رواية ساره وصراع الحب -2
البارت الخامس
ووصلوا مجمع جديد توه مفتوح ودخلوا وتمشوا ودخلوا محل بلايز واشتروا بلايز نفس الشكل لكل وحده بس ألوان مختلفه وراحوا محل الشنط واشترت كل وحده شنطه نفس الاشكال والالوان نفس البلايز وراحوا محل العطورات وكل وحده اشترت نفس العطر وهم يمشون شافوا محل هدايا كبير دخلوه وقاموا يتفرجون وشافت ضي هديه حلوه عباره عن دبدوب ابيض فيه قلوب حمرا وسط وحوله شموع حمرا باحجام مختلفه وجوانب الدبدوب عامودين احمر عليه شريطه لف ابيض وخشبه مقوسه على العامودين مكتوب عيد ميلاد سعيد وفيه علبه حمرا جنب الدبدوب فيها قلوب بيضاء وحول الدبدوب ورد مجفف وقلوب حمرا وبيضاء كان شكله مره خيال.
ضي:ساره ساره تعالي شوفي الهديه.
ساره:واو تجنن والله لاشتريها.
هدى:صراحه روعه واو ليتني استاذة هديل.
وضحكوا على هدى وشافت ساره بجنب الهديه نفس الهديه بس انها أصغر شوي ومكتوب احبك للابد واخذتهم واشترتهم واشترت اكياس مناسبه للهديه ورجعت محل العطورات واشترت عطرين لونهم احمر مختلفين بالشكل واحد صغير والثاني كبير وحطتهم مع الهدايا وراحوا عند المطاعم فوق شافوا مطعم صيني دخلوا وتعشوا واستانسوا وطلعوا ووصلتهم ساره كل وحده بيتها ورجعت وصارت الساعه يوم وصلت١١الليل وراحت غرفتها ونامت وجا الصباح صحت ساره بدري واستشورت شعرها ولبست مريولها ونزلت تحت.
ساره:السلام عليكم.
الكل:وعليكم السلام.
باست رأس امها وابوها توها بتجلس.
ساره:رهام لا لا معجزه أول مره تصحين بدري.
رهام:لو سمحتي هاذي ثالث مره وبعدين اليوم عندنا يوم مفتوح طبعا أنا ماراح افوت هذا اليوم علي.
الكل يضحك على رهام.
ساره:طيب يمه بمر على هدى لأن سيارتهم خربت وراح تجي معي كل يوم.
أم فهد:الله يحفظك ويحفظها.
وخلصوا فطور.
رهام:يلا يلا ياحلوين للمدرسه بدري رايحين يلا.
وطلعت ساره باست رأس امها وابوها وطلعت ركبت السياره.
ساره:روح بيت أبو راكان.
السواق:اوكي مدام.
ووصلوا بيت هدى شوي الا هي طالعه وركبت السياره.
هدى:السلام عليكم.
الكل:وعليكم السلام.
هدى:غريبه امجاد وين هي؟
ساره:والله تعبانه اليوم فقالت لها أمي تغيب.
هدى:اها وغريبه رهام قدام أغلب الأحيان إذا جيت معاكم تكون ورا نايمه.
الكل يضحك.
رهام:قولي ماشاءالله لاتحسديني بعدين اليوم عندنا يوم مفتوح وماراح افوتها علي.
ووصولوا مدرسه رهام وسهام ونزلوا ومشى عشان يوصل ساره.
ساره:واو اليوم فرحتي ماتوصف شلون بعطي استاذة هديل الهديه؟
هدى:أنا اقولك إذا وصلنا روحي لها وقولي لها ابغاك في الفسحه في الفصل واعطيها.
ساره:اممم حلوه طيب والاء.
هدى:بسيطه اطلعي معها الطلعه واعطيها.
ساره:والله فكره حلوه.
ووصلوا المدرسه ودخلوا على طول مع الهدايا للفصل وحطوها في دواليب الفصل.
ساره وهي تعدل نفسها:صراحه طفشت من شعري ابغى اقص.
هدى:حرام عليك ليه كذا حلو ويجنن حرام كل هذا يروح.
ساره:لا يعني الين كتفي بس.
هدى:بس والله انك مجنونه امشي بس امشي البنات دخلوا والحين استاذة سحر بتجي ويمر الوقت على ساره مره سريع ومره بطيء ودق الفسحه طبعا أول ماجوا وحطوا الهدايا راحوا عند أساتذة هديل واتفقوا معاها من دون مايقولون لها بأيش يبغونها وجات في الفصل وسلمت وطلعت لها ساره الهديه.
ساره:استاذة نسيتي اليوم ميلادك.
استاذة هديل وهي شوي وتبكي حضنت ساره:صراحه ماحطيت ببالي ابدا انه يوم ميلادي مشكوره ياحياتي وباستها.
ساره:العفو هذا أقل شي اعطيك اياه.
استاذة هديل:مشكوره حياتي والله ماتدرين قد ايش فرحتي.
ساره:انشاءالله دوم واسفه اني قصرت فيها.
استاذة هديل:كل هذا ومقصره بعد مشكوره حياتي يلا البنات جاو مقدر أطول اشوفك في وقت ثاني.
وضمت ساره وطلعت وساره وجهها حمر
ومر الوقت بسرعه ماحست الا بهدى جات لها.
هدى:ساره ساره ايش فيك ماودك تطلعين عشان تعطين الاء الهديه.
ساره:ها طيب طيب وبسرعه لبست عبايتها وطلعت وشافت الاء رايحه لسيارتها.
ساره:الاء الاء.
والاء مطنشه وجات ساره مسكت يدها.
ساره:الاء ايش فيك اناديك مطنشتني.
الاء:اسفه ماسمعت ليه بغيتي شي؟
ساره وهي مستغربه:الاء ايش فيك ليش أنتي كذا سويت لك شي زعلانه مني إذا أنا غلطانه عليك أنا اسفه.
الاء:كل هذا وماسويتي شي واليوم اللي صار مع استاذة هديل وماسويتي شي حتى سلام في الصباح ماتجين تسلمين علي أي زعلانه.
وطلعت ساره الهديه ومدتها ل الاء.
ساره:طيب هاذي مني لك ترضيك؟
الاء شافت الهديه انصدمت وماقدرت تتكلم.
ساره:ادري ان اليوم يعتبر صدمه لك وجا في بالك اني راح اتركك وابغى اقهرك وأنا مستحيل اسوي كذا أنا اهديت استاذة هديل لأن اليوم ميلادها وأنا اشتري هديتها جيتي على بالي واشتريت لك هديه يعني لو اني مااحبك ماكان شريت لك ولا جيتي على بالي ولو جا يوم ميلادك ورحت اشتري لك هديه راح اخلي كل همي هديتك وماراح افكر في استاذة هديل الاء بعدين أمس أنا قلت لك مستحيل انساك.
الاء وهي تبكي:أنا غبيه أنا حقيره مااستاهل منك ولا شي حتى الكلمه ساره سامحيني تكفين سامحيني.
ساره وهي تحضن الاء:أنا اللي سامحيني أنا غلطانه مو أنتي خلاص حياتي خلاص بكاء يلا ابغاك تضحكين خلاص تكفين.
الاء:ساره أنا مااستاهل شي ابد لو اموت أحسن لي.
ساره:الاء تموتين وتخليني لحالي.
الاء:يعني ماراح تتركيني.
ساره:مستحيل اتركك اترك روحي ولا اتركك.
الاء:مشكوره ياقلبي اشوفك بكره انشاءالله باي.
ساره:والهديه ماراح تاخذينها.
ابتسمت الاء وابتسامتها بانت من شيلتها لانها كانت خفيفه.
الاء:راح اخذها عشانها منك.
ساره:فديتك وفديت ابتسامك.
الاء استحت واخذت الهديه.
الاء:باي حياتي.
ساره:باي حبي.
وكل وحده ركبت سيارتها وراحت هدى مع ساره.
ساره:جننتني هالبنت بس شسوي احبها.
هدى:إذا كنتي تحبينها اصبري عليها والله يعينك عليها.
ساره:الله يعيني ولاافترق عنها يارب وصلنا بسرعه بيتكم.
هدى:صادقه يلا حياتي اشوفك بكره انشاءالله.
ساره:ما اتوقع اجي راح اغيب وأنتي بعد غيبي تكفين.
هدى:ليه تغيبين؟
ساره ساكته ماتكلمت وفهمتها هدى.
هدى:خلاص طيب راح اغيب بكره.
ساره:هدى طلبتك ارسلي ل الاء رساله اني بغيب بكره.
هدى:خلاص ولا يهمك راح ارسلها يلا باي.
ساره:باي.
ورجع السواق للبيت ونزلت ساره وعلى طول راحت غرفتها وحطت رأسها على المخده وبكت الين مانامت وما صحت الا المغرب ونزلت تحت والكل كان موجود.
ساره:السلام عليكم.
الكل وعليكم السلام.
وباست رأس امها وابوها وجلست.
أم فهد:ساره اتصلت عليك العنود.
ساره:قالت لك شي.
أم فهد:تقول انها بتطلع مع البنات المجمع الجديد ويبغونك تروحين معاهم.
ساره:اها طيب راح اتصل عليها.
وقامت راحت غرفتها واتصلت على العنود.
العنود:مساء الخير.
ساره وصوتها تعبان:مساء النور ايش عندكم طالعين؟
العنود:بس حبينا نكتشفه ونتمشى بتجين؟
ساره:انشاءالله راح اجي.
العنود:والله فله راح يجون البنات كلهم.
ساره:اها خلاص طيب راح اجي يلا باي.
العنود:باي.
واتصلت ساره على ضي.
ساره بصوت تعبان:السلام عليكم.
ضي:وعليكم السلام سلامات ايش فيك تعبانه.
ساره:عشان كذا متصله راح تجين المجمع مع البنات؟
ضي:أي راح اجي.
ساره:خلاص إذا جيتي راح اقولك كل شي يلا باي.
ضي:باي.
وراحت ساره لبست عبايتها وتجهزت وطلعت اتصلت على السواق وجا وركبت السياره وقالت له روح مجمع جديد.
السواق:اوكي مدام.
ووصلوا عند المجمع الا شافت البنات مجتمعين عند الباب ينتظرونها ودخلوا يتمشون
..!! (.." توقعاتكم وش اللي بيحصل بعدين"..) !!..
البارت السادس
وافترقوا البنات مجموعات ريم وعبير وسهام ومي وسديم مجموعه رهام وغاده مجموعه ساره وضي مجموعه
دنيا وذكرى ورغد والعنود مجموعه وآخر مجموعه كل وحده تشتري عشان زواجها واللي مو متزوجه تساعد الثانيه والمجموعه الاولى تمشي وتهبل بالناس والمجموعه الثانيه يشوفون آخر الموضه من ملابس واكسسوارات وشنط اما الثالثه وهم ساره وضي ساره تقولها عن اللي صار اليوم.
ضي:طيب خذيها يوم على جنب وكلميها ولا واعديها في مكان وكلميها حتى تخلص السالفه.
ساره:طيب ليش ماتكلمينها وتفهمينها.
ضي:والله فكره خلاص اعطيني رقمها واكلمها.
ساره:أنا راح اغيب بكره وراح اجي عندك البيت.
ضي:حياك ربي.
ساره:طيب بتصل على أمي واقولها.
واتصلت ساره على امها.
ساره:الو السلام عليكم يمه اخبارك؟
أم فهد:وعليكم السلام والله بخير الحمدلله ايش عندها بنتي.
ساره:يمه بكره بغيب وابغى اروح عند ضي انام عندها.
أم فهد:خلاص طيب نامي عندها.
ساره:صدق يمه الله يخليك لي خلاص بجي مع ضي البيت واخذ لي ملابس يلا باي وافقت الحمدلله خلاص راح اغيب الاسبوع كله اصلن يوم الاربعاء زواج خلاص افلها.
ضي:طيب وهدى والاء.
ساره وهي تتنهد:هدى راح اتصل عليها والاء ماصدقت انساها وتذكرني فيها.
ضي:اسفه حياتي خلاص انسيها وخلينا نشتري فساتين حلوه يلا وقاموا يتمشون ودخلوا محل فساتين حلوه وشافوا فساتين تليق لكل وحده ساره اخذت فستان موف قصير للركب وعليه ذيل طويل من ورا توب عند الصدر وفيه كرستال ذهبي حلو وحزام ذهبي عند الخصر ومي اخذت نفس الفستان بس لونه احمر واسود وراحوا محل الجزم وشافوا جزم نفس ألوان الفساتين وصاير طقم مع الفستان وأخذوا اكسسوارات هاديه طقم على الفستان وتعشوا وماطلعوا من المجمع الا الساعه١الليل ورجعت ساره مع ضي ونزلت معها اخذت لها ملابس لأسبوع واخذت الأشياء اللي تحتاجها وراحت عند ضي وصلوا البيت راحوا غرفه ضي جلسوا يسولفون وبعد صلاة الفجر ناموا وماصحوا الا العصر وبدلوا ملابسهم ونزلوا والكل كان موجود ماعادا عبدالله لأنه دايم برا البيت بسبب شغله أو مسافر ساره وضي:السلام عليكم.
الكل وعليكم السلام.
أم عبدالله:حيا الله من جانا.
ساره:الله يحييك اخبارك خالتي؟
أم عبدالله:الحمدلله بخير أنتي اخبارك واخبار اهلك.
ساره:والله تمام وأمي تسلم عليك.
أم عبدالله:الله يسلمك.
بدور:هلا والله بالغاليه.
ساره:هلا فيك.
بدور وهي تضحك:الشغاله راحت قبل أمس زين انك جيتي عشان تشتغلين بدالها.
الكل يضحك.
ضي:لا ماراح تشيل شعره أنتي عليك البيت كله حتى الزواج مافي روحه راح اقلب البيت فوق تحت عشان تنظفين وماتروحين.
الكل يضحك.
بدور وهي تضحك:اصلن هذا بيتكم وأنا بيتي فوق يعني مالي دخل.
والكل قام يضحك.
أم عبدالله يلا ضي قومي نحط الغدا.
ساره:بجي اساعدكم.
أم عبدالله:مشكوره حياتي أنتي الضيفه مفروض تجلسين.
ساره:لا عادي لو تبون اطبخ لكم عادي.
ضي وبدور بنفس الوقت:واو وناسه يعني ماراح نطبخ بعد اليوم ههههههه.
والكل قام يضحك وحطوا الغدا وتغدوا وراحت ضي مع ساره فوق توريها الأفلام اللي عندها في بيت أبو فهد.
أبو فهد:والله افتقدنا ساره.
أم فهد:أي والله الله يحفظها.
رهام:الحمدلله راحت راح انام الين بكره مافي أحد يصحيني.
سهام:حرام عليك والله اشتقت لها.
امجاد:وأنا بعد اشتقت لها.
فهد:بجد تاركه مساحه فاضيه بالبيت.
في بيت أبو فراس.
أم فراس تحضن بنتها ذكرى:والله راح نفتقدك يا بنتي.
ذكرى وهي تبكي:والله حتى أنا راح اشتاق لكم.
فارس وفراس داخلين السلام ايش صاير مات أحد.
أم فراس:اعوذ بالله اختكم بعد يومين بتروح وانتوا في أحد ميت.
جات فرح تركض وتحضن اختها:لاتروحين وتنسينا.
ذكرى:لا ماراح انساكم انشاءالله
وجا العشا.
ساره:ضي يلا اتصلي على الاء.
ضي:يلا عطيني رقمها.
وأعطتها الرقم عليها.
عند الاء دق جوالها شافت الرقم غريب وردت.
ضي:الو السلام عليكم.
الاء:وعليكم السلام.
ضي:اخبارك.
الاء:الحمدلله بخير مين معي؟
ضي:مو مهم مين معك المهم ليش دقيت عليك.
الاء:طيب ليش داقه.
ضي:الاء أنا اعرفك وأعرف اسمك وأعرف كل شي عنك وأعرف اللي بينك وبين ساره.
الاء:طيب أنتي مين وكيف عرفتي اسمي.
ضي:ساره تحكي لي كل شي عنك وابغاك تسمعيني الين مااخلص.
الاء:طيب تفضلي.
ضي:مشكوره طيب بقولك شي بصراحه ساره تحبك وتموت فيك وتبغى تسوي أي شي عشان ترضيك حتى لو سويتي شي غلط تعتبر الغلطه منها لأنها هي السبب اللي خلتك تغلطين صدقيني لو تعرفين انها قد ايش تحبك بالعكس أنتي راح تنسين استاذة هديل راح تعرفين انها تحبك حتى أكثر منها حتى لو كانت تحب استاذة هديل خلي ببالك انها تحبك وراح تحسين انها لك وحدك بس مو تحطين ببالك استاذة هديل لانك راح تحسين بالنقص وساره يعلم الله انها قد ايش تموت فيك بعد واللي يثبت هذا أمس على الهديه وقبل أمس لما اشترت الهديه لأستاذة هديل على طول راحت تدور لك هديه.
ضي وهي تتكلم تسمع صوت الاء وهي تبكي.
الاء وهي تبكي:أنا غبيه أنا حقيره ماافكر تكفين قولي لها تسامحني.
ضي:هي مسامحتك بس تبغى ثقتك فيها حتى لو راحت أو مشت مع استاذة هديل بالعكس اضحكي وقولي بنفسك انه بيجي يوم احلى من يوم استاذة هديل.
الاء:طيب سلميلي عليها وقولي لها الاء توعدك انها تحبك للابد وماراح اشك في حبها حتى لو تخلت عني.
ضي:مشكوره حياتي واسفه طولت عليك.
الاء:بالعكس مشكوره على اتصالك خليتني أحسن من أول مشكوره.
ضي:العفو يلا باي.
الاء:باي.
وعلى طول ساره والاء بنفس الوقت رموا نفسهم على السرير وتنفسوا بقوه.
ساره وهي تضم ضي:مشكوره ياقلبي لولا الله ثم أنتي كان الحين أنا منتحره.
ضي:بعيد عنك الشر ياحياتي.
و ساره على طول حطت رأسها على المخده ونامت وجلست تناظر فيها ضي وابتسمت ونامت وصحوا الصباح الساعه٩وشافوا الكل صاحي.
بدور وهي مستعجله:تبغون تروحون السوق عشان زواج ذكرى.
ساره وضي في نفس الوقت:لا شرينا خلصنا.
بدور:طيب تبغون شي قبل لانروح.
ضي:لا إذا بغينا شي اتصلنا عليكم.
بدور:أجل يلا باي وطلعت.
ساره:طيب الحين ايش نسوي؟
ضي:خلينا نفطر بعدين نفكر ايش نسوي.
ساره:طيب يلا وحطت لهم الشغاله الفطور وهم يفطرون.
ساره:ايش رايك نتصل على هدى تجي.
ضي:تجي هنا بالبيت.
ساره:اي تجي هنا بالبيت.
ضي:صراحه فكره بس راح اتصل على أمي واقولها.
ساره:يلا اتصلي.
واتصلت ضي على امها.
ضي:الو السلام عليكم.
أم عبدالله:وعليكم السلام ها بغيتي شي.
ضي:أي يمه بعزم وحده للبيت.
أم عبدالله:بس شلون تعزمينها واحنا مو بالبيت طيب اعزميها العصر أو المغرب.
ضي:لا يمه عادي خلصوا أشغالكم بنجلس في غرفتي ماراح نجلس في الصاله ولا المقلط.
أم عبدالله:خلاص اعزميها.
ضي:مشكوره ياحلى أم في الدنيا يلا باي.
واتصلت ضي على هدى.
البارت السابع
هدى وصوتها فيها نوم وماانتبهت للرقم:الو.
ضي:صباح الخير.
هدى انتبهت للصوت انه غريب:صباح النور مين؟
ضي:معقوله ماعرفتيني؟
هدى:لا مين؟
ضي:تأكدي من صوتي.
هدى وهي تحاول تصحصح:أحلام؟
ضي وهي تضحك:ماراح أطولها عليك أنا ضي.
هدى رجعت تبغى تنام:هلا اخبارك؟
ضي حست ان فيه شي:الحمدلله أنتي اخبارك؟
هدى:والله تمام غريبه من وين أخذتي رقمي؟
ضي:من ساره هدى ايش رايك تجين عندي الحين؟
هدى:اوكي مافي مشك....ايش الحين.
ضي:أي الحين بسم الله عليك وترى ساره عندي.
هدى:توقعتك تقولين العصر المغرب شي.
ضي:لا الحين لأن مافي أحد بالبيت الا أنا وساره وقلنا نعزمك.
هدى:طيب ربع ساعه وأنا عندكم باي.
ضي:باي
وبدلوا ملابسهم ورتبوا الغرفه شوي الا هدى جايه ونزلت ضي وفتحت الباب.
ضي:هلا والله وغلا.
هدى:هلا فيك اخبارك؟
ضي:والله تمام أنتي اخبارك؟
هدى:بخير الحمدلله أجل وين ساره.
ضي:فوق يلا تعالي.
وراحوا الغرفه مالقوا ساره شوي بووو.
هدى خافت وصرخت.
ساره وضي يضحكون وراحت ساره ضمت هدى وهدى ضربتها على ظهرها.
هدى:وجع خوفتيني.
ساره:ياحياتي اخبارك؟
هدى:الحمدلله أنتي اخبارك.
ساره:واو دنتي وحشتيني يابت.
هدى:وانتي كمان.
والكل ضحك.
ساره:آه ياهدى ياني جايبتلك أخبار حلوه عن الاء.
هدى:يلا سمعينا.
وقالت لها ساره اللي صار.
هدى:تصدقين ذاك اليوم اتصلت عليها وقلت لها انك بتغيبين وقالت والله راح اشتاق لها قولي لها ماراح إنساها.
ساره وهي تتنفس بقوه:ياني احبها ياني اعشقها اموت فيها واهواها.
ضي:خلاص خلاص تعالي خلي هدى تشوف فستانك.
ساره:اي صح طيب دقايق بس.
شوي جات وجابت الفستان واغراضه.
ساره:ايش رايك؟
هدى:واو يجنن من وين شريتيهم؟
ساره:ما اقولك عشان ماتروحين تشترين مثلي.
هدى:بلا دلع من زينه يلا من وين؟
ساره:مو عاجبك أجل ليه تبين تعرفين؟
هدى:لا والله حلو بس قولي من وين؟
ساره:من المجمع الجديد وقلنا بنطقم أنا وضي أخذنا نفس الفساتين بس ألوان مختلفه.
هدى:صراحه يجنن طيب روحوا مشغل احلى لمسة يمدحونه.
ضي:صادقه حتى صديقتي روابي أعطتني بطاقة تخفيض.
ساره:أجل بكره الظهر نروح.
ضي:خلاص طيب.
وجلسوا سوالف وضحك الين العصر.
هدى:يلا حبايبي والله طولت أمي كل شوي داقه اشوفكم بعدين انشاءالله.
ساره:طيب ليه ماتجين الزواج بكره؟
هدى:عندنا استراحه يلا باي مقدر أطول دقيقه وحده يلا باي.
ضي:خلينا نشوفك بعدين.
هدى:انشاءالله.
وراحت.
ضي:صراحه اليوم فله ايش رايك نروح عند ذكرى نساعدها.
ساره:يلا.
ضي:خلاص بس اتصل على أمي واقولها.
ودقت على امها وراحوا عند ذكرى.
ساره:مبروك يالعروسه اكيد بكره راح تطلعين جنان.
ضي:اكيد بسم الله عليها حلوه وبكره بتزيد حلا.
ذكرى:بس خايفه هو مره جريء وأنا مقدر اجاريه ايش اسوي.
ساره:هههههه خلك مثل رغد ماشاءالله عليها من أول يوم الأحضان والبوسات.
ضي وهي تضحك:ههههههه أي والله صادقه ويوم جات بيتكم ودرت انهبلت.
ذكرى وهي تضحك:هههههه الله يسعدكم خففتوا عني.
ساره:ياحياتي ريحي بالك مع الأيام راح تتعودين.
ذكرى:هههه اخاف من أول يوم أنا عند اهلي.
الكل يضحك.
ضي:ترى راح نكون معاك بكره في المشغل.
ذكرى فرحانه:صدق الله يحقق لكم اللي تتمنونه والله اطرهم أحد يجي معي ماحد راضي.
ساره:ياعمري أنتي طيب تخيلي لو ماراح نجي كان اتصلتي علينا.
ذكرى وهي تحضن ساره:والله ما جا على بالي الحمدلله فرحتوني.
ساره:عيب ياذكرى أنا مو زوجك.
وجلسوا يسولفون ويضحكون مع ذكرى الين العشاء.
ضي:يلا ذكرى مانقدر نطول معاك والله نفسي اجلس الين بكره بس اكيد اهلي جاوا من السوق وبكره راح نمر ناخذك للمشغل.
ذكرى:انشاءالله يلا باي.
ساره وضي:باي.
وطلعوا من عند ذكرى وراحوا البيت واكياس ودنيا وحوسه جات الساعه١٠راحت ضي مع ساره الغرفه عشان ينامون بكره وراهم شغل كثير وناموا وجا الصباح الساعه١٠وصحوا أخذوا اغراضهم وفساتينهم وراحوا عند ذكرى وأخذوها ومروا أخذوا فطور وراحوا المشغل وصلوا ولبسوا وتجهزوا وخلصوا مكياج وتسريحه قريب المغرب
وطلعت ساره جنان بالفستان والتسريحه والمكياج خلصوا راحوا للاستراحه وعلى طول لغرفة العروس وجاوا الناس ورقص وأنزفت العروس والكل يبارك لها شوي دق جوال ساره شافت الرقم الاء طلعت الحوش وردت عليها وجلسوا يسولفون شوي حست بأحد وراها التفتت شافت فيصل اخو رغد اللي مسافر لأمريكا وهو يطالع فيها وكان ينتظر امه وتأخرت وصدفه طلعت ساره
ساره سكرت بوجه الاء تبغى تهرب بس ماتقدر وراها جدار لأنها وهي تكلم الاء مشت إلى عند الجدار وتفاجأت بفيصل.
فيصل:وش هالجمال كله أنتي وحده من بنات خوالي ولا مين؟
ساره تتكلم مع نفسها وهي خايفه:يستهبل ذا ولا ويسأل ووجه.
فيصل:ايش فيه القمر مايتكلم.
وهو يقرب منها راحت دفته وركضت داخل وراحت للحمامات وهي خايفه.
فيصل اخو دنيا عليه جمال وجسم درس في أمريكا خمس سنوات وبعدين رجع.
ساره:الله يستر لاحد شافني ياربي وش اسوي.
جلست شوي لما هدت وطلعت الا شافت ضي عند الباب.
ضي راحت تركض عندها:ساره وين كنتي الناس دخلوا العشا وانتي هنا.
ساره:كنت اكلم ساره وجيت الحمام.
ضي:طيب يلا تعالي نتعشى.
وراحت ساره معاها عشان ماتحس فيها.
ساره وهي تتكلم مع نفسها:الحمدلله ماحست بشي.
دخلوا غرفه خاص لأهل العروسه وساره يوم شافت الاكل نست السالفه وراحت تاكل بشراهه من شدة الجوع لأنهم طول اليوم بس افطروا بعد العشاء كملوا رقص واستهبال وودعوا ذكرى وعلى طول راحت على المطار وسافرت فرنسا وماطلعوا من القصر الا قريب الفجر وراحت ساره مع ضي وعلى طول نامت بفستانها وتسريحتها ومكياجها.نسيت اقولكم ان ساره قصت شعرها فراوله مدرج الين كتفها وطالع عليها جنان.وضي نامت على طول وصحوا العصر يوم صحت ساره اخذت أغراضها وضي راحت معاها بتنام الخميس والجمعه ترجع وجهزت أغراضها ونزلوا تحت واتصلت ضي على السواق وجا وراحوا بيت ساره أول مادخلت ساره على طول جات امجاد تحضنها وجات امها وأخواتها يسلمون عليها كأنها سنه برا البيت لأنهم من جد افتقدوها وجات ضي وسلموا عليها وجلسوا في الصاله يسولفون شوي دخل فهد وأبو فهد وتغطت ضي وسلمت وراحت مع ساره للغرفه وقالت لها ساره عن اللي صار في العرس.
ضي:ما صدقنا خلصنا من سالفة خالد جا فيصل بس صراحه حركته وقحه.
ساره:خلاص تكفين ماابغى افكر فيه خلاص.
ضي:طيب ساره بعطيك شي بس غمضي عيونك وافتحي يدك.
ساره غمضت عيونها وفتحت يدها وجات ضي باستها وفتحت عينها شافت بيدها طلبه حمراء صغيره عليها شريطه بيضاء.
ضي:افتحيها.
وفتحت ساره العلبه كان فيها قلاده فيها حرف ضي وساره والقلاده على شكل قلب تنفتح مكتوب داخلها.مهما كان الاحباب بعيدين القلوب تبقى تحب من تحب.
ساره:هذا كله لي.
ضي:إذا ماكان لك أجل لمين؟
وقامت ساره حضنت ضي.
ساره:ادري يا ضي والله اتعبتك معاي.
ضي وهي تضم ساره بقوه:لا حياتي تعبك راحه لاتقولين هذا الكلام أنا لو كنت محتاجتك بتساعديني؟
ساره وهي تبكي:اكيد ياحياتي لو اعطيك روحي تفداك.
ضي:ساره بتروحين بكره الاستراحه؟
ساره:هذا سؤال تسأليني لا اخاف يصير شي بعد.
ضي:طيب ايش رايك نعزم هدى وتجي بالبيت.
ساره:فكره حلوه أو نطلع نتمشى مع بعض.
ضي:احلى واحلى بعد.
ونزلت ساره للمطبخ وسوت بوب كورن وبطاطس مقلي وفشار وعصيرات وطلبت من البقاله شيبس وأشياء للسهره على الأفلام وراحت غرفتها مع الأغراض اللي سوتها واللي شرتها وجلسوا على الأفلام الين الساعه١الليل وناموا جا الظهر طلعت أم فهد لغرفة ساره.
أم فهد:ساره ضي يلا قوموا بنروح الاستراحه.
ساره:ما ابي اروح.
أم فهد:خلاص براحتك.
ساره وهي تقوم من الفراش:يمه راح اطلع مع هدى اليوم نتمشى.
أم فهد:طيب يلا مع السلامه.
واتصلت ساره على هدى ماترد وتتصل عليها كم مره ماترد.
ساره:شكلها نايمه.
ضي:شكلها أمس طالعه ورجعت متأخر.
ساره:اكيد ولا هي بالعاده تصحى بدري.
شوي الا دق جوال ساره شافت رقم الاء وردت.
ساره:اهلين اخبارك؟
الاء:الحمدلله أنتي اخبارك؟
ساره:والله تمام معليش اعذرني انقطعت الشبكه في الاستراحه وماقدرت اتصل عليك.
الاء:لا عادي بس خفت انك زعلتي.
ساره:ازعل من حبيبتي.
الاء:مشكوره حياتي
وبعد ماسكرت من الاء اتصلت على هدى.
ساره:صح النوم.
هدى:اهلين ايش عندك؟
ساره:والله اهلي رايحين استراحه ولد خالي توه جاي من أمريكا وأنا وضي مانبي نروح فقلت نتمشى ونروح حديقة الحيوانات.
هدى:والله وناسه من زمان عن الحديقة خلاص نروح بعد العصر.
ساره:خلاص عادي بس سواقنا مع اهلي في الاستراحه يعني.
هدى:يعني اجي أنا وآخذكم.
ساره:صح شاطره ههههه.
هدى وهي تضحك:خلاص ياقلبي انشاءالله بعد العصر أمر عليكم ونروح.
ساره:أجل يلا مع السلامه.
هدى:مع السلامه.
ضي:والله فله ايش رايك بعد مانروح حديقة الحيوان نروح المتحف.
ساره:والله حلو ونروح نتعشى في المطعم الهندي.
ضي:حلو أجل يلا اذن العصر خلينا نصلي ونتجهز عشان نروح.
ساره:يلا.
وصلوا وخلصوا وجات هدى وراحوا حديقة الحيوان وصوروا الحيوانات وصوروا أنفسهم والناس وهم يمشون يشترون سلاش أو فشار وبعد المغرب راحوا المتحف وشافوا التراث القديم واشتروا بعض الأشياء اللي عجبتهم وصوروا الساعه١٠طلعوا من المتحف وراحوا المطعم الهندي وتعشوا واستانسوا وتمشوا في شوارع الرياض ومارجعوا البيت الا الساعه١الليل رجعوا والبيت مافيه أحد ناموا يوم جا الصباح صحوا ولبست ساره مريولها واستشورت شعرها وافطروا في الغرفه ونزلوا تحت وركبوا السياره.
ضي:ساره بروح الغرفة نسيت شي بجيبه واجي.
ساره:يلا عشان مانتأخر.
ونزلت ضي بسرعه وراحت الغرفة وهي نازله من الدرج صادفت فهد واصطدمت فيه وهو مسك نفسه ومسكها وهي بعدت عنه ونزلت بسرعه وركبت السياره وهي خايفه وترتجف وتتنفس بقوه وساره تضحك على شكلها ووصلوا بيت ضي ونزلت ونزل السواق أغراضها داخل البيت وراح يودي ساره المدرسه وأخواتها كلهم غايبين لأنهم أمس رجعوا من الاستراحه الفجر ودخلت المدرسه وراحت عند صديقاتها ويسلمون عليها ويضمونها.
اروى:نعيما متى قصيتي شعرك؟
ساره:يوم الاربعاء.
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك