رواية قتلهن الطيش وأحياهن الحب -10
نور وهي داخله للصاله ماشيه بهدووء وقفت بالمدخل محتاره تروح تنام ولا تجلس تناظر التلفزيون ولا تصحي هند ولا تفطر ميب عارفه وش تسوي .. نزلت الغطا من راسها على اكتافها وقررت تصحي هند وهي طالعه الدرج بسرعه صدمت بشخص قدامها رفعت راسها ناظرت بربكه الا هذا ماجد قدامها عينها بعيونه .. ماجد مو مستوعب اللي صاير نور عندهم ومن الصبح خير وش عندها .. نور حاولت تمر يمين ماجد بس صقعت فيه مره ثانيه حاولت يساره بعد صقعت فيه من السرعه موب عارفين يفتحون الطريق لبعض ,, ابتسم ماجد : هدي السرعه يابنت الحلال
نور وجهها احمر من الاحراج وخصلها طايحه على وجهها وتحاول تصلح الغطا بس مرتبكه ومو عارفه تتصرف
ماجد : خليك كذا شكلك حلو لا تتغطين
نور: ابعد لو سمحت بطلع
ماجد يضحك : طيب لاتدفين ماباكلك
نور حاولت تعدي من جنبه بس وقف قدامها وراحت من الجنب الثانيه سبقها ووقف قدامها
نورتناظر بالارض وعصبت : لو سمحت ابعد لا احد يجي ويفهم شي ثاني
ماجد رفع راسها بيده وابعد خصلها عن عيونها وناظر فيها : طيب ابي اتكلم معاكي ضروري ممكن
نورانصدمت من الحركه وجلست ساكته وتناظر عيونه
ماجد ابتسم لها وقال: اقدر اتصل عليك ؟
نورصحت لنفسها وقالت : اسفه ابعد ,, ودفته من كتفه وعدت من جنبه ركض على الغرفه دخلت وقفلت الباب وصارت تتنفس بقوه وقلبها دقاته ماهدت وقالت بنفسها : بسم الله هذا متى وصل؟
راحت ونقزت على السرير: هند هند هند وتهزها بقوووه هند قومي بسرعه
هند تنقلب للجه الثانيه : هممممم
نور: قومي بسرعه : صار شي خطير
هند : طيب شوي بس واقوم
نور: لا لا قومي اللحين
هند فتحت عيونها : يالله يالقلق عندنا وفي بيتنا وبغرفتي ومزعجه بعد
نور تضحك : قومي قومي يلعن ام المواقف اللي كذا
هند: انت من متى صاحيه ؟؟
نور::: منذ مبطي ياحلوه صحصحي بقولك شي بمليون ريال
هند جلست على السرير: هااا وش صاير بعد
نور: ماجد اخوكي متى جى
هند: وين جى؟
نور: وين بعد ... البيت
هند: ماجد مابعد جى يالخبله باقي على رجعته اممم يومين تقريبا
نور: اقولك جى تقولين لي لسه
هند : يمه لا يكون جني يانور << تستهبل عليها
نور: لا حووول اصحي معي لا اكفخك الحين
هند : وش تكفخين ماتكفخين يمكن شايفه بابا وتحسبيه ماجد
نور: لا والله وش قالولك مااميز ,, تراه تحت وقبل شوي طلع بوجهي وانواع الاحراج .. وقال ..
هند فتحت زين : وش قال؟
نور متردده ومنحرجه تقول لهند صح ان هم مابينهم احراج لكن ماجد غير وضعه لأنه اخوها: قال امممم
هند قامت وتعدلت بجلستها: وش قال بسرعه قولي
نور: قال ابي اكلمك
هند وعلامات الدهشه مرسومه على وجهها: واالله صدق؟!
نور: ايه قصم القصمات ..
هند: وانت وش قلتي ؟
نور: قلتله تفضل هذا رقمي ..
هند: صدق؟؟؟
نور تضحك : بلا غباء انت الثانيه ,, لا طبعا الصراحه انصدمت في البدايه ولاقلت ولا كلمه وبعدين سويت زي الافلام قلتله اسفه ودفيته من كتفه وعلى طول على الغرفه قفلت الباب وجلست ورى الباب شوي بعد الموقف استعيد قواي وبعدين نقزت على السرير وصحيتك هند هند هند وانت ماتردين وبعدهاا قلتلك قوم...
هند : خلاااص طيب رجيتيني.. وانت وش منزلك الصبح بدري تحت
نور: مرني دحوم يبي يسافر مع اخوياه واعطاني فلوووس وتطلع الفلوس من جيب البجامه وتحركها بيدها قدام هند
هند: الله وناسه يعني اليوم بنطلع ونظمن اخوكي الجني مايكون بنفس المكان ويصيدك
نور تضحك : ايه. قومي انزلي لماجد سلمي عليه
هند: والله مافيني
نور: اصلا انت متى كان فيكي عشان يصير مافيكي ,, اقول قومي بس خلينا نفطر تراني جوعاااانه موت
هند تنزل من السرير : يلا هذاني قمت
,,,,,,,,,,,,,,,,,,,,,,,,,,,,,,,,,,,,
الظهر في بيت عبدالعزيز توه داخل البيت جاب ضي من المدرسه وبيده التذاكر وراح على الغرفه
عبير : هلا والله جيب
عبدالعزيز: ايه .. خلصتي اغراضي
عبير: ايه خلصتها كل شي جاهز متى الرحله ؟
عبدالعزيز قلقان ياا راح وياما جى ومتر الغرفه من كثر الدوران: الساعه 3 لازم نكون بالطياره
عبير : عبدالعزيز اجلس ياقلبي اتاح وهدي اعصابك ان شالله انهم بخير ومافيهم شي
عبدالعزيز: اقولك الرجال يقول حالتهم خطير,, الله يستر بس الله يستر
عبير: طيب ماتبي تتغدا قبل تسافر
عبالعزيز: لا ماابي مالي نفس ,, بس حطي الغدا للضي واتغدوا انتو .. وشوفي ضي لاحظت ان فيني شي انتبهي لا تزلين بلسانك قدامها
عبير: لا توصي حريص ,, طيب متى بترجع
عبدالعزيز: مدري حسب وضعهم
,,,,,,,,,,,,,,,,,,,,,,,,,,,,,,,,,,,,,
من جهه ثانيه في بيت ابوا فهد
لوجين توها تدخل من المدرسه رمت الشنطه على السرير وفوقها العباه واخذت ملابسها ودخلت الحمام
,,,,,,,,,,,,,,,,,,,,,,,,,,,,,,,
هند ونور جالسين بحديقه البيت تحت المضله عن الشمس ومعهم كاسات العصير وقالت نور بعد مااخذت جوالها: خليني اتصل على ماما ماكلمتها امس ابدا واتصلت لقته مغلق قفلت وقالت : غريبه مقفل .. يلا بدق على بابا .. اتصلت ولقته مغلق .. استغربت : معقول كل الاثنين مقفلين الجوالات
هند : يالله ناس مسافرين بيجددون شهر العسل ليه تغثينهم
نور تبتسم : لا ياماما راااحت عليهم خلاص مافي لا عسل ولا بصل دامهم جابونا ينسون هالحركات
هند : اخس يالحقوووده
نور تضحك : هييي امزح .. يالله يمكن مافي بطاريه ولا هم مقفلين مدري عنهم
بدق على بيت عزيز اشوف اخبار ضي
واتصلت واللي رد جنان: مييين ؟؟
نور: دنوووونه حبيبي كيف حالك ياحلوه؟
جنان:انتي مين؟
نور: انا عمه نونو كيف حالك؟
جنان : تيبه ..انتي تيف حالت ؟
تضحك نور وتفتح سبكر عشان تسمع هند كلامها: انا تيبه يادلبي انت .. وين ضيوو
جنان: ضيوو مااحبها مااحبها
نور: ليش ؟
جنان: هيا لاحت المدسه وماتاختني معاها وانا صيحت ( هيا راحت المدرسه ومااخذتني معاها وانا صيحت )
نور: مايسير تروحين المدرسه مايدخلونك ياحبيبتي
جنان: الا يتخلوني .. تيف تلوح المدسه ( الا يدخلوني.. طيف تروح المدرسه )
نور: من طيف؟
جنان: سديقتي باللروضه
نور ضحكت بصوت عالي وتناظر هند: ياكذبك ياجنان أي طيف واي روضه .. طيب وينو ضيوو ناديها
جنان: عمه عمه
نور: يوووه يالنشبه .. نعم ياعين عنه
جناان: سفتيني انا تفرزت على البثه والفار ( شفتيني انا تفرجت على البسه والفار) << تقصد توم وجيري
نور: والله شفتيها .. ايه عشانك شطوره يابطله
جنان: انت ليث ماتزين عنتنا
نور: بكرا ان شالله اجيكم .. يلا دنونه وين ضيووو
عبير سحبت السماعه : الووو
نور: السلام عليكم .كيفك عبير
عبير: هلا والله من نور؟
نور: ايه ,, شخباركم وشخبار ضي
عبير: الحمدلله بخير يامال الخير انت وش اخبارك
نور : الحمدلله .. وين ضي
عبير: والله داخل تبدل ملابسها عشان بتتتغدى الحين
نور : اهاا اوكي خلاص قوليلها ان اتصلت اسأل عنها .. ايه صح قولي لعبدالعزيز ان اليوم برجع البيت عشان عبدالرحمن مرني وقال انه بيسافر مع اخوياه
عبير حست بغصه : ايه ان شالله يوصل
نور : يلا مع السلامه
وقفلت ..ناظرت هند: شرايك بالفكره السريعه هذي
هند: وشهي؟
نور: خلاص انا بروح بيتنا وانت بتجين معي
هند: ليه طيب خلاص كله واحد هنا ولا هناك
نور: لا خلاص برجع انا وبعدين البيت فاضي هناك مافي غير الخدامه والله بنخيل على كيفنا وبناخذ راحتنا .ز شرايك؟
هند : نوو بروبلم مافي أي مشاكل بالنسبه لي
انفتح باب الحوش ودخلت الهنوف طفشانه وحرانه جايه من المدرسه وهند ونور بحكم السهر والوقت المشقلب ماكانوا يقابلون اللي بالبيت كثير
الهنوف: السلااام
البنات : وعليكم السلام
نور: وش اخبارك .. يوووه شكلك طفشاااانه وتضحك
الهنوف : قرف قرف متى اخلص ياربي طفشت من المدرسه
هند: لسه بدري على الطفش ياماما وراك مشوااااااااااااااااااار طويل
الهنوف تكمل طريقها لجوا البيت : الله يقطع المدرسه بروووح انام احسن لي ودخلت
نور: الحمدلله اني خلصت مدرسه
هند: يلا قومي خلاص الجو مرررررره حااار ندخل نتغدى
نور: انا ماابي غدا
هند: ليه ؟ ترا ماجد نايم وبابا عادي مو غريب عليك
نور: لا لا مو عشان كذا بس شبعت من الصبح وحنا ناكل
هند: اقول بتاكلين غصب عنك يلا قومي دخلنا ,, وهم ماشيين قالت نور: وين نروح اليوم
هند : خلينا نروح الراشد الجديد
نور: اوكي.. بتكلمين لولو عشان تجي معنا؟
هند : ايه .. اكيد بكلمها ,, ودخلوا البيت
,,,,,,,,,,,,,,,,,,,,,,,,,,,
رن جوال عبدالعزيز: هلاا عبدالرحمن
عبالرحمن : خلاص جهزت ,, امر عليك
عبدالعزيز: ايه مرني
عبدالرحمن : يلا عشر دقايق واكون عندك .سلام
عبدالعزيز: مع السلامه
,,,,,,,,,,,,,,,,,,,,,,,,,,,
ابو بندر جالس على الكراسي عند الغرف اللي مترقدين فيها ابو وام عبدالعزيز بالعنايه المركزه .. طلع الدكتور من الغرفه وقام له ابو بندر: هاا بشر يادكتور كيف وضعهم
الدكتور: والله الحاله خطيره .. لكن ادعيلهم .. وراح
ابو بندر يصفق ايدينه ببعض: لا حول ولا قوه الا بالله
,,,,,,,,,,,,,,,,,,,,,,,,,,,,,,,,,,,,
يتبع..
لوجين خلصت صلاه الظهر وراحت قفلت الباب بالمفتاح واخذت الجوال اتصلت على وليد ومن اول رنه : هلا هلا والله بهالصوت .. هلا باللي لها الخافق يهلي
لوجين : هلابك كيفك..
وليد : تمام ياقلبي انت كيفك ؟
لوجين : الحمدلله بخير .. غريبه !!
وليد : وش الغريب؟
لوجين : من اول رنه ترد..
وليد يضحك : ياقلبي لا زوم ارد من اول رنه وانا اقدر اتأخر عليك ولا ماارد اصلاً
لوجين مستغربه : ههه من متى ؟
وليد : من يوم عرفتك ياحياتي وانت قالبه حياتي
لوجين : طيب خلاص تراني مااصدق على طول اخذ بنفسي مقلب
وليد لا مقلب ولا شي هذا للصحيح ماتشوفين نفسك كيف مجننتني من اول يوم شفتك
لوجين انحرجت : طيب خلاص والله وجهي بوخ .. كيف يومك اليوم
وليد : يووومي احبك
لوجين : ولييييدي خلاص
وليد : احبك
لوجين : والله ترا بقفل من الخجل:
ولي : بعد احبك
لوجين : وانا بعد
وليد : انت وش؟
لوجين : احبك
وليد ضحك مبسوووط: آآآآه ياقلبي صدق والله تحبيني
لوجين : ايه وامووت فيك بعد
وليد : آه ياقلبي بمووت الحقوني ياناس بتذبحني هالبنت بتجنني
لوجين تضحك : اجل خلاص دام السالفه فيها موت بنسحب الكلام
وليد: ياحبي لك يالغاليه
لوجين : وليدي ..
وليد : هلا ياعيون وليدك
لوجين : بسأل عن شي
وليد : اسألي ..قولي .. غردي
لوجين : جوالي خرب وابي اصلحه لو سويت لها فورمات تروح الاشياء اللي فيه
وليد : اشياء ايش ؟
لوجين : مو شي محدد
وليد : ايه ياقلبي تروح اكيد
لوجين : كويس الحمدلله عشان انا كنت بالحيل خااايفه
وليد : ليه وش فيه جوالك خايفه
لوجين : لما خرب كانت فيه صور لك وانا كنت خايفه اصلحه وتبقى الاشياء لأن اخوي فهد هو اللي بيوديه
وليد : اخوك اسمه فهد
لوجين : ايه ليه اول مره اقولك
سكت وليد شوي وتذكر شي لوجين قالت له انها ساكنه بحي الازهري وفهد خويه بنفس الحي معقوله لوجين اخت فهد
لوجين : الوووو ,, وليدي وين رحت
وليد :هلا هلا ياقلبي معك .. اقولك لولو وش اسمك الكامل
لوجين : ليه ؟؟
وليد: شلون ليه ياعمري حبيبتي ومااعرف عنها شي كثير .. هذا وانا ناوي اخطب واتقدم بالله كيف بقول لأهلي وانا مب عارف بنت مين ..
لوجين : ليه انت ناوي تتقدم ؟!
وليد : ايه .. ليه عندك مانع ولا ماتبيني
لوجين : هههه لا بس مااظن في شاب يكلم بنت ويتزوجها
وليد : انا موب كذا ولا انت بنت عاديه ورخيصه بالنسبه لي ..عشان كذا انا فكرت بالهتفكير الكبير
لوجين : اهااا تسلملي يارب
وليد : وبعدين حنا لنا فتره طويله نعرف بعض..
لوجين اوكي خلاص بقولك .. انا لوجين عبدالله العالي
انصدم وليد وقال بنفسه ( والله طلع شكي بمحله الله يالمصيبه وش العمل الحين )
لوجين : وين رحت ؟
وليد تنحنح وبلع ريقه : معك حياالله بنت العالي والله تشرفنا
لوجين : تسلم الشرف لنا .. طيب يلا انا اللحين بقفل عشان اروح اعطيه الجوال اوكي
وليد : اوكي ياقلبي بس انتبهي ثاني مره انا كل مره اقولك امسحي اول بأول حتى لو رساله لا تخلين عشان لا يسير شي لا سمح الله يضرك
لوجين : والله انا اسح بس هالمره خرب قبل لا انظفه
وليد : تنظفينه ؟!! ليه انا قذاره ؟
لوجين تضحك : لا لا لااااا والله مو قصدي كذا
وليد ضحك على رده فعلها : ادري ادري ياقلبي بس امزح معك .. يلا تبين شي ياحبي
لوجين : سلامتك
وقفلت وابتسمت مكالمتها لوليد اليووم مره حلوه .. قامت من السرير وفتحت باب الغرفه وراحت على غرفه فهد ودقت الباب
فهد: من؟
لوجين : اناااا اناااا .. ادخل
فهد : ادخلي
فتحت الباب : مرحباااا
فهد : اهلين .. كيف المدرسه اليوم
لوجين : عادي زي كل يوم .. انت كيف الجامعه
فهد : كويسه
لوجين بدلع : فهووودي
فهد : نعم
لوجين : جوالي خرب انكبت عليه مويه خذه وده المصلح
فهد : طيب عادي تنشف المويا ويرد يشتغل
لوجين : لا مو اختك الصغيره الدلوعه مرررره ذكيه لما انكبت المويا شبكته بالشاحن على بالها بينشف قام انعدم مره وحده
طالع فيها فهد واطلق ضحكه عاليه : يالله كل هذا غباء يالولو .. اول مره ادري انك غبيه لهالدرجه
لوجين : لا تضحك ترى بعدين ربي يبالك بشوي من اللي عندي
فهد لازال يضحك بس اخف من قبل: والله انت الصراحه شي .. خليه خليه على المكتب اذا رحت العصر اخذه
لوجين : اوكي .. ثانكس الوووت فوفو يلا باي
وطلعت وقفلت الباب.. قابلت امها طالعه من تحت
هدى : كيف المدرسه اليوم
لوجين : عادي زي كل يوم
هدى : طيب يلا الغذا دقايق ويكون بالارض
لوجين : لا ماابي بناااام نعساااانه .. وتمشي للغرفه
هدى : تغدي وبعدين نامي
لوجين : لا بديش اكووول .. عشان اشبع نوم واقوم اروح للبنات
هدى: ليه عزموك اليوم
لوجين : موب لازم يعزمون بروح من غير عزومه
هدى : براحتك
دخلت الغرفه الا هذا جوالها يدق : هلااا والله اهلين بالشين
هند : شين بعينك
لوجين : هنوده شوفي ترا انا اخر ونااااااااااااسه ومبسوووطه وابي اسوي اللي ابي واقول اللي ابيه واسب اللي اسبه فرجااااءً يعني لا تعكرين مزاجي راجاءً يعني ..
هند : اقول انقلعي صدق من قال ياشين السرج على البقره الشرهه علي اللي داقه اقولك تعالي بس جزاء لك وردع لأمثالك ضفي وجهك ولا اشوفك اليوم سامعه
لوجين تضحك : لا لا امزح والله امزح تعالي
ابتسمت هند بمكر : ايه كذا احترمي نفسك .. اقول لا تطولين بالنومه اليوم وتعالي بدري عشان بنروح الراشد وبعدها على بيت نور
لوجين : ليه بيت نونو
هند : عشان اخوها سافر اليوم والبيت هناك فاضي ونبي نروح نفلها وبعدبن ماجد رجع وانحكرنا شوي
لوجين : اهااا عشان كذا .. اوكي ان شالله يسير خير
هند : تراني بنام عندها شرايك تقولين لأمك وتنامين معنا
لوجين : والله ماادري اخاف ماما ماترضالي اغيب
هند: خلاص انت بس تعالي وتدبر بعدين
لوجين : اوكي
وقفلت ونامت ...
,,,,,,,,,,,,,,,,,,,,,,,,,,,,,,,,,,,,
الساعه 5 ونص عبدالعزيز وعبدالرحمن بارض الرياض بالمستشفى كلموا ابوبندر وسألوه عن القسم والغرفه وهم بالمصعد قال عبدالرحمن : يوه نسيت اتصل اطمن نور اني وصلت
عبدالعزيز: ليه وش قلت لها؟
عبدالرحمن: اني مسافر مع اخوياي لجده.. وطلع جواله وفتحه واتصل بس محد رد
,,,,,,,,,,,,,,,,,,,,,,,,,,,,
نور وهند كانوا بالصاله وحاطين قناه روتانا والصوت على اعلى شي ويرقصون على اغنيه ( عـــزاه )
عزاه ياقلب من الهم عزاه
من يواسي دمعتي قال خيره
وشلون خيره بعد فرقاه
لا تقولوا خيره خيبه كبيره
نور تقرب لهند وتمسك ايدينها وتحطها على اكتافها ويرقصون ورى بعض بنفس الطريقه
الا هذي سعاد نازله من فوق :يابنات
ماسمعوها ولا شافوها
سعاد : بناااااات ,, بس محد عندها
دخلت الصاله الا نور تخفض الصوت : هلا خالتي سوسو
سعاد : وش عندهم اليوم بناتي رقص
هند : والله نستانس.. ماما مافي عرس قريب ؟
سعاد : عرسكم ان شالله .. وتجلس على الكنب
هند ونور يضحكون .. دق جوال نور راحت ركض اخذته من فوق التلفزيون
هلااا دحوم... وصلت؟
عبدالرحمن : ايه وينك عن الجوال
نور: ماكنت سامعته الحمدلله على سلامتك .. متى بترجع؟
عبدالرحمن : مدري والله احتمال بكره او بعده على حسب
نور: اوكي بس اذا اكدت رجعتك قلي عشان انا اليوم بروح البيت ومعاي هند
عبدالرحمن كان مستعجل يبي يقفل عشان يروح يريح قلبه ويتطمن على ابوه وامه : طيب طيب يلا مع السلامه
نور: يمه .. طيب باي
وقفل وهو ماشي ورى عبدالعزيز بسرعه دخلو ممر طويل لقو ابو بندر جالس على الكراسي
عبدالعزيز: السلا عليكم .. هايابو بندر بشرنا ؟؟
ابو بندر : والله مدري وش اقولكم ياعيال بس الدكتور قبل ساعتين طالع من عندهم ويقول الحاله خطيره والله يستر
عبدالرحمن : منهو الدكتور ؟
ابو بندر: والله مدري سمعتهم ينادونه بالدكتور سلطان
عبدالرحمن : يالله عبدالعزيز خلنا نروح له ... نزلو وسألوا عنه وراحوا له دقو الباب
الدكتور: تفضل
عبدالعزيز وعبدالرحمن دخلو : السلام عليكم
الدكتور: وعليكم السلام ورحمه الله .. أي خدمه ياشباب
عبدالعزيز: حنا عيال المريض سعود اللي جاكم بحادث هو ووزوجته
الدكتور: هلا الله يحيكم تفضلو
عبدالرحمن : ممكن تشرحلنا حالتهم وكيف وضعهم اللحين
الدكتور : والله مدري وش اقول لكم بس مارح اخبي عنكم شي الوالد اصابته خطيره واكثر شي تأثر بالصدمه العمود الفقري فأحتمال كبير انه يصاب بالشلل النصفي
عبدالرحمن : لا يدكتور قول غير هالكلام.. مافي أي حل
الدكتور: للأسف
وناظر عبدالعزيز: عبدالعزيز خلنا نسفره الخارج
الدكتور: استهدي بالله يااخوي حتى لو سفرتوه برا النتيجه واضحه مارح تستفيدوا أي شي هذي الاشاعات والاوراق اللي تتكلم عن حالته تقدروا تتأكدوا بأنفسكم
عبدالعزيز: لا حول ولا قوه الا بالله .. طيب مافي امل حتى لو بالعلاج الطبيعي
الدكتور: والله كل شي بيد الله... حنا نسوي كل اللي بيدنا والباقي على الله
عبدالرحمن تنهد : استغفر الله العظيم لا حول ولاقوه الا بالله
الدكتور ناظرهم : اما الوالده
عبدالعزيز تنبه هو وعبدالرحمن انشغلوا بحاله ابوهم ونسوا امهم وقالوا بصوت واحد :وش فيها .؟
الدكتور: حالتها جدا سيئه واحتمال بقائها حيه نسبته للأسف ضعيفه الحادث كان شنيع وجات الضربه على الدماغ واثر تأثير شديد عليها وحتى لو الله كتب لها عمر جديد بتضل في غيبوبه وان قامت منها بتفقد الذاكره
عبدالعزيز وعبدالرحمن تأثروا من الحاله اللي وصلت لها امهم وكان السكوت سيد الموقف
رد وتكلم عبدالعزيز: لا حول ولا قوه الا بالله .. اللهم انا لا نسألك رد القضاء ولكن نسألك اللطف فيه .. طيب يادكتور مانقدر نشوفهم ونتطمن عليهم ؟
الدكتور: والله الحاله اللحين ابدا ماتسمح انه يدخل عليهم احد ,, لكن ابشروا بس تستقر حالتهم بندخلكم لهم
عبدالعزيز : طيب يعطيك العافيه وماتقصر قام وقوم عبدالرحمن اللي سكت بالمره من الكلام اللي سمعه وصار بس يفكر في امه وابوه ..
,,,,,,,,,,,,,,,,,,,,,,,,,,,,,,,,
سعاد وهند ونور لازالوا بالصاله جالسين يسولوفون قالت سعاد: ليه بتروحين بيتكم يانور
نور: خلاص عشان ماجد ياخذ راحته بعد وكلها بكره ولا بعده وماما وبابا يرجعوا ان شالله
سعاد : ان شالله بالسلامه ..كلمتيهم
نور: دقيت لقيته مغلق .. ياخاله تراني رح اخذ هنو معي تنام ببيتنا
سعاد : بكيفكم ..
هند : ترا وصل ماجد اليوم شقتيه ؟
سعاد : ايه شفته نايم بغرفته ..
هند :ايه صح وبنروح الراشد اليوم
سعاد : الجديد؟
هند: ايه
سعاد: لا تتأخرون سامعين
هند ونور: طيب
رن جوال هند الا هذا حسن شافت الرقم وعطته سايلنت
نور: من لولو
هند غمزت لها يعني افهمي انه عبدالكريم : لا لا رقم غريب
شوي ورد اتصل مره ثانيه وبعد اعطته سايلنت وحطت الجوال غير متصل بالشبكه
نور مافهمت قصدها وقالت: طيب ردي يمكن احد غلطان
انقهرت هند من غباء نور : لا ماني راده اخاف واحد لعاب وينشبلي عاد
نور : ماشالله ماشالله من متىالاخلاق
قالت سعاد: ايه بنيتي رزينه ماعندها حركات النص كم
نور بصوت واطي وتناظر هند : والله اللي يدري يدري واللي مايدي يقووول...
سعاد: هلا وش قلتي
ابتسمت هند ابتسامه صفره: لا لا ماعليك منها ياماما ماعندها سالفه .. قومي نور بوريك شي بالغرفه
نور تضحك عارفه انها بتصرف الموضوع : وشو الشي
هند : شي وخلاص بتجين ولا اروح
نور: لا لا جايه .. وقامت
سعاد قالت والبنات قايمين : هند مري على اختك صحيها عشان تنام بدري بالليل
هند وهي طالعه الدرج : طااااااااايب.. تناظر نور تعالي خلينا نزعج هنوفه شوي..
دخلو على غرفه الهنوف هند فتحت الانوار ونور قفلت المكيف وفتحت الدرايش هند راحت سحبت اللحاف من عليها ونور تصحيها : هنوف هنوف هنوف يلا قومي قومي يلا
الهنوف ::: هااا ماابي اقوم اللحين
جات هند وجلست على السرير وسحبتها من ايدها وقعدتها : يلا يلاااااااا قومي
الهنوف :يا ماااااااااامااااا << تصارخ وتنادي امها
هند:ماما قالت اصحيكي بسرعه يالله قومي
نور قامت جابت الشباصه ولمت شعر الهنوف ومسكتها من رجوالها وهند من ايدينها وشالوها وطالعين بها برا بيودونها الحمام
الهنوف تضحك : نزلوووني
بس محد رد عليها .. وهم طالعين منالغرفه الا هذا ماجد طالع من غرفته توه قايم وشاف البنات بوجهه وصار يحك شعره الناعم الطويل شوي ويناظرهم
نور تورطت وش تسوي ماتقدر تهرب وماسكه الهنوف بنفس الوقت قامت تركت رجولها وركضت على الغرفه
اما الهنوف : آآآآآآآآآآآآه << طااحت على الارض
هند تركت ايدين هنوف وماتت ضحك
اما ماجد واقف يناظر الموقف ومبتسم وقال: صدق الناس لما تصحصح على وجيه حلوه غير لما تقوم على وجيه شينه مثلك ياهند
هند سكتت من كلمته : هيهيهيهي لا ياشيخ باااايخ مررره
طبعا الهنوف قامت معصبه من الطيحه وقالت بعصبيه : الله ياخذكم قولوا امين وراحت على الحمام
هند ضحكت عليها وردت ناظرت ماجد: اللحين انت وش رجعك من السفر سبحان الله دايم تخرب علينا
ماجد: ليه ؟
هند : البنت بتروح بيتهم
ماجد كشر: لا واللله جد .. ليش خليها تجلس عندنا البيت بيتها وبنستانس معاها اكيد
هند : لا ياشيخ احلف
ماجد : والله العظيم
هند عطته ظهرها ومشت للغرفه
وماجد ناظرها وضحك : هالبنت هبله .. وكمل طريقه للحمام ...
دخلت هند على نور الغرفه ولقتها جالسه على السرير وضحكت يوم شافتها: الصارحه احلى موقف
نور: انقلعي اقول .. خلاص بروح بيتنا الحين والله فشله مرتين اطلع بوجهه اليوم
هند: اقول ريحينا
نور: متى بتجي لولو
هند : مدري بس قلت لها لا تتأخر .. وطلعت جوالها وفتحته وقالت لنور: وبعدين يالغبيه ترا عبدالكريم اللي كان يدق واغمز لك وانت ماتفهمين انا نفسي اعرف انت شلون تخرجتي من الثانويه بنسبه عاليه وانت بهالدلاخه
نورتضحك : ههههههه الله نجحني .. بدقين عليه ؟
هند: ايه
نور: وش له داعي خلاص موب لازم
هند: لا ياشيخه خلينا نستانس شوي
نور: هنو انت ليه تكلمينه اللحين والله اني موب مرتاحه له كذا من الباب للطاقه جاب رقمك وكلمك وانت ماتعرفين عنه شي
هند: بكيفه حنا مو خسرانين شي وبعدين كم مره قلت لك مايعرف شي عني غير الاسم الاول ولو صار ماصار كل راس مالها شريحه وتتغير .. واتصلت
طبعا حسن من اول رنه : هلااا هلااا والله وينك انت ؟! ليه تسحبين فيني ادق ماتردين وارجع ادق تقفلينه
هند: سوووري والله ماكنت اقدر ارد عليك .. اخبارك اليوم
حسن : ماشي الحال الحمدلله .. انت كيفك ؟
هند : الحمدلله طيبه
حسن : ايووا كيف صديقاتك جوو عندك ؟
هند : ايه نونو عندي بس لولو مابعد جات
حسن : اهااا ..ايوااا وبعدين ..
هند ضحكت : ابد والله هذي كل السالفه ..انت وش صار معك
حسن ولا شي والله بس تضاربت معهم الله يحرقهم
( طبعا جالسين يقولون كلام موب مفهوم بس هند وحسن ان مالقوا سالفه تخترعوا سالفه من عندهم بنفس الطريقه اللي يتكلمون فيها الحين )
دق الباب ونزلت هند الجوال : منووو؟
لوجين دخلت : انا انا ..مرررررررحبا ياحلوات
هند : هلا والله اكتملت الشله وردت الجوال لأذنها
حسن : من ؟
هند : لولو جات .. وتسلم عليها وبعدها سلمت على نور اخباركم يابنات
هند : الحمدلله وتكمل كلامها مع حسن
نور: كيف المدرسه اليوم
لوجين : عادي طفش كيف السهره امس ؟
نور: حلوووه ناقصتك
تكلمت هند : وين حلوه تدلع علي نونو متضايقه ومدري وش فيني قلقتني معاها وفوق هذا مقومتنا من صباح الله خير
لوجين : ليه وش مضايقك يانونو؟
نور: ابد حسيت بضيقه والحمدلله الحين عادي
لوجين تناظر نور وتتكلم عن هند: تكلم من هذي ؟
نور: يوووه سالفه طويله ,, وتقولها السالفه ..
بعد ماخلصت نور قالت لوجين لهند : عطيني اسلم عليه ..
هند : عبودي لولو بتسلم عليك تبيها ؟
حسن: لا وش ابي فيها
هند ضحكت : يقول وش يبي فيكي
يتبع ,,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك