رواية وصية حقد -16
بحد ذاته خطر
جلست جنبهم وقعدت تناظر اللي اسمها سحر لانها معبسه
مناير لاحظت نظرات هيوف وقربت منها _ هي مخطوبه قبل كم يوم وما تبغاه كانت تبغى واحد ثاني
هيوف هزت راسها ليتهم ما يقولون لها اسرارهم ما تحب شغله الاسرار كلها
دخلت في افكارها عن دانه وكيف خربت لها حياتها بس للاسف ما زالت تشعر بالراحه واضح انها ما تخلصت من حقدها كله كانت تسمع كلام البنات اللي ما وقفوا كلام لكنهم في لحظه وقفوا هيوف التفتت لمناير تبغى تشوف ليه سكتوا
ناظرت حولها ما شافت شي يدعوا للتعجب _ ايش فيه ليه سكتوا
مناير وهي تناظر سحر وهي تقوم بسرعه ومغطيه عيونها شكلها تبكي تكلمت مع البنات كلهم _ معقوله هو هنا
جنى _ لا ولد عمه مو معقوله سحر ذي يعني لو تشوف أي واحد من عايلته بتسوي كذا ما حد قالها كوني غبيه وحبيه
هيوف تناظرهم بقرف يعني هم راعين سوالف الحب والغرام لا ومتحمسين ويبكون الحمد لله والشكر
مناير تناظر هيوف وهي مبتسمه _ اعذرينا لكن احنا راح نعتبرك صديقتنا من اليوم يله تروحين معنا
هيوف ناظرت جنى وفاطمه _ لا مشكورين انا خايفه الطياره تفوتني
مناير ناظرت جنى _ البنت خايفه يا حلو قوي قلبك انتي معنا كل شي له حل
هيوف _ مشكورين انا بصراحه ما احب اروح في ذا الحر
جنى _ يله لا تصيرين عنيده
هيوف ناظرتها _ انا عنيده للاسف تقدرون تروحون انا هنا ما راح اروح
مناير _ اوكيه كيفك يله خلونا نروح وناخذ سحر ونطلع باي هيوفه
هيوفه ناظرتها بغت تقولها قولي لي هيوف وبلاها سالفه هيوفه ذي
هيوف _ باي
الانتظار طال وهو ما بان حاولت تلقى بنات لقت بنتين بحرينيات لكنهم ما تقبلوها جلست جنبهم وهم ما عطوها وجه
يحقلهم اصلا لو جلست معهم ما راح تفهم لهجتهم هي ما تعرف الا السعوديه وبعدها تضيع بعدين هم تكلموا بلهجتهم الاصليه وكانهم قاصدين يحقلهم بعد هم منين يعرفونها عشان يامنون لها
رجعت لكرسيها خاليه الوفاض تنتظر البنات اللي شكلها راح تقضي باقي ايامها معهم
وانتظرت
.................................................. ..
ام سعد دخلت غرفة نومها ولقت ابو سعد متمدد على سريره
ام سعد بشك _ انت منت بمستغرب ليه سعد راح وش هاذي الشغله المهمه اكثر من زواجه
ابو سعد_ والله انا بعد استغربت لكن ان شاء الله انها صفقه زينه لا تخافين هو بيرجع بكره
ام سعد_ انا قلبي ما هو بمطمن
ابو سعد_ يا بنت الحلال لا تفاولين بالشر ولدك بيرجع انتي عارفه انه بينجن على بنت الشهال
ام سعد_ عموما تابعه دق عليه الحين ابغى اعرف وش سالفته
ابو سعد خذا جواله بسرعه عارف ان النقاش مع زوجته ما ينفع
قعد يناظر ام سعد والجوال يدق
دق
دق
دق
وما احد رد
ام سعد_ وش فيه ليه ما رد
ابو سعد_ برجع ادق مره ثانيه
ام سعد- دق دق الله يستر
في الطياره
شهلا _ انا بركب قرب هيوف
هيوف وهي تناظر حولها هو مو موجود في الطياره اصلا
جلست جنب شهلا
مناير _ هيوف خاطرك اجلس جنبك
هيوف _ لا عادي مو مشكله
المضيفه _ بليز انسه هيدا مو مقعدك انتي مقعدك 88
شهلا _ بس احنا غيرنا مقعدها تحت في المركز عشان تجلس جنبنا
المضيفه _ للاسف ما تغير شي اعزروني لازم تتفضل وتقعد مكانها
هيوف قامت بسرعه ما همها شي تبغى تقوم ما عليها منهم _ اوكيه وين مكاني
المضيفه _ تفضلي معي
مناير _ هيوف اذا ما اعجبك المكان ناديني بغير معك انا ما عندي مشكله اوكيه
هيوف رغما عنها ارتاحت لمناير
هيوف _ طيب
.................................................. .......... ..........
علي _ محمد اخلص علي انا عارف انك عارف قلي الحين ليه رمم المباني
محمد_ والله العظيم ماني بعارف انا مثلك الاستاذ طارق ما قال شي
علي _ محمد انت يعني مو عارف طيب ما عندك فكره ولا شك في شي
محمد سكت _ ممكن عشان سالفه عبدالله الشهال
علي جلس وهو منغتم _ طارق مشكله والله مشكله متى ناوي يترك العايله بحالها خلاص جاهم ما كفاهم
محمد_ استاذ علي انت عارف ان السبب ما هو بسهل
علي _ السبب السبب بس خلاص طارق ما يرحم وش يبغى بعد من الرجال فلسه دخله المستشفى كم مره اهانه قدام العرب
محمد_ الله اعلم وش ممكن يسوي
علي قام وناظر باب مكتب طارق زعلان على صديقه هو ما يبغى طارق يسوي كذا عشان لا يندم بعدين لان طارق بيكره نفسه
.................................................. .......... ...............
وقفت المضيفه عند مكان هيوف الجديد هيوف وقفت مبلمه كثير
ناظرها وبانت في عيونه صدمه خفيفه نجح في اخفائها قبل ما تشوفها هيوف بعدين رجع يناظر قدامه وقام عشان تدخل تجلس في مكانها
ناظرت المضيفه بس ليه تعارض ما عندها مشكله كلامه صح يسم البدن بس ما عليها منه راح تتجاهله
جلست مكانها وراحت المضيفه هيوف شافت انه مغير ملابسه لابس بلوزه بيضاء كلاسيكيه وبنطلون اسود عادي لبس عادي
صدق انه فاضي يعني كان طول ذي الساعتين او الثلاث ساعات يلبس وما طلع الا بذا اللبس
بدا الاقلاع هيوف بدت تتعود اكيد الخوف غزا قلبها لكنها ما ناظرت للي جالس جنبها نهائيا
بعد الاقلاع اللي هيوف عرفت انها راح تتعقد منه دائما حست بحركه جنبها التفتت له
لقته يناظرها _ لا تزعجيني اتفقنا
هيوف حسته ما ناظرها بتمعن كويس انه مؤدب لكن كلامه الهبها وش يقصد انا مزعجه
هيوف وهي تناظر دريشتها _ لا ما اتفقنا ولما ابغى اتكلم بتكلم
ما رد عليها فناظرت جنبها تبغى تشوف وش هو قاعد يسوي لقته يقرا كتابه الاسود
هيوف فكرت ليه هي و للحظه ظنت انه كويس ... لان الفكره تبخرت من راسها
وندمت لانها تركت مكانها تقدر تدعي مناير تجلس جنبه
بتدعيها بعد شوي
ولا ليه هي فيها نوم راح تنام
وتتركه
قفلت عينها
وبدون شعور او مقدمات نامت
الفصل العشرون
وصيه جديده
لم انتهي بعد من زرع بذوري ...فأنا حقد
سأحاول واحاول حتى اقرب ذلك البعد
لن اجعل مساحات الضعف تمنعني ومع ذلك لم اكتفي بعد ا
م سعد_ ولدي ولدي يا ابو سعد وش فيه لا يكون صاير له شي يا بو سعد بجن ولدي لا يكون صار له شي
ابو سعد_ الو الو عادل
عادل _ الو
ابو سعد_ عادل وينه سعد هاته ابغاه ضروري
صمت طويل
طال كثيرا
عادل رجع للخط _ ابو سعد سعد ما يقدر يكلم الحين
ابو سعد- ليه وش فيه سعد عادل جاوب
سعد خذا الجوال من عادل _ يبه انا سعد
ابو سعد_ سعد انت وينك ليه ما رديت على جوالك امك بنتجن ايش فيك متى بترجع
سعد بصوت واطي _ بكره
ابو سعد ارتاح _ كويس ليه ما رديت
سعد_ كنت في اجتماع
ابو سعد_ اذا يله لا اعطلك
سعد_ في امان الله يبه سلملي على الوالده
قفل الجوال وهو ماسك نفسه ولا هو بعارف كيف
هاذي توصيات طارق
قال يبغى ال شهال ما يعرفون الا في يوم الزواج
بس هم بكره بيعرفون
بكره لان مفروض كتب الكتاب بكره
اسف اسف يا همايل
لو الاسف راح ينفع
.................................................. .......... ............
قال _ قومي الطياره وصلت انتي ايه قومي
هيوف تسمع اصوات من بعيد
قومي
الطياره
واشنطن
فتحت عينها
ورفعتها ولقت نفسها غارقه في تينك عيون لونها بني غريب
ابتعدت تلك العينان هيوف ما فمهت وينها ومن هي كتفه اللي نايمه عليها لا هي مو بس نايمه على الكتف هاذي الا متعلقه فيها بيدينها الثنتين وحاضنتها
الذاكره بدت ترجع
التخزين امتلى
وما شافت نفسها الا مبعده اليد بقوه عنها ومتعدله في جلستها
ما حاولت تناظره لانها منحرجه كثير منه
لا فيه شي غريب وش هذا اللي قدام عيونه ومغطي عليها الرؤيه
خصله من شعرها طايحه تحسست حجابها بسرعه لقته موجود بس متراجع وقصتها شوي طالعه لفتها كويس وناظرت جنبها ما لقته
ما لقته
غير موجود
الكل يمشي يطلع من الطياره معقوله وصلنا...
خذت شنطتها وطلعت لقت البنات منتظرينها في مقاعدهم
هيوف بسرعه عرفت ان في مناير شي لانها ما حطت عيونها في عيون هيوف
هيوف ناظرتها من فوق لتحت ما عليها منها مع انها ارتاحت صدق لمناير
وقفوا في صاله المطار
هيوف_ وين راح نجلس الطياره بعد نص ساعه ما راح تطول
جنى _ هدي بس شهلا هنا خلاص ما راح تكمل معنا راح نجلس معها في الكوفي يله
مناير مسكت يد هيوف عشان تمشي معها في الاخير
البنات مشوا
جلسوا في طاوله
مناير بصوت عالي _ بنات انا بروح للحمام مع هيوف ابغى اضبط لها حجابها
هيوف ناظرتها وش فيه حجابها
بس مع ذلك مشت ورا مناير لانها عرفت ان فيه شي ثاني
في الحمام
مناير جلست شوي تناظر هيوف
هيوف باستغراب _ نعم وش فيه
مناير _ هيوف ابغاك تكونين معي صريحه لان فيه اشياء لازم تعرفينها تسبب حساسيات في شلتنا
هيوف ما ردت تبغى مناير تبغى تكمل كلامها
مناير _ هيوف راح اقولك قصه سحر ومنها راح تعرفين وش ابغى منك ؟(انتظرت شوي لان هيوف ما ردت وقررت تكمل القصه )سحر بدت تدرس معنا من الترم الثاني يعني هي بعدها ما كملت سنتها الاولى وفيه نظام او بالاحرى اتحاد طلبه سعودين يساعدون الطلبه المستجدين جدا رائعين ومتعاونين رئيسهم طالب ماجستير اسمه زيد .. احم احم زيد العاصي زيد هذا نعرفه من البكالوريس طيب المهم هو لمايجي طالب جديد يجلس يلاحقه ويضبط لها اموره يعني لفتره من الزمن لين يتاقلم الطالب غالبا لمده ثلاث ايام ماخذها حركه شهامه
هيوف ناظرت المرايه ثواني _ مناير ادخلي في الموضوع يعني ايش سحر حبته وهو اللي كانت تبغاه طيب وبعدين.. بعيدن في شي ثاني انا ما احب احد يقولي اسراره انا مالي علاقه اسرار سحر لها ملكها للاسف انا انسانه ما تحفظ الاسرار
مناير _ انا معك وما كنت راح اقولك القصه لو مالك علاقه فيها
هيوف بصدمه _ انا لي علاقه فيها ليه لا يكون انا اخت زايد هذا
مناير _ اسمه زيد مو زايد لا منتي اخته وبعدين خليني اكمل القصه سحر دخلت الجامعه وبدا زيد بكل طيبه يهتم فيها هي وكل المستجدين على حدا سواء لكن زيد اهتمامه يسحر الناس هو ما يعرف عموما سحر حبته ماتت فيه وشافت فيه فارس احلامها اللي مثل قصص الافلام انها سافرت ولقتها
هيوف _ سحر بنت عمك ليه تتكلمين عنها كذا
مناير _ هيوف انا ما قلت شي غلط عنها عموما سحر جريئه راحت له وقالت له
هيوف بان الامتعاض في وجهها _ انا اسفه يا مناير بنت عمك مو جرئيه الا غبيه طبعا طلع ما يحبها وبعدين اخلصي علي
مناير ناظرت هيوف _ ايه طلع ما يحبها هو بصراحه ما يحب احد او حتى يناظر باحد لانه خاطب بنت عمه
هيوف _ يا الله طيب خلاص انتهت السالفه
مناير تجاهلت هيوف وكملت السالفه _ طبعا قالها انا اشوفك مثل اختي واهتمامي بك عادي انا اسف لاني بينت لك شي انا ما اقصده وقالها انه خاطب هي لو سئلتنا كان قلنا لها الحقيقه لكنها ما حبت .. المشكله ان سحر حبته لهاذيك الدرجه اللي تعمي ..عقلها سوالها قصه انه زيد يحبها بس عشانه مخطوب ما حب يجرحها ولما وصلت للسعوديه عرفت انه عايش في دبي وراحت مع اهلها للاجازه تعرفين وش سوت
هيوف اللي لاول مره بدت تهتم في القصه _ راحت لخطيبته مثل الافلام وقالت اتركيه عشاني احبه
مناير _ لا يا ليت راح لابوه وانتي الصادقه وقالت له لا تحطم حياه ولدك هو يحبني وانت راح تهدم حياته بذي الطريقه
هيوف شهقت _ استغفر الله ذي انهبلت
مناير _ ابوه طردها لان عايلتهم صارمه في ذي الامور انت لبنت عمك يعني انت لبنت عمك وعرف عمي ببنته طبعا كل اللي عرفناه ان ولد عمي الثاني خطبها وتملكت في نفس اليوم
هيوف _ ولد عمك ما عرف بللي سوت
هيوف حست ان مناير العبره خانقتها _ ايه عرف عشان كذا شاف انه من الواجب يتزوجها حتى لو كان ما يبيها
هيوف من غير ما تتكلم مناير عرفت انها كانت تبغى ولد عمها ذا يالله انا كل ما اروح القالي ناس يحبون ويخبلون لا ومإسي الحمدلله
هيوف _ انا وش علاقتي بذي القصه
مناير _ العايله وافقوا ان سحر ترجع عشان لايبان شي قدام الناس لكن انهم اشرطوا عليها شرط وللاسف احسبوني معها انها ما تحتك بعايله العاصي نهائيا
هيوف بصراحه _ والله قليل ما سوا انا لو منهم ما خليتها تخرج بس يله طيب انا ما زلت ما فمهت وش موضوعي
مناير _ اقطعي علاقتك باي احد من العاصي
هيوف شهقت _ وانا منين اعرفهم عشان اقطع علاقتي بهم
مناير ناظرت هيوف وهي متضايقه ليه هيوف تنكر
هيوف _ تكلمي فهميني
جنى _ بنات ما عاد بذا حمام بسكم خلاص يله الطياره ينادون لها امشوا عشان نسلم على شهلا ونروح لصالتنا يله بسرعه
مشوا وهيوف تبغى تعرف وش السالفه
سلموا على شهلا ومشوا بس هيوف سمعت احد يناديها وقفت والبنات بعد
التفتت لجه اليمين وطاحت عيونها في عيون اللي كان جالس جنبها
قرب منهم وقعد يناظرها هي لحالها وهي قعدت تناظره وتناظر مناير بدون سبب وزي ما توقعت مناير كانت معصبه ومشت وسحبت سحر بعد
قال _ تعالي معي
هيوف فتحت عينها _ ايش انا رحلتي بعد شوي ابغى اروح
جنى _ هيوف معليه روحي احنا راح ننتظرك
هيوف _ بس الرحله
لكنه بكل جراءه مسك يدها وجرها معه
بعدوا شوي وفكها
هيوف لا تعلم
ولا تفهم
ولن تعلم
ولن تفهم
وش اللي قاعد يصير لها
هيوف _ ايش فيه نعم لا يكون انسرق لك شي وتظنه معي
ناظرها شوي وكان الفكره صدمته
هيوف غمضت عينها شوي وبدت ترمش كثير _ كيف عرفت اسمي لا لا لا وقف صدق كيف عرفت اسمي
ناظر فوق بعدين رجع يناظرها _ اتركي هاذيك الشله ودوريلك على غيرهم فهمتي واياني واياك يطرالك انك تعيشين معهم انتي فاهمه تعيشين في سكن الطالبات
هيوف ناظرته _ ها
قال وهو يصر على احرف كلماته _ نفذي اللي قلتلك انا انصحك ومنتظر تسوين النصيحه وما تتجاهلينها
هيوف بهدوء ما قبل العاصفه _ ومن انت لا يكون تكون ولي امري
قال _ لا مو ولي امرك بس مهتم بامرك
هيوف قعدت تناظره و هو غيراتجاه نظراته _ لا تفهمين غلط انا فيه احد موصيني عليك فلا ياخذك فكرك لبعيد
هيوف ناظرت وراه للبنات اللي وجوهم مملؤه بالاسئله
بعدين التفتت له _ انت اسمك زيد زيد العاصي
التفت لها بقوه وقعد يناظرها بعدين ناظر البنات اللي وراها
هيوف وودها تبتسم وكانها كشفت السر فرحانه بذكائها _ انت زيد صح
تكلم وكان الموضوع مو معجبه _ مالك علاقه
هيوف وهي تبغى تقهره من هو عشان يامرها هي عمرها ما تعودت تسمع كلمه من رجال عمها يخسى كامل وهو الطيب ما كان يطلبها لانه عارف انها ممكن ترفض طلبه سالم تعدى مرحله انه يطلب منها بالكلام والضرب خير وسيله كان يستعملها وهذا الرابع لازم يعرف هذا ايضا
هيوف _ صح انا مالي علاقه فيك وانت بعد مالك علاقه فيني واللي ابغاه بسويه ليه ابعد عنهم لا يكون مسوين شي غلط ممكن انا من طينتهم وش دراك باخلاقي
انتظرها لين خلصت كلامها بعدين ناظر ساعته _ هيوف انتي منتي بعارفه من انا صدقيني راح اعصب منك كثير لو ما سويتي اللي قلته لك روحي طيارتك وصلت
مشى وخلاها
هيوف كشته من وراه
رجعت للبنات
جنى ناظرتها _ هيوف
هيوف _ عارفه عارفه خلاص بس والله ما اعرفه هو جلس جنبي في الطياره سبحان الله في الرحلتين يعني انتوا من صدقكم اني مختاره وقلت لا انا ابغى اجلس جنب زيد العاصي بليز
جنى ناظرت فاطمه وهم مو فاهمين بس سكتوا وكملوا مشي
في الطياره
جنى وفاطمه جلسوا جنب هيوف ومناير جنب سحر
جنى _ لما جلستوا جنب بعض وش قالك ودي اسمع صوته يالله يا هيوف لو تعرفين ما تحسين به نهائيا بلا جالس في المكتبه ومؤدب
هيوف خافت تقولهم لا ما هو بمؤدب يروحون يفكرون انه سوا شي غلط
فاطمه _ سبحان الله ذا الجيل الجديد من عايله العاصي اتجهوا للتعليم وتركوا حلال هلهم
جنى _ هيوف ردي علي وش قالك
هيوف تبغى تفتك _ ما قال شي ما تكلم حتى انسان هادي ومؤدب زي ما قلتي
جنى _ حظها جوهره معها خطيب لا يمين ولا شمال
هيوف _ جوهره هي خطيبته
جنى _ ايوه راح تشوفينها تجينا زيارات تزور اختها بدور لا وتجي معها اختهم الثالثه ميار خطيبه زيد سبحان الله على كثر ما زيد وسلطان يكرهون بعض الا انهم راح يتزوجون خوات
هيوف وقفت شوي عشان تستوعب
هيوف _ جنى
جنى _ نعم وش فيه
هيوف _ اللي قبل شوي كنا نتكلم عنه هو زيد صح
جنى _ تقصدين اللي جلستي جنبه في الطياره
هيوف _ ايوه اقصده هو زيد صح
فاطمه وهي تضحك _ لا اكيد لا هو سلطان ولد عم زيد
هيوف حزنت بلا سبب
جنى _ هيوف كيف ما تعرفين اسمه
هيوف وهي متضايقه _ قلتلك ما تكلمت معه وهاذي مناير تبغى تخوفني من نفسي تقول اني اعرفه كيف
جنى _ لا تلومينهم خاصه مناير تعبت على بال ما وصلت هنا وما تبغى سحر تخرب عليها
هيوف _ انا بعدوني منذي الدوامه انا ما عاد ابغى مشاكل جايه ابغى اعيش حياه بلا مشاكل الصراحه انا لو دخلت في مشكله انتوا مو عارفين وش ممكن اسوي انتوا مو عارفين من انا ولا كيف اقدر (سكتت حست انها تهورت وبغت تقولهم اني ممكن اغير حياتكم واخليها جحيم بس سكتت )
جنى _ هدي هدي البنات بيرضون لا تخافين
ومن اللي مهتم برضاهم اصلا قالت هيوف في نفسها
.................................................. .......... ..................
وصلت الرحله ونزلت هيوف صح انها وصلت لواشنطن وحست انها وصلت للارض اللي بتعيش فيها سنين طويله لكن لما وصلت لولايتها حست بشي ثاني
حست ان هنا
راح تكون كامله
بنظر الكل
لان ما احد يعرف
ولن يعرف
باي شي
هيوف _ فاطمه انتي عايشين كلكم في نفس السكن
فاطمه _ سكن سكن وش تقصدين بالسكن لا تكونين ظانه ان احنا ساكنين في سكن الجامعه
جنى _ من اللي طرا سكن الجامعه
هيوف _ انا لاني حجزت لي سكن ومعي روم ميت
جنى _ هيوف انتي مجنونه راح تعيشين معنا كيف تعيشين هناك اصلا تعرفين وش السكن عباره عنه غرفه فيها سريرن وحمام بس
هيوف _ نعمه وش ابغى اكثر بعدين سكن طالبات ما فيها شباب
فاطمه _ صدق انك بريئه تعرفين ان فيه شي اسمه عريف يعيش في في نفس سكن الطالبات عشان يحرس اللوبي والعريف هذا من الطلاب وكم مره لقوه مع وحده من الطالبات بعدين يعني انت من جدك تظنين لو وحده تبغى تدخل صديقها راح يرفضون هيوف لا تكونين ساذجه لذي الدرجه
هيوف استحت من كلام فاطمه وانقرفت منه _ يعني وش الصرفه
جنى _ عيشي معنا راح تنامين مع وحده منا بعدين شقتنا مره حلوه وقرب الجامعه
هيوف _ المشكله في الايجار اكيد ايجار شقتكم غالي
جنى _ لا مو غالي نهايئا
هيوف _ بكم
فاطمه وهي تبتسم _ ببلاش
هيوف _ ايش
جنى _ لا تخافين احنا ما نبي منك شي خلاص احنا متكفلين بالايجار ما نبي منك شي
هيوف _ كيف كذا يعني لا انا ما راح ارضى انتوا اللي تصرفون
فاطمه _ اقول اسكتي وش علاقتك ولا كلمه زياده تعالي بس نراضيك بمناير وسحر ونفهمهم انك حتى اسمه ما تعرفينه
.................................................. ........
مناير _ كيف ما تعرفين اسمه وهو يعرف اسمك
هيوف _ انا وش دراني مناير انا قلت اللي عندي بس خلاص انا ما احب ابرر لشي ما غلطت فيه
مناير _ جيت لك في الطياره بعد ما رحتي بنص ساعه قلت اشوف انتي مرتاحه ولا لا لقيتك نايمه على كتفه ومتعلقه فيه وهو وهو
جنى وفاطمه وهيوف _ وهو ايش
مناير ناظرت سحر _ يلعب في شعرك
هيوف شهقت _ كذابه
جنى وفاطمه ناظروا هيوف بشك
هيوف ناظرتهم _ نعم وش فيه انتوا مصدقين ممكن انه ممكن انه ما اعرف بس انا متاكده اني ما اعرفه
مناير _ بغيت اصحيك واشوف قالي لا تصحين هيوف وابعدي عن طريقها انتي وخوياتك
هيوف _ انتي من جدك تتكلمين عن نفس الشخص اللي جالس جنبي تعرفين انه ما يتكلم معي واذا تكلم قال كم كلمه تسم الروح بعدين صح هو قالي اني ابعد عنكم بس انا رفضت لاني ما احب احد يفرض على رايه
مناير _ هيوف راح ننسى كل شي بس اوعدينا
هيوف _ بويش
مناير _ اتركيه لا جا يتكلم معك مره ثانيه اقحريه بليز
هيوف سكتت هذا اللي راح تسويه هي انسانه ما عندها ذي الحركات
سحر لاول مره تتكلم وتوجه كلامها لهيوف
سحر _ واذا راح تفكرين للحظه انه ممكن راح يحبك فيكون احسن لو تموتين ذا الحلم قبل لا يكبر سلطان خاطب مثل ما زيد خاطب فلا تضحكين على نفسك وتقولين ممكن يترك خطيبته عشاني
هيوف جلست تناظرها وهي تفكر في كلام مناير عن قصتها مع زيد
.................................................. ........
ام سعد _ همايل همايل بنتي هدي لا تخافين هو ان شاء الله راح يجي بعد شوي على الليل وراح يكون هنا
غدير وهي مبتسمه _ همايل ابكي ابكي عشان تخففين على نفسك
غلا _ همايل تكفين لا تبخلين بدموعك اذا ما بكيتي على ذا الشي وتخففين على نفسك متى راح تنزلين دموعك
ام سعد ناظرتهم _ بس خلاص عيب عليكم لو سمحتوا اطلعوا برا خلوني مع همايل شوي
غلا وهي تمسكن _ ليه يا خاله وانتي ما تبغينا نبقى مع همايل وهو في ذي المشكله
ام سعد_ هي ما هي في مشكله سعد بيجي بعد شوي
همايل طول ذا الوقت جالسه على سريرها وتناظر الارض في نقطه محدده وينه وينه سعد
غدير _ ان شاء الله ان شاء الله
حاتم دخل وابو سعد دخل بعده _ غدير ساعدي همايل وضبطي الشناط مالنا جلسه في ذا البيت ابد
الكل سكت من كلام حاتم
ام سعد_ ابو سعد وش صار وينه سعد
ابو سعد_ سعد سود وجهنا الله يفشله من ولد
ام سعد ناظرت همايل اللي ما زالت تناظر الارض
وبعدها ناظرت حاتم _ داخله عليك اليوم اليوم بس اجلسوا عندنا وبكره روحوا طالبتك بغلاه امك
حاتم سكت
همايل حست ان الضجه اللي حولها تهدا حاتم طلع وغدير وغلا وابو سعد
الباقي ام سعد
دق جوالها
وهذا وقته
بس ليه مو وقته وش اللي صار
تركني خطيبي
اللي ما كنت احبه
بس كنت متقبلته
تركني الرجال اللي كنت انا واهلي راح نسكن معه وتنحل مشكله البيت
وش راح يصير
وش هو اللي راح يصير
ام سعد _ همايل ردي وخليك قويه والله اني معك ضد ولدي هو ما يستاهل وحده مثلك بس انا مصدومه فيه كيف تعرفينه يجن عليك وعلى سيرتك ليه يسوي كذا انا ماني بفاهمه ممكن انعمله عمل
همايل ناظرت جوالها المرمي جنبه وشاشته تضوي برقم غريب
ناظرت عمتها
ام سعد__ همايل وش هو اللي خاطرك فيه وش هو اللي بيهون عليك قوليه وبسويه
همايل رجعت تناظر الرقم الملح رفعت الجوال
همايل بصوت تعبان _ الو نعم
طارق _ اعجبتك مفاجاتي
همايل ناظرت عمتها
وعمتها فهمت ان همايل تبغى تجلس لحالها
فطلعت رجعت للجوال
همايل بخوف وكأن مكاملته بالنسه لها هي المفاجاءه _ طارق
طارق _ ايه طارق بس مو انا المفاجاءه المفاجاءه سعد
همايل وقفت ثواني تفهم
هو السبب بس كيف
كيف
همايل _ وش تبغى نعم وش فيه زياده تبغى تسويه وش عاد تبغى تسوي
طارق بهدوء _ هملال تعالي لي
همايل _ انت انجنيت تراني مو البزر اللي بتركضلك لا اشرت بيدك
طارق _ ما راح اشر بيدي ولا ابيلك تركضيلي بس شوفي انا احب المفاجاءت ومفاجاءتي ما خلصت باقي مفاجاءه لك اذا ما جيتي قبل الساعه 12 راح تجيك المفاجاءه لحد البيت الساعه 12 ودقيقه صدقيني
وقفل الخط
..................................................
ما خرجت من الشقه اليوم كله ما شافت البنات تعبانين من السفر وما يقومون الا للصلاه جاعت وكل شي
بس ما قدرت تطلع
تبغى احد يخرج معها بس يله عادي
البيت مريح في مبنى كله شقق بس البنات شكلهم غير مندمجين مع الباقين
هيوف
اول ما وصلت شافت جامعتها وانفتحت نفسيتها ايوه هاذيك الجامعات ولا بلاش
بس الحين تنتظر ذي الاسبوعين تنقضي عشان تبدا دراسه
نست كل شي يتعلق بموضوع العاصي وابناءه ممكن لان هيوف تعودت انها ما تخلي الامور تسيطر عليها وتنساها
تبغى البنات يفوقون من غيبوبتهم عشان تنزل تشتري الجوال والشريحه وتبيع كم قطعة ذهب اللي سرقتهم من عمتهم
هي عارفه ان هذا غلط بس هي شافت ان هذا شي من حقها
والسرقه طبع غلب التطبع
وخذت فلوس امها رغما عنها لكن هيوف كانت ناويه تصرف من فلوس امها وترسل لموزه كل شهر فلوس حلال من فلوس المكافاءه
يعني تاكل هي الحرام واختها الحلال
هيوف انتي ايش
هاذي طيبه ولا ايش
متى راح تنفهم شخصيتك
.................................................. .......... ..
قفلت الجوال وهي منصدمه
هذا طارق ليه
كل هذا انتقام
حقد
وش اللي صار وقسى قلبه كذا
ام سعد دخلت
همايل ناظرتها _ عمه ممكن سواق ابغى اروح لوحده من صديقاتي هي دقت علي
ام سعد استغربت لانها رغم قصر معرفتها بهمايل عارفه ان همايل ما عندها صديقات عزيزات لذي الدرجه
همايل سكتت وام سعد ما حبت ترفض لها طلب
همايل _ بروح استئذن ابوي
ام سعد_ روحي ابوك واخوك مع عمك مقفلين على نفسهم شكل عندهم شي مهم
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك