رواية وصية حقد -3
مبرد (رغم انها اخت هيوف الا ان شخصيتها نسخه عن دانه )
هيوف _ خلاص بس اسكتوا لا حد يقول لامي ولا لخالتي انا بتصرف يوم السبت
دانه ناظرتها بضعف عارفه انها ما تقدر تخلي هيوف تسوي ذا الشي لحالها لازم تساعدها
.................................................. .......... ..................
جالس على كرسي منفرد في غرفته وحاط رجل على رجل بطريقه لبقه والكتاب مفرود على احدى ساقيه يد تسمك الكتاب ويد تسند دقنه بحركة تفكير كان واضح من شكله انه مهتم بقراءه الكتاب المختص بالاستشاره الماليه ودورها في انماء الاقتصاد الدولي في لحظه رفع راسه وفصخ النظاره ذات الاطار الاسود مستطيلة الشكل وناظر الدريشه القريبه منه الهيلوكبتر بتجي بعد ساعه عشان تاخذه للحفل المقام في روما هو الحين موجود في فينيس في جزيرته المسماه جزيرة اول المطر
اندق بابه ناظر الباب
طارق بهدوء رزين _ ادخل
دخل محمد السكرتير _ استاذ طارق هاذي الاوراق لازم توقعها قبل ما تجي الهلوكبتر
طارق ناظره وهز راسه يعني تعال
خذا الورق وقعد يناظره _ ليه مو هاذي المناقصه كانت راح تكون لشركه الباري معقوله ما رست عليهم
محمد_ لا بس رئيس شركه الباري قرر يكون وصي على التوصيات يعني شريك مو صاحب مناقصه
طارق بتفكير _ كم نسبه الاسهم اللي شراها
محمد_ 19 % من الاسهم
طارق _ كم نسبه الاسهم اللي راح تنزل في السوق
محمد_ عشان رفع راس المال بس 25 % انا اعتقد ان شركه واي كاي غلطت كان مفروض تطلب قرض مو تنزل ذي النسبه كلها
طارق _ محمد حاول تشتري على الاقل نص الاسهم النازله في السوق بس بشكل مخفي وهاك الاوراق ما راح نقدم على المناقصه تجاهلها
محمد بنظرة تقدير خذا الاوراق وطلع من الغرفه
طارق حط الكتاب على الطاوله وقام من الكرسي كم تغيرت ملامح هذا الوجه مازالت تلك العيون تمثل الفطنه والذكاء لكن لم يعد بها لمعه شعره ينمو بكثرة وباهمال لكن مازال محتفظ بقصره وبتحليقة تلك الخصله عند مقدمه الراس لم يعد اسمر البشره نظرا لعدم ملاقاته الشمس الا نادرا وعادت بشرته تمثل الصفاء ..طوله السنين تكفلت بزيادته حتى اصبح كالعلم شامخ يرى من بعيد ....جسمه كان رائع التنسيق غير متنافر الاجزاء عضلاته معتنى به نظرا لممارسته اليوميه لرياضه رفع الاثقال من يراه يقوم بهذه التمارين يعتقد انه يريد ان يعاقب نفسه او يحاول ان يتناسى شي من ماضيه وعند رؤيتك لعنقه وتلك العلامه التي تمثل جرح مرسوم على شكل نص دائره تعرف ان ذلك الماضي لم يكن بالسهل .... هذا هو طارق الراسي رجل الاعمال المعروف المستشار المالي المشهور الراس المالي الذي يقف الناس خوفا منه لكن رغم هذا كان قليل الظهور في المجتمع البرجوازي وهذا كان بسبب يجهله الجميع ما عدا طارق كانه يريد ان يختار يوم ليظهر فيه علنيا لكنه يذهب لتلك اللقاءات الصغيره كلقاء اليوم الذي لا يحضره الا رجال الاعمال المهمين جدا جدا ولا يتعدى عددهم ال80 رجل مع عائلاتهم وطارق كان متاكد انه لن يلاقي من لا يرغب في لقائهم .........
سمع هدير الهلوكبتر التي يقوم بقيادتها بنفسه خرج من قصره الصغير الرائع المبني على طراز روميو وجولييت ببدلته السوداء متناسقه التفصيل تلتف على جسده الرائع ركب الطائره
واقلع بها الى السماء وكانه طير يريد ان يتحرر من تلك القيود التي تقيده في الارض
.................................................. .......... ..............
دانه قفلت الباب حقها بسرعه وهي تضحك ضحكتها الرقيقه الصافيه وناظرت هيوف اللي كانت جالسه على الطراحه حقتها مستعده للنوم
هيوف ناظرتها ولقت في يدها بطاطس ليز ملح وخل كبير وثنين ميرندا تفاح اخضر وشطه
دانه قعدت تضحك وتناظر الباب _ هيوف هيوف منتي مصدقه وش سويت
هيوف باستغراب _وش سويتي
دانه جاتها وجلست على طراحتها اللي كانت مفروشه قرب طراحة هيوف وحطت البطاطس والاغراض بينهم _ سرقتها من يد في وجبتها لي ولك
هيوف ضحكت _ وش سوت في
دانه ما تكلمت في قعدت تدق الباب بقوه
في من ورا الباب _ افتحوا يا ملاعين والله جوعانه مجمعه فسحه اسبوع عشان اجيبها
هيوف فتحت البطاطس وصبت الشطه وقعدت تاكل وتضحك
دانه قعدت تناظر الاكل وجعتها فكره ان اختها جمعت فلوسها وفي الاخير هي اللي سرقت
دانه _ هيوف خلاص تكفين بعطيها حراام
هيوف ضربت يد دانه _ اقول انسي كلي كلي اتركيك بلا تكذب فسحتها في اليوم اربعه ريال لو جمعتها كان قدرت تشتري خمسه من ذا مو واحد بلا تكذب
دانه قعدت تاكل بحسره _طيب على الاقل نبقي لهم هي ويا موزه
هيوف وهي تفكر في شي ثاني _ ما عندي مانع
كلوا دانه تاكل شويه اما هيوف تاكل لقمات كبيره بقى شوي
هيوف قامت بالبطاطس والبقايا اللي فيه _ في بعدك عند الباب
في بصوت يائس _ ايوه تكفون لا تاكلونه
هيوف فتحت الباب وفي على طول قامت تبغى تاخذ البطاطس
هيوف مدت الباغه ويوم قربت يد في منها رمت هيوف الباغه بحركه ذكيه المهم ان البطاطس طاح وتنثر في كان وجهها تكسوه العبره ودانه منقهره تمنت تموت ولا تسرق من اختها
في ناظرت دانه _ شفتي وش وسويتي الحين انا لا كليت عشى وانتي ولا همك تبدين هيوف علي
هيوف ساكته بس كانت مرتاحه كثير
دانه باسف صادق _ اسفه والله بشتري لك بكره ابشري اللي تبغينه يجيك
في _ ما ابغى منك شي يا حشره
هيوف بانفعال مفاجى _ في اقول تلايطي لا عاد ترفعين صوتك وش نسوي طاح البطاطس ايش تبغين منا نبكي لك
في _ انتي لا تتدخلين بيني وبين اختي
هيوف وكانها تنتظر الفرصه عطتها كف قوي
في مسكت خدها مكان الكف وبسرعه طارت في هيوف تبغى تضربها لكن هيوف كانها وحش مسكت فَي ومددته وقعدت تترفس في بطنها وانبطحت عليها وقعدت تمزع شعرها وتكفخها دانه تحاول تفك بينهم وتصارخ تبغى احد يساعدها جات امها وخالتها وموزه لكن هيوف ما انفكت كانت انسانه ثانيه شيطان وجهها احمر ودموعها تنزل بقوه في كانت راح تموت بين ايدها
مشافوا الاسالم يركض ويشيل هيوف من على في ويرميها على الجدار بقوه كبيره منها تعتقد ان هيوف انكسر ظهرها
في كان وجهها مليان دم ام كامل حضنت بنتها كان البيت يعمه التوتر والصراخ
ام هيوف ركضت لبنتها لانهم شافوا هيوف تمسك ظهرها وتتلوى
ام هيوف _ هيوف هيوف انتي بخير ايش فيك
وفي ذي اللحظه السكوت عم ما عدا انين هيوف الموجع ابو كامل دخل مع ولده كامل
ابو كامل ناظر هيوف على طول _ من اللي ضرب بنت علي ( وناظر سالم اللي نزل عيونه )
ابو كامل مشى والغضب بسيره لولده سالم وعطاه كف قوي كامل وقف بينهم _ يبه هدي هذولا بزران
ابو كامل _ ما حد يمد يده على بنت علي وانا حي
في برجا _ يبه ضربتني شوف وش سوت فيني
كامل ناظر اخته وفتح عينه بقوه كانت مضروبه بقوه وحشيه _ وش اللي صار
ابو كامل _ قومي اعتذري من بنت عمك وحبيها على راسها
الكل انصدم ام كامل بغت تموت كان وجهها اسود هيوف كانت مغمضه عينها وسامعه كل الكلام وعارفه سببه وام هيوف لا تعليق
سالم بصوت عالي وهو يشوف في تناظر ابوها بصدمه _ تخسى اضربني اذبحني بس تخسى اختي تحبها على راسها( كامل مسك اخيه وطلعه عشان لا يتهور سالم رفض لكن كامل كان اقوى وطلعه )
ابو كامل مسك بنته من شعرها وسحبها لهيوف _ حبيها على راسها
هيوف فتحت عينها وناظرت عمها بنظره توجع فيها الم وكره وحزن _ اتركها انا انا الغلطانه ....حبت في على خدها في ما صدقت قعدت تبكي بصوت عالي في حضن هيوف حضنتها بقوه
العم ناظر بنته وبنت اخيه قلبه تالم طلع من الغرفه بسرعه مهما حاول ما يقدر يفغر لنفسه غلطه
ام هيوف وام كامل رغم ان قلوبهم ما صفت لبعض طلعوا وموزه ودانه قربوا للبنتين وقعدوا يبكون معهم الكل بكى الا هيوف اللي مغمضه عينها والذكريات تنهش جسدها بالم ووحشيه
اخبرني كيف استطعت ان تنظر مباشرة في عيني
هل تعتقد ان ما فعلته يغتفر ام تعتقد ان الايام محته
هل اردت ان اسمعك مرة اخرى صوت انيني
ام ان ضميرك لم يعد يهتم وفعلتك جمدت قلبك وقسته
على طاولة الطعام اجتمعت عايله الشهال
ابو حاتم ناظر همايل _ همايل فيك شي احسك زعلانه
همايل كانت بترد بس مرت ابوها ردت بدالها _ بلا تلقاها مشتاقه لسعد
ابو حاتم ضحك وناظر بنته اللي ابتسمت _ همايل كل هذا اهتمام خفي يا بنتي ابوه وصاه بذي الرحله لايطاليا ولما تتزوجون لا تخلينه يروح لمكان بدونك
همايل تناظر ابوها سبحان الله نفس تفكير سعد
بدريه _ ايوه يا همايل لا تتركينه يروح لمكان بدونك الرجاجيل ما يتامن لهم شوفي هذا انا ما اخلي ابوك يروح لمكان الا ورجولي على رجوله
همايل رجعت تشرب شوربتها ولا ردت وش تقول اني ما اغير على سعد وبالطقاق فيه
حاتم ناظر غدير زوجته _ حبيتي ليه ما تاكلين
ابو حاتم _ ايش في اليوم الشابات زعلانات
همايل ابتسمت ابوها ما عرف انه سب زوجته بذي الكلمه يعني زوجته مو زعلانه لانها عجوز
غدير ناظرت حاتم _ لا حبيبي ما فيني شي بس بغيت اخفف
حاتم بحب خالص _ المهم انتبهي على نفسك حبيبتي
همايل ناظرتهم ودها تعيش بذا الحب في حياتها بس ليه الحب يطلبها تفكر فيه الشخص اللي غيبته جرحتها وضيعت شخصيتها وخلتها متزعزعه
قامت من على الطاوله
ابو حاتم _ ها همايل ليه قمتي
همايل تبي تدق زوجة اخوها اللي ما تحبها _ ابغى اخفف
.................................................. ........
في قاعه ذهبيه كبيره تجمع رجال الاعمال وعائلاتهم كانت القاعه مريحه والموجودين من المعروفين جدا في عالم الاعمال
محمد يمشي مع طارق _ الشيخ فهد العاصي حضر اليوم وفيه اخبار تقول انه جاي عشان صفقه الاسمنت
طارق ابتسم _ جاي عشاني اذن
محمد_ قبل ساعه عرفت
طارق _ ولده الكبير جا
محمد _ لا الشيخ حمد جلس عشان يحضر المؤتمر اللي في دبي وكان مفروض الشيخ صغير هو اللي يحضر بس سافر فرنسا عشان سباق الهجن لا تنسى بارك للشيخ ولده فاز بالمرتبه الثانيه
طارق _ ان شاءالله (ناظر حوله بهدوء ) محمد ما اشوف الباري موجود
محمد_ لا موجود بس في القاعه الثانيه مع صاحب شركه تي ام شين حاضر مع اخته الصغيره جود اتمنى لما تسلم عليهم ما تذكر سالفه ابوهم الله يرحمه البنت تتحسس من ذا الشي
طارق هز راسه بهدوء _ حاضر اذن اول شي لازم اسويه اسلم على الباري والاخير اسلم على الشيخ فهد عشان راح اطول معه الا اقول علي ما جا للحين ليه
محمد__ بعد ثواني يكون هنا الانسه بسمه والانسه امل معه
طارق ناظر محمد _ امل معه ليه تحضر
محمد_ انت وافقت لها امس
طارق _ انا
محمد ابتسم _ اكيد ما كنت عارف وش هي تقول
طارق سكت لكن بان انه عصب ما يحب احد يستغفله
وخذا جواله ودق عليها
طارق _ الو امل وينك الحين
امل بخوف _ مع علي وبسمه جايين
طارق _ امل حبيبتي لا اشوفك هنا
امل برجا _طارق تكفا والله ان ثوبي ساتر ولابسه حجاب اسود مو ملون
طارق _ كويس كويس لكن الحفله لا تجينها اموله لا تخليني اكرر كلامي مرتين طيب حبيبيتي مع السلامه
.................................................. .......... ...........
جود ناظرت الرجل اللي متوجه نحوهم باعجاب كان طويل ووسيم غريبه نادرا تلقى مثل هاذي التوليفه في عالم الاعمال اخوها يمثل هذا الشي بالنسبه لها وهي متاكده ان الناس شايفين هذا الشي وهذا من عيون الشابات الموجودات في القاعه اللي كانوا يناظرون اخوها باعجاب لكن هي نظراتها توجهت للشاب القادم وتعتقد ان حتى المتواجدات في ذي القاعه الجانبيه توجهت انظارهم له كانت عيونه مثيره تخفي سر هذا اللي طرا في عقلها اول شي
قرب منهم اذن يبغاهم هم اخوها التفت له وابتسم له هاذي الابتسامه تعني التحدي سلم على اخوها صوته رائع سلس رخيم اخوها قدم الرجل لها
طارق التفت لجود اللي كانت ايه من الجمال _ السلام عليكم
جود بابتسامه _ وعليكم السلام
طارق ناظر اخوها وبدوا يتكلمون عن اشياء انا ما افهمها لكن حسيت اني ابغى افهمها من كلام الرجل اللي قدامي كان شرحه ممتع لكن مع كل هذا تمنيت ان كامل موجود احتجته لو اشوف وجهه ارتاح وهذا اللي ابغاه اني ارتاح
جا رجل ثاني متواضع
محمد_ السلام عليكم
الكل _ عليكم السلام
محمد_ استاذ طارق السيد سعد الغافل جا
طارق ناظره _ من سعد الغافل (وكان واضح ان اخو جود بعد ما يعرف من هو سعد )
محمد بنبرة ذات معنى _ نسيب السيد بدر الشهال
طارق قعد يناظر محمد بصدمه
جود ابتسمت اخيرا قالوا شي تفهمه _ اااه خطيب همايل الشهال
جود توقفت عن الكلام لان طارق التفت لها وسلط نظراته عليها بس هي عرفت انه ما كان يناظرها كانت عيونه غريبه
محمد_ تبغى تسلم عليه
طارق التفت له _ اكيد (والتفت لجود والسيد الباري )اعذروني
راح مع السكرتير حقه بمشيه الواثق لكن هي متاكده ان نظراته تقول شي غير متوقع معقوله يعرف همايل بس ليه يستغرب همايل مخطوبه لها اربع سنين اللي ما عرف صار يعرف ممكن فيه سبب ثاني
جود ناظرت اخوها بحب _ الرجال هذا غريب
.................................... .........................
طارق _ وينه
محمد ناظر سيده وهو معبس _ هناك
طارق بتساؤل_ جا علي
محمد ناظر سيده _ ايوه الانسه امل ما جات ولا الانسه بسمه قال علي انهم رجعوا للبيت
طارق ناظر سعد بنظره غامضه وبتمعن بعدين ناظر محمد وقال بثبات مهزوز _ انا راح اروح اسلم على الشيخ فهد قول لعلي يسلم على السيد سعد نيابة عني
,,,,,,,,,,,,,,.................................... .......... ..........
اتعلم ماذا سيحدث ايها الماضي ............ ساقوم باحيائك
وصية الحقد (ذكريات مسروقه 2)####
.................................................. .......... ...........................
كامل _ وينك الحين
جود _ اكلمك من غرفة الملابس
كامل _ وش لابسه
جود_ اصور نفسي وارسلك الصوره اوكيه بعد شوي
كامل _ اوكيه تعرفين مفروض اني معك بس انا مو عارف ليه اخوك على اخر دقيقه رفض انه ياخذني معاه وخذا تركي
جود_ انا متاكده ان اخي يعرف شي هو وانت عارف يفهم من ادنى اشاره
كامل _ خليه يعرف لازم يعرف اني ما اقدر اتركك لو يسوي اللي يسوي
جود_ وش قاعد تسوي الحين
كامل _ ولا شي جالس في المكتب بين الورق
جود_ كم مره فكرت فيني اليوم
كامل _ امممم تقدرين تقولين كل ساعه ستين مره
جود ضحكت _ والله كويس يعني فكرت فيني اكثر ما فكرت فيك انا فكرت فيك بس في اليوم اربع وعشرين مره
كامل ضحك _ ما ينفع ذا الشي كثري الجرعه شوي
جود_ من عيوني ... كامل ابغى اسئلك من هو طارق الراسي
كامل سكت شوي _ اااه رئيس شركات ار ال سي هذا رجل معروف وصارم وظايف شركته ما يحصل عليها الا النخبه عايش في الامارات مع عايلته اعتقد انه جمع امواله من بعد اختراع سواه هذا اللي اعرفه لا بعد اعرف ان ابوه مات في السجن قبل 16 سنه ليه يا روحي تسئلين
جود_ بس شفته اليوم وحسيت انه هو ويا اخوي متنافسين
كامل _ اكيد شركته قويه معروفه في الاستشاره الماليه
جود_ ايه صح سمعت شي زي كذا كامل حبيبي تاخرت على اخوي باي حبيبي
كامل _ باي دقي علي الليل قبل ما تنامين ولا تنسين ارسلي الصوره
جود_ اكييد باي
كامل _ باي
قفل الجوال وقعد يناظره بهيام وبعد شوي جاه مسج وفتحه وغمض عينه كان شكلها يوجع القلب
باس الجوال
احبــــــــــــــــــــك
الفصل الرابع
ملاك بين البشر
فيه ناس قد ما تاخذ قد ما تعطي للثاني
وانا يا ما عطيت وقلت ممكن الخير ينتشر
اضحك لهم لفرحهم ويضحكون على لما اعاني
وانا مازلت عايشه ملاكا بين البشر
فاتحه دفتر الرياضيات عشان تحل الواجب لكن افكارها غلبتها وملت دفترها بكتابتها الرمزيه كل الصفحه كانت ممتلئه بحرف الفاء
F+D=love
F my love
F I love you
FFFFFFFFFFFFFFFFFFF للابد
دانه تناظر الحرف برضا
هيوف تناظرها بهدوء
هيوف _ انتي مهبوله تعتقدين انه ممكن يناظر وحده مثلك
دانه ناظرت هيوف وابتسمت _ ليه ما يناظرني هيوف انتي ما شفتي انا شفته وهو جاي ياخذ وعد كان يناظرني وكانه عارفني
هيوف وهي تحاول تحبطها _ كيف يعرفك وانتي لابسه العبايه دانه لا تنجرين ورا ظنونك بلا اللي يحب كذا يعتقد ان اللي يحبه يكن لها نفس المشاعر
دانه دمعت _ لا يا هيوف حتى وعد تبيني لي بعض الكلمات
هيوف _ وليه تبين لك بعض الاشياء وعد زميلتنا يعني لو به شي كان صارحتك دغري
دانه ناظرت هيوف وقربت منها وحطت راسها في حضنها وبكت
دانه _ بس يا هيوف انا احبه وهو راح يسافر عشان دراسه الماجستير قريب ابغى اعرف هل هو يحبني ولا لا بموت لو سافر ولا عرفت اذا هو يحبني ولا لا
هيوف مسدت شعر صديقتها هذا اللي صاير لدانه بسبتها لان وعد جاتها وقالتلها ان اخوها فايز معجب بدانه وطلبت من هيوف انها تعرف اذا دانه تبادله نفس المشاعر بس هيوف قالتلها ان هذا مستحيل لان دانه تحب ولد الجيران بسام اللي عمرهم اصلا ما شافوه
..
هيوف _ انسيه لا عاد تكونين ضعيفه كذا
دانه _ هيوف كيف تقدرين تكونين بذا البرود انتي عمرك ما حبيتي
هيوف سكتت ما ردت لا عمرها ما حبت ما كان عندها وقت كانت بس تكره
هيوف _ اتركيك من ذا الكلام الخايس حب بلا حب بلا هم بلا وجع قلب تخيلي اكتشفت ان موزه تحب الاخ سالم وفي الدلخ تحب صديق سالم هادي يا انا بغيت اموت ضحك وانا اتسمع عليهم هم منين عرفوا ذا الكلام
دانه ابتسمت من بين دموعها _ ايوه انا عارفه ان موزه تحب سالم لكن في جديده بس هادي هادي صدق غريبه كيف ربي جمع ووفق
هيوف _ المهم روحي حلي لنا واجب الرياضيات ديمه بتغيب هاك دفتري انسخي لي الواجب بس لا تنسخين لي حرف الفاء والقلوب يا المغرمه
دانه ضحكت بخجل _ هيوف تعرفين ممكن اتهور واعترف لوعد بحبي لاخوها ممكن تساعدني
هيوف _ لا لا لا بس قولي لها والله راح يكون اخر ما بيني وبينك ما ابيك تطيحين من عيني دانه اوعديني انك ما راح تقولين لها
دانه _ اوعدك انا قلت ممكن اتهور بس ما قلت اني تهورت
هيوف _كويس
طلعت من الغرفه وهي تفكر انها نجت من الموت باعجوبه
راحت لغرفه في وموزه كانت في نايمه وموزه تحل واجباتها
هيوف بصوت واطي _ موزه وش قاعده تسوين
موزه _ احل واجباتي انا وفي الله يهديك يا هيوف ضربك قوي امس ما قدرت ترقد واليوم عيونها توجعها بس ما قالت لاحد
هيوف وقفت شوي ما تكلمت _ وانتي ليه تحلين لها اتركي الدفتر حقها الحين
موزه ناظرت اختها باستغراب _ انتي ما سمعتي اقولك ابنت تعبانه
هيوف _ اتركيه لما تقوم من النوم خليها تحله قولي ما فضيت يله ما عاد الا هي تحلين وتعبين نفسك وهي تاخذها بارده مبرده
موزه قفلت دفتر في عارفه اختها ما ينفع معها الاقناع _ ها قفلته تبين شي ثاني
هيوف _ لا بس بغيت احد يجلس معي يله بنزل تحت امري لله
موزه اول ما شافت هيوف طلعت فتحت دفتر في ورجعت تحل
هيوف قفلت الباب وهي متاكده ان موزه بترجع تحل لفي بس خلاص وش عليها هاذي حركات بزران اللي قاعده تسويها من اليوم راح اوريهم والله لاخلي قلب النجس يموت من القهر كم مره وعدت نفسها بس ما زالت تحس نفسها ما سوت شي
.................................................. .......... ........
صباح الغد
وزعوا الواجبات كالعاده
دانه بابتسامه برأه _ هذا اخر واجب كطالبه ثانوي اعطيكم ياه
وعد عطتهم واجب الكيمياء _ وهذا بعد بنات ماني مصدقه ان الاختبارات بعد اسبوعين بس
ديمه _ بلا صدقي خلينا نرتاح فكه اوووف قرف غصبى خلصنا
هيوف ناظرتهم _ وش له ذا التعلق بالمدرسه تروه مبنى الا اقول ديمه خبري بتغيبين وش مسرحك خليت دانه تحللي الرياضيات
ديمه _ اووووه اسفه رغم هذا حليتها لكم
هيوف _ خليه على كبدك مالت عليك
ديمه _ هيوف وش ذا المزاج الشيطاني على ذا الصباح استهدي بالله
وعد _ تلقونها عشان النسبه قربت الجامعات وانا وياها نسبنا زي وجيهنا احم احم حلوه
دانه _ لا يكون عشان كذا زعلانه هيوف هيوف انا ناويه ادخل اللي تدخلينه لو حتى كان ايش كذا ولا كذا مابه وظايف والطب ممنوع ما عندي مانع
هيوف _ اسمعوا تخسون انتي وياها مو النسبه اللي ترفع ضغطي بعدين انا ناويه اجلس في البيت ما ابغى دراسه ليه المرمطه والقرف اشتغل مع امي وخالتي احسن لي
ديمه _ لا حبيبتي ما تفقنا على كذا اتفقنا ندخل كلنا الجامعه
هيوف _ مابه شي يثبت اني وقعت
وعد ضحكت _ احب المحتاط اقول لا يكثر خلاص اقطعوا ذي السالفه اللي تجيب الهم اوووه في خبر ابغى اقوله انا ممكن اسافر مع فايز لاستراليا وادرس هناك
دانه سود وجهها
ديمه _ لا لا تفكرين كيف تستحملين تجلسين معه لحالكم اكيد المسؤليه بتكبر على راسك
وعد_ بسم الله هدي علي انا راح اجي للمفيد اخي فايز وتحت رغبه امي خطب امس بنت جيرانا غاليه وراح يتزوجون بعد الاختبارات مباشرة وانا راح اسافر معهم هذا مو اكيد اقصد سفري معهم عشان ممكن ان بعدهم عرسان وما الى ذلك
هيوف ناظرت دانه ودانه بدون شعور ناظرت هيوف
دانه قامت
وعد ناظرتها _ وين رايحه خليني اكمل القصه
دانه بصوت ماهي عارفه منين طالع _ ابغى اروح الحمام اعذروني
هيوف ناظرت بنت عمها وهي تطلع من الصف حست ان دانه بتموت
وعد ناظرت هيوف باستغراب _ وش في دانه
هيوف _ ما اعرف
ديمه _ اتركونا من دانه كملي السالفه متى الزواج وهل حن مدعوين
وعد _ اكيد مدعوين يا الدلوخ
هيوف بحركه مقصوده نثرت على ثوبها مويه وشهقت _ اسفه يا بنات بروح الحمام
وعد_ حتى انتي وش فيه بلا مويه
هيوف _ اقول اسكتي احس فيه شي ثاني مو بس مويه بروح
وعد_ يله روحي (ورجعت تكلم ديمه ) شفتي غاليه احسن شي انها تناسب فايز متعلمه ومثقفه ...........
.................................................. ..........
دانه داخل واحد من الحمامات تبكي حبها اللي انتهى بابشع طريقه تخيلتها
كم تخيلت انها راح تغار عليه لكن كيف يحقلها بعد هاليوم انها تغار من زوجته كيف تقدر تتخيل انه ما يحقلها تفكر فيه
وما راح يكون الفارس المثالي لقصه حبها الاسطوريه .......
هيوف دقت الحمام اللي متعوده ان دانه تبكي فيه دانه فتحت لها
هيوف _ دانه
دانه حضنت هيوف وبكت بقوه وجلست على ذا الحال شويه بعدين قالت _ فايز فايز يا هيوف كيف؟؟ احس اني بموت ما اقدر اكمل اليوم تكفين ابغى اروح البيت احس اني بنفضح اذا جلست اكثر ابغى اروح الحين
هيوف _ لا خليك قويه بعدين ما به احد يجي ياخذك اجلسي يله
دانه بقوه _ فايز راح يا هيوف راح
هيوف _ معليه بدال فايز ميه وتريه (اندق باب الحمام)
هيوف بغضب _ نعم
وعد _افتحوا الباب
دانه ناظرت هيوف بخوف اما هيوف فكان وجهها ميت
فتحوا الباب
وعد ناظرت هيوف نظره لها الف معنى بعدين ناظرت دانه _ ليه ما قلتيلي انك تحبينه ليه خبيتي علي
دانه تجمدت وناظرت هيوف
وعد ووجهها باين عليه الغضب _ وانتي يا هيوف ليه لما سئلتك اذا دانه تبادل فايز نفس الشعور قلتي لي لا وانها تحب ولد جيرانكم
دانه بشهقه _ ايش
هيوف ناظرت دانه بهدوء بعدين ناظرت وعد ولا أي تعبير على وجهها
وعد_ انتي ايش انتي خربتي حياة اخوي وصديقتي انتي تظنين فايز راضي بغاليه بلا عشان امي طلبته لكن هو ما يبغى الا دانه كيف طاوعك قلبك تسوين كذا
دانه قعدت تناظر هيوف ما هي مصدقه
هيوف بصوت غريب حاقد _ وطي صوتك انا مو اصغر بزرانك عشان تكلميني كذا فهمتي
وعد انصدمت ثواني مفروض هيوف تشعر بالذنب مو بقوه عين تراد _ ليه ليه سويتي كذا فهميني الحين انا جد معصبه ودي اذبحك شفت اخي يتعذب وهذا كله منك كله منك
هيوف ناظرت وعد في عيونها مباشرة _ عصبي ولا سوي اللي تبين وطي صوتك لان جد انا اللي بديت اعصب من قرفك ثانيا اخوك في جهنم عساه لا تهنى في يوم طيب
وعد بصوت عالي _ انتي حشره
هيوف ناظرت وعد من فوق لتحت وبدت تقرب منها تبغى توريها لكن كلام دانه شلها
دانه ناظرت وعد وقالت بصوت يائس _ وعد بس خلاص لا عاد تتكلمين مع هيوف بذي الطريقه هي اكيد شافت شي من مصلحتي ولا ما كان سوت كذا انا عارفه هيوف
وعد ناظرت دانه بصدمه وناظرت هيوف اللي وقفت من التقدم وقعدت تناظر دانه _ لكن انا مو عارفتها احسها غريبه هيوف اتمنى انك تنسيني ضيعتي حياة دانه ودانه رضت لكن انا لا ما راح اسامحك على حياة اخوي الله لا يسامحك
هيوف رجعت تناظر وعد بهدوء منرفز وعلى وجهها علامه استهزاء
وعد_ دايمن شفت في عيونك الحقد بس مع ذلك قلت لنفسي اتوهم لكن صدق انتي صدمة عمري
ديمه جات بعد ما سمعت الكلام الاخير ووعد كانت بتروح مسكتها
ديمه _ ارجعي وش فيه
وعد فكت يد ديمه بقوه _ اتركيني
هيوف تناظر طريق وعد اللي سلكته تحس قلبها في ثلاجه مو حاسه بالندم وما شافت الا يد دانه تلتف حولها وتحضنها
دانه _ لا تزعلين يا هيوف انا مو زعلانه منك ووعد بترضى بعدين لا تخافين
هيوف ناظرتها مو مصدقه
دانه بابتسامه _ انا عارفه انك تشوفين فايز واحد ما ينفعلي انا مو زعلانه منك انا زعلانه من نفسي ليه ضعيفه كذا لكن عادي ربي ما كتب
ديمه _ وش السالفه ابغى افهم
هيوف حضنت دانه بهدوء واحد غير مهتم
دانه مع ان في صدرها الم وزعل على هيوف بس هي ما تبغى تجرح هيوف ولا تالمها مثل ماهي متالمه حضنت صديقتها ودموع قلبها تنزل بغزراه على حبها الوحيد اللي صار حبها الوحيد الفاشل
.................................................. .......... ..
كان الحقد يريد ايقاع اشخاص في فخه كما جرت العاده لكن فوجئ عندما علم ان ليس الجميع معرض للوقوع في مصيدته وان البعض لديهم من نقاء الروح ما يكفل عدم وقوعهم ضحيه الحقد ... هؤلاء يعيشون في هذه الحياة كملائكه بيننا نحن البشر كملائكه بيننا نحن من نستمع للشيطان لتلك الدرجه التي اصبحنا معها .. من ذريته
وصيه الحقد (ذكريات مسروقة 2)####
.................................................. .......... ...................
تابع ....................
الفصل الرابع
علي _ انا مو فاهم ليه انت جامع هذا كله وش المغزى منه
طارق بهدوء ناظر علي _ قفل الملف وتعال شوف هذا التصميم عندي ملاحظات
علي قفل الملف وناظر الاب مع طارق – وش فيه جدا كويس وتصميم حديث
طارق _ انا عارف ان هذا مو تخصصي تخصصك لكن انا شايف ان التصميم مو هو اللي انا كنت طالبه
علي _ اللي انت طلبته صعب يا طارق
طارق _ انا ما وظفت المهندسين بهاذي الرواتب عشان يقولون لي صعب
علي _ خلاص انا نفسي راح اشرف على هذا الموضوع
طارق _ كويس الشي الثاني وين الاخ عمار
علي بابتسامه _ عمار اخي ليه تسئل اكيد في مدرسته الداخليه في فرنسا مع فارس اخوك
طارق _ اذن هاذي الصور مو له ويعني بعد انه ما سافر تايلند العطله الاسبوعيه اللي طافت
علي بدهشه _ وش انت قاعد تقول
طارق _ انا ارسلت لك الصور في ملف تلقاها في اميلك جاتني امس من ادراة المدرسه تشكي لي تصرفه علي اهتم بموضوع اخوك اكثر
علي قام _ اسف يا طارق على الازعاج راح اتصرف معه
طارق _ علي قبل لا تروح وش اخبار صفى
علي _ كويسه امي سافرت لها امس مع ابوي عشانها توها والده جابت بنوته صغيره
طارق بابتسامه _ تتربى في عز والديها
علي _ امين يله اشوفك على خير
طارق _ ان شاءالله
طلع علي
ناظر طارق روزنامة التاريخ لقاه شهر جون عيد ميلاده اليوم بيكمل الواحد والثلاثين ابتسم ورجع لشغله وكأن هذه الابتسامه هي هديته لهذا اليوم
اندق الباب
محمد دخل
طارق ناظره
محمد_ فيه اخبار مهمه جدا
طارق رجع للاوراق الي في يده _ قول
محمد_ الشيخ عاصي الله يرحمه انفتحت وصيته اليوم
طارق باستغراب _ وصيه غريبه انا ما كنت عارف ان فيه وصيه
محمد_ ما زال الغموض يلف السالفه يا استاذ لكن المهم والاهم انهم يقولون الشيخ فهد جدا معصب الوصيه تنص شي شكله من صالح ولد اخوه
طارق بابتسامه ساخره _ ولد الشيخ زايد اللي مات قبل سنتين
محمد قرب من المكتب وحط اوراق _ بالضبط انا مستغرب
طارق حتى هو باين على وجهه علامات الاستغراب _ عموما خلك مطلع على هذا الموضوع جبت البريد
محمد حط الاوراق ورجعوا يتكلمون عن التجاره والشغل
.................................................. .......... ....
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك