رواية غرام وانتقام -3
عبدالرحمن بحزن قال لدكتور كل شي من وفاة امها وقو علاقتها فيها كل شي قاله بالتفصل لين تبرعهم باغراض امها
تاثر الدكتور وحزن على حالت هند ياخ عبدالرحمن مايكفي القدر حرمها من امها تكملون عليها وتحرمونها من الشيئ الي يذكرها فيها
لازم توفرون لها اسباب الراحه لا تنتكس حالتها ما ضمن لكم وش راح يصير لها
رجعو لها الكرسي طلبها جد بسيط مادامها تنازلت عن كل اغراض امها هذا يدل ان علاقتها بالكرسي الي كانت تجلس عليه امها علاقه قويه فهو يخفف عنها حرمانها من امها
عبدالرحمن وهو بقمه الحزن والهم على حال هند الحساسه والي صار لها
عبدالرحمن ان شاء الله برجع لها كرسي امها
متى نقدر ناخذها للبيت
الدكتور بكره بعد مانتطمن على صحتها والحين تقدرون تمشون
بيت عبدالرحمن
خالد يبيكي ويشاهق بكاء يقطع القلب ويقول هند ماتت والشغاله تحاول تهدي فيه لكن كل ماله والبكاء يزيد وهو يقول انا شفتها ميته
رجع عبدالرحمن مع نوره ودخلو البيت وانفجعو من شكل خالد
ركضت له نوره حبيبي اش فيك
خالد ماما هند ماتت صح
ضمته نوره على صدرها بقوه بتهديه
نوره لا حبيبي بس شوي تعبانه بكره الصباح بتطلع وبتروح مع ابوك اطلعونها ولا تنسى تشتري لها ورد
خالد طيب
قالت نوره روح نام بكره الصباح بقومك علشان ماتتاخر على هند
طلع خالد غرفته بعد ماطمنته امه عنها وراح لغرفته ولبس بجامته ونام
تحت عند عبدالرحمن ونوره
عبدالرحمن نوره وين اغراض ساره
نوره بحزن بالمستودع
عبدالرحمن طلعي الكرسي ورجعيه لغرفتها ابي بكره لطلعت تلقاه قدامها
نوره بس
عبدالرحمن لابس ولا شي هذا كلام الدكتور ولا هند بتضيع منا
نوره بسم الله عليها سو المناسب اهم شي عندنا هند كنت مسويه ذا الشي علشان مصلحتها مضنينت اني بسبب لها مشكله وربي ياعبدالرحمن انها اغلى من عيالي
عبدالرحمن عارف يا لغاليه وعارف ان همك مصلحتها الله يخليك لنا
نوره ويخليك لنا يله نطلع ننام بنام دايخه من قومة الصبح
طلعو فوق ودخلوا لغرفه ومن الارهاق والتعب نامو
يتبع
اليوم الثاني
الصباح بدري قام خالد من الحماس دخل الحمام اخذ شور وغير ملابسه وراح غرفته ابوه وطق عليهم الباب
في داخل الغرفة نوره وعبدالرحمن نايمين استغربو من الطق قامت نوره تفتح الباب استغربت ان خالد لابس وكاشخ طالعت بالساعه الي على الجدار توها الساعه خمس الفجر
نوره اش عندك خلود ماصحينا بدري
خالد بروح للمستشفى انطلع هنوده
نوره حبيبي بدري المستشفى مسكر مايفتحون الا ثمان
خالد يوووووووه ماما انا من اليوم قايم علشان هنوده قومي بابا
نوره ولا يهمك خلود انزل ا ذا جت الساعه 7 اقوم ابوك الحين يتنام يا تلعب بغرفتك لان ابوك تعبان وراه شغل اليوم بالمكتب
خالد بخيبة امل طيب بروح لغرفتي
الساعه 8 قومت نوره عبدالرحمن لان وقت الزياره
نوره حبيبي قوم تاخرت على هند
عبدالرحمن ممممممممم
نوره من الساعه 5 وخالد صاحي ينتظرك متحمس لزيارة هند
قام عبدالرحمن دخل الحمام اخذ شور وجهزت له نوره ملابسه
انزلت الصاله لقيت خالد ينتظر على جمر
خالد ماما بابا وين تاخرنا
نوره خلودي بابا بالحمام شوي ونازل افطرت
خالد ايه افطرت
نوره وينه اخوك محمد
خالد نايم مو راضي يصحى
نزلت المربيه ومعها فهودي وغاده ماسكه كل واحد بيد
المربيه مدام نوره غاده ما نامت من البارح يمكن ساعه وحده الي نامتهم من اليوم تبكي مو راضيه تسكت متعوده على هند و تعرف لها
نوره طيب لما شفتيها مانامت ليش ماتصلتي علي وخبرتيني
المربيه اسفه مدام خفت يكون فيه ازعاج
اخذت نوره غاده وضمتها لصدرها وهي تبكي خذتها وحاولت تاكلها لكن ماهي راضيه
لما شاف فهد غاده مع امه ركض لامه غيران من غاده اخذته نوره وحطت كل وحد بجهه من حضنها
نزل عبدالرحمن اول ما شافه خالد استقبله بابا ياله تاخرنا
عبدالرحمن انتظر خلني افطر وبشوف امك
خالد يووووه بابا بطول علي
تركه عبدالرحمن ودخل المطبخ ولقى نوره جالسه بحضنها غاده وفهد وغاده تبكي نزل راسه وباس نوره على خدها وباس غاده وضمها وباس فهد وضمه
نوره حبيبي غاده امس تبكي باليل مانامت لانها متعوده على وجود هند
عبدالرحمن الله يعينها هند حملت مسئوليه اكبر من عمرها
دخل خالد المطبخ بابا يله تاخرنا
عبدالرحمن جالس اشرب كافي باقي
شوي واخلصه صاير بلشه نشبت بحلقي
خالد انا انتظرك عند السياره لاتتاخرعلي
عبدالرحمن حاضر عمي خالد
خالد طلع ما سمع كلام ابوه لانه مستعجل
خلص عبدالرحمن قهوته ولحق خالد وهو طالع سالته نوره بتتغداء عندنا
عبدالرحمن ماضن وراي اشغال كثيره بتغداء بمطعم الشركه
نوره انتبه على نفسك حبيبي وسوق على مهلك
بالمستشفى
هند صاحيه طفشت من المستشفى دخل عليها الدكتور وفحصها وشافها تحسنت
هند دكتور فك المغذي طفشانه باتحرك
طلب الدكتور من الممرضه تفك المغدي
وعلى طول قامت وراحت لشباك الغرفه تتفرج على الرايحين والجاين وهي تبكي سمع الدكتور شهقاتها وجاء من وراها وحط يده على كتفها
الدكتور بحزن بابا ليش تبكين ترى كثر البكاء هو الي جابك عندنا بالمستشفى شكلك تبين تبقين عندنا
التفتت هند لدكتور ومسحت دموعها ووجهها احمر وعيونه منتفخه من كثر البكاء
هند مابي ابكي انا مشتاقه لماما من يمسح شعري اذا بنام من اقوله الي يصير معي بالمدرسه صرت يتيمه وصارت تشاهق من البكاء
الدكتور ضمها لصدره وغصب عنه تاثر من كلامها اوجعه قلبه عليها لانه يعرف ضروفها الي قالها خالها
الدكتور هنود انتي كذا تزعلين الناس الي يحبونك خالك يحبك وزوجته
امس يوم جيتي كانو كثيرخايفين عليك كانو بينامون عندك انا طلبت منهم يرجعون
على كلام الدكتور دخل خالد معه باقة ورد كبيره وعبدالرحمن معه علبة حلاو ودبدوب
الدكتور شفتي ياهنود انهم يحبونك ولا يستغنون عنك
الله شوفي الورد اش حلوه ابيك تعطيني شكولاته ولا انتي بخيله
ابتسمت هند وباسها خالها وضمها وقال لها
عبدالرحمن هنوده خوفتيني عليك وكرسي امك رجعناه
فرحت وبان على وجهها الفرح
الدكتور وين حلاوتي هند
اخذت هند علبه الحلاوه وفتحت العلبه وقدمتها لدكتور اخذ قطعه
الدكتور الحين تقدرون تاخذونها معكم لانها صارت تسمع الكلام
وياليت تسوي الي قلت عليه امس اهم شي الاهتمام بحالتها النفسية
طلعت هند مع خالها وطلبت من خالها يمر سوبرماركت بتشتري اغراض لغاده
اول مادخلت البيت دخلت تدور على غاده اول ماشافتها غاده ركضت لهند عطتها هند بعض الاغراض لانها شاريه اغرض لفهد والعاب له ولغاده
شالت هند غاده وضمتها وجلست معها على الكنبه شويات الا غاده ناااااايمه لانها حست بحنان هند
دخل عليهم عبدالرحمن ونوره وشافو غاده نايمه بحضن اختها
نوره يقلبي ياغاده فرحانه باختها على طول نامت وانا من الصباح احاول انومها ماهي راضية
عبدالرحمن الله يخليهم لبعض ويحنن قلوبهن على بعض
لما شافتها هند غاطه بالنوم دخلتها غرفتها الي كانت لامها سابق لانها انتقلت فيها من ايام العزاء حطت غاده بسريرها التفتت بتطلع شافت كرسي امها صارت تناقز من الفرحه نوره رجعت الكرسي الصباح
طلعت لهم هند في الصاله ركضت ورمت نفسها في حضن نوره وهي مبسوطه
هند خالتووووو انا احبك
نوره عرفة سبب فرحت هند ان السبب وجود كرسي امها ولامت نفسها كيف تجرت وحرمتها من شي تحبه يذكرها بامها
نوره وانا احبك كثيرر ياهنوده
عبدالرحمن هنوده تحبين خالتو وماتحبين خالو
هند احبكم ثنيناتكم
هند خالتو انا جوعانه
نوره ماعاش الجوع مسويه لك الاكل الي تحبينه روحي بدلي وانزلي بيكون الغداء جاهز
ترى غاده بتغداء عندنا انا عازمتها
هند بفرح وناسه
نوره لا طولين جايه بالطريق
هند طيب
جت ام بسام ومعها غاده وبسام على طول طلع عند خالد وغاده جلست جنب امها تنتظر هند تنزل
في غرفة ساره
خذت شور ولبست فستان نعومي لونه وردي وشبشب وردي وشعرها طلبت من الشغاله تسوي لها ظفيرتنين وراء اذنها وتركت قصتها نازله على عيونها
نزلت هند تحت لقيت غاده جالسه بصاله مع امها
اول مادخلت سلمت على ام بسام وسلمت على غادة
نادتهم الشغاله على الغداء تغدو واخذت هند غاده لغرفتها كانت غاده الصغيره معهن بالغرفه اخذت هند لاختها غداء ودخلته بالغرفه وغدتها وهي تسولف مع غاده
شغلت لها توم جيري وصارت اطالع فيه لين نامت
جلست غاده عندهم لين الساعه 12 لان اليوم خميس وبكره ايجازات
نقلت لكم بارتات المرحله الاولى كامل من حياة البطله وهي صغيره والبارتات الجايه لها وهي كبيره
( بنظري ان المرحله الاولى كانت كثير بارده لكن المرحله الثانيه قمه بتشويق والاثاره )
يتبع
مرت السنين ووراها سنين وكبرت هند وكبر معها حقدها لابوها وتتمنى يجي اليوم الي تنتقم منه
أكرهـك وأكـره كـل مـن جـاب طاريـك
وأكــره الدنـيـا يــوم تـحـلا لــك
أكـره اسمـك وأكـره أرض(ن) تحتويـك
روح عسـى مـا يــوم يصـفـا لــك
الله لايسهـل دربـك وتتعثـر بخطـاويـك
مثل ماصعـبـت دربــي بأفـعـالـك
ربـي يكفينـي شـر مـكـرك وبـلاويـك
يالـلـي ضيعتـنـي بليـلـك الـحـالـك
لـو تبـوس راسـي والله مـا اراعـيـك
بــردك محـتـرق وخـايـب(ن) فـالـك
أنـا كرامـتـي اكـبـر مــن مبـاديـك
وعـزة نفسـي ماتسمـح لــي إذلالــك
أدعـي علـيـك يخـيـب الله رجـاويـك
وكـل مـن تحبـه يغيـره عليـك عذالـك
قلبـي يصـرخ بعالـي الحـس مـا أبيـك
كـمـل طريـقـك بصحـبـة أنـذالــك
فـارق..لاتـجـيـنـي ولا أجــيـــك
كرهـت شوفـك وأكـره أقـعـد قبـالـك
أعزي كل قلـب(ن) صـار اليـوم يغليـك
واقولـه زهـب أكفانـك المـوت جـالـك
مثلـت لـي حـبـك ووفــاك وتفانـيـك
وانتهـى فلمـك بمـوت كــل أبطـالـك
جريمـة ارتكبتهـا بحقـي ربـي يجازيـك
على غدرك يغدربك كل من تطلبـه وصالـك
حطمـت أحلامـي عسـى تتحطـم أمانيـك
وماتهنا مع كل حبيب(ن) م بعـدي غدالـك
هنت قلبي..بس كرامتـي تمسهـا ماأخليـك
لهينك وأأدبك ليـن تنـدم وتغيـر أحوالـك
تظن كل من شافك يحبـك وميـت(ن) فيـك
(هــه)... مجنـون وغـرورك زاد خـبـالـك
هند 26 من اجمل البنات جمالها خرافي وجهها ابيض صافي عيونها حاده ممزوجه بنظرة التحدي والكبرياء والثقه والحزن
خشمها صغير واقف فمها صغير منفوخ لونه وردي بخدها غمازتين شعرها طويل وكثيف يوصل لتحت فخذها ناعم من كثر نعومته ماتمسكه البكله قاصه شعرهامن قدام مدرج ومن وراء على طوله لونه على طبيعته بني فاتح
تبهر كل من شافها كلها جاذبيه نااادر ماتنشاف ضحكتها لان وجهها كله حزن والم
جسمها ينطق نعومه وانوثه طاغيةوسط لاهي طويله ولا قصيره
شخصيتها قويه وجديه وجودهاطاغي تجبرالي قدامهايحترمهاويخاف منها فيها قساوة وجبروت مع الي يستاهل وحنونه وكريمه مع الي يستاهل تساعدماترد احد يبي منه مساعده
تميل لتواضع والغرور في نفس الوقت شخصيته قياديه مدبره
انسانه عامله ما تهتم بمظهرها كل لبسها رسمي ماتعرف شي اسمه مكياج دايما تكون على طبيعتها
معها دكتوراة في اداره الاعمال ماخذتها من بريطانيا باقصر مده لذكائها
سلمها خالها شركاتها وفي خلال سنوات قلبلة شركاتها كبرت وصارت معروفه لها فروع بالمملكه وحاليا فاتحه فرع ببريطانيا ماسك ادارته ولد خالها فواز لانه مستقر مع اهله هناك تسافر في السنه لها مره او مرتين تجلس شهر تطمن فيها على شركتها وبعده ترجع ويكون اخوها خالد او محمد معها
وبفضلها صار لشركاتها سمعه طيبه وتفكر تفتح فرع لشركتها بدبي لكنه مشروع مؤجل
فتحت فرع من فروع شركتها خاص لتسليف ومساعدة الشركات المنهاره الي تحتاج للمساعده تسلفهم بدون ارباح ربويه
صارت بمده قصيره اكبر مليارديره سعوديه تلاحقها وسائل الاعلام لان مشاريعها انتشرت بمده قياسيه
اعجب خالها بذكائها وصار يستشيرها بامور شركته
علاقتها قويه بخالد مايتفرقون ابد بفضله تعلمت السباحه والرمايه وركوب الخيل
ولما كانت في بريطانيا اخذت دروس في الرياضات القتاليه والدفاع عن النفس
غاده عمرها 19 جميله جمالها يختلف عن جمال هند جمالها طفولي كلها نعومه ورقه ودلع وجذابه بشكل كبير
شعرها لين كتوفها صابغته بني فاتح بخصل ثلجيه وزادها جمال فوق جمالها تدرس بالجامعه بثاني سنه طب
طيبه حنونه متعلقه بهند كثير تعتبرها امها
ما تقول لهند الا ماماتي لكن اذا زعلت وعصبت متهور افعالها تسبق تفكيرها
عائلة عبدالرحمن
عبدالرحمن عمره 60 شخصيته قويه له هيبه ورزه ووقار شخصيته تفرض على الكل يحترمه علاقته بهند كبيره وعند المشاكل تلجاء له وهو الوحيد الي يشوف دموعها وضعفها
نوره عمرها50طيبه وحنووونه ربت بيت تحب هند وغاده كانهم بناتها وهند تحبها وتقدرها وتحترمها كانها امها
خالد عمره 26 جميل وسيم اسمراني فيه شبه كبير من ابوه شعره قصير نازل لرقبته بقصه رجوليه ملامحه حاده شنب وعوارض جسمه رياضي لانه مداوم على الرمايه والسباحه وركوب الخيل دمه خفيف
نقطة ضعفه يشوف هند متضايقه عنده الحاسه السادسه يحس فيها قبل لا تشكي يحبها اكثر من اخوانه الباقين
درس نفس تخصص هند ومعه دكتوراه باداره الاعمال يشتغل مع هند بشركتها وبكل مكان معها ويحضر الاجتماعات ويسافر معها وهي محافظه على حجابها الكامل
هند صديقه خالد وخالد صديق هند اسرارهم كلها عند بعض هند ماتكون بشخصيتها الطبيعه الا قدامه
محمد عمره 23 حبوب طيوب يشبه خالد شخصيته مسالمه يستشير هند ببعض اموره الخاصه لانه يثق برايها يحترم هند ويحبها ويعاملها كام مو اخت فتحت هند له مكتب محاماه
فهد عمره 19 اكبر من غاده بشهرين علاقته بهند قويه ويعتبرها امه الثانيه يدرس بابريطانيا سياسه وعلوم اقتصاديه وهند تحبه وتعامله مثل غاده
عدنان اخر العنقود عمره 15 ثالث متوسط دلوع البيت لسانه طويل مناقر مع غاده يخاف من هند
عائلة ابو بسام
ابو بسام عمره 60 شخصيه طيب وحنون مع عياله خفيفة دم علاقته قويه مع عبدالرحمن كان يتمنى يربط علاقتهم مع بعض بنسب لكن ماصار لانه خطب هند لبسام وهند رفضته وقالت تعتبره مثل خالد
ام بسام عمرها 50 حبوبه تحب هند كانت تتمناها لبسام لانها تعرف ان بسام يحبها لكن على قولتها الزواج قسمه ونصيب
بسام عمره 29 مملوح كله رجوله يحب هند من يومه صغير انصدم من رفضها له لكن امه اصرت تزوجه بنت اختها
نجلاء حبوبه وطيبه قدرت تكسب قلب بسام والحين حامل بشهرها الرابع بدايه زواجهم كانت حياتهم كلها مشاكل وسكنت عند اهله لكن الحين ببيت الحالهم
غاده عمرها 26 تدرس تخصص طب نفس
صديقة هند الروح بالروح جميله لكنها سمرا كانها مكسيكه شعرها طبيعته كيري كشيخه وتهتم بالبس والموضه عكس هند وكشختها زادتها جمال فوق جمالها جسمها كله اغراء وفتنه
تحب خالد اخو هند وهو يبادله نفس الشعور لكن كل واحد يجهل مشاعر الثاني
غلا عمرها 7 سنوات اول ابتدائي دلوعة البيت مخربها ابو بسام بدلع كل اومرها مستجابها تحاول تقلد اختها بكل شي
عائلة راشد
ام راشد وضحى عمرها 92 ساكنه بالديره تبعد عن الرياض 4 ساعات
مريم خالة راشد ام موضي عمرها 90 ساكنه بالديره مع اختها
قاطعهن راشد بسبب زوجته موضي لانها مانعته من زيارتهن
جاسم صار مسئول عنهن وفر لهن خدامه وسواق وممرضه اذا اتعبن بغيابه
وصى عليهم جارهم ابو مطلق وولده يطلون عليهن بعد فتره وفتره لانه مشغول باشغاله بالرياض والاجازات يقضيها عندهن
يحبن جاسم ودايما يدعن له ومبلشاته بالزواج وكل رده ان شاء الله وبسرعه ينسن بسبب الكبر
راشد عمره 60 الي يشوفه يعطيه اكبر من عمره بسبب الضغط والسكر
رجع لقصر هند بعد ماتطمن ان عبدالرحمن نسى الي صار خسر امواله بسبب طلبات زوجته الكثيره
شركته خسرانه والبيت حاجز عليه البنك
مخبي على اهله ان متزوج وعنده بنت ماقال لهم خايف يحرمونه من بنت عمه لي يحبها ومحجوزه له
موضي الوحيده الي تدري بموضع زواجه وبنته و مخبيه عن الكل من مصلحتها ماحد يدري علشان مايشاركونها براشد
راشد لما تزوج ساره قال لاهلها ان اهله كلهم ميتين خاف من اهله يوصلون شي لساره ويخرب مخططه
موضي زوجته وبنت عمه وخالته عمرها 40 مهتمه بنفسها جمالها عادي وواضح عليها الكبر
طماعه وانانيه وتحب الفلوس وتتمنى الحصول عليها ايا كانت الطريقه ( هي السبب بضياع اموال راشد )
قاطعه بامها ما تزورها لان امها مو راضيه بفعايلها مع راشد وتنصحها
طلبت من راشد يقطع بامه تبيه يعيش لها لحالها ( علشان فلوسه )
من بعد الحادث استقوت اكثرعليه مايقدر يرفض لها طلب
عيال اخوه ويصيرون عيال اخت موضي
جاسم عمره 35 طبيب جراح تخصص جراحة قلب لكنه ترك الطب بسبب وفاة طفل كان مريض بالقلب وتوفي بين ايدينه وهو يسوي العمليه تاثر كثير لانها اول عمليه يفشل فيها تعقد وترك الطب
شخصيته قويه جميل ووسيم بشرته حنطيه فيه حبة خال في خذه محليته شنبه خفيف جسمه كله رجوله له هيبه ورزه
ماتزوج لانه مايبي يربط نفسه بزوجه تغثه يكره الحريم بسبب الي يشوفه من خالته لعمه لانه عارف ان خالته استغلاليه وهو ساكن معهم بالبيت وعلاقته قويه مع عمه
فيصل عمره 25 طيار اجمل من جاسم قريب من اخوه يعتبره صديقه دايما سهراتهم مع بعض ربع جاسم هم ربع فيصل سهراتهم وطلعتهم مع بعض عصبي اذا انفعل مايتحكم باعصابه مايخبي شي عن اخوه ونفس الشي اخوه
الجوهره عمرها 19 صديقة غاده ومعها بنفس الجامعه ونفس التخصص طب اسنان صديقتها الوحيده الجوهره وفيصل ساكنين عند امهم بقصرهم لانهم يعتبرون اغنياء لكن اقل مستوى من هند وهم مليونيره
عائلة ابو نواف
ابو نواف عمره 70صديق لعبد الرحمن ولابو بسام
زوجته فاطمه عمرها 60 اخت ام بسام
نواف عمره 35 صديق جاسم الروح بالروح يشتغل طبيب جراحه قلب بمستشفى خاص لابوه كان جاسم يشتغل معه بنفس المستشفى لكن ترك الطب
نجلا عمرها 23 جميلة وجذابه تصير زوجه بسام
صلاح عمره 19 ثاني سنه جامعه علوم سياسيه يدرس مع فهد بابريطانيا
في بيت ابو عبدالرحمن
في غرفة هند
كرسي امها موجود بالغرفه لازم قبل ماتنام تتكلم مع الكرسي وكانها تتكلم مع امها
قامت هند على صوت اذان الفجر دخلت الحمام توضت اخذت سجاتها وصلت الفجر وكانت غاده نايمه بحضنها كالعاده ما تنام الا بحضنها
قربت منها تبوسها على راسها غدويه حبيبتي ماما قومي صلي الفجر بتطلع الشمس
غاده بنعاس ماما بنام شوي واقوم روحي قومي خالد ومحمد وبعدين تعالي تلقيني قايمه
هند خالتي وخالي بيقومنهم لانهم قايمين قبلي وتلقينهم راحوا للمسجد ووراك جامعه يادوبك تستعدين
قامت غاده ودخلت الحمام وتوضت وصلت وبعد الصلاه ضمت هند
غاده ماما تعبانه بغيب اليوم ماشبعت نوم
هند بعصبية غدويه لازم كل يوم على هالموال انتي تعرفين رايي بموضوع الغياب مافي ولا عاد اسمعك تطرين الغياب الطب مو سهل ابيك ترفعين راسي ويقولون هند عرفت تربي
غاده خلاص ماماتي لا تزعلين مني توبه
معاد اطري الغياب ماماتي وش رايك قبل دوامك والجامعه نتجهز ونطلع نفطر برا
هند قرصتها بذنها خفيف طيب بالبس وانتي البسي وبخلي خالد هالمره يودينا تعرفيني لازم الطلعات هذي معي خالد
غاده انتي وخلود كانكم توئم سونامي ماتنفصلون
ضربتها على راسها هند قولي ماشاءالله
غاده ههههههههههه ماشاء الله عيني بارده
هند بروح اقول لخلود فيما تتجهزين وتاخذين شور وبعدك بدخل اخذ شور على السريع بالبس أي شي القاه قدامي
غاده بحب ماماتي ميته اشوفك بالمكياج اش رايك احط لك الحين قبل ماتروحين لشركه
هند لا مخليه المكياج لك بشركه تصير اجتماعات بحضور رجال ونقابي علي مرتاحه لا اشوف احد ولا احد يشوفني
دخلت غاده الحمام تاخذ شور وتسعد للجامعه
طلعت هند لغرفة خالد مالقته موجود سمعت صوته على الدرج
هند خلود انا بطلع مع غاده نفطر بمطعم وانت بتوصلنا وعازمتك تفطر معنا تعرفني ماحب الطلعات هذي من غيرك
خالد كم مره اقولك لاتقولين خلود شنب وعوارض وتاليتها خلود شكلي بطيح بكبد اهلي بسبتك
هند ههههههههههه لا تطمن مراح اطيح بكبد اهلك على ضمانتي فيه وحده دعت عليها امها وحبتك
خالد الا داعيه لها امها ياله تجهزي خلي السوالف عنك
دخل خالد غرفته ودخلت غرفتها اول مادخلت غرفتها الا غاده طالعة من الحمام
دخلت واخذت شور طلعت من الحمام لقت غاده لابسه تنوره جنز وبلوزه بيضاء لبس الجامعه واقفه قدام التسريحه تستشور شعرها
فتحت دولابها وطلعت بدله رسميه لونه كحلي عباره عن جكيت وبنطلون ولبست بلوزه وردي تحت الجكيت بيحيث طالع قلابي القميص فوق الجكيت وجزمه واطيه لونها كحلي والشعر جففته ولمته بعضاضه لونه وردي
هند غاده انا خلصت انتي للحين ماخلصتي
غاده باقي احط قلوس
خلصت غاده وكان مكياجها ناعم مره علشان الجامعه
طلعو من الغرفة لقو خالد ونوره بالصاله
هند وغاده صباح الخير لاغلى خاله
نوره صبح النور ماشاء الله وش هالنشاط
هند عازمتهم على الفطور قبل الدومات
غاده خالتو وينه خالو ماشوفه
نوره ياحبيبتي خالك نايم دوامه 8 والساعه الحين 6
هند خاله اذا جيت من الشركه فيه موضوع ضروري ابي اكلمك فيه
نوره بخوف عسى خير لا تعلقيني وتطلعين تعرفيني احاتي وافكر كثير
قربت منها وباستها على راسها هند لا تحاتين يالغاليه ان شاء الله خير
بحاول اطلع بدري علشان ماطولين اتحاتين ولازم محمد يكون موجود هو وخالد
نوره ان شاء الله بس وانا امك لا طولين علي
مسكت يدها وباستها هند ماعاش الي يضايقك
طلعت هند وخالد وغاده لمطعم جلسو على طاوله اخذو المنيوم اختارت هند كرسون بالزبده وكبتشينو
وغاده طلبت بانك كيك وعصير برتقال
وخالد طلب كرسون جبن وعصير برتقال
خلصو فطور اطلعو من المطعم ركبو السياره وصلو غادة للجامعه
وهند وخالد كملو طريقهم لشركه والجو بالسياره سوالف مر الوقت محسو فيه الا لما وصلو
دخلوا لشركه كان الوقت بدري باقي ساعه على الدوامات
دخلت هند مكتبها ودخل خالد معها نزلت عباتها ونقابها وعلقتها على علاقة ملابس بالمكتب محطوطه وراء مكتبها
كان مكتبها الجدران كلها خشب عودي والمكتب كان قمه بالفخامه وفيه غرفة داخليه خاصه للاجتماعات فيها طاوله كبيره للاجتماعات بنفس ديكور غرفتها لها بابين باب من مكتب هند وباب من برا وبجانب المكتب حمام صغير خاص لهند
عندها سكرتيره لبنانيه تحدد مواعيد الاجتماعات والصفقات وعشاء العمل الي تحضرها غالبا مع خالها لان له قدره وقيمته بالسوق
هند تحضر الاجتماعات بحجابها الكامل من عباه ساتره ونقاب ياله تبان عيونها وبحضور محرم اغلب الاحيان خالد اوخالها كل التجار يحبون التعامل معها لامانتها والتزامها بكلمتها بالسوق ولا ترضى بالغلط والصفقات المشبوهه ترفضها وبقوه ولا يهمها احد
بالجامعه
جالسه غاده مع الجوهره في كفتريا الجامعه سوالف وضحك
الجوهره غاده انا مسويه عزيمه بعد اسبوع بنات خالتي بيجون من جده ودايما اتكلم عنك عندهم وابيهم يشوفونك انتي صديقتي الوحيده
غاده ماقدر اوعدك ماضن ان ماماتي ترضى اني احضر الحفلات هذي
الجوهره خليها تجي معك وتتعرف على امي انا متاكده بيصرن صديقات
غاده ماضن ان ماماتي تحضر لانها ماتحب الاجتماعات هذي ماماتي كل اهتماماتها بالشغل لكن بحاول مع خالتي نوره تجي معي
الجوهره طيب مو تقولين خالتي رفضت
غاده لا اضمن موافقت خالتي اولا لانها اجتماعية وثانيا ماتحب ترفض لي طلب
الجوهره خلاص انتظرك
غاده يله بسرعه تاخرنا على المحاضره
في بيت بسام
نجلا حبيبي قوم تاخرت بالنوم بتتاخر عن الدوام
بسام غمز بعينه كله منك البارح سهرتيني مخليني انام بس احلى سهر سحبها لحضنه وضمها اليوم ماني بمداوم باخذ اجازه من ابوي
نجلاء حمرت خدودها بسام خف علي ترى استحي
بسام فديت الي يستحون انا وش الي مجنني غير الحياء والخدود المحمره ضمها بقوه
نجلا خف شوي على ولدك خنقته
بسام متى يجي واخذ راحتي على الاخر
نجلا حبيبي حبيبي اش رايك نعزم خالتي وبيت ابو خالد واهلي للعشاء الليله عندنا لان من يوم سكنت البيت ماجوني اهلك الا مره وحده
بسام الي تشوفينه بس خليها حريم تعب عليك لما يكون معاهم رجال بعزمهم بستراحتنا
وبعشيهم هناك لانك تعرفين الشياب لازم عشاهم بدري وينامون بدري
نجلاء خلاص شورتك وهداية الله
في بيت عبدالرحمن
نوره جالسه على نار تنتظر هند الساعه 10 وللحين ماجت وكلمت محمد بيه يجي على طلب هند وصل وللحين ماجت
نوره محمد كلم اختك شوف وينها تاخر
محمد يمه هدي اعصابك الله يهداها هند المفروض تقولك على طول ماتخليك تحاتين
نوره بعد قلبي قلبها ماهون عليها
سمعت الباب يفتح دخلت هند ومعها خالد
هند يالغاليه اسفه كان عندي شغل ضروري وخلصته وجيتك طيران
نوره يمه ادخلي بالموضوع من اليوم وانا على نار وانا انتظرك
هند يمه ابي اسالك خالي بدر وينه
دمعت عيونها يوم ذكرت اخوها بدر لانها اصغر منها بسنه وعلاقتها معه قويه اكثر من اخوانها الباقين
نوره يمك من سنتين منقطعه عنا اخباره اخواني ما تركو مكان ماسالو عنه وللحين ماندري وين ارضيه امي ماتت بحسرتها عليه وجلست تبكي
سلمت على راسها يالغاليه لا تبكين انا مافتحت الموضوع علشان اشوف دموعك ومسحت دموع نوره بيدها
نوره وش الي جاب طاري بدر بالموضوع
هند لاني عرفت مكانه
نوره بحماس وينه فيه وين غايب كل هالغيبه
هند يالغالية خالي بدر محبوس بحق خاص
نوره كيف حق خاص
هند خالي بدر ذابح واحد بالمسدس بالخطا لكن اهل الميت رفضو يتنازلون كنت بتدخل واحل المشكله وطلع خالي طلعت السالفه معقده تحتاج لخوالي
نوره كيف
هند لازم جاها من كبار العايله يروحون لاهل
المتوفي ويشوفون طلاباتهم وان شاء الله يسقطون حقهم لو نضطر ندفع ثمن دم ولدهم
محمد انا بحاول اصير المحامي لخالي لان ان شاء الله ضامن القضيه اذا ماتنازلو لانه قتل بالخطا والقتل الخطا يتطلب ديه
هند الحين لازم خوالي يدرون وهذا عليك يالغاليه تعلمينهم لانهم هم الي بيجمعون الجاهه
نوره ان شاء الله الحين بروح لهم وبقول لهم
هند يالغاليه وسعي صدرك وطمني اهل خالي بدر وانه ان شاء الله راجع لهم
خالي بدر ذبحته وحشت السجن محدن درى عنه ولا احد زاره لازم يزورونه ماحتاج من يقويه بمصيبته يكفي سنتين بالحاله
نوره سلمت على راس هند الله لا يحرمني منك ولله وعرفت اربي
هند بحب اذا تبيني اروح معك انا حاضره والي تبينه مني بسويه انتي تامرين وانا انفذ
نوره ياليت وانا امك اتشجع بوجودك معي
هند ولا يهمك يالغاليه العصر اروح معك لبيت خالي سعود
في بيت راشد
راشد وجاسم وموضي جالسين يتغدون
راشد جاسم وانا ابوك سمعت عن شركه هند الفهد
جاسم ايه ياعمي اكبر الشركات بالخليج صاحبتها المليارديره هند
راشد سمعت انها تعطي سلفية لشركات المبتدئة وتساعد الشركات الي طايحه بالسوق والسداد بدون ربا
جاسم سمعت وصديقي نواف ابوه يعرفهم وله علاقة كبيره بشركتهم
راشد انا ناوي اروح لشركتهم اخذ منها سلفيه اقوم فيها شركتي وتصير احسن من اول
جاسم مدري ياعمي اخاف ماتقدر تسدد القرض وتحمل على نفسك ديون وتتطورط
راشد انا خسران خسران مراح تضرني المحاوله اليوم كلم شركتها واحجز موعد نقابلها فيه والي سمعته ماترفض احد
جاسم ان شاء الله عندك رقمهم
راشد ايه ماخذ من واحد مساعدته هند
جاسم بكلمها الحين بحاول يكون الموعد بكره
راشد خير البر عاجله
اتصل جاسم على مكتب هند ردت السكرتيره وطلبت منه ينتظر على التلفون
في الشركه
بعد ماقالت لخالتها سالفة خالها رجعت لشركه مع خالد
دخلت السكرتيره على هند السكرتيره فيه مكالمه من واحد اسمه جاسم يبي موعد علشان يقابلك يبي سلفيه علشان شركته
هند حولي لي المكالمه
السكرتيره تكلم جاسم
السكرتيره اخ جاسم لحظه احول المكالمه
جاسم طيب انا انتظر
هند الو مرحبا
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك