رواية شقائق النعمان -34
غرفة مها :
مها: رجعت دقت عليه حصلته مشغول له اكثر من ساعه : ما صارت هذى يكلم من كل
هـ الوقت لا ويتحكم ما يبيني اكلم منيره او احد بوقت متاخر
ارسلت له مسج
%%حبيبي معليش انتظرتك وانت مشغول انا تعبانه بنام تصبح على خير%%
و اخذت تيلفون البيت و تصلت على منيره
منيره : الو
مها: سلام وش اخبارك
منيره : مها وش عندك متصله من تيلفون البيت
مها : يا سلام شوفي الساعه كم وبتعرفين ليش دقيت من هـ الرقم
منيره : ما تخيلتك جبانه كذا
مها : لا يعمري ماني بجبانه بس ما ابيه يزعل وبعدين انتي فكري فيها صح لو احد غيره دق وحصل جوالي مشغول بيضن اني اكلمه
منيره: صح كلامك بس هو وش عنده معناه يشك فيك
مها: بكل حب : لا مستحيل انتي ما تعرفين وش كثر يحبني ..المهم انتي وش عندك بكره
منيره: ما عندي شي خير
مها: ابي اروح السوق
منيره: متي تبين تروحين
مها : الصبح
منيره : لا خليها بعد المغرب
مها: لا ما اقدر يمكن راشد يجي بكره وبعدين انا ابي اخذ له هديه هاه وش قلتي
منيره : خلاص فيها سوق صحيني اروح معك
مها : زين انا بنام عشان اقدر اصحى الصبح تصبحين على خير
منيره : وانتي من اهله باي
مها : باي وقامت طفت النور وراحت على سريرها ودق جوالها ....الو
راشد: معليش حياتي تاخرت عليك صحيتك من النوم
مها : لا بعدني ما نمت
راشد : حبيبتي بتنامين الحين اذا كذا اكلمك بعدين
مها : لا حياتي انت معي وتبيني انام
~~*~*~~
بيت ابو ملاك
غرفة البنات
منى :دخلت الغرفه ومي نايمه بدلت ملابسها ببجامه قطنيه مريحه و دهنت ايديها ورجولها بكريم ولبست خف برجلها و تقلبت على السرير وكل شوي عينها تجي على الاب توب و ترجع تنقلب الجهه الثانيه..و شهقت يوم خطر في بالها سؤال..وتكلم نفسها بصوت واطي لازم اعرف مستحيل اعيش معه اذا مهو مثلي و تقوم بسرعه تفتح جهازها..وتضرب جبينها بيدها ..يوووه الورقه عند ملاك و تقوم بسرعه وتخرج من الغرفه تتسحب و تدخل غرفة ملاك و تسمع صوت المويه في الحمام و امها ما بعد طلعت تاخذ الورقه من على التسريحه وتخرج بسرعه ..و تضيف الاسم و تتاكد من حروفه و تناظر الساعه كانت عشره و خمسه وثلاثين دقيقه ..بعد ما ارسلت توترت و رجعت تهدي عمرها انها بس سؤال وحد تسأله وتخرج ..
خالد : كان التوتر وصل حده عنده و لما ماشافها دخلت ارتاح شوي و قام راح ياخذ له كاسه مويه و العيال الكل نايم رجع دخل غرفته و سكر الباب و جلس على طرف السرير بيقفل الجهاز الا يشوف فيه اضافه اخذ ثواني وهو متنح في الشاشه شرب رشفه من المويه و تنهد كله منى انا الي جبته لعمري سمي بالرحمن وهو ناوي يخبرها انه ماراح يكلمها اذا كانت هي وقبلها وحب ياتاكد انها هي ولا لا لانه جلس فتره بعد ما اضافها ما تكلمت
:: وما كنت ممن يدخل العشق قلبه و لكن من يبصر جفونك يعشق ::
السلام عليكم ...ممكن اعرف من معي ...؟؟
منى : بلعت ريقها وتوترت مهي قادره تكتب
خالد : شاف انه مافي رد ..وابتسم وعرف انها هي ...
:::وما كنت ممن يدخل العشق قلبه و لكن من يبصر جفونك يعشق:::
اذا ما قلت من انت بحذفك من عندي على طول ..
منى : طيب يا خويلد يارب تحذفني ماني راده ..يووه وش فيني انا كيف بسأله ..وكتبت وهي يدها تغلط باماكن الحروف وترجع تعدل الكلمه
][ أحبك حتى كأن الهوى تجمع وارتاح في أضلعي ][
وعليكم السلام ..شوف ما اضفتك الا عشان بس اسئل سؤال وابي اجابه بصراحه
منى تنهدت بعد ما ارسلتها ..و ختفت ابتسامتها يوم شافت نكها ما غيرته و تكلمت بصوت ..خبله طول عمرك خبله الحين وش بيضن..و شافت مي تحركت و نطت عن السرير و سحبت مفرشها وجلست على الارض بالزاويه والنور مطفي مافي غير نور الشاشه ..
خالد : ابتسم على عفويتها بس حب يتاكد انها هي ولا لا
:::وما كنت ممن يدخل العشق قلبه و لكن من يبصر جفونك يعشق::
اعطيني اشاره انه انتي الي في بالي وبعدين اسئلي الي تبين
منى يوم جلست شافته مرسل خبل يشخمط بيدي ويبي اشاره
][ أحبك حتى كأن الهوى تجمع وارتاح في أضلعي ][
انت اعتقد ماشي مع اغنية شخبط شخبيط
خالد : ضحك يناس خبله واحبها
:::وما كنت ممن يدخل العشق قلبه و لكن من يبصر جفونك يعشق:::
وانا خطيبك تطمني ..وشهو ..سؤالك الي تبين تعرفينه
منى : ارتاحت اكثر ..وترف عينها تشوف مي بعدها نايمه او لا
][ أحبك حتى كأن الهوى تجمع وارتاح في أضلعي ][
ابي اعرف انت وش ناديك الي تشجعه مره سمعت محمد يقول انه واحد من الي معه شبابي متعصب ..
خالد : تنح بسؤالها مهو مصدق انه هذا الشي الي دخلها ..
:::وما كنت ممن يدخل العشق قلبه و لكن من يبصر جفونك يعشق:::
الحين من جدك تسالين هذا السؤال
][ أحبك حتى كأن الهوى تجمع وارتاح في أضلعي ][
ايه مهم وابي الصدق
خالد :ابتسم وحس انه فعلا يتعامل مع مراهقه
:: وما كنت ممن يدخل العشق قلبه و لكن من يبصر جفونك يعشق ::
ايه هو وش بتسوين يعني
منى : عصبت لا مستحيل
][ أحبك حتى كأن الهوى تجمع وارتاح في أضلعي ][
نعععععععععععععم وش تشجع ..خلاص اقول مافي خطبه سامع مع السلامه
خالد : ضحك من قلبه بصوت ...هيه خبله هذى وش قصتها
::وما كنت ممن يدخل العشق قلبه و لكن من يبصر جفونك يعشق::
بنت تعالي وش قصتك انتي ليه حضرتك وش تشجعين ..وش دخل الانديه بحياتنا
منى : ردت بسرعه عليه وهي تبي تخرج خلاص
][ أحبك حتى كأن الهوى تجمع وارتاح في أضلعي ][
لا لها دخل مستحيل اقبل في واحد مهو مثلي ..ضنيتك مثل محمد هلالى حتى النخاع فديته وفديت كل من يحبه
خالد :ضحك على خبالها حتى هنا حركاتها عفويه
:: وما كنت ممن يدخل العشق قلبه و لكن من يبصر جفونك يعشق::
هههههههه منى اعقلي بلا جنان انا احبك ومستحيل ابعد عنك سامعه وحطيها حلقه باذنك ..انا اعشق ناديك مثلك..وانتي قلتيها فديتي الي يحبه يعني انا
منى : بتسمت بفرحه ..طيب قول كذا من اول تلعب علي فديت روحك وناديك يارب
][ أحبك حتى كأن الهوى تجمع وارتاح في أضلعي ][
زين مع السلامه ..ولعد ترسل مره ثانيه
خالد نسي عمره من كثر مهو مستانس فيها
:: وما كنت ممن يدخل العشق قلبه و لكن من يبصر جفونك يعشق::
احلفي انتي مهو بكيفك تضيفيني و تتامرين علي على كيفي انا ..وبعدين وش دخل الانديه بحياتنا الزوجيه
منى : بنفعال وخبال
][ أحبك حتى كأن الهوى تجمع وارتاح في أضلعي ][
ايه على كيفي وش بتسوي يعني و بعدين وشلون مالها دخل عادي يعني اكسر التحف والصحون على راسك
خالد بس قرأ ردها..مات ضحك على خبالها
:: وما كنت ممن يدخل العشق قلبه و لكن من يبصر جفونك يعشق::
آآآآآآآآآآه يا يمه لحقي علي ذبحتيني ياخبله احبك
منى: انا الي بموت اليوم وترسل بوسه في الهواء ..و كتبت بجديه
][ أحبك حتى كأن الهوى تجمع وارتاح في أضلعي ][
لو سمحت بطل قلت ادب واكتب عدل ..كلام غزل ما ابي لانكم كلكم مثل بعض الحين كلام حلو وبعدين تعطونا على روسنا
خالد : ههههههه لا اشو فيها ذرة عقل مع خبالها ..
:: وما كنت ممن يدخل العشق قلبه و لكن من يبصر جفونك يعشق::
طيب وعد ما اكتب غزل بس اكلمك بحدود ايش قلتي
منى : تبي تعرف يومها هو كيف كان رد فعله وتتحرقص من اول تبي تعرف
][ أحبك حتى كأن الهوى تجمع وارتاح في أضلعي ][
وش كان ردت فعلك يومها
:: وما كنت ممن يدخل العشق قلبه و لكن من يبصر جفونك يعشق::
آآآآآآه ذبحتيني عمري بحياتي ما راح انساه من يومها معد اشوف الي انتي قدامي وطول وقتي افكر فيك .....تعرفين
منى:ابتسمت وحمر وجها
][ أحبك حتى كأن الهوى تجمع وارتاح في أضلعي ][
خير
:: وما كنت ممن يدخل العشق قلبه و لكن من يبصر جفونك يعشق::
ان محمد ما صدق لما قلت له ابي اخطب وقعد يضحك علي
][ أحبك حتى كأن الهوى تجمع وارتاح في أضلعي ][
وليش
:: وما كنت ممن يدخل العشق قلبه و لكن من يبصر جفونك يعشق::
لاني عمري ما فكرت اني اعرس بس احسن شي سوتيه انك قلتي اسمك ولا كان جنيت لما قال لي ان اخته مخطوبه
منى : السعاده غمرت قلبها
][ أحبك حتى كأن الهوى تجمع وارتاح في أضلعي ][
وشلون عرفت انه مهو انا
:: وما كنت ممن يدخل العشق قلبه و لكن من يبصر جفونك يعشق::
آآآه ياعمري قلتله وختك الثانيه قلي منى صغيره قلت ايه هاذى الي ابيها الي ما خلت فيني عقل
][ أحبك حتى كأن الهوى تجمع وارتاح في أضلعي ][
سلامه عقلك
:: وما كنت ممن يدخل العشق قلبه و لكن من يبصر جفونك يعشق::
انتي ما فكرتي فيني يومها بعد ما سبحتيني معك
منى خجلت و ماعرفت وش ترد
:: وما كنت ممن يدخل العشق قلبه و لكن من يبصر جفونك يعشق::
هههههه وش فيك ما تردين
][ أحبك حتى كأن الهوى تجمع وارتاح في أضلعي ][
لا لاني من الخوف نسيت شكلك
:: وما كنت ممن يدخل العشق قلبه و لكن من يبصر جفونك يعشق::
هههههههههههههههههههههه من وشو خايفه
][ أحبك حتى كأن الهوى تجمع وارتاح في أضلعي ][
كنت اضنك محمد لما طيحتك وخفت تخبره
الخالد : حب يكون كلامه جدي معها ..
:: وما كنت ممن يدخل العشق قلبه و لكن من يبصر جفونك يعشق::
انتى باي قسم
][ أحبك حتى كأن الهوى تجمع وارتاح في أضلعي ][
علمي
:: وما كنت ممن يدخل العشق قلبه و لكن من يبصر جفونك يعشق::
وش ناويه تدخلين
][ أحبك حتى كأن الهوى تجمع وارتاح في أضلعي ][
مدري للحين ما بعد قررت .... كلمنى عن نفسك وش تحب وش ما تحب..و عن اهلك
:: وما كنت ممن يدخل العشق قلبه و لكن من يبصر جفونك يعشق::
اوكي سئلي وانا اجاوبك و انتي بعد ابي اعرف عنك كل شي
~~*~*~~
بيت ابو عامر
على الفطور
مها : نزلت وشافت ابوها يفطر سلمت على راسه : صباح الخير
ابوعامر : صباح النور وش مقعدك من بدري اليوم مهي العاده
مها : حبيت افطر معك
ام عامر: لها كم يوم متحسنه حالتها وهي تشرب عصير برتقال طازج وصوتها فيه بحه من الزكام : غريبه نازله الصبح
مها : تسلم على راسها وتجلس : يمه ابي اروح السوق اليوم
ام عامر: متي تبين تروحين
مها : الحين الصبح بيكون فاضي
ام عامر: وين تبين
مها : الفيصليه
ام عامر: خلاص اجهزي واوصلك معي انا بروح بعد نفطر هناك ..زهقت من جلست البيت
ابو عامر: انتي حتى بمرضك ماتعرفين تجلسين بالبيت امس خارجه
ام عامر :وش عندي بالبيت اجلس عشانه نجتمع ونشوف احوال الناس والمحتاجين
ابو عامر : بتريقه : ايه صدقتك
مها :تبي تلحق تقول الي عندها قبل ما تقلب الجلسه لخناق : امي منيره بتروح معي
ام عامر: خليها تجهز ونمرها
ابو عامر: مها ترى اودعت بحسابك مهرك واذا نقص عليك شي خبريني
مها : تسلم يبه الله يخليك لي ويطولي بعمرك ...وخفظت صوتها وقالتها بحيا... يبه راشد كلم البارح يبي يجي اليوم وش ارد عليه
ابو عامر : الله يحيه باي وقت
ام عامر : متي قلك بيجي
مها: مدري ما حدد
ام عامر : خليه يجي بدري بعد المغرب انا معزومه اليوم عندي عرس بحضره ولا يطول زين نبهي عليه
ابو عامر : كيف تبينها تقله كذا بيعتبرها طرده خلاص ما عليك انا بكون بالبيت
ام عامر: سوى الي تبيه يالله اجهزي انتي انا بطلع ابدل الي علي
مها : وهي فرحانه : زين
~~*~*~~
بيت ابو ملاك :
الصباح
مي : منى قومي بيكفيك نوم بسرعه خالتي تنطرنا بنروح مع ملاك
منى: خليني ابي انام
ملاك: تدخل و ترفع صوتها : مهو بكيفك قومي ...وتسحب عنها الغطاء
منى: وجع ملاك ذلفي برا
ملاك:تجلس عندها تبوسها صباح الخير ..وتكلمها باذنها قومي ولا اخبر ماما انك كلمتيه شوفي الاثار باينه و تاشر على الاب توب والشاحن الي بالارض و المخدات
منى: اووووووف وجع نذله
مي : وش فيكم
منى: ولا شي وتوقف قمت خلاص طلعوا بالبس وانزل تحت
مي : بسرعه وتخرج
ملاك : تمسكها مع يدها انتي كلمتيه بجد و متى نمتي
منى:تفرك عيونها : ايه .. الساعه ثنين
ملاك :شوووووو طول الوقت تكلمينه
مى: ايه
ملاك: لا عن جد الها حق ماما تمنعك بضيعين عمرك كذا
منى: لا حبيبتي تفقنا بس يوم الاربعاء والخميس
ملاك: بنشوف
منى: يابختك محمد معك مهو مثلي
ملاك: وجع روحي بسرعه لا علم ماما
منى: حرام عليك محمد يحبك و انتي ما اشوفك تتكلمين عنه وتعطينه وجه
ملاك: انا نازله لحقيني وتخرج وتسكر الباب
منى : ايه زين تهربين من الموضوع
ملاك: صباح الخير وتروح وتبوس امها
ام احمد: صباح النور
ملاك : صباح الخير حبيبي وتبوسه
محمد: صباح النور يا حياتي
ملاك: تجلس شو احد كلمك
مي وام احمد: هههههههههههههههههه
احمد : يثاوب وش فيه تضحكون
محمد: اكل و انت ساكت محد قدك على هـ الصبح يا ليتني مكانك
ام احمد: محمد عيب
محمد: الحين من اولي انا ولا اهو
ملاك: هو عندك مانع
محمد: زين انا راويك
ام احمد: محمد وش فيك على هـ الصبح بسم الله الرحمن الرحيم
مي: قالتها بعفويه و نيه حسنه : احمد ربك اهي معك طول الوقت
محمد:فهمها شي ثاني و ابتسم : ايه عن الحسد عشانهم ما خذينك عنه ما كنك طول اليلل و انتي تكلمينه
مي: خجلت و مهي قادره تبلع الاكل
ام احمد: وش فيك يالله صباح خير خجلت اختك
محمد:اوكي عشان خاطرك بسكت
ام احمد: لا تنسى اليوم روح احجز
ملاك: قامت
ام احمد: تعالي وين رايحه ما فطرتي
ملاك:مابدي واخذت كوب الكوفي و طلعت
محمد: خالتي خلينا كم يوم وبعدين نحجز
ام احمد: لا ما فيه وقت توه نروح نرتب امورنا هناك اذا حصلت حجز على بكره او بعده بيكون ازين
محمد: ماشي .. ويقوم
ام احمد: وش فيك ما كملت فطورك
محمد: الحمدلله
~~*~*~~
غرفة مها
مها:صباح الخير حبيبي
راشد: هلا صباح النور
مها: حبيبي ليه نايم مارحت العمل
راشد: ليه الساعه كم
مها: الساعه وحده
راشد : اوكي ما عليك الحين اروح ابوي ما يقول شي
مها: حبيبي كلمت اهلى تعال اليوم
راشد : اخيرا ما بقت توافق خلاص الساعه عشره اجيك
مها: لا حياتي وش عشره تعال قبل
راشد: ليه
مها : امي تبي تروح عرس تعال بعد المغرب
راشد: لا وش رايها العصر يكون احسن
مها: حبيبي لا تزعل
راشد: خلاص بعدين اكلمك بروح اخذ شور و بروح الدوام سلام
مها : راشد زعلت
راشد: لا حبيبتي بعدين اكلمك خليني اصحصح شوى زين
مها : اوكي
راشد: باي
مها: باي
~~*~*~~
بيت يزيد
يزيد : دخل بيته وهو طفشان من الدوام واصل حده من التعب سحب شماغه و عقاله من على راسه وشاف هند وهي جالسه و جهازها الاب توب قدامها ..وتكتب شي فيه : السلام عليكم
هند : وعليكم السلام ..هلا راد مبكر اليوم ..وقفلت الجهاز قبل يوصل ..تبي الغداء الحين
يزيد : يجلس بتعب : لا خليه بعدين ما ني مشتهي ..
هند : جلست عنده : وش فيك ياقلبي تعبان و تمسح على شعره
يزيد : ميل على كتفها وسند راسه : مصدع و جسمي كله مكسر شكلها بداية زكام
هند : تحس راسه وحرارته عاديه : زين الحين اجيب لك عصير برتقال باليمون و حبة بندول ..وش رايك تبي العصير معه نعناع
يزيد : وهو مغمض عيونه : نفس الي سوتيه قبل
هند : تمسح على وجهه بيدها و تسمي عليه بخوف كانه ولدها الصغير الي بيتعب : ايه حبيبي هو
يزيد : طيب بس لا تكثرين النعناع فيه .
~~*~*~~
بيت عامر
نوره كانت بالمطبخ بعد ما خلصت غداها طلعت تشوف بناتها وينهم ما لهم صوت ودخلت عليهم غرفتهم شافتهم ما فيه احد و راحت غرفة الالعاب تصدمت من منضرها مافي لها موطي رجل حايسين الدنيا فيها و مهم فيه بعد نادت عليهم محد رد عليها والمشكله الثلاثه مختفين دورت في الدور الي فوق ما فيه ولا وحده منهم ..
عامر : دخل البيت و هو ماشي بالمدخل سمع اصوات جايه من جهة مجلس الحريم قرب منه وقف مكانه يضحك بدون صوت على المنظر الي قدامه ..وشاف نوره نازله اشر لها تجي وبدون صوت قربت منه و كلمها باذنها وباس راسها وهو مبتسم ..وفتح الباب عليهم
نوره : شهقت و ضحكها منظرهم : وش تسون يالمخبل
شروق شافت امها وابوها قامت تصفق
شهد : نلعب حجاج
شوق : تعالي العبي معانا لبيك
عامر : يضحك: فديتكم تعالوا لا تنقض عليكم امكم بسرعه شوفوا عيونها عندها نية غاره جويه بسرعه
البنات شافوا امهم من جدها معصبه راحوا يركضون عند ابوهم
نوره : بعصبيه وضحك على اشكالهم : الحين ما كفاكم لعبكم فوق وحايسين الغرفه نازلين تكملونها هنا ولعبين بجلال الصلاه
شهد : ووهي عند ابوها : عشان نسوي زي الحجاج
شروق : هم يلبسونه ويطيح الجلال من عليها و ترده بخجل لانها بملابسها الداخليه وسروالها النص
نوره : قربت منهم وتصرخ فيهم :وبعدين معكم انتوا الحين ترتبون كل شي ..وانا رويكم المجالس ما قلت ما تدخلونها ..
عامر : شال شروق وهو يضحك : غاره بسرعه بنات اركضوا وراح يجري معهم و طاح جلالهم من عليهم وهم يركضون على الصاله و مات ضحك عليهم و ياشر لنوره تعديها لهم
نوره : والله محد بيخربهم غيرك الحين لو جاني ضيف والمجلس كذا
( البنات لمن شافهم ابوهم كانوا لابسين الجلال ابيض ولفينه مثل الأحرام و يلفون من حول الطاولات و يلبون لبيك اللهم لبيك و يرمون من الحلاوه الوزيه على الطاولات على انها الجمرات ..والمجلس حاله صاير يرثي له )
~~*~*~~
بيت هزاع
اصايل : بغرفتها من يوم خبرها بوها عن موعد الزواج وهي معصبه وتسب فيه
شمايل : ابي اعرف الحين على ايه تسبين فيه المسكين تستاهلين ولا فيه بنت ترفض الملكه جالسه تتشرطين عليه خلاص نفذوا الي تبين والحين معترضه على موعد العرس وانتي مثل ما قلك ابوي ماعندك شي الي ياجل عشانه
اصايل : بعصبيه واصله حدها : ايه ما ابي ملكه هو على كيفه ليه الملكه وش بستفد منها ماغير يضحك على فيها شوفي لي وحده تقلك انه زوجها مستمر مثل ما كان ايام الملكه ..كلهم نفس الشي مسخره
شمايل : تعبت من تفكير اختها المشقلب ما تدري ليه هي الوحيده فيهم تفكيرها كذا : انتي مدري وشلون تفكرين الحين ليه تنظرين لشين منهم مهم كلهم مثل بعض ..والملكه تمهيد لك عشان تعرفينه قبل تدخلين بيتك ..
اصايل : ما ابي اعرفه و ابي مثل امي وجدتي مهو مثلكم..
شمايل : قامت عنها : خبله انتي بعدين بتندمين
اصايل :بطفش وتوتر : اندم على ايه على غزله الي مدري من وين يبي يجيبه ما هقيت حميدان يعرف لهذا الشي ..وخليه يوفره لبعدين مهو بملكه وخربيط
~~*~*~~
ام عامر دخلت بيتها وهي تحس انه مرضها بدا يخف اخيرا بدت تنفذ مخططها و داريه انها بس حدها هند اسبوع مع يزيد و بيطردها شر طرده
الفصل الرابع والعشرون
هل الحلم وهم ام حقيقه..كثير من الناس اصبح يخلط بين كلمتي الحلم والتمني..لانها بنظره كالمرآة تعكس ما يدور بداخله ..فالحلم هو ما يراه الشخص بمنامه نتيجة تراكم لأحداث و ما يدور بداخل النفس من محدثات الحياه
اما التمني : هو ما يريد تحقيقه للوصول الى هدف وغاية محدده ..
وملاك اصبح عندها التباس وخلط بين الاثنين عندما شاهدت صورتها العاكسه في المرآه وهي بفستان زفافها لم يخطر في بالها يوما انها تفكر في ارتدائه كان بمثابة الحلم بل السراب لانها لا تستطيع لمسه مهما ركضت خلفه ..وتجمعت الدموع في عينها ..و افزعها صوت منى
منى : الحين بطولين تتأملين شكلك لا تخافين بيعجبه زين ما انهبل عليك ..
ملاك : بصوت كالصفير لاضطراب تنفسها : منى بليز بلا هـالكلام خلاص ساعديني ..
منى: وهي تناظرها بتمعن : تعرفين أغباء منك ما شفت انتى الحين ليه خايفه و انتي بتضلين عند امي فيه احلى من كذا..
ملاك : تردد بداخلها ..ياليت اعيش بحظن ماما بس.. آآه لو محد بعدني عنها و ظليت بحضنها ما كان صار الي صار .. وبعد ما استلموا الفستان ورجعوا البيت ملاك تسوق بصمت حاسه انها حامله معها كفنها بين ايديها دخلوا البيت و محمد كان جالس بالصاله يعلم احمد لشطرنج..واحمد يتافف ما يحبه يبي أي لعبه إلكترونيه
ام احمد: السلام عليكم
محمد: وعليكم السلام
احمد : بحركه طفوليه طيح حجار الشطرنج و قام بسرعه وهو يضحك على محمد الي التفت له يهدده بنظرته : ماما طولتوا ليه تقوين ساعه وتردين ليه ما خذتيني معك زهقت لوحدي
محمد: سحبه مع بلوزته و يكتفه بيدينه مقهور منه دلوع امه : يالنصاب زهقت و انت فار راسي من محل لمحل تدور على لعبه ..
احمد : وهو يضحك : خلاص ياشيخ توووبه ما عيدها بس شتقت لماما والبنات
محمد: تضحك بعد ..و يضغط مسكته عليه
احمد: خلاص دمعته بتنزل : خلااااص فك يدي
محمد: بتهديد : ياويلك تصيح انت رجال سامع محد يشوف دمعتك
ام احمد : تجلس عنده وتسحب يده وتحضن احمد بحنان وتلوم محمد : هذا الي علمته لك ..الرجال ما يعيبه دمعته اذا نزلت لخشيه وخشوع الربه ولا لحق او ظلم او ضيم جار عليه الي يعيبه هيبته وكلمته للحق اذا راحت بين الرياجيل ..
محمد: ياسلااام عليك يالغاليه المفروض يعينونك تربين هالجيل الي طالع ..بس انا ما ابيه كل من كلمه نزلت دمعته ابيه عنده شده وصلابه
ام احمد : الشده والصلابه بيكتسبها مع الوقت هو بعده صغير ..ويعني وين يبي يروح عنك وعن ابوه لا تخاف عليه بس لا تعقده عاد ..
دخوا البنات ومي ومنى شايلين علبة الفستان وملاك خلفهم بيدها علبه صغيره ..وكيس حطوا الاغراض على الارض عند الباب ..
محمد يبي يشوف رد فعلها مع انه مرتاح لتصرفاتها هذا الاسبوع وحاس انها تغيرت كثير عن قبل وهو عينه عليها : خالتي جهزوا ترى حجزت بكره الرحله
ام احمد: الساعه كم
محمد: شافها ناظرته بتركيز وتكلم على مهل : الساعه ثمنيه الصبح
ملاك: رمت الكيس الي بيدها وطلعت غرفتها
محمد: تنهد بداخله ولف يناظر خالته
ام احمد: ماعليك منها بكلمها
مي : خالتي وش فيها صاير شي
ام احمد: ما فيها شي أكيد خايفه مثلك ولا نسيتي وش سويتي فيني اطلعوا رتبوا أغراضكم بطلع اشوفها
منى : تجلس ليه تبونا نرجع الحين بعده باقي وقت ما لحقنا نستانس بالسفره مالي دعوه ابي اروح ملاهي التون تاور معتبرها جيه لهنا اذا ما رحت لها
احمد :قام مسك امه قبل تمشي وبصوت كله فرحه وصراخ : ماما الله يخليك نبي الملاهي
محمد: مهبل انتم الاثنين متى ناوين تعقلون أي وقت الي تبون تروحون لها الحين
منى : تناظر ساعتها : لا فيه وقت توها ما صارت وحده قوموا الحين
ام احمد : منى بلا جنان قومي رتبي شنطتك الحين ..
منى: تقوم تبوس راسها : امي والي يعافيك خلي روز والخدم يرتبنها لنا كل شي بس خلينا نروح الحين بسرعه .
مي : شوفوا اذا تبونا نروح عشان ملاك تغير جو لانه بحزنها على ابوها فقدت مرحها
محمد : يناظرها ما هقيت يا مي ان الي فيها بس حزن ياليتك قدرتي تخرجينها من الي هي فيه : انتي تشوفين كذا..يمكن ما ترضى تروح
مي : ايه لازم تغير جو
منى: ياسلااام الحين عشانها بتوافق ..بس مهو مشكله اجيبها من شعرها بس اهم شي توديني ..
محمد: صرخ بصوت عالي : مـــــــــــــــنى
منى: خشت خلف امها : امي لحقي علي...خلاااص توبه ما قول شي بس وديني ابي اروح
ام احمد : وهي تضحك : بعدي عني كسرتيني خلاص محمد اذا ماعنك شي وديهم ..
منى: تبوسها بقوه : يااااااااااااارب يخليك نصر الكل مظلوم
احمد: بفرحه ويبوس راس محمد : تكفي دخيلك يالشيخ تودينا هاااه تراني طالبك قول تم
محمد: وهو يضحك : اوف طلعت علوم الرجال خلاص تم دام الغاليه قالت نروح نروح وش عندنا بسرعه خمس دقايق وانتم بالسياره
منى واحمد من فرحتها طلعوا ركض مع الدرج الكل يبي يجهز
ام احمد : الله يهديهم ويصلحهم هالثنين
محمد: يوقف : امين ويهدي هالمخبوله مدري وشلون بتعرس
ام احمد : تتنهد : الله يعينا عليها ويهديها ...وتطلع وتدخل غرفتها وتحصلها جالسه في البلكونه ...حبيبتي وش فيك
ملاك: سمعت صوتها كانها كانت تنتظره عشان تنزل دموعها بكيت و لفت ورتمت بحضنها وهي تبكي
ام احمد : حضنتها وهي شايله همها : حبيبتي صحيح الظروف الحين مهي بمناسبه بس وش تبينا نسوي
ملاك:صوتها مهو واضح لان وجها بكتف امها : ماما الله يخليك ما بدي اتزوج
ام احمد: تدخلها وتجلس معها على السرير : حبيبتي صحيح ابوك الله يرحمه ما صار له شي متوفي بس يرضيك اناس تتكلم فيك
ملاك: ما بيهمني
ام احمد: حتي سمعت ابوك ما تهمك هم مهم بقايلين ملاك سوت بيقولون بنت خالد سوت يهون عليك ابوك الله يرحمه يقولون بنته ساكنه مع واحد حبيبتي الناس ما تعرف انك ملكتي وعمتك الي اقرب شي لك تكلمت عنك بالشين ما بالك بالناس.. يا يمه كلها كم يوم وبتردين ومحد راح يتكلم عنكم ساعتها يالله حبيبتي اذا تحبين ابوك ولي خاطر عندك لا تبكين
ملاك: تحط راسها على رجل امها وتبكي
ام احمد: يابنتي من وشهو خايفه محمد يعزك وبيحطك بعيونه وابيك انت بعد تحطينه بعيونك وتحافظين عليه لاني شايفتك يايمه ما تعطينه وجه يا بنتي انا لو ماني بشايفه انه يصلح لك ما كان خليته يتقدم وياخذك
ملاك:خلاص ما بدي فرح
ام احمد: حبيبتي حاسه فيك بس وش نسوي لعمك وبعدين هو صادق الناس مالها الا الي تشوفه وتسمعه و انتي يابنتي كلها كم يوم بتعدي ماراح تشعرين فيها بننشغل هناك بتجهيز ما راح يكون عندك فرصه تفكرين قومي حبيتي غسلي وجهك ولا تزعليني منك ..وأبيك تنسين كل الي صار عليك قبل اذا خايفه منه محمد ماراح يضرك بشي ..وترفعها عن رجلها وتناظر وجها ..قومي البسي اخوانك ينتظرونا اسفل بنخرج الحين
~~ ***
بيت ابو عامر :
في المجلس
ابوعامر : هلا حياك ياولدي
راشد: يتكلم بكل هيبه و الي يسمع نبرت صوته يحس برهبه منها : الله يحيك ويسلم على راسه وش اخبارك
ابو عامر: الحمد لله بخير وش علومك وكيف الوالد عساه بخير
راشد: الحمد لله وش اخبار العيال وينهم ما في احد منهم
ابو عامر : لا اليوم ما جو
ام عامر : السلام عليكم
... وعليكم السلام
راشد: يوقف ويسلم على راسها ولقط شرارت عيونها وبادلها بامثل : وش اخبارك ياعمه عساك بخير
ام عامر: الحمد لله بخير انت وش علومك
راشد : الحمد لله بخير
ام عامر : مقهور الي جايهم الساعه تسعه وهي لابسه و تبي تخرج و مرت تشوفه وهي لابسه عباتها ما ترتاح قبل تعطيع الكلمتين الي بحنجرتها الذهبيه و تناظر بساعتها : امك وش فيها ادق عليها ما ردت هي مهي برايحه للعرس اليوم
راشد: مايحب نظرت الشماته الي بعيونها و رد عليها بكل كبره : يمكن ما سمعت جوالها عندها خالتي مجتمعين
ام عامر : كان خبرتني انها مهي برايحه
راشد: والله مدري عنها كلميها وشوفي
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك