رواية قتلهن الطيش وأحياهن الحب -20
لوجين ضبطت صوتها وكأنها بكت صحيح : حسن تكفى مارح اقدر اتكلم معاك باللي صار ..
حسن نافخ عليها: لوجين قولي وش صاير .. هند صار لها شي
لوجين وصار تشهق وضابطه الدور: حسن هند ماتت
حسن كان واقف ويدور بغرفته جنب السرير ويوم سمع كلمتها جلس مصدوم : شتقولين ..
هند دارت وجهها عن لوجين لأنها تضحك وماتبي تخرب المشهد المؤثر هذا ..لوجين : مثل ماقلت لك
حسن دمعت عيونه : كيف ومتى صار ؟؟؟!
لوجين لازالت ضابطه الدور وتشهق وتبكي وكل شوي تتنحنح يعنني ترجع صوتها : من شهر تقريبا .. صار لها حادث وماتت ياحسن .. ماتت صديقه عمري .. وسوت حالها تبكي
حسن بكى : لوجين انت صادقه ولا كذابه .. بذمتك جاوبيني.. صدق اللي قلتيه ولا بس عشان مااتصل عليها .. اذا عشان هالسبب خلاص مابتصل بس لاتقولين كذا
لوجين وكأنها انفعلت : حسن مااظن ان هالمواضيع فيها صدق وكذب .. حسن هند راحت مننا .. وسوت حالها تبكي مره ثانيه
قفل حسن الخط بوجهها وجلس مصدوم مصدق ومو مصدق ومستحيل هالشي يصير شلون ياربي.. وصار يضرب على راسه ويصيح مستحيل ..سكت شوي وقال بنفسه : مقلب من مقالب البنات .. لا مستحيل صوتها مايقول انها كذبه .. لازم اتصل على نور واتأكد بنفسي
لوجين قفل بوجهها وسطحت وقامت تنقز و تضحك وقالت: والله صدق صدق ياهند
هند : وش ردت فعله يوم قلتي له
لوجين : ياحرام انصدم وسكت وبعدين سأل كيف وليش..وبكى
هند: من جد بكى؟؟؟
لوجين: قسم بالله
بنفس الوقت هذا حسن صار يتصل على نور بس طبعا نور ناااايمه ولا تدري وش صاير بحسن المسكين
هند ولوجين ردو الخيمه وناموا ولا كأنهم ماسوو شي بحسن اللي ماقدر ينام هذيك الليله
ثاني يوم الصبح الكل صحى ويلمون الاغراض بالسيارات عشان يرجعون للمدينه والبنات والحريم برا الخيمه نور طلعت جوالها من الشنطه ولقت اتصالين من حسن ورساله نور تكفين ردي ابيك ضروري انا حسن
نور: هند
هند : نعم
نور: حسن داق علي بالليل
هند : ايه اكيد بيسألك صح اني مت ولا لأ
نور فتحت عيونها على كبرها : سويتوا المقلب
هند : ايه
نور: ووش صار
هند اسألي لوجين
لوجين صح انها واقفه معهم بس انها نعسانه ومن النوم ماتدري هم وش جالسين يقولون
نور تلتفت لها : لولو وش قلتي لحسن ووش قالك بسرعه قوليلي
لوجين بصوت كله نوم : بعدين اقولك اللحين مافيني اتكلم ولا كلمه
نور تكلم هند : انت قوليلي
تقولها هند السالفه .. نور: ياويلكم من الله .. والله حرام
هند تحسفت على اللي صار: طيب وش اسوي صح انه ماهان علي امس بس ماابيه يتصل
نور: في اكثر من طريقه تمنعه من الاتصال موب كذا
هند : بالله خلاص يانور انا بنفسي ندمانه على هالحركه
نور: احسن اندمي انا قايله لكم من امس لا تسوونها ..
هند : وش بتقولين له اذا اتصل ؟
نور: لا.. اساساً مابرد لأنه اكيد بيحلفني وانا مااقدر اكذب اذا حلفت
بعد وقت قصير الكل كانوا بالسيارات ومسكوا طريق الرجعه للمدينه .. وكانت احلى طلعه طلعوها الثلاث العوايل سوا..
انتهــــــــــــى الجزء التـــاسع ...
في الجزء العاشر .. وش بيسوي حسن؟! ..
ووليد بيكون عند كلمته ويتقدم لخطبه لوجين ولا لأ ؟؟!
ونور .. ونور وش بصير معاها ؟؟
الجــــزء العـــاشر ...
...............
مدخل/
إن غضب صديقك . . اذهب و صافحه و احتضنه . .
وان غضبت من صديقك . . افتح له يديك و قلبك . .
إن خسرت شيئا . . فتذكر انك قد كسبت اشياء . .
و إن فاتك موعد . . فتذكر انك قد تلحق موعــداً..
................
يوم الجمعه بعد العصر كل عيله صارت في بيتها وطبعا التعب مااعطى مجال لأي احد يضل صاحي والكل نايم وكأن الوقت اخر الليل ..
حسن طول الطريق وهو يتصل على نور وبما انها كانت بالسياره فما ردت عليه ابدا ولا حتى برساله.. ويوم وصلت نامت على طول ..
,,,,,,,,,,,,,,,,,,,,,,,,,,,,
وليد جالس مع امه : يمه
ام وليد : سم ياوليدي
وليد : اسمعي يمه ابي اتكلم معك بموضوع ضروري
ام وليد : قول اسمعك
وليد : ابيك تخطبين لي
ام وليد متفاجئه : وشو؟؟!
وليد : وش فيك تخرعتي .. اول مره تشوفين ولد يطلب امه تخطب له
ام وليد: لأ .. بس انت باقي تدرس
وليد: ايه هذي اخر سنه وبتخرج انت اخطبي لين اتخرج واتوظف
ام وليد : ياحليلك على بالك الموضوع كذا سهل تتخرج وتتوظف .. انت ضامن الوظيفه مااشالله وبعدين قبل الخطبه ماتبي تكون نفسك ولا تبي تخطب وانت طفران وتنتظر راتب من ابوك
وليد: يمه علامك .. انت بس احجزيلي البنت ..
ام وليد : ومن هالبنت ؟!
وليد : اخت واحد من اخوياي
ام وليد : منهو
وليد : خويي فهد العالي .. ماتعرفينه؟
ام وليد : مدري والله يمكن سامعه بأسمهم .. وعلى أي اساس تبي اخته .. ليه اهيا بالذات ؟
وليد : يمه وش اساس وما اساس .. اخت خويي كذا مره شفتها معاه بالشارع ومعجبتني .. وابيها
ام وليد : كذا معجبتك من برا برا بالعباة بس
وليد بدا يمل من امه : ايه يمه
ام وليد : خليني افكر بالموضوع واسأل ابوك وارد عليك
وليد انبسط : يعني انت مبدئيا موافقه
ام وليد ضحكت : لا تفرح بنشوف ابوك بالاول
يقوم وليد ويحبها على راسها : الله يخليك لي ياااارب
,,,,,,,,,,,,,,,,,,,,,
بعد شهر .... وبعد فتره الاختبارات اللي انهكت الطلاب والطالبات وبالذات اللي مع لوجين وبنفس مرحلتها .. لوجين جالسه على النت من البارحه بالليل تنتظر النتايج ونور وهند طول الوقت كانو على النت عشانها لكن لما اذن الفجر استأذنوها لأنهم نعسو ويبون ينامون ..
نور طلعت من النت وقفلت اللاب وهي ماتشوف الطريق من النوم .. هز جوالها تحت المخده وسحبته وناظرت : يووووه ياااربي .. هذا وش اسوي معاها الحين ؟!!
( نور ماردت على حسن من ذيك الايام عشان ماتحط نفسها بموقف محرج معه وهو المسكين قطع نفسه اتصالات عليها ورسايل .. وقلبه محسسه ان موت هند كذبه )
حسن لازال يتصل ..اللين فصل ..وارسل رساله ( نور تكفين ردي .. الله يحفظ لك الغوالي تردين علي .. )
ورد اتصل وردت نوروصوتها كله نوم : نعم
حسن : الوو .. السلام عليكم
نور: وعليكم السلام ورحمه الله
حسن : نور اسف اذا ازعجتك .. الظاهر انك نايمه
نور: اكيد وقت مثل هذا بكون نايمه .. بس مو مشكله وش بغيت
حسن : اول شي وش اخبارك
نور: الحمدلله
حسن : نور انا ماابي منك شي .. بس ابيك تريحيني الله يخليك .. بسألك وجاوبيني بصراحه واللي يسلمك
نور: اسأل ..
حسن : بس امانه تجاوبيني بصدق ..امانه اوعديني بهالشي
نور: ان شالله اذا كنت اقدر اجاوبك بجاوبك بس اذا مااقدر اعذرني
حسن : هي اجابه وحده ياتقولين صح ولا خطأ .. بس امانه بصراحه
نور: ان شالله .. احاول
حسن : نور صدق اللي قالته لوجين ان هند ماتت..امانه تجاوبين بصراحه امانه يانور
نور: ايه
حسن : احلفي ..
نور: ماله داعي احلف
حسن : لا بتحلفين اذا انت صادقه
نور: موب لازم احلف .. تبي تصدق صدق ماتبي بكيفك
حسن : نور يعني هالكلام كذب
نور ضحكت : ماادري
حسن بدا يصدق احساسه : نور امانه عاد
نور: شوف حسن بقولك شي
حسن : قولي..
نور: تعرف لو انا مكانك مابصدق
حسن ضحك بصوت عالي : يعني لوجين كذابه
نور : ماادري انا ماقلت شي انا قلت لو مكانك مابصدق هذا اللي قلته .. ماقلت لا كذب ولا صدق .. وافهمها مثل ماتبي
حسن والفرحه موسايعته : ياشيخه روحي الله يسعدك .. الله يريح بالك مثل ماريحتيني .. الله يوفقك ان شالله .. ويخليك لأهلك ويستر عليك دنيا واخره .. والله انك افهم وحده بالدنيا يانور
نور تضحك : عاد وراك تضحك وانبسطت .. انا ماقلت لك شي قلت وجهة نظري بس
حسن : فهمت وجهة نظرك .. نور نور والله موب عارف شلون اشكرك
نور تستهبل : انا ماقلت شي عشان تشكرني عليه
حسن سطح ضحك : طيب طيب ماقلتي شي .. انت ماقلتي أي شي بس قلتي وجهة نظرك
نور: طيب ممكن اسأل سؤال ياحسن ..
حسن : آآمري ياشيخه .. اسألي
نور: انت وش رجعك لهند .. وش تبي بعد اللي سويته فيها
حسن : ماابي شي .. بس ابي قلبها .. لاني احبها يانور .. قسم بالله احبها .. ادري بتقولين اني كذاب واني مو ثقه .. بس والله هذا اللي بقلبي ولو مااحبها مااقعد اتصل عليها كل هالمده اللي راحت وهي ماترد علي.. ولا يئست حتى بعد حركه لوجين.... نور ترى مافي شخص يرضى المذله لنفسه غير اللي يحب بصدق
نور: ومنيره .. والخطه اللي بينكم عشان تتطيحون هند فيها هذا كله وش تفسيره ؟؟
حسن تنهد: انا معك يانور صح بالبدايه كان اتفاق بيني وبين منيره عشان نطيح هند بس انا بعد مده من معرفتي مو بس بهند معرفتي فيكم كلكم فركشت هالخطه كلها
نور: وانا وش يضمن لي كلامك ؟!!
حسن : نور لو انا كذاب كان تلقين منيروه سوت اللي تبيه بهند .. كان تلاقين بعيونها نظرات الشماته والانتصار .. اسألك بالله من بعد سالفتي مع هند منيره عمرها كلمتكم
نور: لا ماعمرها
حسن : شايفه .. لأني انا مهددها لو سوت أي شي لوحده فيكم مابتحصل خير مني
نور مستعجبه من هالموضوع : مهددها؟!
حسن : ايه
نور: بوش مهددها؟!
حسن : مهددها وخلاص .. وترى منيره انسانه حقوده انتو ماتعرفونها مثلي
نور: ليه انت تقربلها ولا شنو؟
حسن : لا مااتشرف فيها
نور .. اهااا بس انا لازم انتقم من منيره بنفسي .. وابرد نار هند منها ..
حسن قد مايقدر يحاول يثبت لنور صدق كلامه وعشان كذا قال لها: أي شي تبين تسوينه انا معك
نور : والله
حسن : والله
نور: وش الشي اللي تحس انها لو فقدته بيحترق قلبها
حسن : انا
نور: انت
حسن : ايه
نور: وشلون
حسن : منيره تحبني يانور بس انا بحياتي ماحبيتها .. انا مااقول لك هالكلام عشان توصلينه لهند لا والله بس منيره ماشافت مني رجى من يوم عرفتني حبتني بس انا ماحبيتها كانت علاقتي معاها طقطقه شباب وتضيع وقت
نور : اوكي .. انا ماابي انتقم منها ولا شي انا بس بغيت اتأكد من كلامك ..
حسن ابتسم : وتأكدتي
نور: اوف كورس
حسن : طيب ومتى رح اكلم هند
نور: ماادري والله .. خلني اكلمها بالأول .. واذا دقيت عليها وردت معناته اني كلمتها .. يعني خلك اسبوع بعد
حسن : اسبوع والله كثير
نور: الله الله اسبوع كثير والشهور اللي راحت موب كثير
حسن يضحك : يالله الله يعيني.. نور انا اسف مره ثانيه على الازعاج والقلق اللي سببته لك ..
نور: لا عادي مو مشكله
حسن : يالله اخليك تنامين اللحين سهرتك واجد اليوم
نور: اوكي يالله تصبح على خير
حسن : وانت من اهل الخير .. مع السلامه
نور: باي .. وتقفل منه .. وكانت مبسوطه حيل انها ريحت حسن وكذبت موت هند .. وقالت بس اقوم من النوم بكلم هند على طول.. ونامت ..
اما حسن الدنيا مو سايعته من الفرحه يحس انه يبي يطير من الوناسه وقال بنفسه : الله يسعدك يانور
,,,,,,,,,,,,,,,,,,,,,,,,,,
بعد ساعات من نفس اليوم لوجين تدخل جناح امها وابوها تطق باب الغرفه وتناديهم وتروح ركض على غرفه فهد وتصحيه وتصارخ بالبيت كله وتنقز : نجحت نجحت
الكل صحى على ازعاجها .. هدى وعبدالله واقفين عند باب السويت ..وفهد بعد واقف عند باب الغرفه ولوجين بالسيب لازالت تصرخ : نجااااااااااحــــــت .. وتروح تضم امها .. ماما باركيلي .. هدى تلمها : مبروووك الف مبروك ياحبيبتي
فهد واقف ونعسان : مبروك لوجين
لوجين : الله يبارك فيك..
عبدالله مبسوط: واخيرا يالوجين تخرجتي يادلوعتي .. على البركه ان شالله
لوجين : الله يبارك فيكم .. يالله بسرعه ابي اطلع من البيت فطروني برا اللحين الحين الحين
عبدالله: بس فطور اللي تبينه ..ماطلبتي شي .. نهايه الاسبوع بنسويلك اكبر عشا بالبيت واعزمي اللي تبين
لوجين تضحك: والله
هدى : ايه اكيد .. ليه انت كل يوم تتخرجين
فهد صحصح: يالله يالله تجهزوا بلبس عشان نروح احلى مطعم اليوم
لوجين دخلت الغرفه وقفلت الباب ووقفت شوي ورفعت راسها وقالت : الحمدلله يارب الحمدلله
اتصلت على هند ونور وبشرتهم بنجاحها وفرحو لها بالحيل لكن النوم كان مسيطر عليهم اكثر من مشاعر الفرحه وبالذات نور .. واتصلت بعد على جود صديقتها : الوووو
جود : هلااا والله مبروووووووووووووووووووك .. شفتي النتيجه
لوجين :ايه شفتها مبروووك لي ولك ياقلبي .. واخيرا واخيرا .. مابغينا نخلص من المغثه
جود بعد مبسوطه : الله يبارك فيك .. ايه والله افتكينا خلاص .. وتصارخ بالجوال .. لوجين ونااااسه ماعاد فيه دراسه.. ولا مدرسات
لوجين : ايه والله وناسه بس يالله انا صحيت البيت كله عشان يفطروني برا .. مع السلاااامه
جود : ابسط ياعم من قدك اليوم ..
لوجين : تبين امرك نروح سوا
جود: لا والله لو اطير مايوافقون اهلي
لوجين : طيب اجل يالله مع السلامه
جود: مع السلامه
قفلت لوجين من جود وهي مستانسه .. لبست وطلعت وراحوا سوا يفطرون برا .. بعد ساعات ردو للبيت وطبعا لوجين نعسااانه موت .. دخلت غرفتها وبدلت وانسدحت على السرير بس حطت راسها قالت بتصل على اورنج اقوله .. واتصلت اورنج كان حاط صدى اغنيه نوال الزغبي ( تبقى اغلى الحبايب ) ضلت لوجين تسمعها الين فصل ومارد وقالت خلاص لما اقوم اكلمه بس دقايق الا رد واتصل ..وردت : صبااااحو
اورنج : هلا قلبي .. أي صباح الله يهداتس بيذن الظهر بعد شوي
لوجين: صبح ظهر ليل مايفرق معاي دام اني مستانسه
اورنج : باين على صوتس .. وش صاير ونسينا معتس
لوجين : نجحت وتخرجت وافتكيت ..قلي مبرووووك
اورنج ضحك: والله
لوجين : ايه والله
اورنج : مبرووووك حياتو ومتى طلعت النتيجه .. اليوم؟!
لوجين : تو قبل ساعات
اورنج : مبرووك الف مبروك .. يالله عاد وش تبين هديه ؟!
لوجين : ماابي هديه ابي سلامتك ياقلبي
اورنج : لا عاد لازم اجيب لتس هديه التخرج .. يالله قولي وش تبين ؟!
لوجين : والله سلامتك احلى هديه
اورنج : طيب انا ابي منتس هديه
لوجين تضحك : هديه .. شحقه ؟؟
اورنج : هاه ..شلون شحقه .. حنا حبايب ومابين الحبايب اسباب عشان يتهادون
لوجين(تذكرت الهديه اللي جابتها لوليد : ايه صح .. طيب وش تبي هديه ؟!
اورنج : انت وش تبين تهديني؟!
لوجين : اللي تبيه
اورنج : اللي ابيه اللي ابيه .. يعني موتقولين لا وش هالهديه .. وماتصلح .. ومدري شنو.. حركات مالها داعي
لوجين ضحكت : لا شدعوه عاد..قول .. وعليك مني اجيبها لك ومعها شي ثاني على ذوقي
اورنج : امممم .. ابي .. ابي .. وسكت شوي وقال : توعديني انتس تنفذينها .
لوجين : ان شالله
اورنج : ابيتس تعرضين لي على الكام ..
لوجين قعدت وهي مصدومه : وش تبي؟
اورنج : هااا بدينا .. انت وعدتيني تنفذين
لوجين : ماسمعت .. وش الطلب
اورنج : ابيتس تعرضين لي بالكام على الماسن .. شقلتي
لوجين : لااا طبعا مستحيل وش الهديه هذي اللي تبيها .. وتضحك .. يامضخك ياعزوز
اورنج : مالي دخل بتنفذين طلبي ولا ترديني .. صح حبيبتي؟!
لوجين : عزوز تتكلم من صدق انت ...؟!
اورنج : اكيد .. وبعدين ليش مستحيل عادي خمس دقايق تشغلين الكام اشوفتس فيديو وبعدين تقفلينه .. ولا كأن شي كان
لوجين : لا انا اسفه ..
اورنج : قلبووو وش فيها يعني .. من بيشوفتس غيري
لوجين : قلت لأ يعني لأ..
اورنج : حبيبتي وش بلاتس زعلتي وعصبتي
لوجين : انت شايف الطلب اللي تبيه مني .. بالله هذا طلب عاد
ارورنج: هذي هديه موب طلب .. يعني المفروض ترضين فيه بدون أي نقاش
لوجين : لا والله ..
اورنج : لولو بتنفذين ولا شلون
لوجين خافت : لا مستحيل عزوز .. اطلب أي شي ثاني وانفذه
اورنج: انا ماابي شي غيره
لوجين : انا اسفه ويالله مع السلامه
عزوز : اوكي لوجين .. مع السلامه
قفلت منه وحاسه ان الدنيا حر موت وقالت : ليه بايعه نفسي انا اعرض له .. وش يحس فيه ذا ؟! .... سكتت شوي وركزت على الكلمه اللي قالتها وضحكت وقالت : وراي صرت اقول مثله ؟!
,,,,,,,,,,,
بعد المغرب من نفس اليوم نور وعبدالرحمن وسعود وضي كلهم بالصاله
نور: اليوم طلعت نتيجه لوجين ونجحت
سعود : ماشالله .. هي وش تدرس
نور: تخرجت من الثانويه
عبدالرحمن : والله .. خلاص خلصت
نور: ايه والله من امس بالليل على النت اللين طلعت نتيجتها الصبح واتصلت قالت لي
ضي: ياااحظها ليتني مكانها وتخرجت اليوم
سعود : انشاءالله بتتخرجين وتصيرين دكتوره بعد
ضي: لا بابا وش دكتوره قديمه هذي
عبدالرحمن : وش تبين اجل
ضي: أبي اكون سيده اعمال
نور : الله الله على سيده الاعمال
ضي: ايه .. فيها شي بابا
سعود : لامافيها شي بالعكس شي حلو وطموح كبير
عبدالرحمن : ان شالله منا اللين تتخرجين يصير خير .. ويوقوم انا بطلع للشباب تبون شي
سعود: ليه مارحت الشركه اليوم ؟؟
عبدالرحمن : لا ماعندي شي الصبح خلصت كل اشغالي .. خلاص يبا حتى حنا تخرجنا وفضينا للشركه لا تشيل همها
نور بفرحه : خلاص طلعت نتيجتك ونجحت انت بعد
عبدالرحمن : لا مابعد طلعت لكن خلاص الترم الاخير هذا وبعدين ان شالله اني ضامن النجاح لأني شديت حيلي
سعود: الله يوفقكم كلكم ياعيالي واشوفكم احسن الناس .. وفهد وماجد وش باقي لهم بالدراسه
عبدالرحمن : كلنا سوا يبه اخر ترم خلاص نبي نقدم تقاعد خدمنا في مجال التعليم كثير وجى الوقت اللي نبي نرتاح فيه
كلهم ضحكو.. وقالت نور: اما بهذي صادق كم لكم تدرسون مامليتو
عبدالرحمن : حنا نحب نقدم خدمات للمجتمع ..
نور: عاد ماجد اكبركم ويتخرج معكم
عبدالرحمن : لا ماجد ياخذ بريكات كثيره .. تعرفون يحب ينفه عن نفسه والبزنس شاغله عن الدراسه لكن الحين خلاص خلص
سعود: والله انه رجال ماجد ..
نور حست بمغص وقال عبدالرحمن : وحنا ماحنا رجال
سعود ضحك: كلكم فيكم الخير والبركه
عبدالرحمن : ايه حسبت قلت يمكن لسه معتبرني بزر
سعود: لا افا أي بزر واي خرابيط
عبدالرحمن يضحك:اجل شد حيلك يابو عبدالعزيز عشان تزوجني
نور : الله زواج مره وحده
عبدالرحمن : ايه .. ولا ماني مالي عيونك
ضي تضحك : ومن بيخطب لك ان شالله
عبدالرحمن : هذي لاتشيلون همها
نور: افااا من وراي مخطط يالدوووب
سعود: الحين توك تقول رجال وترد تقول زوجني يبه الرجال يزوج نفسه بنفسه.. وبعدين انا اللي اقول هالكلمه يابنتي يانور .. مااشالله مخطط مختارها يعني .. وخلاص معزم
عبدالرحمن يضحك : ياويلي ويلاه انا وش قلت .. تراني امزح وراكم كليتوني .. وبعدين مانستغنى عنك يابو عبدالعزيز
سعود: ايه .. حسبت
عبدالرحمن : افا ياابو عبدالعزيز وانا اقدر اخطي خطوه ماتعرف بها
سعود: هذا خبري فيك ياابو سعود
نور: الله لنا
عبدالرحمن : وراك انت بعد
نور: ولا شي سلامتك
سعود يضحك.. وعبدالرحمن استأذنهم وطلع ركب سيارته ومشى
,,,,,,,,,,,,,,,,,,,,,,
في بيت ابو ماجد .. هند وسعاد و الهنوف بالصاله وماجد وابوه طالعين من البيت .. سعاد : وش بتاخذين لها هديه
هند : والله ماادري محتاره .. انت شرايك ؟!
سعاد: انا ماااعرف خرابيطكم .. شوفي هي وش تحب وجيبيه لها
الهنوف : جيبي لها فستان
هند : فستان ؟؟ لا لا مايصلح فستان .. ابي شي ثاني
سعاد : اجل خلي حفله نجاحها عليك
هند: بعد مايصير قالت اليوم ان ابوها الظاهر بيسوي لها نهايه الاسبوع بارتي بعشا بس ماتأكد الموضوع للحين
هذا ماجد دخل البيت وتوجه لهم : السلام عليكم
الكل: وعليكم السلام
سعاد : هاا جيت ؟!
ماجد : لا مابعد جيت
سعاد : تستخف بعمرك انت
ماجد يضحك : علامك يمه يعني قدامك دخلت وتسألين اذا جيت ولا لأ..
الهنوف تضحك : تحسبك بابا يمكن
ماجد: لا مااظن الفرق بيننا واضح ..
سعاد عصبت : بنت ولد والله اشوفكم زودتوها .. قله حيا .. صحيح لا قالوا البزارين ماينعطون وجه
الهنوف وهند يكتمون الضحكه .. وقال ماجد : بزر يمه .. الله يسامحك بس .. الحين كل هالطول والعرض وتقولين بزر..
سعاد : على قوله المثل الطول طول نخله والعقل عقل صخله
هند والهنوف هنا انفجروا ضحك ,,
ماجد رفع حواجبه : افااا .. كل هالكلام علي اللحين .. مشكور يمه وماقصرتي .. بعتبر نفسي ماسمعت شي
سعاد : احسن بعد ..وقامت : انا طالعه من البيت معزومه .. وطلعت تبدل عشان تروح
هند : هااا ياناس وش اجيب لها
ماجد : منهي؟!
هند :" لوجين اليوم طلعت نتيجتها ونجحت وتخرجت خلاص وموب عارفه وش اخذ لها هديه
ماجد : ماشالله .. خذيني انا احلى هديه
هند تضحك بستخفاف : لا والله احلف وانت واقف طيب .. قطع كلامها اتصال نور.. ناظرت هند جوالها وردت : هلااا والله
نور: مراااحب
هند: اهلين ياحلوه .. كيفك
نور: تمام الحمدلله .. انت كيفك
هند : الحمدلله تمام
نور: وش جالسه تسوين ؟!
هند : والله جالسه بالصاله انا والماي سستر اند البرذر .. ولي ساعه افكر واستشير الماما ماني عارفه وش اجيب لها هديه
نور: والله حتى انا ماني عارفه
هند ضحكت وتناظر ماجد :: وماجد يقول خذيني انا احلى هديه
نور: وووااع .. الا اخيس هديه .. وتضحك
هند ضحكت وقالت لماجد .. شفت حتى نور تقول انك اخيس هديه
ماجد : انتوا وش فيكم علي اليوم
هند: ماجد ورا ماتريحنا شوي
نور: المهم اسمعي هنوده ترا حسن كلمني اليوم الفجر
هند شرقت : احلفي
ماجد : بسم الله وش فيك ؟!
هند تقوم : لا ولا شي وتطلع غرفتها .. : ايه وش صار يانور
,,,,,,,,,,,,,,,,,,,,,,,
دق جرس بيت ابو فهد وراحت خديجه تفتح ..دخلت خديجه وبيدها الاغراض وراحت لهدى : مدام
هدى تناظر اللي بيد خديجه : نعم
خديجه : هدا جرس دوق انا افته كان شوف هدا هديه اند الباب (الجرس دق وفتحته ولقيت هالهدايا عند الباب)
هدى عبست : جيبيها ... من مين ؟!
خديجه : مااعرف .. مابي اهد اند الباب ( مااعرف مافي احد عن الباب).. وتورح تعطيها اياها
هدى: شكرا .. خلاص روحي
فتحت هدى الاكياس وشافت الهدايا وفرحت لكنها استغربت من مين بتكون وقامت طلعت للوجين بالغرفه...لوجين كانت فاتحه المسن يعني خلاص من قدها مافي أي شي يشغلها وودعت الدراسه وهمها .. كانت حاطه توبيك ( *سعوديه* وماله داعي اقول .. مره سبشل ومره كول .. وعايشه حياتي بالمجهول .. واكره شي اسمه .. سكول )..
دخلت هدى للغرفه بعد ماطقت الباب: لوجين واصلتك هديه تخرج
لوجين بفرحه : والله .. من مين .. وتنقز من السرير و تاخذ الاغراض من امها وتشوفها ..كانت خمس وردات جوريه حمرا مغلفه كل وحده لحالها ووسط كل ورده كرت احمر صغير مكتوب فيه حرف من حروف كلمه احبك والكرت الخامس مكتوب اسمها .. اما الشي الثاني اللي مع الورد فكان مجموعه من العطور مرصوصه بطريقه حلوه في سبت حديد حلو ومغلف وعليه كرت من برا مكتوب فيه ( الف مبروك النجاح والتخرج وعقبال كل سنه .. تحياتي) لوجين كانت تقرأ الكروت بصوت عالي ومبهوره بالهديه وبالحيل اعجبتها
لوجين ماسكه الورد وتشمه : الله .. وتشوف سبت العطور .. ماما روعه صح ؟!
هدى ايه ذوق والله من تتوقعين راسله لك
لوجين والله ماادري .. من جايبها
هدى: بس رن جرس الباب وراحت خديجه فتحت ولقت هالاغراض عند الباب
لوجين : غريبه
هدى : لوجين لا يكون بس...وسكتت
لوجين فهمت قصد امها وكشرت : يالله ياماما اللين متى بتضلين تفكرين كذا .. ودمعت عينها
هدى: طيب لاتزعلين موب قصدي .. بس غريبه
لوجين والحيره نستها الهديه : والله غريبه من جد
,,,,,,,,,,,,,,,,,,,,,,,,,,,,,
نورقالت لها كل المكالمه من طقطق الى السلام عليكم
هند سكتت ..
نور: شرايك بالكلام هذا
هند : ماادري وش اقول والله
نور: هنوده زعلتي مني لأني قلت الصراحه له؟!
هند : لا بالعكس مازعلت الا ارتحت لأن ضميري مأنبني على الحركه البايخه اللي صارت
نور: على العموم ردي عليه لا اتصل اسمعي وش بيقولك واتفاهمو واعتذري على المقلب البايخ وياليت لوجين بعد تعتذر منه ..
هند : ماابي ارد عليه اخاف منه
نور: ليه تخافين .. بعد كل الكلام اللي سمعتيه وخايفه
هند : انت اللي تقولين كذا يانور وكنت دايم تقولين اتركيه ووش لاقيه فيه ولين متى هالطيش
نور: ايه صح كنت اقول كذا بس ياهنو حسن باين عليه الصدق بكلامه ومو بلعب .. انت قارني بينه وبين اورنج انت كلمتي الاثنين واكيد في فرق بينهم والصادق يبان واللعاب يبان
هند تنهدت بقوه : والله ماادري .. على العموم خلاص افكر بالموضوع واشوف وش اسوي
نور: اوكي .. يالله اخليك الحين
هند : اوكي.. مع السلامه وقفلوا الخط
,,,,,,,,,,,,,,,,,,,,,,,,,,,,,,,,
عدا يومين على هذا الموضوع وحسن طبيعي رح يكون اتصل على هند .. لكن هند ماهي عارفه وش تسوي معاه عشان كذا ماردت عليه .. هند كانت بغرفتها وجالسه تطلع ملابس لأنها بتروح هي ولوجين لنور .. فاتحه الدولاب ونص الدولاب على السرير وواقفه تفكر وش تلبس .. اللين اختارت تنوره جنز بيج وبلوزه تركواز ..حطتهم على جنب وراحت عند التسريحه .. رن جوالها برقم غريب .. ردت هند وسكتت :....
حسن : الوو
هند ماعرفته: نعم
حسن : عظم الله اجرك ..
هند ابتسمت وعرفته : جازاك الله خير
حسن فرحان انه سمع صوتها : واخيرا رديتي ..يعني لو مااتصلت من رقم ثاني كان مارديتي علي صح
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك