رواية اما غرام يشرح الصدر طاريه ولا صدود -102
خلود بهمس بيهاوشون ويقولون شوهتوا صورة الفندق..مسفر يضحك هههههه يعقبون..
طلعوا لجناحهم وهو مبسوط لأنها تسولف وتعلق على شكلها وشكله..
وتضحك لما تتذكر كيف زحلقت في المطر وطاحت وسحبته معها..
فسخت عبايتها ورمتها في سلة الغسيل..
ومعها حجابها..
وهو بدأ ينزل ملابسه ويسوي مثلها..
أنحرجت منه ودخلت تبدل في دورة المياهـ..
خذت لها حمام دافي وطلعت لابسة بجامة..
شافته نايم من دون قميص ولاغطاء..
رفعت الغطاء عليه وقبل تبتعد عنه..
مسك يدها وطيحها عليه..
صرخت بخوف لأنها كانت تظنه نايم..
تكلم وشعرها على وجهه..
مسفر آآآهـ ياعذابي..
مشتاق لك..
ضمها له بقوة وقبلها على رقبتها..
منعها تبتعد عنه وهو يذكرها إنها زوجته..
؛؛؛؛؛؛؛؛؛؛؛؛؛؛؛؛
قفلت الجوال بعد ماطمنت امها على حالها..
والتفتت على طالب اللي معصب..
شوق لا اله الا الله..
وش عندك معصب..؟؟
طالب أمك وش تحس فيه لما راحت لحرمة عمك وتركتك..
هذا وانتي مكسورة وعندك ولد يغث القلب..
شوق لايكون ناسي إن حرمة عمي هي أختك..
وبعدين خلك تحس ولو شوي بمغثة ولدك..
طالب بعدين مين قالك طيحي من على الدرج وإنكسري..
لو والدة مثل الحريم في المستشفى..
كان الحين ماخذه هذا النتفة ومريحتني..
شوق تضحك ههههههههههه اقوول قوم عطني الولد..
وعطني حليبه من المطبخ..
طالب بقهر أوووف كل يوم شغل كل يوم بزر..
شوق تشهق يـ الظالم خاف ربك..
أول بزر لك..ولو ماني مكسورة ماكنت بانتظر حضرتك..
طالب ما ابي وش اسمه هذا..
ما ابي انيمه ولا ولا انيمه ولامدري وشهو..
شوق ههههههههه لافديتك بتنيمه وبتبدل ملابسه..
وبتهتم فيه مو انت ابوووهـ ولا الولادة صعبة ع الفاضي..
طالب وش رايك اتزوج واجيب لك ضرة تساعدك..
ولما تقومين بـ السلامة اطلقها..
شوق بنص عين وش رايك تقوم وتنيم ولدك..
وبعدها تحضر عشاي انا واياك لأني جوعانة..
طالب بغيض هزولت لو تدري أمي إني اخدمك يابنت امك وش تقول..؟؟
شوق الله يرحمها بتقول كفو ياولدي قاوم بحرمتك..
طالب خليك تحملين مرة ثانية افقع وجهك..
راح المطبخ وشوق تضحك على تذمرهـ وهواشه..
من بعد ماسافرت امها الرياض وهو مشمر اكمامه ويساعدها..
قدم طلب على خادمة منزلية بس طلبه لازال في الإنتظار..
فكان مضطر يقدم إجازة مرضية لحتى ترجع أم شوق او تجي الخادمة..
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
دخلت الصالة وشافته جالس على الكنبة وذياب بحضنه..
يحاول يعلمه ينطق اسمه..
غازي ذياب..
ذياب مم...مه
هديل فديتك انا..
غازي ياهلا والله..
وين متخبية يا حمامة..
تعالي هنا جنبي..
جلست قريب منهم واخذت ذياب من حضنه..
نزلت راسها له واشرت على غازي..
هديل بحني ذياب من هذا..؟؟
ذياب ممـــوودي..
هديل ههههههههه صح شطووور..
غازي عقد حواجبه مين مودي هذا..؟؟
قوول غازي ولا باب مو مودي..
وش معلمه الولد انتي..؟؟
هديل تكتم ضحكتها مالي دخل هو يسمع ويردد..
غازي طيب وش يردد..؟؟
هديل مدري إساله..
غازي ذياب من انا..؟؟
ذياب مممــــ...ـودي
هديل هههههههههههههههههه
غازي بـ الله عليك وش يقول..؟؟
هديل استغفر الله إعرف من نفسك..
اخاف اقولك تقوم وتتوطانا..
وقفت وراحت المطبخ تحضر أكل ذياب..
ولما رجعت نادته بدلع..
هديل حبيبي..
غازي بوله يــآآآآآآآآآآآآ جنونه..
هديل مين اللي ناداك..؟؟
غازي توك تقولين حبيبي..
هديل قلت حبيبي يعني ذياب..
ماقلت جلمودي..
شالت ذياب..
ولاحظت غازي اللي يضحك..
لأنه فهم معنى اسم مودي اللي يناديه فيه ذياب..
يقصد جلمودي..
رد على جواله لما شاف اسم امه..
تطمن عن حالهم وسولف معها عن رشا وشوق..
طمنها عن هديل وذياب..
أنتبه على هديل لما جلست وهي تاكل ذياب..
قفل الخط وعيونه تراقبها..
مايبي يجبرها على هله أو مقابلتهم..
بس بعد مايهون عليه تكون علاقتهم فيها قاسية..
هديل بهدؤ كيف حالهم..؟؟
أبتسم برضى الحمدلله طيبين..
يسلمون عليك..
هديل الله يسلمهم..
احم غازي..
غازي بمحبة لبيه..
هديل علاقتك في إخواني وهلي كلهم..
ما ابيها تظل هواش وخصام..
غازي كنت افكر بنفس الشيء..
وفي علاقتك بأمي وخواتي..
هديل بجمود لاتفكر تقارن ولا شوي..
فرق السماء عن الارض..
أمك على عيني وراسي..
ماهو عشانها امك..لأني من سنين أحترمها..
بس خواتك ماراح اجبر نفسي اتقبلهم..
غازي ما ابيك تجبرين نفسك على شيء..
ولاهو ضروري تكونون مثل الخوات او القريبات..
تهمني راحتك ورضاك عندي بـ الدنيا..
هديل وهلي..؟؟
غازي حن رجال وعلاقتنا بتتعدل بسرعة..
أنا ما احقد على هلك طول ماهم بعيدين عنا..
المهم مايحاولون ياخذونك..
هديل بغرور ولو انا رجعت لهم..
غازي لا ياحبي فاتت فرصتك..
وبعدين كيف تتركيني وانا احبك..
نزلت راسها خجلانة من كلمته..
وهو كان متوقع ردت فعلها..
وقف وجلس قريب منها..
نزل ذياب على الارض واخذ أكله من يدينها..
قربها منه وهو يبتسم لإحراجها..
غازي وانا اقول الولد احمر على مين..
هديل بإرتباك جوعان..؟؟
غازي موووت..
هديل اممممم خلنا نطلع نتعشى برا..
غازي هممممم
هديل أانــ....ا باروح ابدل..
بعدت عنه بـ الغصب..
وراحت لغرفتها..
طلعت البالطوا تبعها وحجابها..
فكت شعرها ناوية ترجع تلمه مرة ثانية..
بس يدينه منعتها ..
دخل يدهـ في شعرها وقرب فمه من أذنها..
غازي تدرين إن بيني أنا وشعرك قصة حب طويلة..
من اول نظرة عشقته..
وصرت اتمنى اشوفه كل يوم وكل لحظة..
ضعفت كثير بأيام فرنسا وسويسرا..
لأنه كان يغريني لما يتمرد ويلتف على وجهك..
وآآآهـ لما قصيتيه..
حسيت بقهر عليه وعليك..
لاتفكرين تقصينه مرة ثانية يا جنوني..
ألتفتت عليه وحركت شعرها بعبث..
قدمت بعضه على كتفها..
ونزلت غرتها على جبينها..
ورفعت حاجبها كأنها تساله إذا كان كذا يرضيه..
غازي بوله عذآآآآب بكل حالاتك..
نزل البالطوا من عليها وضمها له بحنية..
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
خرجت من غرفتها..
بعد ماكلمتها سارة وقالت لها معها ضيفة تبي تعرفها عليها..
أنصدمت لما شافت جدتها مع سارة في الجناح..
صرخت بخوف لما شافت جدتها معقدة حواجبها ومقربة ناحيتها..
دخلت الغرفة وهي تنادي راكان..
غادة راكان الحق عسوولة هنا..
راكان ههههههههههه سوتها ام حسين..
غادة بتفقشني بعصاها..
خرج راكان لجدته وسارة اللي رافعه حواجبها..
بتشفي لحالهم..
راكان هلا والله ومرحبا أرحبي يا جدتنا الحلوة..
الجدة الله لا يحييك يا السرووق..
هاتوا الخاتم جعلكم البط اللي يبطكم..
غادة يووومه انا حامل لا تدعين علي..
الجدة والحامل تسرق ذهب أختها يـ السرووق..؟؟
هاتي الخاتم قبل ابلغ عنكم البليس..<<تقصد البوليس
سارة هههههههههههههه ماأنتي بهينه أجل بتبلغين البليس.؟؟
طلعوا الخاتم اشووف طلعووه..
غادة أنتي يا مخربة البيووت يا الحقوودة وش مدخلك بيتنا.؟؟
برا لا أشوتك بكرشي الحين..
سارة معصي ..ما نطلع الا بـ الخاتم يـ السروق..
شوهتوا سمعتكم في العائلة صرتوا الراكان السروق..
راكان كله من النتفة عبيد الوغد..
ناشر اسمنا في الواتس حق العائلة السروق راحوا المول..
السروق طلعوا البر..السروق عندهم موعد لـ وغدة الحامل..
سارة ههههههههههه عشان تدرون ما احد يغدر بعبيد..
والحين هاتوا الخاتم..
الجدة سويرة دقي على البليس..
سارة بجنان ياويلي ويلاه يا البليس..
سامحيهم يومه بيطلعون الخاتم من ورى خشمهم..
هاتوا الخاتم اشووف..
غادة أدري إنك تبينه لك بس لو تحبين خشمي ما عطيتك..
سارة وع يا خشمك..أبد نبي الخاتم ولا نسلمكم لـ البليس..
راكان عنبوا ابليس خليك محضر خير..
يومه فديتك الخاتم هدية من هديل لغادة..
وإذا مو مصدقتنا كلميها وهي تقولك..
الجدة تضرب بعصاها كذووب يارويكن تبيني أسود الوجه معها..
عطتني ذهوبها اخبيها لها..
والحين ادق عليها واقول سرقوا ذهبك يا هدييل..
تعقبون..هاتوا الخاتم يعني هاتوهـ..
عنبوا ابليسك كلمي البليس قبل يهربون..
غادة بزعل والله إنه خاتمي وحقي..
سارة لا اله الا الله ماصارت على خاتم كانكم مشفوحين ماعمركم عرفتوا الذهب..
غادة أنتي تموتين ويصير لك..
بس حامض على براطمك..
سارة وخري يومه انا اعرف كيف اخذه منها..
قربت من غادة اللي تخبت ورى راكان..
مسكها راكان من يدينها وهو يضحك على حركاتها في التخلص منه..
سارة وخر مكفختها مكفختها الوغدة..
هاتي الخاتم يا الدقماء العصلاء..
غادة والله ما اعطيك إياهـ..
قربت الجدة من راكان وضربته بعصاها وبعدته عن سارة..
اللي قدرت تفسخ الخاتم من يد غادة بسهولة لأنها سدحتها على الكنبة ..
وهي حامل ماتقدر تبعدها عنها..
سارة بإنتصار وش رايك يا أم حسين مايجيبها الا حريمها..
هذا الخاتم ورجعته لك..
واي شيء أنا في الخدمة..دقي تسمئة ومدري وشهو وانا عندك..
غادة يوومه والله حقي..
الجدة لا اشوفك توطوطين في بيتنا مرة ثانية..
وانت يارويكن بأبلغ عنك البليس أكيد إنك تسرق قروش البنك..
راكان ههههههههه لا تكفين لا تبلغين ههههههههههههه
سارة بنذالة يالله يومه..لقناهم درساً سوف لن ينسوهـ نيههههااااي..
غادة أنتي نذلة ماساعدتي جدتي من عدم..
سارة مو مثلك مادية دائماً..
طلعوا من جناح راكان وغادة..
وسارة مسكت الجدة في الممر..
سارة بنص عين أقول ام حسين وين الدراهم اللي أتفقنا عليها..
الجدة تبين دراهم يا سوير..
تعالي معي..
رجعوا لجناح راكان وصرخت الجدة فيهم..
وقف راكان منحرج من جدته ويمسح شفايفه..
سارة هههههههههههه قليلين ادب..
هجت من الغرفة قبل تصكها الجدة بعصاها..
الجدة ياقليلين الللادب..
هات قرووش عبيد اللي وعدته فيها..
من دون ما يقول كلمة طلع البوك من جيبه..
وحط بيدها ميتين ريال..
وغادة كانت ماسكة ثوبه ومخبية وجها وراهـ..
الجدة بإنتقاد خبي وجهك يـ الغبراء..
أعلمك السنع لما ولدتي حاسبتها لك في تفتر..
راكان اسمه دفتر..
الجدة أعقب ولا كلمة..ولك وجه يا اسود الوجه..
خرجت الجدة من الجناح وتلفتت تدور على سارة بس ماشافتها..
نزلت وقابلت ياسمين زوجت سلمان..
سلمت عليها وعلى بنتها الصغيرة..
الجدة إلا اقول يا بنتي كيف سلمان معك..؟؟
لايكون مذيك تراني اعرفه عقله مثل حبة الفول..
ياسمين تبتسم على التشبيه لا الحمدلله سلمان طيب معي..
الجدة الحمدلله..ترى مايخفاك..
إن زعلك أو هذي أم زوجك إن زعلتك لمي قشك وتعالي عندي..
وانا أدبرهم ..
ياسمين هههههههههه إن شاء الله..
الجدة أخوك اللي مدري وينه مابيجي هنا..؟؟
ياسمين لا هو مستقر في إيطاليا..
وإن شاء الله راح اسافر أزورهم بآخر السنة هذي..
الجدة ماتبين اخاويك هناك..
ياسمين أكيد بأنبسط معك..
سارة وردة لا تعشمين عسولة ترى تنشب في بلعومك..
الجدة بفتنة وانتي هنا يا سوير..
تعالي رجعيني البيت..
سارة من حظك إن زوجي بعد تسبدي ينتظرني برا ولا ماكنت بأوصلك..
الجدة بعد تسبدس برا..خليني اقوله عن سواد وجهك ..
سارة لا والله تكفين يومه ترا انا قدامه العاقلة الرزينة..
لا تخربين صورتي عندهـ..
الجدة مالت عليك وعليه..
؛؛؛؛؛؛؛؛؛؛؛
مدت يدها وحطتها بيدهـ اللي مادها لها..
جلسها جنبه ولم دهـ على كتفها..
قبلها على خدها وابتعد عنها لما بدت تكلم امها..
خلود هلا يومه....الحمدلله بخير.....إيه وهو طيب......
يسرك حالنا.......والله بخير فديتك........امممم لا موكثير........
يومه خلاص بعدين اقولك..............إيه.....ههههه إن شاء الله....
لا قولي لها ما ابي اكلمها.....لأنها نذلة زوجتي ولد اخوها وكذبت علي.......
مالي شغل مو هي صديقتي خليني اربيها..........طيب.....فمان الله....
قفلت الجوال والتفتت عليه بخجل..
مسفر أجل مهاوشة مراموهـ..؟؟
خلود إيـــه ولو سمحت لا تدخل بينا..
مسفر يبتسم لا ماراح اتدخل بس إذا حبيتي بافزع لك..
لأنها بصراحة رافعة ضغطي بلقافتها..
خلود ليه هي وش مسوية..؟؟
مسفر زوجتك لـ الشايب..
والمفروض تزوجك لـ الشاب..
خلود لأنها تدري إني ماكنت راح اوافق اتزوجك..
مسفر يبتسم شفتي إنتي بنفسك جاوبتني عن سؤالك لها..
هو صح أنا ماعرفتك إلا عن طريق مرام..
وهي اللي رشحتك لي وطلبت مني اتزوجك..
وانا بصراحة أعجبتني الفكرة وتزوجتك..
خلود بس لي حق عليها..
المفروض ماتخدعني كذا..
مسفر بغموض الإنسان لما يكذب على نفسه كذبة..
يعيشها مبسوط فيها ويتعلق فيها اكثر..
إذا شاف اللي حوالينه يشجعونه عليها..
رفع راسه لها وقبلها على جبينها..
؛؛؛؛؛
مثلي .. بعد .. يا ورد .. راحوا .. وخلّـوك ..؟؟
وإلا .. على غيرك .. من الورد .... ; طاحـوا ;
ياورد .. وإن مرّت .. ليالي .. ولا .. جـوك ..!
وإلا .. عقب .. ما جوك ... صدّوا .. و .. شاحوا
جالس داخل أسوار البيت القديم..
البيت اللي ولدوا وفيه وتربوا مع بعض..
يناظر مكان الورد اللي مات من سنين..
هي اللي زرعته وبعد موتها أهملوهـ..
مفتقدها كثييير..
يدورها بين جدران البيت ولا يلقى إلا ذكريتها..
مرت في بالها أخر ذكرى لهم في هذا البيت..
لما كانت منهارة ومتخبية منهم كلهم هنا..
كل شيء كان يهمها نثرته تحت ارجول ذياب..
لها حق تختار طريقها وتعيش..
بس موجوع على حالها لاتكون مقهورة ومخبية..
يدري إن غازي يحبها..
بس مايدري عن حالها هي..
أزعجه جواله ولما طلعه..
أبتسم بحسرة عليها..
رد عليها بصوت مشتاق..
هديل بمحبة توئمي الغالي..
هادي ياروح توئمك وقلبه..
هديل فجأة حسيت إنك تبيني..
هادي فجأة عاد..؟؟إحزري أنا وين..؟؟
هديل اممم مادمت حزرتني معناتها في مكان يخصني..
ومالي مكان الا في البيت القديم..
هادي ما الوم ابو ذياب عاجبه ذكائك..
هديل بخجل امم وش تسوي في البيت القديم..؟؟
هادي بعتب تبين الصدق..؟؟
هديل إيه..
هادي يتنهد أدور عليك فيه..
أحس إني فاقدك كثير..
هديل فدييييت روحك يا اخوي..
سامحني أدري إني قسيت عليك بـ الكلام..
بس ماحبيت احكي لاحد غيرك..
تحملني يا الغالي..والله بعدكم عني قساني..
أنت أخوي وتوئمي..ومهما بعدت عنك او قسيت..
بتظل الوحيد اللي ما احد يوصل مكانك..
هادي حلفتك بــ الله قولي الصدق..
مبسوطة معه..ولا مجبورة عليه..
هديل من دون ماتحلفني كنت باقولك الصدق..
في البداية كنت مجبورة عليه..
بس الحين أنا راضية ياهادي ومقتنعة..
هادي هذا اللي يهمني تكونين راضية..
متى بتنزلون السعودية..؟؟
هديل والله ما ادري ما اعتقد بننزل قريب..
تونا رجعنا المزرعة..
هادي ياحبكم لهذي المزرعة..
هديل ههههههههه عاد وش نسوي نحبها..
هادي يبتسم الله يحفظكم..
بأشتاقلك يا الغالية..
هديل امممم هادي سمعت ان امي تقول تبي تخطب لك..
هادي هههههههههه هي تخطط بس فركشت الموضوع..
هديل افا ليييه..؟؟
هادي بدري على الزواج..خليني اكون مستقبلي اول..
هديل اله يوفقك اجل..
هادي الجميع ان شاء الله..
فمان الله ..
قفل الجوال وهو يحس براحة نفسية بعد ماكلمها..
صوتها متغير كثير..
يحس فيها تبتسم ومبسوطة..
وهذا كان اهم شيء عندهـ..
؛؛؛؛؛؛؛؛
إللـــــــــي بدأ المـــأساة..ينهيــــــــــها ’’’
قفلت الجوال ودخلته بجيب بنطلونها..
ضربت على عسولة بخفة..
وركضت فيها لـ المكان اللي جالس فيه غازي وذياب..
شافته مشغووول بشيء في يدهـ..
نادته جلمووودي..
غازي يبتسم ياجنونه..
هديل بفضول وش اللي معك..؟؟
غازي اممممم ورقة شغل..
هديل بزعل تكذب علي يا جلمود..؟؟
غازي يضحك هههههههههههه إيه..
هديل المهم ماتكون تلعب بأسهمي..
ترى ابيعها لـ المافيا واورطك..
غازي الأسهم وراعيها فداك..
هديل طيب قوووم نتمشى الجو حلوو حتى فيه مطر..
غازي يالله شوي والحقك..
ظلت واقفة على الفرس تنتظرهـ..
ولما شافته مشغول على الورقة..
نزلت واخذت لعبة ذياب مرشة ماء..
صوبتها عليه ورشت الماء على وجهه..
حط الورقة على الطاولة ووقف بسرعة..
ضحكت على شكله ولا قدرت تهرب منه لما شافته يقرب منها..
مسكها ولم يدينه حوالين خصرها يمنعها تبتعد عنه..
قربها منه وهو يبتسم على ضحكتها..
هديل والله العظيم توبة ما اعيدها؟؟
غازي هههههههههه ما يجنني إلا إنك خوافة..
بس تتمردين وتسوين اللي في بالك وتشردين..
ألحين الكنز اللي كنت اقراهـ لو لمسه الماء..
تدرين وش كنت باسوي فيك..؟؟
هديل تبتسم لا ماتدرين..
غازي كنت بأخليك تكتبينها مرة ثانية..
وترددينها علي طووول عمري..
هديل بحيرة وش هي هذي..
غازي بحب أحبـــــــــــــــــك..
نزلت راسها وهي تبتسم برضى عن كلمته..
بس ماقالتها له..
وهو راضي بسكوتها..
لأن رسالتها حكت له اكثر من كلمة أحبـــــــــــــك..
رفعها على الفرس وجلس وراها..
ونادى ماريا تشيل ذياب..
كان حاضنها له ويردد لها ..
كلمة احبـــــك يا اطهر ذنوبي..
ألتفتت عليه ولأول مرة تتجرء وتقبله على شفايفه..
الرسالة ظلت على الطاولة..
مفتوحة تنبض بكل شعور حست فيه هديل بيوم لجلمودها..
متى ستعرف كم أهواك يا رجلا..؟؟
أبيع من أجله الدنيـــا وما فيها
لو تطلب البحر في عينيك أسكبه
أو تطلب الشمس في كفيك أرميها..
أنـا أحبك فوق الغيم أكتبهــا
وللعصافيـر والأشجـار أحكيهـا..
أنـا أحبك فوق الماء أنقشهــا
وللعناقيـد والأقـداح أسقيهـــا..
أنـا أحبك حاول أن تسـاعدني
فإن من بـدأ المأساة ينهيهـــا...
وإن من فتح الأبواب يغلقهــا
وإن من أشعل النيـران يطفيهــا..
يا من يدخن في صمت ويتركني
في البحر أرفع مرسـاتي وألقيهـا..
ألا تراني ببحر الحب غارقـة
والموج يمضغ آمـالي ويرميهــا..
كفاك تلعب دور العاشقين معي
وتنتقي كلمــات لست تعنيهــا...
كم اخترعت مكاتيبـا سترسلها
وأسعدتني ورود سوف تهديهــا..
وكم ذهبت لوعد لا وجود لـه
وكم حلمت بأثـواب سأشريهــا...
وكم تمنيت لو للرقص تطلبني
وحيـرتني ذراعي أين ألقيهـــا...
ارجع إلي فإن الأرض واقفـة
كأنمــا فرت من ثوانيهــــا...
إرجـع فبعدك لا عقد أعلقــه
ولا لمست عطوري في أوانيهــا...
لمن جمالي لمن شال الحرير لمن
ضفـائري منذ أعـوام أربيهــا..
إرجع كما أنت صحوا كنت أم مطرا
فمــا حياتي أنا إن لم تكن فيهـا...
تمــــــــــــــــــــــت بحمد الله ورعايته...
الســـــادة الـــــــــكرام:
ركـــــــاب سفينتنا "أما غرام يشرح الصدر طاريه ولا صدوود وعمرنا ماعشقنا"
قمت بإلقاء مرساتنا بـــ شــــاطىء يسمى النهاية ..
شـــــــــــــــــكراً بحجم السمـــــــــــــــاء ..
لكل القلووووب اللتي رافقتني برحلتنا هذهـ..
فوثقت بـــــي وسلمتني دفة القيادة..
الروايـــــة إهــــــــــداء لجميـــــــــــــع احبتــــي ..
ولــ جميع أفراد عائلتــــي الغالية..
ولكل عيــــن أبحرت معنا ولربما تبحر في يوم من الأيام..
بين صفحات روايتنا..
أشعر يحـــزن يستوطنني ..
لأني راحلة عنكم على قارب صغير لا يتسع إلا لي..
هــ أنا اغادر ميـــــنائكم أحمل معي ذكريات وكلمات لن انساها ابداً..
قبل الغياب..
أريد أن اشـــــــــــكر..
نوف بنت نايـــف...لوجودها بقربي دومــــاً..
ومهما قلت فلن اوفيك حقك غاليتي..
وردة الزيزفون... زعيمة رابطة هديل..
الإنسانة الرائعة الصـــامدة المدافعة عن الحق دائـــماً..
لقد كانت ردوودك غاليتــــي ذات وعي وإدراك كبير..
همســــــات وردة...زعيمة رابطة غازي..
أختـــــــي بل توئــــــمي..ما اجمـــل الحياة بوجودك غاليتي..
وبمشاكساتك ودفاعك المستميت عن غازي ورابطته..
الكثيـــــــرون كان لهم بصمــــات ووجود دائم معي..
لم اغفل عن رد إلا وقرأته بإذن الله...
هذهـ هي النهاية فلا تحرموني آرائـــــــــــــــــكم ..
طلب ورجــــاء دعوة صادقة بجوف الليل ..
أو وضح النهار لي ولعائلتي..بأن تكون الجنة مثوانا ومثواكم..
بـ النسبة لـــروايتي الأولى ""
ستعلــــن عنها المشرفة الغالية..بيـــــــاض الصبح بعد إسبوعين من اليوم..
لأني أريد أن تاخذ روايتي اما غرام حقها في القرأة..
قال النبي صلى الله عليه وسلم:من جلس في مجلس فكثر فيه لغطه فقال قبل ان يقوم
(( سبحانك اللهم وبحمدك اشهد ان لا اله الا انت استغفرك واتوب اليك ))
الا غفر الله له ما كان في مجلسه ذلك...
إلـــــــــــــــى الملتـــــــــــقى ..
في رحلة أخــــــــرى بإذن الله تعـــــــالى ,,,
أستودعكم الله اللذي لاتضيع ودائعه في الأرض ولا في السمــــــاء ..
صدووود’’’
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
تجميع / ♫ معزوفة حنين ♫ ..
اللهم لك الحمد حتى ترضى وإذا رضيت وبعد الرضى ,,, اضف تعليقك