رواية غفلتي دفعتني حياتي -12
ريم ودموعها على خذها: يبه ليه تعطيني ها الفلوس... والله كثيرة علي
ارتاح أبو نواف: ولو يا ريم أنتي بنتي... وأنا عارف أنك متعودة على حياة غير عن بيت أبوك... وما أقدر أقول لأبوك يغير بيته عشانك... كل اللي أقدر عليه أعطيك ذا المبلغ لك وحلال عليك
ريم من بين دموعها: بس هذا كثير... كثير علي
أبو نواف: وأنتي تستاهلين... حافظي عليه وحاولي تستثمريه بشي يفيدك
ريم وهي تمسح دموعها: مشكور يبه... ما تقصر
طلعت ريم من البنك ونفسيتها تغيرت 180 درجة.... ركبت السيارة ومو ناوية تقول لحد عن ذا المبلغ....
رفعت جوالها ودقت على بيت أبوها.... رد فهد: الوو
ريم: فهد ولا سلطان وسلمان
فهد: لا سجووو... يخرب شرك يا ريم أنا فهد
ريم: هههههههه سوري... أقول فهيدان أجهز أنت وأخواني ياسر بيتمشى فينا
استغرب ياسر وقال فهد: جد
ريم: إيوه... وقل لخالتي بنتعشى بالمطعم اليوم
انبسط فهد: اوكيه باي
ياسر: وش ناوية عليه
ريم: خلنا نتمشى مع أخوانا
ياسر: الفلوس اللي بنصرفها أبوي أولى فيها
ريم: ياسر خل عنك البخل... حرام أخواني محرمين من أشياء بسيطة
ياسر: اوكيه... لكن من وين نجيب فلوس
ريم: ما عليك أنا أتصرف
وصلوا البيت وخذوا أخوانهم وتمشون وتعشوا ورجعوا....
دخلت عبير البيت مع رنا والخدامة شايله الأغراض.... كان التعب واضح عليهم.... دخلوا الصالة وتفاجاوء لما شافوا نواف يعلب بلاي ستيشن.... وجالسين جنبه بنتين توأم وشعرهم كستنائي.... ناظرتهم عبير وعرفت أنهم بنات زوجها....
أما رنا عرفت أنهم خواتها لكن هذي أول مرة تشوف بسمة.... لأنها شايفه أسماء من قبل....
عبير: نويف... وين أبوك
نواف: فوق
راحت عبير فوق أما رنا جلست بالصالة وهي ساكته.... راحت عبير وفتحت باب غرفتها وتفاجأت.... صارت غرفتها فاضية حتى أنها بدون أثاث.... راحت لغرفة ريم وشافت فيها سريرين وكل شي فيها اثنين.... خمنت أنها لتوأم اللي تحت...." وش عنده سالم "....
مرت من عند الغرفة اللي كانت الفاضية وسمعت صوت أبو نواف ومعه صوت أنثوي.... فتحت الباب وانفجعت باللي شافته.... وقالت: سالم من هذي
أبو نواف كان جالس بالكرسي وقباله الطاولة اللي عليها الكيرم.... وجالسة جنبه أم نواف بدبتها يقالها تتعلم تلعب....
أم نواف: كيف تلعبها
ضرب أبو نواف الحجر بمهارة: كذا نلعبها
خذت أم نواف الحجر وضربتها.... حركت يدها بالهواء لأنها تتألم: اووتش... لعبة مؤلمة
مسك أبو نواف يدها وباسها.... ناظرها وابتسم: راح الألم
أم نواف وهي تحاول تتكلم عامي: هههههههه إيوه
التفتتوا الاثنين لما انفتح الباب وقالت عبير: سالم من هذي
وقف أبو نواف وراح لعبير، مسك يدها وطلعها برة.... دخلوا لغرفة رنا وسحبت عبير يدها من أبو نواف....
عبير بعصبية: ايش هذا يا سالم... من هذي
ابتسم أبو نواف وقال: توقعت تعرفينها أول ما تشوفينها... لأنها تشبه نواف هذي الله يسلمك أم نواف زوجتي
عبير بصدمة: ز..زو..جتك
أبو نواف: إيوه... في شي ثاني لأنك مو حلال علي
عبير: ط..طلقتني
أبو نواف: مو هذا اللي تبينه عشان تتزوجين أبو ريم... مو أنتي وافقتي علي عشان أكون أنا المحلل لك... هذا أنا سويت اللي تبينه
مسكت عبير كم بدلته وقالت: لا سالم... أنت تحبني
أبو نواف: أحبك؟؟ إيه أنا أحبك... لكن أنتي ما تستاهلين حد يناظرك... عبير لا تظنين إني غافل عن طلعاتك الزايدة أو عن تلفوناتك
عبير: أنت تشك فيني... بعد ها العمر تشك فيني
ناظرها أبو نواف باشمئزاز: أنا اشك فيك... - مد الجوال وقال: ناظري
انصدمت عبير وهي تشوف نفسها ترقص.... في وحده من السهرات اللي كانت تروح لها.... قالت: مـ..مو أنا هذي تركيب... تركيب يا سالم
أبو نواف: تركيب؟؟ هه اوكيه تركيب... يمكن وحده تبي تنتقم منك وصورتك في زواج... طيب وهذي
ما قدرت عبير تنطق بكلمة وهي تناظر الفيديو.... أكيد فراس نفذ تهديده وفضحها....
أبو نواف: بعد هذي تركيب ما أظن... أنتي بالدمام مبسوطة وهنا الحكي عليك كثير... أنتي أم وبنتك دخلت الـ 20 سنة وهذي تصرفاتك... هه ما ينشره ع الباقي
عبير بارتباك: كذب هذا كله كذب
أبو نواف: بعد مو مصدقة... آآآخ ما هان علي زوجتي أم بنتي سيدها قيدها... عشان كذا اخذت رنا للمستشفى حتى أتأكد أنها بنتي
فتحت عبير عيونها: ايش
أبو نواف: إيوه سوو لها فحص الدي أن ايه... والحمد لله أنها بنتي... ولو أنها مو بنتي كان ما أنكرتها لأن مالها ذنب غير أنك أمها... لكن الله العالم الولد اللي مات ببطنك من كم شهر... من هو أبوه ويمكن رحمه له مات
نزلت دموع عبير وقالت: و..وين ريم بنتي
أبو نواف: بنتك هه أنتي ما تستاهلين حد يقولك يمه... عموما ريم راحت لأبوها وأخوانها أريح لها من الحياة هنا... لأنها ما سلمت من شرك... هي الوحيدة اللي فقدت وجودها بالبيت الله يسعدها بأهلها
نزلت عبير راسها وقالت برجاء: سامحني يا سالم... سامحني
مسك أبو نواف زنودها وقال: عبير أنا طلقتك الطلقة الأولى لما كنتي حامل ورجعتك... وطلقتك مرة ثانية من شهرين وبرضوا رجعتك... وبعد 3 أيام راح توصل لك ورقة طلاقك
توها بتنطق قال: ولا تشتكين لأبوك لأنه عارف كل شي... بالعربي أنا طلعت اللي بخاطري له... وهو قالي ما أقدر أقولك غير سو اللي يريحك... واللي يريحني فراقك
جلست عبير ع الأرض تبكي.... هذي المفاجأة اللي قالها عنها قبل ما تروح الشاليهات....
ناظرها أبو نواف وقال: وبالنسبة للورقة اللي ماسكتها علي... أنقعيها في مويه وأشربيها... لأني قلت لك أكثر من مليون مرة إني مظلوم... وربك ما ينسى عبيده عشان كذا النصاب طلع وطلعت برائتي
ناظرته عبير من بين دموعها وما قالت شي....
أبو نواف: تعرفين يا عبير لأي درجة تمنيت فراقك... لدرجة إني جمعت 9 ملايين و700 الف ريال... بس عشان ارتاح منك ومن العار اللي فيك... وسبحان الله صارت فلوسي لي ومنيب عارف ايش أسوي فيها... أنتي تقهريني وأنا ضغط على نفسي الين طلع معي ذا المبلغ الكبير
وقفت عبير شوي وتنهار: سالم... الله يخليك لا تطلقني أنا احبك ومستعدة أكون خدامة لك... بس لا تطلقني
أبو نواف: وأنا قلبي مع غيرك... مع اللي عطتني مليونين تساعدني بالمصيبة اللي طاحت براسي... تحملت فراقي وفراق عيالها لأنها عارفة في النهاية... إني لها وهي لي... - فتح الباب ورفع يده وقال: يللا فارقي مالك شي عندي
طلعت عبير وهي تجر رجلها جر.... نزلت تحت وشافت أم نواف وعيالها معها.... شافت بطن أم نواف وعرفت إنا أبو نواف كذب عليها لما قال عنده شغل ببريطانيا.... وهو راح لأم نواف مو للشغل....
بخطوات سريعة قربت من أم نواف.... رفع يدها حتى تطلع القهر اللي فيها.... لكن يد قوية مسكتها.... ناظرت بنواف وانصدمت أول مرة يسويها نواف....
نواف وهو ماسك يدها: لهنا ووقفي عند حدك... لا تفكري تمدين إيدك على أجنبية... لأن شكوى منها للسفارة البريطانية... راح تمسح الأرض فيك وفي أهلك
سحبها لبرة التهوية ودفها بقرف وقال: ومو أنا اللي أتهجم على أختي ريم يا..###
طلعت عبير وركبت السيارة.... لحقتها رنا وهي مو عارفه وش السالفة.... راحوا لبيت أبو مساعد ودخلوا.... أبو مساعد اللي عارف كل شي.... ما تفاجاء لما شاف حال عبير بعكس أمها لما شافتها قالت: عبير... وش فيك
ضمت عبير أمها وهي تبكي ما تقدر تحكي شي عن بلاويها....
ناظر أبو مساعد بنته باحتقار.... وقال بعصبية: موضي... أخذي بنتك لفوق
قامت أم مساعد مع بنتها وراحوا فوق.... لحقتهم رنا وجلست بالصالة اللي فوق.... بعد ساعتين طلعت جدتها من غرفة أمها.... طياري راحت لأمها اللي متمددة ع السرير وتبكي....
رنا: ماما... ماما وش فيك
ابعدت عبير الغطا عنها ودفت بنتها بقرف: أطلعي... أنتي مو بنتي أطلعي برة
ناظرت رنا بأمها ومبين أنها تبكي.... واستغربت أنها تطردها: ماما ليه نواف وداادي طلعوك برة
عبير ما لها مزاج لبنتها.... قامت وطلعتها برة الغرفة: أطلعي برة لا تجين لي... روحي لأبوك لا بارك الله في أبوك... ولا في الساعة اللي تزوجته فيها
جت أم مساعد لما سمعت صراخ بنتها.... مسكت رنا اللي تبكي ودخلتها لغرفة ثانية حتى ترتاح لأنهم توهم جايين من الشاليهات....
لبست ريم ملابسها وقامت لعند الاوظة وحطت لها ميك آب خفيف.... وشعرها تركته مفتوح على كتفها....
دخلت أختها سجى وقالت: وااااااو تهبلين
ريم دارت حول نفسها: جد
سجى: أكييييد... عموما يللا أبوي يقول مشينا
ريم: اوكيه أخذ عباتي وأنزل
طلعت سجى وجمعت ريم أغراضها بشنطتها الصغيرة.... خذت عباتها ونزلت تحت وشافت الكل .... لما شافت الأعجاب بعيون أخوانها.... دارت حول نفسها وقالت: وش رايكم
صفر فهد: ولا جوليا روبرت
ريم: هههههه بسم الله علي منها
ياسر: ريما بما أنك بتشوفين عمامي وعماتي... وش شعورك الحين
ريم: مرتبكه وخايفه حدي
أبو ياسر مبسوط ببنته: من ايش خايفه
انتبهت ريم لوجود أبوها وقالت: سوري داادي... بس عشان أول مرة أشوفهم
فهد: سمعوا الحكي الحلو... قالت داادي يااااي
ريم: ههههههههههه أختي رنا دايما تنادي أبوي سالم داادي... حلفت على نفسي ما أقولها الا لأبوي
أبو ياسر: خذي راحتك يا عيون الداادي
أم ياسر: مطولين أنتم... يللا تحركوا تاخرنا
وصلوا لبيت عمهم أبو ماجد وكانوا آخر الواصلين.... لأن الأغلبية متحمسين لشوفه ريم فوصلوا من بدري.... ناظرت ريم بالبيت أحسن من بيت أبوها.... وهذا دليل حالتهم المادية الممتازة....
دخلت مع زوجة أبوها وأخواتها سجى ورهف.... ناظرت ببنات عمها بعضهم كبرها وأصغر منها.... سلمت عليهم وهي مو عارف وحده منهم....
ريم: سجوو وين عماتي
سجى: كلهم بغرفة النسوان
ناظرت ريم حولها وشافت المرايا المثبته ع الجدار.... قربت منها وفصخت عباتها.... رتبت شكلها والكل يناظرها.... فتحت شنطتها وطلعت الاكسسوار ولبسته....
التفتت وابتسمت لما شافت أغلب العيون عليها.... وقالت: سجوو هاتي رهوفه وتعالي
تقدمت سجى وهي شايله رهف.... لبست ريم رهف وسجى العقد مع الاسوارة.... استغربوا بنات عمها من متى بنات عمهم يوسف يهتمون للاكسسوارات.... أكيد بفضل أختهم ريم....
ريم: سجووو لا تروحين انتظري أبدخل معك
سجى مبسوطة باهتمام أختها فيها: اوكيه
ناظرت ريم وجهها بالمرايا كل شي اوكيه.... حطت عباتها ع الكنبه وشالت شنطتها وقالت: يللا سجوو
سجى: يللا
مشت ببطئ ورا أختها وقفت عند باب غرفة النسوان.... خذت نفس عميق ودخلت.... الكل التفت لها وعم السكوت المكان.... الكل انبهر منها جميلة وكشخة.... كأنها من الطبقة المخملية مو بنت أخوهم.... مشت ريم وهي مرتبكة وسلمت عليهم.... جلست بمكان خالي وبشكل مستقيم بعكس الأغلبية....
سمعت همس....
ـ : ما شاء الله... طالعه على أمها
ـ : لا أمها قشرة عسى ما تكون مثلها
ـ : أقصد كشخة مثلها... نسيتي كيف كانت كشخة وتحب تهتم بنفسها
بدت السوالف من جديد والإزعاج يملي المكان.... الكل سكت لما سمع صوت نغمة جوال غريبة عنهم.... لأن اللي عندهم جوال كلهم نوكيا وسامسنج بدون كاميرات.... ومحد عنده مثل ذا النغمة الواضحة والحلوه....
طلعت ريم جوالها سوني اريكسون.... كتموا شهقتهم هذا الجوال قيمته الفين وشوي تقريبا وهم بالفين يشترون اشياء واشياء....
سمعت ريم بنت تقول: صحيح بنت عز
استغربت ريم" وش ذا الحسد ".... ناظرت بالرقم رنا متصلة عليها من بيت جدها....
ريم: هاااي ناانه... كيفك
رنا: طيبة... ريومه عندي طلب
انتبهت ريم إنا الكل ساكت وقالت: دقيقة
طلعت من الغرفة ووقفت بالصالة الفاضية عند المرايا....
ريم: الو نااانه وش فيك
رنا: ريومه أنا في بيت جدي... تعالي
ريم: لا نااانه ما أقدر
رنا: وينك فيه
ريم: أنا في بيت عمي مدري وش أسمه... إن شاء الله مرة ثانية
رنا: اوكيه... بس لا تتعذرين
ريم: بلغيني بوقت عشان أعرف إذا كنت مرتبطة ولا لا... تمام
رنا: طيب
ريم: يللا بروح أجلس مع عماتي
رنا: أهم شي تعطيني التقرير
ريم: هههههه اوكيه باي
سكرت ريم الخط وبدت ترتب شعرها وهي تغني: لا تخاف من الزمان.. الزمن ماله أمان... - سكتت لما انتبهت بواحد بثوبه الأبيض من المرايا.... التفتت وشافت ذا المملوح اللي باين عليه الصدمة.... ركضت لعند الحمام وقفلت على نفسها الباب وهي ترتجف....
وصل ماجد لبيت أبوه لأن عندهم عزيمة عشان وحده من بنات عمامه.... تعبان وما يدري متى العزيمة اليوم أو بكرة أو السنة الجاية.... دخل يدور السرير لأنه توه جاي من الدمام في يوم اجازته....
دخل الصالة واستغرب من البنت اللي عند المرايا وتغني.... لفت عليه البنت وركضت للحمام.... راح فوق وهو مستغرب أول مرة يشوف ها البنت.... بنات عمامه حافظ أشكالهم لأنه عايش معهم.... لكن هذي وجهها مألوف بس وين شايفها.... خمن أنها صديقة وحده من خواته....
ريم اللي كانت بالحمام متوهقه.... تخاف تطلع وتشوف الرجال برة.... سمعت حد يطق الباب وانفبض قلبها.... قالت بصوت مرتجف: مـ..من
وحده من عماتها: إيوه
فتحت ريم الباب وهي مرتاحه نوعا ما: سوري
عمتها: عادي... بس بغسل ليونه
طلعت ريم ودخلت الصالة وشافت بنات عمها جالسات.... يعني ما فيه أي شباب، راحت لغرفة النسوان وجلست جنب زوجة ابوها....
أم ياسر: ريما وش فيك وجهك مخطوف
ريم: وش أحكي يا خالتي... مو في رجال دخل وشافني
أم ياسر: ايش
ريم: أنا كنت أكلم أختي رنا... ورتبت شعري كان المح واحد عند البوابة وركضت للحمام
أم ياسر: يمكن واحد من أولاد عمك
ريم: بس يا خالتي معقوله أولاد عمي ما يدورن إنا البيت فيه بنات
أم ياسر: مدري عنهم... أقول ريم سلمتي على جدتك
ريم: جدتي؟؟
أم ياسر: إيه... البنات راحوا الصالة حتى يسلمون عليها
جت سجى وهي تركض: ريما... ريما جدتي تسأل عنك
ريم: وينها فيه... ليه ما جلست هنا
أم ياسر: هي جالسة بغرفتها وما تبي ازعاج
وقفت ريم: اوكيه رايحه لها
راحت ريم مع سجى للصالة والكل ينتظر ريم تدخل لعند الجده....
سجى: هذي غرفتها وعلى فكرة تراها ما تشوف
راحت ريم عند باب الغرفة وشافت وحده من عماتها جالسة مع الجده.... التفتت عمتها وقالت: يمه هذا ريم بنت يوسف جت
أم طلال مدت يدها بالهواء وقالت: وينها بنتي وينها بنت ولدي
قربت ريم ومسكت يدها وباست راسها وقالت: أنا هنا يمه
تحسستها أم طلال وضمتها: ريما بنيتي شلونك يمه
دمعت عيون ريم وقالت: الحمد لله يمه وش أخبارك أنتي
أم طلال: بخير جعلك الخير... ريما في أحد معنا بالغرفة
ريم: إيوه عمتي هنا والبنات عند الباب
أم طلال: وضحى خليني مع بنت ولدي وسكري معك الباب
وقفت وضحى: إن شاء الله يمه
طلعت وضحى وقالت ريم: يمه أبي أسألك سؤال ما قدرت أسأل أبوي عنه
أم طلال: قولي يمه وش فيك
ريم: ليه أبوي تركني عند أمي وزوجها وما سأل عني
أم طلال: غصبن عنه يا يمه... لا تظنين أنه تركك عند زوج أمك برضاه... كله من تحت راس خوالك الله يسامحهم
ريم: فهميني يمه أبي أعرف
أم طلال: أنا ما أعرف وش صار بين أمك وأبوك... بس لما تطلقوا وتزوجت أمك... أبوك رفع قضية على أمك عشان ياخذك منها... وأنتي عارفة القانون معه لكن ولدي يوسف مو قد عبير وأهلها...
عشان كذا بهدلوه وخذوك منه... أنتي شفتي بيت أبوك وعرفتي أنه فقير... لكن كل هذا بسبب خوالك يا ريم... مع أنا أبوك حاول ياخذك لكنهم هددوا عمامك... عشان كذا أبوك تركك لأنه خايف على أخوانه
نزلت دموع ريم وكتمت شهقتها....
مسحت أم طلال دموعها وقالت: لا تبكين يا بنتي ما بيدنا شي... قولي لي يا بنتي شلون يعاملك زوج أمك... يضرب ولا يهاوشك ولا يتـ...
قاطعتها ريم: لا يمه... زوج أمي دايما يقولي أنا ربيتك مع عيالي ليه تناديني عمي... كان طيب معي وما يفرق بيني وبين عياله
أم طلال: ودامه زوين معك... ليه ما جابك لأبوك
ريم: لأن خوالي ورطوه بمصيبة وهددوه بالسجن... عشان كذا وافق يتزوج أمي ويسكت عن تصرفاتها
أم طلال: الله يسامحها... الله يسامحها
بعد فترة طلعت ريم وجلست بالصالة مع بنات عمها....
قالت لها وحده: في أي سنة أنتي يا ريم
ريم: ثالث جامعة
قالت لها بنت ثانية: اهاا أنتي ريم بنت يوسف
ناظرتها ريم من غير ما ترد....
البنت: أنا هدى بنت عمك طلال... أنتي ما تعرفيني بس أنا أشوفك بالجامعة
ريم: أنتي بثالث
هدى: لا أنا في ثاني... صديقاتي يسألوني إذا تقربين لي وأنا أقول لهم لا... وما دريت أنك بنت عمي
بنت ثانية: يعني أنتوا مع بعض
هدى: إيوه لكن من شاف ريم ما يصدق أنها بنت عمي ريم غيير... - ناظرت ريم وقالت: كنت أظن أنك مغرورة يا ريم بس طلع العكس
ريم: ههههههههههه حتى صديقاتي قالوا لي كذا من قبل
جت سجى لريم: ريماااا... ريما
ريم: وش فيك... شوي شوي
سجى: يقولك أبوي قومي سلمي على عمامي
ريم: وأولاد عمي
سجى: ما فيه الا عمامي وأخواني
وقفت ريم وراحت معها المجلس.... رتبت شكلها ودخلت وشافت الرجال.... سلمت على عمامها وهي مستحية.... ولما مدت يدها لأصغر عمامها ناظرته وانصدمت....
سحبت يدها وقالت: أنت؟؟... - رجعت خطوتين وقالت: جد انك ### وما تربيت
الكل تفاجاء.... ياسر: ريم وش ها الحكي
قربت ريم من ياسر وقالت وهي ترتجف: ياسر أنت شفتني متغطية... عباتي فيها زينة، فيها شي يخلي الشباب يلحقوني
استغرب ياسر: لا
أبو ياسر: ريم وش فيك يبه... وش فيك على عمك
راحت ريم لأبوها وجلست جنبه.... نزلت دموعها وهي ترتجف: يبه مرة كنت في السوق مع أمي وأبوي سالم... ضعت عنهم بالمجمع واتصلت عليهم حتى أرجع لهم
أبو ياسر خايف على بنته: وبعدين
ريم وهي تبكي وتتذكر وش صار: جا هذا... - أشرت على عمها وقالت: جا قبالي قاصد أني أصدم به وطحت بحضنه
الكل ناظر ماهر بعتب.... توه بينطق أبو ياسر قالت ريم وهي تصرخ: تدري وش سوا فيني قربك مني... صرت أشوفك بالنوم تتهجم علي... أنادي أمي وزوجها وما أشوف الا نواف بوجهي... أنا عارفه أنه مو أخوي لكن مالي غيره لأني ما أعرفكم
ياسر جاب كاس مويه لأخته: أهدي يا ريم وشربي مويه
أبو ماجد: وش ها الحركات اللي مالها داعي يا ماهر
وقف ماهر وجلس عند رجلين ريم وقال: ريم أنا ما لحقتك الا لأني عارف أنك بنت أخوي
ريم هدت شوي وقالت: وأنا وش يعرفني أنك عمي أو حتى أخوي
ماهر ندم على حركته وقال: أنتي قلتي لأبو نواف يتفاهم معي... وأنا قلت له أنك بنت أخوي وقالي منت قد خوالها
ريم وهي منطشه كلامه: أنا تربيت في بيت أبوي سالم محترمه... وأبوي عارف أنا بيت جدي العباه ملغية هناك... أنا الوحيده اللي اكون بحجابي بينهم... وف الآخر أشوف رقمك في أكياسي... تظن إني رخيصة حتى اتصل على أي رقم
ماهر: آآسف يا ريم والله إني ندمان باللي سويته فيك... ما توقعت أنه لها الدرجة بيأثر فيك
وقفت ريم ووقف معها ماهر وقال: ها يا ريم سامحتيني
ابتسمت وضمته والكل ضحك عليها....
ريم وهي مبسوطة بشوفة أهلها قالت: من زمان اتمنى يكون عندي عم أو خال كبرك... - طلعت جوالها: عطني رقمك يا ماهر
جر شعرها بخفيف وقال: شنوو ماهر واحد من الربع أنا
ريم: واللي يعافيك احمد ربك أنا ريم بنت يوسف طالبه رقمك
ابتسم ماهر: حامده وشاكره سجلي عندك ****
يوم السبت ....
رجعت رنا من المدرسة مع أخواتها.... تمددت ع السرير وهي تتذكر كيف صارت مشهورة بالمدرسة.... لأن الأجنبيات أخواتها، تحسنت علاقتها معهم وصارت دايما تسولف معهم....
على طاولة الغدا....
أبو نواف جالس وجنبه زوجته يسولفون بهمس.... بسمة وأسماء ياكلون بهدوء وهم يراقبون نواف ورنا اللي جالسين قبالهم.... يتساسرون ويضحكون....
رنا: نواف
نواف: خييير
رنا: بذمتك هذا غدا
ناظر نواف الصحن وابتسم: إيه أكلي وأنتي ساكته
رنا: حرااام عليك أنا ما عندي سالفة مع الرجيم
نواف: ومن قالك تسوين رجيم
رنا: والله من شاف طباخ أمك بيقول كذا
نواف: ههههههههه يا حلوه أمي أجنبية والأجانب ما يهمهم الا شكل الصحن
رنا: بس أنا جوعانه وهذا ما يسوي شي
نواف: حتى أنا جوعان مدرس الرياضة كسر رجولي من كثر الركض... لو داري كان ما سويت العملية اللي بقلبي
رنا: خلاص بعد شوي نشتري من كنتاكي
نواف: لا كودو أحسن
رنا: مو مهم أهم شي مطعم
أبو نواف: نواف رنا وش عندكم تتساسرون
رنا: ما عندنا شي
أما نواف ناظر أبوه وعرف أبو نواف بايش يفكر ولده.... شرب من كاس العصير وحطه وقال: حسبوني معكم
رنا ضربت كتف نواف بخفيف: شفت
أم نواف: سالم... ستشتري من المطعم
ضحكوا نواف ورنا....
بسمة قالت: ليه ما قلتوا لي
أسماء: حتى أنا أحسبوا حسابي معكم
أم نواف ناظرت زوجها وقالت: سالم... الغداء لا يكفي
أبو نواف: قلت لك الأكل البريطاني أنسيه... لأنه خفيف وهنا نستهلك طاقه أكبر
أم نواف: حسنا اشتروا من مطعم الآن... لكن على العشاء سأعد لكم الكبسة
أبو نواف: لا تسوين كبسة ولا شي... أنا وأنتي نروح المطعم ونواف ياخذ البنات ويروح معهم
بسمه: وااااو نروح ماكدوو
رنا: لا كودو أحسن
أسماء: شنوو كودو وماكدوو... لا أنا أقول كنتاكي روووعة
بسمة: أنتي ما طفشتي من الزنجر
أسماء: مستحيل
رنا: لااا... نواف أنا وأنت كودو صح
ناظرهم نواف وهو متوهق.... كيف بيروح المطعم مع ها الثلاثة.... وقال: وينك يا ريم تنقذيني
في الليل....
تمددت أم نواف ع السرير وناظرت بجهة أبو نواف الخالية.... تذكرت لما قال لها أنه بيبات في العمل لأن عنده ضغوط بسبب إجازة زميله....
بعد ساعتين....
صحت أم نواف لما حست بانقباضه قوية.... معقولة بتولد وهي بالشهر السابع.... قامت وبدلت ملابسها ولبست عباتها.... خذت شنطة فيها ملابس احتياط وطلعت من الغرفة.... راحت لعند غرفة نواف طقت الباب وجتها أنقباضة ثانية....
نواف اللي كان ع الكمبيوتر استغرب لما أنطق الباب مرة وحدة.... وقف وفتح الباب وتفاجاء لما شاف أمه.... وجهها أحمر وشكلها تتألم ولابسه عباه....
نواف: يمه وش فيك
أم نواف تقاوم الألم: ننــ.. نواف خذ..ني للمسـ..تشفى
عرف نواف أنا أمه تولد.... أخذ جواله بوكه ومفتاح سيارته.... أخذ الشنطة من يد أمه وساعدها الين ركبت السيارة.... وصلوا المستشفى وجاب نواف كرسي متحرك لأمه....
وقف نواف عند الباب وهو يفرك إيدينه.... أما في غرفة الولادة، أم نواف ع السرير وتصرخ من ألم الولادة....
قالت بعد الترجمة: أريد زوجي... اتصلوا بزوجي
طلعت الممرضة السعودية وشافت نواف.... بدله سوده وبنطلون جينز يشبه الأجنبية اللي تولد.... قالت بعد الترجمة: المراة تريد زوجها اتصل به
نواف: هااه وش قلتي
الممرضة: اهاا تفهم عربي... أنت زوج الحرمة
نواف: تنكتين أنتي هذي أمي... وش فيها
الممرضة: اتصل على أبوك خله يجي الحين... ضروري
خاف نواف: ليه... أمي فيها شي
الممرضة: ما فيها شي... بس أمك أجنبية وتبي زوجها معها
طلع نواف جواله ودق على أبوه: الوو
نواف: يبه أمي تولد
أبو نواف: ايش... وينكم فيه
نواف: بمستشفى { ..... }
أبو نواف: طيب... أنا جاي
دقايق ووصل أبو نواف للمستشفى وراح لولده.... وقال: نواف وش صار
نواف: ولا شي
طلعت الممرضة ولما شافت أبو نواف قالت: أنت زوج منيرة الـ..
أبو نواف: إيوه
الممرضة: تفضل معي زوجتك تبيك
أبو نواف: نواف رح البيت... ما يصير تخلي خواتك لحالهم
نواف: اوكيه
دخل أبو نواف لغرفة الولادة لأنه متعود على ذا الشي.... شافته أم نواف مدت يدها له....
قالت بعد الترجمة: الحمد لله لقد وصلت
مسك يدها وقال: لا تخافي ستكونين بخير
جلس جنبها ومسح جبينها وهي تصرخ.... بعد فتره ارتفع صوت بكاء طفل.... يعلن وصوله للحياة ابتسم أبو نواف.... أما أم نواف حطت راسها ع المخده....
الدكتورة: مبروك ولد
التفت أبو نواف لزوجته وباس جبينها وقال: الف مبروك يا حياتي
ابتسمت أم نواف بتعب وقالت: الله يبارك فيك
وقف أبو نواف: انا بطلع الحين وابشر العيال... وبجيك بعد صلاة الظهر
هزت أم نواف راسها....
دخل نواف البيت وجو خواته له....
رنا: وش أخبار خالتي
أسماء: ولدت ماما
نواف: ما بعد... بس أبوي عندها
جلس ع الكنب وسند راسه بتعب.... جت رنا وجلست جنبه....
رنا: نواف وش يسوي أبوي عند خالتي
ناظرها نواف: رنووه أنتي شفتي أفلام أجنبية... الحرمة ما تولد إلا لما يكون زوجها معها... عشان يعرف كيف تعاني
كشرت رنا بوجهها وهي تضحك: ههههههههه والله أكسر رجل زوجي أن دخل وشافني
ضحك نواف وأسماء أما بسمة استغربت من أخوانها.... لأن في نظرها شي عادي.... دقايق ودخل أبو نواف ومبين عليه التعب....
أبو نواف: وش عندكم ما نمتوا
بسمة: بابا وش جابت ماما
ابتسم أبو نواف: جابت لكم أخ جديد
فرحوا وكل واحد يختار أسم إلا نواف.... اللي مبسوط ولو أبوه سأله عن رايه على طول بيقول لأبوه عن الأسم اللي بباله....
بعد صلاة الظهر طلع أبو نواف من محل الورد وراح المستشفى.... دخل على زوجته اللي متمدده ع السرير وولدها بسريره.... حط بوكيه الورد بحضنها وباس جبيها....
فتحت أم نواف عيونها: سالم
أبو نواف: الحمد لله على سلامتك
أم نواف: سلمك الله
ناظر أبو نواف ولده وقالت أم نواف: سالم... لما لا تحمل الطفل
شال أبو نواف ولده وباسه: يشبه نواف
أم نواف: فعلا إنه يشبه أخاه كثير
ناظر أبو نواف ولده الصغير وتذكر عبير.... لما ولدت رنا صرخت بوجهه عشان شال رنا من سريرها.... تنهد حتى يبعد ها الذكرى عن باله.... قرب فمه من أذن ولده وبدا يهمس وهو يأذن بأذنه....
انبسطت أم نواف وهي تشوف زوجها يكبر بأذن ولدها....
أم نواف: الإسلام شي غريب... مع أنه قد مضى على نزول الوحي أكثر من ألف سنة... إلا أنه لم يختفي كبقية الأديان... والمسلمين يزيدون كل يوم
أبو نواف: لأنه دين الحق
أم نواف: فعلا أنه دين الحق... سالم ماذا ستختار أسم ابنك
أبو نواف: أنتي وش رايك
أم نواف: المهم أن تختار أسما جميلا
أبو نواف: بسميه سعود على أخوي
أم نواف: لماذا لايختار نواف أسم أخيه
أبو نواف: نواف بيختار سعود
أم نواف: هل هو من أخبرك
أبو نواف: لا والله ما قالي
ابتسمت أم نواف: صدقتك لماذا تحلف
أبو نواف: هههههه مو قصدي أحلف
دخل نواف ومعه خواته وكل وحدة بمريول المدرسة: هاااااي
أبو نواف: اهلين
ركضوا البنات وسلموا على أمهم وطياري ع الصغير.... الا رنا سلمت على زوجة أبوها ووقفت بعيده عنهم....
أبو نواف: نواف... تعال وشل أخوك
قرب نواف وشال أخوه وابتسم.... باسه وقال: يحليله مثل عيال الأجانب
رنا: ليه أنت ما شفت وجهك بالمرايا
أسماء: ماما من يشبه
أم نواف: يشبه نواف كثيرا
بسمة خذت جوال أبوها وبدت تصور الصغير وهي مبسوطة....
بسمة: وش أسمه
أم نواف: قررنا أن يسميه نواف
مشى نواف وهو شايل الصغير ووقف عند رنا: رنووه ناظري أخوك
ناظرته رنا وابتسمت وباسته: يحليله يوزع ابتسامات وهو نايم
نواف: وش تتوقعين بسميه يا رنا
رنا: أنت... لو أنها بنت كان قلت جوانا بس الحين أكيد تبي سعود
نواف: هههههه عليك نور... يبه سمه سعود على عمي
ناظر أبو نواف زوجته وابتسم: خلاص إن شاء الله أسمه سعود بن سالم
بعد سنة....
لبسها دبلتها وهو طاير من الفرحة.... لبسته دبلته وهي مرتبكة ومستحية.... شربوا بعضهم العصير وكل واحد أكل الثاني كيك.... كل هذا قدام أهل ريم وأهل خطيبها.... مع أم نواف اللي كاشفة وجهها لكن حجابها كامل هي وبناتها ورنا.... بعد التصوير ولبس الشبكة تركوا المخطوبين لحالهم....
مسك يدها الباردة وابتسم وقال: تدرين من متى وأنا افكر فيك يا ريم
ريم خايفة، مستحية، مرتبكة ومبسوطة.... هزت رأسها بلا وهي تناظر الأرض....
ماجد وهو مبسوط: من يوم كنتي في بطن أمك... أبوي قالي إذا زوجة عمك يوسف جابت بنت بتكون زوجتك... كان عمري 6 سنين وما أدري إذا أبوي يمزح ولا لا.... لكن ما غابت كلمته عن بالي... عشان كذا تعبت أمي مني لأنها تبي تزوجني... وأنا رافض الزواج بدون ما أقول لهم إني أفكر فيك
انبسطت ريم ولد عمها يفكر فيها قبل ما تجي للدنيا.... كانت تظن قصص الحب مجرد قصص خيالية.... لكن الحين صارت هي بطلتها.... ناظرته وتوها بتنطق دخلوا أخوانها....
سلمان: ياهوو مو كنا عطيناكم وجه بزيادة
سلطان: انتهى الوقت... ماجد أبوي يسأل عنك
ماجد بصوت واطي: حسبي الله عليكم يا التوم
ابتسمت ريم لأن مبين أنا ماجد معصب.... وأخوانها متقصدين يدخلون عليهم....
******
وصل لأرض السعودية من بعد ما تركها من سنتين.... راح لبيت أبوه وسلم على أهله وأخوانه وأخواته.... تفاجاء بالخبر أبو نواف طلق عبير.... وكانت صدمته أكبر لما عرف مكان عبير....
راح لمستشفى الأمراض العقلية.... سأل عن غرفتها وراح لها ومعه ممرضة للحالة الطارئة.... دخل غرفتها كلها أبيض في أبيض وما فيها الا السرير وكرسي.... شافته عبير وركضت له....
ضمته عبير: مساعد... سالم بيجيني اليوم
مسك كتوفها: عبير... وش فيك
عبير: هههههههه أنا مبسوطة... سالم بيجي اليوم
بعدت عن أخوها ووقفت مقابله الجدار.... رفعت إيدينها للهواء وكانها تفتحت باب الدولاب.... قالت وهي مبسوطة: بجهز العشاء الرومانسي لسالم... لأنه بيجي اليوم
ناظرها مساعد وهز رأسه.... مو مصدق أخته تربيته جنت....
قربت عبير وهي تحط الصينية الوهمية ع الطاولة الوهمية.... ناظرت أخوها وقالت: يللا أطلع أبي أجلس مع سالم لحالنا لأني اشتقت له كثير
قرب منها مساعد ومسك كتوفها.... قال بعصبية: عبير وش فيك... أنتي مو مجنونة
ناظرته عبير ونزلت دموعها: سالم عنده ورقة تثبت أنه مو حرامي... - نزلت للأرض وهي تبكي: سالم جاب الأجنبية في بيتي وطلقني... أخذ رنا بنتي وريم راحت عند أبوها
نزل مساعد لمستواها وضمها.... ما توقع نهاية أخته بمستشفى الأمراض العقلية.... ضمته عبير ثواني وبعدت.... وقفت وقالت: بيجي سالم وأنا ما جهزت العشاء
وقف مساعد وناظر أخته وتحسر عليها.... طلع من المستشفى وهو ندمان على الحقد اللي زرعه بقلبها....
*******
جلس نواف جنب أخواته أسماء وبسمة ورنا.... ومقابله أمه وأبوه وأخوه الصغير سعود.... طفت الأنوار، نواف وأخواته عطوا أبوهم وأمهم ظهرهم.... حتى يشوفون الألعاب النارية اللي ملت السماء.... رفع نواف جواله يصور.... أسماء وبسمة أخذوا جوال أمهم... أما رنا خذت جوال أبوها....
وبغفلة عن الكل حط أبو نواف يده حول رقبة زوجته وهو مبسوط فيها.... وحطت أم نواف رأسها على كتف زوجها وابتسمت....
تمت
1425 هـ
تحيتي للجميع / الـ ج ـوري
احبائي القراء
يعجز لساني عن وصف مدى أمتناني لكم
في إتمام هذي الروايهـ المتواضعهـ بكلامكم الرائع
أعجز عن التعبير عن مدى شكري لكم
أشكر جميع من قرأ الرواية وأخص بالذكر من قام بالرد
تسلمون لي جميعها
وألقاكم على خير بروايتي الثالثهـ
دارت أيامكـ يا دنيا ورجعتي لي يا بندري
والسـلآم خير الختـآم
محبتكم / الـ ج ـوري
:
تجميع ورد الجوري
اللهم لك الحمد حتى ترضى وإذا رضيت وبعد الرضى ,,, اضف تعليقك