رواية حياتي عذاب -16
مساعد: بس مو بالزواج يا جدتي..." نزلت عليهم منيرة وسمعت أخر جمله قالها"...
منيرة: وش فيه الزواج يا مساعد ترى وضعك مو عاجبني...
مساعد بملل: بس عاجبني يا يمه..
أم عبد الرحمن: لا مو عاجبك أنت تكابر وأنا جدتك يا مساعد لك حق أن تشوف حياتك والحياة ما تتوقف على وفاة المرحومة..
مساعد بضيق: الله يرحمها...
منيرة تمسك يده: عشاني يا يمه وعشان هالصغيرة اللي كل يوم تسال على أمها جب لها أم تنتبه لها بغيابك وتهتم فيك...
مساعد: ولنفرض أني وافقت حطين احد في الساحة..؟؟..
منيرة بفرح: إيه بشاير بنت أختي..!!...
أم عبد الرحمن بنرفزه: وش معنى بشاير البنت صغيرة وما عندها معرفة بطيف...
منيرة بقهر: يا خالتي بشاير دينه ومربية وما عليها وان شاء لله تسعد وليدي وبنته.."نزل متعب وحب رأس جدته لأنه جاء من السفر ولا شافها"...
مساعد: الله جابك يا متعب أنقذني منهم...
متعب بدهشة: وش فيك وش مسوين لك العجايز..؟؟..
أم عبد الرحمن تفرك بإذنه لأنه قريب منها: عجايز يا وسيع الوجه هذا أخرتها يا ولد عبد الرحمن
متعب يفرك إذنه: آآآآآي يا جدتي والله انك قوية...
أم عبد الرحمن بقهر: قل لا اله إلا الله أعرفك عينك حارة...
متعب: لا اله إلا الله وإذ عيني حارة ترى العين حق يا جدتي ومذكورة بالقران والحين وش فيكم مستلمين اخوي الوحيد..
منيرة: بدل ما تفزع له شجعه..
متعب: أشجعه..!!..على ايش بالضبط..؟؟..
مساعد بسخرية: تصور يا متعب يبغوني أتزوج من بعد نورة...
متعب بدهشة: اهاااااااااا وأنا أشوف كله مجتمعين مع بعض وإذ سألتهم قالوا ما عندنا شئ أثريكم طابخين الطبخة والحين يا مساعد أكلها لوحدك...
مساعد بتعجب: افااااا يا متعب تتخلى عني وأنا محتاج لك..
متعب يلم جدته: دام القضاء الأعلى نطق بالحكم المفروض تحترم قراراته وتسوي مثل ما يبغون..
منيرة: هااااااه يا مساعد وش قلت..؟؟..
مساعد: يمه نورة اللي يرحمها توها متوفيه وش يقولون الناس ما صدق على الله تموت زوجته من هنا ويتزوج من هنا..
أم عبد الرحمن: ما علينا من الناس حنا ندور على راحتك وراحة هالصغيرة..
متعب بخبث: شكل أمي حاطه العين على وحدة تعرفها عشان كذا ما تبغاها تطير منها..
مساعد باستخفاف: بشاير بنت خالتك...
منيرة: إيه بشاير دامك رفضتها عشان اللي ما دري منهي خلاص أخوك أولىّ منها...
متعب: الحمد لله أني رفضتها وإلا ما أخذت أميرتي..
أم عبد الرحمن بمكر: الحين أميرتك وبالأول انتم وانتم سبحان مغير الأحوال...
متعب بإحراج: هذاك أول يا جدتي تكفين لا تنبشين علينا الماضي..
أم عبد الرحمن: يووووووه هذا عاد كلامك عننا وعن هالمسكينة....
منيرة: لا تغيرون الموضوع وش قلت يمه مساعد اكلم خالتك فوزية اليوم..؟؟..
مساعد: يمه...أنت تشوفين بشاير بتكون حنونة على بنتي..؟؟..
منيرة: يا وليدي عشان كذا أبغاك تأخذ لك قريبة وما تلعوز بنتك بكرة وتحطها بالعين..
أم عبد الرحمن: والله يا منيرة لو نجي للحق الأقارب عقارب.."انتبهت على ضحكت متعب العالية"..
أم عبد الرحمن بقهر: الحين وش يضحكك يا وسيع الوجه...
متعب: ههههههههههههههههههههههه يا جدتي تقولين الأقارب عقارب هههههههههههههه وبصراحة أميرتي ما قد لدغتني بيوم من الأيام ولا حتى عمتي.."التفت عليه أخوه وبوجهه ابتسامه خبث وكانه يذكره بشئ لكن متعب ما لقى له بال"...
أم عبد الرحمن: بناتي اعرفهم ومربيتهم أحسن تربية لو هن عقارب كان شفتوا شرهم من زمان
" ناظرت لمساعد اللي بان انه فهم قصدها"..
مساعد بنظرة مكر: طيب يا جدتي قولي بعض الأقارب عقارب بكلامك تو جمعتي كل الأقارب
منيرة: يووووووه يا كثر ما تطلعون عن موضوعنا...هااااه يا مساعد وش قلت...؟؟..
مساعد بتردد: ما عندي أي مانع دام تشوفينها من مصلحة بنتي بس مو بشاير يا يمه...
منيرة بغرابة: ليش مو بشاير..؟؟ مو ناقصها شئ..
مساعد: مو القصد نقص أو غيره بس..
أم عبد الرحمن قاطعته بفرح: خلاص مو شرط بشاير عندك بنت عمتك حصة ..خوله...
مساعد بغرابة: خوله...
منيرة بدهشة: خوله يا خالتي..!!..
أم عبد الرحمن بغرابة: إيه خوله وش فيكم انصدمتوا أشوف كأن الكلام مو عاجبكم تو عن بشاير مو ناقصها أما خوله كاملة والكامل الله..
منيرة بضيق: إيه يا خالتي بس خوله عندها بنت..
أم عبد الرحمن بتعجب: وش فيها بالعكس كذا راح تطمأنون على طيف معها وإذ عندها بنت وش فيها..؟؟ ناقصها رجل أو يد..
منيرة بضيق: لا مو القصد يا خالتي بس..
متعب يتدخل: الحين مين اللي بيتزوج انتم أو مساعد..
منيرة بزعل: متعب...هذا وقت كلام فاضي...
أم عبد الرحمن: لا مو كلام فاضي شوفي يا منيرة هذولاء عيالك عندك وأنتي حرة فيهم زوجتيهم أو لا وعسى ربي يسعدهم هذا أهم شئ خلاص أنا عجزت وخرفت وما لي رأي ولا حتى كلمه....
منيرة بأسف: يا خالتي لا تزعلين علي وهذا هو قدامك اسأليه وهو كيفه دام راضي..."ناظروا لمساعد اللي كان يناظر لهم وهو مبتسم أول مرة ما يكونون متفقين بشئ"...
أم عبد الرحمن: وش تناظر وأنا أمك تلفزيون قدامك قل شئ..
مساعد يبتسم: لا يا جدتي بس أول مرة أشوفكم كذا مو على رأي واحد..
أم عبد الرحمن وقفت بقهر: إذ جلست معكم بيزيد علي الضغط وأنا مو ناقصة.."مشت شوي وجاء لعندها يحب رأسها"..
مساعد: افااااا يا أم عبد الرحمن تروحين وتتركيني من غير كلمة مبروك...
أم عبد الرحمن: وليش مبروك دامك ما اخترت..
مساعد: لا اخترت وأنتي اللي اخترتيها لي...
أم عبد الرحمن بفرح: خوله..؟؟.."هز رأسه بأيه"..عسى ربي يسعدكم ويهنيكم هااااااه يا منيرة وش رأيك بخطتي..؟؟..
منيرة تبتسم: أول مرة يا خالتي يكون عندك هالافكار اشوا سمعت كلامك وإلا ما عمره وافق..
مساعد يناظر لاخوه اللي كانوا مندهشين منهم: صدق يا جدتي من سماك صيته أم عبد الرحمن...
متعب: هههههههههههههههههههههههههههههههه تصدق حسبالي صدق تزاعلو على بعض ونسوي عيد قبل عيد الأضحى...
أم عبد الرحمن بعصبية: يا وسيع الوجه شمت فينا أنت وأخوك بتسوي عيد هااااه أنا أسويك خروف العيد...
متعب يحب على رأسها: وش دعوة يا جدتي ما تتحملين المزح ..
مساعد: بس الحين انتظروا للين ما أعطيكم الضوء الأخضر...
متعب يتقرب من أخوه: الله يا مساعد نأخذ أخوات والله ما راح تندم دام هي أخت أميرتي.."سرح مساعد بالكلام اللي قالوا صح بنتها تدخل القلب بس عمري ما فكرت اخذ خوله ليش جدتي رشحتها لي ليش عشان عمتي تستولي على التركة كله جايز ليش لا دام ما نالت اللي تبغاه إلى الحين بس خوله الكل يشهد عليها من ناحية الطيبة والأخلاق وش فيها إذ أخذتها وسويت فيها خير ببنتها وتسوي فيني خير ببنتي ليش لا دام عندها بنت وأكيد ما راح تظلمها.."
"""الجزء الرابع عشر """
كان يمشى بالظلام ومن شدة الظلام طاح على وجهه حاول يشوف اللي قدامه على أمل يلمح نور..وكان يدعوا الله أن يجي احد ويفتح له النور حاول يقوم لكن حس بدينه مشلولة وفجاءة شاف النور من بعيد وكل مال يقرب..شاف أميرة تمشي بهدوء ووجهها خاليه من أي تعبير وقفت عنده..ابتسمت له وأخذت بيده وكان يناظر لها بإعجاب ولما تقرب منها يبغى يحضنها..شاف عقرب كبير وضخم ولونه اسود جاي لجهتهم أبعد أميرة عنه بسرعة وارتمت للجهة الثانية كانت خايفه من اللي سواه وشاف عيونها مليانه خوفه عليه لما تقربت العقرب لأميرة مسكها متعب ورماها لبعيد ولما تقرب من أميرة مرة ثانية صرخت أميرة باسمه وما حس إلا شئ يلدغه على ظهره ولما التف يبغى يشوفه طاح من الألم وحس انه يغمى عليه تقربت أميرة وهي تصيح وتناديه ولما انتبه متعب على صوتها شاف العقرب عند أميرة يبغى يلدغها التفتت على العقرب وكان قريب منها ولما رفع دبوسه يبغى يلدغها صاح باسمها...
أميرة تمسح عرقه وبخوف: بسم الله وش فيك..؟؟..
متعب يتنفس بصعوبة ويناظر حولها: عقرب....كبير.....كان......كان
أميرة تمسح على كتفه: شكلك شايف كابوس سم بسم الله وتعوذ من الشيطان.."نزل رأسه بتعب ويردد اسم الله على نفسه ولما رفعه شاف بعيونها الخوف والاهتمام ومن غير سابق إنذار اخذ يدها وباسها وظل ما سكها بقوة.."...
أميرة منحرجه: تبغى أجيب لك شئ تشربه...؟؟...
متعب للحين مآثر الحلم عليه: لا خليك بجنبي لا تروحي وتتركيني.."هزت رأسها بأيه"..أميرة لا تروحين وتتركيني..سامعة..."شكل الكابوس للحين مآثر عليه عالطول ضمته بقوة وقرت المعوذات وإيه الكرسي"...
منيرة: لا تتعذرين بعد بكرة عشاكم عندنا...
حصة: والله ما ادري يا أم مساعد بشوف أبو طلال وارد لك خبر...
منيرة: ما عليك من أبو طلال..أنا اكلمه لو بغيتي...
حصة: لا تكلفين على نفسك أنتي أعطيني فرصة وارد لكم خبر...
بلقيس: وش رأيكم تخلونها بمزرعتنا ومرة وحدة عمتي وبناتها يشوفونها
حصة: نشوف..إلا وشلون الصغيرة معك...
بلقيس تناظر لبنتها اللي معها شئ تعضه: هههههههههههههه حركة بسم الله عليها...
خوله تبتسم: تستنكر الوجيه...أو عادي ...
بلقيس: إيه بدت تتعرف...
خوله تكلم بنتها: حبيبتي..رغد روحي ساعدي خالتك أميرة بالمطبخ..
رغد واقفة: إن شاء لله..."وهي طالعة تقابلت مع مساعد اللي توه داخل من برا وعالطول ابتسم"...
مساعد انحنى على نفس مستواها: وشلونك رغد..؟؟..
رغد بابتسامتها الجذابة: بخير...وشلونك أنت..؟؟..
مساعد باس رأسها: بخير...وين طيف عنك..؟؟..
رغد تأشر لفوق: تتلبس فوق.."عدل وقفته"...
مساعد: مع مين جيتي..؟؟..
طيف: مع ماما حصة وخوله..؟؟..
مساعد يبتسم: وأنتي وين رايحه..؟؟..
طيف: عند خالتي أميرة بروح أساعدها...
مساعد يمسح على شعرها الناعم: طيب روحي...باي
طيف تبتسم وتلوح بيدها: باي.."راحت عنه ومازال عيونه متعلقة فيها دخلت أميرة ومعها صينية القهوة ورغد معها صينية الحلى"...
حصة تناظر لها بحنان: كان ما تعبتي نفسك...
منيرة: وش دعوة لو فنجان واحد.."تدخل هاجر مع بنت مساعد راحت تسلم على الضيوف وقالت لامها أن مساعد يبغاها أما البنات طلعوا يلاعبون برا وبعد دقايق رجعت منيرة تنادي على حصة لان ولدها يبغى يسلم عليها.."...
بلقيس تكلم أختها: متى قررتي موعد الحفلة..؟؟..
هاجر: ما ادري فكرت أحطها بعد الاختبارات...؟؟..
خوله: أي حفلة..؟؟..
هاجر: حفلة أحب أسويها مع صديقاتي..؟؟..
بلقيس: خلاص بعد العيد سويها..؟؟؟..
هاجر بحزن: طيب ونورة..؟؟..
بلقيس: نورة الله يرحمها وأنتي يا كثر ما تأجلينها...
هاجر بتردد: أخاف أسويها ويصير شئ..
أميرة: وش ذا الكلام يا هاجر تعوذي من الشيطان وتوكلي على الله وسويها وراح أساعدك.."ابتسمت لها وردت لها الابتسامة"...
بالمعرض كان يعين المجموعة مع الصايغ اللي توها وصلت من دبي كان جالس وراء مكتبه بكل اهتمام وما حس إلا لؤي يدخل عليه...
متعب باهتمام: ومين هالزبون ما قالك وش اسمه..
لؤي: لا استاز قال انه زبون أديم وانه متعامل هنا من سنوات راحت وحاب يشوفك..
متعب واقف: اوكي شوي وأجي اسمع يا رامز عين كل جوهرة واكتب رمزها ونوعها لا تنسى للين ما أشوف هالزبون اللي يبغى يقابلني...
رامز: حازر استاز.."نزل متعب وشاف مجموعة حريم مع أبوهم جالسات ووحدة واقفة بعيد عنهم تتفرج على مجموعة راح للؤي وسال عن الزبون واشر على الوحدة اللي واقفة لوحدة عند مجموعة بعيدة عنهم راح متعب وتفكيره مين هالانسانة اللي أصرت على مقابلته.."...
متعب: نعم أختي اقدر أخدمك بشئ...
:بابتسامة خبث: وشلونك متعب...؟؟..
متعب بتعجب وبنفس الوقت بضيق: ما قلتي أختي وش الشغل اللي طلبتيني فيه...
: وش دعوة متعب نسيت صوتي ما توقعتك تنسى بسرعة..."ناظر لها بدهشة وكان احد صب عليه مويه هند وش جابها لهنا ومن دلها على المعرض ناظر لها بحقارة وشاف طريقة لبسها بالعباية وتلثمها اللي شوي ويكشف عن شكلها معقولة هذه هند اللي حبيتها بيوم الأيام معقول تصير كذا الظاهر أن ربي حط أميرة بطريقي عشان ما أنصدم بالمخلوقة.."...
متعب بقهر: هند...وش جابك هنا..؟؟..
هند بابتسامة خبث: أنت تعرف وش جابني ليش يا متعب نسيت أيامنا ليش غيرت رقمك ليش أرسلت صديقك ليش كل هذا ليش..؟؟..
متعب متمالك أعصابه: لو سمحتي حنا بمكان عام وش جابك من الأساس الظاهر ما سمعتي الرسالة زين وأثرت فيك وش تبغين أخدمك فيه...
هند بحنان: أبغاك أبغى متعب الحبيب اللي حاربت أهلي وتحديت نفسي عشانه متعب أنا راضيه لو أكون الزوجة الثانية بس أكون بجنبك...
متعب بصوت عالي: يا لؤي...
لؤي وقف بجنبه: نعم استاز...
متعب بنظره احتقار: وصل الأخت لحد الباب..."هز رأسه وتقدم عنهم"..
هند: هذا ردك لي..طيب يا متعب الأيام راح تعرفك قيمتي وتعرف أني كنت بيوم من الأيام على حق وبتجيني تزحف على ركبك وتطلب مني السماح..."ناظر لها بحقارة وطلع لمكتبه وتركها بغيظها"..
الكل جالس بالصالة يسولفون ويضحكون على سوالف مهند وطيف كانت معهم بجسمهم لكن لقلبها وعقلها مع هاجر لأنها معها قطتها وحطتها بحضنها...
هاجر تمسح على قطتها: أقول أميرة..وش رأيك نزور عمتي عزيزة.." حمر وجهها لما جاء بالها رياض من بعد وفاة نورة تغيرت هاجر على الكل وصارت هاجر ثانية حست بفقدان نورة لها واللي غيرها أكثر أخذت دور كبير بعد أخوها مساعد مسئوليه بنته لان منيرة ما عادت تتحمل أي جهد.."....
أميرة تحاول تكون طبيعية: بكيفك حددي اليوم ودقي أو أنا أدق إذ حبيتي...
متعب ملاحظ شكل أميرة: هاجر..هاتي فله من زمان عليها.."ابتسم بخبث وهي خافت لأنها جالسه بجنبه"..
هاجر تضمها لها: لا..عشان ما ترميها زي هذاك اليوم...
متعب بقهر: إذ ما جبتيها أخذها وارميها لك الحين.."قامت بقهر وأعطته لها وتحركت أميرة شوي بحركة عفوية تبعد عنه"....
متعب يقهرها: الله هاجر شعرها مرة حلو..."قربها لها"..المسيها أميرة شوفي...
أميرة بخوف وهي شاده على أعصابه بقوة: لا ما أبغى المسها.."ووقفت طيف عندهم"..
طيف تلمس شعرها: الله عموووو...سعلها ملة ناعم...
متعب يقربها أكثر لها: يله المسيها.."من الخوف صدت للجهة الثانية وما حست إلا ويحطها بحضنها وعالطول قفزت وهي تصارخ وراحت فوق تركض والكل يضحك عليها"...
أم عبد الرحمن بزعل: متعب أنت صاحي تسوي كذا...
متعب: ههههههههههههههههههههه وش فيها يا جدتي خليها تتعود عليها..
هاجر: هههههههههههههه ما توقعت أن أميرة خوفها لدرجة...
منيرة بضيق: مهما كان المفروض ما تحرجها قدامنا افترض صار لها شئ الحين قوم شوفها..
متعب: وش بيصير لها يعنى ما أبغى زوجتي خوافه خليها تتعود...
منيرة: قوم شوف حرمتك أخاف صار معها شئ ما شفتها وشلون تناقز وتركض ترى مو زين لها...
متعب: ما فيها إلا العافية..."وترك فله تمشي"....
منيرة بضيق: مــــتـــــعــــب..
متعب بغرابة: خلاص يا الغالية بروح أشوفها.."طلع لعندها وما حصل احد بالصالة سمع صوت المويه وطق عليها بالحمام.."...
متعب: أميرة.."ما ردت عليه"..أميرة افتحي..أميرة افتحي الباب.."يطق بقوة وفجاءة انفتح الباب وشاف وجهها وكأنها متضايقة مسكها من يدينها وفلتتهم بقوة وبعدت عنه لكن أصر ومسكه وجلسها "
متعب باهتمام: وش فيك أميرتي.. "وشاف الرجفة فيها"...أميرتي...
أميرة بضيق: ابعد عني..
متعب: وش ابعد عنك ما تشوفين حالتك أميرتي وش تحسين فيه...؟؟..
أميرة تبكي: تحرجني قدام اهلك ولا هامك غير انك تضحك علي ليش تسوي كذا فيني.."حطت يدينها على وجهها ابتسم متعب وحس بتأنيب الضمير المفروض ما أحرجها حس بحنان لها وقربها أكثر وضمها بقوة وباس رأسها"...
متعب بحنان: أسف يا عمري ما هقيتك خوافة.."وقفت وبعدت عنه حست انه واقف بجنبها وضمها وحط يدينه على بطنها"..يعنى اعتذاري ما يكفى اجل خلاص بتوسط لدحومي عشان ترضين علي..
" ما ردت عليه"..خلاص أميرتي.."فلتت منه وتدخل للغرفة وتجلس بالسرير دخل ورآها وجلس عند رجولها.."...
متعب بحنان: وش تبغين أسوي عشان أميرتي الدلوعة ترضى.."ما ردت عليه وصدت للجهة الثانية" عاد خلاص أميرة ترى من تغلا تخلى...
أميرة بقهر: ما تغليت بس تشوفها زينه بحقي ما ظنيت انك....
متعب حط أصبعه على فمه: اششششش خلاص اللي صار صار مو هذا اللي تقولينه يعنى اعتذاري ما يكفى
أميرة بزعل: لا يكفى بس...
متعب: بس ولا بسين خلاص يا قلبي وأخر مرة بعد...
أميرة: لا أنت لازم تتعاقب عشان ما تكررها...
متعب بتعجب: لا يا أميرتي واهون عليك...
أميرة بقهر: مثل ما هنت عليك قبل شوي...
متعب: خلاص عاد.."ناظرت له بعيون حزينة ورد لها بابتسامة جذابة وكانت العيون هي اللي تتكلم عشقت الحب من اسمك.. وشفت الكون بعيونك...ترى دمي جرى بدمك...ومالي روح من دونك وبكل أخلاص حــبــيـــتـــك..."..
دخل على أمه بعد يوم طويل مر عليه شافها جالسه تقرئ قران وجلس عندها بالسرير...
منيرة بنظرة حنان لولدها: هااااه يمه مساعد شكل عندك شئ تبغى تقوله...
مساعد يبوس يدها: إيه أهم شئ تكوني راضية علي يا أم مساعد..؟؟..
منيرة تبتسم بحنان: طول عمري راضية عليك أنت واخوانك وعمري ما زعلت عليك ولا تنسى أنت بكري ومستحيل ازعل عليك يا يمه...
مساعد: الله يخليك لي يا الغالية...."بتردد"....يمه...
منيرة: سم أمي...
مساعد: سم الله عدوك...يمه تذكرين هذاك الموضوع...؟؟..
منيرة تحاول تتذكر: أي موضوع يا وليدي..؟؟..
مساعد بتردد: مــ...موضوع الزواج..."نزل رأسه منحرج"...
منيرة تبتسم: إيه...ذكرته وش فيه..؟؟..
مساعد: أشوفك قفلتي عليه..؟؟..
منيرة: لا والله ما قفلت ولا شئ بس انتظرك تعطيني الإشارة الخضراء مثل ما قلت....
مساعد: ههههههههههههههههههههه وهذا أعطيتك الإشارة ...
منيرة بفرح: والله يعنى خلاص أنت مقتنع بخوله..
مساعد بتردد وإحراج: إذ على القناعة صدقيني يا يمه مو مقتنع بس عشان بنتي لازم اقتنع غصب عني.."ابتسم لها"...أنتي كلميها وأعطيني رأيها..؟؟..
منيرة بحزن: والله يا مساعد ما ادري وشلون أقولك..؟؟..
مساعد باهتمام: ليش يمه صاير شئ..؟؟..
منيرة: لا مو صاير بس اللي اعرفه أن خوله شايله فكرة الزواج من رأسها...
مساعد بجدية: طيب يمه وليش..؟؟..
منيرة: عشان بنتها وعلى كلام عمتك ما تبغى تظلم هاليتيمه وخطبوها كثيرين بس ترفض...
مساعد: طيب أنتي شوفي يمكن تغير رأيها...؟؟..
منيرة: لا للحين متمسكة برأيها لان عم رغد خطبها ورفضت..معها حق تخاف إذ تزوجت أعمام بنتها يخذونها منها وهي ما تصبر عليها...
مساعد: بس أنا غير رغد راح تكون بنتي الثانية اللي انحرمت منها ولها مثل لطيف...
منيرة: ما ادري يمه أنت كلم بلقيس تقولها ومنها تجس نبضها..؟؟..
مساعد وكانه يفكر: إن شاء الله بكلم أميرة يمكن تحاول معها.."ابتسم لها".. شكلي سهرتك يا الغالية
منيرة: لا سهرتني ولا شئ روح يمه شوف بنتك ترى كل اليوم تسال عنك...
مساعد يبوس رأسها: إن شاء الله..."طلع وبرأسه الحين لازم يكلم أميرة عشان يعرف رأيه أختها وفعلا بعد ما شاف بنته تلعب مع هاجر طلع فوق لقسم أخوه وقال لأميرة عن الموضوع وبعد ما
اقتنعت بكلامه وفعلا شافت أن مساعد هو المناسبة لأختها ووصل هالكلام لخوله لكن كانت رده فعلها جدا عادية لان هذا مو أول مرة يتقدم لها..."..
أميرة: هااااه يا خوله وش قلتي..؟؟
خوله ببرود: أنتي تعرفين رأي من قبل..
أميرة: كل اللي قلته وما أعجبك يا خوله فكري زين لا تضيعين على نفسك هالفرصة...
خوله تبتسم: ليش ست أميرة عشان أصير بجنبك...
أميرة بفرح: بصراحة أكيد أبغاك بجنبي...
خوله: اجل مو لله تبغيني أوافق...
أميرة: لا وش دعوة أكيد أبغى لك الستر هااااه وش رأيك..؟؟..
خوله: آسفة أميرة ما اقدر أوافق وأنتي الوحيدة اللي تعرفين ليش..؟؟..
أميرة: رغد ما راح تضيع مساعد أكد لي أن رغد بتعيش حالها حال بنته وما راح يقصر معها بشئ ومن أول ما شافها معتبرها مثل بنته...
خوله: وإذ فرضنا وافقت تظنين أن أعمام رغد يوافقون راح يخذون بنتي مني لا يا أميرة ما اقدر أعيش من غير بنيتي...
أميرة: من الناحية هذه اطمني قالي مساعد بنفسه بيروح لعمام رغد ويتفاهم معهم بس أهم شئ أنتي يبغى يعرف رأيك قبل ما يتقدم...
خوله بحيرة: ما ادري يا أميرة بجد حيرتيني وخليتيني ما اقدر أفكر باي شئ...
أميرة: ههههههههههههههههههههه تدرين موصيني عليك وقال اسكر عليك جميع الأبواب...
خوله بتعجب: يوووه اجل متفقين علي...
أميرة: خوله..يعنى إذ وافقتي راح تخسرين شئ الحياة فرص وأنتي جتك أكثر من مرة ورفضتيها لكن إذ رفضتي هالفرصة الثمينة جد الجد راح تخسرين كل شئ...
خوله: أووووف لدرجة مساعد فرصة ثمينة والله يا أميرة هالشئ مو بيدي أنت تعرفين قبل ما أفكر بنفسي عندي بنت أخاف اظلمها بكرة....
أميرة: يعنى وشلون...؟؟..
خوله بحيرة: أعطيني فرصة أفكر وبكلم عمات رغد عشان يقولون لإخوانهم...
أميرة: لا تقولي لأي احد أنتي فكري ومساعد راح يتصرف ولا تشيلين أي هم...
دخلت ببيت الشعر تبغى تنظفه لان هاجر وأميرة بيجونهم اليوم وشافت أخوها جالس ومنزل رأسه يقرأ الجريدة دخلت بالمكنسة وأدوات التنظيف معها وقفت بملل قدامه...
لمى بقهر: هييييييييييييييه لو سمحت يا الحبيب ممكن تطس أبغى أنظف المكان ما تشوف وشلون قايل من عقبك أنت وطلللللووووه..."ابتسم على طريقة كلامها وما حب يرفع رأسه لأنه إذ سواها راح تنحرج كثير خليها تنحرج أحسن عشان مرة ثانية تتأدب وهي تكلم أخوها باحترام وأول ما رفع رأسه وبوجه ابتسامة مكر شاف شكلها المسكين وكأنها مرتكبة جرم كبير استدارت بسرعة تبغى تطلع وقفها صوته"...
طلال يتصنع العصبية: أنا طللللووولوووه يا الدبه...
لمى لفت بقهر: أنا دبه ياااااا.. "ناظرت له باحتقار"..وإلا بلاش...
طلال يتقرب منها: وإلا ايش..قولي إذ أنتي شجاعة قولي...
لمى بتحدي: شجاعة غصب عنك ممكن تطلع أبغى أنظف..
طلال يتكتف: والله انتظر اخوي اللي هو أخوك ما جلست عالفاضي...
لمى باشمئزاز: انتظره بالسيارة يعنى لازم هنا...
طلال بجدية: لمى..وش فيك..؟؟..ليش تكلميني كذا..؟؟..
لمى تتكتف بغرور: والله كيفي أكلمك مثل ما أبغى ليكون عندك مانع..؟؟..
طلال بقهر: أكيد عندي مانع وش صاير لك..مو هذه لمى اللي دخلت قلبي وعرفتها.." ناظرت له بدهشة...معقولة أنا دخلت قلبه والكلام اللي قالته فوز لا أكيد يبغى يلين راسي وابتسمت بسخرية.."
طلال بضيق: وش سبب الابتسامة..؟؟..
لمى بارتباك: لو سمحت طلال اطلع قبل ما يشوفنا احد..
طلال بتحدي: لا ما راح اطلع وخليهم يشوفونا ما جلست أسوي شئ غلط أبغى اعرف وش سويت معك عشان تقلبين علي بالشكل كذا..؟؟..
لمى تتلفت من ورآها: يعنى ما تعرف وش سويت..؟؟..
طلال بغرابة: لا والله ما اعرف وش سويت قولي..؟؟...
لمى بارتباك: أنت وش تبغى مني بالضبط...؟؟..
طلال بغرابة: وش أبغى..!!...أبغى كل خير لك.. لمى وش فيك أنتي..؟؟..
لمى بتردد: بصراحة طلال فوز عرفت أمر الصورة بس أبغى اعرف شئ واحد ليش..ليش...ما ادري وش أقول.."نزلت رأسها بحزن"...
طلال بجدية: ليش مهتم فيك..؟؟.."رفعت عيونها ووجهها احمر"..لأني...يا لمى لا تزعلين على اللي بقوله بس إذ تبغين ترتاحين..أنا...احبك لمووو فهمتي الحين.." ناظرت له بعدم تصديق من صدقه هذا لا أكيد أنه صاير شئ وقاعد يخربط علي.."..
طلال يبتسم: والله العظيم أتكلم جد...احبك..وابغاك لي..؟؟..وش رأيك..؟؟.."نزلت رأسها بحياء وربي مو صاحي هالادمي أكيد فيه شئ.."...لمى وش رأيك..؟؟..
لمى بخجل ووجها صار احمر: بايش..؟؟..
طلال بابتسامة مكر: أقول ابغاكي لي وأنتي ما تبغيني..؟؟...
لمى بخجل وحطت أصبعها بفمها بطريقة طفولية: طلال...لا تحرجني...
طلال: هههههههههههههههه خلاص عندك مهله وبأقرب فرصة اسمع ردك...اوكي.."ما ردت عليه غير بالابتسامة"...والحين أخليك تنظفين وهالله بالتنظيف الزين لان بكرة أبغى بيتي نظيف...
لمى بقهر مخلوط بخجل: طلالالالالالالالالالالالالالالالالال
طلال: ههههههههههههههههههههههه طيب هذاني طلعت...انتبهي لنفسك باي.."حست بسعادة ما بعدها سعادة طلال يحبني وأنا بعد أحبه وأموت فيه ليكون احلم..لا وشلون احلم وكل شئ صار قدامي يا بعد عمري طلووولتي يوووه إذ جلست الحين وأفكر فيه ما راح اخلص من التنظيف..."...
شماء بفرح: ألف مبروك وأخيرا عشت وشفتك عروس..؟؟..
خوله بخجل: شموووه أكيد منتي صاحية أقولك للحين ما صار شئ وجالسة تباركين لي...
حصة: لا تلومينها فرحانة لك...
شماء: بصراحة أول مرة تقولين أبغى أفكر العادة عالطول لا من غير سابق إنذار...
حصة بقهر: لا تفرحين هالعنيدة مو مقتنعة فيه...
شماء بتعجب: ليش خوله ترى اللي تسويه بنفسك حرام...
خوله بتعجب: قبل أمس جاني الخبر أعطوني فرصة أفكر على مهل ما أبغى اندم بعدين لا تنسون عندي بنت بشاورها...
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك