رواية بنيت لك في داخل فؤادي من اللهفة قصر -2
علياء: أهلين ... السلام عليكم ..
غاليه: وعليكم السلام , أخبارج الغاليه..؟؟
علياء: الحمدالله فديتج والله ملاااااااااااانه حدي ...
غاليه: والله عيل تعالي ألعبي ويانا ورقه ..
علياء شاقه الحلج : والله صبري خمس دقايق بس وأنا عندكم ...
بندت علياء عن غاليه وتلبست مخوره وشيلتها صفوه ونزلت تحت لقت خليفه يالس تحت وسارت صوبه ..
علياء: خلوف ممكن توديني بيت عمي عبدالله...
خليفه: ليش..؟؟
علياء: بليزز توها غاليه متصل بي تباني أيي ..
خليفه: لا والله وهي ليش ماتي عندج ..
علياء: خلووف تخليك بليززز
خليفه : أنزين أفففف سيري شغلي السياره لين أتلبس ...
عند غاليه والهنوف , يت الهنوف مبوزه وقالت: الشيخه منى تذاكر واماتبا تلعب حضرتها افففففففف ...
غاليه: اوووف منها فايجه خخخخ المهم تعالي نطلع برع يمكن نلقى واحد من الشباب علشان يعلب ويانا ..
سارن برع لقن اليده شيخه وأمهن يالست على الحصير ويتقهوين , سارن صوبهن ويلسن والورقه في يد غاليه ... قالت الهنوف حق أمها: أمي وين عيالج ؟؟
أم سالم( عائشه)) : ما ادريبهم .. ليش شو تبينهم ..؟؟
الهنوف: خلاص ماشي ..
أم سالم وهي تشوف الورقه بيد غاليه: أها الا علشان ها الورقه ..
شقت غاليه الحلج : أمي بتلعبين ويانا ..
أم سالم: ها الي ناقص بس ...
وشوي ولان سيارة خليفه تحدر الحوي ويعدلن البنات شيلهن ... وتنزل من السياره علياء وخليفه وراها , ويسلمون على اليده شيخه وأم سالم ...وييلس خليفه يتقهوا ..
علياء تصاصر غاليه: شو بنلعب ؟؟
غاليه: الشيخه منى تقول تدرس ومالقينا حد رابع ...
وشوي وتقوم اليده شيخه وأم سالم وياها بروحون عند يرانهم ... ويقوم خليفه..
علياء تقبض كندورت: خلوووف تعال لعب ويانا ..
الهنوف: تخليك ولد عمي ...
غاليه شاق الحلج : خلوووف ..
أطلعهن خليفه وهو رافع حياته ويقول: علشان اليوم الجو حلو وبرد بلعب وياكن ..
تيلس علياء مجابله خليفه وتدفرها غاليه : قومي روحي انا وياه ..
علياء : لالالالالالا انا ...
الهنوف : لالالالالا أنا ...
غاليه: انا يعني أنا ..
خليفه : صدق أنكن يهال ...
الهنوف : يالله كودي بودي سيد الا بغدادي .............................. وطلعت غاليه ...
وخوزت غاليه علياء ويلست مجابله خليفه ...
ضحك خليفه : يعني واثقات أني بفوز خخخخخ ...
وشوي ييلسون يلعبون ..
خليفه محرج: حوو أنتِ لعبي زين بتخسريني ...
غاليه منقهره: لاوالله أنا ألعب زين تحيد عمرك ماتلعب زين...
خليفه: لمي ثمج عن أيج طراااق ..
غاليه: جب جب أحترم نفسك ..
خليفه : والله ان تميتي جي بفر الورقه ..
علياء : خلوف خلاص مابترمس ..
أطلعتها علياء بترجي: غاليووه ..
غاليه: أنزين بس هب ترمسني جي ..
يلسوا يلعبون وجان يفوزون خليفه وغاليه ضحكت وقالت حق خليفه : كفك ...
خليفه مد يده بدال ما يصفق يدها ضربها على الخفيف على خدها ...
فجت غاليه حلجها واحمرت من الغيض : لا والله ..
خليفه: تستاهلين الي ياج من كثر مارفعتي ضغطي في اللعبه مره ماتفهمين شي ..
غاليه قامت متضايقه وسارت صوبه وبدون مايعرف شو بتسوي, ضربته بقوه على ريله وشردة ....
نهاية الجزء الاول..
الجزء الثاني
سارت غاليه بكل بروده المطبخ تسويلها كابشينوا ...
في الطرف الثاني كانن علياء والهنوف مبطلات حلجهن من حركة غاليه , تقول صدق أعداء , أما خليفه صدق ريله عورته لان الحبيبه غاليه ضربته بالنعاله الي كانت في ريلها , وتم يفرك ريله
وشوي الدخان وبيطلع من راسه من الضيقه , والغضب ... تم متنفرز وكان شكله يقول : ماعليه أن ماخليتج تنسين أسمج يا غاليوه ..
كانن علياء والهنوف متروعات على غاليه لان خليفه مكشر ويتنافض من القهر .. شوي وخليفه يقوم وقال : بسير أشرب ماي ..
قالت الهنوف: يلس بسير أيب لك من المطبخ التحضيري ..
خليفه اطالعها بنظره ناريه: يلسي محلج بسير بروحي...
قام خليفه وسار صوب المطبخ ودخل وشاف غاليه يالس تغني وهي تسوي الكابشينوا..
هي انتبهت له بس أونها سوت طاف , بس في داخلها ترتجف من الزيغه ...
سارت صوب ثلاجة الماي تصب لها ماي حار .. شوي خليفه زخ له كوب من الرف وغسله , وسار يصب له ماي من الثلاجه في نفس الوقت الي غاليه يالسه بتصب أونها ..
دزها خليفه , ويلس يصب له فولت غاليه , وضربته على جتفه بقهر ويلست تتحرطم: ماأدري شو أتحسب عمرك أوووف منك أكرهك...
خليفه سمعها ووشوي وبينفجر , حط الكوب على الطاوله وسار صوبها , غاليه تروعت شكله بيضربها ردت ورا على اليدار... طاح الكوب من يد غاليه , وفي نفس الوقت زخ خليفه يد غاليه
ولفها وردها على ورا , حست غاليه خلاص بيغمى عليها ويدها شوي وبتنكسر عضت شفايفها بألم وقالت: خلني أحسن لك ..
خليفه وأنفاسه تحرق ويه غاليه: ما بخليج لين تتأدبين ...
غاليه تصرخ: الحمدالله متأدبه احسن عنك...
خليفه يشد أكثر على يداها وغاليه تتألم وتقول: حرااام يدي تعورني أي أي..
خليفه يقولها لها بكل عجرفه : بشوفين أن ما خليتج تعرفين منو هو خليفه سعيد ...
غاليه: أونك عاد ... شكرا ما أبا أعرف ..
خليفه انقهر: أسكتي أحسن لج فايقه تنكتين أنتِ..
غاليه بدلع لا أرادي : ما أبا ...
خليفه فج عيونه وتم يتأملها بدون وعي , غاليه يوم شافت عيونه كيف أطالعها نزلت عيونها بسرعه تحت وتمت ترتجف , وبسرعه أنتبه خليفه لعمره وخلى يد غاليه وطلع برع المطبخ التحضيري ...
يلست غاليه على الارض وهي حاطه يدها على قلبها وترتجف حاولت تتنفس بنتظام , وشوي شوي رد تنفسها ينتظم تنهدت وقالت: خايس حماار روعت قلبي ..
قامت ووايجت من الدريشه , أرتاحت يوم ماشافت السياره : الحمدالله الحمدالله ..
عدلت شيلتها وسوت لها كابشينوا,وطلعت لقت الهنوف وعلياء يالسات على الزوليه يسوالفن ...
يلست عدال علياء , حركت علياء بوزها وقالت: الصراحه أنتِ حركاتج ووايد قويه !!!
غاليه: لاوالله انته شفتيه بروحج شو سوا قهرني الخايس...
علياء: أووف منج حليله أخويه , يسوالف وياج , وثاني شي مادري شو فيج أنته عليه أصلا هو محد أحسن عنه وأنتِ الي تتسببين عليه ..
غاليه بقهر: شوي شوي عن ينطر لج عرج , الا ناقص تاكليني ..
علياء: أووف منج ومن أسلوبج الخايس ...
غاليه قامت : زين زين مشكوره ماتقصرين ... إيي منج أكثر ..
الهنوف: تضاربن احسن علياء خلاص خليها ..
روحت عنهن والدمعه في عينها وهي تقول: كله يردون عليه مب هو الغلطان بعد, أكرهه أكرهه حقير ...
سارت حجرتها وطاحت على شبريتها وتمت أصيح , يلست وقالت: مادري ليش أصيح صدق اني بايخه ...
بعد فتره بدون وعي نامت , نشت الساعه 7ونص , أنقهرت من عمرها أنها فوتت صلاة المغرب , قامت تتمسح وتصلي ...
نزلت الصاله ببجامتها الوسيعه وما أنتبهت حق الحضور, خطفت من جدامهم وطاحت على الغنفه وشغلت التلفزيون , أدور شي أطالعه , تمت تتأفف بصوت عالي: أوووف أوووف شو ها الملل ...
حست الصاله هدوء , مب الا هدوء تحس الجو متوتر ماتدري ليش ... صدت صوبهم بققت عيوانها على الحضور , قامت وحطت المخده فوق راسها وصرخت : غمض غمض عيونك خلني أبا أروح
حجرتي أخ ويهي أمييييييييييييييييييييييييييييييي....
ضحكوا عليها عمها أبو خليفه وأبوها وعلي وامها كانت معصبه .... وغاليه شوي وبصيح ..
أبو خليفه: خليفه غمض عيونك خل البنت تخطف ...
خليفه توتر وهو مب مستوعب أنه كان يطالعها : ها أنزين ..
نزل خليفة راسه وخطفت غاليه تربع , دخلت حجرتها منقهره وتشاهق : ليش ليش يشوفني لالالالالالالالالالالا يالفضيحه ...
طاحت على شبريتها تفكر وشوي والا بموبايلها يرن شافت رقم أبوها ردت عليه بتردد: هلا أبويه ..
أبو سالم: وينج غاليه تعالي تعشي ..
غاليه : ماأبا ...
أبوسالم: يالله نزلي أترياج .. وسكر ...
غاليه : أهممممم ليش ... يمكن راح ..
قامت وتلبست , وهي نازله من عالدري يالسه تغني غينه أجنبيه وأتهزز فجأه وقفت ضحك عمها ((سعيد)) أبو خليفه.. عليها وقال: الحين تغنين بعد ...
بوزت غاليه وقالت: تحريت محد في الصاله ...عمي فشلتني على الاقل قول ماسمعت ..
أبو خليفه: أونه بعد صدق أن لسانج يباله قص ...
غاليه: أهو ناقص عمي ..
هزاع: أصلا هو من انقصه يطول شبر فأحسن نخليه على ماهو ...
ضحكوا الكل , نطرت غاليه براطمها بقهر: هي زين تمصخروا عليه .. وسارت يلست عدال علي وقالت : الوحيد الا مايجرح شعوري هو علاوي فديته ..
هزاع : أونه علاوي بعد ...
أبو سالم: وانا يعني الي يجرحج ...
أبتسمت غاليه: لا فديتك أدريبك أنك تحبني , بس لزم التغير شوي يوم أتبزا عليك ويوم على علاوي يعني بالدور هع ...
بصوت هامس سمعته غاليه: أونه أمحق بزا ...
رفعت راسها وأطلعت خليفه بنص عينها وقالت بعصبيه : ولي مب عايبنه يدق راسه في اليدار..
هزاع : شو رايج أدق راسج أنتِ ...
غاليه: لاوالله ...
علي : كله ولا راس الغاليه .. ولوى على راسها ..
غاليه : علاوي خلني شيلتي بطيح ... خاز علي عنها وضحك ... يتمصخر الحبيب ..
أبو سالم: ها شو الشور ياأبو خليفه علشان سيرت المزرعه يوم الخميس ...
أبو خليفه : والله زين ..
غاليه داشه عرض: هي هي خاطري أغير جو الله ياويلي منو بسير ويانا ...
أبو سالم : ياحبج للمقاطعه ...
غاليه بوزت : سوري بابا..
أبو سالم أبتسم : ان شاء الله عمج وفريجه ونحنا وعمتج صبيحه وفريجها...
غاليه: والله حلو , أنزين أبويه فديتك قول حق قوم خالتي الموز( ام سيف)) بليز ..
أبو سالم: ان شاء الله بطالع ريل خالتج مطر ...
غاليه : والله فديتك باباتي ...
أبو سالم ضحك: يامخرشج انتِ .. مادري كيف بتعرسين ماجنج الا ياهل ..
أحمر ويه غاليه وسكتت , ضحك هزاع: استحت أستحت أونج حركات ..
فجا ينفج الباب بكل دفاشه وتحدر اليده شيخه : السلام عليكم يالشواب ..
ردوا عليها : وعليكم السلام ورحمة الله وبركاته ..
أبو سالم: أمايه عنبوه نحنا بعدنا شباب مب شواب ..
اليده شيخه تيلس حذال خليفه وتأشر بعصاتها على أبو سالم : وها الخيوط الي في ويهك شو يسمونها ..
ضحكوا وقال هزاع : عاده خيوط يدوه هههههه ...
أشرت بعصاتها صوب هزاع: عاد انت أسكت أسكت .. من الحين شعرك أبيض....
هزاع حاس بوزه : والله فديتج يايبنها وراثه من عندج ..
اليده شيخه: لا فديتك ولا وراثه ولا شياته شوف شعري وخوزت الشيله عن راسها كان شعرها أحمر محنتنه هههههه..
ضحكت غاليه: ماشاء الله يدوه شعرج مافي مثله , غير عن شعورنا ليش ماطلع شعري أحمر شرا شعرج..
اليده شيخه: وااايه فديتني محد طالع مثلي غير خلوف يعلني أفداه ...
ضحكت غاليه بصوت عالي ...
صدت عليها اليده شيخه: شو يقرقطج ..
أنقفطت غاليه: يدوه أذكرت سالفه بس ..
اليده شيخه تضرب غاليه بعصاته على جتفها ((نقزت غاليه من الضربه)) : ماياز الا الحين تذكرينها ...
غاليه: يدوه حرام ليش جي تكرهيني ...
اليده شيخه ردت وضربتها بالعصا: انا أكرهج ..
غاليه خافت: لالالا أنتِ اصلا منو يحبني شراتج!!!! ..
أبتسمت اليده شيخه: هي أباج جي حرمه ...
بوزت غاليه: يدوه انا بنوته مش حرمه ...
اليده شيخه تصارخ أونها ماسمعتها : شووه قلتي ...؟؟؟
غاليه طالعت يدتها برعب: فديتج ماشي...
يت البشكاره وحطت القهوه على الطاوله جدام غاليه , نقزت اليده بعصاتها غاليه ’ يعني صبي قهوه , فزت غاليه كانت سرحانه وبغمت , الكل صد صوبها , أطالعتهم وهي مبوزه , ومنحرجه ,
وقامت أصب قهوه حق الموجودين عطت أول شي عمها بو خليفه وبعدين أبوها ومدت يدها تعطي هزاع بس قال مايبا وخذه منها علي وبعدين صبت ورفعت راسها على الي جدامها كان خليفه , حاست
بوزها ومدت يدها بالفنيان صوبه , خذه منها ولمست يده , طبعا غاليه أنقهرت, أمبونها تبا تجب القهوه عليه بس قبضت عمرها , وتمت تسب في نفسها يعني بها اليد حشا , حست خليفه إيطالعها بنظره
مرتبكه , طنشت ولاهمها , صبت ليدتها وعطتها ...
سارت حجرت التلفزيون مالت اللالعاب شافت عمر يلعب بلاي ستيشن ومعاه راشد ومايد عيال عمها سعيد صرخت: خيانه تلعبون من ورايه كرش ..
ضحك راشد: هي نلعب من وراج ...
ضحكت تتطنز: ادري خايفين أقلبكم ..
عمر: تخسين العنز..
سارت عنده وضربته بالخفيف على راسه : تخسي الاانت يالزطي ..
دزت عمر : قوم عمور بلعب .
صرخ عليها عمر: لالالا ما ابا ...
ضربت راشد على راسه: رشود قوم أبا ألعب ...
راشد : لالا عمور الخسران خليه يعطيج ...
شلت عمر بالقوه ويلس يصيح : ما أبا ماأبا ..
غاليه: جب تبا ولا لا .. بنلعب بالدور الي يخسر يعطي الثاني ....
حط راشد الدور بس السهل وصد صوبها وقال: هذا الي يناسبج ..
غاليه: تخسي الا أنت حط هارد أحسن لك ...
حط راشد هارد , ويلسوا يلعبون عمر يشجع راشد ومايد يشجع غاليه ...
يلس عمر يقولها : انتِ الي فوق..
غاليه معصب: جب عمور أرديبك تبا تخربط بي علشان أخسر ..
مايد: غاليوه شوه هذا طالعه الاخيره ..
ضحك راشد: اونها أقولها أيزي مستواها بس مب طايعه أونها ...
عمر: أقولك تراها عنز..
صرخت غاليه: عمور أنجب أحسن لك ...
وطلعت غاليه الاخيره طبعا وراشد الخامس , عمر رفع فنيلته ويسل يدق على صدره فرحان ...
ضحكت غاليه عليه وقالت: تراوينا عضامك يالتيس ..
عمر حرج: جب يالدرام..
غاليه: درام في عينك ... وسارت صوبه تيره من شعره وير هو شيلت غاليه وعفد على شعرها وغاليه تباغم وعمر يسبها ...
وراشد ومايد يشجعون منو بيقلب ..
راشد: عمر ضربها ضربها قوى ..
مايد: غاليووه عطيه بكس ..
صرخت غاليه: عيموره بس شعري عورني عنبوه أنا أسوالف وياك جلبتها صدق .. ترا بتندم صدق هب تقولي بعدين أشتريلي من الدكان أييي خايس ..
زادت غاليه وزاد معاها عمر , صرخت غاليه: أبوويه والله بخبره عليك ...
يا صوت من وراهم: ماشاء الله على اليهال ...
صرخت غاليه: سلوم طالعه ها الخايس شكه عافد عليه..
صرخ سالم: عمر قوم عن أختك العوده عيب جي أسوي ...
خاز عمر من الزيغه عن يضربه سالم(( ترا سالم عصبي ويخافون منه العيال)) ...
سالم: ياويلك ان شفتك مره ثانيه تضرب أختك العوده , وصد صوب غاليه : وأنتِ ياهل تضاربين وياه ...
تعلثمت غاليه: هو بدى عليه ..
عمر: جذابه ..
سالم: أوووص انته ...
أبتسمت غاليه بنتصار يوم سالم سكت عمر أخيرا أنتقمت منه (( صدق أنها ياهل ..))
روحت غاليه الصاله مالقت حد فكرت وقالت: أه شكلهم راحوا يصلون ...بسير أصلي أنا بعد...
سارت تصلي ويلست على الاب توب .. أطلع أذا نزل مسلسل كوري يديد ..
تمت تتحرطم: أووف يقهروني إلي يقطعون في الدراما يوم يترجمونها ..
سمعت صوت الهنوف وهي داخله: علشان محد ياخذ من وراهم ذنوب..
قالت غاليه: أووف يعني مابياخذون ذنوب من الحركات الباقيه والله يخربون عليه أكون مندمجه وهم يقطعون عليه ...
ضحكت الهنوف: والله أنج خايسه ..
بوزت غاليه : خاست ريحج عنزوه ...
الهنوف تتطنز : كمسا ميدا أوني ...(( هي بالكوري ومعناها: شكرا أختي ))
غاليه: علموج بعد..
الهنوف: منو خربني غيرج..
غاليه: اونه..
الهنوف طالعت غاليه بجد: أقول غلوي أنتِ شو سالفج مع خلوف ..
غاليه: منو..
الهنوف: بعد منو غيره ولد عمج ..
غاليه : ماشي ..
الهنوف: عيل ليش كل ما أتشاوفون تضاربون ..
غاليه: هو يقهرني شفتي شقا حركاته..
الهنوف: بس أنتِ تبدين ..
فكرت غاليه شوي(( غاليه ماتعصب من الهنوف لانها تحبها أكثر من عمرها )) وأعترفت: صح انا أبدى , ضحكت وكملت : مادري يوم أشوفه خاطري أتحرش فيه ..
ضحكت الهنوف: أنتِ عجيبه الله يعين الريال عليج.. شكله بيعاف ييت بيتنا منج..
نقزت غاليه: بخبرج شو استوى اليوم ..
الهنوف اندمجت: شوووه.؟؟؟
غاليه: تعرفين أنه شافني ببجامه جدام عمي وابويه وأمي بعد..
الهنوف: حلفي يالفضيحه , ليكون شاف شعرج بعد..
اطنزت غاليه: بعد بجامه وشيله ماشي مونه طبعا بدون شيله ...
نهاية الجزء الثاني
الجزء الثالث...
الهنوف : صح ... أصلا مايركب هع ...
غاليه: انزين فكينا من طاريه الحين ... خاطري بأم علي ..
الهنوف: أنزين سيري سوي لج ..
غاليه: ما أروم انتِ سوي لي...
الهنوف حطيت يدها على خصرها : لا والله ..
غاليه تسوي نفس حركاتها بس بغباء: هي والله ..
تاففت غاليه وضحكت ضحكه شيطانيه واطالعت الهنوف: هنفوه بسير عند عواش بخليها أسويها لي .. وضحكت ..
الهنوف ضحكت: شوها العقل الي عليج ..
غاليه: صبري بتصل أول ..
دقت غاليه على عواش حرمة عمها خالد: هلا عواش اخبارج؟؟
عواش: الحمدالله أخبارج أنتِ؟؟
غاليه: تمام فديتج ..
غاليه : والله ملانه ووايد وخاطري بام علي ...
عواش: فالج طيب ..
غاليه: فديتج تعرفيلي ...
عواش: أدريبج ماتين عندي إلا حق الأكل ..
غاليه بوزت : أفا بنت سعيد ..
عواش: أونج زعلتي ...
غاليه ظهرت لسانها : أوني ...
عواش: يالله تعالي بسير أقول حق الخدامه تسوي لنا أم علي..
غاليه: مشكوره فديتج , أقول عواش يدوه في البيت ؟؟
عواش: لا مش موجوده في العزبه ..
غاليه: أحسن ..
ضحكت عواش: زين عيل فمان الله ..
قامت غاليه وقالت: هنوف بتين وياي ...؟؟؟
الهنوف: ما أروم مالي بارض ..
غاليه : صدق أنج عيوز ..
الهنوف: تحيدين عمرج...
غاليه: جب , وراحت عنها, دخلت غاليه حوي بيت عمها خالد , كان البيت هدوء , سارت صوب الباب دقته دقته محد فج تأففت وقالت: أووف وينهم.,, وشوي يتبطل الباب شقت غاليه الحلج
وقالت: امبوني بدخل بدفاشه بس وفرتي عليه القفظه هع ..
بحلقت عيونها على الي جدامها ودخلت قصتها الي طالعه بسرعه وقالت: أنت!!!
أبتسم خليفه بمسخره وقال: لا يدي ..
أطلعته غاليه بحتقار وقالت: سخيفففف ...
أسترخت ملامح خليفه وقال بصوت واطي : يا محلاها من ثمج ...
شهقت غاليه وقالت: شو شو قلت عيد ..
ضحك خليفه بتوتر وقال: قلت سباله ..
غاليه ببرأه : والله , تحسبت شي ثاني , شكلي اسمع غلط ...
خليفه ضحك: توج تدرين أنج ماتسمعين زين ...
غاليه بوزت : لاتضحكني تحيد عمرك يالهرم ..
خليفه عصب : أنتِ ما أتوبين , كله تسبين ..
غاليه بعناد: كيفي ..
خليفه تنفس بعمق وقال: شو تبين أسوي بج ها ...
مطت غاليه لسانها وقالت: قرصني هاهاها , وربعت المطبخ .... تأففت غاليه في نفسها : أوف منه أنا كل ما أسير مكان أشوفه جدامي ياهي حاله...
وصلت المطبخ لقت البشكاره واقفه , وتحط عجينة البف في الفرن , تجربت منها وقالت : وين ماما عواش.؟؟؟
أشرت البشكاره بيدها أنها في الحجره المجابله للمطبخ , راحت غاليه صوبها , لقتها يالسه تلبس بنتها نوف , بغمت غاليه بصوت عالي: وووووووووووووي ..
فزت عواش وقالت: الله يغربل بليسج روعتني صدق انج خايسه ..
غاليه: انا !!!
عواش تضحك : لا أنا ..
تقربت غاليه من نوف , بس نوف صاحت وحظنت امها بخوف حاست غاليه بوزها: حشا تقول جني باكل بنتج هاي الزفته ..
عواش : شو دراني فيج اليهال يخافون منج ...
غاليه تأشر على نفسها: أنا حرااام عليج , وكملت بأحباط: مادري مع اني طيبه ووايد ووايهم يعني الطيب مافيه فايده في هذا الزمان ...
عواش أبتسمت : يالله خلينا نسير الصاله , عند خلوف ..
غاليه تأففف: وانتِ ليش ماتخبريني أنه ولد اختج هنيه..
عواش بستغراب: توا ياي , وانزين شو بيستوي أن ماخبرتج ...
غاليه: بطيح نصي .. هاهاهاهاهاهاهاهاها
عواش: لاضحكني ,يالله خلينا نسير ...
غاليه : أوكي ..
سارن غاليه وعواش مع بنتها , الصاله , كان خليفه يالس ويبدل في القنوات , ركضت نوف لحضن خليفه ويلست جدامه ويلس خليفه يبوسها ويحضنها ويلست عواش على يمينه و غاليه عدال عواش ...
حطت غاليه ريل على ريل ويلست تحركها بتوتر ... صدت صوبها عواش وقالت: تراج دورتي راسي من كثر ما تهزين ريلج ..
أنتبهت غاليه حق عمرها وقالت: أوووه سوري مدام ...
عواش: تتمصخرين حضرج...
غاليه: أفا أنا..
عواش: انزين شو بلاج متوتره , ليكون من .....
قاطعتها غاليه بسرعه وهي ترص عيونها بتهديد: لا فديتج ... لامتوتره ولاشي ..
أطالع خليفه بنص عينه غاليه وأبتسم بمكر, أنقهرت غاليه وخاطرها تعطيه بكس وتوطا في بطنه ...
ضحكة عواش وقالت: صدق أنكم تناسبون بعض..
أطالعتها غاليه بقهر: سيري لا...
أبتسم خليفه على الخفيف وقال : هزرج ..
أحمر ويه غاليه , وتفتفت وقالت: تستهبلون أنتوا هااا..
وراحت عنهم تفور من الغيض,يلست على الدري الوارني , بوزت ويلست تقول: أووف ليش عواش جي تيلس ترمس , صدق تقهرني , أوووف أفففف , قهر ... ياويلي أحس الحراره الي في
جسمي كلها يت في ويه أوووه , وحطت يدها على خدودها تبردهن ..
حست بحد ييلس عدالها وقال: أحم..
صدت صوبه وبوزت : أووف أنته شو تبا بعد..
تنهد خليفه وطالع جدامه وقال: انتِ ليش تكرهيني ...
اطالعته غاليه بصدمه وقالت: أنا ما أكرهك ..
أطالعها خليفه في عيونها وقال: بس تصرفاتج اكبر دليل ...
غاليه ببرأه: والله... ماكنت منتبهه ...
ركز في عيونها اكثر وقال: عن الاستهبال..
غاليه : ما أستهبل والله , توترت غاليه من نظراته وغطت ويها ,بيدها وقالت: لا اطالعني جي أنته توترني ..
ضحك خليفه: والله , عيل في أمل ...
خوزت يدها عن ويها ولقته يطالع جدامه وقالت: كيف يعني شي أمل , شو تقصد.؟؟..
صد صوبها وغمز : مالج خص ...
ضحكت وضربته على جتفه : اونك بعد تغمز انته ماتستحي عيببببببب..
رفع خليفه حاجب ونزل حاجب : لا والله وأنتِ أتحسبني أصغر عيالج تضربني على جتفي , عنبوه أستحي شوي أول شي انا ولد عمج وثاني شي ريال يمكن في يوم من الايام يأخذج ...
فجت غاليه عيونها على وسعهن : ها , أنت!!!
خليفه: هي ..
غاليه: لالالالالا ما أتخيل ...
خليفه : أقولج انا تخيلي ..
غاليه: ما أبا ..
خليفه: كيفج ...
غاليه بوزت: انته ليش تقولي ها الرمسه , يسد يدوه حاشرتني وتهددني , وبتم الا أفكر فيها بعددد..
خليفه أبتسم : تبين تعرفين ليش ...
غاليه ببرأه:هي ..
ياصوت من وراهم : هي وبعد ...
فزوا , لان عمهم خالد , واقف فوق رواسهم وقال: ماشاء الله الحبايب يالسين يسوالفون ..
غاليه أحمرت وخليفه توتر, وكأنهم مزخوخين بجرم, قال خليفه: والله ماشي خالد بس كنت أسوالف ويابنت العم شوي ..
خالد بمسخره: والله ...
غاليه قامت : هي شو فيها يعني ..
تقرب منها خالد: لامافيها شي, بس لو حد غيري شافكم شو بقول عنكم ...
غاليه ببرأه: عادي أخو وأخت يرمسون ...
خالد : حلوه , والله أنج بقره ... سيري يالله ...
غاليه تخصرت بضيق : لاوالله تحيد عمرك ثور...
زخها خالد من ذينها وقال: منو عيدي أنا شو يالله..
تألمت غاليه : خلاص , الشيخ خلود..
خوزها خالد عنه: خلود في عينج ...يالله سيري ..
سارت عنهم وقبل ماتدخل البيت , طلعت لسانها وحطت صبعها تحت عينها , اونها تعيب ...
ضحكوا عليها خالد وخليفه , يلس خالد حذال خليفه وأطالعه وحاس بوزه ..
خالد: صدق أنها بقره..
خليفه: حليلها , صدق أنها سوالف ...
خالد يهز راسه بأسف: صدق انك ماعندك سالفه , مادري شو تحب في هاي الخبله ..
خليفه أبتسم: تجنن خبالها يخبلبي...
خالد: ماشي مونه .. بس ياحسره ماتدريبك شكلها..
خليفه بحزن: الا ماعندها خبر ...
خالد أطالع خليفه بجد: أنزين أنته ليش ماتخطبها ..؟؟؟
خليفه أطالع فوق: أخاف ترفضني...
خالد بتفكير: شو دراك أنته أنها بترفضك يمكن ماترفضك..
خليفه: أحس أنها تعتبرني شرا أخوها , يعني تضربني بمصخره عادي عندها جني أخوها ...
ضحك خالد: حلف , الله يعينك بس... انته بس أدعي أنها تكون من نصيبك ...
خليفه: أمييين..
شوي فكر خالد: شو رأيك تقولها انك تحبها وتفك عمرك...
خليفه: ماأقدر ...
خالد: ليش ؟؟؟؟, جان تباني أخبرها حاضر ..
خليفه: لاتخبرها , بيي اليوم الي أخبرها فيه ...
خالد هز راسه : زين والله ...
خالد: يالله عيل , ندخل داخل ..
خليفه : يالله ...
دخلوا خليفه وخالد الصاله , لقوا غاليه منسدحه وحاطه على korea TV وأطالع دراما , تحنن خالد , أطلعته غاليه بأرف وردت أطالع التلفزيون ...
يا أيلس خالد عدالها وقال بصوت واطي: عيب قومي يلسي ماتستحين الريال هنيه ..
غاليه بعبط: أي ريال منو تقصد خلووف!!!
خالد يعيب عليها: خلوووف في عينج قومي..
غاليه بصوت عالي: اوووف مايرزاء عليه الا خلوف هذا ..
يلست غاليه غصبن عنها, وتأففت , لان الخدامه داخله بصحن أم علي , سارت غاليه صوبها وخذت الصحن وحطته على الطاوله , وخذت لها صحن صغير وحطت لها منها , ويلست تاكل...
خالد: أنتِ ماتعرفين الا تاكلين روحج مره ماتعزمين حد..
غاليه: نسييييييييييييت...
خالد: انتِ تذكرين شي أصلا..
غاليه: عن تاكلني أوووف منك...
خالد يقلدها: أووووف منك.. ما أقول غير على ويهج..
غاليه خذت نفس: اخبرك ليكون انته عديلتي وانا مادري...
خالد يستهبل: والله , حلفي أنتِ بس..
خليفه: بسكم ترا رفعتوا ضغطي...
غاليه: والله لاتخبر حد..
خليفه عصب: عن الاستهبال...
غاليه: والله محد قالك تدخل عرض..
خالد : أووووص صخوا ...
خليفه شل الرمونت بيبدل , صرخت غاليه : لا لاتبدل ...
خليفه : مادري شو تبين فيهم هذيله , أنا ما أبا أشوفهم ..
بدل خليفه , قامت غاليه معصب وقالت: أنا اتابع ها الدراما وأبا أشوفها غصبن عنك ... وقامت وقفت جدامه ومدت يدها وقالت: عطني احسن لك..
أطالعه خليفه بأحتقار: شو رايج تين تضربيني أحسن ..
غاليه بغياض: والله ..
خالد : غاليه شو ها التصرفات ؟؟؟
غاليه صدت صوبه: أنته ما تشوفه , ابا أطالع الدراما وهو يبدل ...
خالد: انزين نحنا مانبا نشوف ها الكوريين ...
غاليه: بس أنا أبا أشوف ...
خليفه بغياض: أثنين ضد واحد ماشي أمل ..
غاليه : خليفان عطني الرمونت أحسن لك..
خليفه: تخسيييين , وياويهج ريلج خليفان...
غاليه بضيق : يعني بالقوه ...
ضحكوا خالد وخليفه وقال خالد: اونه قوه ... قوة بن عروه ..
غاليه: تستهبلون حضركم ..
خليفه: هي نستهبل.. يالله قومي عن ويهي ..
خالد: يالله سمعي الكلام ...
غاليه بقهر : والله ما أخوز ...
خالد: أحسن لج سمعي الرمسه ولا والله لتندمين...
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك