رواية خليجيات في الامارات -29
مايد : ما يخصني تشوفونها ولا ما تشوفونها ..! بخطبها يعني بخطبها
أمي فاطمه : يصير خير ان شاء الله
مايد وقف : يلا عاد بروح الشركه
أمي فاطمه : الله وياك
مايد : مع السلامه
أمي فاطمه وملاك : مع السلامه
بعد ما طلع مايد ملاك طالعت أمي فاطمه وقالت : امي ليكووون هذي ساحرتنه ..!
أمي فاطمه : شو هالكلام يا بنتي ..؟؟ وبعدين قال لج البنيه على نياتها
ملاك : مو بعيده تكون حيه من تحت تبن ...!
أمي فاطمه : انتي اذكري ربج وان شاء الله ما يصير الا كل خير
ملاك وهي توقف : ان شاء الله
أمي فاطمه : يلسي ..! توج ما كليتي شي ..؟؟
ملاك : بسني الحمدلله
أمي فاطمه تيود يدها وتيلسها : اكلي يلا ..
ملاك ابتسمت وقالت : ان شاء الله عمتيه ...
أمي فاطمه تضحك : الله يهديج
راشد وهو ياي : صباح الفل
ملاك تبتسم وتقول : صباح الجوري
أمي فاطمه : عاد أنا أقوم أبرك لي
راشد : له له أمنتج الله تقعدين
أمي فاطمه تيلس وتقول : بدو المصاروه ..!
راشد يتجدم وهو يضحك : السلام عليكم
أمي فاطمه وملاك : وعليكم السلام
راشد يقعد يمب ملاك .. ملاك تبتعد شوي راشد يضحك ويقول : أمي ترا حرمتي سيلانيه ..!
أمي فاطمه تضحك : الله يهديك لا ترمس ع بنيتيه ..!
راشد يتبسم ويقول : اشو دراني بعد ..! خوافه
ملاك تطالع أمي فاطمه وتقول : أمي مو صح ما أقعد يمبه الا يوم نتزوج ...!
راشد يضحك : جيه نحن الحين مب متزوجين ..!
ملاك تبتسم : لا فديتك يوم بتسوي هاك العرس اللي صار ولا استوى عقب ..
راشد ابتسم : عز الله فلست
ملاك : أوكي كل بسرررعه عسب توصلني الكليه
راشد : بغص انزين ...!
ملاك ابتسمت : عاد مب كله لقمه وحده قصدي اسرع
راشد : ان شاء الله عمتي .. تبين شي ثاني
ملاك : لا سلامتك ..!
راشد ابتسم وهو يطالع أمه وقال : بلاااج أمي مستانسه
أمي فاطمه : ميووود يقول يبا يتزوج
راشد استغرب : يتزوج ...!
أمي فاطمه : جيه ما قال لك ..
ملاك طالعت راشد بنظره .. راشد قال بسرررعه : هي قال لي هههه .. يلا عيل مبرووووك
أمي فاطمه : خل نشوووف البنيه وعقب نحكم
ملاك قالت وهي لاويه بوزها : اونه معزم الا يباها
راشد ابتسم وقال : خلو الريال على كيفه
أمي فاطمه : بنشوووفها أول
راشد وقف وقال : الحمدلله شبعت
أمي فاطمه : بالعافيه عليك ولدي
راشد : يلا ملاك
ملاك : أوكي بس البس عباتي
راشد : اترياج
ملاك صعدت .. أمي فاطمه وهي تطالع راشد : اقووول أمي شوووف هالبنيه ليكون لاعبه بعقل ميووود ..
روحي ما رمست يدام ملاك
راشد ابتسم : ملاك ما تطوفها هالسوالف أمي .. بنشوووف شو السالفه عقب
أمي فاطمه : هي تراني اباله وحده حشيمه
راشد ابتسم : ان شاء الله
ملاك نازله : يلا راشد .. خلصت
أمي فاطمه : يلا أمي ود حرمتك وروح الدوام وعقب بنرمس
راشد : فمان الله أمي
ملاك : مع السلامه أمي
أمي فاطمه تبتسم : الله يحفظكم وييسر أموركم
راشد فتح الباب ملاك طلعت مبتسمه .. راشد طلع وقال : يلا مشينا
ملاك وهي ماشيه : الجو بدا يحر
راشد : هي ترانا بشهر ثلاثه الحين الله يستر
ملاك : شكله الصيف وايد حر هالسنه
راشد وهو يشغل السياره : شو قلتي بتاخذين السياره ولا لاأ
ملاك : والله ما أدري بس قلت هي ان شاء الله
راشد : ان شاء الله
ملاك : راشد تعرف البنيه اللي يبارها مايد ..؟؟
راشد : لااا مارمسني عنها ولا مره
ملاك : والله أنا مستغربه منه
راشد : تبين الصراحه وأنا بعد .. أحسه ما قام يفكر صح
ملاك : ليكووون مسويه فيه شي هالنسره
راشد ابتسم : لا عاد مب لهالدرجه
ملاك : انت رمسه ورد لي خبر
راشد : أوكي
ملاك : هي صح أبا اروح يوم الخميس عشان أحجر فستان العرس
راشد ابتسم وهو يطالع ملاك .. ملاك نزلت راسها وقالت وهي تبتسم : طالع الشارع عن نموت بس
راشد : فال الله ولا فالج ههههه
ملاك : بس تبا رايي تريا ..! أقوول نأجل موعد العرس عشان سالفة ميود
راشد : بس العرس بعد شهرين يعني عادي ..!
ملاك : هي ان شاء الله وقتها نكون حلينا سالفة ميود
راشد : غريب أخوووج الصراحه
ملاك وهي تضحك : تربية أمك
راشد : ويا هالراااس أقووول فكري في الفستان أحسن لج هههههه
/
.
نور وهي تركب السياره ..
شوق طالعه وهي تتكلم من باب المطبخ
نور نزلت الجامه وهي تصرخ : بسررررعه شوووق
شوق : اي لحظـــــــــــــه يايه ماني شارده
نور ترفع الجامه : وجع شوووقوووه تتأخر كثير
شوق وهي تفتح باب السياره : هو اش فيج يا معوده من صباح الله خير معصبه
نور تضحك : انتي اللي متأخره
شوق : انزين انزين صار خير
نور : وانت راجو حرك بسررررررعه
راجو : ان شاء الله مدام
نور تطالع شوق : خلصتي الفايل اللي كلمتك عنه ..؟؟
شوق : اي وعطيته لأريج
نور : زين سويتي
شوق : اقول نور ..؟؟
نور : هلاأأ
شوق : أمس وأنا طالعه من المطبخ شفت شي غريب
نور : بسم الله الرحمن الرحيم .. شاللي شفتيه ...؟
شوق : عزوز كان يتكلم بالتلفون ويوم شافني ارتبك
نور تطرد الأفكار الشينه من راسها وتقول : الله يهديك يا شوق .. عبدالعزيز وين وسوالف المراهقه هذي
وين
شوق : تهقين جذي ..؟؟
نور : اي أكيييد وبعدين عزوز كبر ووراه مسؤوليات
شوق ابتسمت : ان شاء الله
نور تبتسم بسخريه : وش اللي ان شاء الله
شوق تضحك : قصدي يعني يتحمل مسؤولية عياله ومرته
نور : هبله أنتي ...........؟؟؟
شوق : هو اش فيج ..؟؟
نور : اشلون يتحملهم وهم ما جو بعدهم
شوق : يييون ان شاء الله يييون
نور : تبين الصراحه ما ودي تسكن معنا مرته ...!
شوق مستغربه : ليه ..؟؟
نور : تدرين عاد أنا بنت خالته واذا نطق بكلمه وكلمني بتاكله .. يعني أحسن يستقر لحاله لما أنا أطلع من
بيتكم
شوق تضحك : اي والله صجج لما تخطب له الوالده بخبرها
نور : اي وأنا بعد بكلمها عشان لا يصير بينهم مشاكل
شوق : بس تعرفين عزوز عاقل لا يمكن يروح على كلام مرته
نور : ويييييييييه يا كثر اللي قالو عنهم كذا وآخر شي طلعو سكان حريمهم
شوق : اي والله دنيا
نور : بس كذا ولا كذا بكره بيعرف ان أمه هي الصح وبعدين الأم اللي تتعب وتربي وآخر شي الزوجه تسحب الولد ..
شوق : اي والله هذا اللي صاير
نور : لا وأزيدك من الشعر بيت والسبب .. امك سوت لي جذي وخواتك اذبحوني من طولة لسانهم ووووو
شوق تضحك : أقوووول عسا بس ما نطلع جذي
نور تضحك : فال الله ولا فالك
شوق : نوار ..؟؟
نور : اش تبين ..؟؟
شوق : بعدني أفكر ببراك
نور : اوووف ما صااار تفكير هذا .. بسك .. ذبحتي هذا ( تأشر على راسها ) مسكين بيموت والسبب هالتفكير
شوق : شسوي لاااازم أفكر نواري
نور : أقووول شوق فكري بدارستك ترا واجد أحسن لك من التفكير بالخطبه والعرس
شوق : الله يهديج ما افكر لا بخطبة ولا بعرس أفكر بنواف اللي ما أدري اش موقفه
نور : بيحلها ربك ان شاء الله
شوق : الله يسمع منج
/
.
/
روان ابتسمت وهي تشوف مكالمه لم يرد عليها من فهد ..
روان : خل ألبس عباتي وأنا نازله بتصل فيه
روان وهي تلبس العبايه : والله انه طيب ومبين عليه ولد أصل وفصل .. ما أدري ليييش ظلمت ابوي في البدايه وقلت انه بيزوجني لواحد ما يحبني عشان فلوسه بس الظاهر ان تفكيري من البدايه كان غلط .. وأكبر غلط بحياتي كان مروان ....!
روان وهي نازله : آلو فهووود
فهد : السلام عليكم
روان : وعليكم السلام
فهد : اشلونج ..؟؟
روان : بخير الحمدلله انت اشلونك ..؟؟
فهد : والله تمام
روان : دوم يارب
فهد : وياج ... ها شـ تسوين ..؟؟
روان : والله ماكو بس الحين طالعه وبروح الجامعه
فهد : انتبهي لنفسج ودروسج ترا هذي آخر سنه
روان : ان شاء الله
فهد : تعبانه ..؟؟
روان : لأأأ
فهد : صوتج اش فيه
روان ياليت تدري بالحرقه اللي بقلبي يا فهد : مافيني شي .. بس توني صحيت من النوم وتجهزت تعرف عاد
فهد : اي اقووول ليكووون تعبانه هههه
روان : هههه لا لا .. فهد متى ناوي ترجع دبي ..!
فهد : خلال هالأسبوع ان شاء الله
روان : ان شاء الله
فهد : تدرين عاد قاعد أرتب أموري عشان أنقل وأعيش في دبي ..
روان : تيي بالسلامه يارب
فهد : ابوج وين ..؟؟
روان : والله ما أدري عنه بس من يوم قال انه بيروح مصر أعتقد انه راح مصر
فهد مستغرب : ما تدرين عن ابوج ..؟؟
روان ابتسمت : اي ترا سفراته كثيره عاد وين الحق أخزن بالموميري
فهد : ههههه اي انتي حدج الخليج
روان : اي والله هههههه
فهد : يلا عاد حبيبتي بخليج .. بروح بشوف شوية شغلات وأرتب أموري تدرين ياي عندكم
روان : تيي بالسلامه يارب
فهد : تبين شي من البحرين ..؟؟
روان : لا سلامتك فديتك
فهد : أكيييد ولا شي ولاشي
روان تضحك : لا أبا رهش وحلى من المحرق
فهد يضحك : ان شاء الله هههه
روان : في أمان الله
فهد : فمان الكريم
/
.
/
أريج نزلت تحت البنايه ..
أريج : وينها روان تأخرت ..
...... : تبين نوصلج ..!
اريج لفت وهي مبتسمه : لا شكرا ..!
محمد يضحك : اصلا منو قال اني بصير سواق لج ؟؟
أريج : انت تقول بوصلج
محمد : امزح انزين
اريج : اتريا رفيجتي
محمد : الحين بتوصل ان شاء الله
اريج : ان شاء الله
محمد : يلا مع السلامه
اريج وهي مبتسمه : مع السلامه
محمد يضحك : هذي وصلت ..!
اريج تلف وتطالع سيارة روان وتروح تركب : وينج ..................؟؟
روان : موجوده ههههههه
أريج : قصدي وينج تأخرتي ..؟؟ وأخرتينا
روان : كنت أكلم فهد من جذي تأخرت شوي
أريج تضحك : اي وأنا أقول شالسالفه
روان تضحك : استريحي بيي الأسبوع الياي
اريج : الله يستر عاد
روان : اي والله قولي الحين الله يستر مكالماات دوليه .. الله يستر الفاتوره كم بتيي
اريج : هو بيدفعها ..!
روان : وانتي الصاجه لييش أفكر ههههه
اريج : اقول قولي لـ بابو يسرع
روان تبوز : هذي ما تفهم ...!
/
.
/
بدور : لا سلامتك حبيبي
أحمد : يلا مع السلامه
بدور : مع السلامه
بدور وهي واقفه تنطر البنات ..
بدور : أوووف وينهم هذيل
ملاك : هذيل اهني .......!!
بدور تلف وهي تضحك : ههههههه انتي اهني وأنا أدور عليج
ملاك ابتسمت : لا هناك
بدور : زين ييتي ما بغيتو الصراحه .. احترقت وأنا ع الشمس
ملاك مبتسمه : رشووود وصلني
بدور : وشو الجديد يعني ...!
ملاك : انه وصلني
بدور : من يوم ملكتو وهو يوصلج هاهاهاي
ملاك بوزت : مالت عليج يالنزغه
بدور تضحك : اقووول صرتي لي شوق ..!
ملاك : ذكرنا القط اجالنا ينط
بدور : اي والله يايه وهي تنط
شوق تضحك : اش فيكم ..؟؟
ملاك : ماشي بس نرمس عنج ..!
شوق : شو تقولون ..؟؟
بدور : نقول متى بزوجونج ونفتك من شيفتج
شوق نزلت راسها بحزن : بدور لا تذكريني
بدور حطت يدها ع حلجها : والله آسفه ما أقصد
شوق : أدري فديتج
نور : وه السلام عليكم
البنات : وعليكم السلام
ملاك تضحك : اش فيج تعبانه
نور : والله يختي الشتا ما مداه يخلص الا والصيف دخل
ملاك تضحك : حظنا في الحياه جذي ..
بدور : اي والله حظنا ان نعيش بالمناطق الاستوائيه
شوق تضربها بخفه : اش استوائيته بعد انتي ..؟؟
بدور : نمزح انزييييين
نور : وينهم اريج وروان ..؟؟
ملاك : بعدهم ما وصلو
نور : انتي راشد وصلك ..؟؟
ملاك تبتسم : اي رشود فديته
شوق : استحي على وجهج يا بنيه ..!
ملاك تبتسم : ما قلت شي غلط انزين
بدور : ما يصح عندنا هالكلام يا بنيه
شوق تقرصها : قصدها عيب ذا الكلام يا بووونيه
ملاك تضحك : اقووول سكتي انتي وياها لا اييكم رشود ويخدركم
نور : اي اش صار ع الوظيفه
ملاك : الحمدلله تعين دكتور
بدور : يعني شالوه من انه يكون مساعد الدكتور
ملاك : هي الحمدلله
بدور : الحمدلله
ملاك : عاد نحن بنصير ممرضات عنده هههههه
نور : هذي الدبه مع العصعوصه وصلت ..!
ملاك تبتسم : الحمدلله
شوق : يا هلا ومسهلا بالزين كله
بدور تقرصها : لا لا يقول هلا بالطش والرش والماي المبرد بالغرش ..!
ملاك : اسكتي انتي وياها حتى ع الكلام يتضاربون
روان : السلام عليكم
البنات : وعليكم السلام
اريج : اش فيكم ..؟؟؟
شوق : هذي بدور الهبله ..!
بدور : لا والله هذي انتي
ملاك : خليكم من هذيل الحين ..!
نور : اي والله هههه ... شخباركم ..؟؟
اريج وروان : الحمدلله
ملاك : روان اش حاله فهد ..؟؟
روان : بخير الحمدلله ... بييي هالأسبوع ان شاء الله
ملاك : ان شاء الله
اريج ابتسمت : عشان جذي عقلها طاير
بدور : عن اذنكم شوي ....!
نور مسكت بدور بقوه .. بدور مستغربه : اش فيج ..؟؟
نور : أقووول بدور اقعدي هنا ولا تتحركي ..
بدور مستغربه : اش فيج ...!
نور : ما فيني شي بس اقعدي
بدور قعدت : كاني قعدت ..! اش فيج ..؟
نور : حرااام اللي تسوينه
بدور : شـ سوي أنا عشان تقولين جذي
نور : لا والله يعني ما تدرين
ملاك : نور كلميها بروحها يمكن تنحرج اهني ..!
نور : لا بكلمها قدامكم ما تنحرج وبعدين حنا خوات نبي مصلحة بعض
بدور تأفأف : يعني اش تبون مني .. بعد هالمحاضره ..!
نور : اقطعي علاقتك مع هذا اللي تكلميه
بدور : اوووف يا نووور وانا أكلم منو يعني ..؟؟
نور : هذا أحمد مدري اش اسمه
بدور : أحمد بيخطبني انزين ..!
نور : لا والله .. والدليل
بدور : وعدني ..!
نور : هه هذا وأنا اقول اني العاقله فينا .. وبعدين انتي توك شفتي اش صار بـ روان من بعد سالفة مروان
بدور : انتو ما تدرون مروان شنهي ظروفه ..!
نور : افرضي انه صادق أوكي ....! ما علينا .. بس انتي المفروض تستحين على وجهك هلك طرشوك
تدرسين ما تكلمين أحد ..!
بدور : أدري بس أحمد بيخطبني ليييش ما تفهمون
نور : بدور حبيبتي لو صار شي أخوانك بيذبحونك غير كذا حساب ربك عسير
بدور نزلت راسها وقالت : أحاول أقول له يخطبني بسرررعه
نور : واذا ما رضى الحين اعرفي انه لعاب
بدور : ان شاء الله أكلمه ونشوف ..!
ملاك : هي على طاري هالسالفه ..!
روان : خير اش صاير ..؟؟
ملاك : مايد يبي يخطب
اريج : هذي الساعه المباركه
ملاك بسخريه : اي مباركه الله يخليكم
اريج : اش صاير
ملاك : يبي يخطب له وحده هو متعرف عليها
نور : وبعدين ...؟؟
ملاك : معزم الا يبيها
نور : هي البنيه زينه ولا ..؟؟
ملاك : والله ما أدري شـ قول لج يا نور ..!
نور : ليييه اش صار ..؟؟
ملاك : ما نعرفها .. أحس لا هي من ثوبنا ولا نحن من ثوبها
شوق : قولي استغفر الله ..! وبعدين يمكن البنيه زينه
ملاك : ما اظن
أريج : انتي تفاءلي بالخير
ملاك : ان شاء الله تكون زينه وما ننصدم فيها مثل ما ننصدم بغيرها
نور : لييش اش صار ..!
ملاك : راشد قال بالسياره ان سعاد تزوجت ..
نور مستغربه : من ذي سعاد
بدور : هذي اللي لما رحنا بيت ملاك شفناها مره من زمان
نور : اي تذكرتها .. اش فيها ..؟؟
ملاك : راشد يقول تزوجت مع انها تدري ان مايد يبيها
نور : لا تظلمون البنيه يمكن ما كانت تدري لو هو صادق ولا لأأأ .. خبرك عاد شباب هاليومين ما ينعرف لهم
اريج : ولا بنات هاليومين
روان : اي والله ما عاد ينعرف الزين من الشين ..!
/
.
/
ملاك : والله ما عرفت
راشد : وانتي أمي
أمي فاطمه : مبين عليها زينه
ملاك : أخااف لا ننصدم بعدين
راشد : ان شاء الله تكون زينه
راشد : كلمتوهم ..!
ملاك : هي كلمناهم
راشد مستغرب : بهالسرعه ومن أول يوم رحتو
ملاك : مايد حالف ..! مدري اش فيه
راشد : الله يهديه استعيل
ملاك : عسا خير
راشد : وينه الحين ..! ما طلع من عندهم
ملاك : بيتفق مع عمها عن المهر وجذي ..! وبشوفون متى العرس أو الملجه
أمي فاطمه : أعتقد مايد قال ان بيملج ويعرس بيوم واحد
ملاك بقهر : أحسن .. نفتك من الصدعه
راشد طالع ملاك مستغرب وقال : اش فيج
ملاك تطالع بره : ما فيني شي
راشد بركن السياره وقال : أمي وصلنا
ملاك نزلت وفتحت باب أمي فاطمه ومسكت يدها ومشو
راشد : ملاك لا ترقدين ابااج في سالفه
ملاك : ان شاء الله
أمي فاطمه : شو يبا بج
ملاك : والله ما أدري الله يستر
أمي فاطمه : لما مايد ييي باركي له يا بنتي ترا مو زين اللي تسوينه
ملاك : ان شاء الله أمي
أمي فاطمه : تدرين عاد أخوج الوحيد وين يقدر يسحمل زعلج
ملاك ابتسمت وقالت : ان شاء الله أمي ببارك له وببوسه على راسه اش تبين أكثر
أمي فاطمه : الله يرضى عليج دنيا وأخره يا بنتي
ملاك : تبين شي ثاني أمي ..!
أمي فاطمه : لا سلامتج بروح برقد مب متعوده ع السهر
ملاك : تصبحين على خير أمي
أمي فاطمه : وانتي من أهله
ملاك صعدت لغرفتها وغيرت ملابسها لبست جلابيه .. ورفعت شعرها بطريقه مهمله وهي تطالع شكلها في المرايه ...
ملاك : شو أنا غبيه أطلع له جذي .. هذا وبعدنا ما عرسنا وأنا مهمله نفسي .. لااازم أكشخ عشان لا يمل مني .. بنات الشوارع وايد أحسن لي أحافظ عليه
رتبت شعرها وتعطرت اندق باب الحجره .. ملاك راحت وفتحت الباب ..
ملاك ابتسمت : هلا راشد
راشد : ممكن أدخل
ملاك : هي حياك
راشد دخل ملاك : تفضل
راشد يلس ع الكرسي وقال : ملاك ابااج في سالفه ..!
ملاك : خير ..؟؟
راشد : ملاااك اباا نقدم موعد العرس
ملاك مستغربه : راشد بس نحن ما اتفقنا على جذي
راشد : ملاااك انتي روحج شفتي أهل البنيه
ملاك نزلت راسها وقالت : هي ما ارتحت لهم
راشد : بكلم مايد
ملاك : ما ينفع
راشد : اكلمه قبل لا يطيح الفاس بالراس
ملاك : بس ياراااشد ...........؟؟؟
راشد : اللي فيها فيها بكلمه ..
ملاك : برايك ويكون أحسن جان بيشل البنيه من باله
راشد : مايد تغير وايد
ملاك : وايد بعد
راشد : عشان جذي أقول لج نتزوج ونستقر بروحنا وناخذ أمي .. ما فينا على حشرة حرمته يوم يتزوج
ملاك بقهر : لا والله ما بخليها تسرح وتمرح على كيفها في هالبيت
راشد : ملاك ابعدي عن الشر ..!
ملاك : راشد أنا أحب مايد وايد وما ودي أخسر أخوي والسبب حرمته
راشد : يصير خير ان شاء الله
ملاك بدت دموعها تهل .. راحت قعدت عند ريل راشد وقالت : راشد والله لولاك ما أدري اش سوينا أنا وأمي
راشد مسح على شعرها وقال : ملاك حبيبتي قومي واغسلي ويهج .. مو زين اللي تسوينه وبعدين مايد بعده مثل ما هو مايد ما صار فيه شي
ملاك : بس تغير علينا وايد
راشد ابتسم وقال : بيرد شرات أول وأكثر بعد ان شاء الله
ملاك : الله يسمع منك
راشد : يقولون البنيه دارسه بره
ملاك : لا ودارسه بره بعد ..! أكييييد لاعبه في عقل أخوي عدل
راشد : اذكري ربج ملاك .. يمكن طلعت زينه
ملاك : الله يسمع منك
راشد : بروح برقد
ملاك : نوم العوافي
راشد : ما بداوم باجر
ملاك مستغربه : خير فيك شي ..! تعبان ..؟
راشد : لا بس اليوم هلكت وغير جذي سهران
ملاك : عاد بروح بروحي للكليه
راشد : سوقي عدل وشوي شوي مب تسرعين ..! واذا ما قدرتي قولي لعمران
ملاك : ان شاء الله
راشد ابتسم : يلا تصبحين على خير
ملاك : وانت من أهله
الأربعاء 20-10-2010, 10:25 pm
ღ الحلقه الثالثه و العشرونღ
يوم الخميس الساعه سبع المغرب
روان : يلا باي فديتج ..
ملاك : باي .. عاد لازم تحظرين
روان : من عيوني والله
ملاك : تسلم لي عيونج هههه
روان : هههه يالدبه باي .. كا فهود وصل
ملاك : باي
روان ابتسمت وهي تطالع فهد ياي
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك