رواية غفلتي دفعتني حياتي -9
ريم بهدوء: السلام عليكم
نواف وأسماء: وعليكم السلام
جلست رنا جنب ريم: الحمد لله ع السلامة يا نواف
نواف: الله يسلمك... كيف حالكم
ريم: كويسين
نواف: رنا... هذي أسماء اللي دايما تسألين أبوي عنها
ناظرتها رنا وهي مصدومة.... بيضاء وشقراء بس عيونها بنية...." ها الأجنبية أختي؟؟ "....
ابتسمت ريم: كيف حالك أسماء
أسماء: تمام... أنتي كيفك
ريم: الحمد لله
نواف: أسماء... هذول أخواتك ريم ورنا
أسماء: كيفك رنا... ليه ساكته
رنا: تمام... - ناظرت نواف وقالت: نواف أبغى أناظر مكان العملية
ابتسم نواف: عليه شاش ولفه بيضة ما راح تشوفين شي
أسماء: نواف كيف تتحمم
نواف: أهم شي مكان العملية ما يوصل له الموية... عشان ما يخرب الشاش
رنا: أجل شعرك خايس ههههه
نواف: ههههه لااا أغسل شعري وأنا واقف ع المغسلة
ريم: نواف وش شعورك لما دخلت غرفة العمليات
نواف: يووه يا ريم المكان يخوف... الأجهزة حولك والأنوار على راسك... واللي يخوف أكثر لما جا الدكتور وقالي تشهد
أسماء: لييه
نواف: عشان إذا ما نجحت العملية ومت... تكون الشهادة آخر ما نطقت به
أسماء: يمه كان أهرب من المستشفى كلها
ضحكوا عليها وسكتوا لما دخل أبو نواف مع أخوه أبو رائد.... دخلوا الصالة وراحوا فوق....
أبو سعود دق على ولده أبو نواف.... عشان يعرف ليه سوا بنواف كذا.... أبو نواف دق على أخوه عشان يكون معه لما يقول لأمه وأبوه كل شي....
دخلوا لجناح أخوهم سعود وشافوا أمهم وأبوهم جالسين....
أبو نواف وأبو رائد: السلام عليكم
أم سعود وأبوه: وعليكم السلام
قال أبو سعود لما جلسوا عياله: الحين يا سالم تقولي ليه تسوي اللي سويته... هذا نواف ولدك تتبلى عليه كذا
أخذ أبو نواف نفس عميق وبدا يحكي لهم.... وأبو رائد يكمل معه.... أبو سعود وأمه مصدومين بالمصيبة اللي طاحت براس ولدهم....
أبو سعود: وليه ما قلتوا لي السالفة من زمان
أبو رائد: ما نبي نضايققك يا يبه... أنت شلت همنا واحنا صغار وما نبي نتعبك بمشاكلنا
أبو سعود: بتظلون في عيني صغار حتى لو صرتوا جدود
أبو نواف: ما عليك يا يبه قدرنا نجمع المبلغ وما بقى لي الا كم مية الف
أم سعود مقهورة: حسبي الله عليك يا عبير... الله ينتقم منك في بـ...
قاطعها أبو نواف: لا تدعين يمه... حسابها عند ربها وبعدين بناتها هم بناتي
أم سعود: على كل اللي سوته... وتبيني ما أدعي عليها
أبو نواف: ما عليك منها... يمه ريم تحت جايه تسلم على نواف
أم سعود: صدق أنها قوية عين
أبو نواف: يمه وغلاتي عندك ما تقولين لها شي... لأنها ما لها ذنب كله من تحت راس أمها
أم سعود: ما أقدر يا يمه... لازم أقول لها عشان تعرف أمها على حقيقتها
أبو نواف: تعرف عن أمها لكن ما بيدها شي... يمه عشان خاطري لا تقولين لها شي
أم سعود: عشان خاطرك منيب قايله شي
أبو سعود: الحين من قال لسالم يجمع المبلغ
أبو رائد: سعود الله يرحمه... وأنا ساعدته ويقول سالم أنا أم نواف عطته مليونين
أبو سعود بصدمة: ايش
أبو رائد: أم نواف لما عرفت السالفة جمعت فلوسها... ونزلت مليونين بحساب سالم
أبو سعود: منيب مصدق
أبو رائد: ولا أنا... بس يا يبه ترا سالم ما تهاوش معها وطلقها... لا هو سوا اللي قالت له عبير
أبو سعود: يعني أنت اللي بعدت بنتك عنك... مو هي اللي خذتها
أبو نواف: هي قالت تبي أي واحد منهم... وأنا عطيتها بسمة... أما أسماء خليتها عند ولد عمي عشان ما تعذبها عبير... حتى نواف تركته عند سعود بألمانيا لأن عبير ما تبيه
أم سعود: لا حول ولا قوة الا بالله
ربع ساعة ونزلت أم سعود تحت.... شافت البنات جالسين عند نواف يضحكون.... ناظرت ريم بحقد بس ما قالت لها شي عشان أبو نواف....
أسماء انتبهت بجدتها وقفت وقالت: جددددده... - ركضت لها وضمتها: ولهت عليك كثييييير
أم سعود ما كان ودها يكونون بنات ولدها اجنبيات.... لكن بعد تصرف أمهم... زاد غلاتهم عندها: هلا وغلا ببنتي... شلونك اسومه
اسماء مبسوطه: الحمد لله كويسه... وانتي كيف حالك
ام سعود: انا بخير جعلك الخير... ها يا يمه متى اخر مره شفتي اميمتك
اسماء: من شهرين... بس بابا قال قريب يوديني لها
ام سعود: اذا شفتيها سلمي عليها... وقولي لها ما قصرتي والله يبارك لك بعيالك
اسماء: ان شاء الله
جلسوا وقامت ريم وسلمت على ام سعود وهي حاسه بنظراتها.... سلمت رنا على جدتها وهي مستغربه منها....
وصل أبو نواف لأرض بريطانيا أشتاق لها ولهواها البارد.... والأهم اشتاق لزوجته أم نواف مع بنته بسمة.... مبسوط لأنه ما توقع أنا المدير راح يختاره من ضمن المجموعة عشان صفقات مع شركة بريطانيه....
كانت الساعة 8 الليل.... طلعوا من المطار لسيارتين من الفندق على حساب الشركة.... وصلوا وكل واحد راح لغرفته ونام....
صحى أبو نواف لما سمع حد يطق عليه الباب.... ناظر الساعة كانت 12 ونص الظهر.... قام وهو يفرك عيونه.... فتح الباب وشاف زميله في العمل والمكتب....
ـ : صباح الخير سالم
ناظر أبو نواف بمنصور اللي أصغر منه بسنتين.... وقال: صباح النور ع المروقين
منصور: أكيد أروق هذي لندن يا ناااااس
ابتسم أبو نواف: في ذي صدقت... أقول وش عندك صاحي من بدري... أنا اللي أعرفه الأجتماع الساعة 4 مو الحين
منصور: أدري عشان كذا أنا جيت لك... عشان ننزل نفطر ونشرب لنا كوفي... -وغمز: وأنت تعرف الباقي
أبو نواف: هههههههههه اوكيه... أنت أسبقني على ما أتروش وأصلي وأجيك
منصور: تمام أنا انتظرك
رجع أبو نواف لغرفته وفتح الستاير والنافذة.... ابتسم وهو يشوف الطبيعة من حوله.... شهر بعيد عن وجه عبير نفسه يتنطط من الفرحة.... تذكر منصور وماحب يتأخر عليه....
صحت أم نواف من النوم مبسوطة.... أخيرا بدت إجازتها.... تروشت وصلت ونزلت لتحت.... البيت فاضي مثل العادة أمها راحت لصديقاتها المسلمات عشان يحفظون القرآن.... أبوها يساعد المسلمين لترجمة القرآن للغة الفرنسية.... وبنتها بالمدرسة....
رن جوالها.... ابتسمت لما شافت رقم جواهر صديقتها الإمارتية....
أم نواف: السلام عليكم
جواهر: وعليكم السلام شالج مناير
أم نواف: أنا بخير
جواهر: أقول ليش ما ييتي اليوم
أم نواف: لقد أخذت إجازة
جواهر: اهاا نسيت... عيل أخليج الحين بس حطي في بالج إني مشتاقه لج وايد
أم نواف: ههههههههه وأنا أكثر
جواهر: يللا مع السلامة
سكرت أم نواف من عندها وهي مبتسمة.... خذت شنطتها ووقفت عند المراية تشوف شكلها.... حطت الحجاب على راسها بإهمال لأنها تعتبره حرية شخصية....
التفتت تمشي ورن جوالها.... استغربت لما شافت رقم سامي زميلها السعودي.... ردت عليه وهي مستغربة اتصاله....
أم نواف: السلام عليكم
سامي: وعليكم السلام... كيف حالك أخت منيرة
أم نواف: الحمد لله كيف حالك أنت
سامي: تمام... - بتردد قال: أكيد أنتي مستغربة اتصالي... بس بغيتك بموضوع
جلست أم نواف وقالت: تفضل
سامي: لا... ما ينفع بالتفلون ممكن أشوفك بكوفي { ..... } الحين إذا ما عندك شي
أم نواف ناظرت ساعتها وقالت: حسنا... سأوافيك بعد قليل
سامي: اوكيه... انتظرك مع السلامة
سكر سامي الخط وهو مرتبك وخايف من رد أم نواف.... من نقلوها معه وهو يراقبها.... ما عمره شافها بالمكياج ولا مرة شافها تصافح رجال.... علاقتها معه رسمية مرة مع أنهم زملاء....
تفاجاء لما عرف أنها مسلمه وتتكلم عربي أحسن منه.... عرف أنا عندها بنت بس ما تجرأ يسأل عن أبو البنت.... حط في باله أحتمالين أما أنها أرملة أو مطلقة.... لأنه ولا مرة شافها تسولف مع رجال وتضحك معه....
لاحظ أنه بدا يميل لها وبعدها صار يفتقدها في إجازتها.... صار ياخذ إجازة مع إجازتها لأنه حبها وبنى أحلامه معها....
انتبه لما سمع صوتها: السلام عليكم
من ربكته وقف ومد يده: وعليكم السلام
ناظرته أم نواف وهي مطنشه يده....
انتبه على نفسه وقال: سوري... تفضلي
جلست أم نواف وهي مبتسمة ببشاشة كالعادة....
سامي: افطرتي
أم نواف: لا ليس بعد... وأنت
سامي: حتى أنا... - أشر ع الوتر وجاب لهم المنيو....
نزل أبو نواف تحت وشاف منصور جالس ومعه مشاري.... راح لهم وهو مبتسم....
أبو نواف: اووه الشباب هنا
مشاري: وأخيرا يا شيخ ما كان نزلت
أنحرج أبو نواف: سوري مـ..
قاطعه منصور: ما عليك منه... يللا خلنا نطلب تراني جوعاااان
أبو نواف: لااا خلونا نروح لكوفي قريب... عندهم قهوة رهيبة
مشاري واللي يموت ع القهوة.... وقف وقال: يللا
وهم رايحين قال منصور: سالم أشوفك حافظ لندن أكثر من أسمك
أبو نواف: هههههههه أنا أخذت البكالوريس والماجستير من هنا... كيف ما أحفظها
مشاري: غريبة... مو مبين أنك ولد عز
سكت أبو نواف" وش فيه مشاري علي "....
وصلوا وتوهم يدخلون قال منصور: لحظة... دام في طاولات هنا نجلس برة أحسن
ابتسم أبو نواف لأنه نفس تفكير منصور.... جلسوا منصور ومشاري ع اليمين واليسار.... أما أبو نواف جلس ومعطي ظهره للشارع ويشوف الزباين داخل الكوفي....
طلبوا لهم اللي يبونه وبدوا يسولفون....
مشاري: الصراحة يا سالم ما توقعت أنا ابو هشام { مديرهم } بيختارك من ضمن المجموعة
أبو نواف: ولا أنا... كانت مفاجاة منه
منصور: غريبة أنك ما تدري يا سالم... أسمع أنت عارف أنا أبو فهد خالي... وهو قالي أنه رشحك لأبو هشام
ابتسم أبو نواف لما تذكر ذاك اليوم قاله أبو فهد" عندي لك مفاجأة " أكيد يقصد ذا السفر.... وقال: جزاه الله خير... وإن شاء الله أكون عند حسن ظنه
التفت أبو نواف لجهة اليسار وشافها جايه.... وهي ما تناظره لأنها أساسا ما تناظر رجال.... وابتسم لما شافها تدخل لنفس الكوفي....
سمع مشاري يقول: لا يتشقق حقلك ههههههه
أبو نواف: ههههههههه... مالك دخل
منصور: لااا الرجال أخترب بقول لخالي يغير رايه
أبو نواف: وأنت وش عليك... ناظر محد ماسكك
رجع يناظر النافذة وشافها جلست مقابلته.... وابتسم لما شافها مطنشه يد الرجال اللي يبي يصافحها" غريبة جالسة مع واحد.. أكيد هذا زميلها لأنه وقت غدا "....
أم نواف كنه حد كب عليها موية باردة.... وهي تسمع سامي يعترف لها بحبه ويبي يتزوجها.... هي توقعت إنا سامي عنده شي.... كيف ما تعرف وعندها شهادة بكالورويس علم النفس.... بس لما شافت زوجها خذ ماجستير انجليزي خذتها مثله....
قالت بتردد: لكن أنا... أنا مـ..
قاطعها سامي وهو يحس براحة أنه قالها: لا تردي الحين... أخذي وقتك وفكري ماله داعي العجلة
سكتت أم نواف وندمت أنها قالت لصديقتها جواهر.... ما تقول لأحد عن زوجها سالم.... وكلما سألها حد عن أبو بنتها قالت مالكم دخل.... يعني محد يدري إذا هي متزوجة أو مطلقة أو أرملة....
لفت راسها لنافذة وهي تفكر كيف تقوله عن زوجها.... بس كل تفكيرها راح وهي تشوفه يناظرها مبتسم.... زادت ابتسامته لما انتبهت عليه.... نست وجود سامي ورفعت يدها تأشر له....
سامي أستغرب من سكوتها أكيد مترددة.... وأستغرب لما شافها تناظر النافذة وتبتسم.... أكيد شافت صديقاتها بس لما رفعت يدها تأشر تعال.... ناظر وين هي تناظر.... شاف ثلاث رجال جالسين أثنين يضحكون وواحد بيأكلها بعيونه....
حس بنار الغيرة بصدره.... كيف وهو يعترف لها بحبه وفي الآخر تناظر غيره.... لف وجهه عن النافذة ما يبي تهتز صورتها....
عند أبو نواف....
مشاري: والله يا منصور خالك ما سوى خير... شف الرجال أكل المرة بعيونه
أبو نواف: ههههههههههه
منصور: وأنت صادق عينه زايغة ع الحريم
أبو نواف: وش فيكم علي... هذي زوجتي حلالي آكلها بعيوني كيفي
منصور ومشاري: زوجتك؟؟
ابتسم أبو نواف لما انتبهت منيرة عليه: إيه زوجتي أم نواف
مشاري: وكيف ساكت لها وهي جالسة مع واحد
أبو نواف: عادي أكيد زميلها بالعمل
منصور: اوكيه زميلها... بس لو هي لابسة حجابها عدل
أبو نواف: ما أدري من خرب عقلها وقالها الحجاب حرية شخصية... آآآه مدري وش خذنا من الحرية الشخصية
ناظر مشاري أبو نواف واحتقره.... قال أبو نواف وهو عارف تفكيره: هذي زوجتي وأنا أثق فيها ولو إني شايف شي مو زين فيها... كان ما خليت بنتي معها دقيقة وحدة
مشاري: بعد بنتك لا الحالة صعبة
منصور: واللي في السعودية
أبو نواف يستهبل: صديقتي... أكيد زوجتي
مشاري: وليش تارك أم نواف هنا
وقف أبو نواف لأنه شاف زوجته تأشر له يجي: سالفة طويلة وماحب أتكلم فيها... عن أذنكم
عند أم نواف....
التفت بعد ما أشرت لزوجها يجي.... واستغربت لما شافت سامي كيف نسته.... قالت بتردد: أسمعني يا سيد سامي... أنت رجل ذو أخلاق حميدة... وأنا أخطأت حينما قلت لجواهر أن لا تخبركم عن....
سكتت لما شافت زوجها واقف جنب سامي....
مد أبو نواف يده لها: السلام عليكم
استغرب سامي لما شاف أم نواف تصافحه: وعليكم السلام... كيف حالك
أبو نواف: تمام... وأنتي؟
أم نواف: الحمد لله... - وقفت جنب زوجها وقالت: سالم أعرفك هذا سامي زميلي في العمل
مد أبو نواف يده له: هلا والله
سامي صافحه وهو مستغرب: هلا فيك
أم نواف: سامي هذا... - حست الكلمة ثقيلة على لسانها: احم هذا أبو نواف... زوجي وأب أبنتي
سامي كنه حد عطاه كف: زوجك؟؟
أم نواف: نعم هذا زوجي سالم
أبو نواف: أخليكم الحين
أم نواف خذت شنطتها وقالت: سأتي معك
أبو نواف: لااا أجلسي... أنا بروح لربعي شوفيهم جالسين هناك... - أشر بيده....
أم نواف مسك بذراعة وقالت: بل سأتي معك... أذهب لأصدقائك وقت أخر
أبو نواف: فرصة سعيدة يا أخ سامي
سامي كان في عالم ثاني.... كل أحلامه وآماله تبخرت حبيبته صارت متزوجة.... رفع راسه وقال بحزن: وأنا أسعد
طلع أبو نواف وما انتبه لحالة سامي.... أما أم نواف فكانت تهرب من نظرة العتاب من سامي.... طلعوا مع بعض....
أبو نواف: انتظري شوي
راح أبو نواف لعند مشاري ومنصور.... وقال: منصور
منصور: هلا
أبو نواف: الله يخليك دق علي قبل الإجتماع بنص ساعة
غمز له منصور وقال: اوكيه... بس خل جوالك قريب
أبو نواف: هههههههههههه طيب باااي
راح أبو نواف لزوجته وقال: وين حابه نروح
أم نواف بصوت مخنوق: المنزل
ما عارض أبو نواف ومشى معها.... ثواني وقالت أم نواف: متى وصلت إلى لندن
أبو نواف: أمس في الليل
أم نواف: وماذا عن زوجتك
أبو نواف: أنا جاي للشغل عندنا صفقات مع شركة { ..... }... واختاروني من ضمن المجموعة
ابتسمت أم نواف: إنها تختلف عن الشركة التي أعمل فيها
أبو نواف: ههههههه ولا كان طردونا احنا الأثنين... عشان ما نهرب معلوماتهم
أم نواف: وإلى متى ستظل هنا
أبو نواف: شهر
أم نواف: هههههه لقد بدأت إجازتي اليوم ولمدة شهر
أبو نواف: حلوة الصدفة هههههههه
فتحت أم نواف باب البيت ودخلت وأبو نواف وراها.... رمت شنطتها وحجابها وجلست ع الكنبة تبكي.... ما أستغرب أبو نواف لأن مبين عليها بتبكي من دخل لها الكوفي.... حست بزوجها يجلس جنبها ويضمها.... زادت البكي وهي تحس بحنانه....
أبو نواف وهو يمسح شعرها: افاا والله افا... ما عاش من ينزل دموع مناير
دفنت أم نواف راسها بصدره وهي تشهق بالبكي....
مسح أبو نواف ظهرها يهديها: ايش فيك حبيبتي... ليش ها الدموع
أم نواف ودموعها تنزل: لقد اشتقت لك كثيرا
ضمها أبو نواف أكثر لأنه مشتاق لها: هذا أنا جنبك وحولك
رفعت أم نواف راسها تناظره وقالت: أتعرف مع من جلست منذ قليل
أبو نواف وهو يمسح دموعها: زميلك بالعمل
نزلت أم نواف عينها وقالت: نعم... لكن أنا في إجازة... وقد طلب مقابلتي ليخطبني
أبو نواف: يخطبك؟؟
هزت أم نواف راسها بإيوه: لقد قال لي.... - وقالت له كل شي قاله سامي....
سكت أبو نواف وتوه ينتبه بأنانيته مع زوجته.... كيف هو تاركها مو متزوجة ولا مطلقة وهي من حقها تعيش حياتها مع غيره....
أبو نواف: وأنتي ايش رايك
أم نواف: بماذا
أبو نواف: في سامي مدري سالم
أم نواف: أخ وزميل عمل فقط
أبو نواف: أقصد رايك فيه كزوج لك
أم نواف: أنت زوجي
مسك أبو نواف يدنيها وقال: موني... أنتي من حقك تعيشي مثل غيرك... وأنا كنت أناني لما سويت فيك كذا... فكري في الموضوع كويس وقولي لي... عشان أرسل لك ورقة طلاقك وبعد العدة تقدري تعيشي حياتك مع اللي يستاهلك
وقفت أم نواف وهي مصدومة.... وقالت: ما هذا الكلام
وقف معها وقال: اللي سمعتيه ولا تخافين ما راح أحرمك من عيالك... راح تشوفينهم متى ما حبيتي... وفلـ...
قاطعته أم نواف وهي تفتح واحد من الدروج.... لبست دبلتها حتى تبعد الرجال عنها.... رفعت يدها قدام زوجها وقالت: أنا متزوجة يا سالم... لا أريد سامي ولا أريد غيرك
سكت أبو نواف وما عرف يرد.... ولو أنها نايمة مع عشرة قبله يحبها ومستحيل يضرها.... كفاية أنها دفعت له مليونين ريال مساعده له....
أم نواف تحبه حتى لو هو ما يبيها.... لأنه سبب هدايتها ودخولها الإسلام.... رفعها من حضيض الكفر لقمة الإسلام.... وعرفت كيف المرأة محترمة عند المسلمين....
كانوا يناظروا بعض وفي عيونهم ألف معنى.... ما يبون يفترفون ودامهم بدوا مع بعض لازم يتنهوا مع بعض....
قطع عليهم ذا اللحظة لما فتح الباب ودخلت بسمة.... وقفت بسمة تستوعب أمها مع رجال غريب لوحدهم في البيت.... ناظرت أمها مستغربة وناظرت الرجال مو غريب عليها.... دايما تشوف صوره مع أمها....
قالت بصدمة: بـ..بابا
ابتسم أبو نواف وهو يفتح ذارعة: يا عيون بابا أنتي
بسمة واقفة ومو مصدقة عيونها....
أبو نواف شافها ما تحركت وقال: أدري يا بسوو ما تعرفيني... بس الله يسامح اللي كان السبب
بسمة سمعت كلامه راحت له وضمته بقوة وهي تصيح.... جلسها أبو نواف جنبه ع الكبنة وهو يمسح رأسها ويحسسها بوجوده.... رفع راسه لزوجته اللي كانت تمسح دموعها.... فتح لها ذراعهوجات لعنده وجلست جنبه....
ضمهم أبو نواف له وهو يداري دموعه.... خايف عليهم لأنهم بعيدين عنه.... عايشين في غربه وهم في بلدهم.... خايف لو تهجم عليهم مجرم وقتلهم.... ليتعفنون في البيت محد عرف عنهم....
رفعت أم نواف راسها وشافت زوجها.... يناظرهم ويكابر دموعه.... استغربت ليه الدموع عيب للرجال عند العرب.... ليه ما يقدر يعبر عن حزنه وألمه....
أم نواف وهي تمسح دموعها: اشتقنا لك يا سالم... اشتقنا لك كثيرا
أبو نواف وهو يرجع شعرها ورا أذنها: وأنا اشتقت لكم أكثر وأخاف عليكم من اللي حولكم
بسمة كانت تناظر أبوها تحفظ ملامحة.... شافت صور جديدة له بس بالطبيعة غييير.... طبعت بوسة بخد أبوها وقالت: كيف حالك بابا... وكيف حال نواف وأسماء
انحرجت أم نواف كيف نست تسال عن عيالها: صحيح يا سالم... كيف حال نواف وأسماء
ابتسم أبو نواف: الحمد لله كلنا بخير... إن شاء الله لما أجي يوم ثاني بجيب معي صوره أخوانك نواف ورنا
بسمة: رنا؟؟
أبو نواف: إيه أختك رنا... بنتي أنا يعني أختك
بسمة: بابا أنا في كل يوم أكتب لك رسالة عن المدرسة... وعن صديقاتي وماما وجدي وجدتي
باسها أبو نواف وقال: كل رسايلك توصل لي وأقراهم دايما... وحفظتهم عندي>> طبعا عنده ببيت أبوه ما يبي تشوفهم عبير لأنه عارف تفكيرها....
دق الجرس وفتحت بسمة الباب.... كانت صديقتها مايا اللبنانية جايه....
مايا: هاااي
الكل: هااي
بسمة: ماما... بابا سأذهب إلى غرفتي مع مايا
راحوا البنات فوق....
مايا: who is this man
بسمة: this is my father
وكملوا حكيهم عن المدرسه والبنات....
نزل أبو نواف عينه عن بسمة وهي تروح فوق مع صديقتها....
التفت أبو نواف لزوجته وقال: فكري في الموضوع كويس يا منيرة وعطيني خبر
مسكت أم نواف يدينه وقالت: سانتظرك يا سالم حتى تنتهي المشكلة… وسنعيش بأذن الله سويا
رن جوال أبو نواف ورد: الوو
منصور: يا حلو عايش في العسل... باقي ربع ساعة ع الإجتماع
ضحك أبو نواف من تفكير صديقه وقال: ههههه اوكيه أنا جاي... مع السلامة
وقف أبو نواف وقال: يللا أنا طالع الحين
وقفت أم نواف: هل ستأتي غدا
أبو نواف: بكرة إجتماعنا مع الشركة البريطانية... يمكن في الليل أشوفك
ابتسمت أم نواف: حسنا انتبه لنفسك
أبو نواف بإبتسامة: مع السلامة
طلع أبو نواف وراح للفندق لأن الإجتماع راح يكون فيه.... دخل الغرفة وتقريبا كل الموظفين موجودين إلا المدير....
أبو نواف: السلام عليكم
الكل: وعليكم السلام
جلس جنب منصور ومشاري.... اللي يناظرونه بخبث....
مشاري بهمس: منصور شف سالم كيف وجهه منووور
منصور: ههههه وأنت صادق
كتم أبو نواف ضحكته وقال: والله لو أشرح لكم من اليوم لعشر سنين ما راح تفهمون
منصور بيرد بس سكت لما سمع المدير....
أبو هشام: السلام عليكم
الكل: وعليكم السلام
كان الإجتماع لموظفين شركة أبو هشام بس.... عشان يتأكدون ويعرفون اللي لهم واللي عليهم.... وشروطهم وتوقعاتهم والخ....
انتهى الإجتماع ع الساعة 8 الليل.... وبعد العشاء جلس أبو نواف مع ربعه.... كان ممكن يروح لزوجته بس فضل يعطيها فرصة تفكر....
اليوم الثاني....
من الساعة 9 الصباح.... كانوا الموظفين في الغرفة المنشودة.... دقايق ويدخل عليهم الوفد البريطاني وبدا الإجتماع.... وبعد نقاشات انتهى الإجتماع وصافحوا بعضهم وطلعوا....
راح ابو نواف لغرفته.... دق على جوال عبير وما ردت.... دق على جوال ريم....
ريم استغربت رقم غريب ودولي.... أكيد هذا زوج أمها: الوو
أبو نواف: ريم كيف حالك
انبسطت ريم: هلا يبه... أنا بخير أنت كيف حالك
أبو نواف: تمام... ريومه طلعي عن الإزعاج ما أسمعك
ريم: دقيقة... - راحت للمطبخ: الو يبه
أبو نواف: معك... وش ذا الإزعاج
ريم: احنا في بيت جدي... خالي مسوي عزيمة
ابو نواف: اهاا... شلون أمك ورنا
ريم: الحمد لله... يبه من ساعة أمي دقت عليك وأنت مقفل جوالك
أبو نواف: كان عندي إجتماع وممنوعه الجوالات... ريما إذا أمك جنبك عطيني أكلمها
ريم: طيب... - راحت لعند أمها اللي جالسة مع خالاتها وجدتها....
ريم: يمه أبوي سالم ع الخط
عبير: منيب فاضيه له... بكلمه بعدين
ريم: يبه أمي مشغولة تحاكيك بعدين
أبو نواف: طيب... سلمي عليهم
ريم: مع السلامة
أم مساعد: وراك يا عبير ما كلمتي زوجك
عبير واللي نست أمها قالت: لا يمه بكلمه في الليل مو الحين
أم مساعد: هو بغربه مو كل ساعة يقدر يكلمك... والله أنا مو عاجبني حالك مع زوجك... الله يهديك دوم تاركته
عبير بثقه: لا تخافين يمه... سمنه على عسل
ريم ناظرت أمها وهي تتذكر الورقة اللي تدين أبو نواف.... خافت على أمها" مدري وين بتوديك ثقتك الزايدة ".... جلست وهي تسمع سوالف خالاتها وجدتها....
وصل أبو نواف لبيت زوجته ودق الجرس.... ركضت بسمة للباب وناظرت من العين السحرية.... شافت أبوها واقف وبيده شنطته....
فتحت الباب وقالت: بابا
ضمها أبو نواف وباسها: كيفك بسومه
بسمة: بخير... تفضل
دخل أبو نواف وجلس جنب زوجته: سلام منيرة
أم نواف مبتسمه: وعليكم السلام... انتهى الإجتماع
أبو نواف: وأخيرا... - وبدا يسولفون عن الشركة والاجتماع وما انتبه الا لما حس ببسمه نايمة.... وحاطه راسها على كتفه....
هزها بخفيف: بسمة بسومه... قومي نامي فوق
وقفت بسمة: حسنا
قام أبو نواف معها: تعالي أوصلك لغرفتك
راح معها فوق ولحقتهم أم نواف وراحت غرفتها.... دخلت بسمة للحمام فرشت أسنانها وبدلت ملابسها وشافت أبوها جالس على سريرها....
التفت لها أبو نواف وتذكر لما قالت له ريم أنا بناته يشبهونه.... ابتسم وهو يبعد الغطا عن سريرها: تعالي حبيبتي نامي
تمددت بسمة وغطاها ابوها وقال: وين حابه تروحين بكرة
بسمة: مدينة الألعاب
أبو نواف: خلاص من بكرة إن شاء الله لما تجين من المدرسة... نروح كلنا الملاهي
انبسطت بسمة: وستلعب معي
ابتسم أبو نواف: أكييييد... - شغل الأباجورة وباسها: تصبحين على خير يا حلوة
بسمة: تصبح على خير بابا
قام وطفى النور وطلع بهدوء وسكر الباب.... توه بينزل شاف زوجته واقفة....
ام نواف: سالم... تعال معي لقد اعددت لك عشاء خفيفا
ابتسم أبو نواف: بس شنطتي تحت
أم نواف: اخذتها لغرفتنا... هيا تعال
دخل أبو نواف الغرفة كانت أقل فخامة من غرفته في بيته.... بس انتبه على الطاولة اللي عليها شمع مع العشاء....
مسكت أم نواف يده عشان يمشي معها لطاولة.... جلسوا وهم ساكتين....
ناظر أبو نواف صحنه وقال: ستيك؟؟
ابتسمت أم نواف: نعم... صديقتي جواهر الإماراتية علمتني وصفات كثيرة للطبخ... وقد أعطتي كتب شرقية وأنا أتعلم منها
أكل أبو نواف قطعه وقالت أم نواف: ما رأيك... لذيذ؟؟
أبو نواف شرب عصير على طول لأنها كثرت البهار.... وقال: لو تحطي فيه سم بيكون رووعة
أم نواف: هههههههه البهار كثيرة اليس كذالك
أبو نواف: ما عليك ممتاز عندي بهار أحسن من الملح
وظلوا يسولفون الين قام أبو نواف وراح الحمام يتروش.... طلع من الحمام وهو يجفف شعره.... شافها واقفة تناظر نفسها بالمرايا.... التفتت له وقال: ولهت عليك
خذت رنا التلفون النقال وركضت لغرفتها.... جلست ع السرير وتدق عليه.... ما همها فرق الوقت كل اللي يهمها أنه كلم ريم وما كلمها....
صحى أبو نواف من إزعاج جواله.... خذه ورد بصوت كله نوم: الووو
قفزت رنا من الفرحة: دااااادي ولهت عليك مووت موووووت
أبو نواف حط راسه ع المخده وقال: استغفر الله العظيم... وش عندك داقة الحين هااه
رنا: عادي... أنت اللي وش عندك نايم من الحين كنك دجاجة
ابتسم أبو نواف على تعليق بنته: ليه كم الساعة
ناظرت رنا الساعة: الساعه 12 تو الناس
أبو نواف: حسبي الله على شيطانك... عندي 3 الفجر
رنا: طيب دااادي بس نص ساعة عشان أعطيك التقرير
أبو نواف بشوية عصبية: رنـــا... مع السلامة... - سكر الخط والتفت للجهة الثانية ونام....
أما رنا انفجرت ضحك: ههههههههههههههه يحليله داادي عصب
دخلت ريم وقالت: رنوووه وش عندك تضحكين
رنا وهي مبتسمة: كلمت داادي وعصب علي
ريم: الحين
رنا: من ثواني بس
ريم: حرام عليك أكيد كان نايم
رنا: ههههههههههه أهم شي سمعت صوته
بنفس الوقت….
وصل أبو جراح ومعه الرجال.... وصلوا لأرض المملكة تنفس الرجال هواها.... من سنين وهو في ألمانيا ومحبوس بالمستشفى....
أبو جراح: ها يا وليد تذكر المطار
وليد: لا والله شكله جديد علي... أي مطار هذا
أبو جراح: هذا مطار الظهران
وليد: اهاا... تعرف أحس أنا أسم وليد مو غريب علي... كأني أعرف حد بها الأسم
أبو جراح: هذا أكبر تقدم لك... وإن شاء الله بتتذكر أهلك... عموما خلنا نروح البيت
وأنا بكلم واحد من معارفي يشتغل بجريدة اليوم... نقولهم عن سالفتك وإن شاء الله يطلعون أهلك
وليد: إن شاء الله
يتبع......................
بعد يومين ركب نواف سيارة أبو طارق ولد عم أبوه....
نواف: السلام عليكم
أبو طارق وأسماء: وعليكم السلام
أسماء بحماس: يللا بابا حرك
أبو طارق وهو يسوق: ها يا نواف وش شعورك وأنت رايح تشوف أمك
نواف: مرتبك شوي
أسماء: آآآآه ولهانة على أمي كثييير... أكثر من شهرين ما شفتها
نواف: وش أقول أنا... ما شفت الا صورة قديمه لها
أسماء: صدقني راح تحبها كثير... والله إني كل ما أدخل غرفتها أشوفها تناظر صورتك
أبو طارق: طبيعي لأنه الوحيد اللي ما شافته
أسماء: أحلى حاجة إنا أبوي هناك ينتظرنا... واااو وناسة
ابتسم نواف وناظر النافذة وهو متحمس لبكرة.... لكن اللي مخرب عليه بيكون موجود مع أبوه اللي يشك فيه....
بعد كم ساعة وصلوا لمطار بريطانيا.... وعلى طول ع الفندق وبعد ما ارتاحوا طلعوا.... ركبوا السيارة اللي وصلتهم للمكان المطلوب....
نزلت أسماء وهي حافظه الطريق.... دقت الجرس وفتح أبو نواف الباب....
أبو نواف: أهلين أسومه
ضمته أسماء: أهلين بابا... ولهت عليك كثير
أبو نواف: وأنا أكثر وين نواف... لا تقولين ما جا
بعدت أسماء: هناك واقف مع بابا زياد... - مرت من جنب أبوها ودخلت وسلمت على أمها وأختها بسمة.... وركض لعند جدها وجدتها....
في الشارع....
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك