رواية شقائق النعمان -25
بيت يزيد:
هند:واقفه معه في الصاله : حبيبي الله يطولي بعمرك خلاص خليني بالبيت و ما راح افتح الباب
يزيد: بكل اصرار : لا ما راح اقدر اركز بشغلي وانتي لوحدك روحي البسي بسرعه لا اتأخر
هند: تناظره وهي الخجل صدق باين بعيونها : والله اخجل من خالتي ام ابراهيم اروح عندها مع الصبح(خلال هذى اليومين يزيد اخذ هند عند بيت عمه وخبرهم انها تعبت وطاحت وهي سبب الكدمه الي بوجها و ما يقدر يتركلها لوحدها لانها ممكن ترجع لها الدوخه في أي لحظه)
يزيد: لا هي بينشغل بالها عليك لو ما جيتي عندها اليوم
هند: حياتي الحين اكلمها واخبرها اني بجلس بالبيت
يزيد:مايبي يمشي عنها مهو قادر يرتاح من كثر التفكير وخوفه عليها : هند لا تعاندين ولو جاء يوسف
هند: تقرب منه وتحط يدها على كتفه بكل حب وامتنان : حبيبي ما راح افتح الباب وكلها اليوم او بكره و ام شهد تكون فيه
يزيد: بقهر واضح من صوته : آآآآآه انا بس لو اعرف فين اختفاء..؟!
هند: بخوف على نفسها وهم اخوها الي متعرف فينه بس ماتبي تبين : حبيبي خلاص روح لا تتاخر على الدوام
يزيد:حط يده على خدها : اوكي روحي نامي وانا ما راح طول بخلص الي عندي و استاذن و ارجع بدري
هند: تعدل له اتجاه الكبك بالثوب الي على شكل فص اسود : اوكي بس ما راح انام عندي شغل بالبيت
يزيد: وبعدين معك لا تشتغلين مريم راح ترسل شغالتها اليوم وكلها هـ الاسبوع وتوصل الشغاله روحي ارتاحي
هند: تبوسه على خده: اوكي حبيبي بس لا تعصب
يزيد: انتى السبب ليه تعاندين قلت لك لا تشتغلين و انتي تعبانه
هند: هههههههه حبيبي انت تكذب الكذبه وتصدقها الحمد لله انا ما فينى الا العافيه
يزيد: يمسح على شعرها : شوفي وجهك وشلون صاير ارتاحي ما ابي يجي اليوم الي اشوفك فيه تعبانه
هند: لمعت عيونها بريق دمعه لحبه لها وخوفه عليها و ما شفع لأخوها فعلته معها الا انه اهداها لكنز لو بتعيش عمرها كله تخدمه وتحت رجوله ما قالت لا : الله لا يحرمني منك لا دنيا ولا اخره قول امين
يزيد: امين يبوس جبينها يالله انا تاخرت مع السلامه
هند: مع السلامه
يزيد: خرج وقفل الباب..وهو يدعي اللهم اني استودعتك زوجتي وطفلي وبيتي ومالي ونفسي فحفظنا بحفظك
(ملحوظه: من قال عند خروجه من البيت اللهم اني استودعتك نفسي واهلي ومالي وبيتي فحفظه لي ...فهو بحفظ الله... فهو خير من تستودع عنده الامانات )
* * * * *
بعد الظهر بيت ابو عامر :
على الغداء
ابو عامر :قبل ما يأكل شي يناظر بالي جالسين : وين بناتكم ما جو للغداء..؟؟
نوره: ناظرت عمها بامتنان و بصوت هادي : فديتك عمي غديتهم قبل شوي
ابو عامر : ناظر فيهم كلهم : وليه ما خلتيهم يكلون معنا
ام عامر: تاكل محشي وتغمس الخبز فيه : الحين تقول لك غدتهم وخلاص
ابو عامر: ناظره نظره يعني انكتمي..وماهتمت وكملت اكل : بالعافيه عليهم .. بس ارسلي الشغاله تخليهم يجون يجلسون معي ...ويلف يناظر عامر الي جالس على يمينه ...عامر خلصت شغلك
عامر : فهم ابوه انه يقصد البيت : ايه يبه
ابوعامر : ومتى ناوي تروح
عامر: بكره اذا الله راد
ام عامر : لقمتها بيدها وترفع راسها لعامر تشوفه : وش عندكم وين تبيه يروح
ابوعامر : راحة عيالي اهم شي عندي ..اخذت له بيت و بينقل فيه
ام عامر : ترمي الي بيدها و دها تاكله بعينها :وشهوووو وانا اخر من يعلم..و عشان وشهو البيت ماهو بعاجبه عيشتنا
ابوعامر: بصوت هادي لكن صارم : وش عندك الحين ... لا مهي بعاجبته ... مهو هذا الي تبين هذا البيت بيكون لك بروحك محد راح يزعجك فيه
ام عامر: توقف: انت طول عمرك ما تحب الا تنفذ الشي الي ما ابيه ...وصبت غضبها على نوره ....سويتي الي براسك يا نوير تبين تخذين ولدي مني وتتحكمين فيه هااااه ...وانت يالخبل ضاحكه عليك وغاسله عقلك لكن بكر بتندم وما بتحصل ولد يشيل اسمك اذلف معها الله لا يردكم
ابو عامر : يصرخ : ذلفي انتي على غرفتك ولا اذلفي عند الي يجاملونك برا البيت
ام عامر : مالت عليكم ...وراحت وهي تتحلطم وهي تطلع مع الدرج ..وجت على بالها ملاك وصارت تسب فيها : ااااه يالقهر لو مها الحين مملكه كان فضحتك يابنت انوار بس وش بيقولون الناس عن بنتي لو عرفوا الحين وهي ما ملكت ماعندها حيا مثل بنت خالها وداشره بس وش يفهمهم ان بنت انوار مثل امها مالت عليهم ..
ابو عامر : يتنهد ويمسح على وجهه بيده وصدت نفسه عن الاكل: حسبي الله ونعم الوكيل عمرها ما راح تتغير وانت وانا ابوك لا تحط بخاطرك روح والله يهنيك بيتك
عامر: الله يطول لنا بعمرك اهم شي رضاك علينا والباقي يهون
مها : شي عادي عندها صوت امها وابوها اذ ارتفع تعودت : يبه ابي اروح معهم اليوم
ابو عامر: روحي مع اخوك باي وقت ما علي منك انا ما امنعك الا من الخرجه الي مالها داعي مع زميلاتك و روحة الاسواق
عامر: التفت لمها ونفسه تصدت عن الغداء بس ما يبي يقوم عشان ابوه : ليه من متي هي تروح السوق مع زميلاتها
مها:بارتباك : لا مارحت..
نوره: شافت ارتباك مها وهي عارفه زوجها لو عرف وش يسوي : لا من قال انها تروح لوحدها انكون معها او مع عمتي يالله مها خلينا نروح بدري عندي شغل هناك
مها : بطلع ابدل ملابس (الله يسعدك يانوره انقذتيني)
بيت يزيد
يزيد: يالله حبيبتي كلميه
هند: بس يمكن ما يجي
يزيد: حاولي وشوفي
هند: بيد فيها رجفه خفيفه اتصلت ....وفتحت اسبيكر وجلست جنبه على نفس الكنب ..سمعته فتح الخط مغصتها بطنها وبصوت هادي : الو..السلام عليكم
يوسف : بصوته الصارم : وعليكم السلام ..وينك فيه امس اتصل عليك ما تردين و جيت البيت الصبح بعد منتي موجوده
هند: تاشر له وش اقول
يزيد: يكلمها باذنها : قولي تعبانه
هند: كنت تعبانه وكنا بيت عمي
يوسف : جبتي الفلوس الي طلبتها
هند: وهي تناظر يزيد وهي خايفه من صوته : ايه تعال الحين خذهم يزيد مهو فيه..يزيد شافها متوتره حط يده على كتفها
يوسف: كم الفلوس الي عندك
يزيد: يأشر لها عشره
هند:عشره الاف
يوسف : زين الحين اكون عندك وقفل السماعه
يزيد:بفرح : حلو خلاص مثل ما خبرتك
هند: تمسك بيده : خايفه ايصير شي منت حاسب حسابه
يزيد: لا تخافين روحي جهزي العصير وانا بكلم حمد
بعد ما كلم حمد جا عنده وبعد ثلث ساعه وصل يوسف
هند: تفضل ادخل
يوسف : وين الفلوس
هند: انتظر ادخل اجلس الحين اطلع اجيبهم
يوسف : يصرخ وهو بعده واقف عند الباب : وش عندك مهي معك روحي بسرعه
هند: بخوف : زين اجلس الحين اجيبها وتطلع مع الدرج
يزيد:كان واقف في موقف السياره ودخل ومعه حمد وفتح الباب : حياك حمد ادخل
يوسف : سمع صوتهم وقف...وجع والله لاذبحها مكلمته الحماره
يزيد : ويدخل الصاله وسوى عمره انه مانتبه له وينادي :هند ...ويلف ... هلا والله وينك يامعود لي فتره ما شفتك
يوسف : وهو مرتبك : هلا فيك ويسلم عليه
يزيد:و مقهور وهو شايفه قدامه وده يفصخ عقاله و يضربه ويضغط على يده وهو يسلم بقوه : وش علومك وش الزياره الحلوه
يوسف : رجع يصنع الهدوء : جينا نبارك لكم بالبيت الجديد
يزيد: وهو مقهور منه زياده ايا الكذاب لو مهو اختك كان نحرتك الحين : الله يبارك فيك
هند: حست براحه يوم شافت يزيد دخل : هلا يزيد متي وصلت
يزيد:توني سوى القهوه والشاهي عندي حمد تعال يوسف نروح المجلس
يوسف : (يطالع هند سويتيها يا هندوه والله لاذبحك أكيد مكلمته ): لا انا جيت ابارك لكم بروح مواعد واحد الحين
يزيد: مواعد واحد ولا تبي السم الي تاخذه : اول مره تزورني فبيتي الجديد وما تبي تتقهوى لا مهقيتها منك يالنسيب
هند: ايه يوسف خليك انا بعدين ابيك و تاشر له بالظرف الي مخبيته معها
يوسف : زين بس ما راح اطول
يزيد: ويسحبه مع يده : امش من زمان ما جلسنا معك هند بسرعه وش عندك واقفه روحي سويلنا القهوه
هند: طيب تعال خذ العصير معك
يزيد: جهزيه الحين اجيك وراح مع يوسف
حمد: هلا عاش من شافك وينك فيه
يوسف : عاشت ايامك موجودين بهـ الدنيا
يزيد: وش رايكم نتصل على الربع يجتمعون معنا اليوم
حمد: ايه احسن انت من عرست معد سهرت معنا
يوسف : بضحكه : هو احد يشوفه كل الي بالاستراحه يسألون عنه..شكل اختي ماخذه عقله
يزيد:بلاك ماتدري عن الجوهره الي اعطيتني هي : ياخي عن الحسد انت وهو اعرسوا وفكوني.. ويوقف... خلني اروح اجيب القهوه ويدخل ....هاه سويتي الي قلتلك
هند: لا خذ هذا العصير
يزيد : من وش خايفه هاتي اشوف
هند: حبيبي انتبه
يزيد: لا تخافين راح اعطيك خبر قبل ما اخرج ويدخل المجلس ويوزع العصير وبعد ما شربوه
يوسف : انا استاذن منك
يزيد: على وين اجلس
يوسف : لا تعبان بروح ارتاح راسي مصدع..بس ياليت تنادي اختى ابيها قبل اروح
يزيد: لا خليك وين تبي تروح اذا تعبان فيه غرف فاضيه عندنا
يوسف : يجلس وهو دايخ
حمد: يوسف ارتاح (ويمسكه ويخليه يتكي على الكنب ويكلم يزيد) وش بتسوي الحين
يزيد: الحين اجيك بروح اجيب الاوراق من فوق ونوديه
حمد: لا تتاخر
يزيد: دخل الصاله : هند جيبي الاوراق
هند: خذ شوفها معي ودمعت عينها
يزيد: يبوس راسها : ياعمري لا تخافين عليه
هند: الله يخليك خلهم يحطون بالهم عليه
يزيد : لا تشيلين هم انتبهي لنفسك يمكن اتاخر شوي
هند: لا تخاف توها ام شهد مكلمه بتجي بيتها بروح عندها
يزيد: زين خليها ترسل لك الشغاله مابيك تخرجين لوحدك حتى لو كنا بحوش واحد
هند: طيب بكلمها
يزيد : سلام توصين بشي
هند: تبوسه سلامتك يالغالي الله يحفظك لي انتبه وانت تسوق
يزيد: يبوس راسها وخرج يالله حمد شيله معي
حمد: راح يستقبلونه الحين
يزيد: ايه ما قلت لك انا متفق مع الدكتور وهو الي اعطاني المنوم
وخرج وحطه بالسياره وراح المستشفي الامل وخلص كل الاوراق والإجراءات للدخول
الفصل الخامس عشر
بيت ابو محمد:
غرفة مي
يوم الاربعاء هذا غير عن بقية الايام إله نكه خاصه عند كل الطلاب والموظفين…مي ما تحب تضيعه في النوم تستغل كل دقيقه فيه عشان تسوي الاشياء الي ما تفضي لها ايام الاسبوع صحيت من النوم قبل المغرب وكعادتها لازم كوب الكوفي بعد ما تصحى من النوم تطلبة من الخدامه …وهي جالسه على السرير وجهازها امامها و تفتح في المنتديات الي تدخلها وتشيك عليها و تتصفحها على السريع دخلت صفحتها المخصصه الي تعتبرها كنز بالنسبه لها وعالمها الخاص بما تحتويه من هموم وماسي تدمع لها العين و ينفطر لها القلب اطلعت عليها و جمعتها على صفحة الورد حتى تستطيع الرد عليها بتمعن و هي تنقل احدهما اخذت تقراءه وهي مصدومه مما تقرأ وتردد بداخلها حسبي الله ونعم الوكل.. الحمد لله على النعمه الي انا فيها و قفلت الصفحه وهي بالصفحه الرئيسيه لفت انتباهها موضوع ( ضني ادخلني النار ) ودخلت تشوفه
( حُسن الظن )
قال ابن القيم رحمه الله ولا ريب أن حسن الظن بالله إنما يكون مع الإحسان، فإن المحسن حسن الظن بربه، أنه يجازيه على إحسانه، ولا يخلف وعده، ويقبل توبته، وأما المسيء المصر على الكبائر والظلم والمخالفات فإن وحشة المعاصي والظلم والحرام تمنعه من حسن الظن بربه، وهذا موجود في الشاهد فإن العبد الآبق المسيء الخارج عن طاعة سيده لا يحسن الظن به، ولا يجامع وحشة الإساءة إحسان الظن أبداً، فإن المسيء مستوحش بقدر إساءته، وأحسن الناس ظناً بربه أطوعهم له. كما قال الحسن البصري: ( إن المؤمن أحسن الظن بربه فأحسن العمل، وأن الفاجر أساء الظن بربه فأساء العمل )
وكيف يكون محسن الظن بربه من هو شارد عنه، حال مرتحل في مساخطه وما يغضبه، متعرض للعنته، قد هان حقه وأمره عليه فأضاعه، وهان نهيه عليه فارتكبه وأصر عليه، وكيف يحسن الظن بربه من بارزه بالمحاربة، وعادى أولياءه، ووالى أعداءه، وجحد صفات له، وأساء الظن بما وصف به نفسه ووصفه به رسوله صلى الله عليه وسلم وظن بجهله أن ظاهر ذلك ضلال وكفر.
قال رسول الله صلى الله عليه وسلم : ( إياكم والظن فإنه أكذب الحديث ) البخاري ومسلم
عن أبي هريرة رضي الله عنه قال: قال رسول الله صلى الله عليه وسلم ( حسن الظن من حسن العبادة ) أحمد وأبو داود .
ومن حسن ضن العبد بربه ...حسن ضنه بمن حوله واحاديثهم و مواقف الناس وتبريره لكل ما يحدث من حوله ..
مي تنهدت ...يالله وش كثر احنا مقصرين بمور ديننا ونرتكب الخطأ ...و جاء على بالها الموقف الي صار اليوم امامها مع البنات وحده مرت من عندهم و صاحباتها علقوا عليها انها تعاكس الجوال ما ينزل من اذنها ابد كل ما شافوها وهي تكلم ..وتلوم عمرها يالله يمكن يكونون ظلموا البنت ليه ما فكروا انها ممكن يصادف مرورها دايم واحد داق عليها من اهلها ولا صديقاتها ولا يمكن زوجها اذا مزوجه..وارعبها الباب الي اندق بسرعه وتفتح
منى : بصوت هادي ولا على قد دقها وفتحها للباب : سلام ..ضنيتك نايمه متى صحيتي..؟؟
مي: وعليكم السلام ..ابي اعرف انتي متى تبين تبطلين رجتك هذى يعني لو كنت نايمه كان وقفتي قلبي
منى: وهي تضحك : سلامة قلبك حرم سعد تبينه يجيني بالمنقله والفرجال يطير رسي (سعد مدرس رياضيات ومي بعد تخصص رياضيات )
مي: وجها حمر ومن النوع الي تخجل بس من يطرون اسمه : وجع انكتمي ..وتضيعها من الموضوع لانها تعرفها اذا بدت ما تسكت ....غريبه حضرتك صاحيه المغرب ما بعد اذن
منى: تجلس عندها :يالله بعديها لك بمزاجي هذى المره ... ما جاني نوم ولو نمت ما راح اصحى وبتعصب على امي لانها تبينا نصلي المغرب و روح لجدتي فوزه (ام امهم الله يرحمها )
مي : يوه نسيت بقوم البس وترخي لوحة الشاشه بس ما قفلتها ..انتى وش عندك ما لبستي ..؟
منى: عليها قميص ازرق بكم قصير لنص الساق : جهزت لبسي شوي اقوم البس ترى يمكن خالاتي يكونوا فيه كلهم اليوم اربعاء..بس قلت لأمي ما نبي نطول ابي ارجع انام..
مي : وليه من زمان ما جتمعنا جمعه كبيره عند جدتي كل مره نشوف وحده منهم
منى: امي سمعتها تقول لأبوي تبي تجمعهم كلهم على العشاء الاسبوع الجاي ...انتي وش عندك شكلك كنتى تقرين قصه شي اكيد عشان كذا ما خرجتي من غرفتك
مي : تبعد جهازها عنها لانها تعرفها ملقوفه ماتخلي شي : لا يستي القصص الي اقراها ما بعد نزل لها بارت بس ادخل اشيك ما حصل الف ادور أي شي يسليني ..تعرفين اني توني قراءة موضوع عن حسن الضن و الله انا مره مقصرين بامور ديننا شوفي انتي وشلون ضنيتي في ابد ما نفكر بالضن الحسن قبل السيئ
منى: وهي توقف يؤؤؤه لا تعطيني محاضره الحين خليها اذا ردينا بس انا ما قلت شي من عندي انتي مثلي ما تجلسين تسنترين عند جهازك الا اذا تقرين قصه ..و ما خلتها ترد ..سلاااام ..وراحت على غرفتها
مي: الله يهديك ياشيخه ويهديني معك ...ويدق جوالها وتسمع الصوت بعيد ..وتقوم بسرعه تاخذه من شنطتها الي على التسريحه وبتسمت من يوم شافت اسمه ....ياهلاااا والله أمطرت وازهرت الرياض وهلها بسماع حسك
محمد: انشرح صدره بترحيبها : يا هلا فيك وبكل غاليك ...السلام عليكم
مي: وعليكم السلام..وش اعلومك وينك امس ما كلمت احد
محمد: يتنهد بداخله : بخير الله يسلمك بس كنت مشغول انتم وش اخباركم
مي: الحمد لله الكل بخير ..وبتردد ..محمد حاسه فيك شي .. وبقلق..ملاك فيها شي
محمد: الحمد لله بخير مافينا غير العافيه ...
مي : وتشبك السماعه باذنها وتمشط شعرها بالفرشه : هي كيفها معك ..مدري احساسي يقول انك بالشرق وهي بالغرب صح ولا انا غلطانه
محمد: وهو حاس انها جات على الجرح : لا عاد مهو لهذى الدرجه
مي : حلو ..يعني متفاهمين مع بعض ..محمد تبي الصدق حاسه انك متورط معها ولا تقول لا لاني عارفه طبع كل واحد فيكم
محمد: ويوقف بسيارته على جنب ويناظر بساعته بعد فضلها ثلث ساعه و تخرج وبصوت هادي بس فيه نبرت التوتر : مي هي طبعا عنيده و ما تسمع الكلام..مع الكل ولا شلون ؟؟
مي : كانت عند الدولاب تاخذ لها ملابس سكرت الدولاب وهي تبتسم وحطتها على السرير: لا هي مهي عنيده لهذا الحد وجلست على كرسي التسريحه ..بس الي اتوقعه ياشاطر انك ما سويت مثل ما قلت لك
محمد: خير وش الي قلتيه ؟؟
مي: انك ما ترفع صوتك وانت تتكلم معها ..وحضرتك شكلك جايب العيد معها ..وهي ضنك تصارخ عليها ..وتعاندك
محمد: يكلم عمره ..يوه هي خلتني اكلمها مثل العالم ماغير ترفع ضغطي بكل مره وتخليني اعصب عليها : لا عادي كلامي معها بس لاحضت انها عنيده ...بس تعالي هي وش الاشياء الي تحبها اكثر شي
مي : من أي ناحيه
محمد: يلعب في القلم بين ايديه : اكثر شي تحبه
مي: سؤالك يحير هي فيه اشياء كثيره تحبها ..اكل ولا ..ورد ..ولا كتب ..ولا ايه..حدد عشان اعرف اقول ..انت تبي تاخذ لها هديه يعني
محمد: وخطرت على باله الفكره : ايه وش اخذ لها
مي : وهي تضحك : قصدك ورد
محمد: وهو يحرك السياره : ايه
مي : اصحك تاخذ ورد هي صح تعشقه بس ماتحب تشوفه مقطوف لانها ماتحبه يذبل ويموت
محمد: يوووه منها هذى المدلعه : زين وش الورد الي تحبه
مي : الزنبق و التوليب..
محمد : يبتسم على زهورها الي تحبها خطيره البنت مهي هينه بزهورها ( التوليب ...معناها : التصريح بالحب ....والزنبق معناها : قمة الجمال ) :زين وش الالوان الي تحبها اكثر شي
مي : وهي تضحك تعرف عشقه للورد : كل الالوان ما عندها لون محدد فيها
محمد : وهو يقرب من محل زهور قريب من الجامعه : اوكي ..وسكت
مي : هههههه وينك اسمع ...كلمها بهدوء عندها احسن من مية ورده...اسمع الحين مشغوله شوي نبي نروح عند جدتي فوزه..وتحط الجل على شعرها وتقلب شعرها على قدام عشان تنكشه لانه ناعم ولونه كستناي وطول ظهرها
محمد: انشرح صدره يوم سمع اسم جدته : ياحبني لها سلمي لي عليها وحبي راسها ويديها عني وعلى الكل ...يالله توصين شي
مي : سلامتك بس دير بالك على ملاك وتحملها الشي مايجي بالغصب ولا بين يوم وليله
محمد: ابشري يالغاليه سلاااام ...ويرح ياخذ الورد وعطه عنوان البيت وراح لها لانه اليوم معاقبها بعد ما ترح بسيارتها
:::: * ::::
في الجامعه:
شذى : تمشي هي وملاك ولها ربع ساعه خارجه من المحاضره وتتكلم معها وهذى ولا كان احد يكلمها معطيتها طناش : نجوي وصمخ لين متى بضلين ساكته ...
ملاك: تلف تواجها و هي بتموت من التظاهر بالصلابه ومن داخلها تبكي: شو بدك قول ...انتي يعني تضنيني مجنونه عشان صدق ان الي ارسلها بابا ..ارتاحي حبيبتي اولا هذا مش اسلوب بابا في الكتابه .
شذى:طيب حلو بس انتي وش صاير فيك ..منتى مرتاحه معه ولا كيف ؟؟
ملاك: شذو انتي بتعرفي اني ما بيعجبني ..وانتي فاهمه شو قصدي ..هو كل شي بده يفرضه فرض وانا مستحيل اتقبله
شذى: انجي ..انتي زعلانه منه انه ما يبيك تسوقين ولا عن شي ثاني بعد غير انه بنظرك مغرور ...بس اذا عشان هذا الشي لا تعبين عمرك معروف يا عمري الرجل الخليجي و يحب يخدم زوجته و هو يلبيلها كل طلباتها بنفسه
ملاك: شذو انتي مش فاهمه هو كل همه انه ينفذ الي بده وبدون احد يقول كلمه..او يعارضه
شذى : لا انتي الحين حاكمه عليه كذا وهو ما جلستي معه و عرفتيه زين ...اول اجلسي معه وتكلمي وبعدين احكمي عليه ..ودق جوالها ومن النغمه عرفت انه فيصل متعوده بس يعطيها رنه ويقفل ..يالله هو متى راح يوصل هذا فصولي نبي نروح نتغداء برا وش ريك تجون معنا
ملاك:لا بالعافيه عليكي وهو عازمك بدك اجي معك حلوه هذى ..بس بجد من بكره بدي تكونوا معي في البيت على الغداء والعشاء وخليه بعد يكلم العيال اذا بده يكلهم
شذى : تخزها بعينها : يالطيف منك هذا كله عشان ما تجلسين مع رجالك...وبعدين فصولي وشله يعزمهم ...وتغمز لها وتضحك ...عندك حمودك خبريه
ملاك: بترجي وجها محمر : تكفين شذو كلميه ..وكملت بحزن يفطر الي يسمعه ..بدي كون مثل اول لما بابا فيه البيت مفتوح للكل ...واذا ما بدكم تجوا انا راح خلي السواق كل يوم يوصل الك الاكل على بيتك بدل ما تتعبي و تطبخي ..و بتريقه ..لاني اعرفك شلون شاطره بالطبخ وتبتسم
شذى : شوفي اذا علي عادي ما تفرق معي يوم السعد عندي اني ما ادخل المطبخ بس اشاور فيصل وارد عليك ...يالله هذا هو وصل ..شافت السياره ..سلام اتصلي بمحمد لا ياتاخر عليك ولا تبينا انتظرك لين يوصل
ملاك : روحي هو ما راح يتاخر احنا خرجنا قبل اليوم ..و بستها و راحت عنها ..و ما كملت ثواني الا تشوفه جاي ..و طلعت بالسياره وبدون ما تناظره ..السلام عليكم
محمد: وعليكم السلام ..تاخرت عليك ..وهو يشوفها كيف صاده وجها عنه
ملاك: بهدوء..وبدون نفس :لا
محمد: يبي يفتح معها أي حوار ومهو عارف كيف وحرك بسيارته ونادها بهدوء: ملاك
ملاك : تفتح شنطتها وتاخذ منها منديل معطر : نعم..بدون ما تناظره وتمسح يدها
محمد: عصب ويكلم نفسه انت وش فيك شاب ضوء البنت ردت عليك خلاص مهو معقول من يوم تشوفها تظهر شياطينك وتعوذ : الله ينعم بحالك بنت خالد ...اي مطعم تبين تتغدين فيه
ملاك: بتسمت بداخلها مسكين بيقلد خويه بكل شي : الغداء بالبيت جاهز هلآ
محمد: يلتفت عليها : بس انا ماابي من البيت و بتجين معي
ملاك : لفت عليه ولقيتها فرصه : بروح بس بشرط
محمد: ابتسم و نزل نظارته ونظرته كلها حب : امري انتي بس
ملاك: وترها كلامه ما تحب نبرة الغزل من الشباب تخاف منها و كش جسمها وهى ما تناظر فيه وتتكلم بسرعه خايفه يعصب عليها :تخبر فيصل والعيال الغداء والعشاء عندنا في البيت كل يوم
محمد:اول شي نصدم من طلبها وبعد كذا صار يضحك بصوت عالي ودمعت عيونه من ضحكه وبصوت له رنه غريبه :كل هذا عشان ما تقابلين وجهي على الاكل
ملاك: قلبها يرجف خوف من نبرت صوته الي كلها غزل وماردت عليه
محمد: ابشري بخبرهم اوامر ثانيه ...يمسح عيونه بمنديل و يلبس نظارته
ملاك: شبكت يدها في بعض : لا
محمد: زين الحين وين تبين
ملاك :أي مكان بس نص ساعه وبدي كون في البيت عندي دراسه كثير
محمد: اذا تحتاجي مساعده خبريني
ملاك: شكرا...وفضلت الصمت لانه اليوم موترها بصوته الي له رنه غريبه عليها
محمد: مد يده وشغل المسجل كست بصوت ابو نوره
::: * :::
في السياره
ام عامر رايحه على السوق تبي تاخذ لها شي تكشخ فيه في الجمعه الي مسويتها يوم الخميس وتكلم السواق : هيه انت اسمع ..
السواق : امر عمتي
ام عامر : الحين بعد ما تنزلني بالسوق ابيك تروح عند الشركه وتشوف يزيد وين ساكن فيه وتجيب لي عنوان شقته
السواق : خاف ويكلم نفسه لا انتي يزعل مو مشكل بس انا هذا يزيد يذبحني لو يمشي وراه : بس ..
ام عامر: تصرخ فيه : لابس ولا غيره ياويلك بعد ساعه لو ما جبت لي عنوانه
السواق : بخوف : طيب
::: * :::
بيت الجده فوزه
عندها سبعه عيال (اربع بنات و ثلاثه عيال ) كلهم كبار وام محمد كانت اوسط عيالها...الكل مجتمع عندها بغرفة المخصصه لجمعتهم ارضيتها موكيت و الجلسه ارضي والجده متصدره بمكانها المعتاد بصدر الغرفه والكل حولها و ترامس القهوه موزعه عند كل مجموعه ترمس الي بالهيل والي بالزنجبيل والي بالزعفران كل حسب ذوقه بشربها
ام احمد جايبه معها صواني حلى بسبوسه وكنافه وفته بالسمن والتمر بحافظة الاكل ومقربتها من ام فايز( الجده فوزه)
ام احمد: تكلم ام فايز بصوت واطي واكل من حولها يسولف واصواتهم مرتفعه : خالتي بغيت اخبرك عن شي هو ما بعد صار
ام فايز:حرمه كبيره بالسن جسمها ممتلي و صحتها على قدها ونظرها سته على سته ..عايشه في بيتها لوحدها بنفس الحوش مع ولدها الكبير بس هي عشان بناتها اذا جوها يجلسون عندها في البيت وتحب ام احمد كنها بنتها: خير يا بنيتي وش عندك
ام احمد: ابو محمد بلغني اخبرك منى جاينها خطاب وهي ما بعد ردت موافقتها عليهم
ام فايز وهي تلف تناظرها : عرب نعرفهم و انا امك
ام احمد: لا خالتي ما نعرفهم بس و لدهم مع محمد وهو يعرفه زين
ام فايز : والله خاطري وانا امك تكون لواحد من عويلتنا و ما تخرج برا مثل اختها وابوها وش قال موافق عليهم
ام محمد: ايه موافق عليه لانه محمد مدحه والولد النعم فيه واهله بعد جلست معهم والنعم فيهم
ام فايز : بس خاطري تكون لبدر ولد فايز ولا طلال ..انتي خيري ابوها اني ابيها لوحد منهم العيال ما تكلموا لانهم عارفين انكم ما تعطون البنت الحين ...
منى: نطت وجلست عندهم وش عندهم المزيونات يتساسرون ...
ام فايز : سكتت و تضحك عليها لان ام احمد خانقتها..وحطتها فبالها ماتبيها تروح عن عيالها
ام احمد: انتي متى بتعقلين يعني الواحد ما يعرف يقول كلمة راس غير خشيتي خشتك فيها
منى : وهي تنسدح وتحط راسها على رجل امها من الجهه الثانيه عن جدتها : يازينها عاد من كلمة راس بين العجايز شوي و بتخبروني بها لاني العجوز الثالثه معكم قالتها وهي تضحك
ام فايز : عجز حيلك من بنيه قومي عن امك لا تكسرين رجيلاتها هي مهي بناقصه
منى: جدتي وش فيك علي اليوم ولا عشان بنيتك المزيونه ام طلولك ما هي بجايه
الجده : تمد عليها عصاتها : احشمي يالي السانك يطول اذونك طلال تاج راسك
منى: وهي تضحك ورجعت على ورا : ول جدتي انتي ليش شابه ضوء خلاص بس نجيبلك سيرة طلول تشبين علينا و الله انا تاج راسه هل شايب ولد بنتك
الجده: شاب راسك وعجز حيلك اذا بتشيبين ولدي يالمقويه
منى: هههههه عصبت عجيزنا
ام احمد : تقرصها : احشمي جدتك لا رويك شغلك
منى: ايييي ..وتتثاوب ...امي متى تبين نروح البيت خلاص ترى انتهاء اشتراكي وبديت افصل
ام احمد: تمسح على شعرها : قلت لك نامي شوي الظهر ما رضيتي وش تبيني اسوي بعدها ما جات تسعه وتبينا نمشي
مشاعل ومي جالسين يسولفون على جنب وهي اصغر من مي بسنه
مشاعل: وش فيها اختك رايحه دور حضن امها
مي : تلف تشوف منى وهي منسدحه : ما نامت الظهر
على بعد مسافه بسيطه منهم البنات الي بسن المتوسط بنات فايز وفلاح ..سديم بنت فلاح تقلب بالقنوات وحطت على المسلسل التركي وترفع الصوت
الجده : تصرخ عليها سديم وصمخ يالي ما تستحين شيلي عن هـ الفاصخين الي ماعندهم لاحشمه ولا دين
سديم : بدلع : جدتي كلها شوي وتنتهي المسلسل
ام سديم : سديم غيري ولا رحتى البيت شوفيها
مي : بهدوء وصوت واطي : خالتي اسمحيلي الله يهديك وش تشوف فيها ترها مهي بزينه للي بسنها
سديم: وش فيها لشفتها عادي وش الي مهو بزين الحين شفيهم الكل يتابعها (سديم ثانيه متوسط)
مي: سديم حبيبتي انتي شايفه هم يتكلمون عن الاسلام وهم ما يطبقونه..
مشاعل : الحين انتي وش الي عاجبك فيها
ام سديم : الله يهديها ما في مسلسل تركي ما تبعته (ام سديم على نيتها وماتحب تقول لا لهم)
منى:تقلد صوت جدتها : ايه هم اذا طبوا بشي يمسكون فيه لين يغثون العرب منه..اول مكسيكييني (مكسيكي ) ..وبعده لبناني ...والحين تركي
سديم : هذى الي تبي تنام ابي اعرف بس وش الي ما يعجبكم فيها..انا اشوفها مسلسل عادي مثلها مثل غيرها
مي : لا حبيبتي المسلسل فيها اشياء محرمه وانتم ...صايره عندكم عادي الحين تشوفين الوحده حامل من فلان وعادي عندكم وتقولونها بكل بساطه حامل من فلان مهي مرته ...حبيبتي هذا حرام اسمه زنا والعياذ بالله والحين صايرين يجاهرون فيه بكل المسلسلات فهمتي علي ..يعني لو ستمر الانسان يشوف الحرام بيتعود عليه كيف لو كان الي يتابعه طفل صغير كيف راح يتغير تفكيره وجا على بالها الي قرته اليوم
سديم : زين خلاص بغير القناه ..بس صدق مي وش تبينا نتفرج اذا التلفزيون كله كذا
مي : لامهو كله فيه تقدرين انتي تشوفين الي يفيدك
دخلو عليهم البنات الصغار
اسيل سنه ثالث بتدائي اخت سديم
اسيل : سديم حطي على ابله نوره جات على دبي بسرعه
مشاعل : هاه عندك اختك شوفيها ترضين تابع معك الي تشوفينه
سديم : لا هي ما تشوفها وحطت لهم على المسلسل الي يبونها
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك