رواية غفلتي دفعتني حياتي -2
جا نواف وهو يصيح شاف أبوه وراح له: بابا... أبي ماما
ناظر سالم أخوه وقال: ارتحت الحين... - حط ولده بحضنه وقال: بعدين تجي ماما
فواز: ايش عندكم تحشون فيني
سعود: أمي تقول أنك أحسن واحد فينا... لأنك متزوج بنت عمك مو أخوانك اللي كل واحد متزوج من بره
فواز: أصلا أنا من زمان أحسن منكم
ابتسم سعود: مشكلة الغرور
سالم: يمه أنا طلقت أم نواف وسعود كيفه... وبعدين من قالك أني بأخذ أجنبية ثانية... أنا برجع لعبير
أبو سعود: ليه أنت عرفت وش سالفة زعلها
سالم بكذب: إيه وصلحت الأمور اللي بيننا... والحمد لله أنها رضت
أم سعود فرحت: والنعم بعبير والله أنها بنت أصول
سالم بدون شعور: مستحيل أخلي بنتي تعيش عندها
أم سعود: ليش ما تبي عبير تربي بنتك
لمعت عيونه: بعدين تعرفين
سعود وفواز حسوا أنا سالم فيه شي بس فضلوا السكوت.... ظل سالم يسولف مع أهله وهو يحاول ينسى المصيبة اللي طاحت على راسه.... وبعد العشا طلع وركب سيارته سند ظهره لرتبت السيارة وهو يفكر بحاله.... انتبه لما ركب سعود جنبه....
سالم: سعود
سعود: يللا ما عليك أمر توصلني بيتي
شغل سالم السيارة: أكيد
قال سعود بعد دقايق: أقول سالم
سالم وهو يسوق: هلا
سعود: أنا برجع ألمانيا بعد يومين
سالم: بسلامة إن شاء الله
سعود: الله يسلمك... بس كيف أسافر وأنا منيب متطمن عليك
سالم: وليه تتطمن علي
سعود بجدية: سالم... عيونك تقول أنك بمصيبة ومنت قادر تحلها
ما رد وهو مركز ع الطريق.... حط سعود يده بكتف أخوه....
قال سعود بصوت أخوي: وتبيني أتطمن... قول يخوي أحسك بدوامه منت قادر تطلع منها
تنهد سالم: أنا عارف أنك أقرب لي من فواز... بس المشكلة أني... - سكت....
سعود: أسمع أنت فجاة قلت أنك طلقت أم نواف مع أنك مرتاح معها... والحين قلت تبي عبير والأغرب من كذا... أنك بتترك بنتك عند ولد عمي ايش تسميه ذا
ما عرف سالم وش يقول ظل ساكت الين وصل لبيت أخوه.... ما تحرك سعود من مكانه التفت عليه سالم وقال: سعود وصلنا بيتك
سعود: أدري
سالم: يعني تبي أقولك أنزل
سعود: سالم أنزل أشرب معي قهوة
نزل سالم بعد محاولات سعود لأنه خايف من التحقيق الجاي....
بدا سالم يتكلم عن سالفة الورقة.... وسعود يسمع له الين يخلص....
سالم: وهذي السالفة كلها
سعود وهو واقف عند النافذة: جد أنك غبي... كيف توقع على أوراق ما تدري وش مكتوب فيها
سالم مقهور: قلت لك أني اسأذنت من هنا جاب لي الورقة على طول... - رفس الطاولة: الـ###.. لاعبها صح
التفت سعود: ماينفع العصبية الحين لازم نفكر في حل
سالم بخوف: أنا بسوي أي شي... بس ما أدخل السجن
قرب سعود من أخوه وحط يده على كتفه: أسمعني يخوي توقعيك ع الورقة... أكبر إدانة لك بغض النظر عن الفلوس أستلمتها ولا لا... يعني غفلتك بدفعك حياتك
سالم برجاء: وايش الحل
سعود: أما أنك تدخل السجن وتتحمل المذلة الين يطلع النصاب... أو أنك ترجع لعبير وتتحملها هي وأخوها
سالم: لا هذا ولا ذاك
سعود بعصبية: أجل عندك 10 ملايين كاش... هاا
دفن وجهه بين إيده: حرااام الظلم... والله أني مظلوم
سعود: أنا من رأيي أنك تتزوج عبير وتتحمل كل شي... أرحم من السجن وفي نفس الوقت تجمع المبلغ
سالم: لااا هذول مو مليون أو مليونين... هذول عشرة ملايين وما راح أفتك من ذا المصيبة إلا وعمر نواف 20 سنة
سعود: ويمكن يطلع النصاب قبل العشرين سنة... أسمع وظيفتك ممتازة ورابتك ممتاز... من اليوم تبدا تجمع فلوسك وحاول تقلل مصاريفك... والله يكون بعونك ممكن أنك تمل بس أضغط على نفسك... عشان يرجعون عيالك لك
سكت سالم وهو يفكر بكلام أخوه.... وبعدها قال: بحاول بس محتاج من يشجعني
سعود: كلنا حولك يا سالم... لا تخاف ما راح نتخلى عنك... بس أبيك تروح لمساعد هذا عشان تشوف وش يبي
هز سالم راسه وهو يحاول يرتب أفكاره....
فواز كان جالس في سيارته ويناظر بيت أخوه سعود.... صار لهم أكثر من ساعتين داخل.... انتبه لما شاف أخوه سالم طلع وركب سيارته ومشى.... نزل فواز وراح لعند سعود....
سعود اللي توه مودع سالم توه بيدخل.... استغرب لما دق الجرس من جاي ذا الوقت.... فتح الباب وقال: فواز؟؟
فواز دخل وهو يقول: تعال وقلي كل شي
ابتسم سعود لأخوه.... لأن فواز مطيح الميانة بزيادة.... حكى لأخوه كل شي حتى يعرف وش رايه....
فواز: وأنت وش قلت له
سعود: أنا أقنعته يجمع المبلغ وأنا لو بيدي كان جمعت له... بس أنت عارف كلها كم يوم وأرجع ألمانيا... والحياة هناك تتطلب أكثر من هنا
فواز في خاطره" وش اللي حادك.. خلك هنا " بس أنه قال: عارف يخوي... وأنا إن شاء الله بجمع له اللي أقدر عليه
سعود: بس ترا سالم راتبه اقوى من راتبك... وأنا ما أبيك تضيق على بيتك وعيالك
فواز: لا تخاف أنا ادبرها... بس أنا اللي مستغرب منه ليش بياخذ بنته لولد عمي واحنا موجودين
سعود نفس أخوه مستغرب من سالم بس قال: أنت عندك عيالك وماحب يضيق عليك... وأنا ما أحب العيال عشان كذا عند ولد عمي أحسن
فواز فاهم أخوه.... يكابر: مو علي يا سعود أنا أدري أنك تحب العيال... ولو أنك قلت له ما أتوقع بيردك
نزل سعود رأسه لأنه صحيح يحب العيال ويموت فيهم.... بس أنه عقيم ومحروم منهم.... قال بعد تفكير: يمكن ما يبيها تعيش في ألمانيا وتتكلم ألماني... ما أدري بايش أخوك يفكر
سكتوا لثواني وقال سعود وهو يناظر أخوه: يمكن راح يجي اليوم اللي يشتكي لك سالم... فإذا جا لا تسكته وتقول أنا عارف السالفة من زمان... أسمع له وخفف عنه ولا تستغرب إذا شفت دموعه لأنه مظلوم
تنهد فواز: يصير خير
صحى سالم من النوم ويتمنى كل شي يكون كابوس.... بس صار واقع لما اختفت منيرة زوجته.... وعياله مالهم حس وما فيه إلا أغراضه....
كانت الساعه 1 الظهر صلى الظهر ونزل تحت.... أخذ له عصير وشغل التلفزيون يتابع فلم.... ما كان باله مع الفلم كان مع مساعد.... يفكر وش يبي فيه وكيف بينتقم منه....
نبهه من أفكاره المؤذن يلعن عن آذان العصر.... بعد ما صلى العصر طلب له من مطعم وجلس يأكل.... أتفق مع مساعد أنه يزوره بعد صلاة العشاء....
ناظر سالم بيت مساعد وهو يفكر بأشياء كثيره.... دق الجرس وفتح مساعد الباب....
مساعد بإبتسامه خبث: هلااا أبو نواف... تفضل حياك
استغرب سالم بس قال بخاطره" هدوء ما قبل العاصفة ": الله يحيك
دخلوا المجلس وبعد ما قدم له الموية قال مساعد: خير يا سالم وش عندك جاي
سالم بتردد: أأ..أنا جاي أعتذر لك... وأرجع عبير
مساعد مبسوط: يللا أعتذر
سالم يحس بالذل والإهانة: أنا... أنا آسف يا مساعد كنت حقير معك على أشياء تافهه
وقف مساعد قباله وقال: بوس رجلي وقلي أنا آسف
وقف سالم وقال بعصبية: تخسى ما سويتها
مساعد: هاا عدها ما سمعت... الظاهر لسانك الوصخ هو اللي بيدخل السجن
سالم بقهر: أنا مظلوووم والله إني مظلوم
مساعد: ههههههههه تكفى لا تدغدني قال مظلوم قال... أجل يا الحرامي تسرق عشرة ملايين وتسافر لندن توسع صدرك... وغيرك ينسجن بسبب الديون اللي عليه من تحت رأسك... جد أنك..## و..###
سالم شوي ويصيح: مو أنا والله مو أنا
مسكه مساعد من قلاب ثوبه.... وهو يطلع قهر مكبوت من الثانوية: تذكر وش كنت تسوي ف الثانوية... ليش كل ها الغرور وعلى ايش... من ولده شايف نفسك... - دفه بقرف ورفع صبعه وقال: والله ثم والله لأدفعك الثمن غالي يا سالم... لأدخلك السجن وأخليك تتفعن فيـ..
قاطعه سالم وهو ينهار على رجله.... قال وهو يبوس رجله: الله يخليك... أبوس رجلك لا تدخلني السجن... بسوي لك اللي تبيه بس لا تدخلني السجن
استغرب مساعد ما توقع يسويها سالم.... بس دموع سالم طفت شوي من نار اللي بصدره.... رفسه برجله وقال: أطلع برة ولما تعرف تعتذر عدل... ذيك الساعة رجعت لك عبير
قام سالم وطلع يجر رجله جر.... ركب سيارته وهو يمسح دموعه.... راح لبيت أبوه دخل من غير ما يسلم وراح لغرفته.... جلس ع الأرض وحط راسه ع السرير وبكى....
سالم عمره ما أنذل بها الطريقة.... لأنه جا لأم سعود بعد ما منعها الدكتور تجيب عيال بعد فواز... لأنه جا بعد ما ماتوا اثنين من عيالها.... دلوع أم سعود وأبوه كل شي يبيه يحصله.... ويحبونه أكثر من أخوانه.... لأنه تعذب كثير مع زوج أمه....
واللي سواه مساعد فيه قهره ونفسه يحرق مساعد وعبير سوا.... هذي الفكرة اللي براسه وهو يسمع صوت أمه وهي تطق الباب وتناديه....
التفتت أم سعود وهي تشوف سعود جاي....
أم سعود بخوف على ولدها: سعود... تعال يا يمه شف أخوك قافل الباب على نفسه ويصيح... ما أدري وش فيه ما رضى يكلمني
سعود يطمن أمه: لا تخافين يمه... بس واحد من ربعه متوفي
أم سعود: لا حول ولا قوة إلا بالله
سعود: يمه أنتي أنزلي لأبوي وخليني أكلم سالم
أم سعود: طيب... بس طمني على أخوك
سعود: إن شاء الله
تأكد سعود أنا أمه نزلت تحت.... لف ع الباب وطقه: سالم... يا سالم أفتح الباب
فتح سالم الباب ودموعه بخده: الـ## ما رضى... ما رضى
دخل سعود أخوه الغرفة عشان ما يسمعون أمه وأبوه.... جلسوا على طرف السرير وسالم مازال حاط راسه بصدر أخوه ويصيح....
سعود ما سأل أخوه عن شي.... لأن أكيد اللي سواه مساعد مو سهل عشان كذا سالم مقهور ويصيح....
سعود: سالم أنا تفاهمت مع مساعد
رفع سالم رأسه ودموعه على خده: ايش
سعود وكأنه يكلم طفل: أنت طلعت من بيت مساعد وأنا رحت له وتفاهمت معه
سالم بعد عن أخوه: ايش قال
سعود: قال بيكلم أبوه عشان يرجع لك عبير... بس بشرط تدق عليه وتكلمه
سالم بعصبية: ياكل تبن هو وأخته
سعود بطفش: وبعدين معك إذا ما تبي عبير... بتدخل السجن وش رايك
سالم مقهور: السجن أرحم... هذا أنا اعتذر له قالي بوس رجلي... وش بيسوي فيني بعدين... منيب مكلمه وبدخل السجن واللي فيها فيها
سعود: السجن يا سالم السجن... فكر باللي حولك بأمك وأبوك... سالم ولدهم مسجون لأنه سارق 10 ملايين ناوي تجيب لهم الجلطه... وعيالك لما يكبرون بتاكل الناس وجيهم... ويهاجرون عند أمهم وأهلها... بيعيشون في غربه لأنهم بدون أب... ولا تقول أمهم موجوده لأنها أكيد بتتزوج وتعيش حياتها... حرام عليك فكر يا سالم مو عشان نفسك عشان اللي يحبونك
اقتنع سالم نوعا ما وقال: خلاص بدق عليه وأمري لله... بس ممكن تطلع
وقف سعود: طيب... أنا طالع وإذا صار شي جديد عطني خبر... يللا مع السلامة
بعد ما طلع سعود.... خذ سالم جواله ودق على مساعد....
مساعد: الوو
سالم بدون نفس: هذا أنا دقيت وش تبي
مساعد: مابي شي... بوست رجلي تكفيني منك هههههههههههه
انقهر سالم: وش تبي
مساعد مبسوط: بعد شين وقوي عين... حرامي وعينه زايغة ع الحريم... - بجدية: كل تبن واسمع
بلع سالم الإهانات وسكت....
مساعد يكمل كلامه: أنا كلمت أبوي وهو ينتظرك... وياليت تستعجل
سالم: بكرة أنا عنده... مع السلامة
رمى الجوال بالجدار ودفن وجهه بالمخدة....
يوم العزيمة....
أبو سعود وأبو مساعد مبسوطين برجعت المياه لمجاريها.... خصوصا أنا سالم وعبير انفصلوا عن بعض قبل ما يكملون الشهرين....
أبو مساعد: ما قلت لي يبو سعود... وين سعود ماله شوفه
أبو سعود: راح لزوجته بألمانيا... الله يحفظه
أبو مساعد: الله يحفظه... مدري ليه يبو سعود أنت ساكت لعيالك... كل واحد متزوج أجنبية
أبو سعود: كل شي اغصبهم عليه إلا الزواج... وكل واحد يتحمل اللي يسويه
أبو مساعد ضد ها الراي: لا ما يصير... هذا سالم تهاوش مع زوجته وطلقها... وخذت بنته معها>> هذي كذبة سالم واخوانه ع الشياب....
أبو سعود: أنا نصحته يوم أنه قال يبي يتزوج أجنبية... والباقي عليه... وأصلا هو يحمد ربه ما رفعت عليه قضية... ولا كان العيال كلهم عندها
أبو مساعد: الحمد لله... وسعود لما يجيه الضنا عسى ما يطلق زوجته وتأخذه منه
أبو سعود وهو عارف أنا ولده ما يجيب عيال.... تنهد وقال: الله كريم
سالم جالس وملامح وجهه جامده.... حالف على نفسه ما يبين أي مشاعر.... تذكر مثل ها اليوم قبل كم سنة.... لما كان عمره 24 سنة وصار له شهرين متزوج عبير.... تذكر كيف كان مبسوط فيها.... وهي عمرها 18 سنة وعندها بنت من زوجها الأولي....
حاول يتذكر وش اللي صار في ذاك اليوم.... وخلا عبير تزعل وتطلب الطلاق.... وهو من حبه لها تركها معلقة.... وسافر لبريطانيا وما رجع إلا بزوجته وعياله.... ولما شافها في سوق مع بنتها صارت مشاعره عاديه لها....
تنهد سالم وناظر الأرض.... لأنه تعب وهو يحاول يتذكر سبب زعل عبير....
مساعد مبسوط وهو يناظر اللي حوله.... وابتسم بخبث لما شاف فواز يناظر بحقد.... " الظاهر أهله كلهم عارفين بسواد وجهه.. بس كأنه أبوه ما يدري ".... ناظر سالم اللي يناظر الأرض" هين يا سالم أنا اللي بدفعك الثمن "....
عند النسوان….
أم سعود وأم مساعد وأم سالم مبسوطين عشان عيالهم.... لكن أم سالم حاز في خاطرها عيال ولدها نواف وأسماء.... اللي كل شوي جاي لها نواف ويبي أمه.... " إن شاء الله عبير بتقوم فيهم ".....
أم مساعد عازمه أخواتها وحمواتها.... مبسوطه لبنتها وتسولف مع الكل.... أم سالم ما عندها الا أخواتها وبنت عمها اللي هي أم سعود.... أما حمواتها كل وحده عايشة بمنطقة وما قدروا يحضرون....
عبير هي أكثر وحدة مبسوطة.... رجع لها سالم صحيح هي ما نست سالفة الخيانة.... بس هي تحب سالم ومشتاقه له.... تذكرت قبل كم سنة مثل ها العزيمة.... ونفس الناس بس انهم أقل....
قامت ووقفت عند النافذة.... ناظرت بتهوية البيت وتذكرت سالم.... كان واقف مع بنت جيرانهم ويكلمها.... فجأة قفزت البنت وضمته وهو يضحك.... تجمعت دموعها بعيونها.... حست بيد ترتبت على كتفها.... التفتت وشافت نهلة أخت سالم من أمه....
نهلة الصديقة المقربة من عبير.... عارفة بخيانة أخوها لأن عبير قالت لها.... ابتسمت لعبير وقالت: صار ماضي يا عبير... وهذا سالم رجع لك
ابتسمت عبير وقبل ما ترد جت بنتها ريم اللي عمرها 4 سنوات....
ريم: ماما أبي كيكه
عبير: تعالي حبيبتي
عند الرجال….
سالم اللي كان يسمع سوالف أبوه مع أبو مساعد.... ويبتسم لهم وهم يعلقون عليه.... رن جواله ورد عليه....
سالم: الوو
زياد ولد عمه: هلا سالم
سالم: هلا فيك... كيف حالك
زياد: تمام... وشلونك يقولون رجعت للمدام
سالم: الحمد لله
زياد: قالوا تدور علي... عسى خير
سالم: خير إن شاء الله... بس أبيك بموضوع خاص
زياد: وش فيك
سالم: لا ما ينفع بالتلفون... أقدر أجيك بكرة
زياد: اممم... إيه حياك الله ما وراي شي
سالم: خلاص تم إن شاء الله
زياد: أخليك الحين... مع السلامة
دخلت عبير البيت وهي مبسوطة.... وأخيرا صارت لها مملكتها.... لأنها أول ما تزوجت سالم كانت عايشة معه في بيت أهله.... لأن سعود بألمانيا وفواز ببيته.... وشغل سالم ما يسمح له يفتح له بيت....
بس الحين بعد ما أخذ سالم ماجستير انجليزي.... أكيد حصل وظيفة راتبها ممتاز.... ابتسمت وهي تشوف ترتيباتها أمس مع أخواتها.... وتنتقل بين الغرف وترسم وتخطط وش بتحط وش بتجيب....
دخل سالم طفشان وأخيرا انتهت العزيمة بسلام.... جلس بالصالة وهو يسمع الحوسة بالمطبخ.... دخلت عبير الصالة وشافت سالم جالس....
قربت منه وقالت: وش فيك
سالم: تعبان وأبغى أنام
عبير: أجل يللا خلنا نروح فوق
راحوا فوق ودخلوا الغرفة.... خاب أمل عبير وين المفاجأة اللي كانت متوقعتها.... وين الورد المنثور ع الأرض.... وين الشموع والعشا الرومانسي.... كل ها الأفكار وهي تناظر جهة الكنب والطاولة اللي قباله....
التفتت لما حست بسالم جلس ع السرير.... متى غير ثوبه وكيف يغير ملابسه وهي واقفة....
عبير: ايش هذا
سالم اللي دخل الغرفة وشاف عبير مفهيه ع الكنب.... فتح دولابه وبدل ملابسه.... عادي عنده لأنه عايش مع أجنبية.... وما يدري إذا عبير تستحي منه ولا لا.... جلس ع السرير ولف لجهة عبير لما سمعها تقول: ايش هذا
تمدد وقال: قلت لك تعبان وبنام
عبير: وأنا
سالم بتعب: وش فيك
عبير: أبغى أبدل... ايش رأيك أنام بفستاني
سالم" وش فيها هذي.. نست أنها متزوجة قبلي": بدلي وش اللي مانعك
عبير: كيف أبدل وأنت موجود
سالم يبغاها من الله.... قام وقال وهو رايح: اوكيه بنام بالغرفة الثانية
انقهرت عبير: أي غرفة ثانية... ليه احنا متزوجين بورق بس
كلمة ورق خلت سالم يوقف.... تذكر الورقة اللي ماسكتها عبير عليه.... التفت لها وناظرها بنظرات ما فهمتها وقال: إذا خلصتي ناديني
طلع سالم وهو مقهور خلاص الفأس طاح بالراس.... ولازم يكون مطيع لها وتحت شورها.... حس أنها تأخرت قام ودخل عليها.... شافها جالسة ع الكنب ومنزلة رأسها....
سكر الباب وابتسم وقال: وش فيك مستحية... أول مره نتزوج احنا
راح لها وهو ناسي من عبير ومن أخوها.... والورقة اللي عندها....
يتبع.............
اليوم الثاني ....
دخل سالم مع عبير لبيت أبوه....
سالم وعبير: السلام عليكم
أم سعود وأبو سعود: وعليكم السلام
ركض نواف لأبوه: daddy
عدل سالم شماغه ونزل لمستوا ولده: يا عيون داادي أنت... - شاله ووقف: شلونك فوفو
نواف: ثين... I want Kandy
سالم: تكلم عربي واشتري لك الكاندي
ناظرت عبير بنواف أبيضاني مليان.... شعره بني وعيونه بحريه.... اللي يشوفه يعطيه أكبر من سنتين....
أم سعود: وش فيكم واقفين... أدخلوا
جلست عبير بعدما سلمت عليهم.... أما سالم نزل ولده وراح قبال أمه.... باس بنته وقال: أسومة يا حلوة كيفك
أسماء اللي بحضن جدتها.... ابتسمت لأبوها وحركت يديها عشان يشيلها....
شالها سالم وجلس جنب عبير.... ناظرت عبير أسماء تشبه أبوها.... شعرها خفيف لأنه أشقر بس عيونها بنيه....
سالم: شلونك يمه
أم سعود: بخير جعلك الخير... شلونك أنت مرتاح مع عبير
ابتسم سالم: الحمد لله
أبو سعود: شلونك يا بنتي
عبير: الحمد لله يا عمي
وظلوا يسولفون معهم.... وبعد دقايق جا فواز مع زوجته وعياله.... وصار البيت إزعاج من صوت العيال....
بعد كم ساعة وقف سالم: يمه جهزتي أغراض أسومة
أم سعود: إيه... بس تو الناس أجلس شوي
سالم: لا يمه... أبي آخذ عبير لأهلها أبوها عازمنا ع العشاء... - ناظر الشنطه اللي على جنب وقال: هذي أغراضها
أم سعود: إيه
راح سالم وشال الشنطة وقال: يللا يا عبير الحقيني للسيارة
وقفت عبير: طيب
لما ركبوا السياره قالت عبير: سالم... لايكون بتجيب بنتك بيت أهلي
سالم: ما عليك شوي وبوديها عند ولد عمي... عشان يوديها لأمها
عبير: يكون أحسن
سالم" وأنا خبل عشان أخلي بنتي تعيش عندك "....
دخلوا بيت أبو مساعد....
سالم وعبير: السلام عليكم
الكل: وعليكم السلام
ركضت ريم لأمها: ماما
نزلت عبير لمستوا بنتها وضمتها: حبيبتي ريومه... ولهت عليك
ريم: وأنا بعد
أم مساعد بعد ما جلسوا.... قالت: والله يا عبير أمس ريما ازعجتنا بصياحها وتبيك
دخلت ريهام بنت أخت عبير.... قالت لما شافت أسماء بحضن أبوها: يحليلها أمريكية
حقدت عبير على سالم....
قربت ريهام من سالم وقالت: ممكن أشليها
سالم: عشانك كبيرة... خذيها بس انتبهي عليها
خذتها ريهام ودخلتها داخل لعند أمها وخالاتها.... اللي أنبسطوا لما شافوها.... وما رجعت أسماء إلا وهي نايمة.... أخذها سالم ووقف وقال: عن أذنكم عندي مشوار
أبو مساعد: وين يا ولدي... ما بتتعشى عندنا
سالم: راجع بس بآخذ بنتي لواحد من أهلي عشان يأخذها لأمها
راح سالم لبيت ولد عمه.... دق الجرس وفتح ولد عمه الصغير الباب....
سالم: أهلين ثامر شلونك
ثامر: بخير... - ناظر ورا سالم وقال: وين الأمريكية ليه ما جات
سالم: عن الهذرة الزايدة وناد لي زياد
ثامر: زياد قالي أدخلك المجلس... حياك أدخل
بعد ساعة وقف سالم وقال: خلاص إن شاء الله كل فترة أرسلك مصروفها
وقف زياد: لا يا رجال... خل فلوسك عندك بس أهم شي تنحل ها المشكلة
سالم: الله كريم
زياد: أقولك هاتي لي جواز سفرها
سالم: ليه
زياد: لأني بعد أسبوعين بروح لندن... فأنا اقولك وش رايك آخذها معي لندن... وتشوف أمها وتتعود عليها وبترجع معي... لأنها في النهاية بترجع لك ولأمها... وش قلت
سالم: تمام... كم يوم وأنا مجدد جوازها... وبعطيك التصريح
بعد أسبوع….
ريم الصغيرة كانت تدور نواف.... سمعت صوته بالمطبخ وراحت له.... شافت الخدامة تضربه وهو يصيح.... خافت وراحت لسالم وقالت له.... تفاهم سالم مع الخدامة اللي بدت تشتكي أنا عبير حاطه البيت على راسها.... وهي جايه تشتغل مو مربية أطفال.... راح سالم فوق....
سالم: عبير أبيك بموضوع
عبير: اوكيه حبيبتي... مثل ما تبين... مع السلامة... - سكرت الخط وناظرت سالم: خير
سالم: نواف
عبير: وش فيه
سالم: ما أبي الخدامة تهتم فيه
عبير: لا تقول أنا اللي انتبه له
سالم: وش فيها... أعتبريه ولدك
عبير: هه قال ولدي قال... هذا ولد كافرة وخل الخدامة هي تقوم به... بس أنا لا وأنا قلت لك ها الكلام من قبل ما أبغى أشوف عيالك
سالم: بس شغل البيت كله على رأس الخدامة... وأنا ما جبتها مربية لعيالي وبعدين هي تضربه... وش رأيك يعني
عبير: خله عند أمك
سالم: عشان تقولي ليه ما تخلي عبير تقوم به... وش أقول لها عبير ما تبي عيالي... وتقولي مالك كلمة على زوجتك
ابتسمت عبير على سذاجته: إيوه... قلها أنا سارق 10 ملايين ريال وعبير كشفتني... وأنا خايف أنها تفضحني
أنقهر سالم: مو أنا... هذا واحد..### استغفلني... بس ما أقول إلا الله ينتقم منه
عبير: هه يوقع ع الأوراق ويقول مو أنا... ألعب على غيري يا بابا
سكت سالم ما منها فايدة لا منها ولا من أخوها....
عبير لما شافته سكت قالت: وليه ماسك علي ولدي وولدي... أنت متأكد أنه ولدك، ما تعرف من هي أمه... أمه كافرة نايمة مع عشرة قبلك... متأكد أنك يوم تزوجتها ما كانت حامل... أنا من رأيي تسوي فحص DNA لك ولولدك... وبتعرف إني صادقة
ناظرها سالم وهو عارف أنها تبي تشككه.... صحيح هو لما تزوج أم نواف كانت حامل بولده.... بس ها الولد غير شرعي ورحمة فيه مات في بطن أمه.... وأم نواف ما حملت بنواف إلا بعد الزواج.... وأسلمت بعد زواجها من سالم بأسبوعين....
نزل تحت وها الأفكار في راسه، رن الجرس.... شاف ريم سابقته للباب وواقفة لأنها ما تقدر توصل له....
فتح سالم الباب وقال: سعووود!!
ابتسم سعود: سلام عليكم... مساء الخير
انبسط سالم: وعليكم السلام... مساء النور... حياك تفضل
دخلوا الصالة وجلس سعود وجنبه زوجته الألمانية جوانا....
سالم: متى جيت من ألمانيا
سعود: قبل أمس
سالم: وين نمتوا فيه... اللي أعرفه أنك أجرت بيتك قبل ما تسافر
سعود: نمت ببيت أبوي... لأني يوم وصلت رحت أسلم على أمي وأبوي... وأمي لزمت نبات عندها ولا كنت ناوي أجي عندك
سالم: العين أوسع لك من المكان
سعود: تسلم بس بيت أبوي أحسن... أقول من ذا الحلوة
سالم: هذي ريومه بنت عبير... ريومه حبيبتي تعالي
قربت ريم وقالت: نعم عمي
سالم: لا تقولين عمي... قولي بابا
ريم: دده دالت ادولك عمي
سالم: لا ناديني بابا... فهمتي
انبسطت ريم صار عندها أب مثل بنات خالاتها: تيب بابا
سالم: روحي فوق وقولي لأمك... عمي سعود وزوجته تحت
ريم: تيب بابا
صحى نواف اللي كان نايم بغرفة الخدامة.... هو ينام عندها لأن عبير تصرخ عليه.... ولأن الخدامة هي اللي تهتم فيه مع أنها تضربه....
صحى وأخذ رضعته وطلع لصالة.... شاف جوانا زوجة عمه عيونها زرقا لكن شعرها مو مبين لأنها متحجبة حجاب كامل....
قرب نواف وقال سعود: صباح الخير نوافوه... وينك فيه
نواف يمشي لجوانا وكأنه مبرمج.... لأنه يظنها أمه وقف قبالها وقال: ماما
استغربت جوانا.... هذا أول طفل يقرب منها ويقول ماما.... وهي تعرف كم كلمة عربية عشان كذا عرفت أنه يظنها أمه.... ضم نواف ساقها ومد إيدينه لها وقال: ماما... ماما
انبسطت جوانا لأنها تحب الأطفال.... ولما تزوجت سعود أكشفوا أنه عقيم.... لكنها قررت تعيش معه حتى بدون أطفال.... شالت نواف وحطته بحضنها وهي تسمعه.... مرة يقول كلمة عربية ومرة انجليزية....
ابتسم سالم لقى من يهتم بنواف.... ما فيه أحسن من أخوه وزوجته اللي باين أنها تحب الأطفال.... يعيش عند أخوه في غربه.... أحسن من يعيش عنده وفي عذاب مع عبير....
سعود ساكت وداخله زعلان على زوجته.... ما يبيها تتعلق في ولد أخوه لأن أكيد سالم ما يبي ولده يعيش في دولة أجنبية....
نص ساعة وطلع سعود مع زوجته ونواف.... لأن نواف تعلق بجوانا ويبي يروح معها.... ما عارض سالم وترك ولده عند أخوه....
ركب سالم السيارة وجنبه أخوه سعود.... وجالسة ورا جوانا وعندها نواف النايم.... ضمته جوانا لأنها بتفتقده بعد ما ترجع لألمانيا....
سعود: تعبناك معنا يا سالم
سالم: مدري وش مسوي أنا… بس حجز لكم للسفر... أهم شي راحت عنك الانفونلزا
سعود: إيه الحمد لله والحرارة نزلت وارتحت
وصلوا للمطار ونزلوا شنطتهم ودخلوا داخل.... جوانا مازالت شايله نواف اللي صحى من الإزعاج.... سعود اللي يدف العربية اللي فيها شنطهم.... مستغرب إنا سالم شايل شنطة بيده....
جا وقت الوداع....
سعود يسلم على أخوه: يللا أشوفك على خير
سالم: انتبه لنفسك، ولزوجتك... - التفت لجوانا وقال: يللا حبيبي نواف تعال
نواف بحسن نيه راح عند أبوه.... حزنت جوانا عليه بس ما قالت شي.... سالم نزل ولده للأرض ومسك يده.... مشى سعود مع جوانا.... نواف شاف جوانا تروح عنه.... سحب يده من أبوه وراح لجوانا يركض: ماااما... مااما
التفتت جوانا له وضمته ودمعت عيونها.... قرب سالم وهو يضحك....
سعود: هذا اللي بيطير الطيارة علينا
سالم: خذه معك... - حط الشنطة اللي بيده بعربية أخوه... وطلع جواز نواف ومده لسعود: تفضل وحط بالك عليه
سعود: ايش هذا
سالم: نواف يحب جوانا ويظنها أمه... وأنا حجزت له معكم وسويت لك تصريح
سعود: بس هذا ولدك
سالم: عارف بس ما فيه أحد يهتم فيه... عبير ما تبيه وأنت عارف إني ما أقدر عليها... وأبوي لما شاف نواف عند أمي قالي خذ ولدك عندك... وتحمل نتيجة زواجك من أجنبية... لأنه مثل ما أنت عارف يفكر إني تهاوشت مع أم نواف وطلقتها و...
قاطعه سعود: عارف... بس متاكد أنك تبيه يعيش عندي بألمانيا
سالم: إيه... - ضمه وقال: أدري أنك تحب الصغار... عشان كذا خذه عندك وانتبه له
دمعت عيون سعود: ما تقصر يا سالم ونواف بعيوني
بعد سالم عن أخوه وقال: يللا لا تروح عليكم الطيارة... ولا بغير رايي
سعود: هههههههه حتى لو غيرته... أنا باخذه برضاك ولا غصبن عنك
فهم سعود زوجته وانبسطت وبدت تشكر سالم بألماني.... طلع سالم من المطار وهو يتنهد.... بسبب غفلته تشتتوا عياله.... بسمة عند أمها ببريطانيا ونواف عند أخوه بألمانيا.... وما بقى الا أسماء اللي عند ولد عمه.... وعايشة مع أهلها بالرضاعة....
بعد يومين….
وقف سالم سيارته عند باب بيته.... نزل ودخل واستغرب لما شاف سيارة داخل الكراج.... وصخه وكلها طين ورمل، دخل داخل حتى يسأل عبير عنها....
جلست عبير مع أخوها بالصالة.... بعد ما تروشت ولبست لأنها كانت تلعب مع أخوها بالطين.... ويرمونه بسيارته اللي في الكراج.... ما تدري ليه أخوها وصخ سيارته كذا.... بس أنها انبسطت بها اللعبة....
دخل سالم واستغرب لما شاف مساعد" وش جابه "....: السلام عليكم
عبير ومساعد: وعليكم السلام
مساعد: وأخيرا جيت يا سالم... من زمان انتظرك
سالم: ليه عسى خير
مساعد: أبيك بشغله... رح ألبس ثوب بيت وتعال
سالم: ليه وش صاير... وبعدين من سيارته اللي بره
مساعد: مو أنا أقولك رح ألبس ثوب بيت وتعال... عشان في شغله أبيك تشوفها
سالم: اوكيه... دقايق وجاي
بعد دقايق وقف سالم مع مساعد وعبير عند السيارة....
مساعد: تفضل يا سالم... أغسلها
عبير وسالم بنفس الوقت: ايش؟؟
مساعد: أغسلها... هذا الصابون والأغراض جنبك... أبي أشوف صورتي فيها
فار دم سالم: ليه شايفني هندي قدامك
مساعد: أنت جزمتي ما تسوى... بتغسلها ولا شلون
سالم بعصبيه: منيب متحرك من مكاني وش بتسوي
قرب مساعد من سيارته وقال: اوكيه أشوفك بالسجن... يا الحرامي
خاف سالم ومسك ذراعه وقال: لا... الله يخليك كل شي إلا السجن
ابتسم مساعد: أجل ورني شطارتك وأغسلها
بصعوبة أخذ سالم الأغراض وبدا ينظف السيارة.... جلس مساعد ع الكرسي وعبير جنبه.... مساعد يعلق ويضحك وعبير معه....
مساعد: من شوي أنا وعبير لعبنا بالطين ووصخنا السيارة... بس أنا قلت بما أنك موجود... فأنت اللي بتنظفها ههههههههه
سالم حط قهره وهو يمسح السيارة بقوة....
مساعد: شوي شوي ع السيارة
وقفت عبير وقالت: رايحة أجيب عصير
دخلت داخل ووقفت عند النافذة.... ناظرت سالم مبين من وجهه أنه مقهور بس ساكت.... أما أخوها كان يتكلم ويضحك.... حست أنه تمادا مع سالم لكن كل ما تذكرت خيانته.... تحقد عليه ونفسها تقهره أكثر مثل ما قهرها....
يتبع ,,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك