مسوي نفسه ثقيل قدام الحريم ... كان يكتفي بانه يطالع فيها كل شوي وبابتسامه خفيفه... وماسك يدها ....
وائل "قرب منها ": كيفك ...؟!
عبير"بهمس": الحمدلله ..
ام وائل "قربت من وائل وعطته علبة الدبل":... امسك يا وائل لبسوا بعض ...
وائل "فتح العلبه ... وطلع الدبلتين عطاها دبلته وهو ماسك دبلتها":.. هاتي يدك ... "دخل الدبله .. وبعدها ركز في عيونها بكل حب ".. مبروووك ....
عبير"بحرج":.. الله يبارك فيك ..
وائل "مد يده لها ... ولبسته عبير الدبله بدون ما تلمس يده":..
وائل : ههههههه لها الدرجة انا أخوف ..طيب امسكي يدي ..على الأقل مجامله ...
عبير" ضحكت بحرج"...
سمر قربت من وائل .. وأشرت له يقوموا يقطعوا الكيك ويشربوا العصير ...
وائل : سمر من جدك .. كيف بتقوم عبير... !!... لا قربوا الطاولة هنا ...
سمر: انا بمسكها عادي تقدر توقف بس لازم احد يمسكها ...
وائل "بعناد": لا ....
عبير "بحرج.. وتحاول تسحب يدها.. عشان توريه انها تقدر تقوم":.. عادي اقدر اوقف ..
وائل "مسك يدها وسحبها عنده":.. قلت لا ... والا اقول لك بلاش ..ما نبغى نقطع شي ... "طالع في عبير.. وابتسم".. صح عبورة ...
سمر :.. ا و و و وف لازم تخرب تخطيطي ...."وباستسلام" طيب....
جوا الشغالات يساعدون سمر بانها تقرب الكيك منهم ... قطعوا الكيك وشربوا العصير....
وائل : مجلس الحريم فاضي صح ...
عبير: مدري ..
وائل "يأشر لامه اللي قربت منه":.... امي أبغى اجلس مع عبير شوي لوحدنا ... مجلس الحريم فاضي ...؟!
ام وائل "ابتسمت":.. ايه ايه يا ولدي فاضي .... بتقومون الحين ؟!
وائل : ايه ...
عبير" بدات ترتبك.. وتطالع في امها بنظرات أنقذيني ... بس ابتسامة أمها .. هدتها "..
ام وائل : تنادي الشغالات يجيبوا الكرسي المتحرك ..
بس وائل لما حس انهم بيجيبوا الكرسي المتحرك ... وقف .. و وقف عبير ... وبسرعة شالها على يدينه الثنتين ..حتى عبير مو مستوعبه حركته ... ابتسم لها بقوووه ... والكل صرخ وصفق وصفر من حركته ... ومشي باتجاه مجلس الحريم ...وعبير ميتة خجل من حركته وتحاول فيه ينزلها بس كان مطنش توسلاتها ... وكأنه أمير وشايل أميرته الجميلة ....
.....بس دخلوا مجلس الحريم ... وقفلوا عليهم الباب ....
عبير" من الإحراج صوتها راح":.. نزلني ....
وائل "مبتسم.. و يهز راسه بمعنى لا "....
عبير " دمعت عيونها "
وائل " خاف بس شاف دموعها": لا لا ليه الدموع ... طيب طيب بنزلك ...."وجلسها على الكنب .. واخذ منديل ... وجلس جنبها .. يمسح دموعها ... "... ليه كل هالدموع ... خلاص يا عبورة لا تزعليني وانا مبسووط ...
عبير"تمسح دموعها ":.. هذي دموع الإحراج ... أحرجتني وائل ..
وائل " لصق فيها .. وحط رجل على رجل ": .. يا عيون وائل ...
عبير "ارتجفت من قربه منها ...و نزلت راسها بحرج":.. نسيت اقول لك مبروووك ...
وائل : ايه فعلا المفروض الكل يبارك لي... لاني فعلا محظوظ اني اخذتك ..."ومسك يدها ... وباسها"..
عبير" ارتبكت... "
وائل " لاحظ ارتباكها ":.. عبورة المفروض خلاص تتعودي علي ..لا تنحرجين ...انا زوجك ..."طالع فيها من فوق لتحت .. حب يغير الجو"... الفستان عليك احلي من سمر .. انا لما شفته فوق سمر قلت الله يستر ...
عبير:..حرام عليك ..هههههههه..."وهي تضحك مالت عليه بزياده بدون ما تحس"...
وائل " غمض عينه وشم ريحة عطرها بشكل أوضح ":... يا ويل قلبي على هالضحكه ..
جلسوا مع بعض فترة ..لحد ما الكل صار يدق على جوال وائل.. حركة الشباب للازعاج اذا طول العريس عند عروسته ...
وائل " وقف .. ":والله صجوني الشباب .. مضطر اطلع ...
عبير"حاولت توقف ... وقدرت بس غصب عنها مدت يدها لوائل ... عشان تقدر تثبت وقفتها.... وائل مسك يدها وسحبها لحضنه ... "غمض عيونه ... وهو يحاول يركز في هاللحظة وبس ... ولاحظ قد ايش عبير اندمجت بحضة .. وكأن حضنه ما يقبل الا عبير وبس ..وخاصة بعد ما تذكر شيماء .. وبرودة مشاعرهم تجاه بعض .. تأكد ان عبير هي فعلا نصيبه"
عبير تجمدت وهي بحضنه ... تذكرت لما حضنها في المزرعه ..
ابتسمت .. وصار صدرها يطلع وينزل بقوه......
وائل "بعد عنها وطالع في عيونها":.. من الليلة ابغى اسمع صوتك كل يوم... أتوقع ان رقمي لسى فاكرته صح ..
عبير"هزت راسها بمعنى ايه "
وائل : وطلب ثاني بعد ... عطرك ابغاه اليوم .. أعطيه سمر ...طيب ..
عبير"بتعجب": وليه ..؟!
وائل "رفع حواجبه .. وبضحكه":عشان ينام معاي على المخدة يونسني ..حتى وصاحبته تيجي بداله ...
عبير" ..نزلت راسها ... ":.. طـ طيب ...
وائل : فديت الخجلانين والله .....يالله قلبي ... اتركك الحين ... و اول ما يطلعون الناس من عندكم انتظر منك رنه ...اووكي
عبير"ابتسمت": اوكي .. بس أخاف يتأخرون.. وخاصة اخوالي ...
وائل : ما عليك بانتظرك للفجر ..ماعندي شي أغلى منك ... مع السلامه .......
وطلع وائل .. بعد ما اخذ قلب عبير معاه ... وترك قلبه معاها ... اخيرا تلاقت القلوب العاشقة ... ولكن تحت إطار شرعي .. لا يمكن لاحد ان ينكر عليهم حركاتهم او تصرفاتهم او حتى قبلاتهم ...
.............................
.............................
عند الرجال الكل كان مبسوط .. وفرحان لوائل ... ماعدا شخص واحد كان حامل هموم الدنيا على راسه وهو عمر ... حس انه مخنوق وما يفكر الا بشوق ومنى ... طلع من المجلس وانتبه له خالد وطلع وراه ...
"خالد من لما سافر احمد .. صار يحاول يجلس مع عمر كثير .. لانه متعود على وجود احمد واسرارهم مع بعض ... واكثر شخص تأثر لسفر احمد هو عمر "
خالد : عمر وش فيك ... حالك مو عاجبني اليوم ...تعبان ..؟! حصل شي ؟!
عمر "بضيق":.. متضايق ...مخنو و و و و و وق ...
خالد : تحب نطلع نتمشى بالسيارة ....
عمر : أي والله ياليت ...
طلعوا السيارة ... ولفلفوا في الشوارع ... وعمر ملتزم الصمت ... لفت انتباه عمر مروره من جنب مستشفى ..وكان تذكر شي ...
عمر : خالد خالد ... لف وروح لمستشفى اللي كان سعود وعبير فيه ..
خالد "مو فاهم":..هاه ؟!....
عمر : يا خالد روح وانت ساكت ...سمعتني ...
خالد : طيب ليه هذاك المستشفى فيه غيرة وأفضل منه بعد ...
عمر "بعصبيه":.. بتوديني والا وقف واخذ لي تاكسي ...
خالد : طيب طيب ...بوديك ...
راحوا على المستشفى .. وعمر يدعي من قلبه انه يلاقي منى مناوبه اليوم ... وده يرتاح من التفكير ..وتأنيب الضمير ...
خالد "وقف في مواقف المستشفى": .. تحب انزل معاك ...
عمر "يفتح الباب بسرعه ":.. لا لا انتظرني ..........
دخل عمر وعلى الاستقبال وسال عن الممرضه منى ...اللي من حسن حظه كانت مناوبه ... وطلع بسرعه وهو مبسوط من الاصنصير لقسم استراحة الممرضات ... ولمح منى طالعه من غرفة احد المرضى ...وقف ...لما شافها ...
عمر "بصوت عالي":..منى ...منى ....
منى " لفت على اتجاه الصوت .. وانصدمت انه عمر":..
عمر "قرب منها بسرعه وهو مبتسم":.. الحمدلله اني لقيتك في هالوقت ...
منى " مستغربه":.. خير .. وش فيه ..عبير او سعود احد صار له شي...
عمر "نزل راسه":.. لا ...انا اللي ابغاك ...
منى "طالعت فيه باحتقار":.. روح ..روح بيتكم ... بلا حركات مراهقين ....
عمر "اختفت الابتسامه من وجهه .. وبتردد":منى ..منى سامحيني على كل اللي صار بيننا ...
منى "بنظرات بارده":... وبعدين ... بس هذا اللي عندك ... لا طبعا ما راح أسامحك ... تدري ليه ...لانك شوهت سمعتي ...تعرف ايش يعني سمعه ... ولوثت شرفي ...
عمر "دمعت عيونه ":... منى كفايه كفا ا ا ا ا ا ا ايه ارجوك ... وربي تعبان تعبااان ...."تكى على الجدار وانهار يبكي"...
منى "تفاجاة من ردة فعله.. وبقلب الممرضه ساعدته":... عمر ...عمر ... تماسك ... انت رجال ...خلك اقوى من كذا ..."جلسته على كراسي الانتظار"...
عمر "يبكي وهو حاط يده على راسه":.. يا منى مو قادر اتحمل ... اختي شوق تعرضت للي تعرضتي له ...بس هي طفله عمرها 10 سنوات اغتالوا براءتها اللي ما يخافون الله ... وهي الحين تعبانه ..وما تنام الليل الا بالمهدئات ...توي احس ايش يعني أعراض الناس ... دعواتك علي وصلتني وذبحتني يا منى ...تكفين سامحيني ... تكفين ..تكفين ...
منى "مصدومه من اللي سمعته ":.. لاحول ولا قوة الابالله .. حرام طفله يصير فيها كذا ..
عمر : لا يكون قلبك اسود ... سامحيني كنت جاهل ...
منى "ضحكت باستهزاء":... انا وقت ما قلت لك جاهله ما رحمتني ولا سامحتني ..."اخذت نفس بقوه ".. تدري انك رغم محاولاتك تشوه سمعتي ساعدتني انه يجيني عريس ما عمري كنت احلم أتزوج واحد مثله ... بس خوفي منك هو اللي خلاني ارفضه .. سعود ولد خالك ...تخيل ..
عمر "طالع فيها وفمه مفتوح": ... هاه ... سعود خطبك ... وليه رفضته ...؟!
منى :.. بسببك ...انت .... أتوقع اللي حسيت فيه كفاية وربي حسسك بالنار اللي انا سنه كامله أحسها بقلبي وزادت لما عرفت انت .....بس تدري عشان اختك وامك اللي مالهم ذنب... " وقفت"... روح الله يسامحك دنيا واخره ...
عمر "وقف .. وطالع فيها بعيون متعبه":... من قلبك ..
منى :... ايه من قلبي.. بس راح استثني من مسامحتي لك انك ما تتكلم عن اعراض الناس مرة ثانيه..
عمر : توووبه والله توووبه ... هذا درس ما راح انساه .... وسرك ببير يا منى ... "وكان بيروح بس وقف لوف على منى "...أترجاك اذا انتي وسعود تفكرون ببعض لا تتركينه ..وانا اوعدك اني انساك وانسى اللي قلتي لي عليه ... ولا تضيعين سعود عشان ماضي ...
..............................
رجع عمر بيت خالة ابو سعود على الساعه 2 ونص ... وهو فرحان من داخله ومرتاح ... دخل من مجلس الرجال وكان فاضي... واتجه للصاله ... حصل البيت رجع مثل قبل وكل شي مرتب .. والهدوء مسيطر على البيت ... رمى بجسمه على الكنبة اللي متعود ينام عليها ... وشوي يسمع صوت خطوات كعب طالعه من المطبخ ..
سمر كانت بالمطبخ مع عمتها نوره .. سوت عصير برتقال لعبير .. وبتروح تعطيها في غرفتها فوق ...طلعت للصاله متجهه للدرج .. ولا انتبهت لعمر ...اللي كان نايم على الكنبه ...
سمر كانت لابسه لبس ساري ... وبطنها واضح على بنطلون واسع ... وفارقه شعرها من النص وحاطه خرزة بين حواجبها ... وكانها فعلا هنديه ...
عمر .. فز يشوف مين اللي صاحي ... وتجمد من شكل سمر وعدل جلسته بدون ما ينزل عينه ...وهي واقفه تطالع فيه متفاجاة من وجوده .. وصحن العصير بيدها ... لفت يمين يسار بارتباك .. ولكن نظرات عمر ما نزلت عنها .. في اخر شي ضربت برجلها على الأرض .. وبصوت عالي ...
سمر : غمض عيونك بالله غمض عيونك ...
نوره "طلعت عمتها نوره من المطبخ لما سمعتها .":.. بسم الله وش فيك ..."وطالعت في عمر "... عمر ..متى جيت ..؟!
عمر "غمز لامه وياشر على سمر": .. مين هاذي..؟!
نوره : هذي سمر ...
سمر "فتحت عيونها على عمتها":.. عمتوو ... "ورجعت المطبخ "
عمر " بفرح":.. والله ..هذي سمر ... تغيرت كثيير ...
نوره : احلوت يعني ...
عمر : الا تطيح الطير من السما ... فكرتها شغاله ...ليه لابسه كذا ..
نوره :ههههههه هذا لبس ساري يعني هندي ...
عمر "رجع طالع جهة المطبخ": .. اذا هندي شكلها كذا لو لبست سعودي كيف بتكون ...."رجع طالع في امه بنظرات تايهه".. كيف شوق...؟!
نوره "بارتياح":.. بسم الله عليها نامت الساعه 12هنا مع صجه الناس .. ونقلتها مجلس الحريم ...ولحد الحين ما صحيت ...حتى انها ما اخذت علاجها المهدي اليوم ...
عمر "تجمعت الدموع بعيونه .. تذكر منى وتأكد انها سامحته ":.الحمدلله ...
نوره : يالله حبيبي نام الحين .. والا اقول لك تعال نام مع شوق في مجلس الحريم ...
عمر "وقف .. وتذكر سمر" :.. يعني سمر بتنام هنا ...
نوره : لا الحين بتروح ...
عمر "رجع جلس":.. اجل بنتظرها حتى وتروح .. صعب تطلع الحين الساعه 3 الفجر لوحدها ...
نوره :..ما عليك البيت مو بعيد وانا بنتظرها عند الباب حتى اشوفها تدخل ... صعب انت توصلها ....
عمر : ليه مو بنت خالي .....
نورة : ايه ومثل اختك ...
عمر "عصب ووقف ..": انا ما عندي خوات الا شوق ..."وراح لمجلس الحريم وهو زعلان "..
نوره .. قالت لعمر كذا عشان تتاكد اذا عمر بدا يفكر في سمر والا لا ... وتأكدت انه بدا يفكر فيها ....
طلعت سمر من المطبخ وهي مرتبكه ...لانها سمعت كل الكلام اللي صار بين عمر وعمتها .... طالعت في عمتها و وغصب عنها ابتسمت وطلعت تركض بالعصير عند عبير ...
نوره : ياليت والله عمر ياخذ وحده من بنات اخواني ...
عمر طلع من الغرفه وهو يصارخ وينادي على امه .....
عمر "بصوت عالي":.. يمه يمه يمه ....
نوره "بخوف":.. وش فيك .. شوق صار لها شي ...
عمر "ياشر على جواله ": ..لقيت رساله من ..من الجامعه يقولون انه تم قبولي ... وبسبب الخطا اللي صار سيتم قبولي ضمن الدفعه الاولى ...
نوره "بفرح": .. الحمدلله الحمدلله ...
عمر "حضن امه ودمعت عيونه.. وتذكر منى ":... انا كنت باضيع مستقبلي ومستقبل اختي ...
نوره "مستغربه منه" : لا تقول كذا يا عمر ...الحمدلله اختك بخير... وانت ان شاء الله ما ضعت ...
عمر : ربي سلم هالمره يمه ... ربي سلم .....
.............................
طلعت سمر ... عند غرفة عبير... وكان الباب مفتوح وغصب عنها سمعت مكالمتها هي و وائل ...
عبير: سعود يحب سمر ..انا متاكده ... كيف يخطب منى !!... طيب وسمر ؟... يالله يا سعود أكيد صار لعقله شي بعد الحادث ...كيف أتركه على راحته يا وائل ... ايش أقول لسمر الحين وانا كلمتها من قبل وهي تقريبا موافقه ...
سمر وقفت مصدومه وقلبها يدق بقوه ... هدت من نفسها ... ورسمت ابتسامه مصطنعه ... ودقت الباب ....ودخلت لعبير بالعصير....
عبير .. ارتبكت لما شافت سمر...
سمر "وعشان توضح انها طبيعيه.. بصوت عالي":.... وهذا انا جبت العصير لخطيبتك ... شي ثاني ...
عبير :.هههههههه ..يقول لك تسلمين ...
سمر"تاخذ عبايتها":.. يالله انا رايحه الساعه 3 ...
عبير : والله الساعه 3 يووه كيف مر الوقت ..."وترجع تكلم وائل بدلع".. وائل بعدين اكلمك طيب .. لازم اودع سمر .. "قفلت ... وطالعت في سمر"... سمر خليك اليوم عندي ..الوقت متأخر تطلعي لوحدك ...
سمر : ما عليك عمر ولد عمتي راح يوصلني ....
عبير "متعجبه":... ايشششششش... عمر ما غيره .... غريبه ... "وطالعتها بنص عين" تعالي هنا يا بنت وقولي لي ايش فيه بينكم ...
سمر ... حكت لعبير .. اللي صار لها في الصاله مع عمر ... وكلام عمر مع امه ....
عبير:.. شكلك عجبتيه ...
سمر "بحرج":... مدري هو يقول .... تدرين .... يجنن والله " .. وسكتت سمر ...وكأنها مستغربه ليه قالت عنه كذا ... هل هو صدق هذا اللي حست فيه والا عشان توصل رساله لعبير انها ما تفكر في سعود "..........
عبير"بحماس ":أجل يمكن نفرح فيكم قريب ...
سمر : يمكن ... وخاصة انكم هالسنه ما بترجعون الشرقيه ....
عبير : وناسه ....يس ...
سمر : يالله بروح لا اتاخر على عمر ...
عبير : روحي يا زوجة اخوي ....
سمر طالعت فيها وابتسمت .... وفي نفسها .."ان شاء الله هالمره اكون فعلا زوجة اخوك ... حتى لو كان اخوك من الرضاعه "
................................
بعد سنه... وفي العطلة الصيفيه .... والقمر بدرا ... اجتمعوا الأهل والأقارب ... في قاعة فخمه وسط الرياض ....... ليله من الف ليله وليله ... أنتظرها الجميع بفارغ الصبر .. تجمعت القلوب ... وضمدت الجراح بعضها ... وتغلب الشوق على الحنين ... وأضاء الحب دربهم على الطريق الصحيح .... وفي ظل الرباط المقدس ... وعلى عتبة العادات والتقاليد ....اجتمعوا ... ليزفوا أربع عرسان على أربع عرايس .. ...
وهاهن العروسات بمشاركة ازواجهن .. يستعدين لبدء الزفة .....
أول عروس ...> منال & خالد <
منال .. كان فستانها السكري مع الذهبي .. يزيدها جمالا وروعه ... دخل عليها خالد الذي كان في قمة شياكته .. لابس البشت الاسود ... قرب منها ... وطبع قبلة على جبينها ... وامسك بيدها استعداد للزفه ..
ثاني عروس ...> منى & سعود <
منى .. كان فستانها ابيض مع ورود صغيره لونها ازرق ..ومكياج ازرق ...جعل منها عروس جميله وملفته .... دخل عليها سعود ... وهو لابس البشت الاسود ... قرب منها .. وباس جبينها .. وقد استسلم لجمالها ونعومتها ..وأصبح أسير حبها ..كما أصبحت هي ...
ثالث عروس ...> وفاء & عبدالله .<
وفاء .. كانت لابسه فستان ماسك على جسمها بشكل سمكه .. ومسكتها اكسسوار فضي .. ومكياجها فضي على احمر ...زادتها روعه على روعتها .... بحماس دخل عبدالله لابس بشت السكري .. وهو متلهف لرؤيتها بالابيض ... وقف مشدود من جمالها ... سلم عليها في خديها ... ومسك يدها ودخلوا على الحضور ماسكين يد بعض .............
رابع عروس ....> عبير & وائل <
عبير.. كانت لابسه فستان ناصع البياض .. ماسك على الصدر ثم واسع بحجم متوسطه .. مكياجها اورنجي ... مسكتها ورود مجففه اورنجي على بني ...كانت خلابه ورائعه يميزها نعومتها واناقتها.. دخل وائل بعد طول انتظار وشوق لحبيبته عبير ... وهو لابس البشت السكري ... تدور نظراته لرؤيتها ... واخيرا تقابلت عيونهم وشوقهم وحبهم ... ابتسم لها .. وقبل جبينها ... ومسك يدها ... وتوجها للزفه .....
عبير و وائل واقفين خلف الستارة التي على البلكونه ...وقبل ما تفتح ...
وائل " يقرب من اذن عبير وبهمس":... وين اللي قلتلك عليه ...
عبير "بغباء":.. ايش قلت لي ....؟!
وائل "فتح عيونه":...لا تقولين انك نسيتي تجيبين الــ....
......" بدات زفه بطلب خاص باسم العروسين ".............
عبير"بلا اهتمام":... خلاص خلاص بدات الزفه.. بعدين ....
وائل ..ما كان فيه وقت يعترض او يتكلم ... فتحت الستارة ... وطلعت احلى عروس عبير و هي ماسكة يد وائل ..والكل ياشر لهم ويزغرد ويصارخ .. من طلتهم الجذابه ....
وائل ..نسي طلبه من عبير ..واكتفى بانه يعيش اللحظة هذي اللي انتظرها من سنه ....
قربت المسئولة عن زفة العرايس من عبير و وائل .. وهي حامله سلة من القزاز .. لفت عبير عليها .. ومسكت السله بعد ما عطتها المسكه ...و وائل يناظر فيهم وكأنه فهم انها بترمي الورد اللي فيها ...
عبير "وهي ماسكه السله ..بهمس": .. ارمي معاي الورد ... انت ارمي اول ...
وائل ... أبتسم لها ... ودخل يده في السله ... ولمس الورد ... بس انه وقف وطالع في عبير بنظرات شك ... طلع الورد اللي ماسكه وركز فيه ... ورجع يطالع في عبير... يبغى يتأكد ...
وائل "باستغراب": ... ايش هذا ... ورد من الشماغ ؟!
عبير " بنظرات كلها حب ":.. ايه .... هذا شماغي ...انا سويته على شكل ورد .. لان وجهه وجه خير علي ...
وائل "يطالع فيها مو مصدق ":... صدق مجنونه .. واموووت في جنونك ....
المسئولة عن الزفه لاحظت انهم تأخروا ما رموا الورد ... قربت منهم تسألهم اذا فيه مشكله ... ولكنهم اكتفوا بأنهم بدأو يرمون الشماغ اللي على شكل ورد .. وعملته عبير بيدها .... انتهوا من رمي الورد ..
وائل "يطالع في عبير":... خلاص ... ننزل على الجسر ...
عبير "تأشر له يشوف الجسر اللي راح يمشوا عليه ":... شوف حبيبي هناك ....
وائل .. يطالع في عاملات ... فرشوا الجسر بفرش احمر ... ورموا عليه قلوب بيضاء بحجم صغير ... و رموها على الجسر بشكل مبعثر ....
وبعد ما انتهوا واصبح الجسر جاهز .... نزلت عبير ومعاها وائل ... ولما وصلوا .. بدايه الجسر ...
عبير "تهمس لوائل":.. ايش رايك ؟!...
وائل " حاول يركز في القلوب وهو يمشي معاها على الجسر ":... وليه قلوب بيضاء ....
عبير "عبير ما ردت عليه بس ابتسمت "....
كملوا الزفه لحد ما وصلوا للكوشة ... وقربت منهم الجده وام وائل وام سعود وسمر ... وفجأة ....
بدأت زفه جديدة ... ودخلت بنت شايله صندوق بيدها ... وتمشي على الجسر وتنزل على القلوب البيضاء وتلمها في الصندوق ... وجمعتها كلهااا .... ولحد ما وصلت للكوشه....
وائل "يطالع في سمر اللي واقفه قريب منه":... ايش تسوي ...
سمر "رفعت كتفها. باستغراب ":مدري ..
وائل "لف على عبير ولقيها تطالع في البنت بابتسامه .. عرف انها تخطيط من عبير "...
قربت البنت وطلعت شوق بنت عمتها ... سلمت على عبير وعطتها الصندوق .... وانتظرت عبير شوي لحد ما بدأت الاغنيه المطربه تغني اللي طلبته منها ....
على بالي حبيبي
على بالي حبيبي
اغمرك ما اتركك
اسرقك ما ارجعك
احبسك ما طلعك من قلبي ولا يوم
اخطفلك نظراتك ضحكاتك حركاتك
علقهن بغرفتي نيمن عا فرشتي ,,
احلمن بغفوتي تا يحلي علي النوم
ولفت على وائل .... اللي لف هو بعد عليها وصارت وجهيهم متقابلين ...
عبير "مدت الصندوق له ":.. تفضل ... هذي أحلى ذكريات في هالصندوق ... بس خلاص انت معاي ما صارت تهمني ....
وائل "وكل علامات الدهشه والاستغراب على وجهه":... اخذ الصندوق .... ":. بافتحه بعدين .."وغمز لها".. بالفندق ..
عبير"نزلت راسها بحرج .. ":على راحتك...
وائل عطى سمر الصندوق تمسكه لحد ما يطلع من الزفه وتعطيه ...ومسك يد عبير ورقص معاها شوي سلو ....
انتهت الزفه ... وطلع مع عبير للسيارة بعد ما لبست العباية وودعت امها وجدتها وعماتها وسمر .... واخذ الصندوق .......
دخلو الفندق ... وعلى جناحهم ... وفي غرفة النوم ... شال وائل البشت ... ورماة على الاريكه... وقرب من عبير اللي كانت ترجف .. ومرتبكه ... جلسها على السرير وجلس جنبها ...
وائل "حط يده على ظهرها.. وابتسم لها ":.. وليه الخوف الحين والرجفه.... " مسك يدها ".. عبير بردانه ...يدينك متجمده ...
عبير"هزت راسها بمعنى لا .."...
وائل :.. تراني ما اكل البشر ... وخاصة الحلوين اللي مثلك ...
عبير "ولا فيه امل انها تضحك .. والا تهدا"...
وائل "حب يغير الوضع":... طيب ما قلتي لي وين اللي طلبتك ..... انتي وعدتيني تعطيني الشماغ والثوب يوم العرس ...صح ؟!..... طيب الشماغ .. وسويتي فيه ورد ... الثوب وينه ...؟! ... بشنطتك ...؟!.. اجيبها لك ...؟!
عبير" رفعت راسها اخيرا ... ":.. أول افتح الصندوق ...
وائل "ضرب على راسه":.. اخ بس نسيت الصندوق ... ثواني ...
طلع وائل من الغرفة وراح لصاله ... واخذ الصندوق اللي كان حاطه على شنطته وشنطة عبير... فتحه قبل لا يوصل الغرفه ...ودخل عليها وهو فاتحه ومستغرب ...
وائل :.. ايش هذا ... "يقلب الصندوق كله القلوب اللي كانت على الجسر "... هذي القلوب اللي كــ....."وطلع كمين ثوب وياقه " .. وش ذا ... الثو و و و و و و و و و وب!!!..
عبير"ضحكت ":..ههههههههههههههه ايه .........
وائل ... مو مصدق اللي سوته ..ورجع يضحك معاها ... وحط الصندوق على التسريحه ... ورجع جلس جنبها .....
وائل : كل هذا سويتيه لاني طلبتها منك ... يالبخيله ....
عبير : لا مو مساله بخل ...بس ...بس كانت هي السبب في اني أعرفك ....
وائل "بجديه":... عبير.. باعترف لك في أول ليلة من زواجنا ....
عبير"خافت من جديته":.. وشو ...
وائل : انا .... انا حبيتك من اول ما شفتك هذاك اليوم بالمزرعه ... صرت أفكر فيك ... وشغلتي عقلي وبالي وفكري ... وصدقيني ما ملكت قبل الا عشان أنساك ... بس للاسف ما نسيتك ولا لحظه ....
عبير : حتى انا ..."انحرجت تقول حبيتك."... امممم عجبتني ...
وائل "بنص عين":.. والا عجبك الحضن .... انتي اعطيني فرصه وتشوفين مني العجب ...
عبير "بدلع": واااااااائل ....
وائل : يا عيون وائل وروحه .... "لصق خده على خدها .. وهمس في اذنها"... أعششششقك ..."وحس ان عبير ذابت من كلمته ... دخل يده في شعرها ... وسحب الطرحه ... وبدا يبوس رقبتها وخدها .... و ...... و......... ببساطه سلمته شفتها ..."
وش عندي اطعم ولا احلى
من بوس الشفايف
كلما قلت باقرب من شفاتك
لقيت القلب خايف
وان جيت باضمك
شعوري تجاهك ماله وصايف
وان قلت بابعد عنك
عذبني ضميري بالحسايف
احبك حب داخل القلب محفور
حب ماهو بزايف
حب لو فقدته من الحزن
ماعادني للنور شايف
انا واياك والهوى مستحيل انا نفترق
بعد ماصبحنا ولايف
خلاص قلبي تصعب حياته في غيابك حتى لو دقايق خفايف
.................................................. ....................
بعد مرور خمس سنوات
عبير و وائل ...عندهم ولدين ... محمد .. و .. سعود ....
وفاء وعبدالله .. ولد وبنت .... سلطان و دانه ...
منال وخالد ... ولد ... سالم ...
منى وسعود .... بعد معالجات و محاولا للإنجاب ... جابوا ثلاث بنات توأم ... عبير و ورود وأزهار ...
عمر وسمر ... تزوجوا ... ونقلت سمر للإمارات حتى يخلص عمر الماجستير ....
نجوى واحمد .. تزوجوا وسافرت نجوى معاه لـ لندن ... وحتى يكمل الطب ...وهي قررت تاخذ الماجستير من برا...
شيماء ...انخطبت لمده ست شهور لكمال .... ولكن هي اكتشفت بنفسها ان حبها له كان حب ايام المراهقه .. وبعد تفكير ... تم فسخ خطوبتها بطلب منها ... وتركت قرار زواجها بيد أهلها ... الذين لم يرفضوا أول عريس تقدم لها وهو ولد خالتها كان متزوج وطلق ... تزوجته وعندها بنتين وولد ... وعاشت حياة مستقره ...
انتهت روايتنا ... و الحب اذا كان تحت أيطار شرعي .. يكون بدايته جميله ونهايته سعيده ...
((((((((((( الــــنــهـــــايـــــــــــــه ))))))))))
انتهت روايتي ... وبكذا عرفتوا ليه ما نزلتها امس .. .. أتمنى اني وفقت في ايصال مشاعر واحاسيس الشخصيات و حركاتهم .. إليكم .... ..
كما اعتذر عن اي خطأ املائي غير مقصود... واعتذر لو جرحت مشاعر اي شخص قرا روايتي وسببت له أذى ... والله يعلم انه من وراء القصد ....
اذا كان هناك ملاحظات او نقد فأنا اتقبلها بصدر رحب .... هذه اول تجربه لي في كتابة روايه ... واتمنى ما تكون الاخيره ... واخترت هذا المنتدى لابدا انطلاقة روايتي فيه لاني متابعه لكم منذ فتره ..... فلا تحرموني من ردودكم .. وخاصة اني باتابعكم بحماس هالمرة ..
.. هذه روايه من خيالي وليس فيها اي شي واقعي ...
آآآخر شي ....انا نزلت روايتي في كذا منتدى قبل المنتدى هذا ... والسبب تاخر قبول عضويتي هنا ... وانا نفسها ( عقد اللؤلؤ ) .....
انتقاد اخير قراته بمنتدى اخر ... ان عبير تعتبر من المتشبهاات والتشبه يوجب اللعن ... ولكن هنا اطرح قضية عبير اللي تاثرت بكلام صديقتها ريم انها لا تملك اي صفة انوثه من حقدها وغيرتها وهذا الشي سبب رئيسي في مغامرات عبير بهاللبس والشكل ...
وشاكرة لكم تفاعلكم ... وحماسكم .... نتقابل في رواية اخرى ان شاء الله ...
تجميع زهور حسين
اللهم لك الحمد حتى ترضى وإذا رضيت وبعد الرضى ,,, اضف تعليقك