رواية مأساة بلا دموع -18
بعد اللمه والجمعه الحلوه..
ام فارس واللي جالسه قريبه من يوسف.. حاولت تبدى بالموضوع اللي ما له داعي تأجيله اكثر من كذا..
ام فارس : ابو يوسف..
ابو يوسف يلتفت لها : سمي..؟
ام فارس : يا اخوي طلبتك لا تردني..
ابو يوسف : ما عاش من يردك..
ام فارس : تسلم يا اخوي.. ابغى في هالاجتماع الحلوو.. اطلب منك يد عفاف لعبدالعزيز.. وان شاء الله ما تردنا..
ابو يوسف ويطالع عبدالعزيز : افا عليك.. كم عبد العزيز عندنا..؟ وانا ما ابغى اكرر غلطتي.. واخلف وعدي لاخوي الله يرحمه.. واحمد ربي انه ما تم شئ لعفاف.. والبنت لك.. ومتى ما بغيت تملك الله يحييك..
سعد بصوت واطي : ابسط يا عم..!!
يوسف التفت لعبدالعزيز بابتسامه.. وهو يشوف مزيج من المشاعر يتجمع على ملامحه وكأنه مو مصدق اللي يصير..!!
ام فارس : الله يسلمك يا اخوي.. والله الود ودنا لو الملكه اليوم.. بس بما ان عفاف ما جت اليوم.. ( والتفتت لعبدالعزيز ) ما نقدر نقول الا الرأي رأي المعرس..
سعد : وااااااو.. ياااااا كبر هالكلمه عليه..!!
الكل انفجر بالضحك على تعليق سعد..
وعبدالعزيز اكتفى بابتسامة امتنان لعمته.. وبعدها بلحظات شاف يوسف وهو يتكلم : اتمنى الملكه تكون بعد خطوبة يوسف..
يوسف : يعني الجمعه..؟
عبدالعزيز بابتسامه : ان شاء الله..
ام فارس : ونعم الرأي.. ومنها نوافق السنه..!! ربي يتمم لكم بخير..
وقفت وكملت : استأذن أنا..
ابو يوسف : جالسين..
ام فارس : يكفيني عااد جلست معكم.. باطلع للحريم.. مو زينه بحقي ما اجلس معهم..
طلعت بتوديع من الكل.. ودعوات محبه من عبدالعزيز اللي مستحيل ينسى هالفضل لها..!
الجزء الحادي والعشرون
في لحظة يأس انتهى كل شئ...
لكن بمنظار أمل وتفاؤل.. قامت العنود من حضن أختها.. واتجهت للحمام..
غسلت وجهها وعدلت شعرها المبهذل.. لكن تركته مفتوح...! لو بتلمه بتطوول..!
مها ومستغربه من أختها : وش بتسوين..؟
العنود : في ايش..؟
مها : مع اهلي..؟؟
العنود باصرار : بتشوفين..!!
مها بحذر : بتسكتين..؟
العنود بسخريه : لو اسكت صدقو فيني..!
مها : بس ترى الامر مو بالسهوله اللي انتي متخيلتها..
العنود باستغراب : كيف..؟؟
مها وتأشر لها : تعالي اجلسي.. واسمعي كلامي زين..
العنود وجلست بالمكان اللي حددته لها..
مها تكمل كلامها وبهدوء قالت : يمكن هالكلام اللي بأقوله راح تسمعينه مني لاول مره بحياتك.. لكن اللي ما تعرفينه ولا أحد يعرفه من أهلي.. هو سبب طلاقي الحقيقي..
العنود وفاتحه عيونها : وشـو..؟
مها بعد تنهيده : طلاقي كان اكبر غلطة في حياتي.. يمكن يكون تصحيح لمسار خطـأ حطيت نفسي فيه.. لكن مهما كان.. المفروض اني اكبر عقلي واتصرف بهدوء وعقلانيه..
العنود : ماني فاهمة شئ..
مها : الحين افهمك.. يا اختي يا حبيبتي.. فيه مثل يقول.. " اكبر منك بيوم..اعرف منك بسنه " وانا بحياتي الزوجية كنت الاقي من العذاب مالله به عليم.. سب وشتم واهانه.. وفوق هذا غيرة قاتله.. انا ما انكر ان محمد كان معي بتعامله خيالي وحنووون.. لكن امـه الظالمه..
( وابتسمت للذكرى المؤلمه )
امه كانت المنغص الوحيد لحياتي.. والمقيده لحريتي.. ما تتصورين وش كثر كانت تحقد علي.. وتعاملني باسوأ ما عندها.. تحاسبني على كل صغيره وكبيرة.. وتوقف لي عالطالعه والنازله.. بكل بساطه.. كانت تدور أي سبب عشان تطفشني.. وانا بغبائي.. وبعصبية اخوك العمياء.. اهديت لها زوجي على طابق من ذهب..!
العنود وباهتمام : أخوي..؟؟
مها : فهد..
العنود باستغراب : وفهد شدخله بالموضوع..؟
مها : أنــا.. أنا المجنوونه.. كنت اقوله على كل شئ يصير.. وهو بأخوته.. ويمكن حميته.. ما كان يرضى لي المذلة.. لحد ما طاح الفأس بالرأس..
العنود : وشلوون..؟
مها : بيوم كنت راجعه من دوامي.. وما توقعت اني الاقي محمد طلع.. لكن تفاجأت به طالع من الدوام.. وجالس مع امه.. وفي ذاك الوقت كانت عبير صغيره بالمره.. وانا داخله.. سمعت امه تحرضه علي.. وتطلب منه يتزوج.. ليش اني مهمله.. وماني بمهتمه فيه ولا ببيتي.. ولاني ما جبت له الولد..!!
العنود : وليش تسوي كذا..؟
مها : يمكن لانها كانت ناويه تزوجه من بنت اختها.. وهو فضلني عليها..
العنود : طيب وش اللي صار بعدين.. ما اتوقع ان محمد وافق.. وطلقك..
مها : لا ما وافق.. لكنه ما رد عليها.. وهذا اللي قهرني.. وخلاني ادخل عليهم بتهور.. واعصب عليهم كلهم.. كنت منعميه.. وما وعيت الا بامه تطردني برى الصاله.. وبرى البيت كله.. وهو واقف ولا كأن الامر يعنيه..
العنود بحماس : وبعدين..؟
مها بالم : ولاشئ.. دقيت على فهد.. اللي حلّف وقسّم.. اني ما ابقى ببيتهم دقيقه وحده.. لو وش ما صار.. الا بشرووط.. اخذت بنتي وطلعت من بيت امه.. الى ما لا رجعه.. وبعد ايام تفاجأت بفهد يقولي انه راح يطلب الطلاق من محمد..
العنود بصدمه : ووافقتي..؟؟
مها تكمل : ما عارضت.. لان شخصيتي في ذاك الوقت كانت ضعيفه.. وما اعرف الصح من الغلط..!
العنود : وهو..؟؟
مها : اذا تقصدين محمد.. فأنا تعمدت اجرحه..
العنود : ليش..؟
مها ودموعه بعينه : لانه ما حاول ادنى محاوله انه يكلمني.. او حتى يتفاهم معي.. ويعتذر لي..! حسيت اني بطلبي الطلاق.. باحقق غايتي.. لكن الظاهر ان امه هي الوحيده اللي ربحت.. وكلنا طلعنا خسرانيين..!!
العنود : وبعدين وش صار..؟
مها : كل اللي صار اني صرت احمل لقب مطلقه.. والمجتمع ما يرحم.. انطويت على نفسي ايام.. ما اكلم أحد.. ما اروح الدوام.. حتى امي وابوي ما حاولت اشرح لهم الاسباب.. وهالشئ انعكس علي سلبيا.. وصرت انا الخسرانه الوحيده في هالحسبه..
العنود ودموعها تنزل من جديد : وانتي ليش تقولين لي هالكلام الحين..؟؟
مها وتمسك يد العنود وتضغط عليها : لاني عارفه غلاك عند أبوي.. ولو ما وضحتي له انك برئيه.. يمكن يرووح فيها..!!
العنود بصدمه : يرووح فيها..؟؟ لالا مستحيل ما اتحمل الحياة من دون ابوي..!! وبعد اكون انا السبب في عذابه..
ووقفت وكملت : بانزل اكلمه.. مستحيييل اترك الوضع كذا.. ما اتحمل انا.. ما اتحمل..!!
مها وتمسكها : لحظه.. خليني اقولك حاجه..!
العنود وتلتفت لها : وش تبغين تقولين..؟
مها بتردد : فهد..
العنود : شفيه..؟؟
مها : العنود.. ترى فهد في هالمسائل عصبي.. وينعمي على ادنى شئ.. فتجنبيه.. عشان خاطري اذا كلمك لا تردين عليه..
وبنظرة استعطاف.. كانت مها تحاول تحد من انجراف العنود خلف براءاتها.. وخوف الصدام مع طوفاان جاارف من الحميه اللي بفهد..!!
العنود هزت راسها بطيف ابتسامه..!
قامت مها : ما تنزلين لوحدك.. باروح معك..
العنود : زين..
لكن بعد ما طلعوا..
العنود : مها.. شوي وراجعه..
سكتت مها تطالعها وهي ترجع لداخل الغرفه وثواني وهي راجعه..
مها : وش فيك..؟؟
العنود وتمد يدها لمها : ما فيه احد أأمنه عليها اكثر منك..
مها وتطالع يد العنود : ليش..؟
العنود : على قولتك عصبية فهد عمياء..!!
مها بابتسامه : بس ما طلبتي شئ حبيبتي..
خذت مها شريحة جوال العنود من يدها.. ودخلتها بجيب التنورة.. ونزلو لتحت.. ويديهم بيدين بعض..!!
^،^،^،^،^،^،^،^،^،^،^،^،^،^،^
دخلت عفاف للغرفة..
وحصلت ليلى جالسة.. وواضح على ملامحها السعاده.. والفرحه تطل من عيونها...
عفاف : ياربي على هالحلاة.. من هالشين اللي كلمك وفرحك بهالشكل..؟!
ليلى : لا حدك عااد.. كلش ولا أحمد ما ارضى عليه أنا..
عفاف : أحلىىى يالروومانسية انتي.. وينه يسمعك..
ليلى : لا تخافين عليه.. شعباان..
عفاف : ههههههههههه.. شعبان.. ولا رمضان..
ليلى وتضحك على غلتطتها : هههههه.. عااد لا تمسكين لي على الوحده..
عفاف ودمعت عيونها من الضحك : ههههههه.. ياربي بطني..هههه..
ليلى وتطالعها باستغراب : لهالدرجه النكته تضحك..
عفاف : ههههههه..
ليلى : أجل العنود رضت عليك.. ولا عشان اليوم يحددون ملكتك...و..
عفاف وتقاطعها بصدمه : أيش..؟؟
ليلى وحبت تقهرها : سلامتك ولاشئ..
عفاف وجلست جنبها على السرير : تكفين لووله.. عيدي وش قلتي..!
ليلى : تبغين تقولين انك ما تعرفين..؟
عفاف : وش اعرف..؟؟
ليلى : أول جاوبيني.. اليوم ليش ما رحتي لبيت عمي..؟
عفاف وبتوتر : حبيت اجلس معك..
ليلى : هذا السبب المعلن.. ابغى السبب الاساسي..!!
عفاف بقهرر : مو لشئ..
ليلى بتعجب : يعني ما تعرفين ان عبدالعزيز رجع خطبك.. ويمكن تتحدد ملكتك قريب..
عفاف بصدمه : لأ.. متى صار كل هذا.. وانا آخر من يعلم..
ليلى : غريبه وين عايشه انتي..! من قبل يطلع عبدالعزيز من المستشفى وهم متفقين.. ومنتهين..
عفاف تتنهد : ياربي شهالورطه..؟
ليلى : وش ورطة انتي بعد..؟
عفاف : اووف ما انتي فاهمه شئ.. واهلي على كيفهم يحددون مصري.. بدون لا يشاوروني ولا يحطون لي..
ليلى : بعد انتي.. وش يشاورونك.. الكل عارف واولهم انتي انكم لبعض ومن زمان..!!
عفاف : ووينهم يوم كانو بيزوجوني سامي الزفت..! ما قالو هالحكي.. الحين يوم رجع عزيز.. توهم يتكلمون..
عفاف كانت تتكلم بسرعه.. وبقهر.. وكأنها ما صدقت أحد يفتح لها هالسيره.. كانت مقهووره من قلب.. وما تعرف وشلوون بتواجه عبدالعزيز.. بعد كل اللي صار.. وخاصة انه معتبرها بايعته..!!
ليلى : فووفوو..
عفاف بعد ما انتبهت : هااه..
ليلى : أكلمك..
عفاف : وش بغيتي انتي بعد..؟؟
ليلى : لا.. شكل الفيوز عندك ضارب..!!
عفاف : وش هالالفاظ اللي تقولينها.. الظاهر هذا تأثير زوجك عليك..!
ليلى : عفاف.. هدي اعصابك.. ترى والله ما يسوى عليك.. اللي انتي معصبه ومهتمه علشانه..!
عفاف وبعبره وقفت : أي والله ما يسوى.. عن أذنك.. باطلع غرفتي.. تبين شئ..؟
ليلى : سلامتك عيوني..!
لما رجعت أم فارس لداخل البيت قالت لهم عن القرار الجديد.. والكل اكيد استانس.. صار لهم فتره ما فرحو..و انبسطو..
ام فارس وتكلم ام عبدالعزيز : عاد ما اوصيك يا اختي على عفاف.. ولو هي بنت اخوي تراها غاليه..
ام عبدالعزيز : توصيني أنا.. الله يعلم اني ما احب احد كثر عفاف.. دايما احسها قريبه مني.. والله اني تمنيت تكون موجوده اليوم.. ونفرح فيها كلنا..
ام يوسف وتبتسم لام فارس : الله يخليك با ام عبدالعزيز ما تقصرين.. والله يوفقهم لما يحب ويرضى..
ابتسمت ام فارس.. وفكرت تروح تكلم عفاف... وتجس نبضها لكنها اجلت الموضوع الى اجل غير مسمى..!!
وعند البنات كانت فرحتهم غير..اخيرا بيصير عندهم زواج بالعايله..
أمل ومتحمسه بالسالفه : انا بفصلي فستانين.. وكل واحد احلى من الثاني..
غاده : وليش ان شاء الله ام المعرس واحنا ما ندري..؟؟
وفاء ودها تضحك.. بس رحمت امل : الا يحق لها.. اخت العروس وبنت عم المعرس.. وكل واحد له فستان..
غاده : الله يعيننا عليها.. كبرتي راسها..!
ساره : عادي اصلا.. المفروض نفصل كذا فستان..
غاده باستهبال : يعني كم تقريبا..؟؟
ساره طالعتها بقهر وصدت عنها..!!
وفاء : اهم شئ يتوفقون.. ياربي احس اني فرحاانه حيييل..
غاده : آآمييين.. تصدقين ما اتخيل شكل عفاف بالفستان الابيض.. وااااو.. بتطلع جناان..
أمل : غدوو.. خلينا نقول لامي.. تقول لابوي نروح لندن بالصيف.. وناخذ اغراضنا من هناك..!
ساره : ياليت..!!
غاده : هذي احلامكم.. اجل ما احنا رايحيين..!!
وفاء : هههههه.. شفيك عليهم.. خليهم يأملون.. وانتي لاتروحين..
غاده : دا بُعدهم.. أنا اول وحده.. مع اني ما اتوقع اخواني يوافقون.. ولا حتى عفاف...
امل بخيبة : ليش..؟
غاده : اقول يمكن...!
وفاء : اممم.. ويمكن لان الزواج بعد شهر تقريبا..!
غاده : أووفف.. شهر.. وش يمدي عفاف تجهز.. لا حراام..
وفاء : والله ما ادري اذا تغير شئ.. بس اتوقع.. بعد شهر..
هدى داخله عليهم : السلام عليكم..
وفاء بابتسامه : هلاا وغلااا وعليكم السلام..
هدى : تسمحون لي اجلس معكم..؟
غاده : افا عليك تسأذنين من بنات اعمامك..
هدى انحرجت شوي.. لكنها جلست بهدوء بعيده عنهم..
وفاء باستغراب : وش فيك جالسه هناك.. قربي..
بعدما جلست هدى قريب منهم.. كانو يسولفون سوالف بنات.. وتعليقات..
وراح عليهم الوقت وهم يسوولفون..
منى داخله عليهم بغروور : هدى.. يالله بنروح..
وفاء : وينك منى ما جلستي معنا..
منى بدون لا تطالعها : وقت ثاني.. يالله هدى.. باسبقك للسياره..
طلعت منى.. وهدى قامت منحرجه من حركة اختها السخيفه.. ودعتهم وطلعت..
وهي طالعه تفاجأت بأمها واقفه عند مجموعه شباب.. قريب شوي من السياره.. وواضح انهم اولاد عمها.. استحت وما كملت.. ظلت واقفه مكانها..
ام معاذ واللي انتبهت لبنتها : تعالي وانا امك.. تعالي سلمي على عيال عمك.. ما به أحد غريب..!!!
هدى بداخلها بدت تغلي : وهذا وقته يمه..؟؟ "
تقدمت بهدوء بس علشان تسلم من لسان امها السليط.. وبعد علشان تركب السياره بسرعه...
ام معاذ وتكلم هدى : مابه غريب.. هذا مهند وهذا سعد..
سعد بنخوة : حيا الله بنت العم.. شخباركم..
هدى بصوت واطي : تماام..
مهند ما عرف يتكلم وكل اللي طلع معه : ان شاء الله مبسووطين..؟
هدى : الحمد لله..
وعلى طول راحت للسيارة وركبت.. وهي حتى نظرها ما رفعته لهم.. ولا تدري شلون اشكالهم.. كله بس عشان ترضي امها المتجبره..!!
.
.
.
"ههههههههههههههه..!!"
مهند : يا اخي لا تضحك..
سعد : هههههه.. يا قلبي عليك.. والا مبسووطين.. ههههههه..
مهند : على الاقل احسن منك.. ( ويقلده " حيا الله بنت العم..)
سعد : لا ترقعها.. هههه..
يوسف جاي لهم وهو مبتسم : شعندكم مستانسين فرحونا معكم..!
سعد : فاااااتك..هههههه..
مهند : ياثقل دمك..
سعد : خففه...ههههه..
يوسف ويناظر مهند : طحت تحت يده اجل.. اكيد ماسك عليك شئ..
مهند : الله لا يطرحك له.. اعوذ بالله غثيث..!!
سعد : هههههه.. فااتك بو يعقوب.. ما شفت مرة عمك تناديه يسلم على بنتها.. ووجهه طمامه.. خايسه طبعا.. هههههه.. وجاب العيد.. لو تدري وش قال.. ههههههااي..
يوسف : هااه.. وش قال..؟
سعد : وش خلى بس.. وشلونك..شخبارك.. وعلومكم.. وكيف احوالكم.. والدراسه.. ووين تدرسين وبأي قسم.. وسنه كم.. ههههه.. ولو الهيئه ماره كان خذ فيها اعدااام..!! ههههههه..
يوسف : ضاعت علومه الرجال..؟
مهند : يا نصاب.. الحين كل هذا قلته..
سعد : ههههههههههااي..
مهند : يالزفت.. دايما اسلوبك ماصخ مثلك..
سعد : زده ملح.. ويطلع ولا احلى منه.. ههههه..
ويوسف واقف معهم.. ويضحك على هوااشهم..!!
^،^،^،^،^،^،^،^،^،^،^،^،^،^،^
" إن أصعب ما يواجه الانسان.. أن يجد في داخله بركاناً ثائراً سينفجر..
ولا يجد من يهدئه ويسد فوهته...!!! "
بصرخة قال : " لا تحلفين.."
العنود وماسكه نفسها لاتصيح : يبه حرام عليك ما تصدقين.. ترى والله ما رحت مع احد.. واذا ما انتو مصدقين كلمو عفاف.. واسألوها.. ترى اخوها هو اللي جابنا من الجامعه..!
ام فهد كانت جالسه وساكته.. وتحس بركان يغلي بداخلها..
ابو فهد بهدوء : صديقتك.. اكيد بتغطي عليك..!
العنود ووصلت عند ابوها : هذا رايك فيني وفي صديقاتي..!!
ابو فهد : واللي شفته بعيني اكذبه..؟
العنود : وشّو اللي شفته..؟؟
ابو فهد : شفته موصلك لحد باب البيت.. تنكرين..؟
العنود : يبه ما انكر.. بس كانت معه اخته.. ويمكن انت ما شفتها
( العنود وحتى وهي تبرر.. حبت تلتمس لابوها العذر )
ابو فهد : مانيب أعمى.. عشان ما أشوف..
العنود : طيب.. ( وبدت دموعها تطيح ) انت يبه اللي وصلتني الجامعه.. وشلون تصدق فيني اني اطلع بدون علمك..
ابو فهد وكأنه انتبه لهالنقطه.. ووشلون غابت عن باله.. سكت ما عرف يرد عليها..
فهد يصفق لها : برااافووو عليك.. شااطره.. نجحتي وبامتياز..
العنود التفتت له.. وكانت تشوف ورى كتفه مها اختها واقفه.. تذكرت كلامها لها.. وما ردت عليه.. صدت ورجعت بتحاول تكلم ابوها..
لكنها تفاجأت بمسكه قويه على عضدها..
شافته.. رجع لوحشيته اللي قبل شوي فوق.. وشافت حركة شفايفه وهو يكلمها بقسوة..
فهد بعصبية وهو شاد على يدها : لما أكلمك.. تردين علي.. ما تسفهيني.. فاهمه..؟؟؟
العنود اكتفت بانها تطالعه.. وكأنها مو مصدقه.. تحس بداخلها قوة كبيره.. تخليها تتحمل كل شئ.. كــل شــئ..!!
فهد : لو بريئه.. كنت دافعتي عن نفسك.. مو تستغلين طيبة ابوي ومحبته لك.. عشان تغطين على فضيحتك..!!!
العنود كانت عاضة على شفايفها.. ومتحمله.. لو تنفجر فيه مو غريبة عليه يقتلها..!!
فهد باستهزاء : هااه.. اشوفك ما رديتي.. لا أكيد عاجبك الوضع.. انتي البطله.. واحنا المتفرجين.. ومتى ناوية تنهين هالمسرحية..
وعشان ينرفزها قال : ولا.. تنتظرينه يجي يكمل الفصل الاخير عنك..!!!
العنود ما اتحمل لما قال هالكلام والتفتت له وبقوة مو طبيعيه قالت بعد ما مسحت دموعها : شف يا أخــــوي.. ترى أنا أشرف من الشرف.. ولو بغيت أضيع نفسي ما انتظرت الاذن منك ولا من أشكالك.. تعرف ليش..؟ لان اللي بيضيع ما فيه شئ بيرده.. واللي يخاف ربه.. فالله حاميه.. لو مهما صار اللي قدامه.. لا يمكن ربه يخذله..!!
فهد : لااا.. شين وقوي عين.. تردين بعد..؟؟!!
العنود بقهر : اجل تبغاني اسكت لك.. يا اخي خاف ربك.. ما سويت شئ.. ولو مسويه وش اللي بيجبرني انكر...؟
فهد يقاطعها : احلى يالقويه.. وتعرفين تردين بعد..
وحاول يمسك شعرها.. لكن كانت يدها اسرع.. ودزته عنها.. وهي تقوله وهي تنتفض بكبرها : سكت لك يافهد.. لكن مو رجولة منك انك تمد يدك على حرمه...!!!
ولفت عنه.. لكن ما طولت.. الا وحست بيده تلفها له.. وما انتبهت الا على كف محترم يضربها فيه..
العنود من قوة الضربة طاحت من طولها.. بدون أي حركة..
ومها وأمها ركضو لها..
وأبوها وقف مشدوه يطالعها ممده قدامه..
وفهد قبض يده اللي ضرب العنود فيها.. وبأقوى ما عنده.. ضربها بالجدار اللي جنبه..!!!!
^،^،^،^،^،^،^،^،^،^،^،^،^،^،
لما رجعو أهلها للبيت.. ما حست فيهم.. لانها حاولت تنام.. بعد محاولات يائسة علشان تكلم العنود.. وجوالها يعطيها مقفل.. والبيت ما احد يرد.. نامت بدون لا تحس وما قفلت غرفتها..
.
.
لما رجعو.. على طول طلعت غاده لغرفة عفاف على أساس بتقولها على اللي صار ببيت عمها.. واتفاجأت فيها نايمه.. طلعت وسكرت الباب وراها.. وعلى وجهها علامات الاستغراب..
وتوها قافلة الباب.. شافت يوسف بوجهها..
يوسف بابتسامه : سلام ياقميل..
غاده : اهلييين..
يوسف : وين عفاف بغرفتها..؟؟
غاده بحيرة : نامت..
يوسف : نامت..!! مو من عوايدها.. لا يكون تعبانه ولا شئ..!!
غاده : لا ما فيها شئ.. بس شكلها استرخت وما حست بنفسها لما نامت..!
يوسف : اهاا.. زين..
راح يوسف لغرفة مكتبه.. وغاده نزلت لتحت.. وتحس نفسها مكتووم.. وكأنها بتستفرغ.. ما تحب هالشعور لما يجيها.. دايما يحسسها بالقلق.. وعدم الراحه..!!!
.
.
.
.
.
باليوم الثاني.. صحت عفاف الفجر.. وتحس راسها ثقيل.. اكيد ناامت كثير مما انعكس سلبا عليها..
نزلت تحت بعدما لبست..وراها محاضرات.. ولازم تشوف العنود وش صار عليها..
عفاف وتحب امها على راسها : صبحك الله بالخير يمه..
ام يوسف : صباح النور والسرور..
عفاف : السواق جهز السياره.. ووين البنات..؟
ام يوسف : مو برايحين..؟
عفاف : ليش..؟؟
ام يوسف : مدري عنهم.. بس يمكن عشان الامتحانات قربت.. ما عاد له داعي يروحون..
عفاف : ايه والله.. انا بعد يمكن اليوم آخر يوم لنا قبل اجازة الاختبارات..
ام يوسف : الله يحفظك يا بنيتي ويوفقك..!
طلعت عفاف مع السواق والخدامه.. وبطريقها مرت وفاء بنت عمها.. وراحو ثنتينهم للجامعه..!!
.
.
.
.
بعد وصولهم.. استغربت عفاف ان العنود ما جت... ووفاء راحت لقاعتها عندها محاضره..
انقهرت عفاف.. وبنفس الوقت خافت.. لا يكون صار لصديقتها شئ..
حضرت محاضرة وحده بس.. وما قدرت تنتظر اكثر.. طلعت للكافيتريا..
وهي جالسه.. بالصدفه مرت البنت اللي نادت العنود امس وقالت لها عن ان السياره ما راح تجيهم.. نادتها عفاف بخجل.. لما وصلت البنت سلمت عليها عفاف وسألتها عن العنود وليش ما جت.. البنت قالت انهم لما مرو بيتهم الصبح.. ما طلعت عليهم العنود.. بس بعدين طلع واحد من البيت اللي جنبهم.. وقال انها ما راح تروح اليوم..!!
شكرت عفاف البنت.. ورجعت تجلس.. مستغربة اكثر.. اكيد السالفه كبيره.. بس وشلون تتأكد..
لكن بعد فترة استنتجت ان العنود يمكن انحرجت ليش انها بكره يمكن تكون خطوبتها.. وحبت تغيب..!! بس بقى السؤال المهم.. ليش ما دقت علي او على الاقل قالت لي..؟؟!!!
بعد نصف ساعة ما قدرت عفاف تجلس اكثر.. قالت لوفاء انها بتطلع.. بعدين دقت لامها..
ام يوسف : وليش بتطلعين.. خلصتي..؟
عفاف : لا يمه زهقت جالسه لحالي.. باطلع..
ام يوسف : براحتك يا بنتي..
عفاف : طيب يمه ما عليك امر.. ارسلي لي السواق..
ام يوسف : بس تو غاده الحين طلعت معه للمستشفى
عفاف : طيب قولي لها تمرني..
ام يوسف : خلاص..بادق لها تمر عليك..
عفاف : طيب.. مع السلامه..
.
.
.
.
وبعيد شوي من الطاولة اللي جالسة عليها عفاف..
كانت الشلة جالسة.. وأصوات ضحكهم واصلة لآخر الدنيا..!
فاتن : طيب بتطلعين معه مرة ثانية..؟
جميلة : والله حسب... اذا فيه مهمه ثانية.. باطلع.. ليش لأ..؟!!
هناء وبتوتر سألت : والعنود وش صار عليها..؟؟
جميله : ههههههههههااي.. وتسأليني.. خلاص انسي وحده بهالاسم.. العنود بـــح.. هههههه..
هناء بخوف : وش سويتي لها..؟؟
جميله : لا عاد تسألين.. ما فيني اعيد هالسالفه اللي تجيب الهم..! هههههه..
فاتن : ههههههههه.. شكلك لايعة نفسك منها..
جميله وباستقذار : واااااو بالـمـــره.. هــم وانزاح من طريقي..!!
هيفاء باستهبال : وشلوون..؟؟
جميله : خليها عالايام..!! ههههههههه.. أي على فكرة بنات.. لا تفوووتكم طلعة بكرة.. شئ ما حصلش..!!
فاتن : وين..؟؟
جميلة : بالاستراحه اياها.. أصلا ما تحلو الجمعه الا فيها..!
هيفاء واقفه : تبغون شئ.. بأروح اجيب حاجه ناكلها..!!
جميله : جيبي لي على ذوقك..!
فاتن : أنا بأروح معك..
جميله : وانتي هناء..؟؟
هناء : لا بس ما اشتهي..!!
فاتن : ما يصير باجيب عصير على الاقل..
راحو البنات.. ولا ظل الا جميلة وهناء لوحدهم..!!
وبعد فترة..
هناء بتردد : جميله..
جميله وتلعب بالجوال : همممم..
هناء : ممكن اسألك سؤال..
جميله بدلع : اسألي عيوني..
هناء : انتي ليش سويتي في العنود كذا..؟؟
جميله : ممم.. بصراحه بصراحه..
هناء : ايه..
جميله : بغيت أأدبها..!!
هناء بتعجب : تأدبينها..؟؟
جميله : هههههه.. لا بصراحه.. حبيت انتقم منها..!!
هناء باستغراب : تنتقمين..؟؟
جميله بفلسفه : ايه.. لان فيه اشياء بالحياة ممكن انك تتغاضين عنها.. وفيه تصرفات لازم لها رد.. والعنود واللي صار لها مجرد رد.. لا اكثر ولا اقل..
هناء : ووشّّـو هالتصرف اللي خلاك تسوين فيها كذا..؟؟
جميله وتطالع البنات جايين لهم.. قالت بارتباك : بعدين.. بعدين اقولك..!!
^،^،^،^،^،^،^،^،^،^،^،^،^،^،^
ترى لمن يركن الانسان ويستريح..
ويشكو ألم الحياة ومعاناتها..؟
لمن يضحـك ويبكـي..؟
لمن يغضب ويثور..؟
لمن يجفف دمعة انحدرت على وجنتيه..
ويضمد له جراحاً تنزف..
ترى من هو الانسان الذي أطلب منه أن يضمني لخوف اعتراني..!
ويعانقني لشوق كواني..!
كل ما أطلبه..
هو انسان بكل ما تعنيه هذه الكلمة من معانٍ تترجم لكل لغات العالم..!!
جلست بمقعدها جنب الشباك.. وهي تودع أرض الوطن.. ودمعتها بعينها..
رضت بحكم أهلها عليها..حتى لو كان هالحكم مؤقت.. ما لها الا ترضى وترضخ لاوامرهم..
انتبهت ليد اختها على يدها.. التفتت لها وعلى وجهها طيف ابتسامه..تعكس الالم اللي يكاد يغرق به قلبها..!!
رجعت تطالع أرض الحرمين.. وهي تبتعد عنها بجسدها.. لكن روحها باقية بداخلها.. باقية لاحبابها..
حست بدمعتها حاره على خدها.. لكن ما حاولت تمسح.. يمكن هالدمعه هي المتنفس الوحيد.. بعد الله.. ما لها أمل الا فيه.. وما خاب من كان رجاؤه به..!!
التفتت لعبير الصغيرة.. وحست بمعاناتها بفقد الاب.. ولو هو موجود..
ورجعت لتفاصيل الليله الماضية لما طاحت على الارض من كف أخوها.. كانت تحس الدنيا لافه فيها.. والالم بكل خلية بجسمها.. وأختها تحاول تصحيها.. وتراءى لها طيف أمها واقفه جنبها.. لكن امها بسرعه انسحبت لما سمعت ابوها يناديها.. وأخوها طلع بهدوء.. ولا كأنه سوى شئ.. ولا بقى معها إلا أختها.. الا بالاول كانت أبعد وحده عنها.. واللي قومتها بصعوبه.. وطلعتها فوق.. ونومتها بالسرير.. وكمدت لها وجهها بثلج.. وبالاخير نامت معها..!! وبالصبح لما صحت شافتهم يسحبون شنطهم.. ومها تصحيها وتقولها عن قرار ابوها.. وتواطؤ اخوها معه..
انتبهت على احد يهزها.. التفتت.. وكانت مها..
مها وهي تفك الحزام : ما عليش عنوده.. امسكي عبير.. باروح دورة المياه وبأرجع..!!
اكتفت العنود بهز راسها بالموافقه.. وكأنها نست اسلوب التخاطب بين البشر..
وخذت عبير لحضنها.. وغمضت عينها ونامت..!!
^،^،^،^،^،^،^،^،^،^،^،^،^،^،^
ركبت السيارة وهي مقهووره من اللي قاعد يصير لها..
وبالطريق قالت عفاف لغاده عن كل شئ..
غاده : غريبه.. لا يكون صار لها شئ..
عفاف : تكفين لا تضيقين صدري زياده.. يكفيني اللي فيني..
غاده : ووش فيك بعد غير هالسالفه..؟
عفاف : سالفه عزيز.. ولا كأني انا اللي بأتزوج..
غاده باستغراب : وانتي ما تدرين..؟؟
عفاف : من وين بأعرف بالله عليك..؟؟
غاده : بهذي معك حق.. بس وش تقولين.. هذا قدرك..
عفاف : الحمد لله على كل حال..
غاده : زين انك جيتي معي.. ما ادري وشلون بيفكون هالجبس..
عفاف وتمزح : عمليه سهله.. مشرط وجراح.. ويقطعون رجلك..
غاده ببلاده : هااه..
عفاف : ههههههه.. امزح معك يالخبله.. شئ سهل والله.. لا تخافين.. بس خسارة ما وقعت عليه..!!
غاده : أصلا ما انتي لاقيه مكان.. ما قصرو مهند وبسام.. ما خلو اسم لاعب ولا توقيع الا كتبوه.. ما ادري وش بيقول الدكتور عني..!!
عفاف : ههههه.. يا حليلهم..هههه..
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك