رواية كل يوم لك حال جديد يوم قريب ويوم بعيد -53
في بيت ابو تركي اليوم الثاني....
كانت نوف ومرام جالسين وام تركي رايحة وجاية بينهم وبين ابو تركي,,,
نوف متى الامتحانات تبتدي؟
مرام لسه باقي اسبوعين...ليش انتي مابتداومين؟
نوف لابلى السبت بداوم مع تركي بنفس اليوم...
مرام ماكلمتي مشاعل اليوم؟
نوف بلى..كان صوتها حلو اليوم وتقول ان فواز افضل ونفسيته حلوة بعد..
مرام أي انا بعد يوم اكلمها قالت لي....نوف هو وش فيه؟
نوف مدري...
مرام شلون ماتدرين؟
عبير من وراهم ماتبي تقولك مو ماتدري؟
لفوا لها ثنتينهم وسكتوا يوم شافوها وام تركي بس شافتها جت صوبهم..
ام تركي عبير..
عبير هلا خالتي.....عبدالله نكب فيني كان بيطلع معي وكلموه الشباب بيروحون البيت وراح معهم قلت اجي اتقهوى معكم وبالمرة اذا رحتوا لمشاعل نروح سوا من زمان عنها ...
سكتوا كلهم....
نوف قومي مرام سوي لنا قهوة فرنسية خل نشربها قبل لانروح لمشاعل...
ام تركي بس بدون سكر..
نوف خالتي ماهي حلوة بدون سكر..
ام تركي انا مااحب اشربها بسكر...اصلا انا كل شي قاعدة اقلل فيه السكر لين اتركه نهائيا...
نوف اخاف من عمي بس....
عبير أي والله شكله من تاءثير ابو تركي عليها ...
مرام انا قايمة..
عبير خلونا نطلع برى الجو حلو خل نشرب القهوة برى اليوم ونسولف شوي...
الشغالة ماما بابا ابو تركي يبغى انتي فوق؟
ام تركي وقفت يالله جاية...
عبير خالتي تعالي لنا برى ترى قهوتك بتظل تنتظرك..
مشت ام تركي بدون ماتعلق باي شي....
نوف يالله انا قايمة اشوف مرام تبين شي..
عبير حطي شوية مكسرات نتسلى فيهم لو ماعليك كلافة..
استغربت نوف ذرابة عبير اليوم واللي على غير العادة بس سكتت وقالت الهادي الله,,,,
خالد بكرة الليل فينا ننتقل...كل شي بيوصل اليوم تقريبا..
وضحى على هونك ماتقدر تسوي كل شي بيوم واحد ياخالد؟
خالد وانا بجيب الاثاث على ظهري ياوضحى؟هم بيجيبونا....
وضحى أي بس كان لااتفقت معهم كلهم اليوم...خليت اليوم شوي وبكرة شوي..
خالد انا مفضي نفسي لهم اليوم ....
وضحى الله يعطيك العافية....
خالد الله يعافيك ويخليك لي يارب....
وضحى اقول خالد..
خالد قولي ياقلبي..
وضحى ودي اسئلك عن شي...
خالد شنو؟
وضحى لو جبنا بنت وش بنسميها؟
خالد وهو يجر خدها لاجتنا بنت بنفكر وش نسميها؟
وضحى طب ورى ماتفكر من اللحين؟
خالد وليه افكر اللحين؟
وضحى لأن اللي جاينا بنت مو ولد؟
سعد اقول ترى مفلس حدي..
مشعل وانا انذل منك..ولاحتى نص ريال بجيبي!!
سعد والحل؟
مشعل مدري...يعتمد عليك انت؟
سعد وورى مايعتمد عليك انت؟
احمد اكلم ابوي اقوله ابي فلوس؟
مشعل فكرة مو بطالة.بس ياعبقري على ماتكلم على مايرد عليك على ماتجيب لنا الفلوس كم يبي لنا نص يوم؟
سعد زين منه اقترح....
مشعل شوف احمد...انت تطيعني صح ولالا؟
احمد طبعا....
مشعل اسمع اللي بقولك عليه وسويه بالحرف الواحد
سعد ركز عدل مو تخرب لنا السالفة انت مع دلاختك...
احمد بس تنامون معي اذا سويت لكم انتوا قلتوا بتجون تنامون معي وماجيتوا؟
سعد ابشر ولايهمك..
مشعل ولو ان والدك ماينطاق بس علشانك بنحاول....
احمد ها شنو اسوي..انا جاهز,,,
امشعل تروح تدخل اللحين وتشوف وين عمتك وضحى...تقوم تبكي قدامها هي بتسئلك قول لها تبي تروح البقالة معنا وابوك ماعطاك البارح فلوس بتقوم هي تعطيك خبيهم وروح المطبخ بتشوف امي قول لها ابي اقولك شي اذا قالت لك شنو قول لها ابي اروح مع مشعل البقالة وماعندي فلوس بتقوم هي تعطيك خبيهم بعد وروح ديوانية جدي وقوله نفس الحكي بيقوم هو يعطيك خبيهم وتعال لنا بسرعة؟
احمد طيب والجدة مااقول لها؟
سعد لاتحلم ها العجوز بخيلة مرة ومابتشوف منها الا الريش بتقولك وش تبي بالبقالة وكل شي موجود بالبيت؟
احمد طيب وعمي خالد اذا شفته؟
مشعل عمك ياحظي كاهو عند الباب اخلص بسرعة علشان تلحق عليه قبل لايطلع....
احمد يالله طيران,,,,
راشد وين بابا فواز؟
الشغالة مع صديق هو دكتور حسام..
راشد بهمس طب ومدام مشاعل فوق ولامعه؟
الشغالة لا بالحديقة يمشي شوي عند باب المطبخ الخارجي...
راشد طب مافي احد من اهلها هنا ولا زارهم قبل شوي وطلع وقال بيرجع,,
الشغالة لا...
راشد طب روحي سويلي عصير طبيعي ..واختاري شي يطول....
مشت الشغالة وتلفت حوالينه ويوم ماشاف احد مشى لين صوب المطبخ الخارجي هناك مكان ماهي تتمشى بس ماشاف احد رجع للجهة الثانية ولقاها تتمشى,,,وهي سرحانة ..صدق عليها عبايتها بس ماكانت مسكرة وشيلتها كانت على كتوفها,,,,
وتقرب منها...
هي بروحها كانت شاردة بللي صار لها البارحة وماهي قاوية تسال ولا تسوي اي شي..
جافاها النوم طول الليل ومن قعدت صارت تتجنب تحط عيونها بعيونه...
فواز مخبي عليها شي...هذا الشي اللي تاْكدت منه ,,,
وهي تمشي صدمت بشي وماانتبهت الا يوم رفعت راسها وشهقت يوم شافته يتبسم...
راشد وعيونه تدور فيها وين سرحان الحلو ؟
مشاعل بارتباك جت بترفع الشيلة وتحطها على راسها بس مامداها لان يده مسكتها بقوة وقربتها منه..
مشاعل بصراخ بعد عني ياحقير..
راشد اششش ياام محمد.....اي احلى مشاعل ولا ام محمد؟
مشاعل بنفس الصراخ قلت لك بعد....
راشد اللحين ها الجمال هذا كله علشان بالنهاية تحملين وتولدين والله ماعرف قدرك فواز وظلمك....
توها بتصارخ عليه الا باب المجلس اللي فيه نواف ينفتح من برى وهو قريب منهم وصوت حسام طالع ..
بعد عنها وهو مقهور ومتضايق ومشت عنه بسرعة.....
وتفكيرها زاد فوق تفكيرها البارحي....راشد فيه شي جياته لهنا مو طبيعية اكيد وراه شي ماهو خالي!!الله يستر منه بس!!!.
كانت جالسة على الكنبة وضامة رجلينها لعندها ووجهها باين عليه الاكتئاب....
ضاق خلقه يوم شافها كذا وتنهد ووقف مكانه يناظرها...
شيسوي علشان يسعدها وهو اصلا سبب حزنها وضيقها؟؟
متى بيتغير بينهم ها العناد والمكابر وتجريح بعض الى حب وعشق وغرام؟؟
ماتعود يكون معها رقيق وشفاف الا بحالاتهم الخاصة وحتى ها الاوقات مادامت وانقلبت الى غصب واجبار؟؟؟
وش يسوي في نفسه....ليش مو قادر يتعامل معها بشخصية ثانية غير شخصيته الجلفة...
أي حب هذا اللي يكنه قلبه لها وهو يعاملها كذا!!!
يوم رفعت راسها شافته يناظرها تقرب وجلس وسوى نفسه طبيعي...
نواف وش الفطور؟
ياسمين وقفت...
نواف وين رايحة؟
ياسمين وهي عاطيته ظهرها قالت ببرود وبصوت واطي بجهز لك الفطور..
نواف قعدي ماابي....
رجعت قعدت وهي صادة عنه ورجعت للحالة اللي مايحبها فيها...
تلخبطت مشاعره وماعرف شيقول...
نواف بصدق هي مفكرة اني بردها ....ولا حاطة ها الشي في بالها بس هذا مايعني اني بردها ولا ابيها تدخل حياتي من جديد؟
ماردت عليه ورفع راس يستفهم لقاها مباعدة عيونها عنه ولا لها فيه بعد وكاءنه مايكلمها..
نواف بهدوء وهو راق قلبه لها يعني لاتحطين في بالك اشياء ماهي صحيحة ولا لها أي صلة بالواقع...ريم حالة مرت بحياتي ومن سابع المستحيلات انها ترد انا مااْمن على حياتي على مثلها....
بعد ماقالت شي...
نواف بنرفزة اكلمك انا؟
وقفت وقالت له ببرود حاد وانا مالي خبري انا مجرد الهام للكوابيس المرعبة اللي تحلمها اذا شفتني!!
قالتها ومشت وظل مكانه يناظر بسرابها اللي راح,,,,
بعد ماشالت نوف عبايتها راحت تجهز الصينية اللي يبونها واللي عليها علشان تطلعها الشغالة لهم بالحديقة,,,,
عبير دخلت عليها روحي شوفي لنا اول مكان نقعد فيه؟
نوف كل مكان مثل غيره وش الفرق يعني؟
عبير انتي زوجك هنا بس انا عبدالله مو هنا يعني انتي تتحركين براحتك...
نوف طيب....
عبير شيلي انتي ها الصينية وانا بجيب القهوة عن مرام...
طلعت نوف وهي شايلة الصينية اللي فوقها مكسرات وطلعت فيها بالحديقة واكبر ابتسامة على وجه عبير اللي تناظر تركي نازل من الدرج وراحت تركض من شافته لعند الباب..
تركي حشى..منتي صاحية؟
عبير بانفعال اذا انت ماتغار على زوجتك ترى انا اموت ولااخلي بنت تعرض نفسها قدام عبدالله سمعتني!!
تركي بعصبية احترمي حالك احسن لك؟
عبير قول لمرتك اول تحترم حالها مو يوم شافتنا كلنا لاهيين داخل شالت صينية مكسرات وطلعت له وهي على بالها انت نايم وانا اذاكر لمرام وعمي وعمتي فوق يعني بالعربي الجو كله لها لا والحلو شايلة عبايتها ولابسة قصير..
قالتها وطلعت قبله وهو طلع وراها..
ونوف فعلا كانت شايلة عبايتها ولابسة ثوب قصير ابيض لحد الركبة مورد بخيوط ضعيفة...
كانت تمشي ومبين انها سرحانة لانها ماانتبهت ان عبدالله قاعد بس صرخة عبير خلتها تلتفت هي وعبدالله اللي كان قاعد على الكراسي.يقراْ الجريدة
طاحت الصينية بللي فيها على الارض وسط صرخة عبير ونوف وقفت جامدة مكانها ونظراتها بالارض,,,,
حتى ماانتبهت لتركي اللي كان وراها,,,
عبير انتي ماتستحين انتي مو مالي عينك ها الرجال اللي عندك؟وش تبين بعد؟
عبدالله قام بسرعة وطلع من بوابة البيت وعبير لحقته على اساس انها متضايقة..
وماحست نوف الا بيد تركي تسحبها.
اشوفكم بكرة على خير
****
***
**
*
البارت الرابع والتسعين ,,,,
ظلوا بالغرفة واقفين قبال بعض فترة وكل واحد عيونه تقول حكي كبير ومو مفهوم...
نوف قطعت الصمت وقالت تركي..
تركي بانفعال وغيره واضحين بصوته العالي عبايتك وينها؟ها الشي بس اللي ابي افهمه؟
نوف بقهر ودفاع انا مدري انه..
قاطعها بصراخ ماتدرين عن شنو؟انه موجود بالبيت؟؟ليش من متى وانتي تشيلين عبايتك من عليك اصلا!!!
نوف بانفعال لاتصارخ علي لو سمحت انا مو قاصدة اسوي ها الشي وربي فوق يدري,,,,ماتقولي وش الغرض اذا كنت فعلا متقصدة اسوي ها الشي؟
تركي بصراخ مدري..مدري ولاابي ادري...اللي ابي افهمه عبايتك شلون تنزل من على كتفك برى ها الغرفة؟
نوف لزمت الصمت وحست انه بيجرحها اكثر ...هو صدق معصب بس هي بعد مالها ذنب...
يوم شافها ساكتة وماتتكلم قال بغضب اكبر هو بروحه جالس وكلهم داخل فسري لي ها الشي ؟
نوف بصدمة انت شاك فيني وفي اخوك ياتركي؟؟؟
تركي كانت الف علامة استفهام على وجهه بس ماقال شي..
رددت كلمته بصدمة مرة ثانية وهي تتمنى ينفي ولاياْكد بس لايظل ساكت انت شاك فيني ياتركي؟
تركي بغضب ابي افهم وش طلعك له بس!!!قلتيلي بذاكر شوي مع مرام ..ويوم نزلت ماشفت مرام ولاشفت احد غيرك وغيره؟
اجرح ياتركي اجرح...مقبولة منك يالغالي....اصلا الشره كله مو عليك...على اللي عاطيتك صدرها تجرح فيه ومو مبالية ولاهي قادرة تقولك شي وتدافع عن نفسها؟؟
اصلا كلامها كله ضايع جنب قمة غضبك وعصبيتك....
ارحمني يارب...انا ماسويت هالشي متعمدة ياربي وانت عارف بها الشي...
لاتخليه يظلمني بكلامه وظنه فيني!!!
في بيت الجد كانوا نورة وياسمين ووضحى جالسين وام مشعل معهم,,,
نورة يعني الليلة بتنقلون؟
وضحى ان شاءالله؟
ياسمين بعيده عن الشقة اللي قبل؟
وضحى هاذي اقرب بكثير منها....بس تشرفونا بتشوفون..
ام مشعل ان شاءالله بس تتغير الظروف سووا لنا عشى ونتجمع معكم فيها....
ياسمين ان شاءالله....
نورة جيبي الجوال بدق للسايق لاينسانا..
ام مشعل وليه مستعجلين انتي معها؟
ياسمين بنمر مشاعل ...اساسا نورة كانت مارتني وبنروح لها علطول بعدين غيرنا راينا وقلنا نمركم اول نسلم عليكم...
وضحى احنا بعد بنصلي المغرب وبنمرها انتظرونا ونروح لها سوى,,,,
نورة انا عندي جامعة وماابي اطول السهرة كثير,,,,
ام مشعل ماغيرتي رايك ياوضحى وبتجين معنا؟
وضحى لا ..وين لو كنت خفيفة جيت معكم بس مثلك شايفة مدري متى اولد اخاف اروح معكم وتبتلشون فيني...ان شاءالله بعدين الايام جاية ياام مشعل...
ياسمين لحظة انتي وياها...وين تعزمون على بعض ان شاءالله؟
ام مشعل خميس وجمعة بنروح المدينة....
وضحى يصير افتن......
نورة طبعا...
وضحى بيمددوها لنهاية الاسبوع ماعليكم منهم مو بس خميس وجمعة؟
ياسمين ياسلااام ياسلاااام...وان شاءالله اللي جالسين معكم ضيوف شرف ولا شسالفتهم؟؟
نورة افا ياخالتي ماهقيتها منك صراحة لاتعزمين وماشكله لك نية تقولين وبتروحين سكاتي؟
ام مشعل وخير ان شاءالله انتي معها كل وحدة عندها رجال وراها؟
نورة انا ماوراي احد.....مابعد رحت بيته ومابيقول لي لا اذا قلت له بروح مع جدي وجدتي وخالتي..
ياسمين ويجيك قلب تروحين بدوني وانتي ماكنتي تتنفسين الا فيني ومعي!!
وضحى خلاص مو زوجتك ..خليها تتنفس براحتها بعيد عنك وازيدك من الشعر بيت انا مقترحة عليها تترك مشعل وماتروح فيه ؟
ياسمين وان شاءالله تبونه يقعد معي!!!
ام مشعل وان شاءالله ماهو اخوك؟
ياسمين هذا اذا طلع الشارع من وين اجيبه انا يمديك تروحين وترجعين وانا مدري عنه أي شي؟؟؟
وضحى لالالا بيظل معنا انا وخالد...
ام مشعل لا ماراح اخليه باخذه معي بحتاجه هناك هو وسعيدان ابوي كبير ومايقدر يشيل عمره وماابي اخذ السايق وابتلش فيه مشعل وسعد مابيقصرون؟
ياسمين حتى ياسمين اذا اخذتوها مابتقصر؟
ام مشعل لاحبيبتي ياسمين وراها نواف؟
ياسمين طيب واذا جابت الموافقة منه تجي معكم ولاماتجي؟
نورة بهمس يركض نواف يعطيك الموافقة بعد صدقتك؟
ياسمين بهمس وانا باخذها منه تصدقين السالفة لاجواز ولا فيزا بركب الطائرة وبروح ومو رادة له اصلا بقعد هناك ومو راجعة؟؟؟
في سيارة عبدالله...
كان يسوق بسرعة خيالية......
وعبير مخلية الجو متوتر بينهم بكلامها..
عبير شنو يعني بالله تقصد من ها الحركة؟
عبدالله .....
عبير يعني هاذي ماتعني غير شي واحد...احتقار مباشر لي!!!شنو يعني مو مالية عينها وانا داخل تقوم تطلع كذا لزوجي!!!عبدالله مانبي نسكن هنا اذا تزوجنا انا مااتحمل كل يوم تطلع لك كذا!!!
ماكان يرد عليها كان سرحان لبعيد وماغير سكوته اللي يجاوب استفساراتها واسئلتها,,,,
عبير الغريب بالموضوع زوجها تركي؟يبى انت ماتشوف مرتك شلون تقعد بالبيت ؟وين عبايتها؟وين حجابها؟اخوك بالبيت ولاطالع؟ولا الدنيا سايبة عندكم؟لايوم شافني طالعة اركض سوى روحه مهتم وجا وراي....
حبيبي انا مابعيد كلامي مو ساكنة بها البيت اصلا!!
عبدالله بقهر ماراح تسكنين فيه...انتهينا؟
قالها وكان يقصد انك تسكتين مرة وحدة مو بس تسكرين الموضوع..
عبير بحقد تلاقيها اللحين مسوية روحها المسكينة المظلومة واحتمال تقول بعد انك انت اللي متسبب بالسالفة وابوك وامك مايبي لهم شي ويصدقونها؟؟
انا مستغربة فيهم كيف يصدقونها ويبدوها عليك وانت ولدهم وهي الغريبة عنهم!!!
هذا وانت الطيب وكافيهم خيرك وشرك وشنو مايبون قلت لهم حاضر وعلى امركم,,,اخ بس لو انت مثل تركي عندك ذيك الشخصية كان حسبوا لك الف حساب وحسبوا لي معك...بس عيبك طيبتك.....
ناظرها وماعلق بشي....
عبير انا اقول..
قاطعها بسرعة عبير ممكن تسكتين شوي حاس اني متخربط ومو قادر اوصل لااي حل؟ابي هدوء شوي علشان اعرف اتصرف بها السالفة..
ناظرته شوي وبعدها قالت ان شاءالله حبيبي,,,
دق جواله بذيك اللحظة وتفاْجا من اسم المتصل(امي يتصل بك)
رد بسرعة..
تركي نعم..
ام تركي انزل ابيك شوي..
تركي خليها بعدين..
ام تركي بحزم لا اللحين ضروري,,,
قفل الجوال واخذ مفاتيحه وطلع من الغرفة وتركها بروحها بعد ماطلع فيها قهره وغضبه وعصبيته ويمكن لو مااتصلت امه كان كمل بس اتصال امه انقذها,,,,,
نزل بسرعة وكانت امه وابوه جالسين معهم مرام..
تركي بضيق في شي..
ابو تركي أي في....امك قالت لي؟
ام تركي تركي علامك انت العاقل يبى...
تركي بنرفزة يمه..
ام تركي احنا كلنا كنا سوى جالسين ومبسوطين لين جت النسرة وقالت ان اخوك بالبحرين انا نفسي تفاْجات عبدالله ماله بالعادة يروح ومايقولي اذا كنت ابي شي من هناك بس مشيتها وقامت نوف مع مرام يجهزون الاغراض علشان نطلع نشرب لنا قهوة برى لين يخلص ابوك شغله ونروح بيت اختك...
مرام شالت نوف عبايتها بعد اصرار عبير ان عبدالله ماهو هنا ولو كان تركي ماهو هنا شالت هي بعد عبايتها وقالت لنوف تطلع الصينية برى بالوقت اللي انت كنت نازل فيه ..
كان يسمعهم وهو ساكت..
ام تركي تركي..نوف ماسوت شي يخجل لاسمح الله بنت عمك ومن صغرها معنا وعارفينها زين وعارفين طبعها؟
ابو تركي عسى بس مازعلتها ولا ضايقتها؟
تركي للحين لا....
ابو تركي ولا بعدين بعد....انت ماتعرف بنت عمك ولاماتعرفها؟انا حسابي مع مرة عبدالله بس يرجعون المشكلة كل ماادق لجواله مغلق...لكن وين بتروح مني اليوم تصفية الحساب وبعلمها قدرها زين..
تركي بغضب لاخلها علي انا اللي باءدبها....
ابو تركي انت روح لبنت عمك راضيها لو كنت مزعلها..
شال مفاتيحه وهو يمشي للباب وبيطلع بعدين..
ام تركي تركي...
تركي بضيق لارجعت بشوف شسالفتها اللحين مالي خلق شي؟
كان يدورها وينتظرها تجي وماجات رغم انه متاْكد انها تدري انه بروحه وحسام مشى من زمان....
قرر انه يروح يشوف وينها فيه..
طلع يدورها يمين وشمال لين لقاها جالسة بالصالة وضامة ركبتها لعندها ومبين انها تبكي..
ناداها بهمس ورفعت راسها بسرعة ومسحت باقي دموعها...
تقرب منها وهو على كرسيه وقال بحنان شفيك..
مشاعل ولاشي...
فواز تقرب منها وعدلت هي جلستها,,,,
فواز وهو يمسك يدها مو معقولة مافيك شي..
مشاعل كنت انتظر حسام يطلع لاني مليت من القعدة بروحي وشوفة عينك محد وصل من اهلي لسه؟
فواز بثقة بس حسام طلع من زمان يامشاعل؟
مشاعل بارتباك ها.....
فواز شفتي ان انتي فيك شي؟
مشاعل بارتباك اكثر لا ..هو يمكن يوم طلع ماانتبهت له يمكن كنت فوق...
فواز اممم...طب في احد جانا يوم كان حسام هنا؟
مشاعل بخوف لا....
ظل يناظرها ثواني وحست بالخوف والارتباك ليش كذبت عليه ماتدري؟؟؟
توه بيتكلم ومبين ان لهجته كانت فيها شوية صرامة وعصبية مشاعل..
قاطعته بسرعة وكانها كانت بتتكلم قبله راشد,,,
ظل يناظرها وماقال شي,,,
كملت بنفس الارتباك والخوف راشد كان هنا.....فواز انا صرت اخاف منه...مااشوفه الا بوجهي؟شلون يدخل ماادري؟شنو يبي بعد ماادري....
فواز وليه ماقلتيله يجيني بالمجلس؟
مشاعل بخوف انا كنت بالحديقة ومالقيته الا بوجهي....حاولت اصرخ وماحد سمعني...
فواز بغضب ليش هو تحرش فيك؟
مشاعل يمكن كان بيسويها وطلعة حسام منعته...
فواز طيب وليه ماقلتيلي بمجرد شفتي حسام يطلع؟
مشاعل راشد يبي شي....جياته هنا وراها شي يافواز؟
فواز تنهد طبعا يبي شي....مو حضرتك حامل بولدي اللحين....في رايك اللي يبي يذبح الابو بيهمه ان الولد يعيش؟؟؟
مشاعل بخوف يعني صدق هو ورى الحادث؟
تنهد وقال أي...
مشاعل بزعل وانت ليش ساكت له؟
فواز ومن قال لك اني ساكت....انا قاعد اجمع اوراقه بهدوء تام..كل دليل ضده قاعد ينحط بملفه والى جيته هاذي انا قاعد اشوفها على مهل واشوف وش قاعد يسوي فيها..
مشاعل راشد بالنسبة لي انتهى وعلشان ارميه رمية مااندم عليها لازم اجمع له كل سيئاته ومواقفه السودة معي علشان لااندم اني انهيت حياته وهو عمي؟
مشاعل طب لمتى ؟؟؟لين هو ينهي حياتنا انا وانت اكثر واكثر؟
فواز هانت..ماباقي شي يامشاعل ......
رمت نفسها على رجله تبكي من الخوف من اللي جايها وقام يمسح على شعرها بحنان....
فواز مشاعل للحين انا اقولك بيت اهلك احسن لك...
مشاعل بصراخ ماابي اروح مكان ابي اموت عند رجلك؟خلاص افهمني لاعاد تفتح ها السيرة ثاني يافواز؟
شي واحد بس كان يدور في بالها..
تركي وشكه فيها؟وها الشي اللي ماراح تسمح له ولاتغفر له عنه لو صار؟
والاهم من هذا كله هي اذا زعلت منه اللحين وين تروح؟
ها الشي اكيد من صالح تركي...لانه متاْكد مية بالمية ان ماعندها مكان تلجاْ له...
لابيت اخو ولابيت جد ولااي احد من العيلة كان يبيها قبل علشان يفكر ياخذها عنده بوقت ضيقها؟
كانت تمسح دموعها وهي تناظر بصورة تركي المعلقة على الجدار....
تركي يحبها...ويحبها بجنون بعد....وها الشي تعرفه هي ويعرفونه الكل....
هل معقولة يدخل الشك بقلبه عليها من ها الموقف؟وعبير وش مصلحتها اصلا تسوي كذا!!!
وعبدالله وش بيكون موقفه من اللي صار؟؟؟
منو بيوقف معي ومنو بيوقف ضدي ها المرة؟
تركي وش راح تكون نظرته فيني بالايام الجاية وياترى هذا الموقف صار من تخطيط عبير بروحها ولا معها احد؟؟
تركي بيصدق اللي صار وبتكون حياتي معه اشبه بالجحيم وسط شكه وغيرته؟؟وياترى هل هو سامع شي من قبل ولا واصله عني أي شي انا وعبدالله وكان يبي يصير ها الشي علشان يتاْكد؟؟
ياربي راسي بينفجر مو قادرة اركز بشي...
اصلا انا مو مصدقة الكلام اللي قاله لي تركي....
وين اروح اللحين؟لمنو اللجاء لغيرك ياربي,,,انت الوحيد اللي عارف بنفسي وبنفوس العباد..هونها يارب هونها...
على كورنيش الخبر ,,
جلسوا مقابلين بعض وكل واحد شايل بقلبه هم مو طبيعي,,,,
نواف وسالفة ياسمينته اللي تعقدت بينهم الامور بشكل اكبر واكبر وجرحه لها خلاها تبعد عنه بشكل كلي وتكرهه اكثر واكثر,,,
تستجيب لكل مطالبه وتعطيه كل شي يبيه بس كله ببرود وبدون نفس ومابينهم أي كلام ونقاش ,,,
تركي والسالفة اللي صارت له اليوم....نوف اكبر شي بقلبه مايتصور انه يجرحها ولايزعلها وهو يموت اللي يفكر مجرد تفكير انه يزعلها,,,,
شلون راح تصير الامور بينهم بعد اللي صار؟
اكيد انها اللحين زعلانة وجالسة تبكي...
غمض عيونه لايتخيلها تبكي ومتضايقة وهو السبب!!
شيسوي بنفسه بس,,,,
يوم شافها بها الثوب العريان طالعة واخوه جالس برى جن جنونه حس ان الدنيا كلها تدور فيه,,,
ماعرف شيسوي,,,,
قطع الصمت نواف يوم قال تهقى بتتصلح الامور بيني وبينها؟
تركي بلامبالاة قلت لها انك مابترد مرتك؟
نواف باالم أي..
تركي وبعدين؟
نواف بالم اكبر قالت انه مايهمها اصلا انا وحياتي مانهمها بشي...
تركي وليش قالتها؟
نواف بتنهيدة لاني جرحتها وبمجرد اقول لها شي تعيد لي الكلمة اللي جرحتها فيها علشان اسكت وماطلب منها أي شي,,,,ماتتخيل حياتنا كيف صايرة....
حتى يوم كانت علاقتنا تجي بالاجبار كانت اهون الف مرة من انها تكون مثل قطعة جليد باردة مالها أي طعم!!
تركي في النهاية انت السبب؟
نواف بضيق مو عارف شسوي ولاشلون ارضيها؟اصلا انا ماادري وش اللي تحبه وشنو اللي تكرهه علشان افكر ازعلها واراضيها؟
تركي ترى الجدار اللي بينكم اذا انترك فترة اطول بتتعب على ماتوصل لها يانواف...لاتترك المجال لها انها تبعد عنك اكثر واكثر,,
تنهد نواف وماعلق وسكت تركي..
نواف افهم من كلامك انك بتروح الليلة تراضي نوف؟
تنهد تركي وقال بضيق هي ماغلطت يانواف؟وكلام اهلي منطقي!!بس انا عميت عيوني وماقدرت اشوف شي ثاني..كل اللي كان في بالي انها كانت بثوب عاري قدام اخوي؟ماقدرت اشوف لاالصورة اللي قبل ولاالصورة اللي بعد؟
نواف أي....
تركي غيرتي اخذتني وانهديت فيها وانا متيقن انها زعلانة مووت مني اللحين ويمكن حتى لو توسلت لها ماترضى عني وهذا حقها بس انا ماقدرت امسك نفسي ولو شوي عنها,,,,
نواف وش اللي مقعدك مدام تدري انك غلطان وانها مالها شغل بالسالفة قوم روح لها وراضيها؟
تركي احس اني لسه متوتر وقاعد افكر كيف اذبح ذيك اللي ماتتسمى ,,
نواف طب يمكن خطيبة عبدالله مالها شغل؟
تركي اقولك قايلة لااهلي يعني السالفة كلها من تخطيطها؟وبعدين حتى لو مالها شغل هي يبيلها تاءديب يبيلها تاْديب انا احد يحط دوبه ودوب نوف لايمكن ارضى عنه ولازم اعرفه حدوده؟
نواف تهقى ممكن تترك لك البيت وتطلع؟
تركي بضيق نوف...تطلع وين تروح؟هالشي انا عارف انه بصالحي بس بعد يضايقني....اني احس ان ماوراها احد تلجاْ له لو ظلمتها انا يانواف؟
نواف بس انت تحبها اكثر من أي شخص بها العالم معقولة ممكن تظلمها بيوم من الايام؟
تركي وهو يقوم قال بمرارة وهذا انا ظلمتها اليوم؟
سعد بهمس تصدق؟
مشعل وهو ينزل راسه لمستوى سعد شنو؟
سعد وهو ياْشر على احمد اللي ياكل همبرجرته هذا بيطلع لنا ذهب؟
مشعل شلون؟
سعد اليوم بس قدر يجيب لنا خمسة وستين ريال على اساس انه يبي يروح البقالة....ولاحظ مو كل الاطراف عطوه مجرد اربعة اشخاص بس,,,تتوقع لو اجتمعت العيلة كلها كم بيقدر يجيب لنا,,؟
مشعل باعجاب تتوقع انه يكون وسيلة دخل ممتازة؟
سعد الا واثق ياعمي....
مشعل طيب افرض انه راح بلغ عنا وقال ان احنا اللي قايلين له يجيب الفلوس؟شنو راح يكون موقنا...
سعد .........
مشعل طبعا هو بيقول للكل بما فيهم ابوه...تخيل نظرة نواف عنا؟؟؟وتركي وعبدالله والكل؟
سعد لاتخاف هذا نحطه بجيبنا ونضمن انه مايقول لااحد؟
مشعل لا ياعيوني انا ابي دراسة محكمة للخطة ماابي اسوي شي عشوائي واروح فيها بعدين؟
سعد لاتطمن انا بجهز كل شي بس في مشكلة تواجهنا؟
مشعل شنو بعد؟؟
سعد هل في كل مرة بيقول ابي فلوس بيعطونا؟وشنهي بتكون الحجج في كل مرة؟
مشعل زين انك فكرت بها النقطة قبل لانبدي مشروعنا..
احمد بتجون تنامون عندي الليلة مثل ماوعدتوني؟
سعد أي طبعا بس نخاف ابوك مايرضى؟
احمد ماله شغل انتوا بتنامون بغرفتي مو بغرفته؟
سعد أي كفو خلك كذا دايم قد كلمتك...
مشعل اقول احمد انت منو تحب اكثر بابا نواف ولامشعل وسعد؟
احمد العم مشعل والعم سعد؟
سعد معناته بنبدي نحط النقاط على الحروف الليلة ونشتغل في مشروعنا الجديد؟
في بيت ابو تركي...
ام تركي نوف...
نوف من ورى الباب هلا خالتي....
فتحت لها ...
نوف تفضلي...
ام تركي قومي نزلي قعدي معي شوي..عمك شوي وبيودينا لمشاعل...
نوف يالله بس البس عبايتي...
انتظرتها عند الباب لين لبست عبايتها وطلعت معها ومشوا مع بعض لين الدرج..
رغم ان ام تركي جاية تفتح الموضوع معها بس يوم شافت باقي اثار دموع نوف على وجهها وسكوتها فضلت انها تسكت وماتتكلم,,,,
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك