رواية خليجيات في الامارات -51
ضاري : وأنا اش دراني ..!
شوق : يلا عسا ان تكرهو شيئا وهو خير لكم
ضاري : وبعدين بيني وبينج أحسن يرجعون
شوق : اي والله مب قادره أعيييش بدون نور
ضاري ابتسم : مب على سالفة جذي .. بس أنا ابي نرجع دبي واقدم أوراقي
شوق ابتسمت وقالت : اي صح يا حييك هـ السنه أول سنه لك
ضاري ابتسم : شفتي كيف ..!
شوق : وين ناوي تكمل
ضاري : مافي جامعه محدده حسب ربعي
شوق ابتسمت : حلو .. وشو ناوي تكمل
ضاري : والله حاط ببالي هندسه بس ما يصير أنا أدبي
شوق ابتسمت له : اي يالذكي اشلون تدش هندسه وبعدين ياما قلنا لك علمي بس ما طعت .. تحمل الحين يوم انك مب قادر تدخل هـ التخصص
ضاري : بس جرافيك هم حلو وعاجبني
شوق : يلا ان شالله خير ..
ضاري : آمييين بس مستحيل ادش بزنس وما شابه
شوق : اي انصحك الصراحه لأن ابوي بيدخلك معاه الشغل غصب
ضاري ضحك : مو هذا اللي قاهرني
شوق يا على بالها براك وقالت : صح براك اش دارس ..؟
ضاري : أعتقد هندسه
شوق : بس حرام يتشغل في المعرض مع عمي يعني لو يروح يفتح له مكتب صغير أحسن له
ضاري : انزين هو يشتغل الصبح ويداوم العصر عند عمي
شوق : آهااا يعني هو يشتغل بعد ..!
ضاري : اي شو قالو لج عنه
شوق : حلو ..!
ضاري وقف : يلا باي بطلع
شوق : لأأأأأأأأ تعال بقعد معاك شوي
ضاري : مستعيل
شوق أفأفت وهي تقول : والله حــــآله ..!
ضاري ابتسم : مآلت .. انتن البنات ما عندكن شغله غير الحجي
شوق مدت بوزها : من زينكم انتو عآد ...!!
/
.
/
بدور : لا حرااام عليج
أريج وهي تضحك : شو حرام علي .. المفروض الحين تزورينا تولهنا عليج
بدور ابتسمت : عآد انتو تعالو زوروني مو كله أنا ازوركم
اريج : لأأأ هذاك اول الحين تزورينا
بدور : انشالله بكلم معضد
اريج ابتسمت : شو الأخبار ..؟
بدور : وين الله يخليج .. خلينا الحين بموضوعنا قولي لخالو هذا هو الطقم
اريج : أوووكي .. كلمت روان ..؟
بدور : شخبارها ..؟
اريج تنهدت : شقول لج عنها ... الله يهديها بس
بدور : خير اش صاير
اريج : سالفة طويله وعريضه وبعدين انتي تعرفينها ..
بدور طالعت اريج وقالت : خلاااص عاد بس نلتقي مره ثانيه نتكلم
اريج ابتسمت : ان شالله .. يلا عاد الحين انا بروح
بدور : تو الناس
اريج : شسوي والله توني خلصت وبعدين هلكت
بدور : شـ قالو ..؟
اريج : قالو لي راجعينا بعد اسبوع
بدور : ان شاء لله يقبلونج
اريج : آميين يارب
بدور : لا تحاتين بيقبلونج ان شاء الله
اريج : آمييين .. يلا عاد الحين انا استئذن .. مع السلامه
بدور : مع السلامه حبيبتي
اريج مشت مع بدور الين وصلن لـ باب الحوي
اريج قبل لا تطلع : مب تقطعين
بدور ابتسمت : زين .. سلمي على خالو وايد
اريج : ان شاء الله يلا مع السلامه
بدور : مع السلامه
بعد ما طلعت اريج .. بدور سمعت صوت سيارة معضد بس مشت عشان تدخل داخل مالها خلق تسولف معاااه النفسيه روحها عدم وغير تسولف معاه عز الله دخلت بنوبة بكا ما بتطلع منها
قبل لا تدخل لباب الصاله سمعت صوت وقف الدم بعروقها وهي يقول بهيبه : السلام عليكم
بدور بدون لا تلف : وعليكم السلام
ودخلت الصاله بسرررعه وهي ودها تروح للحجره ركض بس عشان ما تسمع صوته
صعدت ع الدري وهي تمشي بسررررعه وميته قهر ليييش وصل هـ الحزه بالذااات يعني ما يقدر يتأخر ولو شوي الين ما وصلت لـ حجرتها ورمت روحها ع السرير وهي تتنهد
بس ما كملت دقايق على هـ الحال الا ومعضد داخل
فزعت بدور وعدلت بقعدتها بسرررعه وعدلت الشيله
معضد وقف وهو ساند ع الباب ومعاه سويج سيارته
بدور ما تكلمت وهي مرتبكه .. وفي خاطرها .. يالله اش يبي هذا واقف جذي ومحرج
معضد عقد حياته وهو يقول : ممكن أفهم شاللي سويتيه ..؟
بدور بدت تفرك بيدها وما ردت عليه
معضد بجديه أكثر : قلت لج ممكن أفهم شالتصرف هذا ..؟؟
بدور وقفت مرتبكه وقالت : اش سويت أنا ..؟
معضد : يعني ما تعرفين اش سويتي ..؟؟
بدور تنفست بصعوبه وقالت بصوت مرتجف وخايف بنفس الوقت : لأأأأ ما أعرف
قطع عليهم صوت حمدان وهو يركض من بعيد : بـــــــــــــــــــابا حبيبي ...........
معضد لف له وحمدان حضن ابوووه بقوووه وقال : وين كنت ..؟
معضد نزل لمستوى حمدان وقال : في الدوام حبيبي
حمدان حضن ابوووه وكأنه يقول له لا تتركني
معضد ابتسم : ليييش شو تبا حبيبي
حمدان : أباااك تلاعبني
معضد بنفس اسلوب حمدان : بلاعبك حبيبي بس انت سير الحين
حمدان رص ع يد ابوووه : لأأأ مابي
معضد ابتسم له : خلاااص حبيبي بدور بتيي معاك وانا بتسبح وبنزل لك عقب اوووكي
حمدان هز راسه وقال : خلاااص بقعد اهني مع ماماتي
معضد ابتسم له لأنه الياهل من لقط شي ما ينساه وقال : شطووور
حمدان تقدم من بدور وقال : يلا بدور نلعب
بدور وبعدها ترتجف وخايفه
معضد ما قال شي غير : نص ساعه واشوفج في الحجره عندي
بدور هزت راسها وهي تحس انها اصغر عياله : ان شالله
/
.
دخلت نور وهي تلعب بأصابعها ومرتبكه ومعصبه بنفس الوقت
عبدالعزيز من شافها وقف وتقدم عنها .. نور ابتعدت وهي تقول : نعم ..؟؟
عبدالعزيز : نور اقعدي
نور طالعته وقالت : قول اش تبي ما ودي أقعد
عبدالعزيز : أوووكي بس ممكن نتفاهم شوي
نور وهي معصبه : قلت لك اش تبي ..؟
عبدالعزيز مسك يدها بقوه ورص عليها : نور انتي اش فيج ...؟؟
نور امتلت عيونها دموع وقالت : ابي ارجع الكويت
عبدالعزيز : وليييش ..؟؟
نور : بس ما عجبتني القعده هنا يعني غصب أقعد
عبدالعزيز : هي غصب
نور علت صوتها وهي تصيح : لأأأأ ماهو بغصب أقعد .. وبعدين انا أقعد بالمكان اللي أنا ارتاح فيه
عبدالعزيز مسك ويهها : نور اش فيج قولي لي
نور : قلت لك ما فيني شي وبعدين ابيك ترجعني ما فيها شي يعني لو رجعت مع البنات
عبدالعزيز : أحد قال لج شي ..؟؟
نور : لأأأ بس أبي ارجع وبعدين اذا انت ناوي تلعب علي دخيلك اتركني بحالي ... أنا ما فيني اتحمل كثر اللي تحملته
عبدالعزيز : نور انتي شو تقولين ..؟
نور طالعته وهي تصيح : عبدالعزيز اذا انت ما تبيني تأكد أنا ما بزعل بالعكس بقدر موقفك لأنك من البدايه تركتني بحالي
عبدالعزيز رص ع يد نور وقال بعصبيه : بس عااااد انتي شكلج صدق تخبلتي ... اش لون مابيج وانتي مرتي
نور وهي تصيح : مرتك ها مرتك ...؟؟؟ واللي متزوج يسوي سواتك ..؟؟
عبدالعزيز : فهميني ع الأقل انزين .. اش سويت ..؟؟ أحد قااايل لج شي غلط عني ..؟؟
نور مشت بسرررعه وهي ما فيها تقعد ولا ثانيه أكثر معاااه لأنها بركان وبينفجر
عبدالعزيز ضرب الباب بيده بقووووه وهو معصب : استغفر الله .. هذي اش فيها تخبلت وقامت تقول كلام مب مفهوم
/
.
/
روان تصيح : مروان أكلمك رد علي ...!
مروان وهو يقرا الجريده : استغفر الله العلي العظيم .. خير اش تبين ..؟؟
روان : مروااان اسمعني انزين واترك اللي بيدك
مروان رما الجريده وقال : نعم ..؟؟
روان : انت ليييش تعاملني جذي .. ترا والله أنا انسانه
مروان طالعها باستحقار وقال : بس هذا اللي تبينه ..؟
روان : ع بالك هذا شويه
مروان رفع الجريده وبدا يكمل قرايه
روان احترت وتقدمت منه وسحبت الجريده : مروااااااااااان
مروان وقف بعصبيه وقال : اش فيج انتي تخبلتي
روان قعدت عند ريوله وقالت وهي تترجاه : مرواااان اسمعني انزين
مروان عقد حياته وقال : خيييرررر
روان : مروان افهمني دخيلك والله مالي دخل بكل اللي صار والله
مروان قال وهو يروح للكبت : أنا بطلع بغير جو أحسن من جو الحجره هذي
روان مسحت دموعها : قول لي اش تبيني اسوي واسوي لك والله
مروان : تسكتين وتصكرين على هـ السالفه
روان : مرواااان انت ليييش مب راضي تفهمني
مروان عصب وقال : لأنج ما رضيتي تصونين نفسج
روان توها بتتكلم الا ومروان طلع من الحجره ...
تقدمت روان عن السرير وهي تصيح ..
يالله أنا اش سويت عشان مروان يعاملني جذي .. والله كل شي غصب عني ... حتى اليوم اللي تفارقنا أنا وانت كان غصب عني .. ما يطلع شي بيدي مروااان دخيلك ارحمني وافهمني ...
/
.
/
ملاك : لأأأأ حرااام عليك
راشد : شو حراام علي ملاك لاازم نيره
ملاك : انزين بس شوي شوي عليه
راشد : المهم يرد مثل أول
ملاك : هي أكيييد
راشد : ان شاء الله حطي ببالج هـ الأسبوع بيصير أوكي جان مب هذا الياي بإذن الله
ملاك : آمييين
راشد ابتسم : وبعرس عقب
ملاك : المهم ميود يرد شرات أول
راشد : آمييين
ملاك : يالله راشد ما تدري أحس عمري بصير اسعد انسانه يوم اخوي يرد شرات أول
راشد ابتسم : وأنا بصير اسعد انسان عشاني بعرس
ملاك ضحكت : هههه هذا اللي يهمك وبس
راشد : أكيييد وبعدين عمرج سمعتي بواحد مالج وتعيس
ملاك ابتسمت : لأأأ
راشد : هذاا أنا ... والله اسمع كل ربعي مستانسين مع حريمهم ايام الملجه الا أنا المسكين متوهق
ملاك بزعل : رشووود حرام عليك
راشد ابتسم : أمزح انزين
ملاك : وبعدين أخوووي مريض كيف تباني استانس واطلع واخوي بـ هالحال
راشد : ولا يهمج ان شالله ميود يرد شرات اول
ملاك : آمييين وما يظلم أحد ولا يخصه بـ أحد والله يبعد عيال الحرام والشر عنه
راشد : آمييين
ملاك : انت ومنو بتودونه ومن وين بتشلونه
راشد : هو لازم من الشركه لأن بيساعدوني الشباب
ملاك : هي من البيت ما يصير أم دويس عندنا وبعدين من الشركه دير بالك عن حد من الموظفين يحس
راشد : لأأ لأأ وهو طالع للباركنات
ملاك : ياربي ......... والله اني ادعي من كل قلبي انه يصير أوووكي
راشد ابتسم : يلا عاد ملاكي انا بصكر عندي مناوبه اليوم
ملاك : يالله ويا دوام هـ الشفتات
راشد ابتسم : يوم تداومين بتعرفين
ملاك : أوووكي ههههه ... يلا مع السلامه
راشد : مع السلامه
/
.
/
بدور دقت الباب ودخلت الحجره وهي خايفه لفت ويهها للجهه الثانيه شافت معضد واقف
معضد اشر لها تدخل وتقدم عن الباب وصكره
بدور خافت وابتعدت هي روحها مرتاعه منه أول ما دخل البيت
معضد تقدم منها وقال : وين حمدان ..؟
بدور : تحت يطالع تلفزيون
معضد تقدم منها وقال : ليييش تسوين جذي ...؟
بدور حست بنفسه الساخن وقالت وهي مرتبكه : اش سويت أنا ...!!
معضد مسك ويهها : مره ثانيه لما أزقرج وانا داخل ما تسفهيني
بدور : بس أنا متى سفهتك ...؟؟
معضد : وانا ازقرج اليوم
بدور خايفه : والله ما سمعتك
معضد : هـ المره بودرج بحالج بس المره اليايه نشوووف شو بيصير
بدور هزت راسها بخوووف : ان شالله ما تنعاد
معضد ابتسم لها وقال : هي اباج جذي تسمعين الرمسه
بدور زاد خوفها معضد بحنانه وعصبيته وبكل حالاته يخوف ...
بدت تطالعه بنظرة طفل خايف .. شوي وتموت صيآح من الخوف ..
معضد : انزلي تحت وطلعي لي عشا بتعشى معاج ومع حمدان
بدور تحاول تبتعد مب قادره ...
معضد ابتسم أكثر
بدور قالت وهي ترتجف : انزين ممكن توخر شوي بطلع ..؟
معضد ابتعد عنها وقال : قولي لـ حمدان اييني بعطيه شي
بدور : ان شالله
طلعت بدور من الحجره وهي مرتبكه وخايفه ... وفي خاطرها .. الحمدلله انها عدت على جذي وما صار شي جايد بس أنا متى ما سمعته ... هو ما ناداني عشان اسمعه ... وبعدين قلت له مب قصدي .. بس الله يهديه معضد يحاول بأي طريقة يربكني ... ويعرف كيف يربكني ..
شافت حمدان تحت وقالت : حمداني روح فوووق حبيبي ..
حمدان : ليييش ..؟
بدور : باباتك يباك يلا شاااطر روح له
حمدان مشى وهو يبتسم ومستانس لأنه بيروووح لأأأبوه ويلعب معاه
/
.
/
بعد مرور اربعة أيآم .. الخميس
شوق تطالع نور : تريقتي ..؟
نور هزت راسها : لأأ مالي نفس
شوق ابتسمت : تصدقين عآد والله استانست يوم دريت انكم بتردون
نور ابتسمت بتعب : اي وأنا بعد ما استحملت فراقك
شوق تضحك : عليه هـ الكلام ...؟؟!!
نور بتعب : تدرين قبل أمس يوم ردينا كنت هلكانه وأمس ما مداني استريح
شوق ابتسمت : خلاااص اليوم مرتاحه أكيييد
نور : بعد فيني ارهاق وتعب
شوق : يلا ان شاء الله الا هم يومين وثلاث وتردين شرات أول
نور : ياريت
شوق ضحكت : نواري والله صايره عيوووز
نور : حرااام عليك والله من التعب ما فيني اسوي أي شي
شوق : يلا مسامحه هـ المره المره اليايه لما تردين تيبين لي كل ألمانيا معاج
نور ابتسمت : هذا لو رحت
شوق تربعت وقالت بسرررعه : اي صح اش صار ولييش رديتي ..؟؟ ليكون عشان الأجنبيات
نور ابتسمت : لأأأأأأأأأأأ وين راح فكرك بس الصراحه ما عجبني الوضع هناك وملل
شوق : آفآآآآ لا تقوووووووولين
نور : والله
شوق : وعبدالعزيز ..؟؟ يعني معقوله تملين معاه
نور ابتسمت وهي من داخلها مقهوره : مو من كذا ..!! بس مدري أحس اهناك غير واهنا غير
شوق : اي الحمدلله بلادنا غيرررر
نور : حسستيني انك باعلان اسكتي دخيلك هههههه
شوق ابتسمت : يلا ننزل
نور : لأأأأ ما فيني تعبانه
شوق : نفطر انزين
نور : لاأأ مو مشتهيه
شوق : على راحتج
نور : تعالي خبريني اش صار ..؟؟
شوق عقدت حياتها : اش صار ..؟!!
نور : على الموضوع اللي قلتي بتكلميني عنه
شوق : اي توني تذكرت
نور مستغربه : طيب اش صار ...؟؟
شوق : الله يسلمج ذاك اليوم مره ثانيه شفت نواف وبراك مع بعض
نور مستغربه : صح انتي ليييش ما سافرتي معانا صدق ...!!
شوق : والله أمي كلمتني وعاد أنا حسيت عمري كارهه حياتي
نور : طول عمرك هبله
شوق ابتسمت : ما علينا المهم ومحتاره الصراحه أوافق على براك ولا لأأأأ
نور : فكري ..؟؟
شوق : مشكلتي فكرت ..!! وما شفت غير نواف الصراحه يناسبني
نور : أجل ارفضيه
شوق : وهو أخوووه يعني بخسر الاثنين سوا
نور : اتوكلي على ربك
شوق : نور انتي من عايلتنا افهميني ع الأقل وتعرفين كيف تفكيرنا
نور : أدررري أدررري بس عاد ما في شي غصب وبعدين لو اثنين تخانقو ما يدخلو الكل بالجريمه
شوق : أنا وانتي ندري بس أبوووي وعمي من يفهمهم
نور : الصراحه ما أدررري بس حرااام يعني يفرقو اثنين والسبب أحد غيرهم
شوق : محتاره الصراحه بس قبل لا نرجع الامارات بقول لهم رايي
نور : شو بيكون ..؟؟
شوق : مبدئيا رافضه وموافقه بس الموافقه الصراحه غالبه يعني احتمال أوافق
نور : فكري زين ترا هذي حياتك اللي بتعيشيها طول عمرك
شوق : اي ان شاء الله
.................... فجأه انفتح الباب بقووووه ودخلت فجر ...........!!
فجر : مرحبـــــــــــــــــــــــــآ بكم يا أهل المنزل المسكون
شوق متخرعه : وجــــــــــــــــــــــــع ان شا الله خرعتيني
فجر ابتسمت وهي تدور : وشحالكووووووووم ............؟؟؟
نور عاقده حياتها : اقوووول انتي ما علموك الأدب ...!!!
فجر ابتسمت وهي تغمز لها : لا يـ حلو انته ...؟؟؟
نور : والله قلت افتكيت منك بعد ما رجعنا من المانيا جيتي طلعتي لي اهني
فجر ابتسمت : حرااام عليج نوراااني
نور ابتسمت : امزح معك يالدبه
فجر تطالع شوق : شخبارج يالعيوووز ..؟؟
شوق عقدت حياتها : عيوووز في عينج
فجر : والله عيوووز ولا في أحد يرفض سفره ..............!!
شوق : عداال عآد .. ندري انج حتى طلعه لبيت الييران ما ترفضينها
فجر ابتسمت : مو مثلج ويه فقر ارفض سفررره بكبرها
شوق : فجووور عصووور ظهووور اسكتي ولا بطلعج برع
فجر ابتسمت وهي متخصره وبدت تتكلم بغنج : فجووور عصووور ظهووور بعينج شوكه ...!!! وبعدين ياللي ما تستحين انتي مع أخوووج هذا ضاري ...!!! ليييش تقولون لي جذي اسمي فوفو ... يعني فجووور
نور مبطله حلجها وفيها الضحكه خلاااص بتنقع ضحك
شوق : فوفو عبدو مب أحسن هههه
فجر : صج ما تستحين ..!!
شوق ابتسمت : لا والله انتي اللي ما تستحين يايه تسبينا في بيتنا
فجر : هذا بيت عمي قبل لا يكون بيتج يالدبه
شوق : دبه بعينج يالعصعوصه
فجر : شوق ترا والله أضربج
شوق : تعالي جآن فيج خير
فجر تمثل كالعاده : لا والله قالو لج تبين عمي يزعل وما ياخذني معاه الامارات وبعدين ما يخلوني اتزوج مزيون اماراتي
شوق اهني ماتت ضحك وقالت : اسكتي يالهبله ضاري ورااااج ..!!!
نور ميته ضحك لدرجه صارت حمرررررررررررره ..!!!
فجر احمرت من الفشله وطالعت ضاري ردت نزلت راسها ضاري تحرك وهو روحه مستحي من اسلوب بنت عمه .. أول مره يشوووف وحده بهالجرأه .. وفجر بعد ما تحرك ضاري تقدمت وبندت باب الحجرررررره بسرررررررعه
لفت شافت البنات يضحكون طالعتهم بنص عين : تضحكون علي ...؟؟
نور ميته ضحك : أجل على مين ...؟؟
فجر محمره ومعصبه وفجأه بدت تضحك : هههههههههههههههههههههه
شوق ابتسمت : يالهبله والله انج فضيحه
فجر وهي تضحك : هو سمعني أنا مالي خص
شوق : بياخذ عنج فكررره يالهبله
فجر : على كيفه ..!! مب ميته عليه
نور : والله انك هبله
فجر : وينها هذي الهبله أختكم ...؟؟
شوق : تشوفينها بدارها
فجر : لا عآد ماني طالعه ما فيني ضاري يسحبني من شعري ويطردني
نور : الحمدلله عرفتي لحالك هههههه
/
.
/
بدور وهي تطالع الدرب حمدان سألها وهو يالس ورا في النص
حمدان : خالو ..؟؟
بدور لفت وبصوت واطي مستحيه من معضد : نعم حمودي ..؟؟
حمدان : متى نوصل ..؟
بدور : مب باجي شي حبيبي خلاااص واصلين
حمدان : بنروح عند يديده هيييييييييييي
بدور ابتسمت وقالت : اقعد فديتك
حمدان يلس وقال : خلود تقول شرت لي لعبه
بدور : صج والله ..؟؟
حمدان : كبيررررررره
بدور : خلاااص بنشوفها اليوم
حمدان قعد يطالع الدرب
معضد شاف بدور وقال : خلج جاهزه احتمال كبيرر باجر بليل نرد
بدور مستغربه : بليل ..؟؟
معضد : هي لأن احتمال السبت بداوم
بدور : آهااا
معضد : مب أكيييد ثلاثين بالميه
بدور : لا ان شاء الله ما تتداوم متولهين على خالو نحن
معضد ابتسم وهو يطالع الدرب : حشا مب وله يخليج تدعين عليه
بدور مستغربه وفي خاطرها هذا اليوم شكله مزاجه أوكي هو من يومين صاير أوكي ليييش يا ترى ...؟؟ يمكن لأنه اليوم بنروح العين عساس جذي يبي يبين لأهله نحن أوكي ويوم نرد دبي بيرد شرات أول يعصب ويحرج على كل شي
معضد : بدووووووووووور
بدور انتبهت : هلأأأ
معضد : وينج أكلمج ..!
بدور : معاك
معضد : كلمي خلود وقولي لها اليوم العصر بنطلع
بدور : ان شالله
معضد : ولا أقول لأأأ بنطلع روحنا أحسن
بدور : حرااام خلود بروحها محد يطلعها
معضد : فيصل عندها
بدور : فيصل ولا يكلمها بعد
معضد مستغرب : اش دراج ...؟؟
بدور : فيصل أصلا اربع وعشرين ساعه برع يا في الدوام أو مع ربعه
معضد : خلاااص انزين كلميها
بدور : أوووكي
/
.
/
ملاك : يا الله متى ايي العصر
راشد ابتسم : ما عليج اليوم العصر بوديه ان شاء الله
ملاك : دخييييييييييلك راشد قد ما تقدر حاوووول دخيييييييييلك
راشد : ان شاء الله بحاااول
ملاك ابتسمت : والله ما أصدق ان اليوم ميووود بيرد شرااات أول
راشد : ان شاء الله شرات أول وأحسن بعد
ملاك : آمييين
راشد : حرمته وين ..؟؟
ملاك : اهني موجوده
راشد : آهااا ... الله يستر منها ومن اللي أمثالها
ملاك : كريهه قسم بالله
راشد ابتسم : يحق لج عآد ... أجلت موعد عرسج
ملاك بنص عين : والله مب أنا اللي مستعيله وبعدين انت اللي مستعيل يالطيب
راشد : انزين خلاااص كليتيني
ملاك : أبا اشوووفك
راشد ابتسم : مو يقولون قبل العرس ما يصير بأسبوع أشوووفج
ملاك : أدرري بس باجي ع العرس وايد
راشد : أووووللللللله وليييش ...؟؟
ملاك ابتسمت : تريا رشووود والله أنا غاديه صفرا وضعفانه وويهي شاحب
راشد ابتسم : عادي المهم انج ملاك
ملاك : لا صج والله تريا شوي حرااام علاما أرد شرات أول حلوووه جذي
راشد ضحك : ومنو قال لج انج حلوووه
ملاك ابتسمت : انت يالدب
راشد : خلاااص يلا باي حبيبتي بروووح بشووووف الدكاتره شوي
ملاك : أوكي مع السلامه ودير بالك ع عمرك
راشد : ان شاء الله وانتي بعد لا تحاتين
ملاك : أوكي
/
.
/
بليل الساعه 12
تقدمت روان عن مروان : مرواااان
مروان راقد : لااااااااا رد
روان هزته شوي : مروااااااااااان تتعشى ..؟؟
مروان : لا رد
روان تخرعت وقالت : مروااان حبيبي قوم اش فيك ...؟؟
مروان : حرك راسه شوي شوي وما رد عليها
روان مسكت راسه شافت حرارته مرتفعه تخرعت .... راحت صوووب الثلاجه وطلعت ثلج مع ماي بارد ويت صوبه بدت تحط له الكمادات
مروان بدا يون
روان مسكت ويهه : مرواااان ...؟؟
مروان تكلم بس ما فهمت عليه
وبدت روان تحط له كمادات وهي خايفه عليه وتقرا عليه بنفس الوقت
/
.
/
بدور : ما صار اليوم خلاااص باااجر بنطلع
خلود ابتسمت : هي انتو روحكم ييتو لنا اليوم هلكانين ما يصير بعد تطلعونا
يتبع >>>
بدور ابتسمت : باجر ان شاء الله نطلع
خلود : وينه حمداني ..؟؟ من عقب العشا ما شفته
بدور ابتسمت : راح ينام مع خالو
خلود : يالله هالولد حركات ..!!
بدور ابتسمت : شفتي كيييف ..؟؟
خلود : من الحين يقردن ماماتي
بدور ضحكت : عشان تيوزه بنت فيصل
خلود ضحكت : لا دخيييييييييلج ..!!
بدور تتثاوب : فيني رقاد تصدقين
خلود ابتسمت : مستويه حرمه البنيه
بدور : هي عيل شو تتحريني
خلود : أحيدج اول ترقدين كل البيت وتتفقدين احوال الرعيه وأخر وحده ترقدين
بدور ابتسمت : هذاك اول خلاااص
خلود : معضد بعده ماياااه تمي معاي بعد شوي
بدور : يمكن ياااه ..!
خلود : لاأأأ نحن من نص ساعه رقينا وبعدين هو ييي متأخر اعرفي هالشي ربعه في العين
بدور ابتسمت : خلاااص عاد خمس دقايق وبرد حجرتي
خلود : تدرين عاد نوروووه ووفاء امس يوني وعقب رحنا لبيت ربيعة وفاء
بدور : وناسه
خلود : هي وناسه يمعة بنات وجذي والله كشخه
بدور : ياريتني وياكم
خلود ابتسمت : انتو وين .............. طايحين في دبي حتى ما تيوون صوبنا
بدور : دوام معضد تدرين عاد
خلود : شكلج هلكتي فيج رقاد ههههه
بدور هزت راسها : اي والله فيني رقاااد بموووت خلااااص من التعب
خلود : يلا عاد تصبحين على خير
بدور وهي طالعه : وانتي من أهله
تقدمت بدور عن جناحهم وهي ميته رقااااااااد ...!! دخلت وسارت صوب التسريحه بدت تفتح شعرها عشان
ترقد
وهي قاعد تفتح شعرها شافت معضد ع السرير لفت متخرعه ومصدومه
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك