رواية قتلهن الطيش وأحياهن الحب -25
ماجد : انتبهي لنفسك .. مع السلامه ويقفل .... قام من الكرسي وقف وناظر نفسه بالمرايا وضحك من قلبه على هالمكالمه اللي ماكانت لا على البال ولا على الخاطر .. اما نور قفلت وهي مبتسمه ..ضمت جوالها لصدرها وقال : احبك والله احبك .. فكرت شوي وقالت : ليتني ماكلمته ..الله يلعن الشيطان .. نزلت دمعه قهر على الحركه اللي صارت .. وحلفت بينها وبين نفسها انها مابتنعاد ابدا .. رفعت جوالها وكتبت له رساله ( مكالمتي معك غلط كبير واقترفته .. واللحين ندمت عليه .. اتمنى ربي يسامحني واسامح نفسي .. اتمنى بعد مايكون بيننا أي مكالمات ورسايل بعد هالمره ) ...
وصلت الرساله لماجد وقرأها وماتوقع هالشي المكتوب .. لكنه رضى باللي طلبته وارسل لها كلمتين بس( انت تامرين .. امر).. نبه العشاق اذان الفجر .. وكل منهم قام توضى وصلى ونام ....
,,,,,,,,,,,,,,,,,,,,,,,,,,,,,,
بعد ايام كانت في عيون عبدالرحمن طويله كلها تفكير شلون يوقف موضوع خطبه وليد ولوجين .. اتصل على فهد ...
فهد : هلا والله ابو سعود
عبدالرحمن : هلابك .. شلونك ؟!
فهد : بخير يارب لك الحمد .. انت اخبارك
عبدالرحمن : ماشي الحمدلله ... اقول فهد وينك الحين ؟!
فهد : والله بالبيت .. وبطلع بعد شوي ..
عبدالرحمن : في مجال نتقابل ودي اتكلم معك في موضوع ..
فهد : خير .. وش موضوعه
عبدالرحمن : لا خير ان شالله .. بس اذا فضيت كلمني نتقابل بأي مكان
فهد : خلاص ابشر ..بعد ساعه او ساعتين بالكثير نتقابل في الاستراحه ..شرايك؟!
عبدالرحمن : لا ياشيخ مكان غير الاستراحه .. خلنا نروح لوحده من القهاوي .. وسما له اسم القهوه
فهد : خلاص ..صار ان شالله
عبدالرحمن : يالله اجل اخليك ..مع السلامه .. وقفل منه ...
تابع الجزء الثاني عشر
هند ونور ولوجين مجتمعين في بيت لوجين ...
لوجين : والله ماادري ؟!
نور: طيب انت من تبين ؟!
لوجين : انا محتااااااره وماانام الليل من التفكير .. مرات اقول وليد يحبني ولو حبه كذب ماتقدم وخطبني .. ومرات اقول عبدالرحمن بعد يحبني .. وموب عارفه اوافق على وليد ولا لأ ..
هند: بس يمكن ماتنسعدين مع وليد .. اغلب الزواج اللي يكون قبله علاقه حب بين الشخصين ماينجح
نور: صادقه هنوده .. لولو حبيبتي لا تحسبين اني اقول كذا عشان عبدالرحمن اخوي .. لا والله بس من جد دايم الزواج اللي كذا يكون 90% فاشل
لوجين : والله ماادري ماادري .. طيب لو انتو مكاني من تخاترون ؟!
هند: حبيبتي .. كل وحده فينا وضعها بيختلف عن الثانيه .. على العموم انت قبل كل شي استخيري ...
لوجين : استخرت ما حسيت بشي
نور: والله شي يحير ,,
هند : نونو صح نسيت اقولك ..
نور: ايش؟
هند : ندى اللي قابلناها بالنادي طلعت اخت حسن ..
نور رفعت حواجبها: والله ؟!
هند: ايه والله يوم قلتله عنها قال ايه اختي
لوجين ماتدري شالسالفه : من ندى ؟1
هند: وحده قابلناها بالنادي ذاك اليوم وطلعت اخت حسن .. تخيلي الصدفه بس..
لوجين بدهشه : وكيف عرفتو؟!
.............................
ماجد : اوكي حبيبتي .. اشوف الوقت المناسب وارد عليك
.... : متى بترد علي طيب؟!
ماجد : اللين اشوف الوقت اللي افضى فيه
....: انت دايم مشغول وماعندك وقت .. وتسحب علي
ماجد يتأفف: خلاص قلت لك .. انا اشوف وارد عليك
.... : اوكي ... باي
ماجد يقفل: باي .... اوووف وش هالنشبه ...
,,,,,,,,,,,,,,,,,,,
فهد وعبدالرحمن جالسين على طاوله في قهوه...
فهد : خير يادحيم .. وش الموضوع اللي تبيني فيه ؟!
عبدالرحمن : والله ياابن الحلال الموضوع اللي بقولك عنه محد يدري فيه حتى الوالد .. بس بغيت اخذ رايك فيه قبل اكلمه
فهد استغرب وش هالموضوع اللي ياخذ رايه فيه قبل راي ابوه : خير ان شالله
عبدالرحمن : الصراحه انا ودي اخطب لوجين اختك ..
فهد تفاجئ: تخطب لوجين ؟!
عبدالرحمن : ايه اخطبها .. انا قلت اعطيك خبر واخذ رايك قبل الجميع وبعدها اكلم الوالد واخليه يكلم ابوك .. وتصير الشغله رسمي .. سكت شوي وقال : لو الوالده عايشه الله يرحمها كان خففت علي هم الموضوع هذا وصار الموضوع بين الحريم اول .. لكن تدري بالظروف
فهد انبسط : الله يرحمها .. ابصراحه فاجأتني وفرحتني ..
عبدالرحمن ابتسم : يعني موافق ..
فهد : اكيد مايبيلها كلام .. ولا تشيل هم شي وتقدم رسمي وابشر باللي تبيه .. ولا اظن حنا بنلاقي احسن منكم
عبدالرحمن ارتاح شوي : الله يسلمك ..
,,,,,,,,,,,,,,,,
عدا اسبوع ورن تلفون بيت عبدالله ردت خديجه : الوو
ام وليد : السلام عليكم .. ام وليد موجوده
خديجه: ايوه ... وتحول الاتصال على غرفه هدى
هدى: الوو
ام وليد السلام عليكم
هدى : هلا وعليكم السلام
ام وليد : معك ام وليد عرفتيني
هدى : ايه ياهلا ومرحبا ...
ام وليد : كيف الحال .. شخبارك
هدى : الحمدلله بخير .. انت كيفك وكيف نوف بنتك
ام وليد : والله تسلم عليك ... بغيت اسألك وش صار بموضوعنا .. كلمتي ابوها
هدى : ايه والله كلمته ومرد لي بشي قال بسأل عن الولد ونشوف كيف
ام وليد : اهاا.. خير ان شالله
وليد يدق امه : اسأليها عن لوجين طيب
ام وليد : طيب ماسألتي لوجين وش رايها بالموضوع ؟!
هدى : لا والله تدرين ياام وليد البنات في هالمواضيع يتلخبطون .. انا قلت اشوف ابوها بالأول
ام وليد : ايه .. على خير ان شالله .. على العموم اعطينا خبر باللي يصير
هدى : اكيد اكيد بتصل عليك لو صار شي
ام وليد : ان شالله .. يالله اخليك الحين
هدى : الله معك . مع السلامه..
ام وليد : مع السلامه ... تقفل منها
وليد : وش قالت لك ؟
ام وليد : باقي ماصار شي للحين ..
وليد: ووش راي لوجين
ام وليد : للحين مافاتحتها بالموضوع .. تنتظر رأي ابوها
,,,,,,,,,,,
بعد ساعات يدخل عبدالله للغرفه : السلام عليكم
هدى جالسه على الكرسي : وعليكم السلام ورحمه الله ... هاا جيت بدري اليوم
عبدالله : ايه والله ماعندي شي اليوم ..
هدى : ابو فهد
عبدالله جالس يفصخ ثوبه ::: هممم
هدى : كلمتني اليوم ام وليد تسأل وش صار على موضوع لوجين ووليد
عبدالله يجلس جنبها : توني ابي اقولك كل اللي سألتهم عنه يقولون رجال وولد ناس طيبين مافيهم نقص ..
هدى : وانت شرايك ؟
عبدالله : والله انا اشوفه رجل ولد رجال ومافيه شي
هدى : يعني خلاص نتم الموضوع .. واقول لـ لولو رايك
عبد الله : ايه قوليلها .. وبعدين لين متى بتضلين تدلعينها البنت تبي تتزوج وانت تنادينها لولو
هدى تضحك : بنتي الوحيد وشلون ماادلعها
,,,,,,,,,,,,,,,,,,,,,,,,,,,,,,,,
صالح وماجد عند سعود بالمجلس ويسولفون .. انطق الباب ودخلت الخدامه بيدها صينيه القهوه .. حطتها وطلعت .. قام ماجد وصب القهوه وقدمها لسعود: سم
سعود: سم الله عدوك .. والله الفشله في بيتي وتضيفني
ماجد : افااا ياعمي .. البيت واحد
سعود : تسلم
ماجد يجلس ويتكلم صالح..: الله يسلمك من كل شر... ابو عبدالعزيز بغيت اتكلم معك في موضوع
سعود: اسلم .. وش عندك
صالح : والله يابو عبدالعزيز انت عارف اخوتنا وعارف غلاتك عندي
سعود: اوووه ياابو ماجد جاي تقولي هالشي اللي كلنا نعرفه .. تدري يابو ماجد وش كثر احمد ربي على انه جمعني بأخوان مثلك انت وابو فهد
صالح : الحمدلله .. وعشان كذا ابي اخوتنا هذي تكون عن حق وحقيقي
سعود: وش قصدك ؟!
صالح : انا جايك اليوم وابي اقولك ان ماجد يبي يخطب بنتك نور ..
سعود ابتسم وناظر ماجد : والله هذي الساعه المباركه ..
,,,,,,,,,,,,,,,,,,,,,,,,
نور تكلم هند : ايه والله عندنا
هند : من متى ؟!
نور: لهم ساعه يمكن
هند : غريبه ماجد ماقالي
نور: ليش وانت متعوده ان ماجد يقولك كل شي
هند: لأ
نور تضحك : اجل بلا لقافه ..
هند تضحك: وعبدالرحمن موجود معهم ؟!
نور: لا عبدالرحمن طالع من البيت من بدري ومااظنه داري بزيارتهم ..لو يدري اكيد مايطلع
هند: اهااا .. شرايك اسوي مكالمه جماعيه مع لولو
نور: يالله .. وش ورانا حنا
هند ... طيب اجل دقايق وارجع لك ..
نور: اوكي
انتظرت نور شوي على الخط .. اللين رجعت لها هند ولوجين
لوجين : الووو
نور: اهلييين .. كيفك
لوجين : طيبه الحمدلله .. انتو كيفكم
هند ونور: تمام
نور: وش صار معك بموضوع وليد
لوجين : ولا شي محد تكلم
هند: والين متى كذا .. يعني مابتعرفين وش يبي يصير معك ؟!
لوجين : والله مااادري ..
وكملو سوالف..
,,,,,,,,,,,,,,,,,,,,,,
عبدالله وهدى بالصاله .. نزلت لهم لوجين بعد ماانتهت من مكالمتها مع البنات : السلام عليكم
عبدالله وهدى : وعليكم السلام ... راحت جلست على الكنب المفرد وتناظر التلفزيون قناه العربيه
عبدالله خفض الصوت : لوجين
لوجين ناظرته : هلا بابا
عبدالله ناظر هدى : قلتيلها ؟1
هدى: لأ
عبدالله رجع وناظر لوجين : اسمعي يابنتي
لوجين انمغصت بطنها: ايش؟!
عبدالله : امك قالت لي على وليد خوي فهد اللي خطبك .. وانا سألت عن الولد وارسلت رجال اعرفهم يسألون عنه .. واللي عرفته ووصلني انه كفو .. يعني رجال طيب وعيلتهم ماعليها كلام .. انا ابيك تفكرين بالموضوع ..
لوجين : بابا ... وسكتت
عبدالله : قولي يابنتي وش عندك
لوجين : بابا انا ماابي اتزوج اللحين ولا افكر بهالموضوع
على دخلت فهد من الباب .. دخل للهم الصاله .. السلام عليكم
الجميع : وعليكم السلام
جلس فهد .. وقال عبدالله : ايه وش قلتي يالوجين ؟!
لوجين : بابا ماابي ابي اكمل دراستي بالاول
عبدالله : الدراسه ميب مشكله تقدرين تشرطين عليه هالشي بعد الزواج
لوجين دمعت عينها ..: بس...
عبدالله : يابنتي الرجال مايتعوض
فهد : لا يبه وليد ماينفع للوجين
لوجين ناظرته متفاجئه .. عبدالله : ليش ماينفع لها ؟!
فهد :بس كذا .. وليد خويي وانا اعرفه زين
عبدالله : بس انا سائل عنه .. والولد مافيه شي يعيبه
فهد : يايبه والله ماينفع لها
لوجين تحمد ربها بقلبها وتقول ان فهد بيوقف بصفها ويرفض وليد
عبدالله : عطني اسباب مقنعه
فهد انفعل : يبه انا اعرفه اكثر دايم حنا مع بعض.. مايناسبها صدقني .. وبعدين موب لازم يكون سعاده لوجين هي الاساس .. زواجها من وليد مابيسعدها صدقني
عبدالله : لوجين انت وش تشوفين ؟!
لوجين ساكته ..
فهد : ردي عليه قولي رايك .. ولا تبينه ؟!
لوجين : لا بابا مابيه ..
عبدالله : ليش ؟!
اضطرت تكذب : بابا انا استخرت وماارتحت
عبدالله : تقدرين تستخيرين اكثر من مره .. واذا مارتحتي بكل المرات بعذرك
لوجين بكت : استخرت كثير ومارتحت ولا بمره ..
هدى : اهدو .. الدنيا مابطير فكروا زين .. وانت بعد يالوجين فكري زين
لوجين قامت وقفت : انا فكرت كثير وماابيه .. وراحت
عبدالله : توها صغيره ولا تعرف مصلحتها .. بكره لا صار الموضوع رسمي بتتعود عليه وتحبه
هدى : معقوله ياابو فهد بتغصبها عليه
عبدالله : موب قصه غصب بس هي توها ماتعرف تقرر وش اللي يفيدها ووش اللي يضرها وانا مااشوف به شي عشان ترفضه
فهد : يبه لوجين هي اللي تبي تعيش موب احنا ..
عبدالله : وانا ابي لها العيشه الزينه .. وهم ماينفصهم شي
فهد : يبه فكر بكلامي زين .. اسمحلي يبه بس انا اعرفه اكثر منك
عبدالله مارد عليه ... قامت هدى طلعت لها ولحقها فهد .. دخلو الغرفه ولقوها تصيح من قلب ..
هدى تروح لها على السرير : يايمه يالوجين .. وش اللي يخليك تصيحين الحين كل هالصياح ماصار شي
لوجين ترفع راسها وهي تبكي: كيف ماصار شي وبابا موافق عليه ومن كلامه انه يبيني اخذه غصب
فهد : لا لاتخافين مابتاخذينه .. انا بقنع ابوي بهالشي .. ناظر امه : يمه اتركينا لحالنا شوي
هدى : طيب .. وطلعت وقفلت الباب ..
فهد قرب للوجين ورفع راسها له : لوجين حبيبتي انا تدرين ليش واقف بوجه هالزواج ؟!
لوجين : لا ..ليش؟
فهد : لأن الزواج اللي يكون قبله علاقه ماينجح .. وانا ماابيك تتعبين بحياه زوجيه كلها مشاكل وشكك وامور مالها اول من تالي .. ولا وليد خويي مافيه منه اثنين رجال وينشد فيه الظهر
لوجين ابتسمت وضمت فهد : الله لا يحرمني منك .. دخل عليهم عبدالله وحاس ان ضميره أنبه شلون انه بيغصبها علي شي ماتبيه ..
لوجين وفهد ناظروه وبعدوا عن بعض ..
قرب عبدالله لها : حبيبتي لوجين .. خلاص لا تزعلين حالك ولا تبكين اللي تبينه بيصير .. وزواج مابتتزوجينه
لوجين مسحت دموعها : صدق بابا
عبدالله : صدق .. وانا اقدر ازعل بنتي الوحيده ودلوعتي
قامت لوجين نزلت من السرير وضمته : شكرا شكرا يابابا
,,,,,,,,,,,,,,,,,,,
صالح وماجد يدخلون البيت وسعاد جالسه بالصاله هي وهند والهنوف ...
صالح وماجد : السلام عليكم
الكل : وعليكم السلام
سعاد:هاا وش صار معكم
صالح وماجد يجلسون وماجد مبسوط ومبتسم
صالح : هذا ابو عبدالعزيز اكيد مابيجي منه الا الخير
سعاد ضحكت : يعني وافق
صالح : اكيد مايبيلها كلام
هند تناظر ماتدري وش قصدهم : وش السالفه ؟!
ماجد : خطبت نور
هند شهقت وضحكت ضحكه جنونيه : صدق والله مجوود
ماجد يضحك: ايه
هند : يالله صديقه عمري بتصير مرت اخوي .. وتضحك : لا مومعقول .. الله وش هالوناسه
سعاد : نور هذي مانلاقي احسن منها لولدنا
الهنوف مبتسمه : يعني ضي بتصير قريبتي
سعاد: ايه قريبتك ..
هند بقوم اكلمها
سعاد : لا يابنت يمكن لسه ماتدري عن السالفه
هند طيب بنتظرها اللين هي تتصل علي ..ياربي صبرني شلون بصبر وامسك لساني.. تقوم تحط قناه سبايسي وتلاقي اغنيه حمام جنانا مسيان .. وتناظر ابوها : بابا معليش .. وترفع الصوت على الاخر .. وترقص وتروح لأمها وتسحبها من ايدها .وبصوت عالي يالله قومي ولدك بيعرس .. وتقوم معها سعاد وهي تضحك وماجد مستانس ويقوم يرقص معهم والهنوف تصفق لهم وهي مبسوطه وصالح يناظرهم وهو يضحك...
,,,,,,,,,,,,,,,,,,,
سعود يدخل للصاله بالكرسي اللي هو عليه ونور نازله من الدرج : هاا بابا راحو؟!
سعود مبتسم : ايه قبل شوي راحو
نور : وش تبي تتعشى
سعود: لا ماابي عشى شبعان الحمدلله
نور: بابا ماكليت شي من الغدا .. شلون بتاخذ الدوا ..
سعود : الخبر اللي عندي شبعني
نور تجلس على الكنب : خبر ؟!
سعود مبتسم : ايه
نور: من وجهك الظاهر انه حلو
سعود : ايه والله موب حلو وبس ..
نور ابتسمت على ابتسامه ابوها : وشو بابا ؟!
سعود: ابو ماجد اليوم كان عندي عشان يخطبك لماجد ولده ..
نور تفاجئت بالخبر ابدا ماتوقعت هالشي يصير .. ارتبكت وتغير لون وجهها .. واختفت ابتسامتها
سعود : شرايك انت؟!
نور ساكته ماتدري شتقول
سعود: ادري انك متفاجئه بس فكري بالموضوع ولا تستعجلين خذي وقتك وزياده .. وماجد نعرفه مايحتاج نسأل عنه ولدنا ورابي بيننا
نور : .....
سعود: فكري يابنتي زين
نور تهز راسها بمعنى طيب وقامت
سعود: وين رايحه
نور: غرفتي
سعود ضحك: طيب روحي
طلعت نور وتحس انها ماتشوف شي من الصدمه متفاجئه وفرحانه بنفس الوقت .. دخلت وقفلت الباب عليها بالمفتاح ووقفت ورى الباب وايدينها ورى ظهرها ورافعه راسها .. : يالله معقوله .. وتذكر ايام البر وكلام سعاد : يعني كانت تقصدني بالكلام
راحت وجلست علىالسرير وهي تضحك .. وفكرت تتصل على هند ولا لأ ..
,,,,,,,,,,,,,,,,,,,,,
لوجين بعد رفض وليد مبسوووطه وبعد ساعات من الاحداث اللي صارت قالت بتصل على نور وهنوده اقولهم وابشرهم ...
اتصلت على نور ...
نور: هلا والله لولو
لوجين : لك يااهلين وسهلين ومرحبتين بنور العينين
نور: خير .. قلبتي شاميه
لوجين : نونو خلااااص رفضت وليد مابتزوجه
نور: والله ؟!
لوجين : والله العظيم
نور: وشلون صار كذا ؟!
تقولها لوجين اللي صار ..
نور: زين الحمدلله .. بس تصدقين تفاجئت من كلام ابوك مره ماتوقعته يقول لك كذا
لوجين : مثلي والله اناظره مو مصدقه انه بيغصبني بس الحمدلله ماهنت عليه
نور: اكيد مابتهونين عليه .. ياحرام ياوليد
لوجين : حرمت عيشة العدو ..
نور: لولو
لوجين : هلا
نور: تدرين وش صار اليوم ؟!
لوجين : ايش
نور: ابو هند جى لبابا وخطبني لماجد
لوجين بصوت عالي: احللللللللفي
نور: قسم بالله
لوجين : ايه .. ووش قلتي
نور: ماقلت شي مارديت اصلا بغيت ادوخ يوم قالي بابا .. مومصدقه
لوجين : وهند تدري
نور: ماادري والله
لوجين : ليش ماكلمتيها
نور: لا استحيت
لوجين ضحكت بصوت عالي : من متى ؟!
نور ضحكت : من لحظه ماخطبني ماجد .. اللحين هي بتصير اخت زوجي لازم احاسب على تصرفاتي
لوجين تضحك : يالله ونااااسه اليوم ..
نور: سبحان الله خطوبتي وخطوبتك بنفس الوقت لاحظتي هالشي
لوجين : ايه والله .. بس انا الحمدلله فرحتي بالرفض اكثر من اني اوافق عليه
نور: الحمدلله على كل شي .. يالله عقبال خطوبتك انت ودحوم
لوجين تضحك : ان شالله ..وبعدين تعالي هنا .. انت الحين وافقتي خلاص على ماجد ؟!
نور مبتسمه : اصلا انا موافقه من زمان .. وانتبهت لنفسها وش قالت
لوجين : شلون من زمان ؟!
نور: لا اقصد يعني ليش ارفض حنا نعرفهم من زمان
لوجين : علي هالكلام
نور ضحكت : ايه عليك
لوجين : تحبينه صح ؟
نور: لا عاي .. مااكرهه
لوجين : اهاا طيب على العموم مبروووووك مبرووووم الف مبروك
نور: الله يبارك فيك .. وعقبالك مره ثانيه ..
لوجين : من عبؤك لباب السما يارب
نور تضحك: ان شالله
بنفس الوقت هند تتصل على نور تبي تجس نبضها اذا عارفه شي ولا لأ ..
نور: يالله لولو باي هند على الخط الثاني
لوجين : اوكي باي وبلغيها برفضي لوليد
نور: اوكي .. يلا باي .. تقفل وترد على هند : هلا هنوده
هند مبتسمه : هلا هلا هلا والله .. كيفك
نور: تمام الحمدلله مبسوطه .. وانت كيفك
هند: مبسوووطه اكيد
نور: ايه
هند شكت انها تعرف : انا طيبه الحمدلله
نور تقول لها سالفه لوجين ..
هند: ايه زين الحمدلله .. واخيرا انحل الموضوع
نور تتنحنح: هنوده
هند: نعم
نور: عندك خبر باللي صار اليوم ؟!
هند تأكدت وضحكت : ايه ادري يازوجه اخوي مبروووك
نور انحرجت : الله يبارك فيك .. بس مابعد وافقت
هند : بتوافقين غصب عنك مجود ميت عليك .. نوووونووو وناااسه بتصيرين مرت اخوي .. وتسكنين معنا وش هالوناسه يارب.. قوليلي وش شعورك لما عرفتي ..
نور: بغيت ادوخ
هند تضحك ليش
نور: تفاجئت الصراحه
هند : فاتك انا قمت وعليت صوت الاغاني ورقصت رقصت لين تعبت وموجود وماما يرقصون معي .. نور انا مبسوطه وانت ؟!
نور: مثلي
هند بصوت جدي: عيب استحي انا اخت زوجك
نور ضحكت : توني اقول للولو الحين لازم انتبه لتصرفاتي مع هند
هند تضحك: ايه لازم .. ولا بكون حماه وقويه بعد اطلع عيونك
نور: ماتقدرين ...
هند تضحك...
نور: عقبالك يارب
هند : ان شالله .. كالعاده انا امكم لازم اتطمن عليكم الاول وبعدين اشوف نفسي
نور تضحك : الله لا يحرمنا من بعض
هند : آآآمين
,,,,,,,,,,,,,,,,
نور تنتظر عبدالرحمن بالصاله .. دخل من برا ونعسان مايشوف الطريق ..: السلام .. وتوجه لـ الدرج على طول
نور قامت بسرعه : وعليكم السلام ... تبي تنام
عبدالرحمن : ايه والله ميت من التعب
نور توقف قدامه : عندي لك خبر بمليون ريال
عبدالرحمن : وشو؟!
نور: اول شي وش تعطيني
عبدالرحمن طافي : اقول وخري ماعندك سالفه
نور توقفه : والله تندم اذا ماسمعته اللحين
عبدالرحمن : وشو اخلصي قوليه
نور:وش تعطيني ؟!
عبدالرحمن : والله على حسب الخبر
نور:خبر يفرحك
عبدالرحمن : وشو
نور: خلاص لوجين مابتتزوج وليد
عبدالرحمن فتح عيونه على الاخر وابتسم : وش دراك ؟!
نور: هي قالتلي
عبدالرحمن: اسألك بالله ؟!
نور تضحك: قسم بالله .. خلاص رفضته
عبدالرحمن طار النوم من عينه : الله يسعدك على هالخبر
نور : يالله يالله ابي اتشرط
عبدالرحمن : اشرطي اللي تبينه بيكون عندك اول ماتقومين من النوم
نور: والله .. قد كلمتك ؟1
عبدالرحمن : قدها وقدود بعد
نور: اجل خلني افكر وش ابي عشان اقولك ..
عبدالرحمن : اوكي .. ويطلع
نور: تبي تنام
عبدالرحمن : ايه
نور:" والله انك مابتنام من الفرحه وقول نور قالت
عبدالرحمن يضحك : الظاهر كذا..وطلع ولحقته نور على غرفتها..
نور منسدحه على سريرها وتتكلم مع نفسها من جد اليوم هذا احلى يوم بحياتها .. يالله .. ماجد يخطبني .. ماعمره طرا على بالي هالشي .. وش شعوره اللحين .. اكيد انه استانس مثلي .. بهالحظه وصلتها رساله من ماجد .. فتحتها وقرأتها ( مبروووك ..قلتها لقلبي اليوم .. مبرووك .. عسى الله على خير يجمعنا .. * اسف اني ارسلت لك هالرساله يازوجتي العزيزه بس عجزت اعيش هالفرحه لحالي *)
نور ابتسمت وقالت بنفسها: فرحتي انا اكبر بهالموضوع ..
صكت الجوال وباسته ونامت ...
,,,,,,,,,,,,,,,,,,,,,,,,,,,
عبدالرحمن دخل غرفته مومصدق ان لوجين خلاص رفضت وليد ..ويقول لنفسه بأقرب فرصه ابي اكلم ابوي يخطبها لي .. وطبعا اللين الحين مايدري عن سالفه نور وماجد ....
,,,,,,,,,,,,,,,,,,,,,,,,,,
بعد ايام من الاحداث الحلوه اللي صارت .. اتصلت هدى على ام وليد : السلام عليكم
ام وليد : ياهلا والله وعليكم السلام ورحمه الله وبركاته
هدى : وش اخبارك ياام وليد ؟!
ام وليد : بخير يارب لك الحمد.. انت وش اخبارك ان شالله بخير
هدى : الحمدلله بخير وعافيه ..
ام وليد : الحمدلله
هدى : ام وليد والله مادري وش اقول لك .. بس النصيب ماجمعنا بناس مثلكم طيبين
ام وليد عبست وصاب احساسها : شلون يعني ؟!
هدى : يعني مافي نصيب بيننا .. البنت تبي تكمل دراستها الحين ورافضه فكره الزواج نهائيا
ام وليد : بس هذا مو سبب يعني اذا تبي تكمل دراسه عادي تكمل وهي متزوجه
هدى : موب دراسه وبس .. لكن مااقدر اقولك غير مافي نصيب .. وان شالله تلاقين له بنت الحلال اللي تسعده يارب
ام وليد : خير ان شالله ..
هدى : اتمنى اني مااكون كدرت خاطرك
ام وليد : لا يابنت الحلال يمكن مالنا خير من ورا هالموضوع
هدى : الله اعلم .. يالله اتركك الحين وسلميلي على نوف
ام وليد : خير ان شالله يوصل .. قفلت منها ... وهي شايله هم كبر الجبل شلون تبي تقول لوليد مثل هالخبر الشين ..
,,,,,,,,,,,,,,,,,,,,
انتــــهى الجزء الثاني عـــشر...
من البنت اللي ماجد يكلمها ؟!
وش بتكون رده فعل وليد لما يعرف خبر رفض لوجين ؟!
الـجــــزء الثــالث عشــــر,,,
..............
مدخل/
لا تلوميني فغيرتي تقتلني
وترمي بي في كل زوايا الغضب
فلتسامحيني ارجوكِ
..........
يتبع ,,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك