رواية نهاية حب -8
سلمان كان منقهر من الخاطر ماتوقع هالتصرف .. مريم صدمته بتصرفها .. الواحد مهما يكون تعز عليه نفسه .. شلون تشك فيه وتتهمه .. صج اهو يحبها ويموت فيها بس لاول مره يحس سلمان ان مريم بعدها ياهل وتصرفها هاي تصرف سطحي .. صار له سنتين يعرفها .. يوم عرفها عمرها 18 واهو 23 الحين اهي 20 واهو 25
وصارت وايد اشياء ووايد مشاكل .. بس رغم كلشئ كانت مريم متمسكه فيه وحاربت الكل ووقفت بويه العادات والتقاليد عشان حبها مايموت .. والحين عقب ماحققو حلمهم تتخلى عنه بهالسهوله ؟
سلمان في خاطره كان يقول " الله يسامحج يا مريم .. ماتوقعت هالشئ منج .. انا اللي علي اني ابرر موقفي وادافع عن نفسي والباقي بيدج .. اذا اهي صج تحبني راح تصدقيني "
في غرفتها قاعده .. تسمع اغنية عبد المجيد " تنتظر كلمة احبك شايفك مشغول فيها كل شئ بوقته حلو ليش متسعجل عليها .. بكره اهي اللي تجيك وتمر كل لحظه عليك .. انت بس طول لي بالك .. وكل شئ بوقته حلوو "
شريفه كانت قاعده في غرفتها .. تتذكر الموقف اللي صار لها امس في العرس ويا خالد وشلون كان يطالعها .. احمرت خدودها من المستحى واهي تتذكر .. مشاعرها كانت متضاربه .. من سنتين مات حبها بس اهي بقت عايشه على ذكراه والحين يوم برا جرحها وبدت تنسى شوي طلع لها خالد واعاد لقلبها الاحاسيس والمشاعر اللي كانت في سبات عميق ومافكرت انها تخليهم يظهرون مره ثانيه .. في قلبها اهي كانت مرتاحه لخالد وتحس انها تبيه واهي فكرت عدل من يوم فطوم كلمتها عنه .. وقررت انها تخبر مريوم اليوم .. لين راحت بيتهم وتاخذ رايهاا
لساعه 2 الظهر في بيت بوعلي .. البنات كلهم قاعدات يشوفون تلفزيون وبوعلي توه كان واصل ..
بوعلي : السلام عليكم
البنات : وعليكم السلام
بوعلي واهو ينزل دانه : شحالكم بناتي .. وين ام علي ومنار ؟
منى : في المطبخ .. اليوم بيونا ناس يباركون
بوعلي : ايه .. انزين قعدن باسولف وياكم شوي
قعدو منى وصفاء وروان وياهم
بوعلي : شلون الدراسه متى راح تبتدون ؟
صفاء : بصراحه خالي انا تركت الجامعه وان شاء الله بادخل جامعه خاصه في الكويت او يمكن اروح الاردن اذا ابوي وافق احاول اقنعه
بوعلي : لا يا بنتي .. السفر هب زين للبنات
قاطعته صفاء : بس يا خالي باورح ويا بنات وراح يكون سكن خاص يعني مافي اي مشاكل
بوعلي يبتسم ويطالعها بحنان : صفوي سمعيني .. السفر صعب وخلاص .. انا خالج ماراح اخليج تروحين
صفاء بوزت : ليش يا خالي ؟
بوعلي مارد عليها والتفت على منى : منايه وانتي بتدشين الجامعه السنه ؟
منى : ايه .. بس للحين ماحدد شنو ادرس
بوعلي ابتسم : زين عيل .. تعالو درسو اهني في جامعه البحرين .. صدقيني يا صفاء احسن من السفر
صفاء نقزت : صج والله فكره ... من صجك خالي ؟
بوعلي : ايه من صجي .. شرايج منى ؟؟
منى : والله فكره حلوه بس ابوي ماراح يوافق
بوعلي : لا راح يوافق .. انتو بتدرسون من تلعبون .. وراح تكونون في بيتكم وعند خالكم
استانسو البنات من الخاطر .. وقعدو يخططون شلون يقنعون ابوهم
روان كانت تسمع واهي بتموووت من الغيض .. مو كفايه مريم .. بعد صفووي ومنايه ؟؟ اففف شنو هالحاله
بوعلي التفت على روان اللي كانت قاعده تشوف تلفزيون : روان حبيبتي .. شفيج ؟
روان بأرتباك : ها .. لا مافيني شئ .. انا باروح غرفتي ..
قامت روان وطالعت منى وصفاء بنظرات توعد بس منى وصفاء ما سوو لها سالفه
بوعلي : وين مريم ؟
دانه : بابا .. مريامي راقده .. رحت انا غرفتها بس اهي كله راقده !
بوعلي يسحبها صوبه : فديت هالويه انا .. تعالي عند بابا يا روح بابا انتي
تركض دانه وتنخش في حظن ابوها واهو يدلدغها واهي ميته ضحك وعيونها دمعت من الضحك
بوعلي يقعد دانه في حظنه : قومو شوفو مريم .. قعدوها بسها رقاد
منى : ان شاء الله خالي
قام بو علي وركب غرفته يرتاح شوي و
راحت منى صوب غرفة مريم .. دقت على الخفيف بس مريم ماردت .. بطلت الباب ودشت الغرفه .. كانت الغرفه بارده ومريم راقده وعلامات التعب على ويها قربت منها منى وبدت توعيها
منى بصوت واطي : مريم .. مريامي قومي بسج
مريم : ....
منى : يلاا عاد بسج قومي .. بعدين ويهج بيكون منتفخ في ناس بييون اليوم
مريم فتحت عيونها بتعب وطالعت منى : خلاص قمت
منى : الحين قومي يالله
مريم : افف منج .. زين قمت
قامت مريم بتعب من السرير ودشت الحمام تتسبح
طلعت منى من غرفتها ونزلت تحت تسولف ويا اختها
منى واهي نازله من على الدري : صفاء صفاء
صفاء : شنو ؟ شفيج ؟
منى وصوتها متقطع من الركض : عندي كلام باقوله لج
صفاء : قولي .. تفلسفي
منى : هههه يالبايخه .. شوفي طبعا اذا احنا بنسكن اهني .. انا ماقدر اتحمل اكون وياج في نفس الغرفه على طول كفايه هالاسابيع
صفاء تطالعها بنص عين : ارجوج .. انا اللي ميته عليج يعني ؟
منى : زين عيل اتفقنا .. سمعي الطابق الثالث مافيه احد .. انا باخذ غرفه وانتي غرفه .. ومريوم نخليها تيي فوق وبنخبر روانو العله اذا تبي تيي .. وبنعدل الصاله ونغيرها وبنخليه قسم للبنات
صفاء : اخ منج .. من الحين خططتي .. لا سمعي .. مابنروح الطابق الثالث .. علووي بنخليه يرووح انا سمعته يتحرطم ذاك اليوم يبي قسم خاص فيه .. بنقنعه يروح فوق وبنساعده بنرتب له المكان .. وانا باخذ غرفته
علي وهو طالع من المطبخ وفي يده تفاح : هاهااااهااهاا .. وحليلكم فاهميني .. بتسكنون اهني خلاص ؟؟
منى : ايه ان شاء الله .. وبنروغك من غرفتك مانبي يهال
علي : هاهااهاهاها .. يالعنز انا بروحي من نفسي باروح مايحتاي .. ماستحمل وحده نفسج يالديناصورة
منى : جاب انا مو متفرغه لك .. يلا قم مناك
علي التفت على دانه وقعد يطالعها بنظرة خبث : دانه شتسوين ؟
دانه كانت مشغوله بألعابها " تسوي كيك "
دانه تطالعه ببراءه وعيونها مبطلين على الاخر : اسوي كيكه
علي : هممم .. زين ابي اذوقها
دانه بعصبيه تحط يدها على العابها : لاا .. هاي عشان مريامي مو انته
علي مد بوزه : خلاص انا زعلت
دانه ماهان عليها اخوها : زين شوي بس ..
علي : وعععع شنو هاي .. بلاستيك يالغبيه
دانه بعصبيه : انا مو غبيه
علي : غبيه ونص .. احد يطبخ بلاستيك
دانه ماردت عليه وقعدت تكمل الطبخه واهي تقول كلام مو مفهوم
علي كان مصر يطفر بها
علي : دانووو
دانه ماسوت له سالفه
منى : اففف ذبحت البنيه خلها .. يالله قوم
علي : باقوم عشان افتك من ويهج
صفاء : ههههههههههههههههههههههه
منى : تدري خلك قاعد .. انا باروح المطبخ اساعدهم احسن من اجابل ويهك
** خلصت مريم وطلعت من الحمام .. قعدت تنشف شعرها واهي تحس بالألم والحزن .. وقررت انها ماتسامح سلمان ولا تصدقه في اي شئ ثاني ماراح تخليه يجذب ويلعب عليها مره ثانيه .. اهي ماراح تقول لأحد شصاير بس راح تتجاهل سلمان .. الناس شبتقول ؟ اول يوم ملجه تركها ؟ اكيد مريم بتضرر من الكلام .. فقررت انها تسكت وتخلي روحها عادي
تلبست وطلعت من الغرفه .. وراحت صوب غرفة روان .. شافت الباب مفتوح دشت الغرفه شافت روان تشوف تلفزيون
مريم : روان ؟!
روان نقزت يوم سمعت صوت مريم وابتسمت لها : هلا حبيبتي تعالي
مريم قعدت واهي منزله راسها : روان ابي اطلب منج طلب ؟
روان رفعت حياتها : امري ؟
مريم : روان الله يخليج مابي احد يدري بسالفه ! انا ابي احلها بنفسي ؟!
روان في خاطرها " ماطلبتي يالغبيه " : ان شاء الله ولايهمج محد راح يدري
مريم ابتسمت لها : زين انا بانزل تحت اكيد كلهم يحاتوني
روان : ايه .. كلهم زاغو عليج
عااااااااااااااااااد هذا طويييييييييييييل واللي بيشتكي بفتح عيونه أخليها فنجان عااااااااااااد هالله هالله بالردود أبيها تكفي طمعي اوكي أشوووووووووووفكم بخيييييييييييييييييييييييير
سي يوووووو
هذي التكملة إلى النهاية والله أنا قايلة ابي انزلكم بالقطارة بس انتو ما رضيتو... والله مررررررررررة راح توحشوني كلكم ابي اشوووف ردووووووودكم بلييييييييييييييييز وخلو خاتمتها مسك.......
نبدأ
** نزلت مريم تحت وشافت صفاء ودانه وعلي قاعدين سلمت عليهم واهي تحاول تمثل الابتسامه
صفاء يوم شافت مريم عاديه .. فضلت انها ماتفتح معاها السالفه وتخليها على راحتها متى ماتبي راح تقول لهم
دانه من شافت مريم .. ربعت صوبها واهي ميوده صحن
دانه : مريامي .. شوفي سويت لج كيك ماعطيت علووي
مريم : ههههه مشكوره حبيبتي " تسوي روحها تاكل " الله طعمه حلوو ما شاء الله فنانه
علي : اخخ منج يالجذابه .. مو انتي عطيتيني شوي ؟
دانه بعصبيه : انا مو جذابه انت جذاب
مريم : عيب حبيبتي
دانه تطلع لسانها لعلي وتكمل لعبها
مريم التفت على صفاء
مريم : وين منايه وخالاتي ؟
صفاء : في المطبخ بعدهم
مريم : اها .. خالوه منار ماتقعد بروحها تعبانه .. قومي نروح نساعدهم ونخلي خالوه تقعد
صفاء : مابتطيع حاولنا وياها .. بس خلنا نروح
راحو البنات صوب المطبخ و منار ارتاحت يوم شافت مريم عاديه مافيها شئ .. وثبت ظنها انها كانت متزاعله ويا سلمان .. بس الحمدالله شكلهم حلو الخلاف
*** العصر مريم كانت في غرفتها تسمع صوت الحريم تحت .. كانت تتعدل واهي من داخلها تحترق وتمووت .. لبست جلابيه هنديه لونها ازرق فاتح ومطرزة بخرز فيروزي ورفعت شعرها بطريقه حلوه وبسيطه .. وحطت ميك اب خفيف ماكان لها مزاج تسوي اي شئ .. بس عشان محد يلاحظ ويشك ..
قبل ماتنزل .. سمعت صوت دق على الباب .. وتبطل الباب وكانت شريفه
قامت مريم وباستها وحظنتها وفضلت انها ماتفتح وياها الموضوع الحين وتكون عاديه
شريفه قعدت تسولف ومريم تسمعها وتبتسم ..
شريفه : مريم حبيبتي شفيج ؟
مريم : ولا شئ الغاليه
شريفه : ماشوفج مستانسه ؟!
مريم ابتسمت : صدقيني انا اسعد انسانه
شريفه : زين يا اسعد انسانه انا عندي لج موضوع وابي رايج
مريم عدلت من جلستها : خير ؟!
شريفه : في واحد يبي يخطبني
مريم وعلامات الفرح على ويها : صج ؟؟؟
شريفه : ايي صج بس ماسئلتي من ؟
مريم بأستغراب : من ؟
شريفه واهي مستحيه : عمج خالد
مريم ماستوعبت شئ تمت تاطلع شريفه .. وبعد دقيقه فهمت السالفه
مريم : حلفيييي ؟؟؟
شريفه : والله
مريم لوت على شريفه واهي مستانسه من الخاطر وتصارخ وتقول "يالسباله ماصدق"
مريم : والله فرحتيني ماصدق والله
شريفه : انتي شرايج ؟
مريم : شنو شرايي .. انتي اختي وهذي عمي اكيييد بستانس .. بس ابيج تفكرين القرارا قراراج
شريفه واهي منزله راسها : انا موافقه
مريم استانست من الخاطر وباركت لها
وبعد ماسولفو شوي .. مريم حست براحه
نزلت تحت وسلمت على الكل واهل تتصنع الابتسامه .. الكل كان يتكلم عنها وعن جمالها واخلاقها .. ويقولون لأم سلمان ..شكثر سلمان محظوظ فيها .. ام سلمان كانت تطالع مريم بكل فخر وقدمت لها الطقم .. كان حلوو وايد وبسييط باستها مريم على راسها وشكرتها
وقعدت مريم عدال نورة واهي ساكته
نوره : مريم .. زهبتي فستانج ماباقي الا يومين على عرسي !؟
مريم ابتسمت : من زمان الغاليه .. فستاني زاهب
نوره : شدي حيلج ماباقي شئ على حفلتج .. دامه سلمان مابيسافر .. ابوي يقول انخلي الحفله في نهاية هالعطله
مريم تطالع نورة بصدمه وفي خاطرها " يعني خلاص ؟! مكتوب علي اعيش مع هالخاين ؟ ياريتني اقدر اسوي شئ ؟! انا الحين حرمته خلاص مو بيدي شئ "
نورة : مريوووم شفيج ؟؟ صار لي ساعه اكلمج !؟
مريم : السموحه حبيبتي " وغيرت مريم السالفه وقعدت تسولف وياها عن عرس نورة "
بعد ماراحو الحريم .. دخل بو علي الصاله ونادى مريم ..
مريم خافت ان خالها درى بالموضوع .. وراحت صوبه
بوعلي : ريلج يبي يشوفج .. يترياج في الصاله
مريم انصدمت " من صجه .. مايستحي ؟؟؟؟ .. ماصدق هالكثر يظني غبيه .. يا ربي شاسوي مابي اشوفه والله ..
مريم بيأس : ان شاء الله خالي الحين بادخل ..
سلمان كان متحرقص مايقدر يتريا اكثر من جيه لازم يكلمها ولازم يدافع عن نفسه ويعاتبها
دشت مريم الصاله بس مارفعت عيونها صوب سلمان
سلمان يوم شافها وقف وحس قلبه يتقطع .. قرب منها بس اهي ابتعدت عنه وقعدت على الكرسي
سلمان تنهد .. وقعد على الكرسي اللي مجابلها
مريم كانت تحاول تحبس دموعها .. وتيود روحها .. وسلمان مو عارف شلون يبتدي
بعد صمت طوويل .. ابتدى سلمان باكلام
سلمان : احمم .. مريم
مريم مارفعت راسها بس ردت عليه بجفاء : نعم ؟!
انصدم سلمان من نبرتها بس كمل كلامه : ابيج تسمعيني عندي كلام باقوله
مريم ماقدرت تيود روحها : شتبي تقول فهمني ؟؟ في شئ بعد ماسويته ؟؟؟ عندك شئ تجرحني فيه ؟؟
سلمان : لا تقولين هالكلام انتي ظلمتيني .. والله يا مريم لولوه اهي اتصلت فيني وقالت تبي تشوفني وانا كنت باقول لج
مريم بأستهزاء : تبي تشوفك ؟ وليش ان شاء الله ؟؟ ليش شنو في بينكم عشان تبي تشوفك ؟
سلمان تنرفز من طريقتها في الكلام : كانت تبيني في موضوع .. و
مريم قاطعته واهي تبجي : خلاص يا سلمان .. مابي اعرف ومابي اسمع سمعت اللي يكفيني خلااص .. ارجوك خلك بعيد عني ومابي اكلمك
سلمان واهو معصب : والله ظلمتيني يا مريم والله ظلمتيني .. انا الحين عرفت انتي شكثر تثقين فيني مشكورة يا مريم
مريم : خلاص ارجوك اللي فيني كافيني .. بس عندي طلب مابي احد يعرف عن هالسالفه خلنا مثل ما احنا .. وان شاء الله بعد ماتمر سنه طلقني
سلمان انصدم خلاص مو قادر يستحمل ! مريم تفكر بالطلاق ؟؟ مستحيييل اللي قاعد يصير الله يالدنياا .. لعبتي لعبتج .. ومريم الله يسامحها
سلمان مارد عليها وطلع من الصاله وقلبه غارق بالهموم .. " ماصدقتني .. خلاص كل شئ راح ينهدم .. هالكثر قلبج قسى يا مريم !
مريم مسحت دموعها .. وقررت بينها وبين نفسها انها ماتذرف ولا دمعة على انسان خانها وماقدر اللي كان بينهم .. وقررت انها تكون اقوى من هالموقف وماتخلي شئ يأثر فيها بعد اليوم
يتبع ......
مريم كانت قاعده في غرفتها والافكار تتضارب في راسها .. تحاول تربط كلام روان والسنتين اللي عاشتهم ويا سلمان .. وفي خاطرها " مستحيل هالانسان اللي وقف وياي وشاركني الحلوه والمره تكون هذي حقيقته .. مستحيل يطلع جذاب ! شلون وانا كنت احس بدفئ مشاعره وصدق كلامه في كل مره قال لي "احبج" معقوله خوفه و اهتمامه يكون تمثيل ؟ معقوله دموعه اللي محد من البشر شافها غيري معقوله تكون دموع تماسيح ؟
كنت احس بكل كلمه يقولها واعيش كل لحظه حلوه وياه والحين يطلع كل هاي وهم ؟ اخاف اني تسرعت .. بس ليش روان تجذب علي ؟ اهي بنت خالي وربينا ويا بعض و ليش لولوه تقول هالكلام لرفيجاتها ؟!
اففف والله راسي عورني ماقدر افكر "
هذي حالة مريم احساسها بالذنب ماكان يفارقها .. تدرون ليش ؟ لان في شئ يربط بين مريم وسلمان .. شئ غريب وغير ملموس يربطهم ببعض ويخليهم يحسون ببعض اللي جمعهم حب طاهر والحين تكلل برباط مقدس .. كان الحب معشش على حياتهم وكانو مثل الروح الوحده مايتفارقون ويحسون ببعض
مريم ماكانت مرتاحه من الوضع حاسه بنغزه في قلبها .. احساسها تجاه سلمان ماخاب ولا مره
مرت عليها ساعتين واهي تفكر .. تبي تتأكد من الكلام بس شلوون ؟؟
في الصاله .. الكل كان قاعد يسولفون عن العزيمه والناس منى وصفاء مستانسين من الخاطر لان خالهم كلم ابوهم عشان يقعدون في البحرين ويدرسون وابوهم وافق لأنهم راح يكونون في بيت خالهم وجدام عيونه واهو اكيد راح يخاف ويحافظ عليهم مثل بناته
بوعلي : ماتبون تيبون اغراضكم من الكويت ؟
منى : لا خالي احنا تقريبا كل اغراضنا ويانا .. احنا من شهر في البحرين
صفاء : ايه والباقي بنشتريه من اهني
ام علي : زين بخبر الخدم يفضون الغرف اللي فوق
منى واهي تطالع علي بنظرة خبث : مايحتاي خالتي .. علي بيروح فوق
علي : احمم .. موعشان شئ بس عشان اكون بروحي وافتك من ويه الخسفات
ام علي : لا يا علوي انا اعرف سوالفك .. تبي تقعد مجابل هالبلاي ستشون 24 ساعه وتفتك مني اعرفك انا
علي : هاهاهااا اسمه بلاي ستيشن مو ستشون
منى : اففف يعني مستعد تلقط اغلاط الاوادم
علي : ايه احسن لج لاتغلطين .. ولا بتجنين على روحج
منى : اعوذ بالله منك
روان : انا باروح الطابق الثالث بعد
بوعلي : ليش ؟ الحين كل البنات بيكونون في الطابق الثاني وانتي تبين تروحين ؟
منى : زين روان ترا اريح اذا رحتي الطابق الثالث
روان : ايه ادري
منى : خلاص انا باخذ غرفتج
منى تعمدت تقول جيه عشان تغايظ روان .. وروان بغت تموووت من القهر وخاطرها تكفخها .. تعرف منى مو هينه ولسانها طويل
طلعت منار من المطبخ وفي يدها صينية عصير واهي تمشي بصعوبه .. من شافتها صفاء ركضت عشان تشيل الصينيه بس منار ماطاعت
منار : خلج حبيبتي .. انا سويته وانا باعطيكم
صفاء : افف شنو هالخاله العنيده .. عشان صفوي اللي في بطنج عطيني
منار : هههههه سمتيها صفوي ؟
صفاء : ايه كيفي
منار : ههه زين خوزي يدج انا باشيله
مشت صفاء واهي تتحرطم على عناد خالتها .. ماتسمع كلام احد اهي في الشهر ال9 و بعدها معانده ماتقعد
بوعلي كان يطالع اخته بحنان .. طول الوقت يحاتي منار واللي في بطنها ومريم .. بس الحين الحمدالله مريم تزوجت ريال ... وشارنها ويحبها وماعليه زود
الله يعلم شنو مصير منار و اللي في بطنها طبعا اهو لايمكن يتخلى عنهم وراح يوقف وياهم مهما صار هذي اخته قطعه منه
حطت منار الصينيه وقعدت تصبلهم عصير
منار : ماشاء الله على بنت ام سلمان غاويه
منى : نورة ؟
منار : ايه .. بتروحون عرسها ؟
ام علي : ايه لازم نروح .. والبنات بعد باوديهم
منار : انا ماقدر احس روحي تعبانه
ام علي : وشتبين بالعروس خلج مرتاحه .. انا باخذ البنات كلهن وبنروح
منار : زين انا باروح غرفتي ارقد .. يالله تصبحون على خير
الكل : وانتي من اهل الخير
مشت منار وركبت الدري وتوها بتحط ريلها على العتبه الثانيه حست بعوار في بطنها خلاها تمسك الدري وتصرخ .. الكل فز من مكانه وبوعلي بسرعه راح لها ويودها .. منار كانت مغمضه عيونها من هالألم المفاجئ
بوعلي : منار حبيبتي شفيج ؟
منار واهي تتعصر من الألم : مادرييي احس بعوار فظيع
ام علي ابتسمت : شكله ولدج يبي يطلع الليله
ابتسمت منار بتعب بس تلاشت الابتسامه بسرعه مع نوبة الألم اللي ياتها
بوعلي : ام علي لبسي عباتج بسرعه .. روان هاتي عباية عمتج بسرعه ... علوي روح شغل السياره بسرعه
بوعلي ساعد منار عشان تمشي وصفاء ومنى واقفات وراها .. غطوها بالعبايه وركبت السياره بصعوبه .. وبسرعه تحرك بوعلي بأتجاه المستشفى الامريكي
صفاء ومنى خايفات .. ودانه وعت على صوتهم ونزلت ببيجامتها واهي تشد جلابية منى عشان تنتبه لها
منى طالعتها وضحكت على شعرها المنفوش : فديت هالويه .. شمقدعدج الحين
دانه وعيونها تنصك : ام امم ان
منى :هههه زين فهمت .. تعالي باشيلج اوديج غرفتج يالشيطانه
شالتها منى وراحت ترقدها .. صفاء راحت تشوف مريم لأنها ماتدري ان خالتها ودوها المستشفى
طقق طقق
صفاء : مريم .. انتي واعيه ؟
مريم كانت بعدها في افكارها بس تروعت على صوت صفاء وقامت تبطل الباب
مريم : هلا صفوي تعالي دشي
صفاء واهي تصك الباب : انتي وينج راقده تحت عفسه وانتي في عالم ثاني ؟
مريم بأستغراب : ليش شصاير ؟
صفاء : خالتي منار ودوها المستشفى بتولد
مريم شهقت : صججج ؟؟ واعليه خالتي .. الله يسهل عليها
صفاء : ان شاء الله
مريم : وانتي ليش قاعده اهني .. قومي خلنه نروح لهم
صفاء : مينونه انتي ؟ تبين خالي يزفنا
مريم : لا مابيزفنا
صفاء : حضرتج ماتدرين الساعه جم ؟
مريم طالعت الساعه كانت 1 بالليل
مريم : اففف .. ابي اروووح
صفاء : امممم .. اقدر اخلي ابوي يمر علينا ؟! اكيد بيروحون ؟!
مريم نقزت بفرح : ايه صح اتصلي فيه
صفاء : اوكيه ..
اتصلت صفاء في ابوها .. وبعد محاولات وجولات وصراع << داشه حرب
وافق ابوها يمر عليهم
صفاء واهي تصك التليفون : قومي لبسي عباتج .. ابوي الحين بيوصل
مريم : زين خبري منايه وروان
صفاء : اوكي بسرعه
مرت 10 دقايق والبنات كلهم في الصاله يتريون بومبارك < ابو صفاء ومنى
يمر عليهم .. بس روان تعذرت بدانه .. ماتقدر تخليها بروحها
وصل بومبارك وركبو كلهم السياره واهمه يدعون الله يسهل عليها
في المستشفى .. منار دخلوها غرفة الولاده المخاض كان صعب عليها وخصوصا اول مره كان تتألم وايد و الولاده كانت عسره .. والدكاتره والنرسات على راسها يراقبون تخطيط قلب البيبي لأن كان تعبان شوي
الدكتوره : تحملي شوي .. عشان البيبي تحملي .. مانبي نسوي لج قيصرية
منار : سوو لي قيصريه وفكوني ماستحمل العوار
الدكتورة : حاولي تتنفسين بعمق .. الولاده الطبيعيه احسن .. سمي بالله وتنفسي
في غرفة الانتظار .. الكل كان مشغول باله على منار وايد تأخرت الحين الساعه 4 ام علي كانت تقرا قرآن وتدعي الله يسهل عليها والبنات ساكتات وعينهم على باب غرفة الولاده
الدقايق تمر ببطئ شديد وسكون قاتل ومنار بعدها تقاوم الألم بتعب وعلى الساعه 6 الكل وعى على صوت صياح ..
كان صياح البيبي .. يمكن كان منزعج ليش ماخلوه براحته و غصبوه يطلع للدنيا اللي ماينعرف شنو تخبي بين ثنايانا وطياتها .. لكن هذي سنة الحياه وهذي دورة الحياه .. وماتكمل هالحلقه الا بهالشئ
البنات ماقدرو يحبسون دموعهم وام علي حمدت الله وبوعلي تنهد بأرتياح
واقل من 10 دقايق طلعت النرس وعلى ويها أبتسامه
الممرضه : مبروك ياتكم بنت مثل القمر ماشاء الله
بوعلي : طمنينا ! شلونها ؟
هزت الممرضه راسها : لا تخاف الحمدالله البيبي بخير .. والأم الحمدالله بخير .. تعبت وايد ولازم ترتاح
بوعلي : الحمدالله .. ممكن نشوف بنتنا ؟؟؟
الممرضه : ايه اكيد .. الحين اييبها
واقل من دقيقتين .. طلعت الممرضه واهي حامله بطانيه ورديه ملفوفه .. الكل اقترب وشافو ملاك راقد .. انغرمو كلهم بهالطفله من اول نظره كانت حلوه بشكل فظيع .. بشرتها ورديه وخدودها مليانه خشمها صغييييير واصابعها صغااار وضامتهم بقوووه .. كانت احلى ياهل في العائله مثل ماقالت ام علي
مريم بهمس : ياربي فديتها .. حلوه تينن ما شاء الله
بوعلي : ما شاء الله .. عطيني اياها بأذن في أذنها
شال بو علي البيبي من يد النرس .. وقعد يأذن في اذنها
وبعد ماتطمنو على منار راحو البيت عشان يرتاحون وعشان ترتاح منار
منار سمت بنتها .. اليــــازيــه
وبقدوم اليازيه انفرجت اسارير الفرح .. كانت مثل الهبه من السماء الكل كان حاس براحه روحيه غريبه و ارتياح نفسي .. من هالطفله الصغيره اللي هلت عليهم و صارت فرد من العايله الحين
صار له يوم ماذاق طعم النوم .. من امس سهران من بعد ماشافها وحرقت له قلبه .. سلمان كان تعبااان نفسيا وجسديا التعب كان مبين عليه .. محتار ومو عارف شلون يتصرف وماقدر يتقبل فكرة ان مريم تكون زعلانه منه .. بس مريم صدمته وخدشت كبريائه بكلامها والريال اهم ما عنده عزة نفسه .. وسلمان عمره مانزل نفسه لأحد اذا اهو مو غلطان لو من يكون عشان جيه ماكان يقدر يكلمها مره ثانيه لان هالشئ بالنسبه له يمس كرامته خصوصا ان اهو مو غلطان .. الافكار كانت متضاربه في راسه كبريائه ونداء قلبه مو عارف يرضي من .. اهو يموووت فيها ويحبها بس بعد مايقدر يدوس على كرامته وبعد صولات وجولات مع افكاره امتدت يده لعلبة الاقراص المنومه وخذ حبتين وحاول يرقد شوي ويرتاح ..
سلمان كان قلبه معوره على اخته الحبيبه نورة .. باجر بيكون عرسها واليوم خطيبها سلطان بيوصل اهو وعدها ان ياخذها ويوديها المطار .. اهو اخوها الوحيد يعني نورة محتاجته يوقف وياها ويشيل ويحط في عرسها بس للأسف سلمان مو قادر يحس بالفرحه شلوون يستانس وقلبه يتقطع ومطعون ؟ وشوي شوي حس بتأثير المنوم وحط المنبه ع الساعه 2 الظهر عشان يقدر ياخذ اخته المطار مثل ماوعدها
وفي بيت شريفه الاجواء كانت هاديه .. شريفه قاعده ويا امها تشوف تلفزيون وابوها قاعد يقرا الجريده في هالوقت رن تلفون ابو شريفه والرقم كان غريب عليه
بو شريفه( حمد) : الو السلام عليكم
--- : وعليكم السلام ورحمة الله .. هاي تلفون حمد خليفه ؟
حمد : ايه نعم .. منوو معاي لو سمحت ؟
--- : معاك محمد العالي
حمد : والنعم فيك مرحبا ملايين اخوي شلونك ؟
محمد ( شد ) : الحمدالله بخير .. شلونك انت عساك بخير ؟
حمد : مااشكي باس
خالد : الحمدالله ..
المتصل كان بو راشد عم مريم وطبعا انتو عارفين ليش متصل ؟ ايه صح متصل عشان موضوع شريفه و خالد طبعا حمد بن خليفه يعرف بو راشد .. وعقب سوالف عن الشغل واشياء اللي تخص الرياييل تكلم بو راشد بالموضوع
بو راشد : والله يا اخوي انا متصل فيك عشان موضوع يخص اخوي الصغير اللي اهو حسبة ولد خالد
حمد بأستغراب : خير ؟ آمر اخوي
شد : مايآمر عليك عدو .. اذا ماعندك مانع نحن نبي بنتكم شريفه لولدنا خالد
حمد : هاي الساعه المباركه وبنتي وين بتحصل واحد شرات ولدكم ريال والنعم فيه ماعليه زود
شريفه انصدمت يوم سمعت هالكلام .. حست بالفضول تبي تعرف من المتصل ؟ طبعا اهي البنت الوحيده !
شد : زين ياخوي انت شاور البنت ورد علينا خبر
حمد : ان شاء الله انا بشاور البنت وبارد عليكم ان شاء الله
شد : خير ان شاء الله .. وانا اترياا اتصالكم .. مع السلامه
حمد : مع السلامه
اول ما سد بو شريفه الخط التفت عليه ام شريفه وشريفه حدها متحرقصه ..
ام شريفه : خير يا حمد .. منو خاطب شريفه ؟
بوشريفه وعينه على بنته : هاي اهل ربيعتها مريم .. بيت العالي يبونها لولدهم خالد
ام شريفه : والنعم فيهم ناس زينين اصل و نعمه .. ها شرووف شرايج ؟؟
شريفه تلعثمت وتلخبطت في كلامها ويها صار احمر ودقات قلبها تسارعووو .. مزيج من احاسيس الفرح و الحجل اختلطو في قلبها
ام شريفه : اييه شريفه .. شفيج يمه ليش ماتردين ؟! ترى محد بيغصبج على شئ ماتبينه
بو شريفه كان حاس ان شريفه بترفض مثل كل مره .. وايد تقدمو لها ومن اكبر العايلات بس رفضتهم كلهم بدون سبب .. كان خايف عليها ويحاتيها مو عارف اهي ليش ترفض وماكان يبي يضغط عليها
الزواج قسمة ونصيب ومحد يقدر يتدخل فيه
بس شريفه كانت مستحيه ومو قادره ترد من المستحى
بو شريفه : خلاص يا بنتي اذا ماتبين انسي الموضوع
شريفه ابتسمت ونزلت راسها وترددت قبل ماتتكلم وسكتت شوي
بو شريفه : في شئ يا شريفه ؟
شريفه : اللي تشوفه ابوي انا موافقه
قالت هالكلمات وبسرعه قامت وراحت غرفتها وعقت روحها على السرير واهي تحظن المخده وتعصرها ودموع الفرح تهل من عينها مو قادره تيود عمرها ..
ابو شريفه استانس من الخاطر وفي نفس الوقت تعجب من رد شريفه السريع .. يمكن لأن خالد يصير عم ربيعتها واهي تعرفه وتعرف اخلاقه عشان جيه ماترددت .. وقرر يتصل في شد بعد مايسأل عن خالد و يحدد معاه موعد
في بيت بو علي .. الساعه تشير ع 12 الظهر
ام علي في المطبخ ويا الخدم تجهز الاكل والاغراض اللي بتوديهم المستشفى ومنى وياها في المطبخ تهذرب على راسها
منى : زيييين اقول لج خالوه .. من يومها البنت ما قربت صوبي
ام علي : حشى مو بنت انتي .. وشلج على بنت الاوادم خلج عاقله .. تراج بتروحين الجامعه والجو غير هناك خلي عنج سوالف الضرابه والهواش
منى : ههههه ان شاء الله خالوه ببيض ويهكم
وفي الصاله صفاء قاعده تسحي شعر دانه وروان قاعده تتكلم في التلفون
صفاء : دوينه .. خالوه منار يابت لنا بيبي حلوووووووووه
دانه : بيبي ؟
صفاء : ايه بيبي .. وايد حلوه اسمها اليازيه
دانه ضحكت وبينت غمازاتها وبرقت عينها من السعاده : بتيي بيتنا ؟
صفاء : اييه بتيي بيتنا اهني عندنا وبنحبها واااايد
دانه كانت متحمسه للضيف اليديد اللي بيي .. وكانت تعذب صفاء ماتخليها تسحي شعرها كل شوي تلتفت وتسئلها عن البيبي
صفاء : افف منج يالله قومي خلصت
دانه : انا ابي مريامي
صفاء : تسوين خير .. روحي قعدي جازورا اللي ماتشبع رقاد ولاتنسين سحبي شعرها وسويه كشه
دانه ضحكت من الخاطر على كلام صفاء و ربعت صوب غرفة مريم
وصلت دانه غرفة مريم .. بطلت الباب ع الآخر و نطت على سرير مريم ودشت تحت لحافها
مريم رقادها ثقيل .. يعني لازم احد يطق طبول على راسها يمكن تصحى .. دانه المسكينه كانت تربت بخفه عليها بس لاحياة لمن تنادي .. واخر شئ استسلمت وتعبت وقررت انها ترقد لأن
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك