رواية يمسح الدمعة بشكوى -12
طالعت عمر افكر بكلامه
اكسر الخوف .. صح ماعلينا من عمي .. ماحنا ماخذين منه شي .. السايرة سيارة عمر وماعلينا من احد
نزلت نظري و شقيت ورقة من دفتر عمر وكتبت
( طيب بكرة نطلع نتمشى ونشوف بعض .. وبعد يومين نطلع للمستشفى .. من زمان عنك وعن دانه .. من زمان ماجلسنا مع بعض ... لا تخلين عمي يسيطر علينا ... يكفي اللي اخذه منا ... خلينا نطلع بكرة العصر ونتمشى و بعد يومين نطلع لموعدك الظهر ... تكفين اطلعي معي انا بعد ابي اخذ اخبارك .. بالملحق ماناخذ راحتنا )
وارسلت الورقة مع دانه اللي بدت تطفش من كثر مانرسلها
شوي وجت دانه ورمت علي الورقة بزعل وهي بحظني
دانه = حلاث تعبت
مارديت عليها واخذت الورقة اقرا
اما عمر ضحك منها واخذها من حظني وطلع من السيارة وهو شايلها ووجه كلامه لي
عمر = اباخذها للدكان ( و اخذ عكازه و سكر باب السواق وراح )
و بديت اقرا كلام مريم
( معك حق كلامك شجعني ياخوي خلاص اتحمل كل شي المهم اجلس معك واخذ اخبارك )
عصرت الورقة بيدي وماقدرت امنع دموعي .. وش تقصد بكلامها ( اتحمل كل شي)
مريم خوفها بمحله .. انا بعد خايف
مريم اذا رجعت لبيت عمي اكيد بيهاوشها وماهو بعيدة يضربها
خايف .. و اذا تذكرت كلام عمر تشجعت
مسحت دموعي بسرعة يوم ركب عمر ودانه السيارة
عمر = هاه بشر ؟
جت دانه وركبت بحظني فرحانه توريني الكيس اللي معها
دانه = لايد شووف ( ورفعت الكيس بوجهي فرحانه )
هزيت براسي لها بايه وانا متضايق
رايد بحزن = خلاص العصر بنطلع
عمر = يعني خلاص نمشي ؟
هزيت راسي بايه
عمر = وبكرة العصر نجي هنا تاخذ انت اخواتك وانا ابقعد عند جدي لين ترجع السيارة
هزيت راسي بايه وانا ساكت
وبصعوبة تهربنا من دانه و طلعنا من الحارة.. دانة عيت تنزل من السيارة وبكت يوم عرفت اني ابروح
رجعنا البيت وانا متحمس للطلعة مع اخواتي .. حتى النوم طار عني
السبت
بعد صلاة العصر مباشرة
واقف فوق راس عمر اللي نايم بالصالة على الكنبة
زفرت بضيق وطفش ... عمر نايم على جنبه ومغطي وجهه على ظهر الكنبة كعادته
من يوم جا من الجامعة تغدا و نام وطفشت من كثر ما اصيح عليه اقومه
قومته قبل الصلاة وماقام .. رحت اصلي ورجعت وهو الى الحين نايم .. نومه ثقيل وانا تأخرت على مريم
مشكلته لزم علي ماروح لحارة عمي لحالي .. واذا سألته ليه .. يقول مزاج .. يقهر عمر احيان ... احسه يتحكم فيني ... والمشكلة ما اقدر اقوله لا ... لاني ببساطة محتاجه ...
مليت صدري هواء وصارخت باعلى صوتي
رايد بصراخ = عومااااااااااااااااااااار
تحرك عمر بكسل وانقلب على ظهره وناظرني بعيون نعسانة
عمر بكسل = اففففف احد مسلطك علي ... ياخي رح المطبخ هذا هو من هنا ( ورجع ينقلب على جنبه ) خلني انام
مديت يديني الثنتين وقلبته على ظهره وانا معصب ومستعجل
رايد = احد قالك ابي المطبخ قم بسرعة .. الناس صلوا وانت الى الحين نايم ... قم تأخرت ابي ارووووووح
و اخذت ثوبه استعجله
رايد = يله البس ثوبك ( بس لقيته نايم على ظهره .. صارخت معصب ) بسررررعة عوماااااااااااااااار
اخيرا جلس بكسل
رميت عليه ثوبه بس عمر وخره عنه وقام وطلع من الصاله
رايد بزعل = بسرعة عمر تأخرت ؟
عمر بصوت نعسان = ابروح اصلي .. شغل السيارة انت لين اجي
رحت لثوب عمر واخذت المفتاح من جيبه ورحت للشارع .. شغلت السيارة ورجعت للصاله احتري عمر
دخل عمر الصاله ولبس ثوبه
وقفت .. وقلت استعجله
رايد = يله عمر تأخرت .. يمديهم يحتروني اخواتي
التفت لي وعمر وطلع بوكه من جيبه .. وطلع منها خمس مية ومدها علي
طالعت الخمس مية مستغرب وبعدها رفعت نظري لعمر
رايد = وش هذا ؟
عمر بابتسامة = عشان دانه .. رح تمشى فيهم واشتر لكم اللي تبون
شهقت مستغرب ونزلت راسي منحرج
رايد = لا مشكور .. اهم شي السيارة
تقدم عمر لي وهو يعرج ودخل الخمس مية بجيبي الامامي
عمر = يابن الحلال قلت عشان دانه مب لك
سكتت مدري وش اقول .. ومن احراجي وفرحتي باول خمسمية بحياتي ضميته ولفيت يديني حولين خصره وغطيت وجهي بصدره .. الصراحة جت بوقتها محتاجها .. انا على ثوبي من يوم طلعت من بيت عمي وصار اكثره متمزق من كثر الغسل واللبس ..
سمعت عمر يضحك وحط يده يمسح على راسي
عمر = هههههه يله مشينا ( وابعدني عنه ) ولا تنسى شماغك
واخذ عكازه و طلع من الصاله .. تبعته وانا ارد عليه
رايد = اصلا من قبل مانويت اخذ الشماغ
واخيرا طلعنا .. وصلنا الحارة ووقفنا السيارة بجنب بيت جد عمر وقعدنا نحتري مريم و دانه
التفتت لعمر
رايد = عمر كم رقم تلفون بيتك ؟
التفت عمر لي مستغرب
عمر مستغرب = تلفون بيتي ؟ ليه ؟
رايد = انا ماعندي جوال .. ابي اعطي اختي الكبيرة الرقم
طير عمر عيونه فيني
عمر = تبي تعطي اختك رقم بيتي تتصل عليه ؟
رايد = وش اسوي ماعندي حل الا كذا .. ابي اعطيها الرقم تتصل علي اذا احتاجتني
سكتت شوي
عمر = اهاا طيب ..
طلعت له الورقة الوحيدة اللي بجيبي اللي فيها رقم مصعب .. ومديت الورقة على عمر
رايد = اكتب الرقم هنا
اخذ عمر الورقة وشاف رقم الجوال
عمر مستغرب = مين رقمه هذا ؟
التفتت له مستغرب .. معقول مايعرف رقم ولد عمه
رايد مستغرب = ماتعرفه ؟
حرك عمر يده يعني مدري وهو يحاول يتذكر
عمر = ما احفظ ارقام الجوالات .. من رقمه ؟
رايد = رقم مصعب
مارد علي و رسم عمر خط تحته وبعدها كتب رقم بيته
و فرحت لما شفت دانه طلعت وقعدت تتلفت .. طلعت راسي من الدريشة وناديتها
رايد = داااااااااااااااااااااانه
جت تركض لنا وشفت مريم تطلع من البيت وعليها عبايتها وواضح من مشيتها ورا دانه انها مرتبكه وواضح انها لابسه عبايتها بسرعة .. العباية مايلة ... طرف اطول من طرف
نزل عمر على طول واخذ عكازه ووقف عند باب جده مبتعد عنا .. نزلت انا واخذت مكان عمر بمكان السواق
ركبت دانه ومريم وسكروا الباب وعلى طول التفتت لي مريم و مسكت يدي ومن صوتها واضح انها خايفه وانفاسها سريعه .. كانها من اليوم تركض
مريم = راااايد .. وشلونك ياخوي .. والله قلبي ياكلني عليك .. مدري وين تنام ووين تاكل ووش تسوي
رايد = انا بخير ... الحين انا ساكن مع واحد من الشباب وخليت الاستراحة ( والتفتت لعمر و لقيته الى الحين واقف عند باب جده ويطالعنا ورجعت التفت لمريم ) مريم اذكرك تعبانة .. وشلونك الحين ؟
سندت مريم ظهرها على المرتبه وتنهدت تنهيدة من قلب
مريم = آآآآه ... بصعوبة طلعت من البيت .. اخذت مكنسة و طلعت للحوش يعنني ابكنس ( وحطت يدها على صدرها ) اووووه والله خايفة وشلون ابرجع .. ( والتفتت لي
) بسرعة امش .. ( والتفتت باضطراب مرة ثانية لبيت عمي ) ياربي وشلون ارجع خاااااااااايفة .. مخليني خدامه عندهم ... على الاقل الخدامه تاخذ راتب ... انا اشتغل على الفاضي .. تعبت والله منهم يارايد ... ابي اطلع من عندهم
سكتت منقهر وحركت السيارة بصمت ... وشفت عمر يدخل بيت جده اول ماشافني حركت السيارة ... مافهمت تصرفه ... ليه مادخل بيته الا لما تأكد اني حركت .. و نفس الشي يوم لزم علي ماروح لبيت عمي الا وهو معي .. معقول عشان تهديدي لعمي يوم اخذ السكينة ذيك الليلة .. طيب هو وش عليه .. حاجة بيني وبين عمي بالعكس بيرتاح مني ... عجزت افهمه عمر ..
اخذت الطريق العام وسألت مريم
رايد = مريم حاولتي تاخذين كرت العايلة من عمي ؟ .. تكفين محتاجه مررررة ابي الكرت
سكتت شوي احتريها ترد بس ماجاني الا صوتها وهي تبكي ... التفتت لها بس ما اشوف منها شي متغطيه .. رجعت اطالع قدام .. خلاص فهمت
زفرت بضيق ياربي وش اسوي مع هالعم ... اكل حلالنا ومانعنا من اثباتاتنا عشان هالراتب اللي ياخذه
انتبهت على صوت مريم وهي تبكي
مريم = ادري انك ماراح تلقى وظيفة ولا شي بدون كرت العايلة ... انا عندهم اغسل واكنس واطبخ واي خطأ يحطونه على راسي ... وبنات عمك دلوعات من يوم ماجيت عندهم شالوا يدهن من الشغل ... قبل كنت اراددهم واطلب حقي الحين احس تبلدت .. حتى دانه اهملتها ... قبل اذا سمعتها تبكي من شهد والا بندر اقوم ادافع عنها ... الحين اشوفها تبكي .. تجوع .. تموت .. ما اتحرك ... انت املي يارايد تكفى دبر عمرك .. سو أي شي ... رح لخوالي تكفى ( وبكت )
طلعت دموعي وانا اسوق .. منقهر .. احس صدري يغلي .. رديت عليها
رايد بصوت باكي = خوالي مثل عمي .. لا تغترين فيهم ... انتي تذكرين عمي ماكان كذا معنا ... وبعد امي وابوي تغير علينا ... خوالي نفس الشي
ورفعت يدي امسح دموعي عشان اشوف الطريق
مريم = انت تقدر تروح لهم لحالك .. يمكن يدبرونك ويلقون لك وظيفة بالرياض ... انا ودانه خلاص محكوم علينا بالاعدام ... عمي هو ولينا حتى لو بغينا نروح لخوالي .. الشرع والقانون مع عمي .. تكفى رايد رح لخوالي .. انت الوحيد اللي تقدر تطلعني من هنا
رايد بصراخ منقهر = مااااابي اروح لاحد منهم ... مانبيهم ... عمي وخوالي واحد ... ( واخذت نفس احاول اهدي نفسي ) ابحاول ادور وظيفة يمكن احد يوظفني بدون اثبات ( وبكيت يائس عارف ما احد بيوظف شخص بدون اثبات )
بكت مريم من ردي
فجأة سمعت دانه اللي جالسه بين المرتبتين
دانه = ليه تبكون ( وبرطمت )
ماحد رد عليها .. كل واحد يفكر بهمه
مر عشر دقايق وحنا ساكتين
وقفت السيارة عند مواقف حديقة عامة و فاضية
نزلنا وجلسنا على العشب ودانه راحت تلعب
مريم = رايد من سيارته هذي ؟
رايد = سيارة خويي اللي انا ساكن معه
مريم = له سيارة ؟ .. اجل اكيد هو اكبر منك ؟
رايد = ايه .. يدرس بالجامعة اظن بثاني جامعة
شهقت مريم و حطت يدها على يدي خايفة
مريم بخوف = لا يضيعونك الشباب ... ابعد عن الحرام .( والتفتت للسيارة اللي واقفة قدامنا وبعدها التفتت لي ) بثاني جامعة هذا اكبر حتى مني ... وش يجلسك معه ... وبعدين تعال .. وشلون تقول ساكن معه ... ماله اهل هذا ساكنين معه بالبيت ؟
رايد = لا ماله اهل
ابعدت مريم يدها عني وحسيت انها تفاجأت .. ماشوف تعابير وجهها من الغطا
مريم مستغربه = كيف ماله اهل ... رايد مافيه احد ماله اهل .. اكيد هو ضاحك عليك ... وماهي بعيدة يصير بيته فيه بلاوي .. والله اني خايفة عليك ( وصارخت منفعله ) اطلع من بيته اكيد فيه شي
رايد = مريم وش فيك اكلتيني بقشوري
مريم بخوف = اطلع من بيته ... يكذب عليك مافيه احد ماله اهل
رايد = له ام ومتزوجه وابوه متوفي من يوم هو صغير وماله اخوان ولا اخوات ... وجده يكون جار عمي
سكتت مريم شوي وبعدها
مريم = ولو انتبه منه
طنشت كلامها وطلعت الورقة اللي فيها الارقام من جيبي
رايد = المهم .. خوذي الرقم هذا احفظيه
اخذت مريم الورقة مني ورفعت راسها لي وقالت بفرح
مريم بفرح = هذا جوالك ؟
رفعت حواجبي ... ابيها تشوف رقم البيت .. راح بالها لرقم جوال مصعب
رايد = لااا .. ماعندي جوال .. احفظي الرقم هذا ( واشرت لها على رقم بيت عمر )
مريم = هذا رقم بيت .. من بيته هذا ؟
رايد = رقم البيت اللي ساكن فيه .. شوفي اذا بغيتيني لا تتصلين عليه لين ارد .. لا .. عطيني رنة رنتين واعرف انه انتي وعاد من بكرة خلي دانه تطلع المغرب .. واكون انا موجود ونتراسل بالاوراق مثل اليوم
سكتت مريم تفكر
مريم = بس ما اقدر اخذ التلفون الا اذا ناموا ... يعني من الساعة 2 الى الفجر اقدر اتصل عليك .. غيره ما اقدر ... تعرف انت مرة عمي قشرا معي .. التلفزيون يالله يالله اشوفه .. اذا شافتني جالسة تحاول تطلع شغل غصب .. حتى لو مافيه شغل تروح ترسلني وتطلع شغل
رايد بقهر = طلعت روحها
مريم = آمين
رايد = طيب عادي اتصلي باخر الليل .. اصلا انا 24 ساعة فاضي .. بعض الاحيان اسهر ماعندي شي .. بس مثل ماقلت عطيني رنة رنتين وسكري .. عشان اعرف انه انتي وبكرة مثل ماقلت تلقيني المغرب عندكم بالحارة طلعي دانه لي
تنهدت مريم بحزن = ان شاء الله ( وسكتت شوي ) طيب ما اقدر اكلمك ؟
رايد = لا .. هذا بيت خويي .. مابيك تكلمين فيه اخاف اصير ماني موجود ويرد عليك هو
سمعت ضحكة صغيرة من مريم
رايد مستغرب = ليش تضحكين ؟
ضحكت اكثر يوم سألتها
مريم = ههههههههههه والله وكبرت يارايد وتعرف تغااار هههههه
لفيت وجهي عنها اشوف دانه وسكتت ماعندي رد .. ليه مب شايفين رجال
صح على طاري دانه .. التفتت لمريم
رايد = مريم حاولي تخلين دانه ماتطلع للشارع
مريم = الحمد الله والشكر مو انت تقول قبل شوي خليها تطلع للشارع المغرب
رفعت حواجبي مستغرب من مريم .. وش فيها اختي ماكانت بهالغباء هذا
رايد مستغرب = خليها تطلع للشارع بعد ماتتصلين علي .. يعني اليوم اللي اتصلتي علي فيه .. من بكرة تخلينها تطلع ... اما اليوم اللي ماتتصلين علي لا تخلينها تطلع .. فهمتي ؟
مريم = لا بالعكس الشارع احسن لها من بيت عمي ...
طيرت عيوني فيها وسكتت
مريم = حتى انت اشوفك مرتاح وانت بالشارع ... آآآآه ياليتيني اقدر اطلع مثلكم ... صح قلبي ياكلني عليكم ... بس احسن لكم والله ... ابي اطير مثلكم ( ورفعت يديها مثل الطير ونزلتهم على طول ) لا لا .. ودي اصير مثل القطاوة اللي بالشارع هههههه
فتحت فمي منصدم من اسلوب مريم في الكلام
نزلت راسي ... وانا منقهر .. وش فيها مريم ... ما كانت كذا .. احسها صارت مهبولة .. ( تنهدت بحزن ) اذكرها كانت تسرح واجد قبل يطردني عمي والحين اسلوبها ماهو عاجبني .. اقولها لا تخلين دانه تطلع تقول الشارع احسن لها .. فيه بنت تقول كذا .. ووش قالت .. قالت تبي تصير قطو ... هذا تمني بالله .. ماكانت كذا مريم .. كانت تذاكر لنا وتحل واجباتنا وامي وابوي يشاورنها بامور كثيرة ... الحين الكلام اعيده ويالله تفهم .. ونص كلامها احسه غبي
اخذنا شوي و ركبنا السيارة ورحنا ناكل أي شي بالخمسمية اللي عطانياها عمر ... ابتسمت لما تذكرته .. والله هالعمر يلعب فيني على كيفه احيان اقول مافي بقلبه رحمه .. عدة مرات يضربني ويرسلني ويتطنز علي ويتحكم فيني واحيان يواسيني ويعلمني ويدافع عني
المهم خلنا نروح نستمتع شوي .. اذكر يوم كنت عند عمي كنت اجوع ويمر علي اليوم واليومين مااكلت شي .. واخواتي الى الحين عنده يعني اكيد اخواتي جوعانات .. شريت لنا اكل دسم وكثير عشانهن .. ابيه يبقى ببطوننا مدة طويله لاننا اكيد بنرجع على الجوع وعلى الايام الصعبة
شرينا و رجعنا للحديقة على اذان المغرب ... وقررنا انا ومريم مانرجع للبيت الا الساعة 10 او 11 بالليل ... خربانه خربانه .. نبي نستانس ونسولف ونتمشى ولاحقين على عمي اللي بيفرقنا
جالسين على العشب وكل واحد معه صحنه الا دانه صحنين
انا ومريم نسولف وناكل ودانه مطنشتنا وتاكل بشفاحة
رفعت راسي لمريم وحنا ناكل
رايد = مريم خوالي يتصلون عليك ؟
مريم = ايه خالي عبد الرحمن يتصل بس ماكلمه براحتي النسرة عندي .. تصدق مرة شكيت له والكلبة قرصتني وانا اكلم وقعدت تشر لي وانا اكلم يعني ياويلك .. وصار صدق ياويلي .. يوم جا عمي علمته قالت اني اسب عمي عند خالي وتعرف عاد انت عمي ماقصر
رايد = قصر الله عمره
مريم = آميييييييييين
رايد = وبناتها الكلبات يضايقنك بشي
مريم = نوف حليلة .. وبدور مادري وشلون اممممم يعني لا تهش ولا تنش . مطنشة الكل .. بس كلهن يسمعن كلام امهن بكل شي .. وامهم مدلعتهن تصدق مايسون شي ابد معي ... كل شي انا اللي اسويه .. لا واللي يقهر احيان اسمع عمتي يوم تكلم بالتلفون مااسمع الا هالمدح ببناتها ... كذب عيني عينك .. وهن اظن حتى شاهي مايعرفن يسونه
سكتت شوي وقربت اللقمة بفمي .. وقبل اكل تذكرت شي ورفعت راسي مرة ثانية لمريم
رايد = صح على طاري الشاهي ( وابتسمت ) وشلون تطبخون الرز ؟
ماشوف وجه مريم بسبب الغطا ... بس طلعت يدها من تحت الغطوة بعد ماكلت لقمتها
مريم مستغربة = الرز ... ليه تسأل ؟
رايد = ببيت خويي مافيه احد يطبخ الا انا ... خويي يكون بالجامعة الصباح ومافيه الا انا ... وكل ماسويت الرز يطلع مب زين
و قعدت مريم تشرح لي وانا اسأل .. ليه تقريبا فهمت
رايد وانا اهز راسي = طيب بكرة اطبق واشوف
بس المشكلة نص اللي قالته مريم مب متوفر عندنا بالمطبخ او يمكن انا ماعرفه وشو بالضبط
بعد صلاة العشا
طلعنا انا واخواتي من الحديقة ورحنا نتمشى على السيارة بالشوارع ونتذكر ايام اول وبدت مريم شوي شوي تنسى خوفها من عمي وصرنا نتمشى و نعلق ونسولف ونضحك ونعدد الفروق بين الرياض مسقط راسنا وبريدة مكان عذابنا
فجأة طلبت مني مريم وحنا نتمشى بالسيارة
مريم = ورني بيت خويك اللي انت ساكن معه
التفتت لمريم مستغرب
رايد = ليه ؟
مريم = بس ابي اشوفه .. مدري ليه احس بيت خويك فيه بلاوي ... ماني متطمنه
رايد = ويعني اذا شفتي البيت من برا بتعرفين هو فيه بلاوي والا لا ؟ ( وسكتت شوي وكملت بصدمه ) لا يكون بتدخلينه ؟
مريم = لا مب داخلته .. بس ابي اشوفه ... ودنا له
لفيت بالسيارة متوجه لبيت عمر وكملت مريم كلامها
مريم = ماهو داخل مزاجي ... وشلون واحد اكبر مني ومنك يدخلك بيته وفوق هذا مايعرفك ( والتفتت لي ) ياخذ منك فلوس ؟
رايد = من وين لي ؟
مريم بتفكير = عمرك لاحظت شي ببيته
رديت عليها متضايق
رايد = اوووووه مريم وش فيك .. مافيه شي ببيته .. وش بيصير يعني فيه .. وبعدين شكلك مانتبهتي من وين جبت الفلوس اللي تعشينا فيها ؟
مريم = ماهي فلوسك هذي ؟
رايد = لا ماهي فلوسي .. من وين لي انا اصلا .. لا اشتغل ولا شي واثباتي عند عمك .. الفلوس هذي من عمر
مريم = مين عمر .. هو خويك هذا اللي ساكن معه ؟
رايد = ايه
مريم = اسمه عمر ؟
رايد = ايه ..
مريم = ولو .. انتبه منه ... انت اخوي الصغير والله خايفة عليك ولولا ضروفنا كان ماخليتك تسكن عند واحد مانعرفه .. ( وسكتت شوي ) وفوق هذا توك عمرك 15 ينضحك عليك بسرعة
التفتت لمريم معصب
رايد = اوووووووه وش فيك علي انتي اليوم .. وين تبيني اروح .. بالشارع
مريم = عند خوالك مو عند واحد مانعرفه
رايد = خوالك مثل عمك ... كم مرة اقولك ماني رايح وبعدين تعالي عمري 16 مو 15
سكتت مريم وسكتت ... بس الصراحة خلتني اشكك ... عمر مقفل وحدة من الغرف اللي فوق ... من يوم جيت عنده والغرفة مقفله
وش الغرفة ذيك ؟ وانا الصراحة ماعمري سألته عنها .. بيته ومايحق لي اتكلم ... لا يكون مريم معها حق وفيها شي هالغرفة
وصلنا بيت عمر ووقفنا السيارة قدام بابه والتفتت لمريم
رايد = هذا هو البيت ... هه ارتحتي
كشفت مريم غطا نقابها وقعدت تطالع البيت وتطالع الحارة والبيوت بشكل عام .. كأنها تتفحص المكان
مريم = اممممم تخيلته بيصير بعيد عن بيوت الحارة
رايد = انتي شكاكة .. البيوت كلها متلاصقة
مريم بتنهيدة = يابعد المسافة عن بيت عمي يارايد .. انت ساكن ببيت وحنا ساكنين ببيت ... ما اقول الا حسبي الله على عمي
تنهدت وسكتت ورجعت بالسيارة وسألت مريم محتار
رايد = وين نروح الحين ؟
مريم = كم الساعة ؟
ناظرت ساعة السيارة
رايد = 10
شهقت مريم بخوف
مريم = ياويلي الساعة عشرة وانا مارجعت
رديت عليها وانا خايف من عمي .. خايف عليها منه ..
رايد = ماسويتي شي غلط .. انا وانتي مع بعض .. ( وزفرت بضيق ) ليه احس كأننا مسوين جريمة
مريم وهي شوي وتبكي من الخوف
مريم = العصر ماكان موجود هو ... الحين اذا رجع للبيت وعلموه اني ماني موجودة بيقلب البيت علي .. ( وكملت وهي تضرب خدها ) ياويلي ياويلي .. رجعني رايد تكفى خلاص ... عجزت ارتاح
حتى انا عجزت ارتاح ... من العصر وحنا على اعصابنا مدري ليه .. حاولنا نكون طبيعين ونحط نفسنا انه ماعلينا من احد بس عجزنا نرتاح
عدت كلام عمر احاول اطمن نفسي واطمن مريم
رايد = اخت واخوها فيها شي ؟
مريم = مافيها شي .. بس عند عمي فيها مليون شي ... ياليتني ماطلعت ... وش بيفكني منه
التفتت لمريم يوم تذكرت
رايد = انا اتصلت عليه وقلتله اني اباخذك على السيارة ؟
مريم = ايه علمتني نوف .. بس عمي عيا ... عمي مب راضي اني اطلع
سكتت .. ايه هو عيا بس مو من حقه يعيي ... الى متى بيتحكم فينا
كملت مريم كلامها
مريم = اصلا هم يبون يدفنوني بالحيا كل شي عندهم لا لا لا ... اطبخ واكنس واغسل واذا فتحت فمي ياويلي ... عمي ماهمه الا راتب ابوي وعمتي ماترتاح الا اذا شافتني اشتغل ... كل واحد له طاقة .. انا مليت والله مليت ابي اطلع ابي استانس ابي ارجع مثل قبل ( وبكت )
اخذت طريق الرجوع لبيت عمي وانا افكر وش بيصير بعد شوي
وكل ماقربنا زادت مريم خوف وتوتر ووترتني معها
وصلنا الحارة ووقفت السيارة قدام بيت جد عمر و التفتت لمريم مرتبك .. الحارة فاضية الا من كم طفلين يلعبون بعيد عنا شوي
التفتت لمريم متوتر وتكلمت بدون عقل من الخوف
رايد = مريم .. طرت علي فكرة ... ووو ... وش رايك نروح للرياض عند خوالي الحين ...
رفعت مريم يدها كأنها تدعي وهي مرتبكه
مريم = ياااااااااااااااااااالييييييييييييت .. بس ما اقدر عمي بياخذني من شوشتي ويرجعنا عنده ... ارجع بكرامتي احسن ( وفركت يديها من الخوف ) رايد انزل معي خايفة
التفتت لبيت عمي اطالعه بخوف
رايد = اكيد ابنزل ( والتفتت للمرتبة الخلفية اطالع دانه وشفتها نايمة ) دانه نايمة
ماردت علي مريم ومتردده تنزل من الخوف
رايد = خلينا نروح لخوالي الحين ... ماتطلع الشمس والا وحنا عندهم
مريم بصوت باكي = ودي اروح لخوالي .. بس عمي ماراح يخليني بحالي انا ودانه الشرع والقانون معه مو مع خوالي ... ( والتفتت لي وحطت يدها الباردة على يدي ) رايد انت تقدر تروح لخوالي .. عمي مايقدر يفتح فمه عليك ... اما انا ودانه لا ... تكفى رح يمكن تتوظف
سحبت يدي من يدها
رايد = مابي اروح لحالي .. كم مرة اقولك خوالي مب رايح لهم لحالي ... تروحون معي انتي ودانه ايه .. اما انا بديرة وانتم بديرة لا ... ( وسكتت شوي ) اصلا خوالي مثل عمي
سكتت احس تفكيري مشتت مابي اروح لخوالي وبنفس الوقت ابي اروح عشان اخواتي
انا ماني محتاجلهم وماني واثق فيهم
مدت مريم يدها وفتحت الباب بتوتر
مريم = خلنا ننزل ... يارب عمي نايم الحين
نزلت مريم ووقفت تحتريني انزل
نزلت وفتحت الباب الخلفي ودخلت راسي وحبيت دانه وقعدت اقومها من النوم لين قامت وطلعتها من السيارة وهي تفرك عيونها من النعاس
مشينا لبيت عمي والخوف مسيطر علي وعلى مريم
مريم خايفة من عمي وانا خايف عليها من عمي ... انا اقدر احط رجلي واهج اذا بغا يضربني بس المشكلة مريم وشلون
ضربت مريم الباب بيد ترجف وهي تسمي وتتعوذ وتدعي
وانا واقف وراها احتري وماسك يد دانه
اخذنا خمس دقايق مااحد فتح .. كلمت لمريم بفرح
رايد = شكلهم مايبونا ... خلاص خلينا نروح لخوالي بالرياض يمكن هم ارحم من عمي
ماامداني اخلص من كلامي والا الباب ينفتح ويطلع لنا عمي معصب والشرار يطلع من عيونه وشهقت لما شفت الخيزرانه بيده
التفت عمي لمريم
عمي معصب وبصراخ = جيتي يالكلبة ... تطلعين بدون علمي
ورفع الخيزرانه وضربها بالشارع
ابتعدت مريم عن خيزرانته وهي تبكي بصوت مسموع وجت وراي تحتمي فيني
تدخلت احاول ادافع
رايد بخوف = هي طلعت معي ... ماطلعت مع واحد غريب والله العظيم
التفت عمي لي وصارخ بوجهي
عمي = انا ماني قايل لك بالتلفون ماتطلع معك يالصايع ( ورفع الخيزارنة وضربني فيها بقوة )
حطيت يدي على ذراعي بمكان لسعة الخيزرانة
بكت دانه بخوف تحتري دورها
صارخت على عمي منقهر
رايد = انا ماني صايع ... ندخل ونطلع على كيفنا ... ماسوينا شي غلط
عمي معصب = لا ياقليل الادب
ورفع الخيزارنه مرة ثانية يبي يضربني
بس هجيت وخليت سيارته الجيب الواقفة قدام الباب بيني وبينه واطالعه من عند الكبوت ومريم واقفة بمكانها بخوف
رايد بقهر = ليه انت معنا كذا ... الله ياخذك ... الله يقصر عمرك يالشايب
عمي = اذا اخذتهم مرة ثانية بدون علمي مايحصلك خير ياصايع .. فارق
( والتفت لمريم وحرك الخيزارنه قدامها ) ادخلي اشوف ( وفسح الطريق لها وهو يهز الخيزرانه قدامها )
مريم وقفت خايفة تبي تدخل وخايفة من الخيزرانه
مريم وهي تبكي = اخر مرة والله اخر مرة
صارخ عمي بصوت عالي خلا مريم تنقز من الخوف ودخلت واول ماتعدته وهو يضربها بالخيزارنه على ظهرها وسمعت صرخت مريم
ونزل نظره لدانه وسحب يدها وجرها داخل البيت
التفت لي معصب
عمي = اذلف لا بارك الله فيك
وسكر الباب بوجهي
وقفت وانا اطالع الباب واسمع صوت عمي وصراخه بالحوش
طلعت دموعي منقهر وانا اسمع صوت مريم تدافع عن نفسها بدون ما اميز كلامها
رحت للباب وقعدت اضربه واصارخ
رايد = افتح افتح .. مالك حق علينا .. ماسوينا شي غلط .. افتح افتح
وقفت عن ضرب الباب احاول اميز اصواتهم
مااسمع الا صوت عمي يصارخ ويهاوش
تلفتت وانا اضرب صدري من القهر .. مدري وش اسوي عشان مريم
وبدون تفكير .. ركبت على سيارة عمي الجيب لواقفة قدام البيت وتسلقت الجدار وطليت براسي عليهم
الحوش مظلم الا من انوار درايش البيت وانوار الشارع .. تقدرت اميز
شفت عمي واقف ويصارخ ويهاوش وهو ماسك شعر مريم ويضربها بالخيزارنه
ومرت عمي واقفه وراه تحاول تهدي عمي
وبنات عمي وبندر واقفين عند الباب الداخلي يراقبون الموقف ..
ما احد انتبه لراسي اللي يطل عليهم .. و اشوف نوف وبدور ومرة عمي كاشفات
مرة عمي = بس يارجال فضحتنا مب بالحوش
التفت عمي لمرته وصارخ بوجهها
عمي = هالكلبة بتعلم بناتي الهياتة ... تطلع بدون ماادري ... ( والتفت لمريم ورفع الخيزرانه عليها وضربها على ظهرها )
صرخت مريم تبكي وهي تتلوى وتحاول تفك نفسها منه
ركضت وحدة من بنات عمي وجت ورا مريم ... اشوفها بس مادري ايهم نوف او بدور
= يبه هي راحت مع رايد .. تكفى يبه خلاص ( وبكت ) فكها
صارخ عمي عليها ورفع الخيزارنه على بنته وضربها خلاها تبتعد عنه
عمي بعصبية = خلني اشوف وحدة منكن تسوي سواتها .. والله لاذبحها ... هالمرة راحت مع رايد .. المرة الثانية مع مين
انقهرت منه ورفعت رجلي اتسلق على حافة الجدار واعتدلت جالس على الجدار
انتبه لي بندر واشر لي
بندر = رااااايد
صارخت بعمي بصوت عالي
رايد بصراخ = اختي اشرف منك ومن بناتك
انتبهوا لي كلهم ودخلوا بنات عمي عني داخل البيت
ومرة عمي رفعت شيلتها على وجهها تتغطى عني
ترك عمي مريم وجا عند الجدار اللي جالس عليه ورفع راسه يطالعني
عمي بعصبية = انزل يالكلب .. فارق للشارع .. يالصايع مابي اشوفك هنا
شفت مريم استغلت الفرصة وراحت تركض ودخلت البيت وهي تبكي .. نزلت نظري لعمي وانا انفاسي سريعة من القهر
وهمست ارد عليه وقلبي مليان غبن
رايد بهمس = هين .. الله يحرق قلبك بعيالك ... هين هين والله لأخلي بندر يشوف اللي انا شفته
صارخ عمي علي مرة ثانية ونزلت من الجدار مابغى اسمع صوته
نزلت على سيارة عمي ... وبعدها نزلت على الارض .. ووقفت وانا اتذكر شكل مريم ... اكيد عمي دخل البيت وراها بيكمل عليها
طلعت دموعي منقهر من عجزي .. سندت ظهري على الجدار بيأس وحطيت يدي على صدري احس بكتمة من القهر ...
مريم تعبت منهم .. تحتريني اتوظف وترتاح من هالعذاب ... بس انا ضعيف ... بزر ... جلست بالارض بيأس وغطيت وجهي بركبي وبكيت اكثر
ياليتني مت ... ياليتني كنت بدال ريان
ودي اتوطف .. ودي اخذ اخواتي ونرجع للرياض
والله لوريك ياعمي .. والله لاذبحك ... والله لذوق بندر اللي ذوقتني .. والله لاذبحك ياكلب
رفعت راسي وقمت واقف بسرعة و منقهر وتلفتت ادور أي شي .. أي شي يبرد كبدي ,,, شفت حصاه بعيدة شوي ورحت اركض واخذتها وحذفتها بدون تفكير على سيارة عمي الجيب وكسرت القزازة الامامية
وصارخت باعلى صوتي
رايد = اوريييييييييييييييييييييييييييك
وقفت بنص الحارة وانا اشوف سيارة عمي وقزازها المتكسر مدري وش اسوي .. ودي اقهره مثل ماقهرني .. نزلت راسي بحزن وتوجهت لسيارة عمر وركبت بمكان الراكب وانا افكر بمريم
وش تسوي مريم الحين .. طالعت ساعة السيارة 11
اخاف الى الحين يضربها ... كيف الحين بتروح معي للمستشفى مثل ما اتفقنا
ضربت راسي منقهر عدة مرات
رايد = وش تسوي وش تسوي
وبكيت .. عجزت اسكت احاول ماابكي بس غصب عني مو بيدي ... احاول اهدي نفسي.. بس كل ماتذكرت مريم بكيت
حطيت يدي على صدري احس بكتمة
اخذت نفس احاول اهدي نفسي ومسحت دموعي بيدي ... نزلت من السيارة ورحت اضرب باب بيت جد عمر عشان يطلعلي عمر ونرجع للبيت
* عمر *
واقف قدام المراية وافك الشاش اللي براسي .. ضايقـني .. نزلت الشاش ونزلت اللزقة اللي على الخياطة و زفرت بضيق .. اففففف الله يخسهم محلقين جزء بسيط من شعري عشان الخياطة .. جاي الجرح بالطول من الجهه اليمين ... من بداية منابت الشعر لين نص جبهتي بالطول ...
رجعت اللزقة ورجعت الف الشاش مرة ثانية على راسي ... ارجع الشاش على راسي احسن .. على الاقل استر اللي محلقينه
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك