رواية يمسح الدمعة بشكوى -15
ابتسمت بحرج
عمر = ماهي اول مرة اكذب ...
ابتسم جدي بفرح
جدي = يعني رايد عندك الحين بالبيت
هزيت راسي بايه
جدي وهو يطالعني باعجاب
جدي بفرح = الله يجزاك خير عنه ياوليدي ... ويكثر من امثالك ... والله فرحتني بهاليتيم ( وسكت شوي يفكر ) بعد الصلاة نمر ابو بندر وناخذ الكرت واروح معك لبيتك واسلم على رايد
ابتسمت لما شفت فرحة جدي وهزيت راسي بأيه
عمر بابتسامة = صااااار ... بس اهم شي لا يدري عمه انه عندي
صلينا و طلعنا من المسجد انا وجدي ومرينا بيت ابو بندر ودخلنا مجلسه ... طلبنا منه الكرت وعطاه جدي وملاحظ عليه انه ماهو معبرني ... والدليل يوم مديت يدي ابي اخذ الكرت سفهني ومده على جدي ... ضحكت مستانس واضح انه منقهر مني
طلعنا من عنده ... وتنهدت بضيق .. كنت اتمنى اشوف دانه ... وينهي ؟ ... بالعادة تلعب المغرب بالشارع ... وحنا ببيت ابو بندر قبل شوي كنت كل شوي اتلفت يمكن اشوفها
بس ماشفتها لا ببيت ابو بندر ولا بالشارع
ركبنا سيارتي انا وجدي وطلعنا من الحارة متوجهين لبيتي
التفتت لجدي ومديت يدي
عمر = عطني البطاقة انا بعطيها رايد
عطاني جدي البطاقة .. وقعدت اقراها وانا اسوق واشوف تاريخ ميلاد كل واحد منهم
مريم
رايد
دانه
امممم مريم هذي اصغر مني بسنتين .. مادري ليه كنت اتخيلها كبر عمتي مها مع ان رايد قاللي مرة ان عمه رافض يدخلها الكلية .. بس غصب عني ارجع واتخيلها انها كبر مها بالثلاثين
البطاقة صغيرة من الشكل الاخير المعتمدة لكروت العايلة ... دخلت البطاقة ببوكي وحطيتها بجيبي
وطوال الطريق افكر كيف افاجأ رايد بأثباته ... ودي بمقلب اسويه فيه قبل اعطيه الكرت ... وابتسمت بنذاله يوم طرا ببالي مقلب يرفع ضغط رايد شوي
* رايد *
بعد صلاة المغرب
طلعت من المسجد مهموم ... المفروض ارجع لمريم واوديها للمستشفى بس بعد ماصار امس من عمي مالي جرأة اخذ اختي ... ومااعتقد مريم لها جرأة تطلع مرة ثانية من بيت عمي
دخلت بيت عمر وانا شوي وابكي من الهم وسكرت الباب وراي ....
وفوق همي هم
عمر فتح لي بيته وفوق هذا ماهو سالم مني ... بسبب هالعله نايف ... كل يوم وعمر متهاوش معه بسببي ... عمر صح دفش بس والله مايستاهل ... فتح بيته لي وامه ماتجي لبيتها كله عشاني ... ياليت عمر وافق اطلع من بيته يوم قلته اليوم الصبح
مابي اسببله مشاكل اكثر من كذا ...
مادري وش يبي مني عمر ...
انا ما استاهل
انا عاله على عمر .. ومافيني فايدة لمريم ... وما اقدر احمي دانه .. ومالي اثبات انفع نفسي على الاقل ( مديت يدي ابي افتح الباب الداخلي بس سمعت صوت حركة بالحوش وقطع علي افكاري ..
التفتت ورا اشوف مصدر الصوت بس ماشفت شي ... طالعت باب الشارع ولقيته مسكر
رجعت لنص الحوش مستغرب احاول اعرف مصدر الصوت
عجيب ... انا متأكد اني سمعت شي ... رفعت راسي لدرايش ابو احمد ( جار عمر ) ولقيتها انوارها شغاله بس كلها مسكرة ... طالعت الممر اللي يودي للحوش الخلفي وماشفت شي .. هزيت راسي اطرد الوهم من راسي .. يمكن اتخيل
رجعت للباب الداخلي وفتحته ودخلت وسكرت الباب وراي
رحت للصاله وفتحت ازارير ثوبي عشان انزله بس سمعت صوت حركة مرة ثانية
التفتت وراي بخوف وطلعت من الصاله وانا اعدل الازارير
واستغربت لما شفت الباب الداخلي يفتح على شوي شوي
همست مستغرب
رايد بهمس = عمر ؟
وشهقت لما شفت راس نايف يطل من الباب
شافني نايف قدامه وجاني يركض .. ومسكني بعنف ولصقني على الجدار
نايف بعصبية = وين عمر ؟
رفعت راسي اطالعه وانفاسي سريعة من الخوف ومن دخوله المفاجأ
رايد = مـ .. مــ .. مو هنا ... وووو ... وشلون دخلت انت ؟
قرب نايف وجهه مني معصب
نايف = ادري انه مو هنا ... من الظهر وانا احتريه ... وين ذلف .. ليه الى الحين ماجا من الجامعة ؟
سكتت مدري وش اقول ... مااقدر اقوله ان عمر عند جده عشان ما يأذيه
رفع نايف يده وعطاني كف وصرخ بوجهي
نايف = تكللللم .. وين رااااح ؟
سكتت بعناد .. ماني معلّمه يكفي عمر اللي جاه من وراي
شفت نايف يدخل يده بجيبه وطلع منها حاجة وغزها على رقبتي
شهقت بقوة يوم حسيت بألم السكينة على رقبتي .. ورفعت راسي اطالعه اترجاه
رايد بترجي = نااايف
نايف = علمني وين عمر ... هو بيجي اليوم والا لااااااا ؟ من الظهر وانا احتريه وييييييييينه ؟
رايد بخوف = و .... وش تبي منا ... آآآآ ... خلنــ
قاطعني نايف وهو يقرب وجهه مني
نايف = ابي عمر ... وينه ؟ ابوي تبرا مني وهو اللي فتّن علي عند الهيئة وفضحني ... قبل على بالي انه انت ... بس انت ورع كم كف تخليك تنتفض قدامي ... اما عمر غير ... واليوم حطيته برااسي ( وسحبني ودفعني على الجدار بقوة وهو ماسكني ) وين عمر ... متى بيجي ؟
سكتت وانا اتذكر كلامي مع عمر امس
)))))))(((((((
رايد = عمر انت اللي بلغت الهيئة ؟
عمر = لا
رايد = بس انا سمعتك تقول لنايف انه انت
التفت لي عمر ورش على وجهي ماء
عمر = عشانك ياخبل ...
)))))))(((((((
طلعت دموعي وانا اتذكر كلمته .. كذب على نايف عشاني والحين بيدفع ثمن هالكذبة .. بعد عشاني
رفعت راسي لنايف وانا مااقدر اشوف من الدموع
رايد = تكفى لا تسوي بعمر شي ... مو هو اللي بلغ .. يكذب عليك ... والله يكذب عليك .. تكفى لا تسوي فيه شي
نايف = اهااا بس .. مب لعبه عندكم انا ..
رايد = والله مب هو
نايف = هو قال بنفسه انه هو اللي بلغ ... عمر اعرفه نذل ... وشري ( وغز السكينه برقبتي اكثر ) متى بيجي ؟
رايد = مدري
ولفيت وجهي عنه وبكيت اكثر
ياليت مايجي عمر ... ياليته مايجي ... بس مشكلته اتصل علي وقالي بيجي المغرب ... يارب يارب مايجي
تحرك نايف للباب الداخلي وهو يجرني معه
نايف = اجل نحتريه عند الباب لين يشرّف ( وسكر الباب الداخلي برجله ولصقني على الجدار بجنب الباب والتفت لي ) نحتريه هنا احسن عشان اول مايدخل تكون هالسكينة بوجهه ( ورفع السكينه قدامي ) ابوي طردني من البيت وتبرا مني ... لولا عمر كان انا وسعد ما انفضحنا ولا تبرا مني ابوي .. تبهذلت بسبته و الحين ابي اطلعها من عيونه ( والتفت للباب ورجع التفت لي ) من الظهر وانا احتريه بالشارع .. اكيد عند الشباب الحين .. احتريه هنا احسن وين بيروح يعني ...
نزلت راسي وانا اتذكر كلمه عمر لي امس
عمر = عشانك ياخبل
ياليته ماكذب على نايف .. بس عشاني كذب .. ليش كل ماروح بمكان يصير فيه مشكلة بسببي ... دخلت بيت عمي وتغير علينا مع انه ماكان كذا بحياة امي وابوي .. دخلت استراحة الشباب وانطردوا كلهم منها .. دخلت بيت عمر وتسلط نايف وشكله هالمرة ماهو ناوي على خير
بكيت بيأس
وقف نايف بجنبي وهو ملصق ظهره بالجدار وماسك السكينة ومستعد
نايف بجنب الباب وانا بجنب نايف
مر علينا ربع ساعة وحنا واقفين عند الباب
تعبت من الوقوف و جلست ببطء عى الارض وانا اسحب ظهري على الجدار
سمعت صوت نايف يكلمني
نايف = خلني اسمع صوتك بس .. واذا تسوي شي ..هالسكينة بتصير بظهرك على طول ... تفهم ؟
* الجــزء الســابع عشــر *
وقف نايف بجنبي وهو ملصق ظهره بالجدار وماسك السكينة ومستعد
نايف بجنب الباب وانا بجنب نايف
مر علينا ربع ساعة وحنا واقفين عند الباب
تعبت من الوقوف و جلست ببطء عى الارض وانا اسحب ظهري على الجدار
سمعت صوت نايف يكلمني
نايف = خلني اسمع صوتك بس .. واذا تسوي شي ..هالسكينة بتصير بظهرك على طول ... تفهم ؟
ضميت ركبتي لصدري وغطيت وجهي وانا ادعي الله ان عمر مايجي
مر ربع ساعة ثانية وحنا ننتظر .. ونايف رايح جاي يحتري ..
نايف بعصبية = وييييين ذلف هذا ؟ ...
سكتت ومارديت عليه وانا ادعي الله تدعي هالليلة على خير
فجأة سمعنا صوت باب الشارع يسكر
شهقت بقوة ورفعت راسي لنايف بخوف ..
ركض نايف راجع لمكانه ووقف لاصق بالجدار جنب الباب ...
جلست على ركبي ومسكت رجلين نايف اترجاه
رايد = تكفى .. الله يخليك لا تسوي شي بعمر .. والله مب هو .. مب هو ... يكذب علييييييييك
مسكني نايف بشعري وخلاني اوقف
نايف بهمس = اششششش .. اسكت .. ياويلك اذا طلع منك صوت .. ما ابيه يدري عنا ... تفهم .. قسم بالله لاذبحك
عضيت على يدي بخوف وترقب
مسك نايف عضدي ولصقني بالجدار بعنف بجنبه ورفع السكينة باستعداد يحتري عمر
طليت من ورا نايف اشوف مقبض الباب بترقب وانا عاض على يدي بخوف وادعي الله ان مايصير شي لعمر
ودي اصرخ باعلى صوتي واقول ياعمر لا تدخل ... ودي انبهه بس مااقدر نايف بيذبحني
وقف نايف قدام الباب مباشرة والسكينة بيده موجهها و مستعد ويشر لي بيده على رقبته يعني ياويلك اذا تكلمت ... حبست انفاسي خايف من اللي بيصير
رفعت راسي لنايف وانا اهز راسي بلا بصمت اترجاه وكأني اسمع عمر يكلم احد وهو يقرب او من الخوف يتهيألي
واول ما انفتح الباب وشفنا عمر الغافل وقبل ما ينتبه للي قدامه .. فاجأه نايف بحركة سريعه وطعنه على بطنه
قدامي
شهقت بقوة ...
رايد = لاااااااااااا
واقف بجنبهم واشوف كل حركة
طيرت عيوني بصدمه وعيني على السكينة ببطن عمر ...
ابتعد نايف عن عمر وعيني على السكينة بيد نايف وهو يسحبها بعد مادخلها بعمر
سمعت صرخت عمر وركع ماسك بطنه
وقف نايف وشهق منصدم وهو يشوف شي ورا عمر
ولأني بجنب الباب وعيني بخوف على عمر ماهتميت لنايف وعلى وش يشوف
همي على اللي انطعن بسببي ...
و صورة السكينة وهي تدخل وتطلع تكرر ببالي
طاح عمر على ركبه وهو ماسك بطنه بألم
تحركت بسرعة وجلست على ركبي قدامه ومسكت عمر اساعده وانا ما اشوف من الدموع
رايد = عمر
مغمض عيونه بألم
نزلت نظري اشوف بطنه ... الدم مغطي ثوبه الابيض ويديه ...
رايد وانا ابكي = عمر هذا نايف
سند عمر بثقله علي وراسه على كتفي .. مسكته مع اكتافه .. وانا احس شوي واطيح انا وعمر على ظهري بسبب ثقله بالنسبة لي .... بصعوبة ساعدته يستلقي على بطنه
عمر بألم = آآآآآآه .. بطني بطني
ماسك بطنه ويتلوى ويحرك رجله اليسرى بالارض
حطيت يدي على يدين عمر فوق بطنه .. مدري وش اسوي
رفعت راسي بس شهقت لما شفت ابو فهد واقف قدامنا وهو متساند على حافة الباب الداخلي .. واقف مثل الصنم وعيونه على عمر بصدمة
بسم الله من وين طلع هذا ... واضح من شكله انه منصدم .. التفتت ادور نايف بس مالقيته .. طالعت باب الشارع اللي قدامنا ولقيته مفتوح بالكامل
هج الكلب ... بس وشلون .. كيف مر من جنب ابو فهد .. وليه ما مسكه
التفتت لابو فهد ولقيته يطالع عمر وشكله مافاق من الصدمة الى الحين ومتساند على الباب بضعف
حاولت ابرر لنفسي لابو فهد
رايد = هذا ... هذا نايف ... والله .. كان يحتري عمر .. والله
جلس ابو فهد ببطء بمساعدة يديه عند عند عتبه الباب وزعمر ممدد رجليه باتجاه جده وراسه باتجاهي
ابو فهد = عمر وليدي ( وطلعت دموعه بصدمة )
بكيت وانا اشوف ابو فهد يبكي قدامي ... اكيد بيكرهني اذا عرف ان كل هذا بسببي
نزلت نظري لعمر وشفته يحاول يتنفس بصعوبة
انحنيت عليه اكثر و حطيت يدي على صدره وهزيته
رايد = عمر .. تسمعني ؟
عمر بألم = آآآه .. بطنيييي
خفت وانا اشوف عمر يطالع السقف ويحاول يسحب نفس بصعوبة .. طيرت عيوني فيه نفس اخوي ريان بانفاسه الاخيرة كان يطالع السماء ويشاهق ووجهه مليان دم
رايد = عمر لا تمووت
بكيت مدري وش اسوي ... انتبهت على فخذ عمر اللي يعرج منها مليانة دم ... لااااااا .. صح هو جلس على ركبته قبل يطيح على الارض واكيد انفتك الخياطة وانفجر الدم من الجرح
ياربي كل اللي يصير لعمر انا السبب
سمعت صوت ابو فهد يكلم عمر بصوت ضعيف
ابو فهد = دزني وماقدرت امسكه ... عمر مين هذا ( وحط يده على رجل عمر) حسبي الله ونعم الوكيل ( وبكى اكثر وهو يهز رجل عمر )
عمر = آآ .. أأبـ .. أبو احمد
التفتت بسرعة لما سمعت عمر يتكلم بصوت ضعيف وبألم
رايد = وشو
التفت عمر لي و حط يده المليانة دم على صدري
عمر وهو يتنفس بصعوبة = رح لابو احمد .. ابو احمد
رايد = مين ابو احـ
وسكتت لما تذكرت ... ايوة صح ... ابو احمد جار عمر بالبيت
رايد = تقصد جارك اللي بجنب البيت ( واشرت على البيت اللي بجنب بيت عمر )
هز عمر راسه بايه
عمر بألم = ناد احمد .. ابي احمد ... خلـ
رايد = طيب طيب .. الحين
وقمت بسرعة وركضت برا البيت اسابق الريح
وتوجهت لبيت الجار ابو احمد ... دايم اشوف ابو احمد هذا يصلي معنا بالمسجد .. ودايم اشوف ولد كبر عمر يدخل بيتهم ... بس مااعرف اسمه .. اظن هو اللي يبيه عمر ... جيران عمر ماعرفهم ولا اهتميت ولا عمري سألت عمر عن جيرانه .. مين هذا ومين هذاك
بالصدفة عرفت ان الجار هذا اسمه ابو احمد ... حتى عياله ما اعرفهم زين مع اني اشوف اللي يطلع واللي يدخل لما اكون واقف عند الباب طفشان
قعدت اضرب باب بيت ابو احمد واصارخ بصوت عالي
رايد = افتحوا البااااااااااااب بسرررررررعة
وقعدت اضرب واصارخ .. فجأة فتحت الباب بنت صغيرة ونقزت على ورا خايفة وعيونها على ثوبي
رايد = رووووحي نادي ابوك .. بسرررررررررعة روحي ... بسرررررعة ونادي احمد ( ودفعتها داخل البيت استعجلها )
ركضت البنت داخل البيت وهي تنادي ابوها
نزلت نظري اشوف وش اللي خافت منه البنت
ولقيت ثوبي ملطخ بدم كثير .. غمضت عيوني بألم وهزيت راسي احاول اطرد صورة عمر عن بالي
طلع ابو احمد ووراه ولدين والبنت اللي قبل شوي
و انصدموا من شكلي
ابو احمد = بسم الله وش فيك عسى ماشر
تكلم الولد اللي كبر عمر
= وش هذا اللي بثوبك ؟
رايد = تعالوا تعالوا بسرررررعة ... عمر طعنه نايف ... بسرعة تكفون تعالوا
انصدم الولد الكبير وشهق
= وشلون ( وراح يركض لبيت عمر ووراه الولد الثاني وابو احمد )
ركضت بسرعة وراهم ... ولقيتهم متجمعين عند الباب الداخلي
الولد اللي شكله كبري بس ادب مني مرتين ساد نص الباب والنص الثاني ساده ابو فهد وهو جالس
دفعت الولد ودخلت البيت
ولقيت ابو احمد وولده الكبير جالسين بالارض و منحنين على عمر ويكلمونه
وابو فهد على وضعه عند عتبة الباب و جالس عند رجلين عمر ويديه تتراعد
سمعت الولد الصغير يهمس بصدمه
= يمه وش هذا ؟
طلعت دموعي بألم وانا اشوف عمر يسبح بدمه ... بلاط الارضيه مليان دم داكن
انا السبب ... ليتني مادخلت بيتك ياعمر ... ياليتني ماعرفتك
انتبهت على عمر يكلم الولد الكبير بصوت متقطع
عمر بضعف = اااا .. احـ .. احمد .. بلغ عن نايف... نايف .. كـ .. اللي كان معك بالثانوي
صاح ابو احمد علي وعلى ولده الثاني الدب
ابو احمد = روحوا هاتوا مناشف ... بسررررررررعة
ركض الولد لبيتهم وانا ركضت للدرج ورحت لغرفة عمر فوق .. وفتحت دواليبه ادور على مناشف
ومالقيت الا منشفة وحدة كبيرة ... اخذتها ونزلت على طول
عطيتها احمد وحطها على طول على بطن عمر والتفت لابوه
احمد = يبه اطلب الاسعاف بسرعة
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
فاصل إعلآني ^_^ / ..
جميع الحقوق محفوظة لي .. لا احلل مسح اسمي مع على الرواية ..
تجميعي : ♫ معزوفة حنين ♫..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
قام ابو احمد وهو يسألني
ابو احمد = وين التلفون ؟
ركضت للصاله وهو وراي واشرت على التلفون وراح للتلفون
رجعت لعمر وجلست عنده ومسكت يده بخوف
الى الحين يسحب نفس .. وفمه يابس ويتنفس بصعوبة
التفت عمر لاحمد
عمر بألم = احمـد
قاطعه احمد بسرعة يمنعه عن الكلام
احمد = خلاص فهمت ... نايف اللي كان معنا بالثانوي ... عرفته خلاص لا تتكلم
جا الولد الدب من بيتهم و معه مناشف وعطاها اخوه
صاح احمد على اخوه بعد مااخذ المناشف منه
احمد بصراخ = محمد رح هات مقص بسرعة .. اركض
محمد = من بيتنا ؟
احمد بعصبية = اييييييييييه بسرعة رح
ركض محمد الولد الدب وراح لبيتهم يجيب مقص
مد احمد علي المناشف
احمد = خذ ... خلهم معك لين يجي محمد
اخذت المناشف وعيني على عمر اللي بدا يفقد وعيه وراسه مايل ناحيتي ويأن
قعد احمد يفتح ازارير ثوب عمر وهو يكلمه
احمد = عمر تحمل شوي الحين يجون الاسعاف
التفتت لاحمد .. ابي اسأله وش يبي بالمقص بس ماتجرأت اسأل
شوي و جا محمد وعطى المقص اخوه
قام احمد واقف وجلس بين رجلين عمر وبدا يقص ثوب عمر بالطول لين وصل للازارير
وبعدها قص الفنيلة الداخلية وكشف عن بطن عمر وصدره
شهقت لما شفت الدم يطلع من الجرح .. ورجع علي صورة السكينة وهي تدخل وتطلع ...
طلعت دموعي ندمان .. ليتني طلعت اليوم من بيته ولا سمعت كلام عمر .. كان ماصار اللي صار
اخذ احمد المناشف مني وحط منشفتين على بطن عمر ووحدة على فخذه
وطلب مني امسك المناشف واضغطها على بطن عمر .. ونفذت بيدين ترتعش
صاح علي احمد
احمد بعصبية = اضغط زييييييين
ضغطت وانا اهز راسي احاول اطرد صورة السكينة عن بالي
منظر الجرح افزعتني ..
شفت المناشف تحت يدي شوي شوي تتحول للون الاحمر
همست
رايد = يااااربي
حاولت اتمالك نفسي ... رفعت راسي وطالعت احمد اللي يضغط المنشفة على فخذ عمر
انا جالس بجهة من عمر واحمد جالس بين رجلين عمر ... مابي انزل نظري لعمر واشوفه وهو يسبح بدمه .. مدري وش اطالع ... ابي أي شي يشغلني عن المنظر
طلع ابو احمد من الصاله وصاح على محمد
ابو احمد = محمد رح لاخر الحارة واحتر الاسعاف ... بسرعة .. الحين يجون
ركض محمد وطلع من البيت ينفذ
راح ابو احمد يحاول يهدي ابو فهد اللي طوال الوقت يتكلم ولا نفهم عليه شي
وقدر ابو احمد يبعد ابو فهد عن الباب اللي ساده وصاروا بالحوش وانا اسمع او احمد يهدي بابو فهد ويكلمه
قرب احمد راسه مني وهمس
احمد = انت شفت اللي طعنه ؟
هزيت راسي بأيه وهمست
رايد بحزن = ايه .. نايف
قرب احمد راسه مني اكثر لين قرب عند اذني وهمس
احمد = المشكلة كان معنا بالثانوي ثنين اسمهم نايف .. مدري أي واحد يقصد عمر
نزلت نظري لعمر ولقيته يأن و صدره يرتفع و ينزل
احمد = ما اقدر اسأل عمر واجد عشان مايتكلم ... ابيك توصفه لي بعدين
وابعد راسه عني
احمد = الكلب طاعنه مرتين
التفتت لاحمد
رايد = اللي بفخذه بسبب حادث مو من نايف
فجأة سمعنا صوت الاسعاف
شوي وجا محمد يركض ووراه رجالين
قمنا انا واحمد وخلينا المجال لرجال الاسعاف
وعلى آذان العشاء اخذوا عمر بسيارة الاسعاف ..
وقفت بالشارع وانا اشوف سيارة الاسعاف تبتعد واحمد ومحمد بجنبي
طلع ابو احمد وهو يساند ابو فهد والتفت لنا
ابو احمد = انا ابوصل ابو فهد للمستشفى ..( والتفت لي ) تعال معنا يارايد
وقبل ارد تكلم احمد
احمد = لا يبه .. روحوا انتوا .. وانا اباخذ رايد بسيارتي
هز ابو احمد راسه بايه وتوجه لسيارته وهو يساعد ابو فهد على المشي
طالعت جد عمر بحزن .. وش جابه بهالوقت ... وليه جاي
ياربي وش هالحظ اللي لي ... يعني مايجي ابو فهد مع عمر الا بالوقت هذا
شكله تعبان مرة والى الحين منصدم ... انا ماأذيت عمر وبس ... انا أذيت للي يقربون له بعد ... امه وجده
الكل بيكرهني اذا عرفوا سبب اعتداء نايف على عمر
حتى مصعب يمكن يكرهني ... وابو فهد بيكرهني ... عمر بنفسه بيكرهني... انا عاله عليهم
نزلت راسي وبكيت بألم
حسيت بيد على ظهري
احمد = وش فيك انت طوال الوقت وانت تصيح .. يارجال ان شاء الله انه طيب .. ( ووجه كلامه لاخوه ) محمد رح هات ثوب عمر بسرعة
راح محمد ودخل بيتنا وجا ومعه ثوب عمر المقطوع نصفين
وانا منزل راسي وساكت
فتش احمد بجيوب ثوب عمر وطلع مفاتيحه وبوكه وجواله ومدهم علي
احمد = خذ خل اغراض عمر معك ...
رفعت راسي لاحمد
رايد = لا .. خلهم معك انت
احمد مستغرب = معي انا !! انت اللي ساكن مع عمر مب انا ... ياخي على الاقل دسهم بمكان لين يرجع عمر لا تخليهم طايحات بالارض كذا ... اخاف يرجع نايف ويسرق سيارة عمر والا جواله .. الاحسن تخليه معك
هزيت راسي بلا مصر على رايي ... مالي وجه ارجع لبيت عمر بعد اللي صار
لا والله مالي وجه
رايد = خلهم معك
طالع احمد اخوه مستغرب وحط اغراض عمر بجيبه
احمد = طيب يله امش خلنا نروح ..
و مشى لسيارته
محمد = احمد غير ثوبك
نزل احمد نظره يشوف ثوبه الملطخ بالدم وتوجه لبيته وهو يكلمني بسرعة
احمد = احترني الحين جاي ... رح انت بعد غير ثوبك والحين اجيك
ودخل بيته وهو يركض
نزلت راسي بحزن ... ماعندي ثوب غير اللي علي ... احس بصدري يغلي من القهر على اللي صار بعمر ... ماراح اسامح نفسي اذا صارله شي
وتوجهت لباب بيت عمر وسكرته ... خلاص لازم اترك بيت عمر وادور لي مكان غيره
بكيت غصب عني وين اروووووووح
اروح لعمي .. بس مابي ارجعله .. انا قلت راح اعتمد على نفسي واخذ اخواتي مب اخذلهم وارجع بدون أي فايده وفوق هذا مسوي مصيبة .. والمشكلة ابو فهد بنفس حارة عمي مالي وجه ارفع عيني قدامهم ... لا .. لا ... مب راجع لعمي ... لا يمكن ...
سمعت محمد يسألني
محمد = ماغيرت ثوبك !
مارديت عليه
غمضت عيوني بألم وصورة السكينة وهي تدخل وتطلع تتكرر ببالي عشرين مرة
طلع احمد من بيته وفتح سيارته ... رحت له وانا اجر رجولي جر وركبت سيارة احمد بصمت
احمد = ليه ماغيرت ثوبك ؟
سكتت ومارديت عليه .. ومسكت راسي بين يدي
حركنا متوجهين للمستشفى .. شوي و سمعت احمد يسألني
احمد = وصف لي اللي طعن عمر
رفعت راسي اطالع قدام وانا مالي نفس اتكلم مع احد
رايد بحزن = نايف ... اااا .... طول عمر ... ااااا ... ( وسكتت )
ما فيه شي مميز اوصفه فيه ... نايف شكله عادي
احمد = بس ؟ طوله طول عمر وبس .. وصفه لي .. عشان اعرف ... كانوا معنا ثنين بالثانوي .. وصفه لي عشان اعرفه ايهم
رايد = مادري مافيه شي مميز
سكت احمد شوي وبعدها سألني
احمد = نايف اللي طعن عمر فيه حبة خال كبيرة بشحمة اذنه ؟
سكتت وانا اتذكر نايف .. مااذكر فيه شي
رايد = لا ( والتفتت لاحمد ) ماعليه حبة خال
ابتسم احمد = اهاا عرفته ( وسكتت شوي وهو يسوق ) انت تقرب لعمر .؟
طالعت قدام بألم وهمست
رايد = لا
وكملت بيني وبين نفسي .. وياليتني ماعرفته .. كان عمر الحين مرتاح
احمد = انا وعمر الصراحة مانمون على بعض .. كنا زملاء ايام الثانوي بس ... وبيني وبينك الصراحة ما استغربت اللي صار لعمر
التفتت له وقطبت حواجبي مستغرب
التفت احمد لي وبعدها طالع قدام
احمد = عمر واحد موذي .. ايام الثانوي كان مشاغب مرررة ... يضرب هذا .. ويتطنز على هذا ... واذا شاف احد واقف على طاولته جاه من وراه وطيحه ... كذا بس .. يدور أي احد يتهاوش معه ... المدرسين ماسلموا منه ... يسوي حركات للشباب يخليهم يضحكون على الاستاذ... كنت اتحاشاه وما اكلمه ... ما احب اللي مثل عمر ... انا بنفسي وصلني اللي وصلني منه ... واكيد اللي صار اليوم ردة فعل ... شكل اللي صار واحد ماسلم من عمر وحب ينتقم ... اممم اذكر نايف هذا واظنهم على مااعتقد انهم دخلوا نفس الجامعة
والتفت لي وسكت
نزلت راسي ومارديت
صح عمر دفش وشري ومغرور حتى على ولد عمه مصعب ... انا اول يوم لي بااستراحتهم عطاني كف طير وجهي ... كل هذا اعرفه بس اللي صار اليوم من نحاستي انا ... عمر برئ ماسوا شي .. وماراح اسامح نفسي اذا صار فيه شي
وصلنا المستشفى ولقيناهم مدخلين عمر غرفة العمليات
وجلسنا ننتظر .. انا واحمد وابو احمد وابو فهد
وقفت بعيد عنهم شوي وانا اسمع ابو فهد اللي فاق من الصدمة شوي والحين قاعد يقول لابو احمد على اللي صار وانه ما امداه يستوعب والا ونايف هج من البيت
جلسوا على الكراسي نحتري الدكتور وكل واحد جالس بصمت
وانا واقف بعيد عنهم شوي
التفتت لابو فهد وضميري يأنبني ... لقيته منزل راسه ويدعي بينه وبين نفسه
مدري ليه احسه يدعي علي ... ياربي وش بيقول اذا عرف اني السبب
= يبه وش صااااار
التفتت متفاجأ لمصدر الصوت اللي قطع صمتنا .. وشهقت ...
مصعب وابوه
غطيت وجهي بيدي .. منحرج من مصعب ...
ياربي اخر شي تمنيته اشوف مصعب الحين ... هو يعرف كل شي ... يوم يزورنا ببيت عمر علمته ان نايف مأذيني ويحسب انا اللي مبلغ الهيئة
بيكرهني .. بيكرهني
سمعت ابو فهد يعيد الكلام اللي قاله لابو احمد على مصعب وابوه
وانا اطالعهم وساكت واحتري ردة فعل مصعب اللي شكله ما انتبه لي
ابو مصعب = يبه هد شوي ... اتصلت انا على الشرطة اول ماعلمتني بالتلفون ... حسبي الله ونعم الوكيل ... هالشباب متعبنا ( ووقف بجنب ابوه متنرفز )
شفت احمد يمشي متوجه لي ووقف بجنبي
احمد = رايد هذا ولد عم عمر ؟ ( واشر على مصعب )
طالعت مصعب وولقيته منحني على جده ويكلمه
هزيت راسي بأيه
احمد = وشسمه ؟
رايد بتنهيدة = مصعب
احمد = اهاا ( وتوجه لمصعب وشفته ياخذه على جنب )
طالعتهم وهم واقفين بعيد عني و يتكلمون .. شوي وشفت احمد يطلع من جيبه اغراض عمر وعطاه مصعب
نزلت راسي ورفعت يدي اشوفهم ... مليانات دم يابس
فركت يدي ببعضهم وصورة السكينة وهي تدخل وتطلع تكرر ببالي
= رايد
رفعت راسي ولقيت مصعب واقف قدامي مباشرة
طالعته بخوف ... وحاولت ابرر لنفسي
رايد = نااايف ( وسكتت مدري وش اقول )
هز مصعب راسه بايه
مصعب = ادري .. من يوم علمنا جدي بالجوال جا ببالي نايف على طول
نزلت راسي وبكيت بندم
رايد = عمر كذب عليه امس وتهاوشوا ... واليوم ( وبكيت اكثر وعجزت اكمل )
حسيت بيد مصعب على كتفي
مصعب = ان شاء الله عمر يطلع بالسلامة ... ونايف هذا ماني ساكتله ..
جانا احمد وطلب مني على الاقل اروح اغسل ثوبي بدورات المياة .. يقول افزعت العالم بثوبك
أيده مصعب ورحت لدورة المياة اغسل وانا بالي ماهو معي
خايف على عمر .. ومحتار مدري وين اروح ... ما اقدر ارجع لبيت عمر بعد اللي صار ... يكفي عمر اللي جاه
بس وين اروح ويييييييين... ما ابي ارجع لعمي ... امس اول ماشافني ضربني بس لأني اخذت اخواتي ... كيف الحين لو ارجع
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك