رواية ارواح تسكن مشارق الشمس -12
مافيها تسمح لها تكشف سر البنت عند أخوها و هي لسى ما وافقت عليه لازم تعرف حدودها و تفهم مشاعر الناس ..
بس و أن سمعتك تكلمتي في هند و الا أهلها و الله بغضبي عليك
أم عزام يعني انتي تعرفين يمه
أم سعود ايه اعرف و ما اني ناقصة تجين أنتي تسالين و تخبرينا انا اعرف كل شي عن البنت و اهلها بس هي ما وافقت
على اخوك عشان يعرف سرهم اليوم الي توافق ذاك اليوم انا اقوله كل شي بنفسي
سعو و هو حاس انه مثل الاطرش في الزفة بينهم زين يمه بس اهم شي هدي نفسك لا تزعلين تكفين و كل الي تبينه يصير
.......
,,,,,,,,,
الخبر
الساعة الـ 05:30 مساء
طلع من غرفته على صوت التلفون الي ازعجه و محد راضي يرد عليه يوسف بخاطرة اووف محد يسمع و يرد
على التلفون نادى على منار و أمل بس محد رد عليه رفع الخط بسرعه و كان بيتكلم لكن صوتها جاه اول
الوو السلام عليكم
كان بيرد لكن لسانه ثقل و حس انه مخنوق مشتاق لصوتها من اكثر من شهرين ما سمعه اشتاق لضحكتها و همستها
اشتاق لاسمه ينطق به لسانها
الوو
قطع عليه صوتها مرة ثانية و رجعه للواقع يوسف وعليكم السلام هلا
بالطرف الثاني كل شي فيها تجمد هي مشتاقة لصوته و تتمنى تسمعه لكن ما توقعت القدر يحكم بينهم كذا اختلطة
بها الدمعة و البسمة تمنة تقفل الخط بدون ماترد بس شو بيقول عنها احسن شي تحط نفسها طبيعية و كانها ما عرفته
ساره امل موجودة ؟
يوسف كيفك ؟
ساره بتردد بخير
يوسف ما في كيفك انت ؟
هذا وش سالفته ليش يبي يعذبني _______ <<< لا رد
يوسف فهم انها ما تبي منه اي شي و لا تبى تسمع اخبارة او اي شي عنه حس بالقهر على نفسه و مشاعرة تجاهها
شاف منار طالعة من غرفتها وحس انها المنقذ الوحيد له رفع صوته لجل يسمعها و يبين لها انها معاد تهمه مثل ما
هو ما عاد يهمها منار تعالي تلفون لكم
منار مين ؟
يوسف وحدة ما اعرفها
بالجهة الثانية ساره حست انها خلاص ما تسوى شي لهدرجة محتقرني و يقول ما يعرفني و انا الغبية لسى احبه
و اشتاق له .......
جده
الساعة الـ 12:00 صباحا
انتصف الليل و كل القلوب سكنت مع أحبابها و عشاقها الا قلبين في سماء جده تحوم تعلمت تعشق بس تنسى مشاعرها
تعلمت تتمنى بس تأجل امانيها تعلمت تعطي و ما تنتظر تاخذ ابد ..
اتقلب في فراشة و هو يتذكر كلام امه و اخته اليوم فيه شي مخبينه عليه بخصوص ابو هند هند صارت تهمه من
اليوم الي قابلها عند المركز و عيونها ما فارقت خيالة صار يحس انها قريبة من روحه و كانها قطعة من قلبه
يترى وش مخبية ذيك العيون من حزن اكيد ما هي مرتاحة بحياتها بس سالفة ابوها لازم تعرفها يا سعود لازم بس
كيف ؟
تتقلب في فراشها و خيال سعود ما هو راضي يفارق عيونها هي شافته مرة وحده بس ملامحه انطبعت بذاكرتها
و كانها تعرفه من زمان هند صار كل تفكيرها سعود اليتيم تربى بدون اب لكنه صار عن الف رجال قدر ينجح بأخلاقه
بدراسته و عمله و الاهم رضى امه عليه فقد ابوه بالموت و هي فقدت ابوها بالانانية و الظلم
ياترى كيف بتكون حياتي معه و الا كيف بيعاملني ؟
و الا احسن شي اقول بكرة لجدتي اني ما اني موافقة افضل حل ......!
,,,,,,,,,,,,,,,,
الخميس
جده
الساعة الـ 05:30 عصرا
جالسين بالمجلس مع بعض إحساسة من أول ما دخل هالبيت أن في شي يربطة بأهل البيت نواف و فهد كانوا جالسين
معه و رحبوا فيه ببيتهم و أستقبلوه بكل أحترام .
سعود وش ناوي تتخص يا نواف ؟
نواف بأذن الله هندسة بترول
سعود مثلي يعني الله يوفقك
نواف امين و يعنى على غربة الشرقية شكل الدوام ما غير فيها
سعود هو من ناحية الوظيفة اول شي لازم هناك لكن لو لك حظ ينقلونك هنا ينبع و الغربة عاد معاد عندك هذا
انا و اختك بنكون هناك و بكرة تتزوج و تعيش هناك
نواف قول الله يعينك انت على صياح أختي ما اظن تتقبل الشرقية بسرعه
سعود الله يعين
لحظة صمت و انظار توجهة ناحية باب المجلس تطالع المخلوق الي دخل و هو يطالع بعيونه في وجيه الجالسين و كانه
يدور على شي قربت منه و حطة وجهها قدامه انت سعود ؟
سعود ابتسم لها ايه انا سعود و من انتي يا حلوة؟
منال
اخذها سعود و جلسها بحضنه الله حلو اسمك
منال انت بتاخذ هند معاك بعيد ؟
سعود ما هو بعيد مرة بروح عند نواف
منال بالطيارة ؟
سعود ايه
منال يعني مااشوفها كل يوم ؟
سعود لو تبين تشوفينها تعالي عندنا بس بعد المدرسة وانا اسوي لك غرفة لوحدك
منال لا انا بجلس مع جدتي و أمي عشان ما يجلسون لوحدهم بس انت جيبها عندنا على طول
سعود ابشري بس كذا
منال كمان لا تصيحها زي سلمان انا ما احبه لانه صيح هند
سعود حس بطعنه بقلبة بس لمجرد انه تخيل ذيك العيون تدمع ماراح اصيحها اوعدك و لو صيحتها تعالي انتي
صيحيني ...
,,,,,,,,,,,,,
الخبر
الساعة الـ 06:30
اخذ جاكيته و طلع من الغرفة مواعد علي و سيف الي طلع من صومعته على قوله وصار يخرج معهم و السبب تعب
زوجته من الحمل و كل وقتها صار ببيت اهلها نزل مع الدرج و شاف اخوة احمد جالس بالصالة لوحدة قرب منه
وسلم عليه يوسف وين الناس ليش جالس لوحدك ؟
احمد طالع اصلا ابوي طلع المسجد و كنت جالس مع امي و البنات بس جوهم ضيوف و راحوا
يوسف من جاهم ؟
احمد اظن خالتي ام عبدالرحمن
يوسف حس بنغزة بقلبة طول الفترة الماضية وهو يتهرب من خالته و لا يبي يشوفها و يحس بالخيانة تجاهها
زين انا طالع مع الشباب و .....
بس صوت منار ما سمح له يكمل يا شباب خالتي بتسلم عليكم
اخر شي تمناه وهو يشوفها تدخل و تسلم على احمد قبله تمنى يهرب قبل يشوفها لكن وين يا يوسف هلا خالتي
ام عبدالرحمن هلا بالقاطع الي ما ينشاف بقول اخوانك عندهم بيوت و عيال يشغلونهم لكن انت وش عندك ما
تمرني و طريق شغلك على بيتي رايح جاي
ام احمد والله ماعنده شي وانا اختك غير الفضاوة الي بسنه عيالهم بالمدارس
يوسف الله يسامحك يمه يعني شايفتني شايب بتزوجوني قبل امشي على ثلاث
احمد امي معها حق الي بسنك الحين متزوجين وانت لا
ام عبد الرحمن يوسف هذا زي ولدي خلوه على راحته لبغى يتزوج يقولي وانا اخطب له البنت الي يتمناها
يوسف والله ما استاهل هذا منك يا خالة لو تدرين وش مسوي الله يخليك يا خالة ايه هذي الناس الي تفهم
ام احمد يعني حنا الي ما نفهم عشان نقولك تزوج
يوسف وهو يوقف محشومة يأم احمد يالله استاذنكم انا مواعد الشباب
منار لا تطلع من هنا روح من باب المطبخ
يوسف ليش ؟
منار امل و سارة طلعوا في الحوش
ام عبدالرحمن وليش يمه يطلعن برد برى ؟
منار مدري ساره تقول ما تقدر تتنفس وطلعوا برى
ام عبدالرحمن والله يا هذي البنت معاد ادري وش فيها من طيحتها برمضان وهي هذا حالها لا تطلع و لا تاكل
وبس تقول مكتوم نفسها
لا تقولين يا خالة لو تدرين قد ايش هالكلام يذبحني و يحسسني بالذنب بس وش بيدي بنتك كرهتني خلاص معاد
تتقبل مني شي ....
,,,,,,,,,,,,
جده
الساعة الـ 08:00 مساء
حاس انه انجز كل شي اليوم بيسعده و يرضي امه عليه البسمة الي شافها مرسومة بوجها لما هند وافقت عليه حسسته
ان امه اسعد انسانة ذيك اللحظة في الدنيا اليوم اتفق مع نواف على كل شي خلاص ما بقى الا انه ياخذ هند و يطير
لشرقية ..
ام سعود يعني خلاص يمه اتفقت مع اخوها على كل شي ؟
سعود ايه يمه
ام عزام مدري على شو فرحانين حدها وحده مطلقة
ام سعود بس تسوى الف بنت هالي ماهي عاجبتك
ام عزام اي الف بنت يمه هذي مربيتها حرمة تعرفين يعني ايش ربتها حرمة
ام سعود وش يعني الفرق هالحرمة عرفت تربي اكثر من الرجال والبنت ابوها حي ما مات عشان تقولين ما رباها
ام عزام الا كانه ميت تاركهم من سنين و لا يدري عنهم تعرفين اخلاقهم طيب ابسطها تعرفين ليش تطلقت و هي
مالها الا شهرين متزوجة ؟
ام سعود هالكلام مالنا فيه الحين بكرة بتصير زوجة اخوك وهو الي له الحق يسالها ليش تطلقت
ام عزام وش يتزوجها و بعدين يعرف سبب طلاقها و شفيك انتي يايمه شكلهم ساحرينك حتى انتي ؟
معاد فيه يسمع اكثر وقف صامد و داخله براكين تثور كلام اخته نزف فيه جروح قديمة اكتشف ان هند تشاركه فيها
بدون ذنب ربته حرمة هالكلمة يا ما سمعها في المدرسة في الشارع بكل مكان يعرفونه الناس وش فيها تربية الحرمة
ربت رجال افضل من غيرة مهندس يخاف ربه و لا يغلط على احد سعود هالكلام خلصنى منه وزواجي يوم الخميس
الجاي بعد اسبوع من اليوم وتراه زواج عائلي و هذا شرط البنت وانا وافقت والجمعة راجع بها الخبر
ماابي مشاكل ...
,,,,,,,,,,,,
جده
الساعة الـ 09:30 مساء
خلاص بعد الي سوته منال اليوم حست ان وجهها انحرق قدام سعود وهي لسى ما شافته الله يهديها هي و حركاتها
الطفولية
فهد لا وعاد الاخت تهدد لا تصيحها عشان احبك
هند هههههههههه انا مدري كيف طلعت من عندنا و جاتكم من غير ما نشوفها
منال عشان تعرفين اني احبك و ماابيه يصيحك زي سلمان
ومن جاب طاري سلمان الحين <<هند
نواف لا سعود باين انه رجال ماشاء الله عليه وفوق كذا بتصيرين قريبة مني يا هند يعني اقدر اتطمئن عليك اي
وقت
ام محمد الله يخليكم لبعض يايمه و يوفقك يا هند بزواجك و انت يا نواف بدراستك
هند&نواف امين ياجدتي والله يخليك لنا
فهد من الان الدعاوي بس لهم وانا و منال رحنا فيها ؟
ام محمد انت و منال الاساس يا يمه خلاص هند ونواف كبروا والدنيا ابعدتهم عنى لكن انت رجال هالبيت الحين
ومنال هي زينته ..
,,,,,,,,
جده
الساعة الـ 10:15 مساء
دخل عليها الغرفة بعد ما جاته ياتي غرفته تقوله ان امه تبيه قبل تنام دخل وهو مبتسم لها و في خاطرة عارف هي
وش بتقوله اكيد بتكلمه عن هند الفترة الاخيرة صارت تتكلم عنها على طول
سعود هاا يالغالية امريني وش بغيتي مني ؟
ام سعود وهي تاشر له على طرف السرير تعال يمه اجلس هنا بغيتك
جلس سعود بطرف السرير و هذي جلسة
ام سعود يمه انا ما ابيك تزعل من كلام اختك تعرفها انت تكلم و لا تفكر وش تقول
سعود الله يهديها تعودت محدن يقولها غلط
ام سعود المهم يمه كلامها ما ياثر فيك انت تعرف نفسك رجال و النعم فيك و هند باذن الله ما تشوف الا كل
خير منها
سعود انتي واثقة منها يمه اشوفك وش السبب ؟
ام سعود خبرة الحياه يمه تبين لك الزين و الشين من اول نظرة
سعود زين يمه انتي مقتنعه فيها و ما اكذب عليك اني من دخلت بيتهم حسيت براحة لكن سالفة زواجها و طلاقها
احس سالفته سريعه و ما اني مقتنع فيها كانه في شي مخبيته ؟
ام سعود الي مخبيته قلب هند و كبره يا يمه هالبنت ما تفكر بنفسها الا اخر شي قبلت تتزوج بس عشان امها و اخوانها ما يتشردون
سعود كيف ؟
ام سعود ابوها مسحور من زوجته الاولى الله يتوب عليها نفسها حقودة و حاسدة ما قدرت تخلف له و من زواجه عليها انقلبت لانسانه
مريضة و خلته ماهو بدنياه تمشيه بكيفها و من يومها ما خلت أذيه الا رمتها على ام نواف و عيالها و حرمتهم كل شي حتى بيتهم
الي يسترهم عيونها جت عليه وما خلت طريقة الا تبيعه لكن ام محمد و قفت لها لكن الحرمة كبيرة و قوتها ضعيفة ما لقت الا هالمسكينه
هند زوجتها من ولد واحد غني بس فلوسة ماثرت بهند طلعت من بيته زي ما دخلت لكن ليش طلقها و على ايش اختلفوا ماسالتها هذا
بيصير حقك بعد كم يوم كان تبي تعرفه
سعود الله المستعان طيب مالهم عمام خوال يوقفونها عند حدها ؟.
ام سعود لهم يمه بس الدنيا غرتهم
سعود الله يعين
ام سعود هذا الي اعرفه و بغيتك تعرفه مني يمه و الباقي عند هند
سعود وهو يسحب الفراش و يغطي امه ان شاء الله يمه ما قصرتي خلاص هالحين نامي و خلي الباقي علي
ام سعود الله يسعدكم يا ولدي
سعود امين
طلع سعود من عند امه و هند كابر قدرها بقلبه لهدرجة تضحي بحياتها و تتزوج لجل اهلها ترمي نفسها بواقع ما تدري وش نهايته
بس تسعد و تامن قلوب الي حولها .....
,,,,,,,,,,,,
الجزء الواحد والثلاثون
الجمعه
جده
الساعة الـ 10:20 صباحا
بخاطرها كلام و خوف من الجاي ما تدري تشكيه لمين و الا تسكت و تخلي القدر يمشي كل تفكيرها بردت فعله وش بتكون ؟
بيتقبل و ضعها بدون نقاش و الا بتكبر سالفتها و ينفضح سرها الي خبته شهور تقوله له قبل الزواج و الا اول ليله معه و الا
تخليه يكتشف بنفسه يالله يا كبر همك يا هند طلعت منها تنهيدة بحرقة و عيونها تطالع بعيد ..
ام محمد هند يمه وش فيك ؟
هند سلامتك جدتي
ام محمد و ليش هالتنهيدة مضايقك شي بنتي ؟
فكرة تقولها يمكن هي منقضها الوحيد بس اتراجعت جدتها ما هي ناقصة هموم و تفكير هند افكر شلون بيمر يومي ما اشوفكم
ام محمد يا بنيتي الحين فيه تلفونات تقرب البعيد بس فكري في حياتك و سعادتك شي ثاني لا تفكرين
هند الله كريم
ام محمد و نعم بالله يمه انا احساسي مرتاح لسعود و انا ما شفته و الي مطمئني اكثر ان اخوك عندك
هند ايه الحمدلله ان نواف هناك اشوفه على طول شي من ريحتكم جدتي .......
,,,,,,,,,,,,,,
الخبر
الساعة الـ 03:00 مساء
صحى من نومه كسلان امس سهر لين الفجر و حتى لصلاة الجمعه ما صحى رغم محاولات منار معه طالع الساعة و شافها ثلاث
قرب اذان العصر و طيارة سعود احساسة بالتعب مسيطر على جسمه اخذ الجوال و تاه فكره عيونه تقراء حروف تتراقص و كلمات
ما هو مستوعبها هي حقيقة و الا لسى يكمل واحد من أحلامه (( أبيك تعذرني اذا فيك الوصل صار معدوم درب العناء انا من فراقك
هالكني .. عطشانه و فيك الماء سرابه مفقود حد اللقاء بحكم هالقدر مختوم ., لي قلب حلف ما يعبره غيرك مخلوق صاينه و ارجي
رب هالكون يلتقي فيك و لو تحت اللحود ....))
كل ألاحسياس تفجرة و ثارة براكين الشوق داخله بصونك بقلب بس بالحلال انتظريني ...
,,,,,,,,,,
جده
الساعة الـ 04:30 مساء
داخل صالات المطار طيارتهم وحده و وجهتهم وحده هالمرة سعود لقى الي يؤنسه و يشاركه الطريق و نواف لقى الي يعينه على الغربه
و يعتبره اخوه الكبير
فارس يالله شباب انا رايح تبون حاجه ؟
سعود ما اوصيك على الوالدة و الاشياء الي وصيتك
فارس اعتمد كل حاجة زي ما تبى و احسن
سعود تسلم نخدمك بعرسك
فارس اكيد بحط رجل على رجل و انت جهز كل حاجه
نواف خاطب ماشاء الله ؟
فارس لا والله لسى
سعود مسوي كل هالرجه بعرسه وهو لسى لا تخرج و لا توظف
فارس هدا اخر سمستر لي و الوظيفة ربك يجيبها
نواف الله كريم
فارس هيا طيارتكم دحين نشوفكم على خير
نواف&سعود تلاقي خير .......
,,,,,,,,,,,,,,,,
جده
الساعة الـ 05:15 مساء
دخلت غرفتها عشان تاخذ راحتها مع رؤى الي كانت معها على الخط من سمعت انها انخطبت ومن ام سعود و فرحتها لهند ما
تنوصف و تذكرها بكلامها ان ام سعود حاطه عينها عليها من اول ما دخلت المركز .
رؤى تذكرتي كلامي وانا اقولك بتخطبك لواحد من عيالها ؟
هند اصلا ما عندها الا واحد
رؤى والتاني الي يجيبها دائم ؟
هند فارس ولد بنتها بس زي ولدها هي مربيته
رؤى يعني عندها بس ولد واحد و كم بنت ؟
هند بنتين وحدة شفتها جت معها لما زارتنا و الثانية ما شفتها لسى
رؤى حلو و بتروحي الشرقية و تاخدي راحتك الله يوفقك
هند امين و عقبالك حبيبتي
رؤى الله يخليك بس وربي بفقدك مو تروحي تنسيني ولا تدقي عليه
هند افى عليك هذا كلام اكيد بكلمك
رؤى راح تجي لدوام بكرة ؟
هند ايه بخلص دوام بكرة و الاحد و خلاص بتركه .......
**********
الخبر
الساعة الـ 06:30 مساء
تمدد على كنب الصالة بتعب جسمه هلك من زحمة المطارات و الطيارات يبي الاستقرار و الراحة
يوسف ادخل غرفتك طيب ريح فيها
سعود خلني هنا ماعاد فيني اتحرك شبر
يوسف بلا دلع تراك الحين عريس
سعود ههههههههههه على طاري العرس ترى يوم الاربعاء حاجز لك و الشباب معي نفس الرحلة
يوسف بجد ؟
سعود ايه والله اجل ما تحظرون عرسي
يوسف لا بس انت قلت زواج عائلي و كذا فكرتك ما بتعزم احد
سعود انتم الاساس و اخواني تجون من غير عزيمة
يوسف عن نفسي حاظر من الحين هو الي ناقص محضر عرسك ؟
سعود الله يخليك و يالله شد حيلك نبي نفرح فيك
يوسف قريب باذن الله الا الشقة وش ناوي تسوي فيها ؟
سعود تباهها انت ؟
يوسف لوحدي ما اقدر عليها شكلي برجع البيت
سعود زين اجل نسلمها نهاية الشهر ذا
يوسف و متى بتقدم لك بيت ؟
سعود كلمت سيف يقولي 15 يوم و يطلعه يعرف واحد بدور لي شقة و الا فندق لين يطلع لي بيت ........
***********
جزء
الثلاثاء
جده
الساعة الـ 05:30 عصرا
عقلها مشتت مع هالانسانة الي قدامها من جت طلبت تتكلم معها لوحدهم كنها تحدثها عن معارك و أعداء ما هي فاهمه هي وش تبي تؤصل له بالضبط عشان تريحها و تريح نفسها..
هند أصب لك قهوة ؟
ام عزام لا شكرا ما اشربها كثير انا
هند ايه صح كثرها يسبب مشاكل صحية
ام عزام طبعا تعرفين ضغط و مشاكلة اكيد عندك خبرة انتي
هند ايه صح
ام عزام عاد وتعرفين اكيد ان صاحب الضغط ينخاف عليه من الامراض و الي حوله يحاولون ما يزعلونه ؟
هند يالليل ما اطولك اكيد
ام عزام امي الان كذا بعد الجلطة ما تستحمل مناقشة ما نقدر نقولها لا لاي شي حتى لو على حساب حياتنا الخاصة
هند بالعكس ماشاء الله اشوف خالتي تتقبل النقاش و روحها حلوة الله يسعدها
ام عزام يمكن معاك لكن مع سعود يا قلبي عليه عصبية و كلامها هو الي يمشي وهو يخاف على صحتها ما يقولها لا
هند اهااا الله يعينه تبقى امه جنته و ناره
ام عزام اكيد امه بس ماهو تغصبه على اشياء مايبيها
هند بقلة صبر مثل شو؟
ام عزام يعني هي حكمته يدخل جامعة الملك فهد و يتغرب و بعدين لما ما اعجبتها بنت عمي و تاخرت ما حملت خلته يطلقها
و هو يبيها و الان اجبرته يتزوج
هند بقلق قصدك انه مجبور يتزوجني ؟
ام عزام بابتسامة نصر لا حبيبتي لا تفهمين غلط هو قال موافق اتزوج بس ماقال لنا روحوا اخطبوا لي الوالدة الله يهديها
راحة خطبتك و حطته في الصورة مدري كيف تقبله وانتي تعرفين انك كنتي مرتبطة بواحد
هند قصدك مطلقة ؟
ام عزام ايه
هند بضيق الي عرفته انه بعد مطلق
ام عزام بس رجال ما يعيبه الطلاق و ارجع اقولك مجبور طلق امي الله يهديها تبي تشوف عياله وبنت عمي تاخرت 8 شهور
ما حملت والان ماشاء الله عليها متزوجة و عندها ولد و حامل يعني لو صبرت شوي كان هذولا عيال ولدها
كنك جاية تفيقين الجروح النائمة هند <<<<سرحانه
ام عزام بمكر انتي وحده جربتي الطلاق وانتي لسى صغيرة حرام تضيعين عمرك مرة ثانية مع واحد قلبه مع غيرك
واخذك رضاء لامه ماتدرين وش مصيرك بعدين لو ماحملتي او صار لامي شي لا سمح الله....
,,,,,,,,,
الخبر
الساعة الـ06:10 مساء
طلع من غرفته لابس و ريحة عطرة تدوخ باين على ملامحه السعادة بسمته عيونه حتى نشاطة صار غير هاليومين
مر الصالة ياخذ جواله من الشاحن و مفتاحه..
يوسف اوووف على وين الشياكة ذي كلها ؟
سعود الراشد
يوسف و علي بصوت واحد الراشد ؟
سعود وشفيكم على كهربه ايه بروح الراشد حرام يعني ؟
يوسف يااخي وش تبى بالراشد بعد بكرة عرسك استريح بس
علي هههههههههه خله يارجال يودع الحرية
سعود قسم بالله تفكيركم غبي بروح اخذ لي غرض و ارجع
يوسف يغمز له علينا امس مع سيف ما خليتوا شي الا اخذتوه حتى الخواتم اشتريتها وش تبي ؟
سعود ما هو انت وسيف مفهين نسيتوني اشتري هدية للبنت
علي ههههههههههه بتكسر القاعدة انت محد يجيب هدية بالعرس يجيبونها للملكة بس
سعود بملك العصر عندهم بالبيت اجيهم و يدي فاضية ؟
يوسف هههههههه لا مايصير حتى يمكن يقولون لك ادخل شوفها و عطها الهدية بنفسك
سعود و هو يرمي عليه الشاحن تطننز ؟
يوسف ههههههههههههههههههه
سعود اصلا انا جالس اضيع وقتي معك انت و هو والا انتم وش عرفكم بالذوق و الرومانسية
علي احلا يالرومانسي من الحين حركات و هداية اجل بكرة وش بتسوي ؟
يوسف اظن بيشوفنا بالدوام و يقول من انتم ؟
سعود وهو يمشي للباب و لا راح اسالكم اصلا .,
,,,,,,,,,,,,,,,,,,,,,
جده
الساعة الـ 08:30 مساء
دخلت معها الغرفة شغلت لها المكيف و غطتها مستغربة نومتها بدري حاسة ان عندها كلام بتقولة لكن بخاطرها ماتبى تسمع شي من احد تبى الكل ينام و تروح غرفتها تاخذ راحتها بالبكاء الصراخ أي شي تفرغ فيه القهر الي تحسه......
هند اطفئ النور جدتي خلاص ؟
مسكتها من يدها و جلستها جمبها ام محمد ما بتقولين لي ؟
هند اقولك ايش جدتي ؟
ام محمد وش تبي اخت رجلك منك ؟
هند جدتي هو لسى ما صار رجلي
ام محمد بيصير باذن الله لكن وش تبي منك و هي من طلعت وانتي خاطرك ماهو معجبني ؟
هند ماتبي شي تسولف معي بس
ام محمد وش هالسواليف الي غير لوحدكن ؟
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك