رواية حبيب الحب -1
حبيب الحب : خالد و نوره
السلام عليكم ورحمة الله وبركاته
الأعزاء اعضاء وعضوات منتديات غرام ، أود ان أنقل لكم قصة أختي الكاتبة ( مـــنـــيــــرة خـــالــــد )
وعسى ان تحوز على اعجابكم ،،،،،،
===
بسم الله الرحمن الرحمن
ولا حول ولا قوة إلا بالله
السلام عليكم ورحمة الله وبركاته
------------
أتشرف بتقديمي لكم أول إنتاجي الأدبي من الرواية { قصة : حبيب الحب خالد ونوره} هذه القصة من وحي الخيال ، أخواتي أنتم تعلمون بأن المجتمع الخليجي متنوع بأهله وفئاته منهم الحضر ومنهم البدو وكلن له عاداته وتقاليده ، وتدور أحداث قصة عن أبناء القبائل وعلاقتهم بالحضر وكيف أصبحت وكذلك عن عادات قبلية لازالت تتمسك بها بعض العوائل من أبناء القبائل والكثير منهم من تركها .................
أهدي القصة لكل زوجة لم ترى زوجها إلا ليلة العرس .......... وأقول لها قد تكون هذه قصة حبك .
أختكم منيرة خالد
ملاحظة : من ارادت أن تنقل قصتي لمنتدى آخر أرحب بذلك ولكن ارجو منها الامانة بأن لا تنسى أسمي .
************************************************** ***************
البـــــــارت الأول
---------------------
الكويت عام 1978
مطار الكويت
<><><><><><>
فهد : حمدلله على السلامة
محمد : حمدلله على السلامة
حمد : الله يسلمكم هلا والله بأبو صالح ، هلا أبو راشد
محمد : على البركة الشهادة ما بغيت تخلص أبك 6 سنين من سواها قبلك
حمد : يا أخوي الدراسة صعبة شسوي
فهد : صعبة وإلا تنطر الجو يخلص وترد معاه
حمد : استر على ما واجهت
فهد : ليش خايف خيرته الوالد بيعرف لي فتحت موضوعك
حمد : الله يستر
محمد : اشفيكم تتساسرون
فهد : لا سلامتك أسأله عن الجو بمصر
محمد : يا لله اخلصوا الرجاجيل ينطرونا بالديوانية ، الوالد مسويلك عشا على سلامة الوصول .
عند باب الديوانية بمنطقة الرقة ، وقف أبو صالح ( الجد ) يستقبل أبنه حمد ، حيث كانت الديوانية مزحومه برجال العائلة والجيران والاصدقاء أتوا للسلام على حمد وتلبية لدعوة العشاء بسلامة الوصول والحصول على الشهادة ( حمد متخرج من جامعة القاهرة تخصص هندسة من سنه وقعد بمصر يتدرب بمكتب هندسي علشان يكون قريب من نوال حتى تنتهي من دراستها الجامعية ) .
سلم حمد على الرجال واستأذن للسلام على والدته وأخواته حيث استقبلنه باليباب والكللللللللللوش
أم محمد : حمد على السلامة يا وليدي وألف مبروك الشهادة
موضي : أخيرا ما بغيت تخلص
شيخه : أي والله عاد اللحين لازم نزوجه علشان نرتاح عدل
ام محمد : خلوني استانس بولدي وبعدين لاحقن على العرس توهه ورع
موضي : هههههههههه أي والله توه ورع
شيخه : يمه قولي لا إله إلا الله عمره 26 سنة بس معاد ورا لازم نزوجه
موضي : حمد دش دش بصالة الاستقبال سلم على عماتي وخالاتي وحريم عماني وخوالي وبقق عيونك ببناتهم واللي تعجبك اخطبها لك اللحين .
< همس حمد بأذن موضي >
حمد : موضي تبين تزوجيني منهم وأنتي خامرتن على سالفة جايده
موضي : يغربل ابليسك وانت للحين مصملن على رأيك
حمد : أي وابيج تقنعين امي
أم محمد < مقاطعتهم > : اشفيكم ........ يالله حمد دش سلم
حمد : جر موضي : امشي بس خليني اسلم وارد الديوانية .
بعد ما انفض المجلس من زواره وبقى حمد وفهد بالديوانية :
حمد : فهد منت رايح لمرتك
فهد : هههههههه المره عند أهلها إنفاس وإلا نسيت >> زوجت فهد أنجبت له ولده البكر راشد
حمد : زين روح نام وراك زام ( دوام )
فهد : وأنت اشعندك بتقعد بالديوانية والساعة 12 من الليل
حمد : ما عندي شي
فهد أكييييييييييييييد وإلا مواعد الجو
حمد : دامك تدري قوم قوم أهو وورنا قفاك
فهد : ههههههههههه وقام يغني أغنية فريد الاطرش : قدام عينيّ وبعيد عليّ مقسوم لغيري وهو ليّ
حمد >> قاطعه بسرعه : فال الله ولا فالك إن شاء الله انها من نصيبي قصبن عليك .
فهد : هههههههههههههههههه
مسك حمد سماعة الهاتف وأدارة قرص الأرقام لمنطقة النزهه :
نوال : ألـــــــــــــو
حمد : هلا بهالصوت ما أقدر أنام من غير ما اسمعه
نوال : هلا حمد
حمد : بس حمد
نوال : لا ......... حبيبي حمد
ودارت المحادثة بين حبيبين يترجون الله بسرعة لقاهم على سنة الله ورسوله .
بعد عدة أيام : المكان : ديوانية أبو محمد
حمد : فهد ...... كلمت الوالد
فهد : حمد الله يهداك بس اشلون اكلمه قبلك ، كلمه أنت وان شاء الله سهالات ما راح يعارض الوالد ........ واذا صار شي لك مني أنا اللي اقنعه
حمد : والله خايف يا فهد ........ أخاف اسمع منه كلمة لا ... والله أموت من القهر
فهد : لا قهر ولا شي وان شاء الله بيوافق ........ أنت بس توكل على الله وكلمه
أبو محمد ( الجد ) : السلام عليكم
فهد وحمد : وعليكم السلام ورحمة الله وبركاته .......... وقاموا وحبوا رأس أبوهم وخشمه
أبو محمد : لا هنتوا ................. وأجلسوا جميعاً
حمد : يبه ........ تعرف خالد بن ناصرالــــــــــ
ابو محمد : أي اعرفه تاجر مشهور بالسوق ودايم اتواجه معاه بسوق الجت ( سوق المناخ سابقاً كان بسوق الجت )
حمد : تنحنح ..... بنته كانت تدرس معاي بالجامعه وتخرجت معاي
أبو محمد : وبعد مثلك قاعده 6 سنين
حمد : لا يبه أهي خلصت 4 سنوات بالضبط
أبو محمد : ومستانس وأنت تقولها البنت حسن منك
فهد : ههههههههههههههــــــــــــــ
حمد : { حمر عيونه على فهد } لا يبه أنا دراستي غير عن دراستها أنا مهندس وأهي تدرس إدارة أعمال
أبو محمد : أي الله يوفقها
حمد : بغيت أقول بعد إنها خوش بنت وخلوقه وماشيه سيده وحتى أمها كانت معاها ما خلتها بروحها بمصر .
أبو محمد : أي الله يستر عليها .
حمد : يبه .... يبه
أبو محمد : أقول قوم صبي لي قهوه بدال يبه يبه هاللي مالها معنى
حمد : إن شاء الله
فهد : خلك أنا اقوم .... كمل سالفتك عسى انخلص على خير ..... ولا ننهبد بالدله على رأسنا اليوم بسبتك
أبو محمد : خير اشكلت
فهد : سم يبه القهوه
أبو محمد : سم الله عدوك
حمد : يبه .... يبه
أبو محمد : خير اشعندك ............. سالفه تستحي منها يا بوك بدها .... اخلص علي
حمد : ان شاء الله ......... { واخذ نفس عميق } أبي أخطب بنت خالد بن ناصر الـــــ
أبو محمد : والفنجان ثابت عند شفايفه وجامد ...............إلا منبهر !!! ونزل الفنجان وفكر شوي وألتفت على حمد وقاله : أنت مسود وجهي بفعلة شينه ؟؟؟
حمد : هاااااااااا ............ قام وحب رأس أبوه : لالالالا يبه كل السالفه إني شايفها بالجامعه وعاجبتني ولي خاطر أتزوجها بس وما بيني وبينها شي .
ابو محمد : اي يعني ان قلت لا عادي ما تفرق معك
حمد : قام وحب رأس ابوه وخشمه : تكفه يبه تكفى لا تردني أبيها على سنة الله ورسوله
وقام فهد وحب رأس أبوه وخشمه : يبه لا ترده
أبو محمد : يا بوك ترا طبعهم مو مثل طبعنا واحنا غير عنهم صحيح خالد بن ناصر .... رجال اجودي وتاجر وسمعته بالسوق مثل ليرة الذهب ........... أخاف باجر لي أخذت بنتهم طبعها ما يوالم طبعك وما ترتاح وتقول يا ليت ابوي حالف علي ما أخذها ............. ترا أنا ما اغصبك على بنات عمك أخاف الله .
حمد : يبه أنا فكرت من زمان وأبيها وراضي بطبع أهلها وان شاء الله ما بينا فرق واختلاف انا جامعي وأهي جامعية وأنت ما عليك قاصر تاجر وعندك حلال وابوها تاجر .......... ما بينا فرق إلا بالاصل أهم حضر واحنا بدو بالاسم بس وإلا عيشتنا بوسط الديرة وساكنين ببيوت مثلنا مثلهم .
ابو محمد : يا بوك فكر واستخير ....... وعقب ثلاث ايام رد علي إذا انت مصمل على رأيك اخطبها لك ...... بس ها ما علي من أمك انت تولاها
حمد : أمي ما تطلع عن شورك يالغالي أنت راعي الأوله
أبو محمد : الله يوفقك ....... والرد عقب ثلاث أيام .
سارت أمور الخطبة على خير بين حمد ونوال وإن شابتها زعل من أم محمد بسبب إنه ما أخذ من بنات عمه وتصميم نوال على السكن عند اهلها بعذر انها وحيدة اهلها من البنات واخوانها متزوجين وساكنين بفلل مستقله .
(( في بداية زواج حمد ونوال إلتزمت نوال بزيارة أهل زوجها كل شهر او شهرين مره وبالمناسبات ومع السنوات تباعدت الزيارات لمره واحده في اول شهر رمضان وقبل عشر سنوات اقطعت نوال بأهل زوجها وعذرها ان خالتها ام محمد وعمها أبو محمد توفوا فماله داعي تزور الجنات اذا يبونها يدلون بيتها . وكانت تعذر عن حضور مناسبات الزواج بدعوا مره انها مسافره او عندها عزا من اهلها وكثيره اعذارها ، أما حمواتها شيخه وموضي تزورهم بشكل متقطع ونادر ، لكن حمد ظل ملتزم بزيارة اهله كل جمعه يتجمع مع اخوانه وعيالهم بغدا بديوانية فهد بعد ما شرا البيت من اخوانه وهده من ساسه وشرا البيت المجاور له وبناءه فله فخمه >> فهد الوسطي بس لأنه شرا بيت ابوه التزموا بجمعتهم يوم الجمعه بنفس بيت الوالد ابو محمد))
البــــارت الـثــانــــي
----------------------
الكويت 2008
عائلة صالح بن محمد ( ابو محمد )
الجد أبو محمد والجده ام محمد ( توفوا قبل عشر سنوات )
العيال
*******
محمد { ابو صالح }عمره 59 سنه : زوجته وضحه 53 سنه
أبناءة : صالح متزوج 32 سنه{ بنت خالته هيا }
سعد 24 سنه ، مساعد27 سنه { متزوج ساره بنت خاله } هند 26سنه سلوى 23سنه مها 18 سنه
****
فهد { ابو راشد } عمره 58 سنه زوجته وسميه 50 سنه
ابناءه : راشد 30 سنه{ زوجته هند بنت محمد } فايز29 سنه{ زوجته تهاني بنت موضي } طلال 24 سنه{ مالج على مناهل بنت عمته شيخه } نوره 19 سنه
***
حمد { ابو خالد }عمره 56 سنه : زوجته نوال 52 سنه
ابناءه : خالد 28 سنه ريم 25 سنه داليا 16 سنه
***
شيخه : { ام بدر } عمرها 54 سنه
ابناءها : بدر 31 سنه { زوجته سلوى بنت محمد }سعود 27 { زوجته أمل بنت عمه } محمد 24 مناهل 20
***
موضي { ام عادل } عمرها 51 سنه
ابناءها : تهاني 25 سنه عادل 26 سنه { زوجته خلود بنت عمه } عمر 20 سنه
بتكون هناك شخصيات مهمه بالقصة بتكلم بوقتها عنها
-----------------------------------------------
18 / 4 / 2008 يوم الجمعه الساعة : 10.00 صباحاً
منطقة النزهه : بفيلا فخمة تم تجديد ديكوراتها حديثاً بعد وفاة صاحبها خالد بن ناصر وشراءها من قبل أبو خالد { حمد بن صالح } تتكون من طابقين الأول عبارة عن صالتين استقبال وغرفة معيشة مفتوحه على غرفة الطعام وقريب منها المطبخ مع المغاسل وغرفة مكتب وديوانية للرجال وتابع لها طبعا مغاسل وحمام كرمكم الله والدور الثاني عباره عن صاله كبيرة تتصل على جوانبها اليمين غرفة ام خالد وأبو خالد مع غرفة الملابس وحمامهم الخاص ، وبجانبهم بنفس الجهة غرفتين مقابلتين لبعضهم البعض للبنات ريم ودلال مع حمام مشترك بينهم ، وجهة اليسار عبارة عن شقة استديو صالة ولها مطبخ تحضيري مفتوح على الصالة وغرفة نوم كبيرة معاها غرفة ملابس وحمامه الخاص كرمكم الله خصصت لخالد الولد الوحيد بالعائلة .
حمد أبو خالد : صبحج الله بالخير يا وجه الخير
نوال ام خالد : صبحك الله بالنور يا الغالي
حمد ابو خالد : وين خالد >> بعد ما جلس على كرسي طاولة الطعام للفطور
نوال ام خالد : اظن نايم
حمد ابو خالد : صحيه للصلاة وقوليله خلي يروح معاي بيت اخوي فهد ما صارت هذا صار له عشر سنين ما جا غدى الجمعه ، قص وجهي كل ما اسألوني عنه تعذرت اول شي بدراسته بأمريكا وبعدين عنده دورات وكله مسافر ....قاطع هالولد مدري اشفيه .
نوال ام خالد : مدت بوزها وضغطت على اسنانها : خله على راحته واذا يبي يوصلهم يدل بيتهم . وبعدين ولدي مو قاطع يوصلهم بالمناسبات
حمد او بخالد : اقولج عشر سنين ما حضر غدا الديوانية تقولين يوصلهم بالمناسبات .
نوال ام خالد : زين .... زين .... اروح اقعده
راحت تركض لغرفة ولدها تصحيه للصلاة >>> خلوني اوصف لكم خالد : عمره 28 سنه يتميز بالطول 185سم مثل اهل ابوه كلمة وسيم قليله عليه ومأخذ سماره البرونزي من امه وطبعا مثل كل شباب الديره لازم الديرتي الشوارب والقفل ، متخرج من امريكا ادارة اعمال وماسك شركة ابوه واهي عباره شركة لمجموعه من وكالات الاجهزة الكهربائية ولوازمها ولهم عدة محلات منتشرة بالديرة من السالمية الى العاصمة والفروانية والفحاحيل والجهرا
و ........... : خالد خالد يووووه خالد قوم يا ماما ما بقى شي على الصلاة ......... اسمع ابوك يبيك تروح معاه عند عمانك غدا الجمعه .......... واحنا معزومين عند خالك وتراه ملزم علي تكون معاي .. خالد
خالد : هااااااااا يمه زين اقوم اللحين
نوال : انت سمعت اللي قلته قوووووووووم اصحه
خالد : هلا يا غلا كاني قمت خير >> وتعدل بقعدته
نوال : اقولك تروح معاي بيت خالك لا تروح مع ابوك عند عمانك بعدين يزعل خالك وانا ما اقدر على ازعله .
خالد : زين اقول لأبوي
نوال : لالالا لاتقول بتروح عند اخوي قوله ربعك عازمينك زين .... خو تعرف ابوك بيظن اني قاصدتها
خالد : زين يمه اقوله ..........
كملت نوال طريجها لغرف البنات أول غرفة مرت غرفة ريم >> ريم عمرها 25 سنة مخطوبه لولد خالها عبداللطيف وأسمه أسامه ، ريم جميله جمال يوحي بالهدوء متوسطة الطول طالعه على أمها بالجمال متبتبه شوي بس بتنسيق مو مخربط جسمها متخرجه من جامعة الكويت كلية الحقوق وتشتغل بالشئون القانونية بمؤسسة البترول
نوال : ريم ريم قومي ماما .... ترا غدانا اليوم عند خالج عبداللطيف >>> طبعا ريم من اسمعت اسم خالها اقمزت على طول مو حبا بالخال وبس لا علشان تشوف الخطيب !!
وطلعت نوال من غرفة ريم واتجهت لغرفة آخر العنقود داليا >> يا ربي هالبنت كيوت حدها عمرها 16 سنه تدرس بالمدرسة الانجليزيه تتكلم بالبطيء وشوي شوي وباردة بحركتها وكلامها كله دلع تأثير الدلال عليها بيضه مثل اهل ابوها وطولهم وتشبه اختها ريم بالجمال بس مختلفه عنها بالطول والبياض واضعف منها بوايد
نوال : داليا داليا ماما >> وجلست بقربها وباستها واحضنتها
داليا : ماما خلاص I'm big now
نوال : no you still my little baby
===================
بفيلا فخمه بمنطقة الرقة : فيلا فهد بن صالح { ابو راشد }كانت عبارة عن فيلا تتكون من ثلاث ادوار الدور الارضي يتكون من صالة استقبال مفتوحه مفروشة بثلاث جلسات أوروبية يتوسطها سلم لولبي وبجانبها صاله اخرى صغيرة خصصت لأستقبال صديقات نوره علشان تأخذ راحتها مع صديقاتها وصالة للمعيشة وفيها طاولة طعام وقريبه من المطبخ وطبعا الديوانية الملحقة بالبيت لها مدخل خاص من خارج البيت الدور الثاني يتكون من غرفة نوم لأم راشد وابو راشد وبنفس جهتهم خصصت غرفة نوم لنورة ولأنها وحيده فقد خصصت لها غرفتين مفتوحتين على بعض الغرفة الاولى كانت بها جلسة مؤثثه بجلسة امريكية وتلفزيون بلازما ومكتب للدراسة وغرفة نومها باللون الفوشي مع السجاد الابيض والكوشيات باللون الاسود والابيض والفوشي وفي الجهة المقابلة خصصت شقة لطلال تتكون من غرفة نوم رئيسة وصاله ومطبخ وغرفتين وحمامهم والدور الثالث عبارة عن شقتين نفس نظام شقة طلال خصصت لراشد مع زوجته هند وفايز مع زوجته تهاني .
فهد ابو راشد : السلام عليكم
ام راشد ونوره وطلال وفايز : وعليكم السلام
وقاموا العيال وحبوا راس ابوهم >> كانوا قاعدين على الارض يتفطرون وتاركين طاولة الطعام مجرد برستيج وأكمالة ديكور بالبيت >> ما حبوها بس حطوها لتجميل الديكور .
نوره : صبحك الله بالخير يبه >> وصبت فنجان القهوه ومدته لأبوها
فهد : لا هنت يا سميت الغاليه سهمج عندي اليوم خضر>> ام محمد الله يرحمها كان اسمها نوره
نوره : ههههههههههه يبه والله مأثره عليك البورصة
حمد : وين راشد ؟
ام راشد : بشقته ... يمه نوره اتصلي عليه خليه ينزل بسرعه يلحق على الصلاة وشوفي هند اذا تبي شي صارت ثقيله وقرب شهرها الله يهون عليها .
نوره : ان شاء الله يمه
ورفعت سماعة التلفون واضغطت على الرقم الداخلي لبدالة البيت
نوره : آلوووووووووووووو
راشد : وجع مادة الألو هلون ليه
نوره : واي بدوي ما كو فايده فيك كلش راشد انت شا ط عنا كلنا حجيك بدوي جق
راشد : والله ما تقول كلمة جق إلا البدويه .... اخلصي اشتبين
نوره : امي تقول بسرعه انزل تقهوه وروح للمسيد ... وعطني هند بكلمها
راشد : زين نازل اللحين وهاج هند
هند : آلو
نوره : هلا والله بنت عمي ومرت اخوي
هند : هلا نوره وما ودج بعد اصير حماتج
نوره : حمر وجهها وضحكت بصوت خافت : لا ما بيج تصيرين حماتي
هند : ليش سعد ما يعجبج
نوره : طنشت : اقول لا تزيدن بالحجي امي تقول تبين شي وتبين نصعدلج الغدا مثل كل يوم وإلا تنزلين تتغدين
هند : لا والله نوره والله ما اقدر انزل حاسه اني ثقيله وريولي متورمه . صعدولي الغدا .
نوره : اوكي ياقلبي انتي تأمرين امر
وسكرت هند التلفون وكان راشد توه خالص من لبسه ويعدل شماغه والتفت عليها وقال : هند اشفيج انزلي شوي وسعي صدرج وغيري المكان صارلح شهر بشقتج
هند : والله ما أقدر راشد حدي تعبانه يالله اوصل الطبيب للمراجعه وبعدين توني داخله شهري وحاسه بثقل من التوأم مو طبيعي
راشد : بعد انتي يالله حملتي تأخرتي
هند : رااااااااااشد اشفيك هذا عطيت رب العالمين اني ما احمل إلا عقب العلاج واذا مضايقتك هالسالفة ليش صبرت علي 8 سنين وبعدين تقدر تتزوج ترى محد رادك ،اففففف احمد الله واطلبه يرزقنا بعيال كاملين وبصحتهم افففففففففــــــــــــ
راشد : قرب منها وباسها على راسها : اسف يا قلبي والله ما اقصد ، >>> وصرخ : ومره ثانية لا تتأففين مني ترا هذا انذار لج ترا والله اسمي العيال على كيفي وما اشاورج
هند : هههه انت ما كو فايده منك تتأسف وتهاوش اقول قوم قوم تعوذ من ابليس وروح للصلاة .
راشد : زين هالمره بطوفها لج انا رايح . سلالالالالالالالالام
-----------------------------------------
بفيلا محمد ابو صالح { بيتهم مقابل فيلا اخوه فهد }
محمد ابو صالح : السلام عليكم
ام محمد : وعليكم السلام ، صبحك الله بالخير
ابو محمد : وين العيال ؟
ام محمد : صالح راح يودي مرته لبيت اهلها ، ومساعد وسعد بدواماتهم >> ضباط بالدفاع . ومها نايمه .
ابو محمد : زين انا غداي بديوانية اخوي فهد انتي وين بتروحين ؟
ام محمد : بنطر مها تقوم من النوم وبتغدي عند ام راشد داقه على من الصبح وعازمتني .
ابو محمد : صبي قهوه ................
-------------------------------------------
بديوانية فهد ابو راشد بعد الغدا
الشباب : صالح ولد محمد ، راشد وفايز وطلال عيال فهد، بدر سعود ومحمد عيال شيخه، عادل وعمر عيال موضي : بعد الغدا كلٍ راح بيته >> يحبون نومة الظهر
اما الأخوان : فهد وحمد ومحمد قعدوا يسولفون مع بعض وعقبها استأذن محمد وطلع من الديوانية وتم فهد وحمد
فهد ابو راشد : ابو خالد ورا خالد ما جا الغدا من زمان خبري فيه من عيد الضحيه
حمد ابو خالد : والله مشاغل يا خوك الشركة والمحلات ماخذه وقته كله بعد لازم يتدرب على الشغل ما لي غيره يمسك الشركة بعد عيني
فهد ابو راشد : عسى الله يطرح فيه البركة ويطول بعمرك وتشوف عياله
حمد ابو خالد : الله يسلمك يا خوي
فهد ابو راشد : اقول ابو فهد المثل يقول اخطب لبنتك ولا تخطب لولدك ، ترا أنا زوجت عيالي من بنات اخواني وبقت عندي نوره وما ودي تطلع عن عيال اخواني وعندي ولدك خالد وسعد ولد اخوي محمد ودي ان واحد منهم يأخذها .
حمد ابو خالد : والله يا بو راشد هاذي الساعة المباركة اللي اشوف فيها نوره سميت امي ببيتي وماني لاقي بنت بزينها واخلاقها يكفي انت ابوها .
فهد ابو راشد : الله يسلمك يا خوي بس لا تستعجل انت شوف اولدك يمكن له خاطر ببنت ولا ماله نيه للزواج ......... بعد الزواج ما هو غصب .
البـــارت الثالث
المساء بنفس اليوم بفيلا ابو خالد
ابو خالد : اتصل على خالد : الو
خالد : هلا يبه
ابو خالد : وينك ؟
خالد : طالع مع ربعي
ابو خالد : متى ترد البيت ؟
خالد : ان قدرت بعد ساعه
ابو خالد : انطرك باغيك بسالفه
خالد : ان شاء الله
بعد اكثر من ساعه كان ابو خالد بصالة المعيشة يسولف مع ام خالد بكل شي إلا السالفه اللي بيقولها لخالد . دخل عليهم
خالد : السلام عليكم
ام خالد وابو خالد : وعليكم السلام
ابو خالد : طولت يا بوك وانا بنام وبكلمك بالسالفه
خالد : شسوي يبه خذتني السوالف
ابو خالد : >> قوم يا بوك دش غرفة المكتب : عن اذنج ام خالد
ام خالد : خير في شي
ابو خالد : بعدين بعدين عقب ما خلص من خالد اكلمج
دخل غرفة المكتب وجلس ابو خالد على الكنبه الجلد وقال لخالد : تعال اقعد يمي
ابو خالد : يا خالد انت عمرك 28 سنة وخلصت دراستك واشتغلت وانا مسكك الشركة وما شاء الله عليك دايرها من احسن ما يكون
خالد : اي يبه الحمد لله
ابو خالد : بقى شي واحد وطلبتك يا بوك ما بيك تردني جان لي معزه عندك قول تم
خالد : تم يبه مالي احد اعز منك
ابو خالد : ابيك تملج على نوره بنت اخوي فهد
خالد : ..............>> توقع يكلمه عن كل شي إلا الزواج كان يتمنى انه يختار زوجته بنفسه لكن ما شاف اللي قلبه هواها .
ابو خالد : قول تم يا بوك ترا أنا معطي اخوي موافقه لا تحرجني جدامه
خالد : قام وحب رأس ابوه : ما عاش اللي يحرجك تم اللي تبيه
ابو خالد : على بركة الله بطلع اعلم امك والله يعيني
صعد ابو خالد لغرفة نومه وشاف نوال تمشط شعرها بعينه بعدها البنت الحلوه اللي عشقها .
ابو خالد : شهالزين شهالزين
ام خالد : هههههههههـــــ الله يسلمك عيونك الحلوه يا قلبي ......... تعال ماني مرتاحه لقفلة باب المكتب عليك انت وخالد شالسالفه ؟
ابو خالد : عاد تصدقين كنت متأكد انج بتسأليني قبل لا اتكلم فيج عجله بعلمج
ام خالد : خير اللهم اجعله خير
ابو خالد : انا خطبت نوره بنت اخوي فهد لخالد
ام خالد : هااااااااااااااااااااااا ليش خالد قال يبي يتزوجها
ابو خالد : لا بس السالفه وما فيها ان اخوي .......................>> وكر السالفه اللي دارت بينه وبين اخوه
ام خالد : ما علقت >>> وراح فكرها لسالفه قديمة بعيد الفطر كانت زايره حمولتها ومعاها ولدها خالد وكان عمره 9 سنين وكانت زوجة فهد توها طالعه من النفاس ببنتها نوره ولما شافت خالد قالته تعال تعال حب بنت عمك باجر اذا كبرت زوجتك اياها ورديناك لأهلك .......... كلمة رديناك لأهلك ترقع بقلب ام خالد اي اللحين فهمت معناتها زين يا ام راشد تبين تردين خالد لأهله جني بايقته منكم لا والله ما عطيكم اياه والله ثم والله لأخليه يملج عليها ويطلقها قبل العرس وافشلج ............ ما اكون نوال بنت خالد ان ما سويتها .
ام خالد : زين خالد شنو قال ؟
ابو خالد : ما قال شي انا طلبته واهو ما ردني .
ام خالد : زين عن اذنك بكلمه وارد عليك
خالد بغرفته محتاس وضايع حاس انه استعجل وعطي ابوه كلمه اهو مو قدها قام وقال بكلم امي يمكن تأثر على ابوي يغير رأيه >>> وقبل لا يطلع دق باب الجناح ودخلت عليه امه
خالد : هلا يمه
ام خالد : هلا حبيبي
خالد : يمه ابوي قالج عن سالفة زواجي
ام خالد : اي يمه انت اشرايك
خالد : والله يمه انا كان ودي انا اختار زوجتي مو تنفرض علي
ام خالد :>> اشوه ما راح اتعب مع خالد : شوف يمه ابوك انحط بموقف محرج مع عمك وما قدر يرده
خالد : وانا شنو ذنبي
ام خالد : حبيبي لا تخاف انا ادبرك
خالد : اشلون ؟؟
ام خالد : حبيبي ملج على البنت وتم ثلاث او اربع اشهر وبعدين طلقها
خالد : يمه اشلون املج واطلق
ام خالد : حبيبي اسمعني انت اذا ملجت عليها رفعت الاحراج عن ابوك ، وبعدين انا ادبرك واطلقك منها ومن غير ما تحرج ابوك .
خالد : اكيد يمه لا توهقيني ما ابيها تعرفين شنو ما ابيها ، ما أبي أتزوج هالطريقه أبي اختار زوجتي بنفسي .
ام خالد : انت ما لك شغل واي شي يقولك ابوك علمني ولا تتصرف من وراي زين
خالد : زين يمه
ام خالد : تصبح على خير
خالد : وانتي من اهله .
=====================
بفيلا محمد أبو صالح :
سعد : تكفى مساعد كلم أبوي أنا قلت لعمي فهد أبي نوره ، بس ما ردلي جواب
مساعد : والله ما ادري ياخوك ليش عمي فهد ما قال خل ابوك يكلمني رسمي
سعد : قالي اصبر يصير خير ولا تقول لأحد ، تهقى شنو قصده
مساعد : سعد انطر ليش مستعجل دام قالك انطر يعني في شي يا إنه بشاور بنته أو
سعد : أو شنو في أحد خاطبها قبلي أنا ولد عمها وأقرب لها من أي واحد
مساعد : إي زين انطر على شنو مستعجل
سعد : مساعد انت ما تفهم أنا أبيها يعني بالعربي أحبها
مساعد : بينك وبينها شي
سعد : لا ، مو أنا اللي اتحرش ببنت عمي ، أنا أحبها من زمان واللحين اشتغلت واستقريت بدوامي أبي أكمل نص ديني وإهي اللي اختارها قلبي
مساعد : عين خير يا بن الحلال وان شاء الله تكون من نصيبك
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك