رواية بلا رقيب -14
للحضه يمكـــن المزيــونه بنت خالته اللي كانت بيتزوجها وأنتشرت صورتها لايكــون نازله لها صوره جديده ولامقطع فيديو أيه البنات هالأيام مايجيبون لأأهلهم الاســواد الوجــــه .. انا وش قاعد أسوي خل ألحق على هالخبــل قبل مايرتكب جريمتــــه ..
وقفت سيارتي تمشيت حال ودقيت على خلف أشوف وينــه .. وسمعت دقت جواله العاليه شفت خياله بالظــلام يرفع جواله يطالع بالرقم ..
قربت منــه وجلست جنبــه ..الله يستر راسه اللي منزله مايبشر بخيــر ...
عســاف :خلف ..
خلف والشرار يتطاير من عيــونه:ذابحها ذابحها الله لايعــوقني بالشـــــررر .. جلس يسب ويلعن فيها وبأهلها اللي ماعرفوا يربونها ...وبنت .. وبنت .. وبنت ....ماقدر أسكته لين هزيته ..
عســاف بقهر :خلف ولعنه تكلم قلي وش السالفه ...
خلف :وش أقولك فضحتني الله يفضحها الله يلع.. الفاجـ..
مايبرد نار قلبي الا ذبحها ...
عساف :قلت لك وش صــار ... والا أقول تعال أركب وقلي وش السالفه ...
ركب خلف وصقع الباب وراه ورمــى بحجري جــوال ..طالعته بأستغراب ..
عسـاف :وش هذا .. وش اسوي فيه ...
شفت خلف يصد عنــي وركى يده اللي ترتجف من القهر على الشباك..
خلف :اقرأ الرسايل اللي فيه وركز على أخر رساله وارده ..
فتحت الجوال وأنا خايف من اللي بشـــــوفه ... وقريت أول رساله وماخلصت الا وأنا حاط راسي بين يدي من الصدمــه ريم مستحيل ماتسويها بنت عمي وأعرفها ..
(( .. آسف حبيبتي أني دقيت عليك نسيت انك بزواج السنيورا أختك وأكيد ماراح تكــونين فاضيه لي .. بس حماسي لسمـاع رأيك باللي سويته نســاني تقولين وينك من أسبوع عن التهنئه أقول لك ماكنت واثق من نجاح أنتشار الصوره لين شفت صورة جميلة الجميـلات هنــد الـ .......... بجــوال واحد من الشباب .. ماقلتي لي وش سوى زوجك عسى وصلته الصوره اذا ماوصلته انا حاضر أوصلها له بنفســي ... الريم يابعــد قلبي تدرين كل اللي سويته من شانك لاتنسين أبي أشوفك قريب حبيبتي أشتقت لك .. كل حبي سلطـانك ..))
الحلقه الرابعــه عشــــــر
((1))
[..خيــــــانه ..]
عسـاف
قريت الرساله مره وثنين وثلاثه لين صار الشك فيها قمــة الغباء المـوضوع واضح ومايحتاج له كل هالتفكيــر وكل شــي بهالجــوال يدين الريم .. اللي سوته الريم ماينغفــر كيف تكــون على علاقه مع شخص ثاني وهي متزوجــه صدق أنها حقيــره خبيثه ملعــو ......
قلتها وأكررها للمـره المليون البنات مايجي منهم الا سواد الوجـــه هذي وهي متزوجــه .. هذي خيـانه الصراحـه مألوم خلف أنا حاس أن دمــي يغلي وسط عروقــي .. اللحيــن ماني بالريم قلعتها عسـاها للحريقه تشيلها انا بخلف هذا اللي حالف أنه يقتلها ومســدسه بجيبه وجالس ينتظر رجعتها ..
عسـاف :خلف تكفى أقصر الشر لاتكلمـها ولاتجيها طلقها وأفتك من وجها ماتستاهل أنك تضيع عمـرك عشــانها علم أهلها بالسواد وجـها وأبوها وأخوانها يتولون أمــرها ...
بس خلف ولاهــو معـي وكأني أتكلم على نفســي أنا حاس باللي داخله ويمـكن بعد ماني حاس لأني ماجربت هالشعــور .. معقوله تخــوني ضحى بيوم وليش ضحــى بالذات هذي مصيري أطلقها وأنســاها ليش هي بالذات اللي أفكر بخيانتها بكل بساطه لأن ماعنــدك غيــرها اللحيــــن .. اوف حنا بأيش وأنا جالس أفكر بأيش ...
عسـاف :خلف طلبتك ....
بس خلف ولا رمــشت عين ..
قمت من عنــده وأنا أدور على نفــسي وأصفق كف بكف
خلف بيضيع وأنا واقف أطالعه ومابيدي شــي أسويه
.. من يقدر على خلف وهــو غضبان مأحد يقدر يوقف بوجـهه ولايغير من رايـــه الا لحضه فيه اللي يقدر على خلف وأبو خلف بعد زي أنه طرى على بالي ... بعــدت عنــه بمسـافه كفيله أنها ماتوصله صوتي وأتصلت بالشخص الوحيــد اللي احس أنه يقدر يغير من قرار خلف ... رنين متواصل ومحد يرد كنت خلاص بديت أفقد الأمل يوم أنفتح خط الطرف الثاني ...
عســــاف :اللو مباررك ألحق ... اوووف أنا عسـاف عســاف .. ايه أسمـــع .. أدري أنك متبري منها اللحين من جاب طاريها ..بكلمــك عن خلف .. ايه خلف أبيك تلحق عليه قبل مايضيع نفســـــه .. اسمــع ... وقلت له السالفه كامــله .. وهو صك من عنـدي حتى قبل مايقول مــع الســــلامه ... كنت بأحبط لوماكانت هذي ردت فعله .. سمعت صوت رنيــن جوال خلف وشفته متردد يرد اولا بالأخيــر زفر زفره قــويه ورفعــــــه .. طول المكــالمه كنت على أعصــابي صح خلف يحترم مبارك كثير ويعتبره بمنزلة أبوه بس خلف بهالحاله ماتقدر تخمن وش ردت فعلـــه والمــوقف اللي فيه مره صعب
اللي خانتــه زوجتــــه اللي دام زواجهــم سبع سنيــن ريم كانت أول وحــده يتزوجها خلف .. كنت احس أن علاقتهم قويه وأحترامهم للبعض كبير وشي ثانــي أن ريم بنت عم أبوه بأختصـار بنت عمــه لحمــه ودمه خيانتها له شــي كبير مايصدقه عقل والشــي الثاني اللي سوته يوم نشرت صور خطيبته خطــــــأ صعـــب يغفره ..
ماني مصدق أن ريم تسوي مثل هالــشي كنت احسب الأنحراف والتصرفات المنحله هذي ماتصدر الا من بنات الشوارع ليش بنت محترمــه مثل ريم تلجأ لمثل هالعــلاقات اللي ماتجلب لصاحبها الا الفضايح هي لاهي صغيــره ولامراهقــه عشـان تنخدع بكلام الشباب المعســول .. ماني قادر أفكر راسي بينفجــر ..ومكالمــة خلف ومبــارك عيت لاتخلص .. وصـوت خلف وصل لأخر الرياض .. وأخيراً أنتهت المكــالمه ...
خلف وهو يقوم يوقف :أعجبك يعني اللي سويتــه ...
عســاف :ماكان بيدي شــي كنت بتضــيع نفسك ... وش صار ..
خلف :ماصك من عنــدي لين حلفت له أني مأسوي لها شـي وهو بيتصرف بطريقته .. بس هين تشــوف الملعــ...... أذا مافضحتها ..
عساف :خلف انت مجنون أنت بتفضح نفسك قبل ماتفضحها ...
خلف :خلاص انا ماني قادر أفكر .. طلعني من هنا لأنها لو رجعت وانا مــوجـود بذبحها الخيـــــانه ...
ماصدقت أنه هو اللي طلب مني أنه يطلـــــع ..
سالته وانا أطلع السيــاره :تبغــى مكان معــين ...
خلف بتعب :أي مكــــان ..
شفته بطرف عينــي يحوس بجواله ... وتمتم (هذي ليش ماتررد )..
كنت بسأله عن مــن يتكلم بس خفت من عصبيته .. والله حاله أنا عمــه وأخاف منــه ..
سمعت يكلم وهو معصب :ساعه على ماترديــن ..
وسكــت وشفته يطـالع بالجــوال ... ومسكت ضحكه كانت بتفلت منــي قفلت بوجــهه .. بس أول مره أدري أن خلف يكلم بنات كنت عندي شك ويمكـن أحسـاس أن هالأمــر عادي عنـده بس اول مره اسمعه يكلم وحـده ..
بس هذي شكلها مـره تمــون عليه ولا تقفل بوجهه وشكـله الموضوع عنده عادي لأنه رجــع يدق عليها ولا ليه عليها يمكـن على وحده ثانيـــه .. ياحليلك ياخلف والله طلعت منت بهيـــــن ..
خلف :أعذريني ماكان المفروض أكلمك بهالطريقه بس تعبان شــوي ..
لاااا عاد هذي قويه خلف يعتذر ...
وكنت بهالوقت موقف بأرض فضا نزل خلف وراح يمشــي بعيد وهـو يكلــــم .. أفا أجل طلعت هذي سوالفك ياخلف لا وبعد بنت تقفل بوجهك وانت تعتذر منها مأتصور نفــسي أقول هالكــلام بوجهه ..
×@×@×@×@×
((2))
[..من اجل الأخــوه ..]
مــلاك
بعد ماتركتنــا ميشو جلست أفكر بالي أطلبته منـــي .. معقــوله مشــاعل أختــي حقيـره لهدرجــه ووصلت فيها الدناءه أنها تفرق بين مـره وزوجـها .. من الريم ووش اللي خلـى ميشـو تصرف معها بهالطريقه .. اللي أعرفه عن مشـاعل والصوره اللي أشوفها فيها تخلينــي أحتار أنا اقول أنها ماراح تسوي هالشــي الا عشـان دافع قــوي .. الكـلام هذا أقوله عشــانها أختـي ومأبي أشوفها بالصوره سيئه بس بالحقيقه انا ماعرفت مشـاعل زين عشـان أحكم أنها ممكــن ترتكــب مثل هالغلط .. أنا مأقدر أقول أن دافعها زيــن لأن مافيه أي سبب بالدنيـا كلها يسمح لها تســوي اللي تســويه الا شـــيء واحد أن ريم ســوت كل هذا صدق ومشـاعل موقاعــده تظلمـها قد ماهي قاعده تفتح عيــون زوجهــا وتكشف الحقيقه لاغيـــر .. بس لوكان ذا صدق من هالنـاس ومن وين تعرفهم مشاعل ... قطع حبل أفكــاري رنيــن الجــوال وكان الرقم
ميشــو انتظرت ثواني ألتقط فيها أنفاســي قفلت عيــوني وضغطت على زر الأتصــال دق لين قطـــع بدون مايرد أحد وأرتحـت ان الخطــه زبطت ومارد قبل مأقفل ... فتحـت على الرسائل المحفوظـه وطالعت بالرساله وحسيت بالضحكـه المكتـومه داخلى بتنفجــر لأن هذي أول مــره أشوف فيها كلام ميشو بالعــامي وكان فيه كذا كلمــه عدلانها أنا وســارا لأنها كاتبتها بالفصحــى ... ترددت قدامها بس بعدين ضغطت على زر الأرسال وماهــديت لين تم ارسال الرساله .. جلست على أعصابي أنتظر أتصاله اللي يمكــن يجي ويمكــن لا .. أنتفضت يوم رن الجــوال فجأه وكان اسم الريم يأشــر على الشاشه.. أرتجفت يدي وطالعت بـ سارا اللي تنتظرني أرد على المتصل مثل ماكـنا متفقين مــع ميشـو ..
سارا :ارفعيــه مو المفروض انت الحبيب المتيــم كيف تترك حبيبتك تنتظرك كل هالمــده .. وكررت بالســخريه ..
سارا :رد ياسلطان الولهان ...
وصوت داخلــي صررررخ ردي لاتخذليـــــــن مشــاعل ردي مثل ماوعــدتيها .. سحبت نفس عميق وأغتصبت كحـه قويه عشــان ينبح صــوتي وغمضت عيــوني وأنا أضغط على الزر الأخضـر ... سمــعت صدى أنفاس الطرف الثاني واللي كانت تعبر عن مدى غضبه ..
سلطــــان :مســاء الخير ولاأقول صباح الخيــر حبيبتي أشتقت لك حيــــل يابعـد قلبي .. وش رايك بحبيبك حبيبتي بطل مــو كل اللي طلبتيه منه سويته وزياده بلاه مأستحق مكافأه على اللي سويتــه ماراح أطلب كثير بس أشوفك بمكــانا المعتـاد بكره على العشــاء ... وسكت شوي الريامــي حبيتي وين رحتـــي ..
كان صوت دقات قلبي مثل الطبــول مأدري ليش حطيت نفســـــــي مكان الريم المسكينـــه ماحسدها على اللي بيصيـرلها الليله ..
وصلني صوت الطرف الثاني صوت جمــدني من حق سلطان المسكـين يرتجف ويتلعثم ......
الطرف الثاني :من أنت ...؟!
سلطـان :هاه أنا آسف شكلي غلطـــــان ..
وقفلت بالســرعه .. ماحسيت بالغلطه اللي سويتها لين صرخت فيني سارا ..
سارا :ملاك يالغبيه مشـاعل ماقالت كذا قالت قفلي الخط بوجهه ...
ملاك :طيب وش بيصير الكلام اللي قلته عادي ماراح يغير شــي ...
سارا :صح مأدري بس يمكـن ميشو لها غرض من السكـوت اللي طلبته منك ...
ملاك :لااا انا عارفه ليه مشـاعل قالت لي أسكت ومأرد تحسبني غبيه وماراح أقدر أتصرف ...
سألتني سارا السؤال اللي سألته نفسي مليــون مره وللحيــن ماقدرت القى له جــواب ...
سارا :وش غرض ميشو من كل هذا ..
ملاك :تفكرين باللي أفكر فيه ..؟!
سارا :قصدك أنا ميشو شريره ..
ملاك :هذا مو شــر هذا شغل الابالسه والشياطيــن ...
سارا :لاتقولين أنك ندمتي على الخدمـه اللي سويتيها لها ...
لاماندمت ولا أقدر أندم على خدمـه سويتها لأختــي حتــى لو فيها شــر حتى لو بضر أشخاص ثانيــن وش يعني أهم شــي أكـون ساعدت أختــي يمكــن بهالطريقه أقدر أكسب مشــاعل وأتغلب على الحـواجز اللي حطتها هي بينــا بالأخيــر حنا خوات ومالنا غير بعض .. تذكـرت أني ماجاوبت سارا على سؤالها ...
ملاك :لاماني نادمــه ولو بتطلب مني مره ثانيــه أي خدمـه بنفذها لها ....
سارا بأستهبال :حتى لوخارج الساعه المجانيه ..
ملاك :ايه حتى لوخارج الساعه المجانيه ..
يااحبيلها ساروانه شكلها بدت تغــــار من ميشو ..
سارا :أقول بس حطي الجـوال على الصامـت وشيليه بالدولابها وأمشـي ننزل تحـت أكيد أفتقــدونا اللحيــــن ..
×@×@×@×@×
((3))
[..فقدت الأمـــــل..]
سارا
نزلنــا ركيض من فـوق وتفاجئنا بوجـــــــــود ..
أنا ومــلاك :منيــــــرررر .....
وعــد :هوووو لايفوتكم أفرااااااج ..
مـلاك :واخيـرأً مبروك خطاك السووء ..
سارا :الف الف الف حمــدالله على السلامــه ..
منيـر :احم احم الله يسلمكم ماتشوفون شر ان شاءالله ..
ياحليله منيــر شكــله متغير كلش كلش اخخ مايستاهل اللي الحبـس اللي كان فيـــــه ..
وعــد :ايه صح تعال منيـر صدق اخوك أسمـاعيل جكـوه مـع الأرهابين اللي قتلوا العائله الفرنسيــه ...
منيـر بأستغراب :لاا من قال أسمـاعيل توني قبل امس شايفه بالمسجــد ..
ملاك :شلون لاا والأشاعه هذي منتشره بالحاره كلها ..
أي حاره صدق انا نصابين أصلاً انا وملاك مصدر هالأشاعه .. رحمته منير جالس يحلف أن اخوه بريء لايكـون حسباله حنا الأستخبـارات ..
منيــر :ياربيه والله أخوي مو أرهابي ..
ملاك :طيب طيب خلاص صدقناك ..
بس الرجال شكلـه من صدق زعـــل .. بس كالعاده مايعرف له غيـــــر نواف ..
نواف :خلك منهن يارجال ذولي حريم ماوراهن الا وجــع الراس ..
منيــر :الصراحه خواتك ذولي مايقدرن وأنا اللي جاي وجايبلهن خيــر بمليـــــون ريال ..
منير عنـده خبرلنا يافرحنا يافرحنـا أكيـد خبر عن جابر ...
سارا :وش تحتري للحيـن ساكـت هات قول غرد أطربنا ..
ملاك بحماس :نسمعك ..
قعد يسوي حركات وكأنه بيلقي خطاب سياسي ..
وعد :مرمر ياشينك ...
شهد :اوووووف بس الواحد مايقدر يتابع التلفزيــون بالراحه لازم هالقلق ...
شوفوا السخيفه مالت عليها بـــس موناقصين منحرفين حنا بعــد يجلسون يتأمرون علينا بس خلوني ساكته .. والله لوضحــى موجـوده مافتحت فمها ...
منيــر:هييي شهـوده وش فيك معصبــه ..
شهــد :وععععع شهــوده منك طالعه بايخــه ...
منيــر بخبث :بس من غيـري حلوه صح وخصــوصاً من واحد أسمه يبدأ بحرف الفاء ..
شهــد بقهر :انثبر أنت مالك دخل بعـدين لاتسـوي فيها بتهددين ترى كل هاللي جالسين هنا يدرون ...
هذولا شعنــدهم وش شهــوده وحرف الفاء ..
لايكـون عارف ان شهـد تكلم خيبه هذا وش دراه .. ومن غيرها السوسه وعد ..
ملاك :بس ياشينكم وانتي مرره فرحانه بعمــرك .. انت انجب وياويلك لو سمعتك تكلم بهالمـوضوع مره ثانيــه ويالله قول وش عنـدك ..
منيــــر :مع أن الجـو خرب والخبــر ماصار له طعم بس أمري لله بقوله ... الخايب جابــــر بيملك يوم الجمـــعه ..
وش يعني بيملك يعنــي خلااص مافيه أمل جابر بيتزوج غيــــري لامستحيل كيف ...
ملاك:سارا ياعمري ولايهمك هو الخسران وين يلقى مثلك ...
طالعني منير بالطريقه غريبه والتفت على ملاك ...
منيــر :هذي من صدقها تحبــه وعععع الحمـدالله والشكـر وش لاقيه فيه أنا أحلى منــه .. والله لو تزوجك بتضيعين حياتك معه هذا واحد غبي فارغ ماعنـده سالفه بس تجلسين معه تكرهين عمرك..ليغرك مظهره الخارجي هو من داخل أتفه منه مافيه ..مــع أني اكره قيس اكثر منــه بس لجينا للجد قيس أفضل منه بألف مره ..
مستحيل هذا وش قاعد يقول أكيد يتكلم عن واحد ثاني غيـر جابر ...
تمالكت نفســي وحبست دمــوعي مأبي أبكــي مأبغى أكون ضعيفه انا من زمان كنت عارفه انه مستحيل يفكر فينــي .. ليش اللي مثلنا فيه أحد يطالع فيهم ..
سارا :ومن بيأخذ ..
منيــر :بنت وحده من قرايب أمــي .. يالله عاد لاتقلبونها نكــد ... أناا جاااي مشتاق لكم حيـــل ...
ملاك :تشتاق لك العافيه يمل العافيــــه ...
منيــر :والله مأدري هذي دعوه لي اوعلي بس يالله نمشيها الا صدق أمكم قصدي أبوكم ضحــى وينهــا ...
سارا :الحكــومه نايمـه ليه عاوز منه حاقه يعني احنا نحل مكـانها ...
منيـر :لاثانكس مش عايزين منك انتي خصوصاً حاقه ولا أحد يحب جابرررر وعععععع ..
تبون الصراحه كلام منير بدأ يأثر فيني مادام اخوه قال عنه وعع يعنــي وعع ..
وفجأه دخلت علينا ميشو وكانت تلهث وشكـلها رايحه فيها ..
ميشو :ملاك تعالي أريدك .....
وبعد ماطلعت ميشو ومعها ملاك .. علق منير ..
منير :احلى حركات ميشو من متى تعطيكم وجـه خبري فيها تدخل وتطلــع بدون ماتعبركم ...
والله فاضي هذا يهذر وأنا خاطري ألحقهـــم أبي أعرف ميشو وش عنــدها .. أحسن شــي أصرفه بعدين ترى الوقت مره متأخر النور شوي ويطلع ..
سارا :اقول منير موكنك مرره تأخرت اخوانك يدرون أنك عندنا ..
منير :لا أعوذ بالله بس وش ورانا بكـره الخميس ...
ايه هذا شكله راعي طــويله ألحق على توأمــي العزيز قبل ماتقضي عليها المتشرده..
فتحت باب حجرة ميشو بالدفاشه خلتهم يتطامـرون ...
ملاك :سارااا ولعنـــ .. ماتعرفين تفتحيــن الباب بهدؤ ..
سارا قلت وأنا أجلس بينهم ..
سارا :متى العزا ..
ميشو بالدهشــه :عزا مــــــن ..؟!
سارا :عزا المنحــوسه ريم ..
ميشو :لأعلم سأسئل وأرد عليك ..
مــلاك :ياسخفكم والله ضميـري بدأ يأنبني ..
أحلى عندها ضميـرملاك الصراحــه معلومـه جديده
بس وين هالضميــر لصار المـوضوع فيه مقابل مادي ..
سارا:اايه صح ميشو ماسمعتي اخر الأخبــار ...
ميشو :لاتعجبني الأخبار ..
قلت بأنكســار والله كل ماتذكرت أني كل هالسنين قضيتها أنتظره أتحطم من داخل حتى لو ماكنت احبه بمعنى الكلمــــه ..
سارا :جابر خطب وبيملك يوم الجمـعه ..
الصراحه انصدمـت من حركة ميشو تصوروا بدال ماتطالع فيني كانت تطالع بمــلاك .. وأخذت يدها بين يديها ..
ميشو :لاتحزني هــو الخاسر ..
قلت بتعجب هذي وش قاعـده تقول ...
سارا :هييي على فكره انا سارراا ..
أرتبكـوا ثنتينهم ...
وقالت لي ميشو وبعيونها نظره غريبه ..
ميشو :هل حقاً ترغبين بالزواج ....
كنت بقول لها أذا صارت تشتغل خطابه ..
بس ملاكي سبقتني ..
ملاك :احلى مشاعل من متى صرتي تشتغلي خطـابه ..
كانت تنقل نظره بينا بعدين تكلمت بجديه ..
ميشو :اريد جواب صريح على سؤالي من ترغب بالزواج ...
ملاك :انا بالنسبه لي مأبي ..
شوفوا الخبله هذي وش قاعــده تقــول فيه أحد يرفض عرض مثل هذا ..
سارا :أنا أكــيد أفكورررس ياليت والله اطلع من هالفقر هذا .. بس لحضه بقول لك مواصفا ت فارس احلامــي ..
ملاك :فاضيه بعد بتحط مواصفات احمدي ربك على العريس اللي بتجيبه لك الخطابه ميشــو الفين وسبعـــه ..
ايه وش فيها ذي قاعده تحطم فينـــي .. والله أني أهبل من زينها عاد هي ولا كنا توأم هههههههه ..
لاتضحكـون انا بس أضحك ..!!
بس هذي من صدقه بتجيب لي عـريس انت شكو أسألكم هي اللي عندها الجــواب ..
سارا :ميشومن جدك عندك عريس لي ..
ميشو :لم أتلفظ بهذا ولكــن سأبحث لك ..
سارا :ايه بس لاتنسين أبيه وسيم ومليونير ..
ميشو : وايهم بالأولويه ..
أحترت اهم شــي يكون وسيم ولامليونيـــــر .. لا أنا متصور نفسي متزوجـه واحد بشـــــع يعني أهم شـي يكون وسيم ..
سارا :طبعاً الأولويه للوسامــه ..
هزت راسهـا وكأنها خلاص فهمـت لأبيه .. يااااااي ياليتها تكــون صادقه واتزوج وأبعـــد عن هالمكــان .. بس فيه شي مكـدرني كيف ببتعـد عن خـواتي لااخلاص شكـلي بغير رايي .. لاخلـوني أول أشوف عريس الغفله بعــــدين أقرر ..
×@×@×@×@×
((4))
[..تــــوأم العسل ..]
ميشـــــو
لأستطيع الا أن أبتسم وأنا أحضــر المشـادات بين توأم العســـل تستغربون هذه التسميــه لو رأيتوا التوأم لن تستغـربوأ هذه التسميــه ولأنكم لم تروهم ولن تروهــم
دعـوني أخبركم بمـواصفاتهما فهن كل مافيهـن بلون العســل البشــره حريريه سمــــــراء صفاءها كصفاء العسل.. العيــون عسليه.. والشعـــــــر بلون العســل المتخثر ..
صاحت بي ساراا ..
سارا :وش عندك معجبــه ..
كشرت عند هذه الكلمــه ..
ميشو :لم تخبريني بمواصفات فارس أحلامك ..
القت بنفسها على السرير وهي مغمضة العينين وتحدثت بعاطفه جياشه
..
سارا :ابيه أبيض وطـــويل وشعــره أسود وعنده سياره أخر موديل ودايم بيده سبحه وباليد الثانيه الجـوال
والألف عنده مثل الريال .. ومامعه الا أبتدائيه عشان مايصير أحسن مني ووبس ..
لم اتوقع مواصفات غيـر هذه من فتاة حالمـه مثل سارا ..
ظلتا ساعه اخرى في حجرتي حتى أصابني بالضجـر فضطريت لطردهـــن ...
استلقيت بعد ذالك على فراشي بالظلام وأنا أفكر بخطتي التي نجحت في نسبة 50% والخمسين الأخـرى تعتمد على قرار خلف في هذا الشأن كم أتتوق للغــد لمعرفة ماسيحـــــدث .. أشعــر بسعاده عارمــه للمافعلته بالريم
جربت ان اشعر بالذنب ولكـن لم أستطيــع كانت محاولتي مثيره للأشفاق ...
أغمضت عيناي لبرهــه ولكنــي لم أستيقظ الا بعـــــد ساعات عــديده ..
أحسست بثقل على بطنــــي فتحت عيناي بصعــوبه لأجد روبي قد اتخذتني فراش لهــا .. ابعدتها عنـي بقسوه فأنا عاده لأكون بميزاج جيــد عند الأستيقاظ من نــــوم .. وبعــد دش فاتر أحسست ببعض نشـاط
فقمـت بفتح جهازي المحـول وتركته لأرتدي ملابسي
لم يتوقف تدفق الرسائل التي كانت تصل الواحده خلف الأخرى لم أستطع ان احصيها .. وبعد ان فرغت من ارتدأ ملابسي عدت له لأجد أن اغلب الرسائل كانت من ريدا .. تخبرني فيها عن الحفله التي ستقيمها الشله في مقرها وتأمرني بأن احضر باكراً لأن هناك مفاجأه بأنتظاري .. سألت روبي القابعه أسفل قدماي اذ كانت ترغب بذهاب معــي .. ردت علي بموء أعتبرته جواب بالمــوافقه .. كنت ابحث ولكـن لأعلم عن ماذا فأفكــاري مشغــوله ولكـن بمـاذا لأعلم ووسط حيرتي تذكـرت أتصال فهــــد ليلة أمـــس الأمر اللذي لم أكن أتوقعـه منـــــه خلال الظروف اللتي يمــر بها أبتسمت للفكره غبيــه طرأت علي هل تعلق بي بهذه السرعه الم اخبركم أن الفكـــره غبيه .. حتى لو أستخدمت العصـا السحريه لن تظهر نتائجها بهذه الســـرعه.. وتحت وطأة هذه الأفكار قررت الأتصال به .. لم أنتظر طويلاً حتى رد علــــي لم يبدو عليه اللهفه لأتصــالي ولكــنه على أقل تقــدير أجاب علــى اتصالي .. وقبل أن أنهي المكالمــه ألقى علي عبــاره رسمت أبتسامة تشفي على شفـاي ..
فهـــد :تصدقين هذي اول مـره انتي
تتصلين علي فيها من نفسك بدون مأكون انا مأكسر تلفونك من الأتصـالات وأنتي مارديتي علي ..
ميشو :أجل أعلم ..
فهـــد :وتدرين بعــد أنك للحيــن رافضه تقولين لي أسمك او تخبريني أي أسم تفضلين علشان أناديك فيه ..
بهذه اللحضه بذات اختارت شدن ان تدخل وتصيح بصوت مرتفع ..
شدن :روبــــي أنتي هنا وأنا جالسه أدورك ...
وصلتني ضحكــة غير مصــدقه من فهــد .. رميت على شدن نظرات غيـــــض لم تعرها اهتمامها الذي كان مركز على الهـره الملعـــو .....,, وأنتظرتها حتى حملت روبي وخرجت لأقفل الباب ورءها ..
فهــــد :روبي ماني مصــدق .. بس مومهم اكيد لايق عليك ياعمـــــري ..
لم ارغب أن يعــرف شيء عني ولوكان هذا الشي أسم هـرتي واللذي يظنــه أسمـي .. ولشدت حنقــي صحت به ...
ميشو :هل تعلم أنك ساااااااافل فهــد أكرررهك ..
وقطعت الأتصــال ..
لم يعاود الأتصال بي يبدو أنه في ميزاج لايسمح له بذالك ولكن لايهم سيندم على عدم معاودته الأتصال فأنا غاضبـــــه ..
×@×@×@×@×
((5))
شـو شـو& قيس
كانت تشــرب ماء بارد وهي تستظل فجــدار المبنــي شافها وأرتفع ضغطه وبنفس الوقت يحــس بشي خفق بين ظلــوعه..
نزل من سيارته وقفلها وهــو جالس يمشي على مهله للمقر شغله .. ماقدر يسكت لازم يخبرها عن رجال مكافحة التسول اللي شافهم يقبضون على متسولين فالشارع الثاني وفطريقهم لهنـا .. مامداهم يسوي شــي لأنه بذيك اللحضه كانوا مــوقفين فأخر الشــارع ..
أنتبهت لهم وحس انها تجـمدت مكانها من الرعب فتح سيارته بجهاز التحكم عن بعد .. وصرخ فيها :أركبي بالســرعه ..
وقفة متردده اللي يأمرها تسويه صعـب بس الصدمـه بعض الأحيان تخلي الأنسان يسوي أشياء مايقصدها وبعدين يندم عليها ..أنتظرها لين ركبت وقفلت الباب وراها ولحقـهابهدوء قاتل يبعد عنه أي شك.. وحمـد ربه أنهم مأنتبهــوا له وتمنـى ان رجال الأمن حقين البنك بعــد مايكـونون أنتبهــوا له .. حرك السيارته بكل سلاسه وطلــــــع من المكــان .. كان يحسها موطبيعيه صمتها موطبيعـي ..
قيس :وين تبين تنزلين ..
حاولت تنطق كذا مره بس بكل مـــره لسانها يخـونها ..
شوشو :هنا بأي مكــان ..
قيس بطنازه :بس موكنا أبعدنا مره عن منطقتك ..
شوشو :الله يعافي الليموزينات .. خلاص هنا نزلني ..
قيس :لا ..
شوشو :وليه أن شاءالله لاا ..
قيس :بوصلك لبيتكم ..
شوشو :ومن قال لك أن عنـدنا بيت .. قيس لوسمحت نزلني هنا ..
قيس :استاذ قيس من فضلك ..
شوشو بطنازه :اسفه يأستاذ مادخلت مدارس عشــان أتعلم هالرسميات ..
قيس :ليش تسوين بنفسك كذا ..
شوشو :وش سويت شغله شريفه جالسه أترزق الله ..
قيس بأحتقار :تسمين الشحاده شغله شريفه..
شوشو :ايه شغله شــريفه وش فيها موشريف ..
قيس :يكفي أنك جالس تأخذين مال مو من حقك ..
شوشو :الا من حقي انا ماسرقته من احد هم اللي يعطــونيه بطيبة نفس ..
قيس :وليش أنتي تقبلينه ..
شوشو:لأني محتاجه ..
قيس بعصبيه وهو يلف بالسياره فجـأه :كذابه أشك أنك محتاجه أنتي أنســانه لعابه مأعتقد أبد أنك محتاجه أنتي أخذه الموضوع تسليه ..
شوشو :والله عاد أنا حرة نفسي ويالله نزلني هنا ولاترى بفتح الباب ...
وقف قيس بقهرعلى جنب ونزلها .. وأول مانزلت حرك من عنــدنها بالســـرعه مجنونه ..
شوشو بالضحكه :باللي مايحفظك يأستاذ قيـــــس ..
تراقب سيارته وهي تبتعــد عنها وبداخلها أحسـاس أنها مجنونه كيف ركبت معه وش اللي صـار فيها .. وش اللي وصلها لهدرجـه من الثقه الغبيه بالنفـــس ..
هذي أبد مو ثقه بالنفس لا هــذي عـدم مبالاه
لاتحسد عليها المـره هذي ركبت معه المـره الجايه الله العالم وش بتسـوي .. داخلها علامة أستفهام كبيره هو ليه ساعــــدها مع أنه دايم كان يهددها أن بيبلغ عنها معقــوله رحمها من الورطــه اللي كانت بتطيح فيها ياســــــلام يعني قيس عنـده قلب ..
صدق ورطــه عويصه اللي كانت بتطيح فيها لومسكـت بتهمــة التســول صدق فضيحتها بتصيــر بجلاجل اصلاً سلوكها هالطريق من البدايه كان غلط ..
لكن اللحين خلاص فات وقت التراجـع لأنه على عاتقهـا مسئوليات كثيــره ماتقدر تخلى عنهــا .. ناس كثيره هي مسئوله عنهــم كيف تخلـى عنهم من لهــــــم ..
بداخلها بدت تناجـي ربها وهي تستقل سيارة الأجره بترجــع للبيت يسخرها لفعل الصـواب ..
×@×@×@×@×
((6))
[..فالنهايه الدنيا فانيه..]
ضحــــــى
مـر علي الأسبوع بالسـرعه.. أسبوع سبع أيام أرتحت فيها من عســاف ماشفته فيها ولاسمـعت حسه ولافكر فيها يغثني ويتصل علــي بس راحتي مااكانت كاملــه لأني خايفه يفاجئني عسـاف مثل الثعلب غـدار مايتأمن له .. آآه بس لو أقدر أرتاح من هالهم وأصارح خــواتي بس ذولي قمــة الغباء والأنانيه لودرن بيسون لي مصايب أنا في غنى عنها ماراح أقدر أتحكم فيهن مثل قبل بكــون بنظرهن مجرد ضيف شــرف بعــد ماكنت أنا القائد ,, بيخـرب كل شــي بديت أبني فيه من ست سنــوات بس أنا ماراح أسمح لعسـافوه يخـرب كل اللي بنيتــه وخواتي امانه برقبتي قدام رب العالميــن ولازم أحافظ على هالأمانه بس من يفهـــــم ..
دخلت البيت راجعه من المستــوصف .. اول مادخلت مع الباب شلت نقـابي وبقيت بالطرحـه والنظاره الشمسيه .. كانت صدفه ماكنت منتبهه للعســـاف اللي كان واقف على باب المجلس الا بعد ماتكلم ..
عسـاف :سلامات من وين جايه المـدام ..
تلفت بعد كلمته الأخيره أتأكد أن مافيه احد يسمعنا ..
ضحـى :أنت وش تبي فيني أنا ماصدقت أرتاح منك هالأسبوع ..
عساف :أكيد أشتقتي لي صح ..
مالت عليك الا قلت أرتحت منك أشتاق للأبليس ولا أشتاق لك كان ودي أقول له هالكلمتين الأخيرات بس عارفه هذا مو من صالحي ..
ضحـى :تبي شــي ..
عساف :أكيد ياعمري أبيك ..
صدق وقح ..
ضحــى :انت صدق أنسـان ماعنـدم دم ..
عساف بثقالة دم :من قالك ماعنـدي دم أجرح لك يدي عشـان تأكدين ...
ضحــى :يمكــن عنـدك دم بس دم مايمت للدم البشري بصله دم بارد ..
ووقفت عنـد هالكلمــه ولاعنـدي كلام ودي أقوله بس أبد مو هذا وقته أخاف بأي لحضه تطلــع وحـده من خـواتي ....
عسـاف ببرود :سـلامات وش كيسة العــلاج اللي بيدك ..
أطنشه ولا أجاوب ودي أعطيه أكبر طاف بس مجبر أخاك لابطل ..
ضحــى :عنــدي حسـاسيه ..
عسـاف :وش سببها ..
أوووف هذا راعي طويله ..
ضحـى :تجيني مع تغير الأجواء برد حر عجاج وغبــار يعنــي جونا ..
عساف :يعني متعذبه معها خلاص ريح حالك وتعالي معــي للبلاد مافيها كل هالتقلبات ..
طنشتــه لأن بداخلى رد صدق بيطيــح وجهه بس بحتفظ فيه لنفــسي وأنا جايه أدخل ..
عســـــاف :ارسليلي شدن ..
صقعت الباب بأقوى ماعنـــــدي حسيت بهالقوه يوم شفت خـواتي اللي كانت جالسات منهن على كراسي طاحن على وجيهن على الأرض صدق أشكالهن نكتـــــــه .. ماشاءالله وش الأخلاق
اللي نازله عليهم اليوم مأحد علق ..
ضحــى :شدن حبيبتي أطلعي لعمك عساف يبيك برى ..
وعد :وععع اجلسي لاتروحيـن له ..
عطيت وعد نظره قويه خلتها تفك شدن اللي كانت ماسكتها ..
ضحــى :لما أوجه لك الكـلام أبدي وجهة نظرك يالله شدن حبيبتي روحــي ..
بعد ماطلـعت شدن أنتظرت دقايق أهدي فيها اعصــابي قبل مأتكلم لأني كنت على وشك أنفجار ..
ضحــى :الحركه اللي صارت قبل شــوي مأبغاها تكــرر .. وشي ثانـــي شدن ماهي غبيه عشــان ترمـون كلمات قدامهــا وبليز لاتناقشون بهمــوم شارعكم بوجــودها توها صغيــره مالازم تسودون الدنيــا بوجها هذا علــــــــــم لازم كلكم تتقيدون فيه لمصلحتكــــــم ..
وللي بالمــدرسه أتمنــى امنيه مو عشاني عشانكم التفتوا شوي لدروسكــم عطــوها شــي بسيط من وقتكــم .. صدقوني بتندمــون قد شعر راسكم على هالتفريط لكبرتم .. وماغير الشهـاده اللي بتأخذونها من الدراسه بينفعكــم
انتم تقلدون أهمال البنات اللي معكم بالمـدرسه ذولى الدراسه ماتعنبي لهن شــي لأن وراهن أهل بيصرفون عليهن لجلسن فالبيت بس انتم من لكم ياحســره غيري وانا ماني دايمــه لكــن ..
وعد بالرعب:ليه مانتي دايمه لنا وين بتروحيـن ..
ضحــى :انا ماني عالمـه للغيب وش بيصير بكـره .. لاتنسون اني فالأول والأخر أنســانه يعني بغمضة عين ممكــن أروح .. بتقدرون تعيشون بعــدي .. فحالتكم هذي مأعتقــد ..
قاطعتني وعــــد ..
وعد :ضحى بسألك سؤال بس أبغاك تجاوبيني بالصدق ممكـــن ...؟!
أستغربت من طلبها وبالنفس الوقت حسيت بالراحه داخلـي يعني كلامــي له صدى داخلهم لأروح بأحلامي بعيد عشـان مأتحطم على صخـرة الواقع فالبدايه خل أسمع السؤال ..
ضحــى :أسمعك قولي ..
وعد :يعني حنا كل مشكلتنا بالفلـــــوس ..
ضحى :الماده جزء من مشكلتنا مو كلهــا ..
ملاك :لامشكلتنا كلها بالفلوس ..لوعنـدنا فلوس تسد حاجتنا مألتفتنا ندور الأسباب اللي خلت أبونا يتركنــا ..
شهد :معها حق ملاك الفلوس حل كل مشــاكلنا وبوجودها ماراح يكــون عندنا أي مشكلـــه ,, بس مو اللي تسد حاجتنا وبس لا وتفيض عنها بعد لأن بالفلوس الكل بيحسب لنا ألف حساب وأهلنا هاللي مايتشرفون فينا لو عنـدنا فلوس هم اول ناس بيركـضون لنا..
أنفخ بقربه مخروقـــــه أنا لو بتكلم معهم من اليوم لين أخر ساعه بعمــري بيبقون على رايهم وأن الفلوس هــي مفتاح سعادتهــــــم ..
ضحــــــى :تدرون لأهل ولافلوس ولاحتــــــى الدنيا هذي كلها بتفيدكم دوروا رضا ربكــــم وأتركــوا الدنيــا لأهلها لاتنحرمــون من السعاده بالدنياكم وأخرتكم ..
أرضوا بقسمــة رب العالمـــــــين سبحانــه معدل من قسمتــه وكل زخرف الدنيـــــا بيزول ويفنــــي وماراح يبقى الا العمل الصالح ..
الحــــلقه الخامســـــه عشــر
((1))
<<..خلف عياش ..>>
عســاف
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك