رواية مع غروب الشمس لا يغرب الحب -2
روضه وقفت وفتحت الثلاجه: شهد فوق في الحمام تستحم وأنا عندي أكله لزيزه حعملها
أخذت لبن زبادي و صكت الثلاجه لفت لقت فارس وراها مباشرة لو مارجعت لورى بسرعه كان صدمت فيه رفعت راسها وطلت فيه يعني خير؟
بس فارس مد يده وأخذ اللبن منها وفتح الثلاجه: لا دا خالي من الدسم (أخذ لبن تاني) خدي دا كامل الدسم
روضه(كأنها بدون نفس): إيوا صح
رجع فارس للطاوله وأخذ أشياؤه: يلا سلام أنا رايح لغرفتي ولا تنسي تذوقيني من أكلتك
سكتت ماحبت ترد عليه
خرج فارس من المطبخ وكملت أكلتها دخلتها الفرن ورجعت للصاله تستنى شهد وهيا في الصاله كانت تفكر: والله مدري إشبو دا الولد فارس يحسبني بيبي ولا ايش، ثاني مره يقرب مني أصلا خلاص لازم مايدخل إلا وأنا محجبه محنا صغار بدل ما يستحي على دمه ويخرج من المطبخ يتكلم عادي ولا كأني قدامه بنت بطولي أفف غبي وانا الأغبى وين خطتي اني أقهروا وأبين لو إنو مايسير الحركه الي سوااها .. صراحة لازم أعترف لنفسي ماأقدر أواجهو بدا الكلام في وجهو مستحيل مره ارتبك،، طيب كيييف؟
قطعت أفكارها شهد: سلملم
روضه طلت في شهد بسرعه كأنها مفجوعه وعلى طول اتداركت نفسها وطلت في ساعتها: هاذي 10 دقايق ماشالله !
شهد: ههههههاي نسيت أقول لك 10 دقايق + 5 دقايق
روضه: لاوالله؟ تنكتي إنتي ووجهك
شهد: أقول أخبار أكلتك؟
روضه وقفت: أوو ذكرتيني رايحه أشوفها
راحت وجات شهد معاها فتحت الفرن لقتها خلاص استوت طلعتها
شهد: إمممم ريحتها تفتح النفس
روضه: وطعمها أحلى
شهد: بسرعه أقطعي لي ماأقدر أتحمل
قطعوا لهم وصلتين وجلسوا ياكلوا
شهد: وااااو خطيييره والله يا روضه
روضه: من جد مرره لزيزه .. على فكره فارس قال يبغا يذوقها
شهد باستغراب: فارس في البيت؟
روضه: إيوا جا لمن كنتي في الحمام
شهد: غريبه .. يلا أقطعي له (وبصوت عالي) فاااارس لياااان عزووووز
ليان وعزوز: هااا
شهد: تعالوا وعلى طريقكم جيبوا فارس معاكم
روضه: لااا خلينا أحسن نودي لفارس صحنه بلاش هوا يجي
شهد بتطنيش: لااا خليه يجي بنفسه
دقيقه وكانوا الثلاثه في المطبخ
فارس: وااو الريحه تجنن
ليان وعزوز: نبغا
قطعت لهم روضه بس جلست تطل في ليان وعزوز تبغا رأيهم
فارس: تسلم يدك والله
روضه: الله يسلمك.. وإنتو ليان وعزوز كيف؟
عزوز: مره طعمه إنتي سويتيها ولا من مطعم؟
فارس يستهبل: أكيد من مطعم
شهد تكلم روضه: موو أقول لك دي الأشكال ماتقدر الشيفات
روضه في البدايه مافهمت لشيفات بس اول ماحللتها وفهمتها: ههههههههه شيفات حراام عليكي ترى أكره الطبخ
ليان: لالالا حلوو طبخك
عزوز: أصلن كنت عارف إنو رودي ثوتو
فارس ضربوا على راسو من ورا بشويش: أجل ليش تسأل .. (وقف): يلا أنا خارج (طل في روضه) تسلم يدك
روضه بابتسامه حلوه:بالعافيه
وأول ماخرج
روضه: أفف منك طيب إذا مادخلتك على مهند
شهد: لاياشيخه دحين زعلانه هاا ترى حافظ شكلك
روضه قامت: ماينفع معاكي الكلام
’.’.’.’.’.’.’.’.’.’.’.’.’.’.’.’
كانت سمر جالسه في غرفتها تحاول تقرأ لها كلمتين من الكتاب بكره عندها اختبار وخصوصا انهم في ثالث ثنوي يعني يحاولوا يجيبوا نسبة حلوه ع الأقل التتقدير ممتاز
سمعت بابها يندق وهيا منسدحه في السرير: اتفضل
دخلت أمها: سمر ايش تسوي؟
سمر جلست ع السرير ومستغربه ايش تبغا امها منها .. رفعت لها الكتاب الي في يدها: أذاكر
أم سامي: طيب كويس اتجهزي بعد المغرب رايحين بيت ستك وحيجوا بيت خالتك ( أم خالد)
سمر عارفه إنو دا مجرد خبر مافي مجال للمناقشه: طيب
خرجت أم سامي ورجعت سمر لوضعها السابق انسدحت وهيا تفكر: حتجي رغد يعني .. فجأه حست قلبها وقف .. ويمكن خالد الي هوا خطيبي يجي امم على حسب سامي بس مااتوقع انهم يجلسوا في بيت ستوو آآآه يا خلوودي وحشتني من زمان ماشفتك والله عارفه إنك تفكر فيا و تحبني ترى الي بيننا شعووور متبادل ....
حست انها موو مع الكتاب تفكيرها مع خاالد زوجها المستقبلي الكل عارف دا الشئ رمت الكتاب ودخلت الحمام تستحم وتتكشخ يمكن تقابلوا صدفه مابقي ع المغرب غير ساع هالا ربع
في غرفة سهى أختها ماسكة جوالها وتكلم بنت خالتها مرام
سهى: هههههههههـ أقول لك ترى بعد ساعة تقريبا حنتقابل في بيت ستو خلينا نقفل ونروح نلبس
مرام: خخخخ من جد الله يعينني على مقابلة وجهك
سهى: هاهاها تتمني انتي اعطيكي وجه اصلا.. على فكرة أختك رغد دلوعة الماما جاية؟
مرام: أفف منها أكيد وهيا تقدر تفوت زيارة لبيت ستو
سهى: الحمدالله انك انتي الي قدي مو هيا والله يعين سمووره عليها
مرام: من جد أجل اش تقولي علي انا معايا 24 ساعه
سهى: بس بس لاتبكي يلا أشوفك هناك باااي
مرام: بااي
بعـــد المغرب كانوا بيت أبو سامي في بيت ستهم (سيدهم متوفي عشان كدا يسموه بيت ستو) أما بيت أبو خالد لسا ماوصلوا
ستهم "علية" من النوع الي تميز أحد من أحفادها وتفضله ع الكل والحفيده هيا ..||| سمـــر |||..
ستهم علية: كيف حالك يابنتي سمر ؟؟ تعالي اجلسي جمبي فقدتك
سمر وهيا مبتسمة راحتوجلست جمبها: والله حتى انتي ياستو وحشتيني كيف صحتك؟
ستهم علية: الله يخليكي ليا.. إلا كيف حال زوجك خالد
هنا سمر وجهها سار طمااطم ومااعرفت بإيش ترد
أم سامي: أمي الله يهديكي سمر لسا مااتزوجتوو بس خطووبه
ستهم علية: طيب خطوبه يعني خلاص زوجها المهم الله يوفقهم
سهى ضحكت وكملت مع ستها: آمين
سمر طلت في سهى نظره يعني أنا أوريكي مزح طبعا
وهنا دخلوا عليهم أم خالد ورغد ومرام
أم خالد: السلااام عليكم
أم سامي: يا هلا يا هلا تو مانورت الفيلا
مرام تقرص سهى: كيفك يا وحشه؟
سهى: أح أحد يسلم كدا
مرام : يااي يارقيقه.. (تسلم على سمر) أهلن أهلن .. وبصوت واطي.. يا مرت أخويا
سمر انحرجت زياده: إيييـ بايخة
مرام: هههههههه ياحليلك انحرجتي
رغد تسلم على سمر بعد ماسلمت على سهى من أطراف أصابعها: كيفك
سمر ايتسمت: بخير
بعد ماجلسوا كلهم طبعا أم خالد وأم سامي مع بعض في الزاويه متكين وماخذين راحتهم في الكلام عن الناس وخصوصا الحريم و البنات أهم الأخبار عندهم ..
أما سهى ومرام مبسوطيين مع بعض يتكلموا ويتحكوا ويرسلوا لبعض بلوتوث في الجوال
رغد وسمر جالسين شويه بعيدين عن بعض
رغد: تعالي سمر ليش جالسة بعيد
سمر ماحبت تطولها صح انو هيا جايه قبل بس قالت مافيها شئ عادي وراحت جلست جمبها: كيفك؟
رغد بدلع: كويسه
سمرابتسمت: الحمدالله
رغد: امم حلوه قصتك وصبغتك متى سويتيهم ماشالله؟
سمر: تسلمي.. سويتهم قبل أسبوعين تقريبا تغيير
رغد: آهاا لأنو حتى أنا أفكر أقص وأصبغ
سمر: روحي لمشغل (..........) خطير في الشعر << ماأسوي دعايات هههههـ
رغد: إيوا أعرفوا حتى صحبتي نصحتني فيه ،، سكتت شويه بعدين قالت كأنها اتذكرت.. إيوا صح نسيت أقول لك
سمر: إيـش
رغد: خالد يسلم عليكي
سمر اررتبكت خصوصا إنو الي يبلغها السلام رغد وهما مابينهم شئ: الله يسلمك
الجـــــــ الرابع ــــــــزء
اليوم الثاني في المدرسة (للتوضيح: روضة وشهد وسمر في نفس المدرسة )
كانوا الثلاثي جالسين ع العشب وقت الفسحة لوحدهم مو مع شلتهم
روضة: عاارفين يا بنات باقي تقريبا 3 أسابيع ويومين ونتخرج من المدرسه كلها هههههه
سمر: اللله متى يجي آخر يوم بس أهم أيام دي الأيام
شهد: طبعا أيام المراجعه يعني حنحضر أتوقع ألين يوم الأحد الجاي وبعدها نغيب ونبدأ نذاكر للاختبارات النهائية
سمر: آآه الله يعيننا مع النظام التراكمي دا
روضه: من جـد مدري اش فايدتو
شهد: إنو ينزل درجاتنا بس !
سمر: خخخخ فائده خطييره
دق الجرس معلنًا نهاية الفسحة
روضة: لااا ياخسارة
شهد وسمر وقفوا و مسكوا يد يعض << يعني لأنهم في فصل واحد يبغوا يقهروا روضه
روضه: ههههههه عادي حروح لناديه وأمسك يدها
شهد وسمر: هههههههههه
سمر: لالا ولو مانقدر نزعل الأموره روودي
روضه تسوي نفسها زعلانه: بعد ايش؟
شهد: خلاص ايش الي يرضيكي؟
روضه تفكر: اممم لقيتهااا
سمر وشهد: ايش؟
روضه: إنك تخليني أقرأ مفكرتك الي تكتبي فيها الي تحسيه في قلبك يا شهد
شهد: احلفي. ماقيتي غير دا أجل خليكي زعلانة أحسن ،، وراحت عنهم
روضة وسمر طلوا في بعض وهما مستغربين مااتوقعوها حتزعل!!
’.’.’.’.’.’.’.’.’.’.’.’.’.’.’.’
طبـعا الشباب يختبروا الإختبارات النهائية قبل المدارس فكانت دي الفتره هيا أيام إختباراتهم .. خلونا نشوف أحوالهم ونبدأ بـ سامي وخالد بما إنهم في نفس القسم.. طبعا هما آخر سنة لهم ويتخرجوا لأنو العلوم 4 سنين عشان كدا شادين حيلهم يبغوا وظائف
في بيت سامي كانو مجتمعين ويذاكروا مع بعض اختبارهم الي بعد بكره
خالد: أفف تعبت الماده هذي بالذات خايف منها
سامي يشجعوا: أبو سلمان استهدي بالله انا عارف انو الماده صعبه بس انا وانت كملنا اوراقنا يعني ان شالله نجيب نتيجه حلوه
خالد: إيش رايك ناخذ استراحة
سامي: هههههههه ماشاالهت استراحاتنا اكثر من مذاركتنا
خالد: ههههههه اصلا الاختبار بعد بكره
سامي: بس باقي لنا يومين ونأجز آآه ونرتاح من الهم
خالد: يلا قوم شوف لنا طريق ولا ترى أتصل على سمووره أقول لها سوي لنا كابتشينوا من إيدك
سامي يقاطعوا بمخده على وجهوا: أشوفك صدقت تراها أختي
خالد: ههههههههـ عاارف
سامي: أستنى شويه أروح أشوف وينهم
خرج سامي للصاله بس ماقى أحد: أكيد إنو كل واحد في غرفتو
دخل مره ثانيه عند خالد في الصالون: اتفضل يا سي خالد خلينا نخرج للحديقه نغير جو
خالد: يلا
خرجوا برا وجالسين يمشوا في الحديقه
خالد: ممكن كاسة مويه
سامي: أحلى يالأدب .. لو إني حتى أنا مو عطشان كان قلت لك دقها كعابي على أقرب سوبر ماركت
خالد: ههههههـ أعرفك وأعرف معدنك الطيب
سامي طنشه ودخل البيت وأول مامشي أول خطوه شاف قفا بنت جالسه ع الكنبة وفاتحه شعرها الي يوصل لنص ضهرها
طبعا هيا أول ماسمعت الباب لفت وجهها واتفاجئت بسامي الي كان وااقف مكانه موو مصدق
في دي اللحظه دخلت سمر : شهد .. سكتت لما شافت سامي.. ساامي!!! ايش تسوي واقف؟
سامي يجاوب على سؤالها وعينه على شهد: أبغا كاستين مويه
سمر: طيب طيب انت اخرج وانا اجيب لك هيا
سامي بسرعه: لالا لاتخرجي في خالد برا
سمر بلعت ريقها: أوكي حدق الباب حق الحديقه
سامي: طيب
وخرج أخيرا
شهد اتنفست بقوة وغمضت عينها
سمر: ههههههههه الي يشوفك يقول شفتي وحش موو إنسان
شهد: أخوكي ما بغاا يخرج
سمر تغمز: موو قادر يقاوم الجمال
شهد سكتت وطلت في الأرض ححست إنها اشتاقت له وانو بس بشوفته قبل شويه رجع لها ذكرياتها معاه
سمر: شهد ويينك
شهد رفعت راسها: هناا يعني وين
سمر: صدقتك .. اسمعي انا رايحه اجيب لهم كاسة الموية وانتي حاولي تكتبي المعادلات الصعبة في ورقة
شهد بهدوء: طيب
’.’.’.’.’.’.’.’.’.’.’.’.’.’.’.’
أما بالنسبة لفارس كان جالس في غرفتو على الطاولة ومشغل الأبجورة على الورقة الي جالس يرسم عليها تصميم بيت والطاولة كلها مراسيم بمقاييس مختلفة ومسطرة ومثلث هندسه حجم كبير يعني الي يشوفوا يعرف انو مهندس
سمع الباب يندق قال بصوت واطي: اتفضل
بس شكلوا الي برا ماسمعوا فاندق الباب مره ثانية وطلع صوت امو: فاارس موجود
فارس قام من الكرسي وفتح الباب: إيوا موجود
أم فارس: ها كيف المذاكره\
فارس: أحتاج دعواتك بكره عندي كويز
أم فارس: والله اني ادعي لك الله يوفقك .. مدت يدها واعطتوا الصحن الي فيه أكل .. لازم تاكل
فارس: الله يخليكي لنا .. ابتسم.. مدري مين حيهتم فيني لو جاتني البعثة
أم فارس: لالا بلا بعثه بلا سفر أجلس عندي وكمل دراستك هنا
فارس وهوا يحط الصحن على الطاولة: انتي عارفة اني ان شالله لو سافرت ماحطول سنتين او سنة وومكن اقل 6 شهور بس
أم فارس: مااقول غير الله يهديك ويختار لك الي فيه خير
فارس: آآمين
’.’.’.’.’.’.’.’.’.’.’.’.’.’.’.’
طبعا مهند اختباراتوا فيها تجارب عملية غير الأقسام الثانية لأنو طب
كان في الجامعه وبالتحديد في المعمل الي فيه اختلاط بنات وأولاد بس الي مريحوا إنو صاحبو رائد معاه من المتوسط وبحوثاتهم دائما مع بعض
،، كانت في وحده لبنانيه اسمها ناهد فيها جمال متعوده إنو الكل يعجب فيها بس حست إنه مهند مو معطيها وجه مره حتى رائد صاحبو ممكن ياخذ ويعطي معاها شوية فقررت إنها هيا الي تتقرب منه
مهند: رائد معاك قلم؟
رائد جالس يدور في جيبه بس
ناهد بابتسامه: اتفزل دكتور مهند
مهند أخذه منها: شكرا
كمل شغله عادي
ناهد: أنا حعمل لي نسكافيه حدا بدو اعمل لو معايا؟
وحده من البنات: إيوا انا لو سمحتي ناهد
ناهد: وإنت دكتور مهند؟
مهند استغرب من بين كل الطلاب تناديه هوا بالذات بس ماحب يكسفها قال لها : لو سمحتي
ناهد: من عيوني
مهند كان مستغرب بس قال أنا دخلت خلاص هذا القسم وكنت عارف إني حختلط مع بنات لازم اتعود وأخلي الوضع طبيعي،،
جات ناهد ومعاها كوبين نسكافيه راحت أعطت للبنت وبعدين راحت لمهند
ناهد وهيا تمد يدها: إن شالله بيعجبك
مهند مبتسم: اكيد تسلمي
ناهد ترد ابتسامته: ولو الله يسلمك
’.’.’.’.’.’.’.’.’.’.’.’.’.’.’.’
يوم جديد.. الساعه 12 ليلة السبت وليلة أول يوم في الإختبارات النهائية للمدارس كانت رغد فاتحة الماسنجر حقها تكلم صحبتها نهى
رغد(?,,دلوعة أمهاا,,?) .. نهى (?? ?فقدتك ياأعـــز الناس ?? ?)
(للتوضيح)= رغد ونهى اتعرفوا على بعض في معهد للغة الانجليزية وساروا مره صحبات << وحنعرف السبب لأنو رغد مغروره وماهي اجتماعية
?? ?فقدتك ياأعـــز الناس ?? ?:
أهلييييييين نووور المسن والله
?,,دلوعة أمهاا,,?):
بوجودك
?? ?فقدتك ياأعـــز الناس ?? ?:
كيفك ياقمر؟
?,,دلوعة أمهاا,,?):
تمام ماشي الحال .. وإنتي أخبارك؟
?? ?فقدتك ياأعـــز الناس ?? ?:
بخير بشوفتك
?,,دلوعة أمهاا,,?):
تسلمي .. ايوا مين الي فقدتيه
?? ?فقدتك ياأعـــز الناس ?? ?:
أكييد انتي فقدتك من جد (وجه مخنوق العبره)
?,,دلوعة أمهاا,,?):
(وجه مكسوف) تسلمي ياقلبي حتى أناا
?? ?فقدتك ياأعـــز الناس ?? ?:
الله يسلمك .. وإن شالله بس السنة تخلص نتقابل
وجلسوا يتكلموا الين الساعه تقريبا 3
نبذه عن الأشخاص الي ذكرتهم
رهف: صحبة سهى في المدرسة عمرها 16 رهف بنت ملامحها ناعمه و فيها جاذبيه في حركاتها وكلامها تحبب الي حولها فيها أعز صحباتها سهى ومرام هوايتها الطبخ وشغل البيت أخت رائد.
نهى:عمرها 19 هيا بنت بس حركاتها وكلامها يشبه الأولاد وحتى شعرها قصير أعز صحباتها وأحبهم رغد لأنها تحس فيها الصفات الي ناقصتها الدلع والأنوثه ولمن كانوا يمشوا مع بعض في المركز كان شكلهم غلط . << عرفتوا السبب طبعا
الجـــــــ بدوون رقم $ هدية $ ^.^ ــــــــزء
* مـع غروب الشمس لا يغرب الحب * أحلى رواية حب رومانسية كاملة
بقلم: ~؟ خيـ~آلـ ـواقعْ ؟~.!
أول يوم في الاختبارات طبعا يكون لو رهبه غير باقي الأيام،، بالنسبة لسمر وشهد وروضه كانوا يهدوا بعض والي مريحهم إنو هما الثلاثه في نفس القاعه وأماكنهم مو مره بعيده عن بعض وأول يوم عليهم رياضيات ومكتبه
دخلوا القاعه وهما يذكروا الله وقرروا إنهم يحاولوا مايغشوا من بعض قدر الإمكان << خخخ ونعم القرار
خلص إختبار الرياضيات ونزلوا بعد ماوقعوا
طبعا الكل يعرف كيف الأحوال تكون في دا الوقت كل البنات ملتمين وكل وحده تسأل عن السؤال الي كانت شاكه فيه وزي كدا وبعد ماجلسوا أخيرا مسكوا الكتاب الي عليهم في الفترة الثانيه وهما جالسين مع بعض
سمر: شهد ممكن سؤال؟
شهد: إذا كان عن الاختبار خلاص راجعنا بما فيه الكفاية
روضه تكمل: واكتشفنا أخطاء بما فيه الكفاية الله يستر بس
سمر: هههههه من جد .. لالاهوا سؤال خارجي
شهد: واات؟
سمر: ليش أول زعلتي لما رودي قالت لك ع المفكره؟
شهد ارتبكت شويه: لااا عادي بس
روضه: بس ايش؟
شهد: إنو الدفتر أكتب فيه كلام ماأحب أحد يقرأو
روضه: حتى إحنا؟
شهد الدمعه في عينها: خصوصيات
سمر قربت منها وضمتها: قلبي شهد ماتسوى دموعك خلاص أنا آسفة إني فتحت الموضوع
شهد تمسح دموعها وتبتسم لهم: لا عادي ماغلطتي خلاص ولا يهمكم بكره أجيبوا تشوفوا شكلوا بسس (وشددت على حرف السين)
روضه: هههههههه ولايهمك أهم شئ راحتك
ورجعوا يذاكرو وهما في ساحة المدرسه
’.’.’.’.’.’.’.’.’.’.’.’.’.’.’.’
بما إنو إختبارات المدارس بدأت فطبيعي إنو بعض الأقسام في الجامعه تكون مأجزه
خالد وسامي كان اليوم عندهم غيـــر اليوم اتخرجوا من الجامعة وأجزوو بلا عودة إن شالله
وأكيد إنو العوائل حتعمل حفلة كبيرة لكل الناجحين والخريجين
وغير حفلتهم الي في الجامعة
أبو سامي: مبرووك ألف مبروك التخرج وعقبال الوظيفة والزواج
خالد وسامي: الله يبارك فيك
سامي: وين أمي وسمر وسهى؟؟؟
أبو سامي: عارف إنت سمر وسهى لسا عندهم اختبارات فأتوقعهم لسا نايمين وأمك مدري وينها
خالد: طيب سامي أدخل شوف فين خالتي حتى أنا أبغا أسلم عليها
سامي: أبشر
دخل سامي للبيت وترك خالد وأبوه في الديوانية
سمع أصوات في المطبخ دخل لقى أمه وبابتسامة عريضة راح لها وقال: باااركي لي
أم سامي: بسم الله .. سامي متى جيت؟
سامي: هههههههه دوبي جاي من الجاامعه وبلااا عودة إن شالله
أم سامي: ماشالله يلا عقبال مانزوجك ونفتك
سامي ماخذها بروح مرحة مايبغا شئ ينكد عليه: أفاا يا امي أهون عليكي تقولي لي الكلام هذا (غمز لها)
أم سامي: مااقلت شئ انت ووجهك .. وناوي تتوظف ولا
سامي: إلا إلا إن شالله .. أمي وين سمورة وسهورة هههههه؟
أم سامي: ذحين تبغا تدلعهم بدون دلع أحلى.. كل وحده في غرفتها أطلع شوفها
سامي: ههههههههه أووكي
رااح جري لغرفة سمر أول شئ دق الباب سمع صوتها اتفضل
دخل جري ونط عليها
سمر صرخت: ايش فييي؟
سامي بضحكة شاقة الحلق: هههههههه سلامتك (قام منها وعدل نفسه) اليوم اتخرجت
سمر اتفاجئت: جــد؟خلاااص اليوم ..قامت من الكرسي وضمت ساامي.. ههههههههـ مبروووك
سامي: الله يبارك فيكي وعقبالك وعلى فكرة أذكرك حتى خالد اتخرج معايا ويستنى الوظيفة
سمر وجهها على طوول حمر: ماشالله الله يوفقكم
سامي: الله يوفق مين بالظبط؟ وغمز لها .. خرج من عندها وراح لغرف سهى دق الباب بس شكلها نااايمة الأخت فنزل تاني لعند أبوه وخالد
’.’.’.’.’.’.’.’.’.’.’.’.’.’.’.’
في اليوم الثاني في المدرسة أهون من اليوم الي قبله بالنسبة لشهد وروضة وسمر طلعوا لاختبار الفترة الأولى والحمدالله عدى تمام وكان سهل ع الكل
بعد مانزلوا جلسوا مع شلتهم شويه بعدين قاموا يمشوا في الساحة وهما ماسكين كتابهم حق الفترة الثانيه يقرأوا كلمة ويتكلموا مع بعض عشره خخخ
شهد: إييوا بنات أتذكرت جبت مفكرتي
روضه: كويس مانسيتي شطووره
سمر: يلا متحمسة أشوفه
(ملاحظة: شنط سمر وشهد وروضه حق الاختبارات نفس الشكل واللون بس المختلف انو كل وحده كاتبه اسمها فيها بالخيط )
راحوا عند مكان شنطهم فتحت شهد شنطتها وطلعت الدفتر منها
روضه: يااي مرره نايس
سمر: كيووت
الدفتر كان مره حلو مغطى بالريش الوردي فاتح من ورا وقدام،، ومن الوجه مخيط بلون وردي غامق شكل قلب
شهد: يسلموو عيونكم الحلوه
وبعد ماشافوه رجعتوا في الشنطه
راحوا كملوا مذاكرتهم..
انتهى اليوم ورجعت كل وحده لبيتهم
سمر دخلت البيت وعلى طول طلعت غرفتها كالعادة بس اتذكرت سؤال كانت شاكه فيه ففتحت شنطتها عشان تشوف الكتاب بس اتفاجئت بوجوود شئ في شنطتها
ايش الشئ الي اتفاجئت منوو سمر؟؟
’.’.’.’.’.’.’.’.’.’.’.’.’.’.’.’
في بيت أبو سامي وقت العصر كانوا سامي وسهى جالسين ع التلفزيون والريموت مع سامي وفي دالوقت يجي مسلسل سهى تتابعوا بس عارفه انها لو قالت لسامي ماحيرضى عشان كدا كانت تفكر إنها تاخذ الريموت منو
سهى: ساامي
سامي: همم
سهى: سمر تبغاك فوق
سامي لف عليها: احلفي
سهى: من جد تبغاك في شئ خاص
سامي وقف: غريبة أوكي انا طالع لها
أول ماراح سامي سهى نطت مكان ماجلس وأخذت الريموت وهياا خايفة من كذبتها
طبعا غيرت عالمسلسل وجلست تتابع وهيا مستنية صرخة سامي
أما سامي فطلع فوق ولقى باب غرفة سمر شبه مفتوح دق الباب بس ماسمع صوتها ففتح الباب وداربعيونه ع الغرفه كانت هدووء وسمر ماهي في وهوا يدور بعينه لمح شئ على طاولتها راح لعنده شكله عجبه وأول مره يشوفو في غرفتها كان دفتر شكله مره حلو مغطى بالريش لونو وردي
مسك الدفتر ورفعه فتح أول صفحة لقاها بيضة ومكتوب من تحت بخط حلو وعريض (( دفتري الخاص .. شهد..))
هوا أول ماقرأ الاسم حس بقلبه يدق وقال بصوت واطي: يعني الدفتر حق شهد .. وبهدوء زي مادخل خرج ومعاه الدفتر قبل ماتطلع سمر من الحمام وتشوفو
دخل لغرفتوا وشغل الأبجوره الي جمب السرير وبإيدين خايفة فتح أول صفحة وهوا جاهل اش ممكن تكتب في دفترها الخاص حاس بتأنيب الضمير ومع ذلك فضوله غلبه قرأ فيه:
إلى من أحببته بقلبي وكياني ..
لا أعرف لمن أبدي هذه المشاعر؟؟
أحس أن البشر لن يفهموا بحقيقة ما أعاني طيلة 11 سنة !
لذلك كان هذا الدفتر بمثابة بديل ..
ولكن.. أي بديل وأي دفتر !!
إن القلم والكتابة لا تحمل إلا جزءا مما أحمله في قلبي من مشاعري الخالدة له ..
أحبه
نعم أحبه
وسأصرخ بصوت عالي في وجه هذا العالم أني أحبه
وسأبقى أحبه إلى الأبد
قلب الصفحة الي بعدها وكان مندمج بفكره وقلبه وحاس بنار تشتعل في قلبه من هذا الانسان الي تحبه شهد وكان نفسه يروح لها دحين ويقول لها بكل حب وصراحة إنه يحبها أكثر مما هيا تحب هذا الانسان
إن هذا الحب هو أسمى حب
و أرقى حب
لأنه مبني على لاشئ
بصراحة تامة أقولها أني اشعر بتناقض كبير من داخلي
أشعر أني أحبه بينما لا يعرف أحد ذلك أبدا
سوى هذا الدفتر المسكين
الذي يتحمل جزءا من معاناتي
فهل من كلمة تعبر عن من يحمل كل المعاناة !!
كان يحس نفسه خلااااص مو قادر يستحمل بس يبغا يعرف على مين هذا الكلام وهوا متأكد إنه إذا عرف ماراح يسير شئ غير إنه ينقهر زيادة ويحس بنار في قلبه تشتعل فقلب الصفحات بسرعه وانفتحت على دي الصفحة
وهنا ..
أحب أن أقول يا من كان حبي لك
مطابقا لاسمك
( لو كان لي قلبان عشت بواحد وتركت آخر في هواك يعذب )
سامي أنت أسمى حب عشته في حياتي ..
كان شكل سامي وشعوره وكله على بعضه يعجز أحد عن وصفه بس كان يبغا يعرف شئ واحد إذا هوا سامي الي كانت تقصده ولا واحد تاني عشان كدا فتح صفحة من النص يبغا أي دليل يأكد له إنه هوا
كانت من أجمل لحظات حياتي ..
فعلا إنها لحظات ولكنها أجمل من أيام مرت وسنون مضت ..
كنت في منزل سمر نذاكر سوية فلم يبقى إلا القليل وتبدأ الاختبارات النهائية /..
كنا جالسين في الصاله واحتاجت سمر لدخول الحمام وذهبت,,
وفجأه سمعت صوت باب المنزل يفتح فالتفت خلفي لأرى من الذي دخل؟ وياليتني ماالتفت !!
لقد رأيته وهو واقف متفاجئ مثلي لاأعلم بماذا يفكر؟
ولكني كنت أحس بأن جميع أعضائي توقفت من الصدمة..’
ولكن الحمدالله جاءت سمر وأنقذتي من هول الموقف..
أطرقت رأسي وأنا أفكرر..
نزلت دمعة من سامي دمعة صااادقة من قلب عاشق دمعة فرح دمعة اشتياق دمعة تحمل كلل معاني الحب وبعد ماقرأ الدفتر كله رجعه لغرفة سمر.
خرجت سمر من الحمام بعد مااخذت لها شور وقررت تتصل على شهد دحين قبل ما تفتح شهد شنطتها وتنصدم إنو دفترها مو موجود راحت للتلفون ودقت ردت عليها ليان
ليان: ألو
سمر: اهلييين ليونه كيفك يا قلبي
ليان ماعرفتها: الحمدالله مين انتي؟
سمر: أفااا ماعرفتيني؟ أنا الي دائما العب معاكي واحبك مره
ليان: آآها سمر
سمر: هههههههههههههههه حبيبي شهوده جمبك؟
ليان: إيوا دقيقه أناديها
وشويه جات شهد: مرحبا سمورتي
سمر: مراحب كيفك
شهد: تمام الحمدالله وإنتي
سمر: بخير (سكتت شويه) شهد
شهد: هلا
سمر: اممم والله ماأعرف كيف أقول لك بس شكلو لأن شنطنا جمب بعض وشكلها زي بعض
شهد: إيوا
سمر: شكلك كنتي تبغي تحطي دفترك في الشنطه بس بالغلط حطيتيه في شنطتي
شهد شهقت: دفتري الخاص عندك؟
سمر: إيوا (وبسرعه) بس شهد لاتخافي والله ما قرأته
شهد: طيب سمر صدقتك بس اسمعيني بليز بليز الله يخليكي حطيه في مكان ماحد يشوفه مرره
سمر: طيب لا تخافي في أيادي أمينه
شهد ارتاحت: الله يسعدك
سمر: آمين .. يلا مع السلامه
شهد: مع السلامه
’.’.’.’.’.’.’.’.’.’.’.’.’.’.’.’
في بيت أبو فارس شهد كانت تذاكر في وسط الصالة وليان وعزوز يضحكوا على شكلها
أم فارس: بدل ماتقولي لنفسك لازم أشد دا آخر اختبار جالسه في الصالة تذاكري
شهد: ماما الله يخليكي الي فيني مكفيني أبغا أختم وأأجز
أبو فارس: يلا هانت بكره وتأجزي
شهد: آآه بس الحمدالله انو مادة بكره سهله
أبو فارس: إيش عليكي
شهد: حاسب، الحلو انو الاستاذه مخططة لنا الي نذاكرو
أم فارس بنظره جانبية: دلــع الله يرحم أيامنا كنا كل الكتاب نذاكرو
أبو فارس: هههههههه صدقتي والله الأجيال تتغير
دخل عليهم فارس البيت وباين تعباان كأنو راسو مصدع
ليان وعزوز نطو عليه: أهلين فروسي
فارس ابتسم لهم ابتسامة خفيفه وراح جلس على اقرب كنبه وحط يدينه فوق راسه بتعب: السلام عليكم
كلهم: وعليكم السلاام
أبو فارس: سلااامات والله
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك