رواية ارواح تسكن مشارق الشمس -13
دخلت معها الغرفة شغلت لها المكيف و غطتها مستغربة نومتها بدري حاسة ان عندها كلام بتقولة لكن بخاطرها ماتبى تسمع شي من احد تبى الكل ينام و تروح غرفتها تاخذ راحتها بالبكاء الصراخ أي شي تفرغ فيه القهر الي تحسه......
هند اطفئ النور جدتي خلاص ؟
مسكتها من يدها و جلستها جمبها ام محمد ما بتقولين لي ؟
هند اقولك ايش جدتي ؟
ام محمد وش تبي اخت رجلك منك ؟
هند جدتي هو لسى ما صار رجلي
ام محمد بيصير باذن الله لكن وش تبي منك و هي من طلعت وانتي خاطرك ماهو معجبني ؟
هند ماتبي شي تسولف معي بس
ام محمد وش هالسواليف الي غير لوحدكن ؟
هند تكلمني عن اخوهها وش يحب وش يكره و كذا
ام محمد والله يابنيتي اني ما ارتحت لها و لا لجيتها
هند ليش ؟
ام محمد قلبي يمه يقولي انها ناوية شر ماجات مع امها و اختها يوم خطبوك جايه الحين لوحدها تكلمك عن اخوها لو فيه شي كان جات من اول ماهو وهو مابقى على عرسكم شي الا تبي تشكك بنفسك يايمه زمان كانت الوحده فينا تتزوج وهي ماتعرف لا الرجال و لا اهله و مع القرب و العشرة تصير وحده من بناتهم
هند لا تشيلين همي جدتي انا تربيتك واعرف معادن الناس ام سعود حبيتها من قبل تفكر فيني لولددها واذا على سعود و حياتي معه خليها للايام.......
**********
الخبر
الساعة الـ 09:30 مساء
مجتمعين الشباب بالشقة على قولتهم اجتماع توديع العزوبية لسعود بين ضحكاتهم و ذكرياتهم مع بعض .
علي والله بشتاق لشقة جمعتنا ايام ياشباب
يوسف اقولك نخليها و تعال اسكن معي فيها منت راضي
علي وين يااخي تعرف ماقدر انام هنا و اهلي ماعندهم احد
يوسف ناصر بيسكن فوقهم يعني قريب منهم لاحتاجوه
علي خله ينبسط بحياته انا متعود على المسئولية
سيف المسئولية بيت و زوجة و عيال مهي كلام وبس
علي تكلم ابو عشرة عيال
يوسف هههههههه الا عشرين
سيف تطنزون والله كنت مفكر العيال بلحظة يجون لا تعب و لا هم بس الحين قلت للاهل مابي الا بعد خمس سنين
سعود حرام عليك الاطفال زينة الحياة بعدين هو لسى في بطن امه و تشكى منه اجل لاطلع وش بتقول .؟
سيف الله يعين بكرة بتجرب مواعيد مستشفى والاغراض الي تجهز و الغرفة كلها بنتظارة
سعود الله يحفضه و يصلحه لك
سيف امين
علي اقول ياسعود انت خلصت كل اغراضك ناقص لك شي محتاج شي ؟
سعود لا والله تسلم مخلص كل شي
علي والشقة استاجرة خلاص ؟
سعود ايه من يومين
يوسف الولد مخلص من بدري عشان يرتاح
سعود لا والله بس صراحة اعتبرة اسرع زواج في التاريخ الحمدلله كل شي ربك سهله بسرعه
يوسف بس باقي المطار و تقلع نحو حياه جديده
سعود ههههههههههه وانتم معي على متن الرحلة
يوسف ههههههههههه ايه والله بشم هواء قبل يوم السبت
علي هههههههههههه وتجي الاربعاء محترق من الشمس
سيف هههههههه بس لا تصور مع اختك الخميس
يوسف ههههههههههههههههه لا بناجل التصوير للعرس مافي تصوير بالملكة بلغ ناصر يا علي ............
جده
الساعة الـ10:00 مساء
باصابع مرتعشه ضغطت على الارقام جهلها للي على الطرف الاخر مقلقها يمكن تكون فعلا انطوائية و شرانيه مثل ما سمعت عنها و ما تعطيها فرصة تتكلم
ام عزام السلام عليكم
وعليكم السلام
ام عزام بارتباك كيف الحال ؟
من معي ؟
ام عزام انتي الخاله نورة ؟
نورة ايه انا نورة من انتي يا حرمه ؟
ام عزام انا وحده تبيك تساعدينها
نورة اساعدها بشو انا وحده كبيرة بالسن و على باب الله
ام عزام و هي تتصنع البكاء بس اخوي انظلم و الي ظلمته محد يقدر عليها الا انتي تكفين يا خالة ساعديه
نورة و من الي ظلمته ذي ؟
ام عزام هند بنت زوجك
نورة ايه هذي طالعه لجدتها ظلمتني قبل و خلت محمد يتزوج علي و مارضت بحكم ربها على ولدها
ام عزام و شلون ؟
نورة الله ما كتب له يجيب عيال راحت زوجته حرمه الله العالم من وين جابت لهم هالعيال
ام عزام معقول بس هم يقولون انك انتي الي ماتخلفين ماهو ابو نواف
نورة هذا جزاي الي صبرت على ولدها و ما قلت له تعالج رموا بلواه علي وزوجته وحده سحرته و غيبت عقله
ام عزام والله و طلعتي يا نورة نذله بجد حتى اهلك متبرين منك و من فعلتك الي الكل يعرفها و انتي مسويه فيها انك البريئة المظلومة بس يالله يقولون اذا لك شي عند الكلب قله حبيبي الله عليها الي ما تخاف ربها ما اكتفت بك جايه هي و هند الحين يضحكون على امي و يسحرونها عشان هند تتزوج اخوي المسكين
نورة بابتسامة خبث هند بتزوج بعد ما تطلقت ؟
ام عزام شفتي كيف بيزوجونها لاخوي و هي مطلقة و هو ما قدر يفتح فمه تخيلي ماعمرة تزوج ياخذ مطلقة
نورة بس الي بيتزوج هند متزوج قبل و مطلق
هذي وش عرفها ام عزام هااااه انتي تعرفين انها بتتزوج ؟
نورة و هذا يوم سعدي ان هند تزوج لا و بتروح الشرقية عز الطلب
ام عزام ليش ؟
نورة وانتي داقه عشان تعرفين وش بستفيد من زواجها و الا انتي ما تبينها لاخوك تراني اعرف كل صغيرة و كبيرة عنك يا ام عزام و اعرف انك السبب بطلاق بنت عمك لكن بقولك ترى هند ما تقوين عليها بس وخري من طريق زواجها و خليه يمر و الا ترى بياصلك الي مني يفهمك كلامي.....
الجزء الثاني و الثلاثون
الخميس
جده
الساعة الــ 04:00 عصرا
ابتسم و هو يخلص كتابة اسمه و يوقع قدامه خلاص من هالحظة هند صارت ملكه لوحده يحس بالارتياح لمجرد ان بيجمعهم سقف واحد بعد ساعات بفكرة مجنونه ( ياليت هنوده تبطل من الروحه للاستراحه و تمشي معي هالحين البيت ابي ارتاح و هي جمبي )
نواف مبروك يالله بروح اجيب توقيع المدام لك
سعود أي والله تكفى
يوسف ههههههه أي الرجال مستعجل
سعود خلك ساكت انت بس
يوسف اقولك ترى انا شاهد على زواجك لا تخليني اسحب شهادتي
سعود مره وقف زواجي عليك اجيب لي عامل من الشارع يشهد و لا تذلني بشهادتك
يوسف ههههههه روح روح يا نواف لا يذبحنا الاخ هنا
فهد خلك نواف انا اوديها
نواف وهو يمد له الدفتر و يغمز ليوسف بس تاكد من موافقتها قبل توقع
فهد ابشر>>>>>>> وراح بطريقه
فارس مبروك ياخالي و يارب عقبالي
سعود الله يبارك فيك بقول امين بس عشان ارتاح منك
فارس افى كل هدا عشان معاد اجي البيت عند جدتي
سعود ههههههههههه ابي ارتاح في بيتي حرام يعني
يوسف لا الاخ بايعنى كلنا اليوم
سعود هههههههه و بلاش الا وين سيف و علي ما جبتهم معك ؟
يوسف بيجون المغرب الاستراحة ما ناموا بدري امس طلعت و هم نائمين
دخل بهالحظة فهد و على وجهه ابتسامه انعكست بالرضى و الراحة على وجه سعود مبروك سعود ......
,,,,,,,,,,
جده
الساعة الـ 05:30 مساء
طلع من الحمام ( اكرمكم الله ) بعد ما اخذ له شور جدد فيه نشاطه راسه هالايام مليان بالافكار مسئولية اخواته و زواج اخوه و الاهم صحة امه ما عنده وقت لنفسه ابد ...
سيف نعيما
علي انعم الله عليك ماجاء يوسف ؟
سيف لا اتصلت عليه يقول نص ساعه و بيجي
علي ملك سعود خلاص ؟
سيف ايه من زمان يقول يوسف فضحنا شوي و يقولهم باخذ البنت خلاص معي
علي هههههه الله يهنيه سعود يستاهل كل خير والله
سيف أي والله يستاهل
علي عقبال ما انفرح بيوسف
سيف و انت كمان و الا ناسي نفسك
علي لا انا زواجي مطول شوي
سيف مدري وش عندك منت راضي تزوج و تريح نفسك ؟
علي اذا الله كتب
سيف ميؤس منك انت تغير الي بر اسك قم بس حلق و البس خل يجي يوسف و نحن جاهزين
علي و هو يمسح ذقنه بيده لا مني محلق بطلق لحيتي انا
سيف تتكلم جد ؟
علي أي والله
سيف الله يثبتك .......
,,,,,,,,,,,,,
الخبر
الساعة الـ 06:30 مساء
جالسه و هي سرحانه خطبتها جت بسرعه و الاسرع ملكتها الي بعد اسبوع و زواجها الي تحدد بالصيف بعد زواج اختها باسبوعين يعني وش تلحق عليه اغراضها و الا تساعد اختها و الا تفكر بالشخص الي عمرها ما شافته و بتعيش معه .
ساره منار وين و صلتي ؟
منار السوق وش بيخلص لي اغراضه .؟
امل لا تذكريني و ابشرك الاسبوع الجاي كله يوسف طالع عمل يعني احلمي احمد او عبدالعزيز يجيبون لك لو الشموع
منار لا انا الشموع لسى ما اخذتها للملكه
ساره عادي يوديكم بكرة
امل هو اصلا بجده وبيجي بكره متاخر ما يمديه راح يحضر عرس سعود
منار دنيا صغيرة الان يوسف بيرجع للبيت مثل ما كنى نحلم و حنا الي بنترك له البيت مره وحده
امل يارب يشوف سعود تزوج و يطيح الي براسه و يتزوج
ساره بقلب مقبوض صح هو ليش ما يبى يتزوج ؟
منار كان يقول ابي اتزوج لتطمئنة عليك انتي و امل و الان قال يفكر يتزوج بس تعرفين امي و ابوي كل واحد حالف عليه يتزوج على اختياره و هو ما تكلم سكر السالفه اصلا
امل تلمح هو اصلا بباله وحده بس ما هو راضي يقولها
بلعت ساره ريقها متاكده يمكن بس هو ما يبي يتزوج الان ؟
امل بذكاء لا متاكده من يسمع اسمها بس يسطل و قبل فترة رتبت له غرفته و شفت كرت مكتوب بخطها
منار ببراه اوف امل تعرفين خطها لا تكون من العنود تكفين لا تقولين
ساره من العنود ؟
امل العنود بنت عمي ابوي يبيه يتزوجها و هو مدري وش رايه فيها بس الخط لا مو للعنود
منار طيب لمن قولي اثرتي فضولي من ذي الي تحب يوسف و يوسف يحبها ؟
امل لا ماابي اقول لانها اصلا كاتبه اسمها اخر الرساله اذا جت فرصه خليتك تقرينها او نواجه يوسف
ساره كانت متاكده ان امل تتكلم عنها بروح اجيب لكم الشاهي
امل و مويه الله يسعدك
ساره ابشري
بعد ماتاكدة انها طلعت و معاد تسمعها امل كفك شفتي وجهها كيف صار لونه ؟
منار والله اخاف يذبحنا يوسف على هالحركات وحنا ما استمتعنا بحياتنا
امل هههههه الا بيشكرنا بس المشكلة بالفقره باء من الخطه .......
,,,,,,,,,,,,,,,
جده
الساعة الـ 10:30 مساء
همهماتهم باذنها تذبحها نظرات ام عزام الي باين فيها الشماته و ان نهايتها الطلاق مثل زواجها الاول دارت بعيونها بالحظور امها و جدتها و اختها هي الوجوه الوحيده الحاضرة من اهلها و الوجوه الي بتفقدها من تطلع من هنا ابتسمت لسحر الي جت قدمت لها هديه
سحر مبروك هنوده ترى ما اوصيك على خالي طول عمره متغرب اخيرا جات الي تؤنسه
هند يبارك فيك ان شاء الله
طلع الكل يبارك و يهني و يقدم لهند هدايه كانت معهم جسد بلا روح عقلها و تفكيرها كله في الكلام الي سمعته و النظرات الي تشوفها من الحظور و ردت فعل سعود لوضعها بعد ساعات تبي تهرب من كل هذا و تروح غرفتها تحضن مخدتها و تبكي عليها تنسى هموم قلبها و تغسلها بدموعها
قطع عليها صوت ام فارس و رجعها للواقع يالله يا هند سعود ينتظرك بالسيارة و كملت كلامها لسحر هاتي عباية هند خالك مستعجل
سحر ان شاء الله يمه.......
************
الخبر
الساعة الـ 10:45 مساء
من طلوا من عندها بنات خالتها و هي هذي حالتها حابسة نفسها في الغرفه و تصيح (( معقول امل تقصدني انا هي تعرف خطي اكيد انا مافي وحده عرفها يوسف من القرايب الا انا اكيد قال لهم عني و طحت من عينهم و بيتزوج بنت عمه ..... كانت تلؤم في نفسها و مشاعرها الي ما قدرت تتحكم فيها صحيح لما كلمت يوسف مافكرت بعلاقة حب تنتهي بالزواج لكن صعب على القلب يشوف الشخص الي يحبه مع انسانه غيرها يضحك و يسولف مبسوط بحياته بس هالمرة خلاص قررت تنساه و تتمنى له السعاده مع البنت الي اختارها يوسف يستاهل حتى لما ابتعد عنها ما سبب لها أي اذى و لا خبر اهلها عن فعلتها .....
*************
جده
الساعة الـ 11:35 مساء
تحس بالاختناق من طلعت السيارة لين وصلت البيت و سعود كان يتكلم مع نواف و لا هم معترفين بوجودها جلست على طرف السرير و هي تشوفه يعلق بشته و شماغه و قرب يجلس جمبها ابتسم لها ( في داخله مرتبك و فرحان ما هو مصدق ان هند صارت ملكه لوحده بخاطرة كلام يبي يقوله كثير بس ماهو عارف من وين يبدا )
سعود مبروك هنوده
هند بهمس الله يبارك فيك
سعود حس براحه من سمع صوتها ما في مبروك لي انا بعد و الا ما استاهلها ؟
هند برتباك مبروك
حس بالارتباك بصوتها فما حب يضغط عليها و فكر يخليها تاخذ راحتها بالغرفه شوي لين تتاقلم على الجو الله يبارك فيك زين انا اخليك ترتاحين و تبدلين بالغرفه و هو يوقف انا برى بالصالة لو احتجتي شي
( هالحظة كل شي قدام هند تسكر بعيونها تذكرت اول لليله لها مع سلمان و شلون تركها لوحدها نفس السيناريو ينعاد تذكرت بعدها و غربتها و الالم الي حسته و الي ينتظرها تذكرت كلام ام عزام وان سعود مغصوب يتزوجها و نهايتها الطلاق للمرة الثانيه شافت قدام عيونها ملامح لاشخاص ماتعرفهم و اصواتهم باذنها سعود يتزوج مطلقه معقول؟ سعود شكل عنده مشكله في الانجاب و الا ما طلق بنت عمه و من تزوجة غيره حملت ؟ كلامهم يرجع صداه بعقلها يجبرها على التفكير في مصيرها للمره الثانيه بلا وعي نزلت دموعها مثل الشلال على وجهها محتاجه تبكي )
بهت من ردت فعلها و منظرها كان يظنها بترد بطيب او حاضر لكن تنفجر كذا بالبكاء رجع جلس جمبها ومسك يدها يضغط عليها كانت يدها صغيرة بالمقارنه مع يده ضمها بقوة بين اصابعه هنوده بسم الله عليك وش فيك ؟
ما كانت تقدر ترد بس صوت شهقاتها بداء يرتفع و يخلي سعود يقلق اكثر فيك شي طيب ردي تعبانه شي يعورك ؟
كل شي يعورني كل شي متعبني و اولهم انت و حياتي معاك كانت تبي تنطقها بس لسانها ما اسعفها هزت راسها بمعنى لا و غطت و جهها بيدينها و كملت شهيق و بكاء
محتار و ما هو عارف وش فيها او وش يسوي معها و هي بهالحالة سحبها لحضنه و ضمها بقوة لصدره و هو يمسح على راسها خلاص اووص اهدي هالحين لا تقولين شي تعوذي من ابليس بس
هذا الي كانت محتاجته هند حد يضمها وقت ضيقتها تمسكت فيه اكثر و دفنت راسها بحضنه و غفت على صدره......
بعد مرور ساعتين
الوضع ما كان مريح لا له و لا لها حست بعضلات رقبتها بدت تتشنج بس المشكله شلون ترفعها من على صدره متاكده ان وجهها صاير خريطة الوان من المكياج و الاحراج ماتدري كم مر من الوقت عليها و هي على وضعها و سعود مخليها على راحتها سحبت نفس عميق و نادته بهمس سعود
كان صاحي من اول و يتامل فيها احساسه انها مغصوبه عليه بداء يسيطر على عقله و بكاءها كان مجرد ردت فعل على وجوده معها هلا صحيتي ؟
هند و على نفس وضعيتها بحضنه غمض عيونك
استغرب طلبها ليش ؟
هند خلاص غمضها و لا تفتح لين اقولك
سعود طيب هااه غمضتها
هند تاكد احلف انك ما تشوف
سعود والله ما اشوف
رفعت جسمها عن صدره و بلمح البصر سمع سعود صوت باب الحمام يتسكر فتح عيونه و ضحك على هند و خريطة الالوان الي بثوبه رفع صوت ضحكته لها ههههههههههههه طيب و بعدين كيف بتطلعين من الحمام ترى ما معك ملابس .
,,,,,,,,,,,,,
هلا وغلا منورين القصــــه
الجزء الثالث و الثلاثون
جزء
الجمعة
الساعة الـ 05:16 فجرا
انتفض في مكانه مو معقول الي يشوفه قدامه فتح النور يحاول يكذب عيونه بس بدون فائدة التفت لها و سحبها من كتفها بقوة لين صار و جهها بوجهه انتي مو كنتي متزوجه وش مسويه بعمرك ؟
هذا الي كانت تخافه ردت فعله وش بتكون هند الا بس......واختنقت بالدموع
سعود حس بالدم يثور بعروقه كيف متزوجه قبل و هي الان قدامه عذراء رفع صوته بغضب و هو يضغط على كتفها بس ايش ؟
هند ما صار بينا شي والله
ارتخت عضلاته و حس بالقهر كيف تعيش مع واحد شهرين بدون مايلمسها سعود النذل و ليش كان متزوجك دامه مايبيك ؟
هند مدري عنه مدري شي ما كان يتكلم معي
سعود و ينام معك بنفس الغرفه ؟
هند لا انا انام لوحدي
سعود بقهر النذل قسم بالله ما هو رجال متزوجك و مخليك كذا
هند يمكن ما يبيني مدري عنه
سعود بغيظ ما يبيك يقول قبل يتزوج ما هو يتزوجك و يطلقك وانتي بكر لسى اهلك يدرون ؟
هند بقلق لا سعود الله يخليك لا تقولهم كفايه مشاكل ابوي لهم ما ابي ازيدهم
سعود و لا حتى امك ماتدري ؟
هند بحزن هي اكثر وحده ماابيها تدري
سعود و هو ما حاول معك بشي وانتي رفضتي ؟
هند لا
سعود ما حاولتي طيب انتي تغريه ؟
فوق الالم الي بكتفها حست بطعنه بقلبها اغريه ! يعني افرض نفسي عليه فوق انه مغصوب علي مستحيل الي مايبيني مره مابيه الف سحبت الروب و نطقتها بكبرياء ما هي هند الي تفرض نفسها على رجال .. و كملت طريقها للحمام بدون ما تنتظر رد سعود......
********
جده
الساعة الـ 08:00 صباحا
غطتها و طلعت من الغرفه من رجعت امس و هي تبكي و تبي هند ترجع و مارضت تنام الا مع جدتها في الغرفه
ام نواف نامت ؟
ام محمد ايه يمه خلاص انتي روحي نامي لك كم ساعة اكيد هند بتمرنا قبل تروح لا تخلينها تشوفك تعبانه
ام نواف و انتي كمان خالتي نامي لك شوي منال ما خلتك تنامين زين
ام محمد ايه انا برجع امدد عندها هالحين
ام نواف الله يخليك لنا يا خالتي والله من غيرك مدري وش اسوي
ام محمد و يخليك يا بنيتي انتي مرة الغالي و هذولا عياله ....
********
الخبر
الساعة الـ 09:00 صباحا
هذي فرصتهم الوحيده صاحين من بدري عشان هذي اللحظة ابوهم جالس بالصالة لوحده و امهم لسى نائمه
امل جاهزة لنفيذ الفقرة باء .؟
منار جاهزة
امل الحقيني
دخلوا على ابوهم الصالة سلموا و جلسوا معه
امل افطرت يبه و الا احط لك فطور ؟
ابو احمد افطرت مع امكم من بدري الا انتن وش مصحيكن بدري مهي عادتكن ؟
امل افى يبه يعني مره مانقوم بدري حنا
منار بعدين حنا اصلا نبي نجلس معك من زمان ما تكلمنا لوحدنا معك
ابو احمد ايه والله من زمان ما بغيتن مني شي
منار هههههههه يعني انت فاهم بناتك يبه ؟
امل زين يبه انت اختصرت لنا الطريق حنا نبي منك شي هالمرة بس اسمعنا للخير و افهمنا
ابو احمد ايه قولن
امل يبه انت تعرف اني و منار خلاص كلها ثلاث شهور و بنترك هالبيت
ابو احمد ايه والله نصيبكن جاء مره وحده يا بناتي الله يسعدكن و يسر امركم بيفضى علينا البيت
منار و هذا الي ما هو مخلينا نرتاح يبه انت و امي بتجلسون لوحدكم من بيهتم فيكم و يسال عنكم
ابو احمد لنا رب يا بناتي انا و امكم قادرين نشيل انفسنا المهم انتن تسعدن بحياتكن
امل يبه انا بروح الرياض و طلال ما بينزلني لكم على طول يمكن شهور تمر ما اشوفكم و منار صح قريبه منكم بس بتنشغل بحياتها و مستحيل تجيكم كل يوم
ابو احمد الله كريم يبه لا تفكرن انتن بشي هالحين الا حياتكن
منار يبه بس حنا نبي نتطمئن عليكم قبل نتزوج
ابو احمد و كيف ؟
منار نزوج يوسف و يعيش معكم
امل و كذا نتطمئن ان زوجته ما بتقصر فيكم
ابو احمد و اخوكن يوافق يتزوج هو الي ما هو راضي و الا بنت عمه جاهزة الليله اروح اكلم عمكن
امل يعني انت ما كلمت عمي انك تبى بنته ليوسف و لا لمحة له ؟
ابو احمد لا ما كلمته اخوكن ما يحشم بكره بعد ما احدد كل شي يقول ما عاد ابيها وين اودي وجهي من اخوي
منار بصراحه يبه العنود اعرفها مستحيل توافق تعيش معكم بالبيت بتقعد تقول تبي بيت لوحدها
امل العنود بنت عمي و حنا نحبها مثل اختنا لكنها ما تصلح ليوسف و لا لكم شف اختها من تزوجة عبدالعزيز سرنا ما عاد نشوفه الا بالمناسبات
ابو احمد ومن بتزوجنه انتن ؟
لحظة الصفر امل ساره بنت خالتي
ابو احمد ايه و امكن الي مرسلتكن علي ؟
منار لا يبه والله لا امي و لا يوسف يعرفون بشي
امل يبه ساره هي الوحيده الي نامنها عليكم و نقدر نعيش حياتنا و حنا مطمنين تذكر يوم كنا صغار كنت تقول ان عندك ثلاث بنات انا و منار و ساره هي لين هالحين بنتك
منار يبه لا تردنا هذا اخر طلب لنا في هالبيت خلنا نروح بيوتنا راضين مطمنيئن
ابو احمد مدام انكن تبنها ما اردكن بس ما اني رايح لابوها الا بعد ما يجيني اخوكن بنفسه يقولي انه يبيها
امل و منار قاموا و سلموا على راس ابوهم تبشر يبه .....
******
جده
الساعة الـ 10:00 صباحا
فتحت عيونها بكسل تاملت السقف قدامها لثواني و شريط الامس يرجع قدام عيونها من طلعت من الحمام امس ما تكلمت مع سعود الي حصلته نائم غطته و استسلمت هي بعد لنوم التفتت بهدوء تبي تتامله تطبع ملامحه في عقلها لكنه ما كان موجود في فراشه .. وين راح هذا الصبح ؟
قامت من مكانها بدلت و طلعت من الغرفه ما كانت تشوف أي احد حتى الانوار مطفيه و كان الدور كله مهجور الا هالغرفه .
( بخاطرها يا مخك يا هند اكيد الدور هذا بس لي انا و سعود و خالتي تحت خل انزل عندها اشوفها يمكن سعود جالس معها )
رجعت الغرفه و اخذت لها شيله احتياط حطتها على كتوفها و نزلت مع الدرج
شافت يأتي طالعه بوجها هند ماما صاحي ؟
يأتي يس في صاله
هند مستر سعود معها ؟
يأتي لا ما يشوف مستر سعود ينزل
هند طيب انا يروح عند ماما يشوف
يأتي سوي فطور ؟
هند لا شكرا
كملت هند طريقها لصاله و بالها تفكر وين طلع سعود من بدري كذا السلام عليكم يمه
ام سعود الي فرحة بشوفة هند و بكلمة يمه منها و عليكم السلام هلا يمه
هند كيف اصبحتي اليوم عسى ما تعبتي امس ؟
ام سعود لا الحمدلله الا نمت وانا مرتاحه لراحتكم يمه
هند الله يخليك لنا يمه
ام سعود عسى انتي ارتحتي يمه ببيتك الجديد و نمتي زين ؟
هند ايه يمه نمت زين
ام سعود و وينه رجلك ما نزل معك لسى نائم ؟
انا جايه اسالك عنه هند والله يمه صحيت و ما حصلته توقعته نزل عندك و نزلت
ام سعود لا والله يمه ما شفته انا صاحيه من بدري و جالسه هنا اتصلتي عليه طيب ؟
هند ما اعرفه رقمه ؟
ام سعود و هي تاخذ جوالها زين يمه انا ادق عليه تلقينه طلع له مشوار و الا شي
هند يمكن
دقت ام سعود على جواله لكنه طلع مقفل مسكره
هند ما تبي تقلقها ايه امس ما كان جواله في بطاريه اكيد تقفل
ام سعود رفعت صوتها تنادي على يأتي يأتي
يأتي نعم ماما
ام سعود شوفي سيارة حق فارس فيه ؟
يأتي انا اول يطلع ما في سياره يفكر مستر فارس ياخذ
هند هو فارس ينام هنا ؟
ام سعود لا يمه امس ما نام هنا بس هو خلى سيارته لخاله عشان سعود خلى سيارته بالشرقيه
هند زين انا سمعته امس يقول لنواف ان اصحابه من الشرقيه هنا حضروا امس اكيد راح عندهم
ام سعود بابتسامه ايه كانه راح عند يوسف انسيه ترى محد بيشارك في سعود كثره ........
,,,,,,,,,,,,,
جده
الساعة الـ 10:30 صباحا
اليوم يسكنه نشاط من الصبح دخل المطبخ و جهز الفطور له و لشباب الي صحاهم من بدري بدون اعتراض و كانهم بيستمتعون باخر ساعات لهم في جده.
علي يالله يوسف خلصت الشاهي ؟
يوسف ايه خلاص جهز
علي وهو يطلع جيبه و تعال الصالة عند سيف
يوسف يالله جاي
طلع الصالة عند سيف و جلس جمبه بسم الله
سيف امم ريحة الشاهي تعدل المزاج
يوسف من صنع يدي عاد
علي الله يعين سعود بيفقد هالمزاج كان متعود عليه
سيف ههههه بيحصل شي احسن اكيد
يوسف ايه تكلم الخبير
علي والله اني مبسوط و انا اشوف سعود امس حسيته مستانس الله يكمل له على خير و يسعده
يوسف أي والله وجهه امس احسن من زواجه الاول بكثير
علي الدور عليك الحين
يوسف و ليه ماانت قبلي ؟
علي خلني اشوفك معرس اول و بعدك انا
سيف الظاهر تبي تجمع خبرتنا الاربعه يا علي و بعدين تتزوج
علي هههههههه تقدر تقول.......
**********
جده
الساعة الـ 11:15 صباحا
خلاص القلق بداء يسيطر عليها و خوفها على خالتها من ارتفاع الضغط و تتعب و هي محد عندها تتصرف هند بخاطرها ( وش هالامبالاه عند هالانسان في حد يطلع صباحية زواجه بهالطريقة و يقفل جواله طيب اقلها كتب لي ورقة انه بيطلع يا ربي وش اسوي هالحين انا ) قطع عليها صوته يدخل
يتبع ,,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك