رواية شرع ربي ولا اعتراض -73
ام ناصر/الف الصلاة والسلام عليك ياحبيب الله يامحمد....حمد الله على سلامتك يمه..
ام علي/خوفتنا عليك ياناصر..
ناصر بتعب/الله يسلمكم..
ابو علي/جهزتوا له فراش بالديوانية..
هيا/أي يبى جهزنا...ماتشوف ر يانور البيت؟
ناصر ابتسم لها بتعب...
ام ناصر/شلونك اللحين يمه..
ناصر/بخيريمه بخير..
ام علي/طيب ماقالوا لك من شنو ها التسمم؟
ابوعلي/اكيد وجبة فاسدة يعني من شنو؟من اكل البيت؟؟؟
نورة/ناصر شلون سووا لك غسيل معدة؟
ناصر/من صدقك؟؟عاد مالقيتيت غير ها السؤال تساليني اياه؟
ابو علي/خلاص لاتتكلم ياناصر بروحك تعبان...قوم يبى الديوانية انسدح هناك..
ام ناصر/خله ينسدح هني معنا بداره...
ابوعلي/لا هناك احسن اللحين عمه بيجي وعمه بو محمد بيجي ..خله هناك اريح...
ناصر/نورة جيبيلي ثياب من غرفتي ببدل.
نورة/ان شاءالله...
ام ناصر/احط لك لقمة تاكلها يمه؟
ابوعلي/سوي له شي مسلوق...بدون زيت ولابهار...
ناصر/انا مابي شي بروحي تعبان وابي احط راسي وانام..احس البنج للحين مدوخني...
ام علي/ماعليك باس يايمه ياناصر...
في محل مارينا مول,,,,
محمد كان تحت بالكافي وعبدالعزيز بروحه ودخلت وحدة تتفرج وبعدها بشويات دخلت وحدة ثانية...
الاولى كانت متبرجة وكاشفة وجهها وفاتحة عبايتها والثانية كانت ملتزمة وقفازتها بيدها,,,
البنت الاولى اللي كانت تناظر بعبدالعزيز قالت بدلع/عندك تنورة جينز قصيرة؟
عبدالعزيز/لا..
البنت/ولا بنطالين جينز؟
عبدالعزيز/لاوالله ماهو تخصص المحل....
وقفت الملتزمة قبالها وقالت/استغفر الله...
البنت الاولى/خير,,في شي..
الثانية/اختي المسلمة...ماهذا اللباس!!هل تتمشين بحفلة من الحفلات والعياذ بالله!!!
الاولى باحتقار/وانتي وش عليك مني بالله!!!
الثانية/انا ناصحة لك ليس الا!!خوفي على ان يتلاعب الشباب بعواطفك هو مادفعني لان انصاحك بماهو غائب عن ذهنك؟
الاولى بملل/تكفين واللي يعافيك بتشترين اشتري بحالك ماتبين مالك شغل بالناس؟قول شي ياْاخ؟
كانت تاكل عبدالعزيز بعينها وهو مرتبك ويلعن ابو الساعة اللي نزل فيها محمد للكافي!!!!
الثانية بعصبية/لاتستنجدي بهذا الشاب لانه حتما سيقف بجانبك اذا لم تكن غيرة على محارمه...
عبدالعزيز بتردد/عفوا بس المحل ..
الاولى بصراخ/ذلفي عن وجهي احسن لك؟؟اقول ممكن تطردها؟
الثانية بعد بصراخ/انتي اصلا وحدة مو متربية ولازم تتربين من جديد؟
وابتدوا بتشابك الايادي والشتم والسب والصراخ وعبدالعزيز عيونه طالعة من الخوف دق على محمد علشان ينقذه اللي دق على السكورتيه وففكوهم وطردوهم من المحل...
عبدالعزيز/اوووق طلعوا عيوني عساهم ..شقول بس!!
محمد/ههههه ليش اول مرة تصير لك وتشوف ها الموقف؟
عبدالعزيز/أي...
محمد/لا انا مشتغل بكذا محل من قبل وشايف ها السوالف فماتشكل عندي....
عبدالعزيز/والله ان دمي نشف خفت لايتذابحون وتروح وحدة فيهم وتطيح فوق راسي!!!
في بيت السبيعي,,
هنوف/ها..على وين العزم انا مااشوفك الا بتطلعين؟؟
ام بندر/يعني وين بروح...رايحة بيت عمك..
هنوف/وبيت عمي ماهي طلعة بالله!!!كافي انها تغير جو البيت,,
ام بندر/وانا رايحة اتسامر وارقص؟؟؟
هنوف/اجل وش بتسوين؟
ام بندر/انتي من صدقك لو تستهبيلن عليّّّ!!!يعني انا اذا رحت هناك بس حق المسامر والوناسة؟
هنوف/والله هذا اللي اشوفه؟
ام بندر/انتي مجنونة ومورادة عليك بانت السبيعي؟
هنوف/الصدق الصدق وش رايحة تسوين اجل؟
ام بندر وهي تلف شيلتها/رايحة اساْل عن مريضهم؟
هنوف/عمي مريض!!محد قال ؟؟وش فيه؟
ام بندر/مو عمك المريض...
هنوف/اجل منو؟
ام بندر باسف/شمعة الشباب عسى الله يقومه بالسلامة....ناصر اللي تعبان...
وقف قلب هنوف وقالت بهمس/ناصر..ناصر تعبان!!!
طلعت امها بدون ماترد عليها وهي واقفة مثل التمثال من الخبر اللي سمعته...
وركبت غرفتها وقفلتها وقامت تبكي...
ناصر تعبان!!!مريض؟؟؟كيف نورة ماقالت لي!!!
ليش توني اسمع واعرف!!!وش فيه؟؟؟
يارب ...يارب عافيه وخفف عنه يارب....
انا لازم اشوفه باي طريقة لازم...ابي اتطمن عليه....
مسحت دموعها وطلعت عبايتها تلبسها,,,
ام مصعب/سلامات حمود ماتشوف شر؟
محمد وهو متضايق لانه توقع ان فوزية تجي معها/الله يسلمك عمتي...شي بسيط مايسوى؟
ام مصعب/انا ماسمعت الا من مصعب يقول عمك فهد قايل له ولا يوم اتصل في امك ماقالت لي!!
محمد/ماحبت تضايقك وبعدين الشي مايسوى مثل ماقلت لك مجرد التواء...
ام مصعب بشماتة/الله يعين بنات الرياض..انا قلت اللحين نصهم على باب بيتكم يبون يتطمنون عليك؟؟
رفع راسه وهو متضايق من سخريتها وتوه بيتكلم الا امه دخلت...
ام مشاري/زارتنا البركة..
ام مصعب/تعالي قعدي انا مو جاية اتضيف البيت بيتي...
ام مشاري/مافي شي من واجبك...الا وينها فوزية مو كانت معك؟
ام مصعب/الضاهر انها مع رحاب يوم نجي كانت مع بنتها ويمكن انها للحين معها ولا راحت لخالها تسلم عليه؟
ارتاحت اعصابه شوي يوم عرف انها موجودة بالبيت وجت تشوفه..رغم ضيقته من كلمة عمته اللي حزت بخاطره بس شوفة فوزية اكيد بتخفف عنه,,,,
نجلاء/فيصل يقول محمد متعورة رجله وملفوفة؟
فهد بلامبالاة/وش يهمك بالموضوع!!
نجلاء قعدت مدام السالفة فيها بيت بو مشاري/شفيه!!من شنو متعورة رجله؟
فهد/اصابة عمل صابته بالشركة..وبعدين كلها بكلها التواء بسيط يعني يقوم ويقعد مافيه شي...ليش تسالين؟
نجلاء/بس...
فهد بسخرية/فكرتك بتروحين تسالين عنه!!!
نجلاء تبي تغير الموضوع/الا انت ليش مارحت الدوام العصر؟
فهد بصرامة/من خصوصاياتي...وبعدين تعالي بنتك وينها؟
نجلاء/فهد لاتحط نقرك من نقرها كاهي قاعدة تبكي تقول..
قاطعها فهد بصرامة/اولا مليون مرة قايل لك قدام عيالي انا بو فيصل ولاتسميني قدامهم فهد ابدا ومهما صار!!!ثانيا..انتي مايهمك تطلع وتدخل وانتي اخر من يعلم ولا تدرين هي وين رايحة؟؟
نجلاء/سالتها؟
فهد/صح واصريتي بعد!!
نجلاء/هي قالت لي انها بتجيب دفترها من صاحبتها بس انا نسيت!!
فهد بضيق/نجلاء انا ها الكلام مايمشي عندي!!!قسم بالله لو عرفت مجرد معرفة انها هي ولاغيرها طالع من البيت بدون شوري لو لبيت اخوي والله مايصير لكم خير؟؟؟
نجلاء/فهد انا ابي افهم انت كل اللي ينقال لك تصدقه!!ابي اعرف منو شافها ومتى وشلون؟
فهد/سالي نفسك..انتي لو بس تنتبهين عليها وتحسسينها انك متابعتها كان ماتجراْت تدخل وتطلع بكيفها وبدون شورك وعلمك!!
نجلاء/هي بنت يافهد والبنات مايقعدون بالبيت ..شوفة عينك..وانت ماتطلعهم غير خميس وجمعة؟؟؟
فهد/انا مو ملزوم اطلعها كل ليلة حضرة جنابها؟؟
نجلاء/لاتطلعها انت خلي السايق يطلعها هي مع اخوانها ولا ليش عندنا سايق!!!
فهد بصرامة وقوة/شوفي نجلاء..كلام زايد يمين وشمال ماراحح يصير لك انتي خير!!!والسايق للشياء الضرورية وبس!!!وبعدين طول الاسبوع عندها مدرسة وين تبي تروح!!هي متى تخلص مذاكرتها وواجباتها علشان تطلع؟؟؟انتي بس حطي بالك عليها اكثر وبلاش ها السوالف اللي مالها داعي وحاشية راسها فيها...وروحي بلغيها اني مااكلمها ولاابي اكلمها اذا ماعرفت غلطها واعترفت فيه واعتذرت عنه!!!!
طول الليل كانوا ناس طالعين داخلين على ناصر يسالون عنه..عمه وجيرانه وخواله واصحابه...
كانت ابتسامة بو علي مو مفارقته وهو يشوف خوف الكل على ناصر وسؤالهم عنه....
بعد الساعة عشر ونص سكر باب الديوانية لانه حس بتعب ناصر وانه مو قادر يقاوم اكثر وخلاه يروح غرفته يريح فيها وراح هو بعد غرفته يرتاح لانه ماارتاح طول اليوم,,,,
بغرفة ابوعلي,,,
ام علي/يعطيك العافية يابو علي ..وتستاهل سلامة ناصر..
ابو علي/الله يسلمك ويسلم عيالك...
ام علي بحزن/علي مامر يشوف اخوه..؟
ابو علي بقهر/لاتذكريني فيه..ولاحتى شفت وجهه !!لعن بودارك هذا اخوك عضيدك بالدنيا ماتمر تسال عنه؟
ام علي/رغم اني كلمته وقلت له ان اخوك تعبان!!اكيد انشغل؟؟
ابوعلي/لاتدافعين عنه..طول عمره كذا ولدك
ام علي/الله يهديه قول الله يهديه بس يابوعلي...
ابوعلي/انا مدري ها الولد لمتى بيتم كذا!!لمتى بيظل قاهرني وعال قلبي ومايهتم بحد من اللي حوالينه!!
ام علي قامت تبكي بهدوء...
ابوعلي/...........
ام علي/...................
ابوعلي/اليوم بكيت بالمستشفى يوم سمعت عن ناصر خفت عليه طول الوقت وانا ادعي ربي يشافيه ويقوم بالسلامة...قعد الشيطان يوسوس لي ومدري شجاني ..ماتخيلت الحياة بعده كيف بتصير...البيت بدونه شلون بيصير,,انا بدونه شبيصير فيني لاسمح الله!!
ام علي شهقت/ابو علي لاتقول ها الحكي واللي يعافيك!!عسى الله يقومه بالسلامة لنا..هذا ناصر,,شمعة البيت...اليوم البيت بدونه مر ماله طعم ولالون...عسى الله يحفظه بشبابه ويخليه لنا..كلنا خفنا على ناصر يابو علي...هذا الغالي اللي مفرح قلوبنا كلنا ,,كبيرنا وصغيرنا..ماتبينا نزعل عليه....وان شاءالله بيدي بزفه لعروسته وبدعي الله يرزقهم الذرية الصالحة يارب....بكت شوي وبعدها قالت بحزن...هو واخوه علي,,,,
بغرفة ناصر
دخل بعد تعب وارهاق وهو مكشر والضيق باين عليه وماله بالعادة يكون كذا بس التعب والمرض مايتركون بني ادم على طبيعته...
قعد بنص الفراش وهو منزل راسه بالارض من التعب,,,
اليوم كان كئيب من اوله من بدا يحس بالتعب وهو بالدوام لين نقلوه للمستشفى وبعدها ماحس على شي ابدا لين شاف ابوه الظهر جنبه وبعدها رجع مايحس بشي من اللي حوالينه من الابر اللي عطوها اياه...لين وصل فيه المطاف للبيت يوم وصل..كل اللي بقى له من ذاكرة انه وصل البيت تعبان ومريض وشاف امه وخالته وخواته وبعدها غير ملابسه ودخل الديوانية يرتاح بالفراش اللي جهزوه له ومامداه يرتاح الا وعمه وابو جواهر واصلين وبعدها بدوا الجيران واحد ورى الثاني وبعدها خواله وبعدها الشباب لين حس انه بيغمى عليه من التعب وابو جواهر اللي قال لهم يخلونه يرتاح وطلعوا وكاهو اللحين قعد بغرفته بروحه بيرتاح واخيرا بعد عناء يوم مرير ,,
وقف ورفع لحافه علشان يدخل بالفراش وانتبه على بوكيه الورد الاحمر اللي على المخدة شاله بيده وهو يدور فيه كرت ويوم شال الكرت ماكان مكتوب فيه غير(حرام عليك تخوفنا عليك كذا!!عسى الله يشافيك ويخليك لنا ولايحرمنا منك)
غريبة...من عند منو ها البوكيه,,,اكيد مو وحدة من خواتي...بس ياترى من مين ..من مين,,,,قعد يناظر بالكرت ويناظر لدرجة انه نسى سالفة التعب وانه يبي ينام لين وصل لنقطة براسه قام بسرعة من مكانه علشان يتاْكد منها وفتح درج مكتبه اللي كان مقفول وطلع منه كم ورقة ومن بينهم طلع كرت موجود...وقارن بينهم...نفس الخط اللي بالكرت الاول يطابق الكرت الثاني!!!
يعني من وحدة محددة بس منهي ياناصر منهي!!!
قطع عليه افكاره جواله وراح يشوف وابتسم يوم شاف الحبيبة يتصل بك..
ناصر/الو..
نجود/سلامات,,سلامات...وانا اقول ليش الدنيا حلوة اليوم؟
ناصر بضعف/ماتقصرين..يجي منك اكثر ياام ناصر؟
نجود/شوف ولد اللذين!!اسم الله علي!!!انا ام يوسف ولاام طلال بكيفه هو يختار بس ناصر مستبعد كليا ها الاسم!!
ناصر/شنسوي بعد لنا الله!!
نجود/ماعلينا...شفيك...عسى ماشر.,, يقولون تعبان؟
ناصر/من أي جريدة جاك الخبر,,اليوم ولاالرياض والا الاقتصادية؟
نجود/لامن جريدة الحياة!!!صدق وش فيك يقولون مسوي غسيل معدة؟
ناصر/سلامتك بس يقولون تسمم مدري شنو؟
نجود/وش ماكل انت؟
ناصر/والله مدري مو ذاكر اني ماكل شي من المطعم امس..
نجود/متاْكد!!طيب شقالوا لك المستشفى؟وشلون صحتك اللحين ؟
منال وهي تغمز لرحاب بدون ماتنتبه لهم فوزية/امك بتمشي كاهي تنتظرك تحت بالغرفة اللي بالصالة؟
فوزية بتردد/اللي قاعد فيها محمد؟
رحاب/أي...
فوزية شالت اغراضها/يالله اجل انا ماشية اشوفكم على خير..
رحاب/نورتينا...لاتقطعين عاد؟
فوزية/ورى ماتصيرين ادمية وتجين انتي لي!!
رحاب/انا عندي اثنين وش يطلعني فيهم ياحسرة!!!انتوا كذا غزلان بدون حسيب ولارقيب!!
فوزية/ههههه الله يخلي الغزلان لاامهم..يالله تصبحون على خير...
منال ورحاب/وانتي من اهل الخير,,,
نزلت وتركتهم بروحهم...
منال/يالله حمود هذا انا سويت فيك جميل وخليتها تجي تشوفك؟
رحاب/انتي متاْكدة ان عمتي مو هناك؟
منال/أي راحت لعمي فهد تشوفه؟
رحاب/حلو يعني البنزين صار قرب النار؟
منال/ليش تتوقعين تولع بينهم!!
رحاب بعيونها/هذا محمد مو مشاري؟.
***بغرفة محمد دخلت وسلمت وماكان في احد ابتسمت..
وتقربت منه...
محمد/قفلي الباب قبل لاتتقربين,,,
لفت للباب اللي كان مردود بس وراحت لعنده وسط ابتسامة محمد اللي تلاشت يوم شافه فاتحة الباب كله..
محمد بهمس/ليه عاد!!
تقربت منه وصارت قباله وقالت بنعومة/تبي الشيطان يكون ثالثنا!!
محمد لف للورد الي جنبه واللي كان من عندها وعطته الشغالة تدخله اول ماجت وقال/مو كفاية وردك وصل قبلك وانتي توك تجين تشوفيني!!!
فوزية/حمود وش فيك صاير حساس!!!
محمد/تخافين مني!!
فوزية/طبعا اخاف منك ومن نفسي بعد!!!المهم ماعلينا شلونها رجلك؟
محمد وهو يبتسم لها/طابت!!!من شفتك اللحين طبت وماعاد فيني أي شي!!!
اكتفت بانها تبتسم له..
محمد/تدرين لو ادري في وجهك كذا سحر عجيب يخلي الواحد يطيب بمجرد يشوفه كان ماتعنيت ورحت المستشفى وقابلتك وريحت عمري!!
فوزية بهمس/محمد!!محنا بروحنا!!
محمد/وبها المناسبة مايصير تعزميني بمناسبة سلامتي على مطعم نتعشى ولانتغذى ولاحتى نفطر ,,ونقعد بروحنا انا وانتي!!!
فوزية/ترى كثرانة استغلالتك استاذ محمد!!وبعدين على فكرة بعد الزواج بطلع من الدوام انت اللي بتصرف عليّ مو انا اصرف عليك!!كل مرة اعزمك؟
محمد/ههههه
فوزية/وي فديتك وفديت ضحكتك,,لو ادري من زمان قايلتها علشان اشوفك تضحك,,تصدق ان قلبي من قلت لي وهو مقبوض لين شفتك اللحين بنفسي وتطمنت ان مافيك شي؟
محمد/يعني شلون مافي عزيمة؟ماراح اشوفك ياعسل!!
فوزية ابتسمت له وبس!!!
بااخر الليل..
نجود/الو
فهد/هلا بللي تخفف عني همومي وتعبي!!
نجود/اسم الله عليك من التعب ان شاء الله فيني وفي كل الناس مو فيك؟
فهد/ومن قال اني برضاها تكون فيك عاد!!شفت تعبك مرة وياليتني ماشفته!!!عفت الدنيا بللي فيها وانتي تعبانة,,
نجود/ياحبيبي...
فهد/وراك مانمتي وين تقومين بدري وانتي للحين سهرانة؟
نجود/وانا شسوي في نفسي بالله!!تعودت كل يوم ماانام واصحى الا على صوت بعض الناس!!!انت تتوقع يجيني نوم وانا ماسمعت صوتهم!!!
فهد/والله هذا يعتمد على بعض االناس اللي انتي تقصديهم!!هل يجيهم قلب ويتركونك مايسمعونك صوتهم!!وهل بالاساس هم يقدرون يرقدون بدون مايسمعون ها الصوت الحلو؟
نجود انتفخ ريشها/يصير اجاوب بالنيابة عن بعض الناس؟
فهد/وليش بالله بعض الناس ماعندهم لسان يتكلمون من خلاله ويعبرون عن اللي بداخلهم!!
نجود بدلع/شوف هم بعض الناس هذولا اللي انا اقصدهم بخييلين!!بخيلين لدرجة ماتتصورها؟؟مشاعرهم يخشونها عني دايم وبالموت يالله يطلعون لي كلمة حلوة!!!
فهد بتحدي/قد كلمتك!!انا بخيل بمشاعري؟
نجود بنفس التحدي/طبعا قد كلمتي!!فهد انت تحط مشاعرك تحت مشاعري!!مافي مجال للمقارنة اصلا!!انا حبي لك بحر ماله حدود..
فهد/ياسلااام..وش يطلع حبي لك اذا كان حبك بحر ماله حدود؟
نجود/اممم مجرد نهر ناضب...
فهد/بلا فلسفة عليّ!!عارفة نفسك وعارفة قيمتك بعد ليش ها التغلي كله!!!
نجود/لانك بصراحة بصراحة وبدون زعل مقصر معي!!
فهد بتعجب/انا مقصر معك!!!انتي تعرفين ان مشاعري ماعمرها طلعت لااحد غيرك وتقولين اني مقصر؟؟؟عاد هذا كلام؟
نجود/فهد...ساعات احس اني املك العالم وانت بقربي وتحاكيني وساعات لمى يغيب صوتك عني وافقدك ولاتكلمني باسلوب مو حلو ومعصب ومو رايق احس اني شي لايطاق بحياتك؟؟
فهد/نجود.....انتي تلفين وتدورين تبين اقولك اياها صح؟بس لاتحلمين قلت لك ماراح اقولها لك الا ليلة العرس وبس!!!
نجود بخيبة امل/كيف عرفت اني ابي اسمعها!!!
فهد بغرور/لاني عارف نجود وعارف هي وش تبي تسمع مني!!بس مثل ماقلتي انتي امس بلا غزل لين ندخل على بعض!!
نجود بقهر/اوووف لو ادري ماقلت ها الكلمة!!شلون اللحين ماراح تقولها ابي اسمعها علشان ارتاح وارقد ولاترى مو راقدة؟
فهد بلامبالاة/عادي لاترقدين انا البارحة مارقدت وين المشكلة؟
نجود بطفش/اوووووووووف على اللي مايحسون لكن هذا كله مني انا جبته لنفسي!!!!
لبنى/والبيت كله منخبص عليه؟
عبدالعزيز باسف/لا مايشوف شر ان شاءالله تصدقين انا من سوالفك عنه حبيته رغم اني بحياتي ماشفته بس مواقفه كلها تبيض الوجه بصراحة..الله يقومه بالسلامة؟
لبنى/الله يسلمك...كلنا زعلنا عليه بصراحة بصراحة محد يتمنى له الشين وكلنا تمنينا له السلامة ويقوم بسرعة ماتشوف البيت بدونه شلون صاير...
عبدالعزيز/الله يقومه بالسلامة..
لبنى/تسلم...
عبدالعزيز/ها عمري..ماصارت ظروفكم احسن؟
لبنى بارتباك/لا ليش تسال؟
عبدالعزيز/ليش يعني!!!مو قادر اصبر ..
تنهدت بحرقة يوم تذكرت المعرس اللي كلمها ابوها عنه بالامس
عبدالعزيز/وش ها التنهيدة الحارة عاد!!
لبنى بخداع/قلت منت قادر تصبر...حبيت اقولك اني انا بعد مو قادرة اصبر؟بس على طريقتي!!
عبدالعزيز/حبيبتي انتي...لبنى...بتكونين سعيدة معي!!!
لبنى/وليش ماكون سعيدة معك؟؟انا اخترتك بنفسي وعارفتك وعارفة طباعك
عبدالعزيز/لابس ظروفي المادية ماهي مثل طروف اهلك وماراح تعيشين عيشتك اللي عايشتها عندهم!!بتعيشين حياة بسيطة معي!!!
لبنى بالم/حبيبي ليش تقول كذا!!انت اكثر واحد عارف ان فلوس الدنيا كلها ماتهمني!!!يكفيني وجودك وحبك بحياتي...طول ماانا بقربك وانام الليل على صدرك وتنام وانت متوسد كتفي عندي بالدنيا كلها...
والله ثم والله ثم والله..ولو تبيني احلف لك طول الليل انك تغنين عن العالم كله بقعد احلف لك بس المهم انك تصدقني وتصدق مشاعري؟
عبدالعزيز بانفعال/انا مصدقك!!وربي مصدقك,,بس خوفي لااهلك يصرون على فراقنا,,ساعتها وش بيصير ,,ةش بناخذ غير كسرت قلوبنا وحسرتنا وتعبنا!!!
كانت واقفة قبال النافذة وهي تبكي بدموع حارة,,,
كل الدنيا عندها كئيبة الليلة علشان تعب الغالي,,,,
يارب تشفيه وتحفظه لي يارب,,,يارب سوي فيني اللي تبي بس اتركه مرتاح بدنيته لانه مايستاهل!!!ياربي انت عارف بحبي له وخوفي عليه,,لاتاْذيه...يارب شافيه وعافيه واحفظه ووفقه,,,
مسحت دموعها وهي تدعي له بصمت وهدوء..وفكرت انها تدز له مسج بس شي بداخلها منعها,,,
وتنهدت بحرقة...لازم اقول لناصر واعترف له عن حبي له لازم!!!
لمتى بقعد انتظر ها الفرصة المناسبة تجيني؟؟؟لين يروح مني واضيع من بعده!!لا,,انا لازم اتحرك واقوله عن اللي بقلبي ناحيته لازم,,,
ياربي ساعدني وقدرني اقوله واصارحه,,,
اليوم الثاني الصباح..
ام ناصر/صباح الخير يمه
ناصر بتعب/هلا يمه صباح النور,,
ام ناصر بحنان/بشرني يالغالي عساك اليوم بخير..
ناصر/الحمد الله يمه...
ام ناصر/الحمد الله..بحط لك شي تاكله؟
ناصر/لايمه انا بروح المستشفى اول موعدي الساعة ثمان وقال لي الدكتور اروح له صايم وبعدها بفطر اذا رجعت!!
ام ناصر بخوف/تطلع على لحم بطنك من الصبح؟؟؟يالله شنسوي بعد اذا هذا حكي الطبيب...
ناصر وقف/يالله اقوم امشي على هوني بالطريق علشان الحق الموعد بدري..
ام ناصر/لا يمه لاتسوق وانت تعبان!!
ناصر/يمه عادي ماني تعبان كثير اقدر امشي اموري!!
ام ناصر باعتراض/لايمه شوف وجهك مخطوف!!مافي سواقة وانت تعبان!!دق على اخوك يوصلك بطريقه واذا خلصت يرجع لك ابوك بيكون قعد من النوم!!
ناصر/لا يمه علي اكيد متاْخر بدوامه انتي تعرفينه مايروح بدري وانا ماابي ااْخره زيادة!!
ام ناصر/هو متاْخر متاْخر مافرقت عاد!!!
ناصر/ويعدين ماابي اتعب ابوي انتي تشوفين صحته على قده بعد ..
ابوعلي دخل عليهم بدون مايسلم/منهو اللي صحته على قده ياولد؟
لفوا له اثنينهم..
ابو علي/لايكون تقصدني انا يانويصر؟
ناصر ابتسم له ,,
ابو علي بفخر/لايابوك انا بعدني شباب..انا اشب منك ومن اخوك,,,اخ بس لو تحصل لي واخذ بنية صغيرة وحلوة كان يطلع شبابي!!! مو امك وخالتك الا جابوا لي السكر من بدري!!!
ام ناصر/والله نجود بنتي تقول السكر اللحين ماركة مع الكل!!ماكو احد ماعنده؟
ابو علي/عشنا احنا على كلام بنتك!!الا الصدق الملعونة ماكلمتني امس..شلون عيونها؟
ام ناصر/لا الحمد الله على قولتها للحين الفصل يتنافضون مني!!
ابو علي/هاذي بنتك بس حق التخريع والهواش!!طالعة على ناس في بالي!!!
ام ناصر/منهم!!
ابو علي/اقول ناصر يالله يبى نمشي لانتاْخر على موعدك...
رحاب/هاي حمود شلونك؟
محمد/بخير وانتي بنتك طول اليوم اذاعتها مفتوحة ماتسكر ,,بث مباشر؟
رحاب تسندت على الكنبة بتعب/اذا انت تقول انها اذاعة وبث مباشر ان شاءالله انا شقول؟
محمد/اقول رحاب مو مهم انا وانتي شنقول ابوها شيقول؟
رحاب وهي تناظر بنتها/ابوها غير عني وعنك..يموت وهو يسمعها تبكي يقول هو معظم الشهر بعيد عنهم هي واخوها واذا رجع بس يبي يسمعهم عاد يصارخون ولايتذابحون مو مهم,,اهم شي حسهم يكون عالي ويسمعه؟
محمد/ماله حق!!!يعني عيالك مو طبيعين!!
رحاب/المهم خلك من عيالي وقولي شخبار العصفورة الامسية؟
محمد/أي عصفورة؟
رحاب/بلاش عصفورة ,,الغزالة اللي كانت معك بروحكم؟
محمد ابتسم/اها..تقصدين فوز؟
رحاب فتحت عيونها وقالت بشبه مسخرة/بالله!!صار اسمها فوز!!!خبري فيها فوزية...ف ,,و ,,ز,,ي,,ة,,فوزية مااكبر اسمها وهو طايح لي فوز الاخ الكريم؟
محمد حط رجل على رجل وحب يقهرها/والله احلى اسم سمعته بحياتي!!!فوزية...يحسسك بشنو...كانها وحدة متفردة بشخصيتها,,متفردة بكل مافيها...عيني عليها باردة ؟
رحاب/والله!!!اقول اخلص وعطني الزبدة ترى محد مهد لكم الا انا واختي عسى الله يخلينا لكم؟
محمد/وش ها المنة انتي واختك!!هي جاية تشوفني وماراح تطلع اذا ماشافتني!!!قالوا هي واختها خلونا نشوف بعض,,والله حالة عليكم!!
رحاب/بالله!!!منو مهد الطريق لكم غيرنا!!!ان شااءلله انت كنت تبيها وعمتي موجودة معليش ماراح اصدقك اذا قلت لي عادي!!ادري فيك عيونك اصلا تقول انك كنت تبيها بروحكم بس!!علشان تشوف خوفها عليك مباشر ...
محمد/لاتعليق....
رحاب/لاوالاخت طايحة لي كل شوي...شلون محمد وش اللي صار له وعساه ماتعور ومدري شنو؟
محمد باهتمام/بالله!!سالتك عني!!شقالت؟؟تعالي قولي كل شي بالتفصيل الممل؟؟؟
رحاب بنحاسة/لامعليش بقوم اشوف اذاعة البث المباشر علامها مافتحت للحين مالها بالعادة!!!
محمد/شوف النذلة!!اقولك تعالي قولي وش صار تروحين تشوفين بنتك!!من زينها عاد بسمة وهي طول الوقت تبكي!!!!!
في وقت الفسحة,,,
ملاك/ليش تسالين؟
نجود/ودي ازورها بشغلها واتعرف عليها وعلى طبيعة شغلها بالمركز,,,انتي ماودك؟
ملاك بخوف/لالالا..المكان مو حلو ماانصحك تروحين,,انتي انخلقتي لااماكن ثانية؟
نجود باحتقار/وش ها الحكي الخربوطي؟وانا وين قايلة لك بروح...كلها بكلها مركز امك مديرته...حابة اشوف هناك الحياة شلون وكيف يتعاملون مع ها الفئة من الناس؟وبعدين انتي اذا ماودك لاتروحين انا ابي اروح....
ملاك تغير الموضوع/والله مدري مااشوف امي تتكلم عن احد يزور المركز بعدين خلنا من ها السالفة اليوم منورة بالاحمر..عجيبة صاير شي خيالي ..ولا في الاحلام!!
نجود/هذا غزل؟
ملاك/أي...ومديح بعد!!
نجود/مشاءالله وبعد!!!
ملاك/بس....
الجازي من وراهم/ابلة نجود..
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك