رواية مجموعة مشاعر -12
شمسه هدت شويه و هي تمسح دموعها ..: و الله ما قد صحت ها الكثر من أتوفى أبويه . .
راشد يبى يغير عليها جو ..: الله , ها الكثر أنا غالي . .
شمسه تصد ما تبى تشوفه : و أكثر . .
راشد : نشي , نشي عن الأرض . . ( و ناولها كلنكس ) : مشي دموعج يلا . .
شمسه خذته و مشت دموعها . .
نش راشد و نشت هي . .
راشد : شو تسوين هنيه و كلهم فوق النقا ..؟؟
شمسه : كنت راقده توني نشيت ..
راشد : أنا بعد , رديت من الدوام و رقدت يوم نشيت ييت . .
شمسه : يعني ما كان عندك شغل ..!
راشد : نوعاً ما . .
شمسه أتذكرت الجباريت . . : ليش كنت تبى جبريت ..؟؟
راشد : عشان أولع مدواخي . .
شمسه : ما بنخلص من المدواخ يعني .!
راشد : لا ما بنخلص . .
تموا يمشون و يهذربون شمسه لبت من راشد طلب , خلاه صدق يتأكد إنها تفهمه من عيونه. .
شويه إلا تشوف مهره و وديمة ميلسات ع آخر النقا جريب الأرض . . إنخشت ورى راشد . .
راشد : بلاج . .؟
شمسه : وايه , مهروره و ودوم ربيعتي يالسات هناك , وايه ع الفشله . .
وديمة : تشوفين اللي أشوفه ..؟؟
مهره : هيه , شفت .!
راشد يرمس شمسه و هو يضحك : عادي , عشان أخوج ما يستلمني بروحي . .!
شمسه : لا, إلا عمير أسميه بينتقم .!
راشد : ليش ..؟؟ , شو قلتي له ..؟؟
شمسه : ما تدري , ريرو يحب أختك دودي . .
راشد : غياض الطفوله صار حب .! , شي طيب . .!
شمسه : وييه , راشد , و الله فشله . .
راشد : شميس عن البزا , يلا جدامي ..
راشد يمشي . . و يسلم ع مهره . .
و خطف و شمسه كانت وراه . .
مهره : هاا , أشووفج وياه .!
وديمة : اختج مضيعه المذهب , شوفي تمشي وياه و لا تضحك و تسولف تقول في باريس هب بوظبي .!
مهره : آه لو تطيح في حلج عمير .!
شمسه مستحيه : بلاكن كل وحده ماخذتني بشراع و ميداف .!
مهره : أشوف ولد العم مكيف .! , شو صار ..؟؟
شمسه : إمشوا خلوني أخبركم . .
و نشن و شمسه تقصن عليهن السالفه . .
وصلوا عند البنات ..
مهره : أخوكم وصل . .
وديمة : و لا , أزيدكن من الشعر بيت , الآنسة شمية كانت وياه , و يوم شافتنا أنخشت وراه .!
بدور : الله , الله . .
هند : شمسوووه , و الله إنج ما تخيلين . .
سلامة : لا , لا ما نرووم , شمسووه , إنتي و راشد غلط تمون بروحكم في مكان , يلا أعترفي شو صار من بينكم ..؟؟
شمسه : لااا , و الله ماشي بس يعني كلام عادي و الله كلام عادي . .
فاطمه : بسكم , حرام بتجتلون البنيه , كل وحده قبضتها . .
حصه : ع فكره أنا يوعانه وايد وايد . .
هند : حصووه , ما تطرين إلا الأكل . .
حصه تنش : أبويه , أنا بسير أتقهوى عند أميه , أحسن من مجابلكم . .
وديمة تصاصر شمسه : تعالي , بتي البشكاره يايبه عيال غيثوه عمي . .
شمسه ويها كله علامات تعجب . .
وديمة : هيه , صح , طلع غيث مدير أختج هو نفسه عمي اللي أقولج جنه ربيعي . .
شمسه : و الله كنت حاسه . .
وديمة : شو ما بتسيرون عند قوم عموه ..؟؟
مهره تنش : هيه , يلا بنات خلونا نسير جداهم .
هند : أقولكم , يوم بتخلصن هذربان أتبعنا . .
شمسه و وديمة : إن شاء الله . .
شويه إلا البشكاره يايبتنهم . .
وديمة تشلهم من عندها و, أول شي ودتهم عند أم حارب خلاف سارت تدور مهره . .
شمسه : طاعي , أكيه مهروه يالسه بروحها مناك . .
وديمة سارت و أتقربت منها . .
تصاصر حمده و حمد ..: سيروا أكيه ماما مهره مناك . .
و ساروا لها يترابعون , مهروه من شافتهن أستانست , و هم أتخبلوا و صاحت وياهم من فرحتها . .
و سارن شمسه و وديمة عند الحريم و بسطن , سوالف و علوم . .
حصه ترمس هند : أسمعي الخدمة الشينة , يقولون الأشقاء هم بيسوون العشا .!
هند تضحك : بنشوف شو بيأكلونا , أشهد إنهم بيحرقون الشواي كله .!
حصه : و الله يوعانه , شو ها .!
فاطمه أنضمت لهن : أنا أحس إنه بننصدم .!
حصه : جانهم يتحسبون بناكل أكلهم مال العزابية اللي يسوونه هم حق عمارهم تراه ما إييب روسنا .!
هند : أحيد حروب يطبخ , يعني يسوي أكل يتاكل .! , حتى عمير يعرف بس والله إنه .!
فاطمه : ويييه هندووه , سمعت أمج ترمس ترمس أميه , تقولها بتشاور حارب علي .!
حصه : أوونه .!
هند : أنزين و ليش متروعه .! , المفروض تستانسين .!
فاطمه : أفرضي قال ما أباها .! , و لا ما أعرفها .!
حصه : لا , حطي إيدج في ماي بارد إلا مثلج .! , حارب شرا سواف مالهم في سوالف البنات , يعني أكيد بيكون زواجه عن طريق الأهل . .
هند : وييه , وييه , الله يرحم وطر الأوّل , أيام ما كانوا بعض الناس يحبون .!
فاطمه : إي يهااا , زمان خطف , أيام ما كانوا بعض الناس يوقفون جدا حوينا و يرقبوون و يتبادلون نظرات .!
حصه أستحت : اييه , بس , بس الحين ها صار ريلي . .
هند : لا , بس نذكرج . .
فاطمه ضحكت و هند تمت تذكر حصوه بماضيها قبل الزواج . .
عند الشباب . .
راشد ينغز عمير . .
راشد : يقولون بعض الناس حبوا .! , من وين ظاهره الشمس ...؟؟
حارب فاهم قصده زين : هيه والله , ما تشوفهم محلوين اليوم ..!
عمير يعرف إنه المقصود ..: تغار يعني ..؟؟
راشد : لا فديتك , أبداً , أنا أموري ترتبيشن , إنته اللي يبالك سنين و دهور ترتب أمورك .!
عمير يطالع راشد بنص عين : بينجب عليك الفنيال ها .! , لا تستفزني .!
راشد يرمس عمير ..: أخوك غدا عنيف .!
سيف : أقولك بوسنيده , أنا أحيدها هاذيج اللي فالعتنه بغرشه .! , شكله بينتقم الحبيب من أختك فيك .!
فيصل يضحك من خاطره : و الله أختي مشهوره .!
راشد يغمز لسيف : لا , أفا عليك الحينه أختي إنشلت من البلاك لست , حطوها في مكان ثاني . .
طبعاً الكل ضحك ع عمير . .
راشد ما وحاله يكمل ضحكته إلا شم ريحة القناد ع ثيابه, يعني عمير سواها و جب الفنيال عليه . .
راشد : عمير , يا الحمار , أتريا بييك دواك . .
عمير ضحك , عرف راشد ما بيطوف . .
و نش يربع , و نش راشد وراه , و اللكل بيفطس ضحك عليهم . .
بدور : واعثرتيه , طااعوا بنات . .
هند تصد و تشوفهم يترابعوون ..: وييه , أتخبلوا هاذيل . . !
حصه : هزركم منوه هاذيل , ظلام ما يبينون .!
بدور : عمير و حد ثاني ..!
شمسه : و شو يأكد لج ..؟؟
اليازيه : قلبها دليلها . .!
الكل ضحك . . بدور تتدارك الموضوع : يعني في ذمتكن , لا تقولين لي شي فيه خبال و ما يكون لعمير إيد فيه ..
تمن يرقبن من بعيد و يضربن أخماس في أسداس . .
أم حارب : منوه الخبايل اللي يترابعون تلايا الليل ..؟؟
أم راشد : وايه جانهم رياييل بلحاهم و يتناقزون جنه فروخ .!
أم سيف : وايه لهله من عيال ها الأيام , ما ترومين تتنطقين إلا قالوا نعيش عمرنا .!
بعد لفة طويلة عريضة , عمير عيز من المراكض و خصه بعده تعبان عنثر العملية فوقف . .
راشد وصل جداه ..: ها , إستسلمت .!
عمير يناهي : لا فديتك بعدني . .
و تموا أوونهم يضاربون . .
راشد : بس , برحمك ها المره .!
عمير يضحك و بمزاح : ما بيوزك أختي .!
راشد يضحك من خاطره : صدق إنته تحب بدور أختي ..؟؟
عمير : أقص إيدي لو هب شمسوه أم الخراريف خبرتك ..!
راشد يبتسم له : ليش ما تفكونا و تسوون شراتنا ..؟؟
عمير : و شو بتسوون ..؟؟
راشد يبتسم : بنملج , جيه تستوي الفرحه فرحتين . .
عمير خبره بسالفة العصر يوم أمه و أم راشد سألنه . .
راشد : أنزين و بعدين ..؟؟
عمير : الموضوع هب حيه سهل , أحس يبا وقت و ترتيب و إستقرار . .
راشد : أنا من جدايه جيه أحس بعد دامك تباها أخطبها , ترى عقب بغير رايي و ما بيوزك إياها .!
تموا يضكون , و يمشون ويا بعض . .
أم حارب : إندووج , طاعي الخبايل , توهم يجاتلون و أكم يووج ضحكتهم شاله البقعه .!
راشد و عمير أتقربوا . .
أم حارب : أونكم رياييل بلحاكم و تتضاربون , إنف عليكم و الله . .
راشد : أفا , عموه ولدج هو راعي المشاكل محد قاله يجب علي فنيال القهوة . .
حارب كان ياي ياييب حراره في إيده : لا تحط ع أخويه , قول إنته شو قلت له .!
راشد : أفا , حارب الحينه غديت ضدي .!
عمير : أنا و أخوي ع بن عمي .!
أم راشد : وايه , أتوالفتوا ع ولديه فديته . .
أم حارب : و ما شي شغله إلا تترابعون جنكم فروخ .!
عمير يضحك . .
راشد : هيه , هيه أبويه أضحك , أنا أصلاً رحمتك لو ما كنت ميهود جان شفت الزين . .
حارب : لا أخويه ما تيبه بكسات , مثل ما قال سواف متعود ينفلع بغراش .!
الكل ضحك , و بدور أستحت . .
عمير : أووه , بدينا معاير .!
راشد : ما صلبته إلا غراش النامليت اللي إنفلع فيهن , عاد آخر وحده هي القاضيه . .
حارب كان يضحك . .
أم سيف : وايه , و هاذيل أونهم بيعرسون جنهم إلا الفروخ اللي يلعبون في حوينا من 15 سنه .!
حارب : أوه , عموه شيخة هنيه , شحالج عموه .!
أم سيف : يسرك الحال ولديه , إنته شحالك ..؟؟
حارب : الحمد لله عموه يسرج الحال . .
أم سيف : أكم , العرب كلهم عرسوا و إنته بعدك عزوبي .!
حارب : أعرس .! , عموه بعدني ما فكرت في موضوع العرس .!
عمير : ما فكرت .! , و لا شي ناس في الـ waiting list . .!
راشد : ما قالوا عمير صقر .!
عمير : طاع , أقوولك بوسنيده شكله الفنيال ما سدك .!
راشد : لا , لا حبيبي خلاص فهمنا , سرك دق في لوح لا تحاتي بن عمي .!
أم حارب : عاد يلا , الحينه إنتوا الثنينه ما بتعرسون إلا يوم بيعرس بجري .!
راشد : لا , لا عموه فديتج هب شور الله يهديج . .!
أم حارب : ع هواكم , أتفاهموا برواحكم .!
عمير : خذ راحتك أخويه , العمر بعده جدامك , لا تحاتي .! , خل بعض الناس يتريون شو وراهم.!
أم راشد : و إنته .! , لين متى بتظلك عزابي و تهيت يمين و يسار .! , ما دواك إلا تنفلع وديه ثانيه لبده يفتر مخك المصدي .! و بتصطلب . .
حارب : عثره , كل ها حق عمير .! , بس إنزين أنا ما فكرت إني بعرس .!
عمير : أقول , ترى شي عرب بديت أحس إنهم بيظهرون كل شي فيك .!
حارب : لا , أبويه , ما فينا مخلف عليهم التفليع , إنزين عموه عندج عروس , ترى أنا ما أعرف أتنقى على عيني ..
أم سيف : تم الساع يا ولد حمامه , العروس مايوده .!
أم حارب : أشهد إنها مايوده , بس عاد مط أخوك وراك و خلونا نفرح وديه وحده , عن لا تتعقدون من الوحده .!
راشد : نحن صدق حسينا إنه نحن معقدين عقب ما عرس سواف , أشوف عقده كلها إنفجت .!
عمير يدحه : الله يوفقك , كم يوم و بتحلقه و بتقول ليتني ما وطيت دربك يا سيف .!
حارب يضحك : بس , خلاص صدعنا روسهم . .
أم سيف : عاد هب تنسى تنشد أمك عن العروس خلاف . .
عمير : عموه , أفا عليج و ما بينسى و إن نسى أنا بذكره .!
و راحوا . .
هند : حشى , بالعين مسجلات .!
بدور كانت شويه و بتصيح . .
موزه : أختي طلعت مشهوره .!
بدور شويه و بتصيح : بس لاااه , و الله مفتشله , حتى سيف ريل هندوه يحيد .!
فاطمه : دودي بلاج .؟ , ترى نسيتي , كلهم كانوا ويا بعض , الله يرحم أيامنا القبليه .! . .
شمسه : وينها عيل مهروه ..؟؟
وديمة : مناك , تلاعب الصغاريه , هب طايعين يفجونها . .
حصه : أبويه , حد يفج الحراره تراني يعت . .
البنات ضحكن عليها . .
.
. . ( . . مجموعة مشاعر . . ) . .! *
(. . الجزء الثاني عشر . .)
خذتهم السوالف , بين ماضي و ذكريات . .
في حدود الساعه 1:30 أتنبهوا ع الساعه . .
وديمة : أبويه أنا بنش , وايد بطيت . .
شمسه : بنتلاقى باجر أوكيه ..؟؟
وديمة : إذا ما كان زايد موجود . .
بدور : يلا عيل نتلاقى ع خير . .
وديمة وايهتهم و نشت لنه غيث كان ياي بعد . .
غيث : شكلكج ما شبعتي ..؟؟
وديمة تضحك : أصبر طشونه , بسير أييب الصغاريه من عند مهره . .
غيث : ليش هم من متى كانوا وياها ..؟؟
وديمة : ماشي حبيت أسوي لها سربرايس . .
غيث : سيري يبيهم دهديه . .
سارت وديمة و ردت . .
غيث : شوو ..؟؟
وديمة : شووف , أنا اليهال ما أعرف أتفاهم وياهم .! , سير شو عيالك المبزاين لا أصفعهم .!
غيث : و العثره .! , جيه تصفعينهم .! , ياينهم من الدرام .!
وديمة : سير طالعهم .!
غيث : شو أتخبلتي و لا شووه .! , شو يسيرني عند البنيه , ودوم , أشوفج إلا عقيتي برقع الحيا .! , سيري أتفاهمي وياها و يبيهم , أما أنا , ما بتحرك شبر واحد من هنيه .!
وديمة تتهندق , لنها بطبيعتها ما تحب اليهال . .
سمعوا حس مهره وراهم : يلا أوكيه أكوه باباه يترياكم في البرد , سيروا و تعالوا باجر . .
وديمة صدت على حمده : حمدوه عن البزا و لا جدامي . .
حمده شويه بتصيح : توفي ماماه , أموه وديمة كله تذالبنا ( شوفي ماماه , عموه وديمة كله تضاربنا . .)
مهره بحنان : خلاص بنضربها عموه وديمة , لا تخافين , صح باباه , بنضربها ..
غيث كان واقف متفرج .! , ما يعرف شو يسوي .! لكنه تدارك الموضوع : هيه , أكيد . .
مهره صاصرت حمد شويه , حمد هز راسه و حب مهره ع خدها , رمس حمده و حمده فجت مهره , و يت بتسير . .
غيث صدق كان منحرج من مهره , كراف في الدوام , و الحين يكرفها , المفروض يخيل شويه , بس في شي أكبر في داخله . .
حمد يزخ أبوه : يلا باباه . .
غيث : يلا أبويه . .
حمده ترد عند مهره : ماما , تووفي محد يباني . .
مهره تضحك عليها .. تمت تصاصرها لين ما سارت وياه أبوها و هي راحت . .
وديمة : الله , الله , بيضربني باباه .! , تبى الصدق عمي إنته ما تخيل , أكيه البنيه سارت , ع الأقل قولها شكراً .!
غيث : إنتي لا تتفلسفين ع راسي و تلوميني , نتفاهم أنا و هي .!
وديمة تمشي و تخليه ..: الله ع اللي يتفاهم .! , وايد واضح .! , ما أدري خايفه ع شو لا يصيربك شي في البرد .!
غيث : ودووم و الله بنتفلعين , عمج أنا , لا تنسين . .
وديمة : عمي ع عيني و ع راسي بس ما تنفع أبداً غير في شغلك و لا في مهْره غير ما تنفع ب بيزه .!
غيث يضحك : و شو تبيني أسوي ..؟؟ , ودوم أنا اليوم شيبه و أبو عيال يعني لو فكرت بجدية بوحده ما أفكر أسوي وياها قصة حب .! , تفهمين .! , خلج واقعيه يعني شو كنتي تبيني أسوي حق مهره مثلاً . .؟
وديمة : إنته لو أتم ع راسك من اليوم لين باجر ما بتفهم , أنا أقول لو مهره توافق على خاطبنها و نفتك أحسن . .
غيث أستغرب : شووه ..؟؟
وديمة : شووه اللي شووه ..؟؟ , توها كانت حرمة عمها تلمح إنها تبى مهره حق ولد أختها . .
غيث : و بعدين ..؟؟
وديمة : شو اللي بعدين ..؟؟ .!!
غيث : هي شو قالت ..؟؟
وديمة : شو بتقول ..؟؟ ( توقف لنهم وصلوا صوب المزرعه ..) , باباه سيروا داخل ( أطالعت بنص عين ) , الصغاريه زاغوا و دخلو يترابعون داخل . .
وديمة تكمل بجدية ويا غيث : في ذمتك شو بتقول يعني ..؟؟ , البنيه عمرها 25 و أمها تبى تتطمن عليها قبل لا تغمض عينها كيف تباهم يتصرفون يوم حد يقول يباها ..؟؟ , و لعلمك يا عمي العزيز هم الحين مجبرين يوافقون عشان يصكون حلوج الناس و العيون المفتحه عليهم , و لا تقولي ما عليهم من الناس لأنهم عايشين بين الناس , و لعلمك لا هي و لا بنات عمها عرسن و السبب حلوج الناس اللي ما تتسكر و لا تفهم إنه في شي إسمه قسمه و نصيب .! , تفهم .! , و إذا إنته متعقد و تتحسب كل الحريم ما فيهم خير و بيفرون عيالهم عشان واحد ثاني , ع هواك .! لكم خلاف يوم الناس بيقولون عن عيالك تربية بشاكير لا تزعل , و إنته يوم بتضيج و بتحتاي حد و ما بتلاقي حد وياك , بعد برايك , عيش ضيع شبابك و شيب و موت بروحك .!
و خلته و راحت . .
في هاذيج اللحظه حست إنها صدق قست على عمها بالكلام و يمكن جرحته بس شو تسوي .! , لازم لنها تحبه و تحب مهره بعد , و التردد في ها الأمور تضيع الواحد لنه عادةً ما يكون فيها غير فرصه وحده إن ما إغتنمتها راحت عليك . .
.
.
في الفلة . .
سلامة كانت تصيح في حجرتها , دخلت يزوي و دودي . .
يزوي : طاعي , من يينا العصر و نحن ع ها الحاله ما أدري بلاها .! هب طايعه ترمس . .
بدور : سلامي , بلاج ..؟؟
سلامه تصيح بزياده , سحبت بدور الفون من إيدها و تشوف . .
بدور تشوف المسد كولات ..: سلامي , سعيد من الصبح يتصل , ليش ما تردين عليه ..؟؟
وصل مسج و فجته .. بدور و يزوي يقرن و هن منصدمات . .
بدور تيلس ع الشبريه : حووو فهميني , شو السالفه , ليش سعيد يقول جيه ..؟؟ , شو صار ..؟؟
دخلت هند و وراها مهره ..
هند : بلاكن ؟؟ , حسكن شال البقعه ..؟؟
يزوي تناول هند الفون ..
هند تقرى بصوت عالي .. سلامه , دخيلج ردي عليه شو صار .؟ , ليش ها القرار دخيلج ردي لا تعذبينيه زود )
مهره : المرسل بو عسكور .!
هند : شو مستوي ..؟؟
هند : سلامي شو صار ..؟؟ و ليش سعيد مطرش ها المسج ..؟؟
في ها اللحظه رن فون سلامه و اللي متصل كان سعيد ..
مهره شلت الفون من إيد هند و فجت الخط .. و حطت الفون ع الطاولة اللي جدام شبرية سلامة و يلست , هند ما فهمت تصرف مهره , بس طنشت لنه الفون كان صامت و محد إنتبه ع مهره . . .
موزه دخلت ..: سلامي , شو اللي تقوله يزوي ..؟؟
سلامه تمش دموعها و تصيح في حضن هند اللي تحاول تهديها . .
موزه منفعله : سلامي , فهميني , يوم إنتي آخرتج بتودرين الصبي , ليش علقتيه فيج ..؟؟, ليش خليتيه يحبج ؟؟ , فهميني ليش تعلوزينه ..؟؟ , ليش خليتينا نداري عليج و نخون الثقه يوم آخرتج بتودرينه ..؟؟
سلامه تصيح ..
موزه تتقرب و تزخها : سلامي أرمسي و لا تنرفزيني , قولي ليش ودرتي سعيد..؟؟
بدور : سلامي حرام عليج , كم مره بغيتي تنفدين الصبي ع درب العين دبي ..؟؟ , و الحين برود مطرشه له مسج أسمحلي سعيد نحن لازم نفترق ..!!
هند : حووه , جنكم خذتوا البنيه بشراع و ميداف , خلوها ترمس . .
و طبطب ع راس سلامه . .
شمسه اللي يت متحيره بس سمعت يزوي يوم يت حق موزه . .
شمسه تيلس جدام سلامه و تمش عيونها ..: سلامي فديتج , أرمسي , خلينا نسمعج , ليش ودرتي سعيد ..؟؟
سلامه بدت تهدى ..: إنتوا تدرون هو منوه ..؟؟ , هو سعيد بن خليفة الـ.... , تعرفون شو اللي بين أبويه و بين أبوه ..؟؟ , تعرفون شو اللي بين أهلنا و أهله .!
موزه : نعرف و قبل لا تحبينه كنتي تعرفين .!
مهره : إنطبي مواز خليها ترمس . .
سلامه : يعني مستحيل أبوه يرضى إنه ياخذني , و لا أبويه بيرضى , تعرفون شو قايلين عنا كلنا , و أبوه دبلوماسي و معروف عزه و رزه , و الأهم من كل هذا , أبوه بيوزه بنت عمه الحين , ليش نكمل على درب نهايته مسدوده ..؟؟ , بعدين كل اللي بينا غلط في غلط , و لو أبويه و لا حد عرف و الله بنعدم . .
اليازيه : يا سلام .! , الحين أفتكرتي بها كله ..؟؟ , وينج من كل ها الأسباب من أربع سنين ..؟؟ , و لا عايبنج اللي يصير في الصبي ..!
موزه تكمل : ليش عطيته المجال ..؟؟ , ليش خليتيه يكون وياج ..؟؟ , ليش رمستيه من الأساس , دامج يا بنت الحمايل خايفه من أبوج و لا من حد غير .! , و لا الحينه عقب ما بغيتي إتنفدين الصبي كم وديه قلتي و الله ما أباه .! , سلامي و الله سعيد يحبج و مستحيل يكون يلعب أو يتسلى , يعني شفتي يوم سويتي الحادث العام ..؟؟ , ياج يوم الضباب من دبي ع درب الموت و كان موجود في المستشفى , تم لين الساعه لين ما ظهرتي من العنايه و أتريا لين الساعه 4 الفجر و تم لين ما ساروا و سأل عنج يوم أتطمن عليج رد دبي في المطر ..؟؟ , كم وديه سوا حادث ع درب دبي العين عشان بس إييج و يراضيج ..؟؟
هزرج واحد يبى يلعب بيسوي ها كله ..؟؟
شمسه : سلامي , إنطقي , قولي ليش جيه تسوين في الصبي ..؟؟ , طاعي شقايل بيتخبل عليج , شوفي كم وديه أتصل و شوفي مطرش لج ..؟؟ , هذا الصبي حط روحه ع إيديه و قالج خذيها يا بنت غانم . .
موزه : سلامي لا تذبحيني غصه .! , نحن نعرف إنج غلطانه إنج رمستيه و إنج و إنج , بس لو كنتي تبين تودرينه كنتي من الأساس لا تعلقينه فيج .. شوفي هو كم عطاج و إنتي شو تعطينه , الكاس اللي سقاج في سلسبيل سقيتيه فيه سم بالعسل .! , يعني يوم كنتي ترمسينه و تشوفينه , كنا نقولج سلامي سلامي , و إنتي تقولين , لا فديته سعيد . غير عن الباجين .! , يلا راوينا شو الغير فيه .!
مهره بهدوء : يعني الحين ها القرار من وين ظهر ..؟؟ , هو خانج .؟ جرحج .؟ , شي سوابج .؟ و لا بس تبين تودرينه لنه اليوم ملجته .!
سلامه منهد حيلها من الصياح : شو السبب الأهم من إنه ملجته اليوم..؟؟ , هو أبوه خطب له بنت عمه الحين , شو الفايده ..؟؟ , اليوم ملجته عليها , حرام و الله حرام كيف تبوني أكلمه و هو صار لأنسانه غير .!
اليازيه : و إنتي وين يوم أبوه خطبها له , و مثل ما فهمت هو مغصوب .!
سلامه : ما أدري , هو قالي مره وحده إنه أبوه بيخطب له و يباله بنت عمه و هو قال لاء , خلاف ما ياب لي طاري , لين قبل كم يوم , كنا بنتلاقى , من زمان ما شفته و الله عديبي أكثر من 6 شهور ما شفته , قالي السالفه و أنا ثاني يوم . .(صاحت) . .
موزه : كملي , كملي لا تنرفزيني .!
سلامه : طرشت له المسج و لا سرت له . .
شمسه : وحليلك يا بو عسكور , سموك سعيد و لا ريتها السعاده .!
بدور بأسلوب إستفزازي : متأكده إنه ما يبى بنت عمه , و لا هاي مجرد قصه و تراجيديا حق الوداع .!
سلامه عصبت و هي تنوح , فرتها بالمخده : لا , إنتي شو تقولين .! , سعيد غير و الله سعيد غير كان جدي ويايه و هو هب راعي بنات و لا راعي سوالف بطالية .! , بس ما أدري يمكن , لا , ما أتخيل كيف يبلعب بمشاعري 4 سنين لا , لا . .
و ناحت من الخاطر . .
موزه عصبت (أمبونها دمها حار.!) : حووه , وينه أنزين عريس الغفله هذا الحين ..؟؟ , يوم إنه ما يلعب وين ما راوانا سواد ويه من 4 سنين ..؟؟ , و لا يتريا تعيزين و يخلص رسالة الدكتوراه مالته .!
شمسه تزخ موزه , لنه لو ما زختها عادي تقوم تسوي فيها شي ..: مواز فديتج هيدي , هدي أعصابج , الحين خليها توقف صياح هب تزيدينها .!
هند تحاول تهديها : بس هذا ما يبرر إنج جيه تسوين , في ألف طريقه تفترقون فيها , و في أسلوب ثاني عد تقولين له إنج إنخطبتي و وافقتي , هب جيه حرام عليج , شكله من قلبه الولد حبج , و لو إني أشك إنه واحد يقبل ياخذ وحده حبها و رمسها و أتلاقى وياها . . ! , بس بعد يمكن يكون واحد من ألف .! , يعني سلامي أحيدج عاقله و راعية مبادىء , وين طيرتي هذا كله .؟
سلامه : ما أدري , ما أدري ..
مهره : أشششش , إنتهت حلقة النقاش , الحين عاد ما ينفع يحبها ما يحبها و لا كان يلعب لو إني أشك إنه يلعب عليها , من أول يوم أتقرب منها حسيته صادق , بس ما عليه , الحين هذا ما يفور دله .! , لنه في الحالتين هي ما بتنساه بسهوله و لا ظنتي هو عديم ضمير , مبادىء ما مبادىء الحين خلاص , هب عقب 4 سنين بنتكلم و بنقول لو و لو , و (صدت جدا سلامي و بجديه تامه) آخر سؤال سلامي , سلامي إنتي تحبينه ..؟؟
سلامه ساكته . .
موزه معصبه : شمووس هديني عليها , جاوبي يا بنت الأشراف , قولي آخر البهدله و الجذب اللي عمره 4 سنين شووه , تحبينه و لا لاء , سلامي أتنشدج , ردي لا تبخرين دمي .!
سلامه تنطق و كأنها تقول هذا الشي الوحيد اللي واثقه منه : في ذمتج ها سؤال , أكيد أحبه و الله إني أموت ع التراب اللي يمشي عليه . .
مهره تنش و تشل الفون . . ناولته سلامه . . : خلاص إنحلت السالفه عيل , دامج تحبينه و إذا كان هو يحبج صدق و هو مجبور ع بنت عمه و لا مفر منها , إرضخي للأمر الواقع و لا تصعبين الأمور عليج و عليه . .(ناولتها الفون) هذا حبيبج و كلميه , شوفي نهاية ها القصه وياه و أتفاهمي وياه و لا تبندين قبل لا تنهين الموضوع و أختاري الحل الصعب , يا تفارق , يا تحب .! .
سلامه تمت تنتفض . .
مهره بأسلوب جدي ..: يودي , الصبي من ساعه ع الخط , فكينا لاااه , هب قاصرين شي زود سواء من جداج و لا من حد غير , ما صدقنا موال الحزن ينتهي عندنا , لا تفجين لنا هموم يديده , شيبنا قبل المشيب من المحاتاه , يودي و أرحمي عمرج و أرحمي المسكين اللي إبتلى بهواج , إمبونهن بنات العين من عوافتهن ما يتشاهدن .! , و إن قسن قسن .!
صدت ع البنات اللي متناثرات في الحجره : يلا بنات . .
سلامه : لحظه بس . .
شمسه : الصبي ع الخط , لا تردينه , أسمعيه لو مره , خليه يقولج الكلمه الأخيره . .
ظهرن من الحجره و سكرن الباب وراهن . . و كلهن مستغربات من مهره و قوتها , لنها طول الوقت هاديه و ساكنه و يوم رمست أنهت كل شي . .
موزه : ليش جيه تسوين , خليه جان ما يباها نفاد .!
مهره : مواز , خلاص الحين هي أرتبطت فيه نفسياً , صار جزء منها , يعني صعب تنساه عقب ما وصلوا ها المرحله و الأصعب تعيش مع ريال غيره و تودعه للأبد . .
موزه : أدري , و الله كريم . .
و سارت لنها تدري بعمرها . .
تمت سلامه زاخه الفون و حطته ع إذنها و هي تصيح . .
ظهرن من قسمهن و أتناثرن في البيت . .
سعيد كان متأثر , شو يصدق و لا شو يصدق , الحين هاذيل (يطري بنات عمها و خواتها) شككنها في حبه و هي ما تدري الله وين فارنها .! , تموا هم الإثنين ساكتين . .
سعيد قطع حالة صمتهم ..: سلامه . .
سلامه بصوت متقطع . .:لبـ , لبـ..يـ..ـه
سعيد : لبيتي في مِنى , إسمعيني سلامه , أنا لا في حياتي رمست بنيه , و ولا وديه في حياتي كانت لي علاقه ويا وحده خارج إيطار الدراسه و لا الشغل , إنتي تعرفيني و تعرفين إسلوبي , و تعرفين إنه
يتبع ,,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك