رواية ياروح الروح حبك فرضته -25
عوار الطلق زاد على لجين وماقدرت تتحمل اكثر خذت تليفونها ودقت على مريم الانها بالغرفه الثانيه
مريم:اممممم
لجين:مريوم عفيه تعالي بسرعه
مريم فزت:لجون شفيج
لجين:عوار مو طبيعي
مريم:باي باي
ودخلت عليها الغرفه
مريم وهيا مخترعه:لجون شفيج
لجين:مادري عوار قوي ماني قادره اتحرك
مريم :ليكون ولاده
لجين وهيا تتألم :شكله جذي مريوم دقي على طلال بسرعه
مريم :الحين الحين ...ودق على طلال كله مغلق
ودقت بيتهم وعلى امها وابوها محد يشيل
مريم متدودها ومو عارفه شتسويي:لجون محد يرد قومي اوديج الطبيب
لجين:لامابي اخاف يصير شي لازم احد كبير معانا ...مريوم عفيه دقي مره ثانيه تعبت ماني قادره اتحمل
مريم وهيا مرتبكه ادق على امها:واي محد يرد
لجين:دقي على دلال اي احد بسرعه
مريم اتدق على دلال وزيد:مايردون
لجين:مريوم جنطة المستشفى مازهبتها عفيه حطيلي ملابس وحق بنتي جم لبس
مريم برتباك:الحين انادي آني اتزهبها وانا ادق عليهم
مريم ضلت نص ساعه ادق على كل اهلهم بس محد رد عليها ....لجين وصلت حدها ماكانت قادره تتحمل...خذت تليفونها ودقت على عبدالله الانه ماكان جدامها حل ثاني
عبدالله كان نايم وشاله على طول بدون مايشوف منو الي داق ...بصوت ناعس:الوووو
لجين:عبدالله الحق علي
عبدالله وهوا نايم:منو انتي
لجين:عبدالله قوم انا تعبانه حدي وطلال مو موجود
عبدالله فز من الفراش:لجون شفيج
لجين تبجي:عوار ماني قادره اتحمل عفيه ابسرعه تعال
عبدالله :كاني ياي ياي بس انتي لاتتحركين من مكانج
لجين تبجي:عبدالله لا تتأخر قاعده اموت بمكاني
عبدالله وهوا يركض على السلم بيطلع من البيت:حياتي لاتبجين كاني والله الحين اطلع ثواني واكون عندج
عبدالرحمن شاف عبدالله نازل وهوا يركض:عبدالله شفيك
عبدالله:يبا لجين بتولد وماكو احد عندها
عبدالرحمن:اي اميره وطلال ليلحين ماوصلو....روح وشوف شيصير معاك وقولي انا اقعد امك والحقكم
عبدالله:اوكي يبه ادعولها ...وراح بسرعه
بيت طلال
لجين كانت تفرك بمكانها من الالم
مريم برتباك:طلال ليلحين جهازه مغلق...وعبدالله وينه ليش تأخر جذي
لجين وهيا تتألم:مادري دقي عليه
ونطق جرس البيت
مريم:آني روحي بسرعه بطلي الباب
آني:اوكي
آني راحت تحت وفتحت الباب
عبدالله:وين لجين
آني:فوق في غرفه
عبدالله راح فوق وهوا يركض....دخل الغرفه وشافها منسدحه على الفراش وكانت تتلوا من العوار .
مريم:الحمدالله انك وصلت
عبدالله:لجون من متى العورا زاد عليج
لجين:من ساعه ونص
عبدالله:يعني ماكو وقت مريم يبي اغراضها ولحقيني بسرعه ...شال لجين ونزل بسرعه
بسياره
عبدالله كان منوم الكشن الي يمه ...عشان اتكون منسدحه
اركبو السياره وبأقصى سرعه مشى
عبدالله مسك تليفونه ودق على عمار
عمار:الوووو
عبدالله:عمار انت وينك
عمار:بالبيت
عبدالله:عمار دق على د.افنان وقولها اتزهب غرفت الولاده لجين بتولد وماكو وقت
عمار:اوكي الحين ادق عليها ....والله يسهل عليها انشالله
عبدالله:آمين...شوف شيصير معاك وعطني خبر بسرعه
عمار: انشالله
لجين كانت تبجي من الالم ...عبدالله ماتحمل يشوفها جذي مسك ايده وضغط عليها حيل
عبدالله:حبيتي شوي ونوصل تحملي شوي
مريم:اي لجون عفيه لاتولدين بسياره
عبدالله:مريم دقيتي على امج
مريم:دقيت ماترد
عبدالله:دقي مره ثانيه
مريم:ماكو الا خالتي عبير...ودقت عليها
عبير:الووو
مريم:خالتي انا مريم
عبير :مريوم شفيج داقه هل حزه
مريم:لجون فيها ولاده
عبير تقاطعها:وانتو وينكم الحين
مريم:عبدالله مودينا المستشفى...خالتي روحي بيتنا وقولي حق امي الاني ادق عليها ماتشيل
عبير:وطلال وينه
مريم:طالع مع مرته
عبير بعصبيه:وهذا وقته شلون يخليها ويطلع ..خلاص انا الحين اروح بيتكم آخذ امج وايي
عبدالله وصل المستشفى ....وبسرعه شال لجين ودخل داخل المستشفى ..اول مادخل شاف السسترات ودكاتره كانو بستقباله ناطرينه يوصل
د.هدى:د.عبدالله حطها على الويل جير واحنا نوديها الولاده انت روح سولها اجرائات الدخول
عبدالله:لا يبولي الاوراق بغرفت الولاده ...بسرعه
وبسرعه ودوها غرفت الولاده ...لبسوها الابس الاخضر
وحطو عليها الاجهزه ...والكمام
د.افنان:د.عبدالله ...ممكن اشوي تنطر بره علما افحصها
عبدالله كان قاعد عند راسها وهز ريله بقوه:ماراح اطلع وفحصيها شنو يعني
د.افنان :اوكي...لجين اخذي نفس عميق
لجين خذت نفس عميق وخدرت من الكمام شوي بس كانت ليلحين تحس بالالم
د.افنان:اتحسين انج خدرتي شوي
لجين اتهز راسها(اي)
د.أفنان:اوكي اخذي نفس عميق مره ثانيه الاني بفحصج
لجين خذت نفس عميق ومن افحصتها صرخت من قمت راسها
عبدالله بصوت عالي:شوي شوي عليها
د.أفنان وهيا تبتسم:د.عبدالله شي طبيعي بتحس بالالم
عبدالله:عطيها ابرة ظهر مابيها تحس بشي
د.أفنان:الحين مانقدر اهيا 6سانتي
عبدالله :مابيها تحس ابشي
د.أفنان:لا عيل انت لازم تنطر بره لين تولد
مريم:دكتوره باقيلها وايد
د.أفنان:اشالله ساعتين بالكثر حبيبتي نطري بره مو زين وايد على راسها
مريم:انشالله
د.افنان:سستر انتي حاطه جهاز النبض حق البيبي
السستر :اي
د.افنان:ليش ماأسمع دقات القلب...الجهاز فيه شي
السستر راحت اتحرك الجهاز :مافي شي
د.أفنان :يبولي جهاز السونار بسرعه
السستر الثانيه يابت جهاز السونار ..ودكتوره قامت اتسويلها سونار ...وكانت الصدمه
عند طلال واميره
طلال اول ماطلع من السينما بطل جهازه...وبعد ثواني وصله 20 مسج كل واحد ور الثاني
اميره:والله شنو هذا
طلال:هذي مريم ولجين وعبدالله داقين...الله يستر
اميره:دق بسرعه
طلال دق على لجين :الووو
مريم:هلا طلال
طلال وهوه مخترع:شفيكم
مريم:احنه بالمستشفى لجون بغرفت الولاده
طلال بصراخ:شنو من متى
مريم:صارلنا ربع ساعه وعبدالله الي يابنا
طلال:خلال انا الحين ياي باي
مريم :باي
بغرفت الولاده
د.أفنان:د.عبدالله ممكن تتفضل معاي بره شوي
عبدالله:ماقدر اخليها بروحا
د.أفنان:شوي ماراح انطول
وطلعو بره الغرفه
عبدالله :خير قولي
د.أفنان:والله مادري شقولك دكتور
عبدالله:لجين فيها شي
افنان:لا بس البيبي...الحبل السري منفصل عن المشيمه من زمان
عبدالله :بنتي ميته صح
افنان:للاسف .
عبدالله ودمعته بعينه:حتى آخر امل كان بنسبه لي راح
طلال وصل المستشفى وراحو صوب غرف الولاده شاف عبدالله واقف مع الدكتوره
طلال:عبدالله وين لجون
عبدالله يطالعه ودموعه بعينه:بغرفت الولاده
طلال لمن شاف الدموع بعين عبدالله خترع :لجون فيها شي
د.أفنان:لا مافيها الا العافيه بس البيبي عطاكم عمره
مريم اسمعت وشهقت :لا مستحيل ..
طلال اخذ نفس عميق:لجون درت
عبدالله:لا
طلال:يصير اشوفها
د.أفنان:اي تفضل معاي
عبدالله ضل واقف بمكانه من الصدمه
طلال دخل الغرفه .....شافها نايمه على الفراش والكمام عليها وشعرها مفلول والويه اصفر ....كانت اتون وتحرك براسها على المخده...شكلها كان يعور القلب حيل
راح صوب السرير وحط ايده على راسها وقام يمسح على شعرها ودمعته بعينه
لجين بطلت عينها وشافته وردت غمضت عينها ...وكانت تون
طلال قلبه كان يتقطع عليها:سلامتج من الاه يعله فيني مو فيج
لجين افتحت عينها ومتد ايها من الغطا...طلال مسك ايدها
طلال:يابعد عمري يليت اقدر اشيل الالم عنج
لجين بصوت تعبان:لاتخليني بروحي
طلال انزلت دمعته:اخلي الدنيا ولا اخليج
عبدالله دخل الغرف ووقف عندها:لجون حبيبتي ليلحين تعبانه
لجين:وايد
عبدالله:د.افنان مايصير جذي عطيها ابره مكست
د.افنان:د.عبدالله ماتوقعتك جذي...هذي ولاده ولازم تتعب ولا ليش الجنه تحت اقدام الامهات
عبدالله:بتتعب على الفاضي ...ونزلت دمعته
ودمعت طلال انزلت وراه
د.افنان:لا مايصير جذي لازم تطلعون بره لين تولد
طلال طلع واخذ عبدالله معاه
بهل وقت الكل كان موجود بره غرفت الولاده...ومريم واميره قالولهم انه البنت ماتت
الكل كان يواسي عبدالله بموت بنته...وعبدالله ساكت ومايرد عليهم ...وهما واقفين بره سمعو صراخ لجين من داخل الغرف
عبدالله مخترع:اشفيها تصارخ جذي
عبير:اضاهر قاعده تولد
عبدالله ماقدر يتحمل وراح الغرفه وفعلن لجين كانت تولد
د.افنان :د.عبدالله اطلع بره
عبدالله ماسمعها وراح قعد عند راسها ...كان معطيهم ظهره...وويها قبال ويه لجين...لجين اتصارخ وهوا يبجي ويمسح على راسها
عبدالله وهوا يبجي:افنان عفيه بسرعه خلصيها
د.أفنان:لجين ساعديني شوي
وليجن كانت مو عارفه تضغط وبس اتصارخ وتبجي :دكتوره رحميني خلاص بموت ....وتصارخ
عبدالله يبجي وصارخ:اقولج بسرعه
د.أفنا:لجين مايصير جذي ...سستر ضقطي على بطنها
لجين تصارخ من قمت راسها....لين اولدت
د.أفنان:الحمدالله على سلامتها
عبدالله :اولدت
افنان :اي
لجين من اولدت نامت على طول
عبدالله شال بنته ...ودموعه تنزل بغزاره:ياحلوه قومي انا بابا انا كنت ناطرج على نار ليش خليتيني ورحتي ..شقول حق امج الحين اقولها انها خسرت كل شي بحياتها...بطلي عينج ...مومعقول تنولدين وماأفرح فيج
بنت لجين وعبدالله كانت حلوه مثل امها ...بس للاسف كانت ميته ...عبدالله خذاها وطلعها بره وهوا يبجي والكل التم حوله ويبجون...بعد ربع ساعه ...عبدالله شاف الدكاتره ياين ركض
استشاري امراض قلب والثاني جراح كبير ومجموعه من استشارينا مراض النساء
السستر مبطله الباب:بسرعه بسرعه
ويدخلون غرفت لجين ركض
عبير:اشصاير
عبدالله دخل الغرفه بسرعه وبعد اشوي اسمعوا صراخ عبدالله من داخل الصراخ كان قوي الي هز المكان كله الكل وقف ابمكانه موقادرين يتحركون....اطلعو اثنين دكاتره ماسكين عبدالله وهوه يطارخ ويبجي
طلال راح صوبه:عبدالله شفيك لجين شفيها
عبدالله يبجي وطارخ:طلال لجين قاعده تموت قاعده تموت لجين بترووح مع بنتها لجين بتخليني بروحي ...آآآآآآآآآآخ كل شي راح كل شي ضاع
ويبجي
طلال من سمع الي قاله عبدالله ماتحمل الخبر طاح من طوله...لجين كل شي بنسبه له ...موبس بنت اخوه اهيا اخته ورفيجته وبنته وامه كل شي عاشت معاه ادق تفاصيل حياته ...شلون تروح وتخليه يكمل حياته بدونها
الصراخ علا بالمستشفى الكل يبجي طلال طايح بصوب وعبدالله دخلوه اقرب غرفه وعطوه مهدء...ولجين داخل غرفت العمليات بين الحيات والموت
نهاية البارت
البارت 42
الصراخ علا بالمستشفى الكل يبجي طلال طايح بصوب وعبدالله دخلوه اقرب غرفه وعطوه مهدء...ولجين داخل غرفة العمليات بين الحيات والموت
بعد ثلاث ساعات
الكل كان واقف عند باب غرفة العمليات الي يدعي والي يبجي...وطلال بغرفة الملاحظه أهوا وعبدالله..واميره وساره وعمار ودلال وزيد موجودين عندهم
طلال بطل عينه ورد سكرها
اميره:ماتشوف شر يالغالي
دلال وهيا تبجي :طلال خوفتنا عليك
طلال رد فتح عينه:لجون شلونها
زيد:ليلحينها بغرفة العمليات
طلال غمض عينه ونزلت دمعته:يارب اخذ عمري بس خلها تعيش
أميره :اسم الله عليك لا تقول جذي وانشالله لجون اتقوم بسلامه...وكل شي يرجع مثل الاول واحسن
دلال:طلال لاتقول جذي اذا انت صار فيك شي لجون بتتعذب اكثر لاتنسى انها متعلقه فيك وايد ..انشالله اتقوم بسلامه
ساره :عمار عفيه روح شوف شصار عليها والله قاعده اموت ابمكاني
عمار:انشالله
عند باب الغرفه
راشد كان قاعد يقرا قرآن وهوا يبجي ... صوته كان عذب ..وشيخه وعاليه قاعدين عنده يسمعون ويدعون...اما عبير كانت قاعده على الارض ومريم حاطه راسها بحظنها وتبجي كانو قاعدين عند باب غرفة العمليات وعبير .. مغطيه ويها وبس تبجي ...وسالم قاعد على اعصابه وكل اشوي يهدي عبير ويروح يطل على طلال...حنان كانت رايحه وراده بالممر تبجي بصوت عالي وعبدالرحمن يهدي فيها...
عمار كان ياي من بعيد حنان من شافته راحتله بسرعه
حنان:يمه ادخل وطمنا عليها طولو وايد
عمار :انشالله عمتي
وهوا رايح صوب غرفة العمليات الباب تبطل وطلع الدكتور وهوه مبتسم.....الكل راح عنده بسرعه
راشد بخوف:دكتور بشر
د.محمد:انت ابوها
راشد:لا انا عمها
د.محمد:والله مادري شقولكم ..الي صار اكبر من اني اسميه معجزه
عبير:لجون صار فيها شي
د.محمد:ماأجذب عليكم حالتها كانت خطره وايد بس الحمدالله... الله كتبلها عمر يديد بآخر لحظه...الحمدالله على سلامتها
الكلهم استانسو والبجي تحول لي يباب ودموع الفرح
راشد:مشكور وماتقصر والي تامر فيه انا تحت امرك
د.محمد:انا ماسويت الا والواجب...وين د.عبدالله خل ابشره
عبدالرحمن:والله ماندري عنه
عمار:بغرفة الملاحضه
د.محمد:بس محتاجين احد يتبرع لها بدم الانها فقدت نسبه كبيره من الدم فياليت اتروحون اتسون تحاليل ..بسرعه
الكل انشالله
عاليه:دكتور اهيا شنو صار معاها بضبط
د.محمد:انقطاع احد اشراين عندها أثناء الولاده وهذا ادا الي حدوث نزيف حاد بس الحمدالله الله كتبلها عمر يديد
عبير :ومن شنو صار معاها جذي
د.محمد:حجم الياهل كان كبير وايد ولاتنسون انه ميت يعني ولادته اصعب بوايد...مع الضغط انقطع عندها الشريان
سالم:الف الحمدالله على كل حال
د.محمد:الحمدالله على سلامتها
الكل:الله يسلمك
عبدالرحمن:مشكور وماقصرت
د.محمد:هذا واجبي ..عن اذنكم
الكل:حياك
عمار :خل اروح ابشرهم
حنان:يمه عبدالله شلونه الحين
عمار:عطيته مهدء والحين نايم
عبير:الحمدالله يارب انا بروح اصلي ركعتين شكر
راشد:اي والله لازم كلنا انصلي ركعتين شكر لله
عبدالرحمن:لازم انسوي التحاليل بالاول يمكن يحاجون الدم بأي وقت
سالم:صاج... يالله قومو بسرعه
عمار :انتو روحو وانا الحقكم بعد اشوي
عمار راح غرفة الملاحظه علشان يبشرهم
ساره:في اخبار يديده ؟
عمار وهوه يبتسم:اي الحمدالله عدت مرحلة الخطر
دلال وهيا تبجي:وااااي الله يبشرك بالخير
طلال قام من مكانه
أميره:وين بتروح انت ليلحين تعبان
طلال:ابي اروح اشوفها ..اول مره احس انه صارلي دهر مو شايفها...ودموعه تزل الحمدالله يارب الف الحمدالله وشكر لك يارب
عمار:انت ارتاح الحين اهيا ليلحين بغرفة العمليات واذا طلعوها بيودونها العنايه المركزه
طلال:انت موتقول مافيها شي
عمار:اي الحمدالله بس لازم يودونها غرفة العنايه لمدة 48 ساعه
طلال:يعني ماراح اشوفها الا بعد يومين
عمار:اذا صحت قبل اليومين بيطلعونها انتو بس ادعولها الله يقومها بسلامه...وعلى فكره احنه محتاجين حق متبرعين بدم ..الي فصيلة دمه اطابق فصيلة دمها يروح يسوي تحاليل بسرعه الانهم محتاجين دم
طلال:انا دمي يطابق دمها
عمار:انت ارتاح الحين مانقدر نسحب منك دم لي صحصحت انشالله نسحب منك
طلال:انا مافيني شي
عمار:طلال الله يهداك ترى الكل يبي يتبرع لها مو بس انت ولاتخاف راح ناخذ منك الانها فقدت دم وايد وحتاج اكثر من 6جياس دم
ساره:والله 6اجياس ..هذي ناشفه على الاخر
عمار:واذا مو اكثر لاتضيعون الوقت قومو بسرعه سوو الفحص
الكل: انشالله
طلال:اميره انتي روحي سوي الفحص لا تقعدين هني
أميره:ماقدر اخليك بروحك..انطرهم ايون بعدين اروح
طلال:بس لازم اتسوين اتحليل
أميره:من غير ماتقول لجون اختي
طلال:الحمدالله انها عندت مرحلت الخطر
أميره:ماتوقعتك متعلق فيها جذي
طلال:فوق ماتتخيلين...لجون كل شي بنسبه لي كل شي امي ابوي اختي بنتي صديقتي حبيبتي كل شي ...والي خلاني اتعلق فيها اكثر ضروفنا المتشابه...وفوق كل هذا يوسف الله يرحمه موصيني عليها
أميره:طلال جني بديت اغار
طلال يبتسم:كيفج والله.... بس لجون غير محد يقدر ياخذ مكانها
أميره:الانها طيبه وحبوبه وتستاهل كل خير
بهالوقت عبدالله قعد
عبدالله بطل عينه ويلتفت حوالينه ماشاف احد غير اميره واقفه عند طلال ...بصوت واطي:اميره
أميره:عبود انت قعدت حمدالله على السلامه وابشرك لجين بالف خير
عبدالله ابتسم:الحمدالله...اميره ناديلي عمار بسرعه
أميره:انشالله...ودقت على ساره
ساره:الووو
أميره:سارونه نادي ريلج عبود قعد ويبيه بسرعه
ساره:اوكي ...الحين اقوله
بعد دقايق
عمار:خطاك السوو
عبدالله:خطاك اللاش....عمار ابي اروح اشوفها
عمار:توني اقول حق طلال مايصير اهيا الحين ودوها العنايه وبيخلونها 48 ساعه
عبدالله قام وقعد:شفتها تموت جدام عيني وماقدرت اسوي شي
عمار:د.محمد والستاف الي معاه ماقصرو
عبدالله:المنظر كان يخوف دمها مطشر بكل مكان
عمار:عبدالله الحين اهيا بخير والحمدالله لاتفكر بالي شفته
عبدالله:الحمدالله رب العالمين وقام راح على سرير الي كان نايم عليه طلال
طلال:الحمدالله على سلامتك
عبدالله:الله يسلمك وانت بعد حمدالله على سلامتك...طلال مابي احد يقولها عن الي صار ودموعه نزلت
طلال:استغفر الله ربي واتوب اليك ..الي قاعد يصير للبنت محد يقدر يتحمله ...والله مادري اذا درت شبيصير فيها بعد
عبدالله:اهم شي صحتها الحين والياهل بداله عشره ...بس مابي احد يقولها الحين اي شي عن الموضوع
طلال:عبدالله ودني عندها ابي اشوفها
عبدالله:مو بس انت الي تبي اتشوفها حتى انا ...بس عطني نص ساعه ..وبعدها بنروحله ...عمار اطلبلنا ويل جير
عمار:انتو من صجكم اثنينكم تحت تأثير البنج ليلحين
عبدالله :عمار بنروح بالويل جير مو على ريلنا
عمار:ماكو طلعه الا بعد نص ساعه
عبدالله :عمار
عمار:بشوف كلامي ولا كلامك ياعبدالله
عمار كلامه اهوا الي مشى عليهم...عمار حط عليهم حراسه مشدده من السسترات... بعد ساعه عبدالله كان معصب وقاعد على اعصابه وطلال نفس الشي
عمار دخل عليهم وهوه مبتسم :يالله افراج
عبدالله جنه ماصدق:طلال بسرعه قبل ماحط علينا حراسه ثانيه
طلال وعبدالله قامو وبسرعه راحو فوق ....صوب قسم العنايه المركزه...مريم وسالم وراشد كانو خالصين من التحاليل وصاعدين فوق على امل انهم يدخلون داخل
مريم من شافت عبدالله ينت وقامت اتصارخ وتبجي:كل منك انت السبب بتعاستها ....ليش كل هذا مو حرام عليك وهجمت على عبدالله بتطقه...بس راشد وسالم وخروها عنه
مريم تبجي وتصارخ:الله ياخذ حق هل يتيمه منك انشالله ماتشوف يوم حلو بحياتك ..انشالله تموت انت وخلودوه ونفتك منكم بيوم واحد
راشد بصوت علي:مريم عيب يبا شهل كلام الي تقولينه
مريم تبجي وتشاهق:خالي لجون كل يوم تموت اكثر من اليوم الي قبله...خالي عبدالله ذبحه بس الحمدالله انه بنتكم ماتت عشان تتطلق وتفتك منك
راشد مسكها وخضها بقوه:مريم سكتي خلاص
مريم:ماراح اسكت انشالله تموت انشالله تموت
عبدالله :عمي خلها الله يلوم الي يلومها
مريم:جب ولا كلمه انت كفو تاخذ لجون انت المفروض تاخذ خلودوه عشان اتطلع عينك مو هل مسكينه
طلال بصرخه:مريم خلاص محنه ناقصينج انتي بعد
عبدالله كمل طريجه
طلال:صبر بدخل معاك
عبدالله:انا ادخل واشوف الوضع وبعدين انت ادخل...ودخل عبدالله الغرفه الي قبل غرفت العنايه ...لبس اللبس الخاص ..وبعدها دخل الغرفه...كانت خطواته ثقيله غصب يمشي...اول مره اييله هالشعور المخيف قلبه يطق بقوه ..رعشه بكل جسمه ....وصل صوب السرير الي كانت نايمه عليه
كان شكلها مخيف...ويهها اصفر مثل الكركم جنه مافيه نقطة دم والاجهزه عليها ...وجياس الدم حولها بكل مكان كانو حاطيلها اكثر من 5اجياس بوقت واحد ...لازم يرجع الدم بجسمها بسرعه
عبدالله راح صوبها وباس راسها بقوه وبعدها باس خدها ....سحب ايدها من تحت الغطا كان ناوي يمسكها بس ماقدر...ايدها كانت متروسه ابر
عبدالله قعد على الكرسي الي يمها ودموعه تنزل:حبيبة قلبي والله ...شلون جسمج هالضعيف متحمل كل هالاجهزه والابر
السستر:د.عبدالله مايصير تطول عندها
عبدالله:انا بطلع الحين وعمها بدخل بس برد اقعد عندها لين تصحى
السستر تبتسم
عبدالله طلع بره:طلال تفضل
راشد:عبدالله ممكن ادخل معاه
عبدالله:لا مايصير اكثر من واحد
راشد:طلال طمني عليها
طلال:انشالله
عبدالله:طلال اذا موبايلك معاك عطه حق اي احد
طلال:مريم اخذي تليفوني
مريم:انشالله
دخل طلال ومن شافها على هل حال ماقدر يمسك نفسه وقع يبجي مثل الياهل ...عبدالله ماقدر يتحمل الوضع وقعد يبجي معاه
السستر:د.عبدالله مايصير جذي قاعدين تبجون على راسها ...وطلعتهم بره
راشد شافه يبجون اخترع:صار شي ثاني بعد
طلال يمسح ادموعه:شكلها يقطع القلب ..لجون وين وهل بلاوي كلها وين
راشد:هذا نصيبها والحمدالله على كل حال...وروح سو فحص دم ابسرعه
طلال:انشالله
د.محمد:د.عبدالله حمدالله على سلامتك وسلامة المدام
عبدالله:الله يسلمك ومشكور وماقصرت
د.محمد:انا ماسويت الا الواجب
ثاني يوم الصبح
عبدالله كان قاعد عند لجين بغرفت العنايه ..طلال واقف عند الباب وكل ساعتين يدخل 10 دقايق ويطلع
بغرفة العنايه
لجين افتحت عينها وكانت حاسه بتعب موقادره تتحرك من كثر الاجهزا الي عليها ...كانت اطالع المكان ومو عارفه الي صار ...وهيا تتلفت شافت عبدالله قاعد على الكرسي الي يمها ومجتف ايده ونايم
لجين بصوت واطي :عبدالله
عبدالله ماسمعها وكان بسابع نومه
لجين ارفعت صوتها شوي:عبدالله
عبدالله اتبه وبطل عينه بسرعه :لجونتي حبيبتي .....الحمدالله على السلامه
لجين:ابي ماي
عبدالله وهوا يبتسم :تامرين امر ..ويابلها ماي مقطر صغير ...وقام يقطر بحلجها....بس ولا بعد
لجين بصوت واطي:بس
عبدالله يكلم السستر: Nurse call doctor mohammed please
السستر: Okay doctor
عبدالله:لجونتي شلونج الحين
لجين:وين طلال
عبدالله:طلال بره واقف
لجين:ابي اشوفه
د.محمد:صباح الخير
عبدالله :صباح النور
د.محمد:لجين اشلونج الحين انشالله احسن
لجين:الحمدالله بس مهدود حيلي
د.محمد كان يشوف ملفها :لا الحمدالله احنه وين كنا او وين صرنا
عبدالله:الحين انطلعه من الغرفة العنايه
د.محمد:الحمدالله كل شي تمام وماتحتاج تقعد اكثر بالعنايه
عبدالله:الحمدالله
بعد ماشالو كل الاجهزه الي عليها طلعوها من العنايه اودوها غرفتها
طلال: الحمدالله على السلامه....الحين روحي ردت ابمكانها ...وباس راسها
لجين تبتسم
عاليه :يابعد عمري والله خوفتينه عليج
عبير:عبدالله نقدر اندخلها الحمام انبدلها الحين
عبدالله:لا خلوها بعد ساعه اخاف اتدوخ
راشد وعبدالرحمن وحنان توهم واصلين :السلام عليكم
الكل:وعليكم السلام
راشد:يقولون القمر طالع بنهار بس ماصدقت لمن شفت بعيني ..الحمدالله على السلامه
لجين بصوت واطي:الله يسلمك عمي
طلال:الحين اتردين عليه وانا لا انزين يلجون الايام بينا
لجين تبتسم
عبدالرحمن:يبا اشلونج الحين
لجين:الحمدالله..ولفت ويها على طلال ...شفت بنتي
طلال قلبه يتقطع:اي شفتها
لجين:حلوه...وينها ابي اشوفها يبوها لي ...ماني قادره انطر ابي اشوفها
الكل ساكت ومحد عرف يرد عليها ...موقادرين يقولولها انه بنتج انولدت وهيا ميته
لجين الخوف تسلل لي قلبها ...حست انه فيها شي ..قلب الام:بنتي فيها شي
راشد راح وقعد عندها على الفراش وخذا راسها وحطه على صدره وماكان عارف من وين يبدي:لجون انتي بعدج صغيره والعمر جدامج
لجين اتقاطعه:بنتي فيها شي
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك