رواية انا الضحية وانا الجلاد -12
ليلى: يعني ما سويتي شي؟ ليش تطلعين مع نورة ومجيد يوم الزواج
وبدون ما تستأذنين من أم إبراهيم ولا مني...
نجلاء: أقول ما بقى الا هي!! أستأذن منتس بعد!!
وبعدين مجيد مكان سعود.. وبعدين ...من قال لها؟
ليلى: دقت وسألت عنتس وقلت لها.. وتشوت أنا بسبتك...
نورة: يا كافي... هذا أهلي مخلينن معكم وأنتم ما تسمحون لنجلاء تجي معنا...!
إيمان: مو عدله تروح البنيه مع بزر وشاب وبدون ماتشاور أحد...
بعذر عذبة... أنتي غلطتي..ولو كنت مكان عذبة ذبحتس!!
نورة: أنتي البزر!!
عبير: الحق حق... نجلاء ياويلك من عذبة!!
إيمان: عبير.. تكفين كلمي بندر خليه يجيبه...
عبير: لا.. كلميه أنتي أنتي كبيرة ويحترمتس..
إيمان: والله حليل...يعني بياكلتس...
عبير: أستحي منه...
نورة: أنا أكلمه...كم رقمه...
إيمان: هـــــــــــــــــــــــو!!
*****
"في الرياض"
مها وفهد, في البر, مها تضع رأسها على كتف فهد..وهو يضع يدها بين راحتيه,
ويطبق عليها بلطف..
فهد: مهاوي.. وش صار على عذبة..
مها: تقطع القلب.. تعبت منه ..مو راضيه تعترف بغلطه..عنادها مصيبة المصايب..
تخيل راحت للعرس وإنهارت هناك...ياقلبي عليه..آآه
فهد: مشكلة الحب... ساعات يكون في المكان الغلط..
مها: دايم بالمكان الغلط...
فهد: وش تقصدين؟!!
مها: ولا شي... بس الحرمة ضعيفة .. إذا حبت ضحت بكل شي...
فهد:.............................................. .._أطرق رأسه وصمت طويلاً_..
مها: عذبة حبت مشاري وضحت بكل شي... براي جده اللي يسوى عيونه..
بغلاه عند أهله..عمانه زعلوا عليه... أخوه جاه الموت يوم الملكة...
فهد: .... بس سعود هو اللي إستقبل الرجال ... ومعه فيصل ومجيد.. مو باين عليه شي..!!
مها: أنت ما تعرفهم... ذولا هالثنائي سعود وعذبة يجيهم الموت ولا يبينون مشاعرهم..
عارف أنا كنت عندهم .. والله إنه يروح للرجال ويرجع ويدخل ويجلس بالصالة..
ولا بالمطبخ.. ولامن أحد لاحظه هج بسرعة ولا سوا نفسه يتنظر شي من المطبخ..
فهد..فيصل...جاء عادي!!؟
فهد: إيه ... بس كان جالس بآخر المجلس.. ويبح مشاري ومشاري يبحه...
اسألي مساعد هو اللي منتبه لهم... وسعد يناظر مشاري من فوق لتحت... ليش
سعد شايف عمره... ولا تركي هذا شي... يوم جاء يطلع مشاري...
كش بوجهه..
مها: قدام الرجال!!!!!!!!!!!!!!!!!!!
فهد_وهو يضحك_: لا... يوم جاء يروح مشاري لعذبة..
سعود يمشي قدامه وتركي لحقهم.. وينادي مشاري.. مشاري..
ويوم إلتفت في نهاية الممر كش بوجهه وقال..(......)
مها:ههههههههههههههههههههه والله هالتركي مقرقع...
غريبة وهذا يصير ولد عم أمه ونسيب خواله!!!
فهد: تركي حبيب بس لو يترك عنه الفسالة...
مها: الله يهديه...فيصل ... مسكين...جاي!!
والله رجل... أقول أنا لعذبة ربي بيعوضتس...
_وتضحك_ أجل العناد
والمكابرة عرق متأصل بهالعايلة...
أنا أول أحسب عذبة طالعة لأمي..
بس يبدو إن العايلة كلها كذا...
فهد: مها..تدرين!! فيه شي صار بين فيصل يوم قام يبارك لمشاري...
مها: وشو... وأنت ليش توك تتكلم!!... وش صار...وش قالوا..
فهد: ماسألتين؟ مادري بالضبط بس أنا شفت فيصل عبس فجأة... ومشاري
ضحك ثم كشر... ودار بينهم كلام ماقدرت أسمعه.. بس أتوقع شماته ولا تهديد..
مها: هـــــــــو!! وش يدريك ؟
فهد: عيون سعد وهو يسمعهم... والله كنها بتطلع من مكانه.. وصر سنونه...
وإلتفت يطالع مشاري بعين حمراء...
مها: وبعدين؟
فهد: فيصل ... بارك لأبو مشاري.. وطلع ولحقه سعود وسعد طلع وراه بدون حتى ما يبارك ...ولا لنسيبهم حتى..فيه شي صار..
مها: يووووووووووووووووه..
فهد: .... ..... ....مادام عذبة الحين بتتزوج فيصل... ورى ما تعطينا ناصر...
مها: .............خافيتك عذبوه... كلش عيت... تقول خوذي عيوني تفداك..
بس ناصر ونجلاء ما أقدر وصية أمي ذولا...
فهودي.. خلنا ناخذ من الرعاية..
فهد: شوفي ... لو بتاخذين ناصر ما يخالف تاخذين من الرعاية..
ولا تجيبين لك .. غيره مافي الموضوع محسوم...
مها: فهد!!! منين أجيب انا...
فهد: من غيري... تزوجي غيري وخلفي... أنا مب اناني...
مها: فهد أنا أحبك..مابي غيرك... مابي عيال... مابي عيال...
وبعدين مساعد مثل ولدنا... والحمدلله... بنات أخوي يعدونن أمهم...
يكفي... والله لو إيش ماكان ما أضحي بك عشان عيل..._وأخذت تبكي_
فهد: وأنا أحبتس ... وعشاني أحبتس مابي أظلمتس...
_وضم مها لصدرة بقوة, _
"في الخبر"
إيمان: ياربيه ... منب طالعة ... بندر بيوديكم...
نورة: أحسن بندر من إبراهيموه هاللي مرته مانتن بوه.. أنا قلت لعمي خل بندر يودينا..
نجلاء: لا عمرتس تلقفين... الحين خالي ورى ما يجيب سواق وتفتكون!!
عبير: مالي خلق بندر.. أستحي منه... وبعدين شديد .. غطي عيونتس...
لاتلفتين.. لاتقولين لاتسوين...
ليلى: وأنا بعد مب رايحة.. بروح مع خالتي فاتن...
نجلاء: بتروح خالتي لحالها...؟
ليلى: لا بتروح معها منى...
نجلاء: وعععععععععععععععععععع... لو خالتي لحاله رحت معكن..
نورة: _وهي تتأمل لوحة متوسطة الحجم علقت على جدار الصالة الفوقية_
الله............روعة من هذولا..
عبير: هذي خالتي فرح .. وفاتن ومعهم جدي وجدتي ...
نورة: هو!! شلون كلهم أعمارهم صغيرة كلهم تقريبا بعمر واحد..
ليلى: هذي الرسمة رسمها خالي يوم أول إجتماع لخواته بالسعوديه بدون إمه وأبوه..
جمعهم كلهم بعمر واحد ووراهم الخلفية حقت حديقة بيتهم بكولورادو..
نورة: يووووووووووووه خالتي فرح تدنن.. وفاتن فاتنه بجمالها...يوه إسم على مسمى...تشبه لتس يا ليول... بس وراه خربت خالتكم...
نجلاء: عجزت... خلاص...
ليلى: دايم يقولون إني أشبه خالتي فاتن وأمي سعود وعذوب اللي طالعين عليها..
وناصر سبحان الله جدي...
نورة: وأبوكم يا حرام من طلع عليه!!
نجلاء: ولدي إن شاء الله...
إيمان: وش دخلتس أنتي...ليلى حلوه الرسمه اللي أرسلتيها لأبوي...
إنهبل عليه...نجلاء.. قولي لبندر هوّنا...
نورة: ليــــــــــــــــــه مايصير... محجورين هنا...
نجلاء: بنروح... أخاف بكرا لامن رحنا الشاليهات يحجرونا...
عبير: إي والله ...
نورة: يالله خنمشي...وين بنادر...
عبير: بالصالة... روحي قولي له يالله...كانك صادقة...
نورة_وهي تغطي وجهها بالشرشف_: أقول له والأمر سهل..
_وذهبت للصالة وتبعتها البنات ووقفن يتابعن الموقف من بعد_
نورة: بندر... يالله بنمشي
بندر_رفع رأسه بتثاقل_: خير.. وين تمشون؟
نورة: بنتمشى... أنا عازمتن البنات بمطعم(....)الهندي... ودنا...
بندر: قولي والله_ويكتم ضحته_
نورة: وقسم بالله... يالله قم تلحلح..تبي نزمك بعد!!
بندر_ينظرباستغراب ويرد بسخريه_وين ناوين إن شاء الله بعد المطعم؟
نورة: أممممممممم يمكن الملاهي..
أقول قم ولامن ركبت نقولك وين نبي نروح... قم!!
بندر: أقول... إنقلعي .. سواق عند أبوك أنا..!!
مافيه روحه...
نورة: غصب...غصب...أبوك يقول بندر يوديكن...
بندر: ..........................................._ينظر لنورة بطرف عينه_
نورة: بندر ... بنمشي قبل لا تجي الصلاة و يسكر كل شي...
بندر:.....................................
نورة: هيه أنا أتحدث...هل من مجيب...
لاحول انت ما عندك إستجابة.. المفروض يحطون لك برج...
بندر_يبتسم_: أنا ما احب اسمع أوامر...
نورة: ياشيخ... عسكري مايبي يسمع أوامر... كل شغلك أوامر..
بندر_يضحك_: والله... شوفي أنا بندر..أنـ...
نورة: أدري إنك بندر مو وائل كفوري...
بندر_يضحك بقوة_: نجلاء!!!
_تأتي نجلاء مرعوبه...: سم!!!
بندر: إقلعي عن هالنشبه...
نورة: قم ودنا .... بنتأخر وأنت تهاوش...
نجلاء:نورة تعالي أقولتس شي بالمطبخ...
نورة: لا قولي لي بسيارة الشيخ... يالله أجيب شماغك...
بندر:............................_ينظر إليها بدهشة_
نجلاء_تهمس_: إمشي ترى بيجيتس طراق...إمشي!!
نورة: لا....بندر يالله...
بندر: لاحووووووووول. ولا قوة إلا بالله..إسمعي ... قولي بندر لو سمحت تتكرم علينا
وتودينا وللمكان اللي تبي..وديتكم....ولا إنطقي...
نورة: سم ... بندر لو سمحت تتكرم علينا وتودينا للمكان اللي أبي..
بندر: مب أنتي.. اللي أبي أنا...
نورة: أووووووووووه وش تفرق... أنا ولا أنت ... المكان اللي نبيه أكيد تبيه
***********
"في غرفة الجد"
الأدوية مرتبة على طاولة بجانب النافذة, والممرضة موني تتنقل كفراشة بين سرير الجد والطاولة, الجد يجلس على كنبة كلاسيكة خضراء بجانب السرير, الستائر الخضراء المطرزة بخيوط ذهبية رفيعة والمرفوعة بحبل ذهبي يتدلى منه أحجار خضراء وخيوط حريرية ذهبية وجدائل خضراء صغيرة أعطت الغرفة نوعاً
من الفخامة المشوب بشيء من الكآبة..
موني: بابا.. سكر كويس... الحمدلله..
الجد: الحمدلله..
_تدخل عذبة ضاحكة, ركضت ثم وضعت يديها على كتفي جدها وإنحنت
وتناثرت خصلات شعرها الحريرية السوداء على وجه جدها ثم قبلته_
الجد: هلا والله بنيتي...هلا وغلا...يالله حيه..يالله حيه..
عذبة: يبه وااااااااااو والله فقدتك..._وهي تفتح الستائر وتفتح النوافذ..
موني: ليس تفتح دريسة .. بعدين يجي برد..
عذبة: خلي الغرفة تهوى وبعدين نشغل الدفاية... ولا يبه؟
الجد: إلا يا بنيتي...زين... الحمدلله دفايات وأنعام... وكل خير ورزق..
عذبة: يبه توقع يزيد البرد...
الجد: إيه يا بنيتي تو المربعانية ماجت..
بنتي ياعذيب... وشلون العرس..؟
عذبة: يووووه يبه يهبل ...
الجد: وش أخبارتس...؟
عذبة: لا يبه... ماهمن ولا شي...رقصت وحفلت مع البنات...
الجد:الحمدلله... أح يابنتي هابه شمالية..صكي الدريشة..عليتس
خفيف.. لايلفحتس الهواء..
شغلي الدفايه..أحيــــــــــــــــــــــــــــه..
_تقف عذبة وتغلق النافذة, ثم تنحني على الدفاية وتشغلها, ثم تلتفت قائلة:
يبه..متى أول مرة شفت الدفاية؟
الجد: عند جدتس إبراهيم...
عذبة: أبوي إبراهيم!!!
الجد: إيه .. أبوتس إبراهيم كان عنده دفاية وطاولة...
أبوتس منول دافور..
عذبة: دافور!! وشلون؟
الجد: ههههه يعني مب سعودي...
عذبة: إلا أبوي قصيمي بعد!!
*******
"في الخبر"
البنات يتجهزن للخروج مع بندر, نورة لبست عبائتها ونقابها,
ووقفت بجانب الباب, دخل بندر واضعا العقال على طاقيته وممسكا الشماغ بيده
ورافعا طرف ثوبة بيده الأخرى..
بندر_يلتفت على نورة بجانب الباب_: بسم الله ...!
عكوز بكوز بكل مكان مركوز...
نورة: يالله؟
بندر_ينظر لبنطلون نورة الأبيض_: خير؟
نجلاء_وهي تلبس نقابها_: وشو؟
بندر: وأنتي بعد؟
نورة: وش بك؟
بندر: وش هاللبس ... بناطيل مافيه...
نجلاء: علينا عبايات مب طالع...
بندر: مافيه يعني مافيه ... طالع من تحت العباة..
نورة: وش دخلك...
بندر: نعم؟!!
نورة: وش...دخلك؟
بندر: نعم... ماسمعت..
نورة: أقول منتب أبوي ولا أخوي...وش دخلك
نجلاء: محنب مغيرينها... والله ملابسي كلها توسخت...
بندر: مافيه طلعه.... خلي أخوتس يوديتس...
_ويخرج ويغلق الباب بقوة , نظرت نورة لنجلاء...وضحكت
بينما نجلاء صرخت: طلع أخوي من القبر
وما أنذل لك ..طلع أخوي من القبر...
لو أخوي فيه ما رجيتك....
الله لايذلنا لك ...
الله لا يذلنا لك ولأشكالك...
_وإرتمت على الأرض تبكي, في هذه الأثنا تدخل الخالة فاتن,
وهي تتذمر_: قلق هالعيال... ولا سلام ولا تقل أم الجيران مارة مو عمته...
هـــــــــــــــــــــــــــــــــــــــــــــــــ ــــــــــــــــــــو!!
نجلاء وش فيك تبكين... من بكاك يا نور العين...؟
وش فيك يانجيل..
_وانحنت وضمت نجلاء وهي تمسح دموعها _
نجلاء: آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآ آآآآآآآآه
ياخالة... بندروه... يقول خلي أخوتس يوديتس..
والله ياخالة لو سعود حي ما خليته يودين...
نورة: نجلاء... يعنين أنا....
نجلاء: لا... منهو هو عشان يذلن...
خالتي يقهر... يقهر...أنا نجلاء عقب ما أتلبس
يعيي يطلعن.. ليش يقول بيودين من الأول...ليش يذلن...ليـــــــــــــــــه!!
فاتن: يا حياتي يا نجلاء لا تبكين... الموضوع هين...
ولا عاش منهو يبكيك... يالله قومي هذا راشد بالملحق يوديك للي تبين..
قومي.. ياروح خالتك أنتي... يابنيت فرح.. يالله لا تغثيني بدموعك...
قومي..قومي.. راااااااااااااااااااااااااااااااشد...
_تنادي إبنها راشد_
نجلاء: الله يخليك يا خالة... وبندر هذا حسابه عند خالي...
********
"في السيارة مع راشد"
راشد: ما شاء الله ... كلكم يايين..
ليلى: إيه أول أحسبه بندر وعييت علبالي بروح مع أمك...
بس يوم أمك هونت عن الروحة ... قلت أروح معكم وما أفوت علي الفرصة..
نورة: أقول أنت ليش لابس عمامة..
راشد: أحب ألبس جذي.. عندج معارضة...
نورة: لا... بس بعذر نجلاء يوم تسميك أبو عمامة...
ههههه... عمامتك أكبر منك...
راشد: نجلاء هذي يبالها قص لسان...
قليلة أدب... وطويلة لسان ويد...
نجلاء: أحترم نفسك..!!
راشد: وإذا ما إحترمت نفسي وش بتسوين ؟
نجلاء: إنطم...
نورة: هيه أنت ... هذي نجلاء...ماتعرفها...
راشد:إلا أعرفها وأعرف أبوها...
نجلاء: لا تجيب طاري أبوي على لسانك يا البزر...
راشد: شوفي يا البزا.. شعور النقص هاي
اللي يخليج تغلطين على الناس ما أبيه يبين بسيارتي...
نجلاء: من زين سيارتك الدردعّه..جمس قديم... ولا فيراري...
وبعدين انت لو فيك خير ما تخليت عن ديرتك... وغيرت لبسك...
أنت اللي تشعر بالنقص مو أنا...
نورة: ماعليتس منه... بربرة بزران...
ليلى: نجلاء حبيبتي... خلاص إحترمي إنك بسيارته..
راشد: أصلا أنا ما يشرفني ناس متوحشة تركب معي...
لكن أنا أعرف شلون أدبها...إذا مانتي محترمه نفسج
إنزلي من سيارتي...
نجلاء: أنزل وأنا بنت خلف... مو بنته اللي تنطرد..
نورة: نجلاء... وقفي... هيه بروح معتس...
_فتحت نجلاء باب السيارة عند الإشارة , ونزلت من السيارة ولحقتها نورة من الباب
الآخر, ليلى تصرخ وتترجى نجلاء أن تركب ولم تستطع أن تمسك بها لأنها في المرتبة الأخيرة بالجمس, بينما شمس تحاول أن تمسك بهما ولكنها لم تستطع,
راشد إلتفت وبدا عليه الإندهاش لجرأة الفتاتين_
شمس: راشد...إنزل جيبهم... شوف راحو السوق... ياويلك من أمي...
راشد:خليهم ... قفلي الأبواب...
ليلى: هيه أنت ... وقف... أبنزل... لا إصبر...رويشد...
راشد: شلون تبيني أسد الشارع... بدور وأيي...
عبير: مجنون أنت!!!!!!!!!!!!!!!!!!!!!!!
راحو شوف وين دخلو...
ياويلك من خالي...
ليلى: أقول وقف...!!!
البنات بيضيعون... والله لو صار لهم شي ياويلك من عماني..
ولا عمان نجلاء بيسلخونك سلخ...
وقف أبنزل..أبنزل...
_توقف راشد ونزلن البنات ولكن لا أثر لنجلاء ونورة_
******
الجزء العاشر
"في غرفة الجد"
عذبة: معقولة أبوي إبراهيم رابي ودارس بالشام!!!
الجد: إيه... يوم مات أبوه...أرسل عمه خط عشان يكزونه لمه..
وأرسلته أمه... وأخذه عمه ورباه ودرسه..
عذبة: طيب عمه هذا وينه ووين عياله؟
مانعرفهم...
الجد: ماله عيال... عاله جدتس...صار له ولد..
عذبة: يبه..أنت كنت تعرف أبوي إبراهيم قبل ما يتزوج أبوي بنته؟
الجد: إيه...يابنيتي إبراهيم صديقي من شبابي..الله يرحمه...إيـــــــــــــــه ...
_ورفع رأسه ثم إبتسم...وأغروقت عيناه بالدموع_وأردف:
إيه ... وقف معي أيام وأيام... أيام الفقر والكسافه..يوم أنا صغير ومغترب...
عذبة: من صغرك تعرفه؟ شلون مب هو رابي بالشام...
الجد: آآآآآآآآآآآآآآآآآه يا بنيتي.. رحت للشام أترزق الله...
صغير وماأعرف شي... قالوا الرزق بالشام ونحرت الشام...
إشتغلت بالرياض وأنا أبو إثناعش سنه..وجمعت لي كم قرش... ورحت أترزق بالشام..
عذبة: إثناعش!!! يبه مادرست؟
الجد: درست ويوم عرفت أقرا المصحف وأكتب... جاء لمي أخوي
عبدالعزيز وقالي : إسمع يا نويصر ... مانقعد كلنا بالديرة...
نقعد كلنا ننتظر الموت جوع... إنحر الرياض وإشتغل.. وأنا بجلس عند أمي..
وأشتغل عنك بالمزرعة...مالك بالديرة قعود كل الشباب راحو يترزقون...
اللي نحر الشرقية واللي نحر الحجاز واللي نحر الرياض...
عذبة: يبه... شلون تروح وأنت صغير؟ وليه هو اللي يقعد وأنت الصغير...؟
الجد: أمي ماتقوى على فراقه.. وأنا صغير ولا أقوي على شغل المزرعة كله...
عذبة: يوه يبه...كنت فقير...!! إيه وش صار عليك...
الجد: رحت لناس من أهل الرياض وإشتغلت صبي عندهم...
وبعدين رحت لتاجرقصيمي بالرياض يشتغل بالبناء.. وإشتغلت عنده أربع سنين...
وبعد الأربع سنين إنكسر هالتاجر وعطان حقي وصفى محله ...
وقال لي جب لك بضاعة من الشام وترزق به بذا..
الله يجزاه خير... دلن على تاجر سعودي بالشام إسمه راشد..
يصيرمن جماعته.. ووصاه علي...
عذبة: منهو التاجر عم جدي؟
الجد: إيه... رحت لمه.. وعلمن أصول السوق... وقعدت هناك ببيته ..
ومع ولد أخوه...
عذبة: يبه... عشت عند خوالي يعني ببيتهم؟ إرتحت وأنت بعيد عن ديرتك وأهلك..
الجد: _يضحك ويسترسل بالضحك ثم يمسح عينيه قائلاً_:
لا... ماعرفت آكل على الطاولة... وعييت ألبس بدلة...
وتهاوشت مع شغالتهم أم وسيم... عشاني أحوس المجالس حوس...
أجدع الوسايد على الأرض وأجلس على الأرض...وآكل على الأرض..
عذبة: هههه... يبه وزوجته ماعصبت على الحوسة؟
الجد: لا.. ماعنده زوجه ولا أحد بالبيت إلا أم وسيم والخدامات والطبابيخ..
..أنا طلعت من فقر... ما ألقى ما آكل وطارت عيوني بأكلهم وطريقتهم..
محاشي وزلطات وشن ملوى وشن معربد وألوان وأشكال ماعرفته ولا بالحلم..
ومع كل هالخير والنعمة ما إرتحت...
ولا عاد يوم دخلت بيتهم روعن...كبير ونوافير... وغرف ماله نهايه...
أربع أدوار... وشجر وحدايق داخل البيت... وخدم يجون أول النهار ويطلعون باليل...
وضيوفن ما ينتهون ... رجال داخلين طالعين... والقهاوي ماتوقف...
بس ماطول هالعز... راح كله بغمضة عين...
عذبة: هــــــــــــــــــــو!!!!شلون...
الجد: إيه مايدوم إلا وجه الكريم... إنحرقت كل مصانعه...
بيوم واحد... خسر كل شي...
عذبة: وبعدين يبه وش صار عليهم ؟
الجد: إيه من يبذر المعروف بالناس ما يعدم جوازيه...
الرجل كريم وشهم ... وفزعت الشام كله عشانه...
التجار من ربعه جبروا دينه... وباع بيته وسرح خدمه إلا أم وسيم
عيت تترك جدتس ...وعمه...إيه أصيله هالإنسانه...
عذبة:ليه يبه؟
الجد: عم جدتس كفل زوجه وطلعه من السجن وعالجه بس مات ماطول...
وزوج بناته ووحط له بيت ومشى له راتب... وشالت معروفه على راسه...
وربت جدتس... وقامت بالبيت كله ...
حتى يوم ماتت إنتظروا جدتس لين جاء من أمريكا و دفنه مع ولده...
ووقف بالعزاء مع ولده وأحفاده...تستاهل والله...
عذبة: طيب يوم باع بيته وين راح ؟ رجع للقصيم ؟
الجد: لا... أرسلوا له عيال عمه... وقالوا له "إرجع وعيونا لك بيت
وعيالنا عيالك ... وبيوتنا بيتك... وحلالنا حلالك"
بس عيا... جلس ببيت صغير هو وأم وسيم وولد أم وسيم...
وأرسل جدتس عشان يشتغل بالرياض...
عذبة: طيب لقى جدي شغل؟
الجد: إيــــــــــــــــه جدتس دارس الجامعة...
إشتغل بجامعة الرياض أول ما فتحت ...
وصار يرسل راتبه لعمه وأم وسيم...
تصدقين يا عذيب وأنا كنت بمحلي... دخل علي وقال لي:
سامحني يا أبو ماجد...
الله يرحم أيام الشام...
والله لولا الله ثم أنت كان متت من زمان...
عذبة: ليه؟
الجد: ههههههه... هماي علمته شلون يصب القهوه العربية...
وشلون يلبس الشماغ... ووشلون ياكل على الأرض...
وصار عنده شوي.. معرفة...
عاد يقول سامحن يوم إني ألومك على كرهك لحياة غير حياتك...
عذبة: وبعدين يبه تأقلم مع الوضع هنا؟
الجد: غصبن عليه... الحياة ماترحم... يحتاج يعيش عمه
وأم وسيم...
وبعدين الله سخر له عيال عمه...
ضيفوه... وأكرموه... وعطوه أجمل بناتهم...
وسندوه...
إيه الله لا يخلينا من القرابه...مب يقولون الله يجعل لي بكل خرابة قرابة....
عذبة: إيه يبه والله القرابه رحمه من الله...
طيب يبه هو ليه راح لأمريكا؟
الجد: سالفه طويله.. روحي يابنيتي.. خليهم يشبون بالخيمة... ويزهبون القهوة...
وأقول لتس كل اللي تبين... بس أنا راسي يبي قهوة... راسي يرنع...
عذبة: تآمر يبه... بروح أقول لمصطفى يشب الضو...
وبخليهم يجهزون القهاوي...
الجد: لا تطلعين له ... !!
كلميه بالتلفون... هذا رجل لا تستهينين بوه... لامن طرت على الحريم قالن عامل...
عذبة: هــــــــــــو!! وأنا من متى عودت أطلع لأحد من العمال...
الله يهديك يبه...
الجد: لا تزعلين يا عذيب ... بس أنا أخاف عليتس...
هالعمال مهما صار أجانب...ولو كان سعودي بعد أخاف عليتس منه...
الرجال رجال لو هو من القمر... الله يستر عليكن ويرزقكن...
*****
"في الخبر"
نجلاء تبكي بحرقة خلف سيارة ونورة تحاول تهدئتها,
تخرج نورة رأسها من خلف سيارة , وتنظر يمنه ويسرة قائلة:
المنطقة آمنه... تقلعوا ... يالله وين نروح الحين؟
نجلاء: مادري؟
نورة: وشو!!! ما تدرين... يمه الساعه ثنتين الظهر..يمه..
الدنيا فضت...وين بنروح؟ ما ندل...
نجلاء: نورة.... ماحد قال لتس إنزلي معي...
ماتبين خلاص روحي للبيت...مع لموزين...
نورة: تدلين وين بيت خالتس؟
نجلاء: هه... أدل بيتنا بالرياض بس!!
نورة: ياملحتس ... المهم ...تدلين الحين مكان آمن وفيه أكل زين...
نجلاء: شوفي المكان كله مطاعم... بس مادري إذا هو آمن ولا لا
نورة: نجلاء معتس جوالتس... أنا نسيت شنطتي بالسيارة...
نجلاء: نورة!!! قولي والله!!! وأنا بوكي وجوالي مع ليلى...
وين بنروح؟ يمه...ياربي ياربي بس... وينك يا يبه...
ويننتس يمه... أبي أمي ... أبي سعود أبي أبوي...
نورة: أقول مابقي إلا تقولين أمبيه وتصيرين حليمه بولند...
خلي عنتس الحكي الفاضي...أهلتس بيطلعون من قبورهم...
نجلاء: رايقة...بلا ما تحسين بالنار اللي داخلي... وين الحين بنروح...
نورة: شوفي نوقف لموزين ونقوله أقرب مركز شرطة... والحمدلله
الشرطة في خدمة الشعب...
ويمكن نلقى هناك بندر ويودينا للبيت... يمكن...
نجلاء: إيه هذا أهم شي عندتس...أقول خلي الإستهبال بس...لو نروح للشرطة بيقصبتس ويسلختس مجيد ... مابقى إلا هي ندخل الشرطة ...الله لا يبلانا...
نورة: شوفي هالمركز يمكن نلقى لنا مرة ولا أحد يعطينا جواله...
نجلاء: مسكر... وقت غدا الحين.. مافيه إلا مطاعم فاتحة...
نورة: لا المطاعم دايم به سمرمح... وين نروح...
نجلاء: إمشي... يمكن نلقى لنا أحد إبن حلال... يفزع لنا...
_وتدخلان بشارع فرعي وتمشي وتتعب نورة فتجلس على أحد عتبات الأبواب_
نورة: وه تعبت ... جوع وعطش...
نجلاء: يووووووووووووه والله عطش غير طبيعي... هذا وهو برد...
لو بالصيف وش بنسوي..
نورة: بننشوي... عمي...عمي
_تنادي رجل أسمر قصير وبدين ترجل من سيارته مقابل الباب الذي يستندان عليه_
الرجل: نعم!!!
نورة: عمي الله يسقيك من الكوثر عطشانين نبي إميه...نبل ريقنا..
الرجل: أميه؟ تبين ماي....!!!
يا بناتي وش مجلسكم هني بهالبرد والسماء شكلها بتمطرووقت كفة الناس..
الله لا يبارك بأهلكم مهيتهنكم... يابناتي خطر عليكم...
وين تبون أوديك ولا تجلسون الشارع... ترا كثير خربانين يمرون هني...
الله لا خلف على أهلكم...حسبي الله ونعم الوكيل...
نورة: لاحول ولا قوة إلا بالله.. عمي نبي ماء بنموت عطش ولامن جبت الماء هاوش زي ماتبي..
الرجل: زين ... دشوا...لا تقعدون بالشارع... دشوا يابناتي..
لامن هيتوكم هلكم... ما أهيتكم آني...
نجلاء: مكثور الخير ياعم ... بس حنا نبي ماء وجوال بس... إذا تتكرم علينا..
الرجل: دشوا لو بالسور...
نجلاء: ياعمي أهلنا مايرضون ندخل بيوت مانعرف أهلها...
ماتقصر عمي... بس والله ما أقدر...
الرجل_بعصبية_: الحين أهلكم يوم يقطونكم هني بالهمكان وهالساعة ...
دارين وين تدشون وين تييون...
نورة: عم نبي ماااااااااااااااااااااااااااااااااااااااااااااااء
الرجل_وهو يدخل وييضرب كفيه ببعضهما_: زين...زين
_ويلتفت متوعدا_: سمعوني زين... لا تتحركون من هني...
ولامن مر أحد بسيارته لو هدا شوي بس دخلو وردو الباب...
فاهمين...
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك