رواية جيتك امانة انقذيني -6
سديم:بس امس ماكنتي تبين الذكور!!فارس..باستهبال:ماتبي الذكور!!،ليه مو مالين عينك!!،اجل ليش تبين تصيرين وحدة منا!!
طلال:لاتتعب نفسك موقفها متناقض معنا،أحياناً تبي تصير وحدة منا،أحياناً ماتطيقنا وتبي تذبحنا،أحياناً احنا العالم كله بالنسبة لها
الرزان:عاد الثالثة عمرها ماصارت،بس الثانية تصير كثير
فارس..ضحك:اجل ينخـاف منك!!
سديم..بتلميح وهي تضحك:انت خصوصاً لازم تخاف على عمرك،احتمال قتلك كبير
فارس..فهم وش تقصد وضحك:بتأكد اني احط لي حارس على راسي اجل،بس ماظنتي انا اللي بنقتل الا يمكن ناس تخون فيني
اصيل:عفواً لايجوز إنكم تلمحون تلمحيات احنا مانفهمها،ياتفهمونا ياتسكتون
هنادي:والافضل تسكتون،لاني ابي اعرف سر الكشخة يا الرزان!!
الرزان:يــاربي خلاص عاد
طلال:لا لا،شاللي خلاك تكشخين مثل باقي البنات هـا!!
فارس:اختك هاذي مستحيل تكون مثلهم..طالعها بالمرايا وهي وراه..مو انتي غير عن باقي البنات وطول عمرك مو مثل باقي البنات
الرزان تغير وجهها ماقدرت تتكلم،
شالسالفة!!شالقصة!!،معقول!!،..
طلال:بعد معاك حق،بـس شي غريب!!الله يعين يوم يشوفك خالد بيغمى عليه من الصدمة
الرزان كان راسها تدور فيه مية فكرة وفكرة وماردت عليه..
فارس:تدري لعانة فيك،بحط اغنية "هم مالهم بينا"
اصيل:وشهالغبار يافارس!!هيثم سعيد مرة وحدة!!
فارس:نكايــة في طلال مع اني مااحب اسمع اغاني
الرزان..استغربت:بس مالها علاقة!!
فارس..ابتسم لطلال:بيني وبينه
طلال..ضحك:طيـب،صدقني عشان اللي بيني وبينك ماراح اسويلك شي..فجأة سكت فكر واستنتج..تعال يعني سويتها!!..لما ضحك فارس..يالدب قلت لك لاتسويها انتظر،دايماً عجول ورا ماتركد!!،وش كبرك شايب وتتصرف كأنك بسن المراهقة
فارس..ضحك:انــا!!،صح صح
هنادي:ترا قدامكم بس كذا ولا هو شي ثاني بالبيت وبأي مكان ثاني،و لا المزاج اللي يقلب فجأة على ناس وناس فـارس
فارس..ابتسم:ليش تهاجموني!!انا وشسويت لكم!!،والله اني طيوب وحبوب مااستاهل كل هذا
طلال:على بـابا ياماما!!
فارس..ضحك:طلول تراها العكس
هنادي:يـلا خلصوني قبل لاننزل ابي اسمع "مكانه وين"
الرزان:ماشبعتي منها امس!!
هنادي:لا ماشبعت ..وهمست بأذنها..ابي اتعلم اهز عليها مثلج
الرزان..ابتسمت:ماينفع عليها!!
هنادي:نصابة!!تعرفين وماتبين تعلميني،وانا اللي تعبت عليج امس!!
الرزان..ابتسمت:خلاص ولاتزعلين،يوم السبت بالعزيمة بعلمج
هنادي..باستها:تسلمين لي يااحلى رزون بالدنيا
الرزان:مصــالح
طلال:لحظة،لحظة من متى؟؟من متى!!
الرزان فهمت انه يقصد البوسة وطالعته..وهو فهم عليها فسكت بلا تعليق..
نزلوا مطعم وافطروا على حساب فارس اللي اصر..وبعدين راحوا عالمطار..الساعة 12 الظهر اقلعت الطيارة والكل عليها..
الرزان توهقت لما جلست بين فارس وطلال وهم سوالف وضحك وتعليقات عالمضيفات!!..
لحظات تحس بتتهور وتقوم تكفخهم..البنات كلهم نايمين وفي سابع نومة!!..كانت بتبادل مع طلال بس طنشها!!..
حست بقهر منهم من قلب..ومالقت الا شنطتها >> كاشخة بالشنطة الهدية من خالد<< طلعت منها قصة "ذهب مع الريح" لـ مارغريت ميتشل..
فارس:انتي من صجج،بتقرين هالرواية!!
الرزان ماطالعت فيه وفتحت القصة..
طلال:نصحتها ماتقراها،انا ماخذها من خالد قبلها وقريتها كلها كآبة في كآبة
فارس:كلها الم في الم قصدك،ترا انتي مو ناقصة!!
الرزان..رفعت حاجب و ببرود طالعته:والقصــد من ورا هالكلام!!
فارس:لاتقرينها احسن لج
الرزان..رجعت للقصة:اوردي بديت اقراها من قبل،و وصلت للنهاية تقريباَ
طلعت الآيبود وحطت السماعات وشغلته..وطنشتهم واندمجت بالقصة..وفعلاً انقهرت من النهاية ..سكرتها بقوة،
قال ذهـب مع الريـح قال..وانا وش اسويله يعني..بعد كل هالعذاب!!..بس فجأة غير رايه وماعاد يحبها!!..شهالغباء!!..صحيح مالي خبرة ابد بالحب بس ماظن ان الحب يموت بسهولة..صعب صعب يموت بهالطريقة!!،..
طلال..ضحك لما شافها تنافخ:هـا شلون حلوة مو!!
فارس..ابتسم:اكيد استانستي عالنهاية خصوصاً
الرزان طنشتهم،
سخيفيـن!!
،..طالعت ساعتها وشافت انهم قربوا ويوصلون..قامت وراحت لبست عبايتها وبدلت الحجاب بالشيلة..
طلال..ابتسم:اشتقت لشكلج بالنقاب والله
الرزان..ببرود:ماجبت وياي نقاب اذا تذكر
طلال..يستهبل:احسن لج كشفي وارتاحي
الرزان..طالعته:صح عشان امي تذبحني وهي ترتاح بعد
طلال..ضحك:والله مو مرتاح الا انا منكم انتوا الثنتين،انتي تتذمرين وامي تهزىء وانا طايح بالوسط،فقير(ن) مسكين (ن) ومالي ذنب
الرزان:حــرام!
فارس:طيب قولي الصراحة،مو احسن لو كنتي تكشفين بالسعودية؟!
الرزان:اكيد لا،اخاف مطافيق السعودية يجيهم شي اذا كشفت
فارس:يعني يقالك ماشفتي مطافيق السعودية بلندن!!
الرزان:اذا طلعوا برا يتغيرون!!
فارس:غريب،بس انتي مو واثقة بنفسج بشكل اغرب!!
طلال:مين واثق!!،اختي!!،مسكينة كلمة ثقة ماتدخل بقاموسها اصلاً ماتتعامل بهالكلمة ولاتعترف بوجودها
الرزان:ياليت تبطلون مصخرة،التفتوا على شي ثاني غيري تسولفون فيه
رجعوا يتغامزون ويتهامزون على شي ثاني..وهي بآذانها سماعات الآيبود..
وأخيراً وصلت الطيارة الى مطار الملك فهد بالدمام الساعة 5 بالضبط..نزلت وهي تتنفس الهوا >>يقالك هوا السعودية غير<<وتلثمت سريع بالشيلة..
ومشت وكلها شوق "بس له"..دخلوا المطار وشافته ينتظرهـا "هي بس"..
كاشخ بالثوب والشماغ "عريس حشى!!" فسخ النظارات الشمسية لما لمحاها..
اول مرة تحس بنفسها تقدر تضمه وتضمه بقوة..اشر لها بيده..راحت ركض وهي مطنشة اللي معاها وضمته..
هو انصدم اول مرة تسويها!!بحياتها ماسوتها!!و اول مرة قدام الناس!!..بعدت وباس راسها..
خالد:شاالتطورات يا قلب خالد؟؟
الرزان..ضحكت:قال قلب خالد قال!!،انت وين زوجة المستقبل عنك!!
خالد..غمز لها بابتسامة:بعدج عفت الحريم
الرزان:خــالي،اشتقت لك موت
خالد..ضحك:قلبي مايستحمل كل هالحركات
الرزان..ضحكت معاه:سـلامتك
خالد:اعترفي مين لعب بعقلج مين!!،هـا يابنت طايحة لج على شب هيك ولا هيك!!
الرزان:وع وع،بعدك انت مافي شب يملى عيني
خالد..ابتسم:ايوا كذا خليج مؤدبة،بعدين وخري شوي ابي اتنفس،والناس بدت تشك
الرزان:اوووه الحين يفكرون اكيد خويته،ايه ايه راجعة من السفر وهو كاشخ وجاي يستقبلها
خالد..ضحك:يقطع ابليسج،تفكيرج هذا هو ماتغير،توي عرفتج
طلال:ياهوووو،ناسينا بعد ماشفت حبيبتك هـا
سلموا على بعض وبالأحضان..
خالد:نساك الموت ياولد اختي،وبعدين ليش مو واثق بمعزتك!!
طلال:قدام هاذي،ماظن احد بقى له أي معزة
الرزان:حقد ولا غيرة حدد!!
طلال:عليج بالعافية انتي وخالج،تصطفلوا وانا مالي
خالد:تعالوا بس تعالوا،خل ناخذ الشنط ونتعرف على المزايين اللي معكم
الرزان:هيييه انا صديقاتي ترا ماياخذون شياب
خالد..يستهبل:ادري من الغيرة تقولين كذا
تعرف خالد على فارس..وطلال عرفه عليه لغرض معين!!..هذا اللي حسته الرزان في طول الوقت تلميحات بكلامهم!!..
طنشت وراحت تسلم عالبنات وتأكد عليهم على العزيمة يوم السبت..وشافوا خلوووود على قولة غادة..
سديم:يعني هذا طلع خلودي!!
الرزان:كنتي تتوقعين شي ثاني!!
سديم:توقعت واحد اصغر!!
الرزان..ابتسمت:خالي شباب بدون شي
غادة:اوووه اشتغل الدفاع ياسدومه ليه تفتحي فمك،هيا اسكتي
هنادي:بس والله مزيون خالج
الرزان:قزي قزي على راحتك ماعندي أي مانع
هنادي..ضحكت:اروح اخطبه عادي
الرزان:حلالج،بس ماتقدرين توصلين
هنادي:لا ناس مافي منهم امل مابي،هونت خلاص
:الـرزان يـلا حياتي
أصيل:خطير بعد يدلع،والله مو هين ياهنادي لاتضيعينه من ايدك
وقعدوا يضحكون..
هنادي:تبينه اتنازل لج عنه مافي مشاكل
الرزان..ابتسمت:لعبة بين ايدينكم خالي!!،يـلا بس انثبروا ؟،اشوفكم يوم السبت
غادة:بيننا الو اوكي
الرزان:اوكـي،نشوفكـم
راحت مع خالد..اشرت للبنات "بـاي" وانتبهت لفارس واشرت له "بـاي"..
وطلعت ماسكه ايده وهي تبتسم..
[..الجـزء الثـامنــ ..]
طاحت عالسرير وهي تطالع بجدران الغرفة بضيق..ودها تكسر راسها على وحدة منهم،
هاذي بدايتها!!..العيشة بالسعودية تضيق الخلق!!..لاطلعات لاتمشيات لافطورات!!..آآآآآخ الله يصبرني بس..
والنهاية طيب!!..النهاية ياامي العزيزة ياامي الحنونة النهاية!!
،كانت الرزان..توها مهزئتها امها بدون سبب..
"بس رحتي بريطانيا سافرتي بس وتكبرتي علينا!!تعالي ساعديني!!قولي امي تحتاج مساعدة وتعالي ساعديني!!تذكري امك اللي ناسيتها من شهور ببلاد الغربة وحني علينا شوي وساعديني"..،
مافي خدامات يعني!!..طول عمرج تطردين الخدامات عشان اصير لج خدامة!! وبعدين..الحين جاية باجازة ابي ارتاح بعد شهور الكرف بالدراسة وآخر الاسابيع كان علينا اختبارات.. ابي ارتاح..لكن وين الراحة وامي الحنونة على حنانها هذا!!
،دلكت يدها اللي تكسرت..ورجولها وهي واقفة ساعة بالمطبخ بس تغسل بالصحون!!..
قامت من على السرير وهي ماسكة ظهرها.. تذكرت انها الصباح مسحت الغبار اللي بالمجلس كله..
والنتيجة "الحــلوة"شرفت،
اكــره نفسي اكرهها
،طاحت عالسرير مرة ثانية وهي تصيح..وتصيح..وتصيح.. صارت الساعة 7:30..
سمعت "طق طق" على الباب..قامت بألم من على السرير وهي تطالع الساعة مفجوعة!!..
نامت وهي تصيح!!لـ اربع ساعات!!..ركضت الحمام"الله يكرمكم" وجسمها متكسر غسلت وجهها بسرعة..
وفتحت الباب..طبت عليها وضمتها وبالمرة كسرتها..
الرزان:ريمـا فكي عني كسرتيني!!
ريما..بعدت عنها بابتسامة:فديت هالوجه والله،كل يوم اشتاق لج اكثر
الرزان..رجعت دخلت الغرفة:توج شايفتني امس وقبل امس!!
ريما:اقولج اشتاق لج كل يوم اكثر..طالعتها وخزتها..انتي كنتي تصيحين
الرزان:لا ،كنت نايمة والحـلوة جاية
ريما:مايبيلها كلام،الحـلوة يعني ام الصياح ليل ونهار،كنتي وش زينج امس وش صار بين ليلة وضحاها!!
الرزان:أمـ...
سكتت عشان ماتنزل الدموع اللي ماتبيها تنزل..
ريما..جلست جنبها:ياعمري خلاص هونيها وتهون،يوم من الأيام صدقيني ربي بيفرجها
الرزان:يارب يكون هاليوم قريب،لاني اختنقت وممكن اموت على هالحالة
ريما..قامت وسحبتها:قومي قومي،جايينك ضيوف اكشخي يااكحل العين،وانا رايحة اجيب لك دارسين وحبة بنادول سحرية تطير الألم وتخليك غزال يرقص
الرزان ابتسمت واستسلمت للأمر الواقع وقامت..طلعت ريما..
وهي جلست تبدل ولبست برمودا بيج "موديل علاء الدين" ولبست قميص خالتها ايمان "burberry" احمر وماسك على جسمها ومعاه شال "burberry" اللي معا هدية خالد وكشخت بساعة "burberry" بعد هدية خالها >>بس قديمة<< ولبست معاها الأسوارة اللي من سديم..
بس وقفت واحتارت وش تلبس شوز!!..دق الباب..
الرزان:تفضل
ريما:قولي تفضلي طيب!!
الرزان..طلعت لها لسانها:تمييز عنصري انزين
ريما..عطتها كوب الدارسين والبنادول:وش هالحركات!!من متى تلبسين ضيق وحركات بنات على قولتك!!
الرزان:خلاص انكسرت القاعدة
ريما..حطت يدها على راسها:ياويلي ويلاه خربوج بنات العنجليز!!
الرزان..ابتسمت:وهو كذا ياجدتي
ريما:بس الساعة المباركة يوم يخربونج بهالطريقة،ايوا اخيراً خلونا نشوف هالحلا وهالجمال
الرزان:تعالي بس وش البس شوز!!
ريما:تعالي نحوس يمكن نلاقي شي احمر يناسبج
ولقوا بدولاب الجزم فلات احمر وناعم ومافيه أي حركة..عجبها وشالته..
ريما:بس هذا عادي!!
الرزان:هذا يناسب جداً فلا تخليني اتهور والبس البوت السبور حقي
ريما:خلاص خلاص هذا يجنن،تعالي نحط لك لمسة لهالعيون الكحيلة
حطت لها كحل عادي وكحل سايل فوق الجفن لمسة بلاشر وروج احمر..وطلعت جنان..رفعت لها شعرها من قدام بف..
ريما:و لا احلـى
الرزان:عيونك والله اللي حلوة
ريما:ادري عمرك ماراح تقبلين مجاملات ومدح الا بطلعت الروح،يلا قدامي
انزلوا..كان اول الواصلين صديقاتها من ايام المدرسة نورة و نوف >>نوف سعد الـ... ..20 سنة ..
اقرب وحدة للرزان من بعد نورة في شلة المدرسة..وتقرب لنورة بعد بس من بعيد شوي..
تدرس بجامعة الملك فيصل سنة ثانية تخصص علاج طبيعي<<..
نورة..وقفت مكانها اول مادخلت تغمض وتفتح تغمض وتفتح:ماني قادرة اصدق،نوفو تشوفين اللي اشوفه!!
نوف:والله مو قادرة اشوف شي عيوني صار عليها غمامة
الرزان:يالسخيفات!!
سلموا وهم مستغربين..مصدومين..مو مصدقين..فرحانين..بتغــير الرزان الغريب!!..
جاوا بعدهم الخالات "هند" و"هيفاء" وبناتهم..وبعدين زوجات الأخوال "ابراهيم"و"سامي"و"عبدالرحمن"و "احمد الله يرحمه" و"مبارك" وبناتهم..
وبالأخير شرفوا غادة ومعاها اختها معين >>معين ..16 سنة..طالبة ثاني ثانوي علمي ولها توأم اسمه معن<< واصيل واختها..
غزلان >>غزلان..22سنة..متزوجة وعندها ولد عمره سنة<< وسديم مع اخت خطيبها!!..
رشـا>>رشا ..18 سنة..طالبة ثالث ثانوي ادبي<< وهنادي مع زوجة اخوها..
بدور>>بدور..19 سنة..زوجة عبدالله اصغر اخوان هنادي <<..واكتمل الجمع بحضور افنان اخت عبدالعزيز >>افنان..21 سنة..متزوجة وعندها بنت وولد<< ..
واختها الصغيرة نورة>> نورة.. 16 سنة..طالبة اول ثانوي<<..ابتدأت الحفلة..
الحريم قعدوا بغرفة الحريم والبنات ظلوا بالمجلس رقص واستهبال على اغاني الدي جي ايمان>>خالتهم<<..
الكل انصدم وتفاجأ بالرزان لما قامت ورقصت مع البنات..وحتى البعض انسحب بس عشان يتفرج عليها!..
وهي ماقصرت "تبي توريهم من هي الرزان" طلعت كل اللي عندها وابهرتهم..وبعدين وقفوا للعشى..جلست جنبها هنادي وبدور..
هنادي:والله يابدور اقولج والله ماكانت تعرف شي يوم الاربعاء هذا بس تعلمت!!
بدور..ابتسمت:معقول!!ماشاء الله عليج يالرزان الرقص معاج يصير شي ثاني
الرزان ابتسمت وماعلقت..
هنادي:بعد العشا الوعد يارزون،ولا ناسية!!
الرزان:ابد والله،وطلبت من ايمان تحط الاغنية بعد
هنادي:حلـو
بدور:خالتج ماشاء الله عليها عندها اغاني فلــة
الرزان:هي بكبرها فلـة
هاجمتها من ورا..
:وش هالحـلا كله!!اذوب انا مااستحمل ترا،خفي علينا
وباستها..
الرزان..بعدتها:وعععع نورة واللي يسملج بعدي
نورة:يحق لج،هذا اللي شايف نفسه ماشي ولا معبرني
هنادي..ضحكت:صادق طلال
نورة:اللي غناها اسمه فيصل الراشد،مو طلال!!
الرزان:تقصد طلال اخوي،قعد يرددها طول الطريق للمطار لوع كبدي
هنادي:وزادها بـ"ارحمني"
نورة:اكيـد معاه حق،ارحمينا شوي طيب،حبة حبة لاتجينا سكتة مرة وحدة
الرزان:روحي بعيد بس،متى ملكتج؟!
نورة..جلست على كرسي قريب:من قال في ملكة!!،من قال اصلاً بتزوج!!
الرزان:ياســلام والخطيب وش صار له؟؟
نورة:اقول عشم ابليس بالجنة آخذ هذا اللي لاراح ولا جا،رفضته
الرزان..استغربت:وابوك سمع كلامك؟!
نورة:لاطبعاً قوم الدنيا وقعدها،بس بالأخير اخواني قالوا الزواج قسمة ونصيب،تدرين كان ودي اشوف وجهه وهم يقولون له رفضتك،فقدت خشته هالكريه
الرزان:والله خبلـة،مو كنا نموت على هواهم شاللي غير الحال؟!!
نورة:يخسى الا هو ولا عشرة من امثاله،انا لاحبيته ولا ابي احبه،الله ياخذ عدوه كريه كريه بشكل لايطـااااق يارزون،تدرين لو كنت اخذته كنت كل يوم بتصبح بخشته البهية والتكشيرة!! والكلام العسل اللي ينقط من كلامه كل ثانية ولا الدرر والحكم ياعيني ياعيني
الرزان..ابتسمت:الله يعينك على نفســج الصراحة
نورة:ليـه لاني ابي نفسي وشاريتها!!،ترا مو رخيصة عندي نفسي اعطيها لأي واحد والسلام ولا ابيعها
الرزان:ان شاء الله ان شاءالله،بس لاتبدين محاضراتج في احترام الذات
نورة..قامت ومسكت يدها:مابرد عليج،قومي ابيج ترقصين معاي يمكن اتعلم واتعدل شوي
الرزان:لحظة اغسل ايدي طيب
نورة:بلا فلسفة مااكلتي فيها،ولا لمستي الأكل فيها
سحبتها ورقصوا مع بعض على "اتهمني" لـ سعود ابو سلطان..وجلست الرزان بعدين..جات وجلست جنبها..ومبين على لسانها كلام..
الرزان:اشفيج افنان!!،تبين تقولين شي؟
افنان..ابتسمت:تغيرتي كثير!!
الرزان..ابتسمت:للأحسن ولا الأسوء
افنان:شخصياً اشوفه للأحسن اكيد،اولاً طالعة قمر وثانياً عليج رقص اسم الله ابدعتي
الرزان:ياسلام،لسه ماشفتي شي
افنان:مافيني اشوف اكثر،اخاف يوقف قلبي من الفرحة،بنستأذن انا ونورة
الرزان:وين تو الناس؟!،تو الليل توه
افنان..ضحكت:لاوالله تأخرنا وبكرا وراها مدرسة الأخت نورة
الرزان..ابتسمت:وجاسر بعد مايقدر على فراقك اكثر
افنان..بابتسامة:اكيـد
الرزان..ابتسمت:بعد!!
افنان..ضحكت:ثقة عمياء،يـلا نشوفك على خير ياعمري
الرزان:على خير ان شاء الله
الساعة 12:20بالليل..كل اللي وراهم مدارس وجامعات وداومات انسحبوا..
بقوا ريما واختها هلا >>هلا..15 سنة..اول ثانوي << واماني وبنت اختها حلا>>حلا..16سنة..بنت اخت اماني الكبيرة سارة..طالبة ثاني ثانوي علمي<< ورغد و وعد..
وبنت خالهم "احمد الله يرحمه" انفال>>انفال.. 21 سنة..متزوجة وعندها ولد عمره سنة<<واختها الصغيرة نوف >>نوف..16 سنة..طالبة ثاني ثانوي علمي..صديقة حلا وهلا الروح بالروح<<..
وسديم بقت لحالها ونفس الحالة هنادي..اما اصيل راحت مع اختها..وغادة اقنعت اختها تقعد وتتعرف على شلة "حلا وهلا ونوف"..
ريما..تتحرش في الشلة:هـا شلة الشرور،شالمقلب الجديد اللي بتسوونه في المعلمات بكرا!!،ولا بتغيبون وتقصرون الشر!!
نوف..حطت يدها على قلبها:ياويلي اغيب،تذبحني امي،بكرا عندي اختبار احياء
اماني:ياعيني!!،سمعتوا عندها اختبار احياء وقاعدة لهالوقت!!،اقول متى ذاكرتي؟؟
نوف..بثقة:ذاكرت الخميس والجمعة،ماني غبية
ريما:لاتخافين عليها امون،هاذي راس الشر والدفارة بعد،يكفيها اخت فصول اللي الدفارة تنقط منه اللهم ياكافي!!
الرزان:قولي ماشاء الله،لايصيب ولد خالي شي من عيونج ريموه،بعدني عيب يعني ان الواحد يصير حريص على الدراسة،نسينا ماكلينا!!ولا عشان تخرجنا وافتكينا من المدرسة ريمو!!
ريما:لاعيوني مانسينا،بس ماكنت دحيحة لهالدرجة ولا دافورة!!،ولاتنكرين انتي بعد
وعد:فكونا بس الله يقرفكم مالقيتوا طاري الا طاري المدارس
رغد:أي مو اللي ايده بالموي مثل اللي ايده بالنار!
هنادي..ضحكت:ههههههههههه،يالظالمين المدرسة صارت نار!!،والله مافي احلى من ايام الثانوية قمة الوناسة والعباطة
وعد:عفواً بس الأخت من أي كوكب بالضبط!!
رغد:حقت ارامكوا!!،اكيــد كوكب الدحيحين،احلى ايام الدفارة هـا؟؟
هنادي..ضحكت:ههههههههههه والله ماشديت حيلي بثالث،ولا اول وثاني انواع الوناسة واللعب
وعد:هذاك اول يامـاما
رغد:مو اقولك اللي ايده بالموي مثل اللي ايده بالنار
حلا:ترا حتى احنا ثاني نعاني اكثر منكم ياثالث
وعد:ليه عيوني!!من يقوله!!
نوف:نفس النظام علينا وعليكم،كلنا بالهوا سوا
حلا:أي والله ودرجاتنا بعد بالهوا سوا
انفال..حطت ايدها على راسها:الحين وش يفكنا من التحلطم،خلاص خلاص سدوها سيرة
جلسوا بنقاشات وسوالف الى الساعة 1ونص صباحاً..راحت الرزان المطبخ تاخذ لهم بندول..
:السلام عليكم
الرزان..التفتت مصدومة:فيصل!!،وعليكم السـلام
فيصل..ابتسم:يفترض الف واروح بهاللحظة!!
>>فيصل..19 سنة..ولد خالها احمد..طالب سنة ثانية بجامعة الملك فهد للبترول والمعادن تخصص هندسة كهربائية والكترونية<<
الرزان..ابتسمت:يفترض
فيصل..ضحك:طيب،شخبارج؟شلونج؟،أي صح الحمدلله عالسلامة
الرزان:الله يسلمك،انا تمام الحمدلله،وانت؟
فيصل:عال العال،وين البيت فاضي؟؟
الرزان:بس في البنات بالمجلس،وش تبي؟؟
فيصل:جاي آخذ الست هانم نوف ونفول،واللي يبي حياه الله معاهم
الرزان..ابتسمت:بعد عزايم..غمزت..مو لله ها؟
فيصل..بابتسامة:لناس لله في لله،بس ناس ثانية لا طبعاً
الرزان:يـلا عطنا مقفاك اشوف،مابي احد يجي ويسوي لي سالفة
فيصل:يوه مازالوا على اغنية "تغطي عن فيصل"،ترا صارت قديمة وبايخة،وبعدين انا مابغيت الا انتي اطالعها!!
الرزان..ابتسمت:وانا مالقيت الا واحد اصغر مني اطالعه،قطيعـة هذا اللي ناقص
فيصل..ضحك:لا والله وتغيرنا وشفنا عمرنا..وغمز..ها وش أخبار لندن معك يابو الشباب؟
الرزان..ابتسمت:تسلم عليك بو الشياب
فيصل..ضحك ورجع غمز:ايوا اعترف اعترف،شايف (ن) لك شوفة؟
الرزان:يوووه عليكم،ماتشبعون من هالسيرة!!
فيصل..ضحك اكثر:شنسوي تافهين وفاضين وماعندنا سالفة غيرها
الرزان:بعد تقولها وانت مبسوط!!،صج الحمدلله والشكر
فيصل..ضحك:بس تدرين،حاس وربي حاس بو الشباب شايف(ن) له شوفة!!،انا رايح قولي لسموهم الكريم يتنزلون ويعجلون لأن وراي دوام بكرا على عكس ناس
الرزان..ابتسمت:قهر وغيرة
فيصل..ابتسم:اقول بس نشوفك على خير،لما نتأكد من الطيحة اللي طايحها
الرزان:ماراح تشوفني ابد اجل،روح تحلم روح
فيصل..ضحك:مو الحلم ببلاش!!خليني احلم،ســلامو
الرزان..ابتسمت:ســلام
فيصل..لف وهو رايح:ركبي بريسس باسرع وقت اسنانج حالتها خطيرة!
الرزان..ضحكت:مالت عليك
راح وراحت معاه انفال ونوف وحلا وهلا و وعد ورغد..وبعدين راحت غادة واختها ومعاهم سديم ..
بينما ظلت ريما واماني وهنادي اللي بعد طلعة الروح امها اقتنعت انها تنام عند الرزان لان مافي احد يجيبها بهالليل..
طلال كان بالشاليهات مع ربعه..اما خالد تنازل وترك غرفته ونزل ينام تحت>> عشان هنادي تاخذ راحتها<<..
الرزان ماكانت غرفتها صغيرة فلقت مكان بسهولة لهم عشان ينامون ريما واماني مع بعض قدام السرير وهنادي جنب السرير..
انسدحوا وطفوا الأنوار >>بس نور الأباجورة لأن الرزان ماتنام بدون نور..من سابع المستحيلات!!<< وظلوا يسولفون ويسولفون..عن الجامعة..عن لندن..
واكثر شي تكلمت هنادي عن عايلتهم واخوانها وخواتها.. وعن مايقالك مغامرات الرزان في لندن!!..
وحكت لهم عن التمشيات..الفطورات..الطلعات الصباحية.. والحنين والشوق خذها للنـدن..
وابتـسمت بعد مادق النوم باب الغرفة..
[..الجـزء التـاسعــ ..]
صحت وهي تتمدد..طالعت حولها كلهم نايمين بهدوء وسلام..طالعت بـ"نيمو" اللي بين ايدينها.. ضمته بقوة،
احترت..احترت بنفسي..اروح لها يمين تجيني يسار!!..وش اسوي بعمري يانيمو!! ..وش الحل!!..اتغير؟..ولا..امسك مجنوني لا يجيني اللي اجن منه؟..ماله دعوى صح!!..بس اخاف تنعفس حياتي اذا عشت مثل باقي البنات!!وانا مو مستعدة نفسياً اصلاً..بس مين بيستفيد اذا ظليت على حالتي هاذي!!
،حست بألم شديد ببطنها..غمضت عيونها بقوة..ومسكت بطنها وشدت عليه،
مين يتهنى بعيشته بوجودج يالعلة!!..انتي اكبر اثبات اني بنت..واني انثى..انثى لكن مجهولة المعالم
،قامت ولبست الشبشب البني..وهي كاشخة بالقميص >>الهدية<<..ولبست الروب اللي من هنادي وتسحبت برا للحمام "الله يكرمكم"..غسلت وجهها..وعلقت عيونها وهي تطالع نفسها بالمرايا!!،
ما اشوف فيج ذرة حـلا..وهم يتمدحون في جمالج ليل نهار!!..ليش يكذبون!!ليش يجاملون لهالدرجة!!..على بالهم بينفع معاي يعني..اعذروني بس مالكم امل
،رشت الماي على وجهها وفركت عيونها..طلعت وجات بتربط شعرها..بس حست جلدة راسها تعورها كأنها مشدودة!! فتركته مفتوح..
تسحبت برا الغرفة ونزلت للمطبخ سوت لها شرابها ..
..Hot chocolateالساخن المفضل
اخذته وطلعت للحوش..طول عمرها تعشق انها تطلع برا..اذا حست بضيق من حبسة الجدارن على طول تطلع برا..
التفتت وهي واقفة قدام باب المدخل..على يمينها باب المجلس وعلى يسارها غرفة الغسيل و المراجيح..
ابتسمت وهي تطالعهم..هالمراجيح قصتهم قصة كانوا لهـلا بنت خالها عبدالرحمن..لكن اضطروا يتخلون عنهم لما جاوا ينقلون لبيتهم الجديد..
طبعاً هلا صيحت وسوت سالفة "هذول مراجيحي انا شلون تاخذونهم مني،ليش تسوون كذا، انتوا اكيد تكرهوني"..
وظلت على هالموال وريما ضحكت عليها "صارت عجوز الأخت ومازالت تبي مراجيح!!،اصحي يابنت ترا عمرج 13 سنة مانتي لسه بالابتدائي!!"..
وكانت المحظوظة هي الرزان لما جابوهم هنا وهي تعشق المراجيح..صارت على طول بالحوش تتمرجح..
امها ياما هزئت انو ممكن ينتبه لها احد بس هي ولا عليها..تموت بالمراجيح والهواء الطلق مو بايدها..
الرزان ابتسمت وهي تطلع الآيبود من جيبها..وحطت السماعة بآذانها وتسمع "لو قادر" لـ عمرو دياب
{لـو قادر بص في عيني وقولي عملت لك ايه..مش فاكر مرة خلفت بوعد وعدتك بيه..
والله ماشفتش مني غير الحنية عليك
علمتك معنى الحب واجمل شوق وغـرام..وما علمتكش القسوة دي مش محتاجة عـلام
اصل انت اكيد من الأول كده والقسوة دي فيك...}
وتنفخ في كوبها اللي مو قادرة تشرب منه لانه حار وهي تطالع قدامها ولاهي شايفة..
ماحست ببرد رغم انها فصخت الروب بالمطبخ لانها حست بالحر..وجات اغنية "تملي معاك"..
{تمـلي معاك..ولو حتى بعيد عني في قلبي هواك
تملي معاك..تملي فبالي وفقلبي ولا بنساك
تملي واحشني لو حتى بكون وياك}
وانفعلت وهي تغني معاه..بس بعدين انتبهت بظلال قدام باب البيت الرئيسي!!..فشالت السماعة الا والباب ينفتح..
ودخل طلال ومعاه اثنين..هي من هول الصدمة شهقت بصوت غير مسموع..بس طاح من يدها الآيبود وطاح فوقه الكوب..
هي طاحت من عينها دمعة مو لشي على الآيبود اللي راح فيها تحت الكوب المكسور والشراب اللي انكب فوقه..
وصرخت بعد ثواني لان ارجولها احترقت من حرارة الشراب..توهم بس انتبهوا لها..
التفت طلال بحدة مقهور بس لما سمع صرختها الثانية ..ركض لها..
اما اللي كانوا معاه ولد خاله عبدالله >>عبدالله..22 سنة..طالب كلية التقنية<< وفارس انسحبوا لما فارس مسك عبدالله بسرعة وطلع وياه..اما داخل طلعت نهلة امهم وهي معصبة على الرزان..
نهلة:انا ساعة ادورك ياقليلة الحيا،وانتي طالعت لي برا تتمشين!!
وماراعت حالة بنتها اللي رجولها تحرقها..ودموعها مغرقتها وكانت منهارة عالأرض..
الرزان..حاولت تقوم وهي تعتذر:انا آسفة،كنت طالعة...
ماكملت كلامها الا وبكف على وجهها..حطت يدها على خدها وهي تتألم من داخل ومو حاسة بألم الكف اللي جاها من أمها..
طلال:مـاما،البنت محترقة رجولها اتركيها الحين
حاولت الرزان تقوم مرة ثانية وهي تلملم شتات نفسها..ونجحت محاولتها وقامت..
الرزان:خلاص ياطلال،انا آسفة ماكان قصدي...
طلال..قاطعها:ولا يهمك اكيد تفاجأتي لأننا جايين بهالساعة
نهلة..مارضت عن اللي يصير:بعد مترززة قدام ربع اخوك بهالقميص ياقليلة الحيا!!،وانا ادورك بغرفتك من ساعة وانا خايفة عليك اثاري حضرتك طالعة تترززين بالحوش...
الرزان ماسمعت اكثر،
خايفة عليّ هـا..طل بوجهي اذا كنتي خفتي عليّ بحياتك مرة يا أمي العزيزة..يا أغلـ...
، وماحست بعمرها الا دايخة والدنيا تدور فيها..طلال تداركها ومسكها قبل لاتطيح عالرخام والكوب المكسور..
طلال..التفت على امه:مـاما!!تحركي سوي شي،نادي خالي،الرزان رزونه حياتي قومي
ضربها خفيف على وجهها..لكن ماقامت..لاحظ انها تتنفس بصعوبة..
امه دخلت داخل بلاهدف!!..شالها هو بسرعة ودخلها للصالة وحطها عالكنبة..
نادى خالد اللي صحى بسرعة.. ظلوا نص ساعة يحاولون يصحونها ماصحت..ركض خالد ونادى على ريما..
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك