رواية واني احبك -3
-ايمان و الطعنة تحركات فجرحها ثاني: ان شاء الله..
و زادت بغمزة لليلى: خلينا فيك دابا مبروك عليك الزين الصافي ديالك ههههه تستاهليه و تستاهلى كل خير
-ليلى: ربي يخليك ..العقبى ليك و لخواتاتك ان شاء الله
-ايمان: امين
انتشرات بسرعة خبار خطبة ليلى من يوسف لباقي البنات و كلشي فرح لليلى اللي كسبات قلوب الكل بمرحها و عفويتها و شخصيتها الجذابة..اللي خلات يوسف تعلق بيها اكثر ملي تكلم معاها اكثر
مر اسبوع قبل يوم الخطبة, دوزوه ليلى و ايمان و عزيزة فالتحضير ليوم مجيتهم..ساعدوا البنات ليلى فشغل الدار و مشاو معاها لعند الخياط باش تختار قفطانها و حجزوا ليها موعد مع الكوافورة لنهار السبت... و وصاو ليها فالباتيسري (المخبزة) على بلاطوهات الحلوى و نهار السبت كانت معاها ايمان فبيتها..
-ايمان و هي تتشوف فيها باعجاب: صداااااع تبارك الله عليك..سعداتو ههههههههه
- ليلى و هي حشمانة و مخلوعة (خايفة): ياك ما الماكياج معيق (مبالغ فيه)
-ايمان: لا بالعكس خفيف ظريف..ناتوغيل (طبيعي) و جاك فن مع الابيض
كانت ليلى لابسة كيف عادة يوم الخطبة قفطان ابيض سامبل(بسيط) بفصالة مبتكرة ..مخيط بخيوط الصقلي (الذهبي) و حاطة مكياج خفيف..كحل و جلوص غوز بيش (وردي خوخي ) و ظل جفون بني خوخي و جاها غزال على لون بشرتها السمرة..
فالصالون...كان يوسف بحال الا جالس على الشوك و هو كيتسنى المجاملات و المقدمات يساليو (ينتهوا)و يدخلو فالموضوع..
-بات يوسف (بتشديد الباء): كيف ما قال ليك ولدي نهار اتصل بيك ..حنا جيناكم طالبين راغبين القرب فبنتكم لالا ليلى ان شاء الله
-بات ليلى: مرحبا بيكم..الدار داركم..ولدكم ولدنا و بنتنا بنتكم..ولدكم جا عندي هاذي السيمانة(الاسبوع) للمحل و هضر معايا فالموضوع.. و الحمد لله ملي سولنا عليكم, كلشي ما ذكركم الا بكل خير
-بات يوسف: الله يبارك فيك ا خويا..حتى نتوما و نعم الناس
-بات ليلى: الله يبارك فيك..ربي يخليك....وانا هضرت مع البنت و تشاورت مع امها و هي موافقة..بجوجهم (اثنيناتهم) موافقين
-بات يوسف بفرح: ايوا هي نقولو مبرووك..و نقراو الفاتحة
-بات ليلى بابتسامة كبيرة: مبروك علينا و عليكم..الله يكمل كلشي بخير..و التفت ليوسف اللي كانت الضحكة واصلة لوذنيه و عينيه تيلمعوا بالفرحة مبروك عليك ا ولدي و ما نوصيكش على بنتي
-يوسف: الله يا ودي ا عمي..بنتك فعينيا ان شاء الله..ما تحتاجش توصي
و تسمعت من صالون العيالات (النساء) زغرودة كبيرة وصوت السلامات و التهاني اللي و صلات للبنات فبيت ليلى...
تدق بابها و دخل عندهم خوها الصغير باش يقول ليها تخرج عند الناس يشوفوها..شافت فايمان و هي مصدومة ههههه و هي تقول ليها ايمان و هي حابسة الضحكة-:مالك صفاريتي
-ليلى: يالاهي معايا
- ايمان و عينيها خارجين-:شنووووو? تسطيتي !!!!( هبلتي) ..بسم الله عليك ا بنتي..انتي العروسة و غادية يشوفوك..انا شنو محلى من الاعراب تما?!!!! و زادت بغمزة و لا النجافة ? ههههههههههه, يالاه سيري و انا نتبعك بالصلاة و السلام على رسول الله..الا...
قاطعاتها ليلى بمخدة جابتها ليها للراس ههههههههه
-ايمان و هي تتصاوب (تعدل) شعرها اللي خربقاتو طيحتها-:هههههههه, ها هي ليلى اللي تنعرف رجعات خخخخخخخخخخ و على أي.. واخا ما نقولهاش انا , ملي غتدخلي عندهم حماتك العزيزة اللي غتقولها ههههههههههههه
-ليلى و فيها البكية: عافاكي ا ايمان..الله يخليك..يالاهي معايا..... بليييييييز بلييييز..
-ايمان بجدية : انتي را طار ليك الفريخ (بمعنى مخك طار)على ما بان ليا...سيري خرجي عند الناس حشومة تخليهم يتسناوك..و عيطات (نادت) محمد خو ليلى و قالت ليه : ها هي واجدة سير قدامها باش تتبعك لعندهم ..يالا ليلى سيري
-ليلى بترجي : ايييمان..
-ايمان-:شششش سيري و دفعاتها بشوية ناحية الصالون..
دخلات ليلى ورا خوها للصالون الكبير اللي تجمعو فيه والديها و يوسف مع والديه و اخوه و قلبها كيضرب بجنون..و مع دخلتها تسمعات الصلاة على النبي عليه الصلاة و السلام من صالون العيالات اللي كانت فيه اختها و خالتها
" الصلاة و السلام على رسول الله..لا جاه الا جاه سيدنا محمد..الله مع الجاه العالي"
و تبعاتها زغروتة كبيرة هههههه ..سلمات على الجميع و هي حشمانة و ملي وصلات ليوسف..ترددت و فالاخير سلمات عليه ..يوسف حس بيها وضغط ضغطة خفيفة على ايدها اللي كانت باردة كي الثلج
جلسات حدا امها و هي صافي ميتة من الخجل..قالت ليها مت يوسف( بض اليم و تشديدها) باعجاب – تبارك الله على عروستنا
-ليلى و هي غتموت من الخجل: الله يبارك فيك ا خالتي..
و بقات مت يوسف تتسولها على دراستها و صداقاتها و لقات بطريقة مدروسة باب باش تسولها على الطبخ و امور البيت بانها تسولها اذا كانوا من هواياتها..(هاذي حتى ام ما تتنسى تسول عليها خخخخخ)
ليلى فطنات ليها و جاوباتها بذكاء و فعلا ليلى حاذقة بزااف فامور البيت كلها لانها هي اللي هازة دارهم من هاذ الناحية من فاش كانت صغيرة
شوية و غمزات مت ليلى بنتها باش تنوض اللي كانت تتسنى ذيك اللحظة من قبل ما تدخل عندهم اصلا خخخخخخخخ
و طارت لعند ايمان
- ليلى و كلها تترعد: اووف كان قلبي غيخرج....يا ربي يا ربي يدوز كلشي على خير
- ايمان: ان شاء الله ا الزين...اجي بعدا ما كنتيش ناوية تسلمي عليه و لا شنو?!! ههههه مسكين كان غيذوب فحوايجو (ملابسو) كون درتيها
- ليلى: ما زجلتي والو (الجيم مصرية و المعنى ما فاتك شي) هههههههههه
- ايمان بخبث-: وعلاه غتفلتوا مني
- ليلى: ههههههههه
- ايمان: ايوا قولي... اش طرا ليك?
جلسات ايمان و هي حشمانة و قالت : ما عرفت خفت و حشمت و ارتبكت ما بقيت عرفت واش خصني (لازمني) نسلم عليه او لا
- ايمان: ههههههههههههههههههه هاذشي كلو و هو عاد جا يخطب ..ملي غتكونوا بوحدكم اش غ يطرا..كون را غادي تقربليها (تنسفيها) عليه هههههههه
- ليلى و هي مزنجة: لعن حسك ....سكتي فين ما نتفكر ذاك النهار..تنحس براسي غ نموت غير بالخلعة (الخوف)
- ايمان: الله يحفظك و ينجيك ..واخا نتي ميتة ميتة و لكن حب ان شاء الله هههههههههههههههه
- ليلى و هي ميتة خجل : بلاتي (مهلا) يا البرهوشة (البزرة)حتى تجي نوبتك(دورك) و تشوفي اش غندير ليك
- ايمان و نظرة الحزن رجعات لعينيها: حتال ذيك الساعة و يحن الله
- ليلى: ايمان, وربي حتى عندي احساس كبير و انا احساسي عمرو ما خيبني ان ربي غيجمعكم و غتكونوا لبعض
ناضت (قامت) ايمان بغضب من بلاصتها (مكانها): و شكون قال ليك انني اصلا ما زال باغاه..امين خرج من حياتي بخاطرو ..الله يعاونو اذن..ما حاقداش عليه و الله.. و لكن جرحني بانانيتو فكرامتي و مستحيل ننسى انه فضل ين..
- ليلى: و لك..
-ايمان: .. ما تقاطعينيش عافاك..اللي تيبغي فعلا تيدير المستحيل..انا ما طلبتش ما عرفت شنو..انا كنت مستعدة نتسناه شحال ما حتاج من وقت و مستعدة نصبر معاه على أي ظروف..و لكن هو ما همو الا راسو ..قرايتو و نجاحو..شنو اللي كان غيمنعوا ما انه يجمع بين هاذي و هاذي..والو ..غير هو انااااني..و عمر الانانية ما تتلاقى مع الحب..اللي تيبغي تيضحي..هاذ الشي اللي تنعرف..صافي امين سيرة و تسدات (تقفلات)...امين ماضي و عمرو ما غيرجع لحياتي
ناضت لعندها ليلى و حضناتها بكل حب و قالت ليها: الله يجيب ليك و لد الناس اللي يستاهلك و يرزقك كل خير يا رب
- ايمان : امين ويتمم عليك عليك حتى انتي بخير و يرزقك الذرية الصالحة ان شاء الله و بغمزة ماكرة لانها حبات تغير الجو: مع حبيب القلب
- ليلى و رجع ليها الخجل: ههههههه امييين
مرات ايام الاستعدادات للحنا و للعرس بسرعة و خلالها..عاونوا البنات ليلى فالاستعدادات..كل نهار فالسوق باش يساعدوها تشري مستلزماتها من حوايج (ملابس) و مستلزمات الحمام من ارواب و باغفان و كريمات و ما نساوش الاحذية و الصنادل عزكم الله و ايضا الماكياج و الاكسسوارات
حجزوا ليها عند كوافورة و بدات معاها جلسات تحضير العروس
دارو معاها عند النكافات (الكاف تنطق جيم مصرية و هي المختصة فملابس العروس) و لقاو اخيرا نكافة عجبوهم الملابس اللي عندها و اتفقوا معاها على اللبسات ديال الحنا و العرس
اختارو لديال الحنا: قفطان من الموبرا (مثل القطيفة) اخضر مطرز بالذهبي غامق تقليدي و معاها الاكسسوارات المصاحبة :
(مفرش مكان جلوس العروس من نفس لون القفطان مع مخداتو + ستارة فنفس الثوب للحائط اللي ورا مكان الجلوس باش يكمل منظر الكوشة الخضرا التقليدية + غطاء بنفس الثوب لقالب السكر + مجموعة الاواني الخاصة بيوم الحنة و تكون من نفس الموديل و فيها طاسة الحنا..زلافة الحليب..علبة الكلينيكس..صحن التمر و حامل الشمعة ) و لجوانب الكوشة 2 طبيقات (الطبيقة هي السلال على شكل قبة) و اختاروها ايضا مغلفة بنفس لون القفطان و مطرزة بالذهبي.
و اختاروا ديال العرس اللي هوما 4 تكاشط ..فضية و ذهبية و تركواز و وردية ثم اللبسة الامازيغية و اللبسة الفاسية هاذا غير عن التكشيطة البيضاء للعروس اللي دفعاتها ليلى على مقاسها عند مصممة و اختارت موديل مبتكر :
ثوب القفطان(الثوب الداخلي) بدون اكمام منقوش كلو نقش خفيف و مخيط بالسفيفة و ثوب الدفينة (الثوب الخارجي) ابيض ناصع مطرز و منبت سطراس شفاف و الدفينة مفتوحة مخيطة بالسفيفة كلها و الاكمام مخيطة بالسفيفة من الوسط و الحزام عريض و مطرز و التكشيطة ضيقة من الوسط مفتوحة من الاسفل مثل الفستان (evasée )
و الغوب بلونش (الفستان الابيض بالفرنسية) اللي كراتها من عند بوتيك مختصة و اختارت موديل ناعم بزاااف ضيق من الصدر و كلوش من الاسفل كله ابيض بتطريزات فضية خفيفة في الصدر و تطريزة رئيسية عللى شكل مثلث من الاسفل و الطرحة متوسطة الطول مشدودة بتاج ناعم و بسيط ..و المسكة من نفس الباقة اللي اختاروها البنات ورد ابيض مشكل بطريقة فنية رااااائعة
و شافو مع النكافة بالنسبة للكوشة و اختاروها ليها عبارة عن محاكاة للهودج فضية باعمدة فضية و مكان جلوس العروسة كنابي canapé فضي عالي توصل ليه العروس بثلاث درجات و معاه على طول الجانبين..انارات تقليدية عبارة عن حاملي اضاءة مشغولين تقليديا ..و اختارو العمارية (الطيفور اللي تحمل عليه العروس) من نفس اللون و على شكل هودج حتى هي و طبعا الكوشة تتوصل ليها العروسة على بساط احمر
بالنسبة للازهار و طاولة العروس تكفلات بيها عزيزة و ايمان من الفها لياءها و اختارو لوسط الكوشة على الدرجة الثانية باقة كبيرة بزاف روووعة كلها ورد ابيض فقط..حبوها تكون بسيطة وناعمة لان الكوشة منقوشة تقليديا و للدرجة الاولى و الثالثة ورد البيض منثور عليها كلها
اتفقوا مع النقاشة (الحناية) حتى هي و مع المصورة على موعد الحفل
و اختارت ليلى موديل الدعوات اللي خذاتو بسيط : ابيض مكتوب بالفضي و مزين من الحواف بنقوش فضية
الباقي تكفلوا بيه الرجال (كراو القاعة مجهزة و اختارو الاكل اختارو ليه عدا التمر معمر باللوز و الحليب بما الزهر فالبداية .. حلوى السواريه مع العصاير+ اتاي مع اطباق الحلوى المغربية اللي كتمر على المدعوين كل ساعة + الدجاج محمر كطبق اول و نصف خروف مشوي كطبق ثاني مصحوبين بالمونادا (الليمونادة)و الفواكه مشكلة للتحلية ثم التمر و الشباكية و الحريرة و القهوة لللي بغاها ملي يقرب الفجر)
و اختارت ليلى موديل الكيكة البيضا اللي خذاتها 4 طوابق بالشكوكولا من الداخل و بيضا كلها من برا و مزينة بورد ابيض بطريقة روعة..و اختارت لحلوى التززيع للضيوف موديل فضي بسيط و ناعم....طاولة العروسة تكفلوا بها البنات و زينوها بذوووق عالي و جات فنننة
نهار الحنا كانت دار ليلى بحال شي خلية ديال النحل........
---------
استقبلوا البنات نساء الفاميلات (العائلات) بجوج (اثنيناتهم) بالتمر معمر و الحليب محلي بما(ء) الزهر و تكفلوا بتدواز (تمرير) الحلوى و العصير و من بعد الحلوى و اتاي عليهم
كانوا مجموعين فالصالون الكبير, اللي فوسطو منصوبة الكوشة ديال العروسة و كانت فيها ليلى روووعة..دخلتها و من وراها صحاباتها بصوت الزغاريد و الصلاة و السلام على رسول الله (عليه الصلاة و السلام) كانت حكاية بوحدها..الاخضر مع الماكياج الذهبي اللي حطات ليها الماكييوز, جاها تحححفة..جات كي شي اميرة خارجة من شي حكاية بتاجها و اكسسواراتها التقليدية
و البنات تيشطحوا على الموسيقى المغربية حداها و كل وحدة احلى من الاخرى و كانوا صحابات ليلى متالقااااات
ايمان لبسات قفطان ف لون تركوازي بحزام عريض, جاها على بياض بشرتها روعة و لبسات معاه فالرجلين صندالة عالية بلون ذهبي (ضروري الطول خخخخخخ) ..خلات شعرها الطويل محلول (مفتوح) على راحتو ..وجمعاتو فقط من جهة وحدة من الأمام ببروش للشعر ذهبي ناعم بزاااف..جات الحركة حلووووة بزاااف...حطات ازرق بدرجات خفيفة للعيينين مع لمسة خفيفة ذهبية مع كحل و احمر شفاه غوز بيش مع لمعة جلوص عليه..و حطات طقم ذهبي تقليدي ..جات انييييييييقة
عزيزة اختارت ليها قفطان بنفسجي غامق, مطرز بلون افتح و تعمدات تختارو بسيط و بلا حزام..لأنها كتموت على البساطة ..و خلات شعرها الشاتان (الكستنائي) و اللي واصل لاول كتفها محلول ...و حطت مكياج بنفسجي فاتح للعيون مع الكحل و وردي شوية غامق للشفاه..و حطات حلقات ذهبية تقليدية و خاتم بسيط مع ساعة موف (بنفسجية)
دنيا لبسات قفطان اسود ناعم مبتكر القصة; بحيث خلات الاكمام بثوب مغاير مزركش شفاف و جاها الموديل روعة..جددت قصة شعرها القصيرة و حطات ماكياج خفيف فقط جلوص و كحل و اعتمدات على العدسات اللاصقة اللي حطاتها فلون عسلي و جاوها روووعة مع لون بشرتها الاسمر
حنان لبسات قفطان بيج (كريمي) بحزام عريض على الموضة مع ماكياج هادئ ذهبي و طقم ذهبي عصري خفيف..و جمعات شعرها الطويل شينيون خفيف..جات راقية و عصرية
- دنيا: ليلى تبارك الله جات تتهبل..
- حنان: اه الله يحفظها و يحرسها..جات غزاااالة
- ايمان: ليلى من ديما غزالة بماكياج و لا بلاش
- عزيزة: اه تبارك الله عليها..زينها سبيسيال (خاص)
- دنيا: ايوا الصراحة, جاب ليها الله انسان مزياااان على قد نيتها الصافية و زيادة تيبغيو بعضياتهم
-عزيزة: الله يكمل عليهم بالخير و يسعدهم ان شاء الله
الكل- امييييييييييييين
- دنيا بتنهيدة و ملامح كتضحك : اااااااه و العقبى لنا حتى حنا
- حنان: هههههههههه مالكي كتنهدي..ناقصك الحنان خخخخخخخخخ
- عزيزة: هضري على راسك ا ختي انا ما زالا ما باغا نتزوج
- دنيا: مالكم كليتوني..مالها حرام?!!!! اه تنقولها بالفم المليان ..انا باغا نتزوج..شفيها الا بغيت نعيش حياتي!!!!!
- عزيزة وحنان بمكر: اااااااااه تعيشيي حياتك .. دابا فهمنا خخخخخخخخ (الان فهمنا)
- ايمان و هي رااحمة دنيا اللي تزنجات ز هههههه رخفوا (حلوا) على دنيا..ما قالت عيب..
- دنياز تفو على برهوشات ..ديما بالكم غادي بعيد..ما قصدتش ذاكشي اللي نويتوا..انا تنهضر على لاموغ..لي سونتيمون (الحب..المشاعر)
- عزيزةز واخا الالا ..هانا غندعي معاك..سيري ا دنيا..الله يرزقك بشي راجل يظل يتدفق (القاف تنطق جيم مصرية) عليك اموغ أي سونتيمون
تفرقعوا (القاف تنطق جيم مصرية) البنات بالضحك و دنيا ندمات علاش حلات (فتحات) فمها و لا قالت شي حاجة و تقلقات (زعلت) عليهم و فالاخر ضحكات حتى هي على هبالهم لانها عرفاتهم غير شادين فيها (فقط لاعبين على اعصابها)
كانت ليلى تتشوف فيهم و بغات تموت و تعرف علاش كيضحكوا..و تحلفات عليهم اللي مخليينها و مجمعين مع بعض بعيد عليها .. الفضول و ما يدير خخخخخخخخخخخخخ
نقشات العروسة يديها و رجليها و نقشوا البنات كلهم من وراها يديهم, اللي اختارت النقش الفاسي و اللي اختارت الامازيغي و اللي اختارت الخليجي ...كل وحدة و ذوقها.. و كملوا العشية رقص و ضحك ..دردكوا (شطحوا مزيان ) على الاغاني الشعبية المغربية
فاخر العشية ناضت ليلى بدلات القفطان الاخضر بتكشيطة بيضا مع اكسسواراتها .. و انتقلات للصالون الصغير مع بنات عائلتها و صحاباتها و بقاو النسا فالصالون الكبير..جلسات قدام المائدة المستطيلة اللي كانت عليها الشبكة اللي جاب ليها يوسف, مشكلة من طقم ذهبي فخم و سلسة (السلسلة هي مجموعة من 6دمالج ذهبية) بالاضافة لخاتم الزواج و مقدمة بشكل حلووو رتبوه بيها البنات
جاو الاب ديال ليلى و راجلها و باه و خوه , اللي جابو معاهم كتاب العدول (الكاتبين العدلين) باش توقع عليه..و تم التوقيع..و ولات (اصبحت) ليلى زوجة يوسف على سنة الله و رسوله..
انحنى يوسف على اذن ليلى و قال ليها: مبروك عليا حياتي معاك..تزنجات ليلى و بابتسامة جاوباتو: مبروك علينا بجوج
البنات ما فلتوش المنظر و ارخوه بالتصاور (الصور) و الفيديو خخخخخخ وخذات المصورة حتى هي صور للعروسة بنقشها و مع راجلها و والديها وسط الزغاريت و الصلاة و السلام..و بعد ساعة بدات الدار كتخوى (تفضى)
كانوا البنات طيلة ايام الاستعدادات للعرس عايشين فعالم ثاني, كلو ضحك و فرحة و امل فالمستقبل...تاكدوا من باقي الحجوزات و اكدوا عليها..و كانت الاتصالات ليلية نهارية بين ليلى و يوسف خخخخخخخ
- ايمان: وا صافي قولي ليه يقطع..غتملي منو قبل العرس
- سمعها يوسف و قال لليلى: قولي ليها دخلي سوق راسك (اهتمي بامورك), ما بين الظفر و اللحم غير.. و سكت..
- ليلى: ايوا حتى ل ايمان و وقف..عينيا هاذيك
- يوسف بغيرة: و انا شنو الا كانت هي عينيك?!!!!
- ايمان بغيظ: اش قال ثاني هاذاك ال..
- قاطعاتها ليلى و هي حمرة من كلامو: اوووف, هلكتوني بجوج..دايرين كي المش و الفار (كيف القط و الفار)
- يوسف: انا المش و غنتبعها و نشدها و ناكلها باش نتهنى منها ذيك الفارة اللي دايرة ليا القلق و مزاحماني على حبيبة ديالي
ماتت ليلى بالضحك و حسات ايمان باللي الهضرة عليها و بغات تمرضو فحياتو و هي تقول ليها
Viens que je t’embrasse ma chérie je vais rentrer chez moi
(تعالي ابوسك حبيبتي انا راجعة البيت) و ناضت لعندها و باستها بصوت مسموع مواح مواح على الحناك (الوجنين) بجوج باش تغيظ يوسف اللي مات قهر منها ههههههههههه
-يوسف بغيظ-:بنت اللذين.. دارتها بلعاني (متقصدة)..بغات تمرضني و تقهرني عليك
- ليلى بمكر: باش (كي) تعرفنا حنا النسا ملي تنحطوا شي حد اذانا فبالنا; على شنو قادات (قادرات)
- يوسف و هو فاهم المقصود: ممم.... ايوا اللي ما يديرش, ما يخافش (اللي ما يعمل شيئ ما يخاف)
- ليلى: هههههه طبعا..لكن يا ويلو الا دار, او حتى فكر يدير
-يوسف بنبرة اسرة: و هو يقدر ?!
- ليلى صافي هنا ذابت..بزز (بالغصب)قدرات تجاوب و حاولات تكون نبرتها متعجرفة: طبعا لا
ضحك يوسف من قلبو وقال: اه منك و من غرورك اللي غيحمقني..هههههه
و كملو ليلتهم حتى الفجر فالهضرة و الضحك و بلا شك فكلام كلو غزل و حب ..
--------
- محمد: دوختينا ا صاحبي بين هاذ المدارس..صافي خلينا نثبثوا على وحدة
- امين: نشوفوا ما زال هاذي.. و ذيك الساعة نقرروا
- محمد بحزم: لا ..صافي هاذشي ولا عندك obsession (هوس) غادي نتقيدوا (نتسجل) ف HEM هي فاحسن وحدة فالمغرب بشهادة كلشي و سالينا( انتهينا)
- امين: باستسلام .. صافي واخا; بلا ما تغوت (تصرخ)
- محمد: وا راك مرضتيني بالدوران عالمدارس
- امين: ايوا راه مستقبلنا هاذاك
- محمد: ما قلت والو و لكن اختصر... سير لاحسن وحدة و جمع و طوي (اطوي الموضوع)
- امين: واخا.. ايوا نهار الاثنين نمشيو نتقيدوا (نتسجل)..
- محمد: كيف ما قلنا.. نديرو تسيير المقاولات و فالماستر التحليل المالي
- امين: ان شاء الله
- محمد بتردد: ..شي خبار على ايمان?
- امين باسى: لا.. من اخر نهار فالليسي (الثانوية) ما شفتها
- تردد يقول ليه او لا و زعم (تشجع): احم شفتها البارح
- دار لعندو امين بالزربة (بسرعة) و عينيه فاضحين مشاعرو: ..فين?
- محمد: كنت ف (الاشارة الحمرا) و قطعات الطريق قدامي مع صاحبتها عزيزة
سكت امين و سرح بالو لعندها و هو كيتمنى لو كان هو اللي شافها البارح..و ناض محمد خرج من عندو و خلاه بوحدو مع افكارو
كانت القاعة انيمي بانغام الاندلسي و الملحون و اهل ليلى تيستقبلو ضيوفهم و البنات مع ليلى فبيت العروسة و كانوا امييييرات
ايمان كانت غزاااالة بتكشيطتها فالغوز انديان (الفوشيا) المطرزة بالسفيفة من نفس اللون مخلوطة بخيوط الصقلى (خيوط مذهبة) و الحزام عريض و منبت بعقيق فوشيا اغمق من اللي فالثوب..... شعرها هزاتو ليها الكوافورة بتسريحة ناعمة مزينة ببروش صغير للشعر على شكل تاج قصير و رقيق محيط بالشينيون....كانت حاطة مكياج دخاني وردي للعيون و وردي غامق مع جلوص...صندالة ذهبية عالية و طقمها الذهبي التقليدي...كانت روووعة
عزيزة اختارت ليها تكشيطة فلون ازرق نيلي على اوغونج (برتقالي) وكانت جد مبتكرة حيت عكسات الاثواب و خلات القفطان الداخلي بلون اوغونج بثوب الشبكة اللي تيتستعمل للدفينة و الدفينة بثوب القفطان و الحزام عريض باساس اوغونج مطرز بالازرق الغامق..لبسات صندالة ذهبية....حطات مكياج بالوان دافئة متناسقة و خلات شعرها محلول و حطات طقم ذهبي رفيع...
دنيا لبسات قفطان سومون (لون سمك السلمون) مطرز بعقيق اسود وخلات القفطان الداخلي بدون اكمام و الدفينة باكمام شفافة و جاها الموديل روعة.. حطات ماكياج بني خفيف فقط جلوص و كحل وحطات العدسات اللاصقة اللي ما كتستغناش عليها و حطات طقم ذهبي خفيف.
حنان لبسات تكشيطة بلون البيسطاش (اخضر فستقي) بحزام عريض و حتى هي خلات الاكمام شفافة على الموضة مع ماكياج هادئ ذهبي و طقم ذهبي تقليدي..و دارت تسريحة على شكل ضفيرة جاتها فنننننة
- دنيا: البنات دعيو معايا
- حنان: ههههه الله يستر عمرني ما شفت شي وحدة ملهوفة على الزواج بحالك..تقولي بايرة (عانس)
- دنيا بهلع: بسم الله عليا; الله ينجيني
- عزيزة: جلسي فبلاصة العروسة باش تتبعيها
- دنيا و هي ماشية: هي الاولى
- عزيزة: ههههه تسناي ههههه ا الهبيلة (يا الهبلة) تسناي.. ماشي دابا ..تسناي بعدا تتجلس فيها هي
- دنيا: ياك فايتين جلسوا فيها عرايس قبل.. ايوا صافي
- ايمان: هههههههه عرفتي اش غتديري انتي جلسي فيها قبل و بعد باش تكوني متاكدة انك غتبعيها خخخخ
- دنيا و الله الا فكرة..راني ديما تنقول ليك راكي دماااااااغ
- عزيزة: و ما تنسايش البوكيه فالاخر..حتى هو باش تكمل الحفلة خخخخ ...
- دنيا: اه.. را دايراها فبالي
- ايمان: هههههههه يا الهبلة انتي تيقتي (انتي صدقتي) هاذوك را غ خرايف ديال زمان
- عزيزة: اللي مكتابة ليك يا الهبلة هي اللي غتجيك واخا تعياي ما تتبعيها
جاهم صوت النجافة......
- النجافة: يالاه ا البنات
- مت ليلى: ليلى قراي قران و حتى انتوما البنات قراوه..العين كاينة..الله يحرسكم
اياياي العروسة بتاج و ذهب
زغرتو عليها بنت الخير شحال تعجب
وجدو ليها المكان معلي ..... لالا السلطانة
عطيوها الحليب محلي ...... لالا السلطانة
و لالا السلطانة
ربي اللي عطاها و الحباب معاها
عريسها بغاها, عشقها راه جا خذاها
يا ربي تكمل رجاها ..... لالا السلطانة
و تحفظها من عين عداها(اعدائها) ....لالا السلطانة
و لالا السلطانة
ليلتنا جميلة مع الاحباب اللي بغيننا
يباركوا لينا و حنا قلوبنا هدينا
و شحال صايلة و تلالي (تتجول و تتلالىء) .... لالا السلطانة
يا احلى حاجة بعمري ..... لالا السلطانة
و لالا السلطانة
الاحباب تبارك تقول محلاها بنية
لوبانة حرة (اسم حجر كريم) تبري (تبرق) شاعلة ثريا (مضوية كالثريا)
لابسة الصاري و الجوهر..... لالا السلطانة
فايحة بالمسك و العنبر..... لالا السلطانة
و لالا السلطانة
مباركة على مولاها.. سيد الرجال داها( اخدها)
مباركة على مولاتو... لالاة البنات داتو (اخدت)
سعدي يا جارتي.. فرحي يا جارتي.. و باركي ليا
زوجت بنيتي و حيدت اللومة عليا (ازحت اللوم عني)
زوجت وليدي و حيدت اللومة عليا
و هنية يا لالا
هنية فهاذ النهار
و هنية يا لالا
هنية فهاذ النهار
على هاذ الاغنية دخلات ليلى مع راجلها بالجلابة التقليدية (الجلباب)...بالزغاريت و الصلاة و السلام من النجافة و مساعداتها و صحاباتها و بنات عمامها و خالاتها من وراها تيرميوها باوراق الورد ..
كانت دخلتها بالتكشيطة البيضا ديالها اللي صاوباتها عند المصممة مع الاكسسوارات المناسبة اللي جابتهم النجافة معاها حكاية من حكايات الف ليلة و ليلة..كانت سلطانة فعلا.. رائعة الجمال و الرقة و هي تتدور على الضيوف مع راجلها كترحيب منها بضيوفها فليلتها و الموسيقى و الزغاريت و الصلاة و السلام ..و التصوير ما كتوقفش
******
- ايمان: عزيزة هاذي نص ساعة و هاذيك السيدة اللي جالسة حدا السرجم (قرب النافذة) و لابسة الرمادي تتشوف فيك, و بغمزة زادت..يمكن تترسم عليك لولدها
- عزيزة: مسكينة, جالسة تتضيع وقتها, انا ما ناوية زواج دابا
- ايمان: تتشوفي ولدها بعدا و ذيك الساعة حكمي
- عزيزة: انتي صافي خليتيها دوات (تكلمات) فيا و جات خطباتتي
- ايمان: هههههههه ابوا الواحد هو اللي يضرب الحديد ما حدو سخون ههههههه
- دنيا: خليت حنان حاصلة واحد الحصلة واعرة هههههههه شدات فيها واحد الشارفة (سيدة عجوز) يمكن باغياها لولد ولدها و هابطة علبها بالاسئلة
- عزيزة: اجي ها واحد السيدة لهيه (هناك) بابنة عندها شي beau gosse ( شاب وسيم ) تتقلب ليه على عروسة
- دنيا: فين فين
- ايمان: عنداك (اياكي).. هاذيك را حاضية (مراقبة) هاذ الحمقة اللي قالت ليك انا ماباغاش نتزوج دابا
- دنيا: شوفي ا ختي عزيزة فكري مزيان.. الا ما بغيتيهش دوزيه لاختك
- ايمان: هههههه انتي رديتية سلعة تبيعي و تشري فيها
- دنيا: ايوا الواحد هو اللي يغتنم الفرص ههههههه
- عزيزة: خليو هاذ الهضرة حتال من بعد و سيروا تحركوا بين الطبالي (الموائد) نوضوا شوية د الحركة فالعرس زعموا (بتشديد العين= شجعوا) الناس ينوضوا يشطحوا.. الا بقينا هكذا واحد الشوية غنسمعوا الشخير
و ما دازت (ما مرت) ربع ساعة حتى كانوا شعلوها فالعرس ههههههه.. و الاغاني الشعبية متتابعة
صارحيني و يا بنت الناس ما فيها باس
صارحيني و قولي ليا باش بالي يهنا ليا
قولي كلام يقنعني راه سكاتك معدبني
كلام الناس معدبني صارحيني
خد قلبي و هديتو ليك يا العزبز الغالي
ها انا ما بين ايديك
غير دير ما يحلى لك
**********
شافت ايمان يوسف خارج من بيت العروسة و تمشات لجهتو باش تدخل عندها...كانوا ايمان و يوسف عمرهم ما تلاقاو الا مرة وحدة قبل ما يخطب ليلى..كانت دازت معاها من دربهم و شافتوا
- ايمان: السلام عليكم
- يوسف: و عليكم السلام
- ايمان: مبروك عليكم
- يوسف: الله يبارك فيك
و مشات و خلاتو.. ذيك الساعة عاد تفكر صوتها و عرفها و تبعها قال ليها: ديتها ليك (اخذتها منك)
ضحكات و قالت ليه: الله يكمل عليكم بالخير و يرزقكم من كل خير
- يوسف: امين
و التفتات تمشي و هو كذلك و رجعات قالت ليه و هو عاطيها بالظهر: و لكن ما ديتيها فين.. غتقرا معايا
و كملات طريقها و هي تتسمع ضحكو
- ايمان من الباب: بتذاكري من ورايا مع الحبيب ?!!!
- ليلى: علاياش (على شنو) كتهضري, يالاه خرجوا من عندي النجافات ..مشاو يشربوا شي حاجة
- ايمان بخبث: بصااااااح (حقيقي) ?!!! واخا ا لالا ..غير و كان المرة الجاية ملي تساليو المذاكرة, مسحي ليه العكر (احمر الشفاه) عاد خليه يخرج عند الناس
- ليلى وهي مزنجة و مصدومة: شنوووووو و شكون قال ليك اصلا حنا درنا شي حاجة
- ايمان: نعم نعم?!!!! و شنو كنتو تديروا?!!! هنا كتعاودو النكات?!!!
سكتات ليلى شوية و ما قدراتش تستحمل و سولاتها بلهفة: واش قلتي ليه يمسحوا
تفرقعات ليلى بالضحك من كل قلبها و جاوباتها من بين ضحكاتها: حصلتي يا العفريتة حصلتي ..و باركة عليا من الصباح و قلداتها شكون قال ليك اصلا ...
لتواني ظلات ليلي كتشوف فيها تتقطع بالضحك عاد استوعبات انها ضحكات عليها و من الغيظ بغات تنوض ليها و لكن الاكسسوارات التقيلة ديال اللبسة الفاسية اللي فوق راسها منعوها و بدات تتلفت بجنون, كتقلب على شي حاجة تشير على ايمان, اللي شافتها و هرباات منها و هي ما زالا كتضحك على منظرها ملي فهمات بالللي لعبات عليها و مشات عاوداتها للبنات اللي ماتوا بالضحك على هبالها
العروسة يا لالا العروسة..الزين و الهمة فالطاووسة...
كانت هاذ الاغنية اللي خدامة و ليلى مهزوزة على كتاف مساعدات النجافة فالعمارية اللي بدلو اختيارهم ليها فاخر لحظة و جابوها فضية ذهبية و كانت هاذي الدخلة الثانية للعروسة باللبسة الفاسية الفخمة باكسسواراتها اللي ثقلات عليها ههههههههه و كانت مازالة ما بلعات الفلاش اللي دارت ليها ايمان ههههههههههه
صونا تلفون ايمان و خرجات لبرا فالجردة (الحديقة) باش تجاوب على بنت خالتها
- ايمان: واخا ..نهار الاربعاء ان شاء الله نجيبوا ليك..صافي كوني هانية
كانت تتهضر و هي راجعة اللور (لورا) باش تدخل مللي حسات بطالون (كعب) صندالتها عافط (داعس) على شي حد و صوت صرخة مكتومة حدا وذنيها
التفتات بالزربة و هي تتقول je m'excuse, je m'excuse, je suis vraiment désolée (اعتذر..اعتذر..انا فعلا اسفة)
كان عمر حال فيها فمو (فاغر فاه فيها) و هو ضايع فملامحها اللي فتناتو
- عمر: c pas grave (ما كاين باس)
- ايمان: سمح ليا بزااف ما انتبهتش ان ورايا شي حد
- عمر: لا ماشي مشكل, حتى انا ما كانش اصلا خصني نكون هنا, جيت غير باش ناخذ من عند بنت اختي المصورة و كنت تانتستاها تخرجها ليا ملي سمعتك و مع دورتي لقيتك قدامي و طالونك حافر رجلي هههههه
- ايمان : ويلي على حشمة ,ياك ما قسحك بزاف? نجيب ليك الثلج?
- عمر: لا لا, ما كاين لاش
التفتات تدخل و هي ما زالا تتعتذر و هو تابعها بعينيه و ما قادرش ينزلهم
ايمان فنفسها و هي ورا الباب تتشوف فطالون صندالتها عزكم الله : ويلي, كون را رجلو ضاراه..شوية و زادت..و انا مالي شكون اللي قال ليه يقرب مني اصلا ..و كملات طريقها و نسات الموضوع
خرجات سارة لعند عمر و عطاتو المصورة ..كانت غترجع ملي عيط ليها (ناداها)
- عمر: سارة حبيبة, قولي ليا , شفتي البنت اللي دخلات ملي كنتي جاية عندي?
-,سارة (6 سنين): اه
- عمر: تتعرفيها ?
- سارة : اه
- عمر: شكون هي?
-سارة: هاذيك ايمان, صاحبة طاطا ليلى (مثل ابلة بالمصرية)..شبغيتيها?
عبس فيها عمر و طلع حاجب و نزل لاخر و بصوت عالي و امر قال ليها: و انتي مالك..يالاه سيري عند ماماك
تجمعات الدموع فعينين سارة اللي ما فهمات والو و مشات تدخل...
- عمر بنفس النبرة: وقفي..اجي لهنا....و رجعات لعندو و الدموع بداو تيسيلو
تحنى (انحنى) لعندها عمر و قال ليها ديما بنفس الطريقة:..بوسي خالك
هنا صافي.. البنت ما بقاتش قادرة و بدات تتبكي بصوت عالي و رفضات تبوسو و تفرقع عمر بالضحك على منظرها و هزها باسها و بدا تيصالح فيها و عطاها شكلاطة كانت فجيبو
عزيز عليها يقهرها حتى تتبكي..تيعجبو منظرها و هي باكية تتجيه حلوووة هههههههه و تيعجبو يرجع يصالحها و تسامحو
-------------
الدخلة الثالثة
دارتها دارتها العروسة باللبسة الذهبية مع السلهام ديالها و اكسسواراتها و كانت طبعا روووعة بالصلاة و السلام و الزغاريت و على انغام اغنية الزين اللي عطاك الله
الزين اللي عطاك الله
مثلو ما نلقاه
ديما في بالي نهار و ليالي
مثلك عيني ما رات
غير تجيني و نراك
اجي داويني راني نستناك
زينك هولني يا لالا و خلاني مهول
كيندير يا لالا و كيفاش نعمل
علاش هاد الباطل قولي لي علاش
من يوم راتك عيني و انا نستناك
ها هي جات يا الوليد
ها هي جات ليك اليوما
بزينها بالتبسيمة
ها هي جات ليك لباب الدار
يتبع ,,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك