رواية يا زينه ويا زين طاريه -2

طقت امه صدرها وهي تشهق : نوره .. بسم الله عليها

وراحت ركض للدرج : بسم الله عليج امي نوره شفيج عسى ماتعورتي؟؟ اشوف رجولج

نوره من الالم مو قادره ترد بس ماسكه رجلها ودمعوها تنزل ورى بعض

شافت ام محمد رجلها تورمت شوي وتفز بسرعه : نوره حبيبتي لاتخافين شي بسيط الحين اخلي سيف يوديكم أنتي وأمج المستشفى

اخذ سيف نوره و امها بعد ما لبسوا عبيهم المستشفى وأم نوره قالت لام محمد لاتخبرين أبو نوره بيحاتيها.. وطول ماهم بالسياره وامها تقرى عليها وهي تصيح بصمت وهو يرفع كل شوي عيونه على المرايه يطالعهم طبعا هي كسرت خاطره لانها صغير و ما تصارخ

في المستشفى الدكتور كشف على رجلها وطلعت مكسوره يعني ما تقدر تروح عرس هيا جبر الدكتور رجلها ورجعت البيت وهي مجبره

في غرفتها كانت نوره تصيح لانها ما راح تروح العرس وامها تقول لها : بنصور العرس كله بعد شتبين؟؟

نوره ودموعها اربع اربع : لا والله انا ابي أروح عرس هيا وارقص مو انحبس هنا.... تذكرت نوره انها لما طاحت كانت محتره من سيف ومو شايفه قدامها وقالت بكل قهر: الله ياخذ اللي كان السبب

في غرفة العروس هيا : مسكينه نورووه شلون ما راح تحضر عرسي ؟؟؟ هي كل يوم تغثني بفستانها وشلون بترقص؟؟ وشلون بيكون مكياجها؟؟ والله كسرت خاطري

سيف كان منسدح على سرير أخته وهو يسمعها : أي والله أنا شفتها وهي تطيح شكل عوارها كايد ... تعدل وهو يقول: تستاهل احد ينزل الدرج وهو مطيور كان تركدت بزر والله انها بزر .. تصدقين هاوشتني ههههههههه

هيا تشوفه وهو قاعد يطالع الباب : ليش هاوشتك؟؟ شصار؟؟

التفت عليها وهو مبتسم : تقول انت ما تستحي انا اتغطى مو بزر هههههههه

هيا طالعت فيه وهي مبتسمه : تراها كانت في الغرفه مساعه يوم جبت المسكه وسمعتك أكيد و انقهرت منك وقالت لك مو بزر عشان كذا

سيف اختفت بسمته وفتح عيونه على أخرها : قولي والله ... سمعتني ؟ ليش وين كانت ؟؟ ما شفتها

يا حظي كانت بالحمام.. هذا كان كلام هيا لآخوها وهي تدفه برى الغرفة

كان عرس هيا حلو وهادي و مرتب بس مو مبالغ فيه والعروس كانت ملكة جمال الله يحفظها.. فستانها كان أوف وايت معطيها نعومه مو طبيعيه وحتى تسريحتها كانت بسيطة بس مرفوع الشعر بطريقه مهمله والماكياج مطلع جمالها من غير ما يغير ملامحها يعني بصوره عامه العرس كان كامل وما الكامل الا وجهه سبحانه

نوره قاعدة تطالع التلفزيون بملل وتفكر بالعرس: أكيد الكل مستانس ويرقصون وأنا منطقه هنا يا ربيييييييييي شهالملل

إلا يرن التليفون وترد: الو

سيف: السلام عليكم

نوره منصدمه شيبي هذا : نعم

سيف فيه الضحكه : قولي وعليكم السلام انتي مو مسلمه؟؟؟

نوره عصبت عليه : والله أنا بكيفي أرد السلام ما أرد بكيفي... مزاجي.... حرة.... على كيف كيفي... أنت شتبي؟؟

سيف فقع من الضحك : هههههههههه وتزعلون لو الناس تقول فيكم الصج

نوره خلاص ارتفع صوتها: وشنوا الصج اللي قلته فيني إن شاء الله؟؟

سيف ومازال يضحك : هههه انك هههههه بزر يالبزر ههههههههههه

نوره فرقعت من القهر وسكتت شوي تسمع سيف وهو يضحك عليها وبعدين قالت وهي تصر على اسنانها: سيف .. ما عمرك سمعت صوت القطار؟؟؟

طوط طوط طوط طوط طوط طوط طوط طوط

وصكت السماعه في وجهه وهي تبتسم ابتسامة الانتصار

رن التليفون مره ثانيه وقامت تطالعه بخوف هالمره قالت: أنا شسويت ؟؟اكيد هو بيكسر راسي الحين... وخلته يرن إلى أن سكت وبعدين رن مره ثانيه ومن الخوف ما ردت وسكت إلا تسمع صوت جرس الباب يرن بصوره متواصلة انربط لسانها من الخوف والخدامة راحت تفتحه

الا تسمع حس سيف في الحوش وهويصرخ : نوروه.. نوروه ياللي ما تستحين هذا جزاي جايب لج عشى؟؟ والله لو ما ابوج ما تنزلت وجبت لج.. تصكين السماعه في وجهي ما تحترمين فرق السن بيني وبينج؟؟ خذي الاكل بلعيه

حذف الكيس على الخدامه وهو طالع حمقان ونوره قامت تبولع بريقها : يمممه لو هو داخل ومنتف شعري وانا بروحي؟؟ يممممه كان الحين يسمعون بوحده اسمها نوره مرت على هالعيله الله يرحمني ويسكني الجنه ههههههههههه

في غرفة الفندق وأول مره يستفرد سلطان بهيا زوجته وحبيبته من فرحته قعد يطالعها يمكن نص ساعه ما كلمها ولا كلمه من دخلوا.. بس يطالع فيها وهو مبهور بجمالها

تشوم عيني عن جميـع الغناديــــر

وإن ناظرت عيني فؤادي نهرهــــا

ياناس أحبَّـه والمحبَّـه مقاديـــــــر

هذا هوى نفسي وهـذا قــدرهـــــــا

والحب ماله ياهل الحب تفسيــــــر

قـلبيـن والله بالمحـــبَّــه أمـرهـــــا

لى جيت أصوَّر حالة الحب تصوير

وأرد عن حالي لخلِّـي خــبــرهـــــا

لقيت وجدي فوق كل التعـــابـيــــر

كل الشِّعر قطره وشوقي بحــرهـــا

هيا يوم شافته طولها أرفعت عينها وقالت له : سلطان ممكن تطلع عشان أغير

سلطان ومازال هايم في وجهها : هااااه

ضحكت هيا : هههههههههههه اقول اطلع بغير

سلطان والبسمه شاقه وجهه شق : فديت الضحكه وراعيتها.... بعد ضحكي مره ثانيه عشان خاطري

استحت وضلت ساكته ومنزله عينها

سلطان يبي يكسر خاطرها: افاااااا ما استاهل انا تعيدين لي ضحكتج ؟؟

هيا ووجها قلب طماطه من اسلوبه : سلطاااان وبعدين

سلطان شق الحلج يستخف دمه : ولا قبلين ضحكي وانا اطلع

عاد هالمره ضحكت هيا وهي مرفعه حواجبها باستغراب: هههههههههه شلون يعني واذا ما ضحكت بترابط

سلطان حط رجل على رجل ورجع ظهره على ورى وهو يتسند على الكنب : ما فيها شي إذا رابطت انتي حلالي بلالي عادي

وقفت هيا ووجها قلب الوان : اقول سلطان اطلع بسرعه لا احلف اني ما افصخ الفستان

سلطان ابتسم بخبث : إيه حلفي ..انا اتمنى انج تحلفين

هيا عرفت ان قصده مو شريف وخافت : لا والله مو حالفه انت قلت اذا ضحكت بتطلع وتوي ضحكت لك.. اطلع الحين

سلطان وقف وهو حاط يده على قلبه يعني يكسر الخاطر : و تسمين هذيك ضحكه؟؟ انتي تقصين علي لاني طيب ومالي سوابق مع الجنس اللطيف وتستغلين هالشي فيني؟؟

فقعت هيا من الضحك على زوجها المستهبل: هههههههههههه هههههههههه إيه اضحك عليك واستغلك استغلال غير شريف بس اطلع الحين

انزين بطلع بس اذا رجعت بنشوف من اللي راح يستغل الثاني استغلال غير شريف هذا كان كلام سلطان وهو طالع من الغرفه وهو مبتسم ابتسامه خبيثه

بعد يومين من العرس سافرت هيا مع زوجها اللي كان مبتعث من شغله الى كندا ودعوها اهلها في المطار وكانت نوره مع ابوها وامها بعد هناك عاد نوره كانت تمشي بعكازين المسكينه

جات نوره لهيا وهي تضمها بقوه : هيونه اتصلي لي سألي علي كل ما تذكرتيني لا تنسيني هناك

هيا وعيونه تدمع : يا بعد قلبي يانونو ما راح اقطع كل ما اخذت بتصل لج انتي بس ديري بالج على روحج لاتناقزين خلاص كبرتي

نوره خزت هيا : طيحتي كان لها ظروفها الخاصه.. هذا وانا مشتريه عكاز عشان اجيج المطار اسلم عليج تضحكين علي؟؟ صج ما تستاهلين

ضحكوا كلهم على سوالف نوره حتى سيف اللي لين الحين منقهر من قلة أدبها هذاك اليوم

محمد قال لسلطان وهو يوصيه: هالله هالله يا سلطان بإختي تراها الغالية ودلوعة بيتنا

التفت سلطان على هيا وهو مبتسم : توصيني على قلبي يا محمد؟؟ ترى هيا محلها سواد العين

استحت هيا ونزلت راسها وامها دمعت عينها : الله يهنيكم و يسعدكم انتبهوا يمه على ارواحكم انتوا في بلاد غربه

سيف حب اخته على راسها : عاد لا تفصخين العبايه هناك وتستخبلين حتى لو سلطان موافق ترى ما راح اسامحج اذا دريت انج تركتيها

نوره انقهرت منه ومن لقافته وتهمس لامها : شلقفه؟؟ زوجها اللي يتدخل بس.. صج ملقوف

فرصتها امها وهي تقول : جب قصري حسج والله محد ملقوف غيرج

نوره مسكت مكان ما امها فرصتها وهي متألمه : اححححح ليش يمه عورتيني؟؟ أنتي متأكده انج أمي؟؟؟ أنا بصراحه اشك

ان شاء الله يعجبكم الجزء لا تحرموني من ردودكم المفرحه

اختكم سالفتي سالفه

انا حبيتها والحب بلوى

مصيبه من مصيبات الزماني

على ماصابني حيل الله اقوى

ياليت اللي برى حالي يراني

يولوالية ما قدمت شكوى

وكيف اشكيك؟؟

واناعمري بدونة ويش يسوي

الجزء الرابع

سافرت هيا مع زوجها وانقطعت روحات نوره لبيت عمتها إلا مع أمها مو مثل أول كانت هيا موجوده .. الحين ما في إلا أولاد في بيت عمتها

مرت السنوات متتابعه وبسرعه وصارت نوره في الثانويه وانشغل سيف في شغله وما صار في احتكاك بينهم خاصة إن نوره تتغطى.. ومحمد تزوج بعد زواج اخته هيا بسنه وعنده الحين بنت عسل اسمها ريم عمرها سنتين وزوجته سارة حليوه بعد ومعتبره ام محمد أمها ما ترد لها طلب تراعيها عشان خاطر زوجها وبعد عشان أم محمد مره طيبه

بعد يومين بتكون رجعت هيا من كندا بعد ما مرت 5 سنوات جابت خلالها هيا ولدين حمد 3سنين و راشد سنه .. طبعا ام محمد طايره من الفرح ومو عارفه ايش تسوي وايش تخلي لان بنتها بترجع بالسلامة مع زوجها وعيالها والكل في بيتهم يعدلون للعزيمة حتى نوره تكرمت وراحت بيت عمتها تساعدهم

أم محمد تعطي نوره المفتاح : نوره امي روحي فتحي غرفة هيا وفتحي الدرايش خل الغرفة تتهوى شوي

أخذت نوره المفتاح وطيران على غرفة هيا و تركب الدرج درجتين درجتين وهي تنط الاعلى طلعت سيف من غرفته .. انتبه لها وهي تنط ورجع الغرفة بسرعة

الا يسمعها تنادي عمتها :عمتي المفتاح ما يفتح انتي متاكده ان هذا مفتاحها

تسند سيف على الباب وهو ماسك قلبه : هذي نوره؟؟؟ ... يا زينها كبرت

صورتها انطبعت في راسه وهي تنط وشعرها اللي واصل نص ظهرها يطير مع كل نطه تنطها

فزَّ الخفوق وقلت ياالله عسى خيــر

أثـر الَّليالي عـاد غـايـب قــمرهــــا

مع شوفته نشوه وفـزَّه وتخديـــــر

وعـيون خـلاَّنٍ تعـانـق نظـرهــــــا

يفــزَّ له قـلبي كـمـا فــزِّة الطَّــيـــر

والرِّجل كن الَّلي تحتها غدرهــــــا

ياصبح عمري ياصباح التِّباشيـــر

نوره ملا قلبي وروحي غمرهـــــا

انتبه على روحه انه مبتسم وحاط يده على قلبه تعدل بوقفته وتلفت في غرفته كأن احد طالعه

في الجهه الثانيه نوره ما كانت تدري عن السحر اللي رمت فيه ولد عمتها عدوها الازلي لو تدري كان ذبحته وشربت من دمه يعني لو كانت متعدله ومتمكيجه كان عادي يعني على الاقل شافها بكامل زينتها خخخخخخخخ

هذيك الليله ما نام سيف عدل كل ما انقلب يمين تطلع له نوره وكل ما انقلب شمال تطلع له نوره : يعني يوم جيت افكر في بنت ما طلعت لي الا نوره اف انا شسويت في دنيتي ... ابتسم وهو يتذكر شكلها وهي تنط: لا وتنط بعد هههههههه والله بتطير مخي هالبزر

حاول بعدها ينام بس ما قدر وطلع عليه الصبح وهو لسه يتخيل شكلها وهي راكبه الدرج وشعرها وهو يطير

وصلت هيا الاجواء السعوديه وهي طايره من الفرح انها خلاص ارتاحت من الغربه واللي استقبلها سيف في المطار.. حمد يركض قدامهم وراشد شايلته امه ابتسم سيف وهو يأشر لهم بيده وجا حمد وهو يركض مستانس ويشيله خاله ويدور فيه وهو رافعه فوق وحمد يضحك من قلبه ... ( يا حليله يشبه خاله سيف لما كان صغير)

سيف وهو يوقف حمد على الارض وينزل لمستواه : هلا والله بأهل كندا

???Hamad How are you

سلمت عليه اخته وهي تضحك: ههههههههه لاتتفلسف على ولدي تراه يعرف انجليزي احسن منك

رد عليها وهو عينه على حمد اللي شاق الحلج يطالع خاله : واضح من رده اللي افحمني انه مقطع الانجليزي تقطيع مع هالخشه اللي ما ادري على مين طالعه؟؟؟

سلم سيف على سلطان بحراره : اسفرت وانورت واستهلت وامطرت والله توما نورت الدمام

سلطان وهو يحب خشم سيف : الدمام منوره باهلها... شلون اجوائكم؟؟؟ عساها مو رطوبه ؟

حمل سيف رشودي وبوس فيه وهو يطالع سلطان : شعنده الكندي اشوف نسينا الرطوبه وصرنا ما نعرفها؟؟ لا تخاف اذا فقدت الذاكره بترجع لك بعد كم دقيقه بس تفارق باب المطار

العزيمه كانت في بيت ام محمد مجهزه والكل كان حاضر حتى أهل سلطان كانوا موجودين أمه وخواته وإخوانه

عند الحريم كانت نوره محط أنظار أهل سلطان لأنها كانت في منتهى الجمال الشعر اسود يتكتكت والوجه سبحان من صوره والعيون اخخخ من عيونها محد بيجيب راس سيف الا عيونها طبعا كل شي فيها ناعم ابتدأ من الشكل الى الصوت الى الطول الى الملابس والمكياج بس فيها دفاشه شوي ما تتناسب مع هيئتها الخارجيه

أم سلطان وكأنها تلمح : بسم عليها بنتج يا ام نوره كبرت وصارت عروس ما طقوا بابكم الخطاب؟؟؟؟

أم نوره تطالع بنتها باعجاب وهي مبتسمه : الا والله من المتوسط والخطاب يطقون بابنا بس بنتي صغيره توها على الزواج والشقى

سكتت أم نوره شوي وهي تشوف بنتها تسولف مع خوات سلطان : إلا إذا جاها رجال زين وينشرى ماحنا برادينه

ابتسمت أم سلطان على بالها ان ام نوره تقصدهم بس ام نوره ما كان في بالها الا رجال واحد هو اللي يستاهل بنتها وتستاهله (( سيف ))

ابتسام اخت سلطان كانت تسولف مع نوره اللي بنفس عمرها وصديقتها : اللي قاهرني الحين اني لو قطعت عمري تقطيع في الثانويه العامه بعد لازم اختبار القدرات التافه هذا.. يعني تراكمي وسكتنا.. بس شسالفة القدرات هذا؟؟؟ اخخخخخخخ بموت من القهر

نوره تتعلك وهي تسولف : والله يا بسومة أنا مطنشه يعني مو لازم هالجامعه بموت اذا ما دخلتها ؟؟؟

مريم الأخت الثانية لسلطان وهي اصغر من نوره بسنتين : أي والله حتى أنا مو داخله جامعه هذي هيا جامعيه شسوت لما أخذها اخوي؟؟ طلعها منها وهي لسه ما خلصت وسافرت معاه يعني ما نقص منها يد ولا رجل

ابتسام حبت تغير الموضوع لأنها ملت من سالفة الدراسة : أقول من اللي راح يجيبهم من المطار؟؟؟؟

نوره بدون نفس : سيف الله المسلول

ابتسام ضحكت : ههههههههه حلوه هههههههههه بقول لهيا تعلمه عليج

نوره طالعتها بنظره استهزاء: تهددين مين يا ماما ؟؟؟ انتي شكلج ما تعرفيني عدل .. أنا هالسيف اشيله واشدخ به في الأرض أنا العب كراتيه مو أي شي

ابتسام وهي مبتسمه ابتسامه شر : زين بروح أقولها

توها بتقوم الا مسكتها نوره : سوسه.. يممممه منج ..انثبري أقول لا تشوفين روحج طايره من الدريشه

قعدت وهي تضحك عليها : يوم انج تخافين منه لا تسوين روحج غريندايزر

مريم تسمعهم وهي تتنهد : وه بس ..عاد سيف ؟؟يـــــا حلوه.. يهبل.. ما أظن يسوي لج شي لانه حليييييييييييو

نوره تحرك يدها قدام مريم : هااااااااي انتي يا قليلة الحيا ترى هو أكبر منج ياللي ما تستحين ... هائمةٌ عشقاً فيه حظرتج؟؟؟؟

مريم ويدها على قلبها : مو بأيدي.. شسوي يعني؟؟ ذباح ولد عمتج ذبـــــــــــــاح

نوره بلوعه : الله يلوع كبدج خلاص سديتي نفسي عن الاكل شلون بتغدى الحين؟؟

ابتسام استغربت من نوره : انتي الحين ليش ما تواطنينه بعيشة الله ؟؟ انا ملاحظه هالشي من زمان عليج ؟؟؟

نوره نست ليش ماتحبه بس تذكر انه كان يصارخ عليها مع انها مره وحده بس ذاكرتها صورت لها انه واجد هاوشها : مادري كذا من الله ما احب سيرته العطره تجيني حكه اذا طروا اسمه قدامي

أول ما دخلت سيارة سيف الكراج دق هرن قوي يعني ترانا وصلنا

طلعوا كلهم الحريم والرجال من المجالس و الفرحه بعيونهم طبعا الحريم بعبيهم

أول ما نزلوا الا نوره تركض وتلم هيا بأقوى ما عندها وهي تتكلم بسرعه : هيووه اشتقت لج واجد والله ما بغتيتي ترجعين الحمد لله على سلامتج

هيا ضحكت وهي تحس حالها مزنوطه على وشك الموت على يد نوره :هههههههه نوره زنطتيني هههههههه يالبطه

فكتها نوره وهي تضحك ما كانت تدري باللي قاعد يصير في اللي واقف يطالعها ووده هو اللي يزنطها بيده هو ما شاف ان الكل يضحك لا بس شاف اخوان سلطان يطالعونها ومبتسمين هو من القهر صرخ بطريقه خلتهم كلهم يلتفتون فجأه عليه : يمااااااااه

حس انه غبي وعبيط بس قال بسرعه : الرطوبه ذبحتني دخلوا داخل سلموا على بعض احسن ... وابتسم كأنه ماسوى شي

ضحك الكل على حركته ومريم داخت من كثر ما هي ميته عليه : وه يا حلوه دمه خفيف

ابتسام افرصتها لانها هي اللي كانت جنبها وسمعتها: جب يا قليلة الحيا

مريم تحك مكان الفرصه : اححححححححح وجع ان شاء الله جعل اصابيعج الكسر

ابتسام وودها تكفخ اختها : احسن ما جاج شي للحين يالمشفوحه في البيت حسابج عندي

نوره طالعته وقالت في نفسها : والله ما خاب ظني فيك يا سيف غبي طول عمرك...الله يفشلك فشلتنا قدام الناس

دخلوا الرجال المجلس بعد ما سلموا على سلطان ودخلوا الحريم داخل البيت عشان يعرفون يسلمون على هيا عدل وفي دخلتهم الا سيف وقف قدام نوره وعينه يتطاير منها الشرر

نوره وهي موعارفه السبب بس بعد مسويه نفسها ما تخاف منه مع إنها كانت مرعوبه من شكله : نعم؟؟؟ خير؟؟؟ شفيك؟؟؟

سيف خزها شوي وبعدين قال بتهديد صريح : شوفي يا نوره عيدي هالحركه مره ثانيه والله ثم والله أنا اللي بزنطج بيدي فاهمه؟؟

مشى عنها سيف وهي وقفت مكانها ما تحركت وهي تتابعه بعينها : شفيه هذا؟؟ وقف قلبي الله يوقف قلبه على بالي عنده سالفه صج غبي

دخلت عند الحريم وهي ساكته وتقول في خاطرها مع مدة بوز خفيفه تكاد لا ترى بالعين المجرده : عشان أمي وأبوي ساكتين هالسيف الغبي يهددني أنا شسويت عشان هالكلام اللي قاله؟؟ والله سخيف وتافه.. لا ومريوم الهبله تقول حلييييييييييو.. مالت عليج وعليه.. يا عساها ما تحتلي له

سيف طول العزيمه ضايق صدره من اللي صار : الحين شقاعدين يقولون هالمشافيح؟؟؟ اكيد يقولون في بالهم انها هبله وغبيه... ايه صج هبله وغبيه هم ما شافوها عشان يقولون غير انها هبله وغبيه؟؟ ويمكن يقولون بعد كريهه؟؟؟

أنا شقاعد اخربط يعني عندهم خوات اكيد بيقولون لهم قمر.. اااااااااااه يا نوره شسويتي فيني؟؟ صرت خبل اكلم نفسي

انتبه له اخوه محمد انه سرحان : سيف شفيك ؟؟ ليش سرحان

التفت سيف على اخوه وهو متوتر شوي : لا سلامتك.. ما فيني شي

محمد رافع حاجب : والله ما يندرى عنك؟؟ المهم روح شوف الغدى خلص وإلا لا؟؟؟ إذا خلص خلهم يحطونه

قام راح المطبخ عشان يستعجل بالأكل ولف من ورى البيت وهو لاف سمع صوت طفل يصارخ من الفرح وهو يركض عرف صاحب الصوت انه حمد توه بيلف يشوفه ورى البيت الا حمد يطلع عليه فجأه ويعديه وهو يركض سيف تابعه بعينه وهو يعدي من جنبه وهو مبتسم توه بيكمل دربه الا طاااااااخ

شو صاااااار؟؟؟؟؟؟؟

ان شاء الله يعجبكم البارت لا تبخلون علي بردودكم المفرحه

اختكم سالفتي سالفه

يا حظ عينك تنام الليل مرتاحه

ما كنها اللي خذت ممساي من عيني

ما كنها اللي خذت من قلبي الراحه

من يوم شفتك نوت بالحيل تشقيني

علقت الآمال في نظرات مزاحه

طويلة الرمش تبعدني وتدنيني

مره تسلهم ومرة حيل ذباحه

ومره تواعد ومرات تجافيني

وشلون تسلب شجي النفس وأفراحه

وتعلقه بالأمل حينٍ ورى حيني

عذر المودة ومن نظرات لماحه

شفت أسود الرمش رغم الخوف يغريني

الجزء الخامس

صدمت نوره في سيف ويطيحون ثنينهم على الارض

نوره وهي متعوره من قوة الصدمه : ااااااااااه .. تبي تقوم مو قادره

وسيف طاح على ظهره من قوة الطيحه ضل منسدح على الارض يتأوه إلا هيا جايه تشوف ولدها هاللي يراكض في كل مكان من وصلوا

شافت الثنائي المدهش متبطح على الارض وشهقت : سيف؟؟ ..نوره؟؟ شفيكم بسم الله عليكم؟؟

هي قالت الاسماء خلتهم يفزون من الارض من الصرعه.. وجات عيونهم ببعض.. هنا بلم سيف وضل واقف يطالع فيها.. لأنه أول مره يشوف وجهها وعيونها اللي من سحرها حس انه مقيد فيها.. هو صحيح كان يتمنى انه يرجع يشوف شعرها مثل ذاك اليوم.. بس انه يكون محظوظ لدرجة انه يشوف وجهها هذا اكبر من احلى احلامه

فدوة عيونك لو غدت روح مغليك

وش عاد لو راحت لعينك عشاير

أبيع مايغلى على الكون واشريك

واسوق لى جتني علومك بشاير

وازعل جميع الناس بالحيل وارضيك

واصبر لو دارت علي الدواير

واخذ من ايامي لك ايام واعطيك

يتبع ,,,,,

👇👇👇