رواية مظاهرة نسائية -16
فؤاد وهو يحاول يرسم ابتسامه على ملامحه الهاديه الحلوه بنفس الوقت: انا اسف لو قلت شئ زعلك وضايقك..يلا امسحي دموعك مااحب اشوفها..
مسحت دموعها وابتسمت ابتسامه هادئه اضافت لملامحها سحر خاص..
نزل فؤاد يده من يدها وهو يبي يتكلم بس مو عارف
اسماء: في خاطرك شئ؟
فؤاد: فيه
اسماء : قول اسمعك
فؤاد: اسماء صار لنا ممملكين على بعض 5 شهور..
هالوقت كانت ام سعود بيدها البخور ومعاها الخادمه بيدها عصير وكيك بس وقفت ام سعود مكانها ودخلت الخادمه حطت الصينيه وطلعت
اسماء: قصدك نتزوج؟
فؤاد: اكيد يعني لين متى بتبقين في بيت وانا في بيت خلاص تعالي معاي ونرتاح
ام سعود فرحت...هذي اللحظه اللي تبيها من زمان
انها تشوف اسماء مرتاحه مستقره ببيت زوجها...
اسماء وهي تقوم: ابوي ماصار له سنه متوفي وتبيني اسوي عرس..وين صارت هذي
فؤاد: ومين جاب طاري عروس وحفلات...مالها داعي اصلا انا ماارضاها لعمي..
دخلت ام سعود بهالوقت حتى تحط النقاط عالحروف وتحط حد لهالموضوع
ام سعود: زوجك معاه حق
اسماء: يممممه
ام سعود: يمه كلام زوجك صحيح لين متى انتي ببيت وهو ببيت خلاص مصخت صار لكم
5 شهور..
واذا عالحفله مانبي عرس ولاشئ..
خلوها عشاء عائلي وخلصنا..
احتارت اسماء بس فكرت ان كلام امها معقول ..
فؤاد: هااسماء شقلتي؟
اسماء: خلاص شوركم وهداية الله
ابتسمت ام سعود ولفت تطالع فؤاد اللي من الفرحه راح باس راس خالته
فؤاد: انا وين لقى مثلك وربي مافي مثلك ياخالتي
ام سعود: هههههههههه يلا الف مبرووك عقبال ماافرح في عيالكم
طالع فؤاد في اسماء حتى يحرجها بس ابتسمت بخجل وطلعت عنهم..
وصادفت فارس بوجهها
فارس والنوم باين بعيونه: ها شفيك طايره
لكنها كانت بعالم ثاني ولا ردت
فارس: هاا شفيها ذي مجنونه
دخل عليهم
فارس: هلااااااااااا ولد خالتي هلا والله
راح وسلم على فؤاد
فؤاد: كان لاجلست رح كمل نووم
فارس: شفيها هالخبله طلعت طايره
ام سعود ببتسامه: خلاص اختك بتروح بيت زوجها
فارس وهو يقلد الحريم: كلوووووووش عقبالي
فؤاد: ياليت والله تترك خرابيطك وتعرس
فارس: لاياشييييخ انا اتزوج رح منااك بس
اخسر حريتي علشان بنت تخسي اللي هي
فؤاد: اسمع مني واخطب ماراح تندم
فارس: يااخي مستغني عنك وعن افكارك اللي بتضيعني
ام سعود: ههههههه الله يوفقكم ياعيالي
بعد ماطلع فؤاد من بيت خالته وهو محمل بأحلام ورديه تنتظره مع شريكة حياته اسماء
ام سعود حست انه الوقت المناسب جاء حتى تكمل فيه وصية زوجها وحبيبها ابوسعود
وتخلي الفرحه فرحتين...
وتخطب اليوم دينا وتكلم ابوريان بهالموضوع حتى يتفق مع سعود
وبأعتقادها لو سعود عصب لتصرفها وزعل بس يتزوج دينا بيفرح ويرتاح
وترتاح بنته رزان معاها لانها لقت ام ثانيه ترعاها وتهتم فيها
جلست اسماء جنب امها السرحانه وسألتها..
اسماء: هاالغاليه في شنو تفكرين؟
ام سعود: افكر اكلم عمك على موضوع بنته واخوك
اسماء بصدمه وهي تقوم:سعود وافق؟
ام سعود: لا طبعا..وتبوني انتظره لين يوافق؟ هذا اللي قاصر لو انتظرته ماراح يوافق اصلا ووصية ابوك لازم تتنفذ انتظرت كثير وماعاد لي صبر مع اخوك العنيد
اسماء وهي تحاول تهدي امها: يمه الله يهداك شهالكلام انتي كذا بتخلقين بينك وبين سعود مشاكل ماراح تنتهي ..
يمه اقنعي سعود قبل وبعدها خطبوا البنت
ام سعود بأصرار: ماتعودت اخلي كلام الصغار يسيرني ويمشيني...ابوك هذي رغبته من قبل مايموت اقل شئ نسويه بحقه انه ننفذها
اسماء: اي يالغاليه مااختلفنا الوصيه بتتنفذ بس موبهالسرعه ..
ماتعرفين عصبية سعود..
ماتضمنين شراح يسوي
ام سعود: بياخذها ولو زعل يومين وبيرضى ولدي واعرفه زين..
اسماء وهي تحس ان امها مصره مافي شك: براحتك
صعدت اسماء بسرعه لجوري ودخلت الغرفه لقت جوري تسمع لراشد وتخربش بقلم اسود
جوري: بسم الله خرعتيني يادبه
اسماء وهي تجلس جنب اختها: لحقي لحقي بتصير معركة بلاط الشهداء في بيتنا الليله
جوري وهي تصفق: حلوو بشجع
اسماء وهي تضرب جوري على راسها: ياخبله اتكلم جد امك بتخطب دينا اليوم من عمي
جوري: شلووووون؟ سعودووه وافق؟ متى؟ انا ماعندي خبر
اسماء: طالع هالخبله اخوك ماوافق امي بتحطه قدام الامر الواقع
جوري: يؤؤؤؤ مايصير سعود ماراح يسكت
اسماء: هذا الكلام يلا شنسوي الحين لازم نوقف امي
جوري وهي تفكر: طيب نكلم خالتي امال
اسماء: وخالتي ايش بتسوي؟
جوري: تجي هنا تكلم امي تهديها .. بس عسى ماكلمت عمي؟
اسماء: لالا قالت بتكلمه المغرب
جوري: اجل بسرعه خذي جوالي ها كلمي خالتي خلها تجي تتصرف
اسماء وهي تاخذ الجوال: طيب
التلفون يرن يرن وترد اماني
اماني: مرحبا
اسماء: هلاوغلا اماني وين خالتي
اماني: هلااسماء شلونك
اسماء: انا بخير بسرعه ابي خالتي
اماني: ليييش عندكم اسرار
اسماء وهي تنزل الجوال وتكلم جوري: هذي اماني كيف اتصرف مع لقافتها
جوري وهي تسحب الجوال من اسماء: يادبه بلا لقاااافه لااجي امعص رقبتك يلا اعطيني خالتي
اماني: مافيييش اول اعرف وش الموضوع وبعدين انادي امي
جوري وهي بدت تعصب: اماني عاد الموضوع مهم وين خالتي
جات ام فؤاد وسمعت اماني
ام فؤاد: ها من متصل
اماني: صاحبتي
ام فؤاد: صاحبتك وانتي تقولين بنادي امي هااتي عارفه لقافتك
اماني: اووه يمه عااااد
ام فؤاد: الوو
جوري: واخيرا وينك خالتي لي ساعه ابي اكلمك
ام فؤاد: تعرفين بعد لقافة بنت خالتك ها يمه خير وش بغيتي عسى مافيكم شئ
جوري: مصيبه ياخالتي تعالي لنا بسرعه
ام فؤاد: يؤؤ شصاااير تكلمي
جوري: لما تجين بتعرفين كل شئ بس تعالي بسرعه
ام فؤاد: احكي الحين طيحتي قلبي الله يغربل عدوك
جوري: خالتي والله امي
ام فؤاد: بسم الله عليها اختي فيها شئ
جوري: لااااااا مافيها شئ بس بتتهور وتخطب دينا لسعود ياخالتي ولو يعرف سعود بيسوي مصيبه انتي عارفته
ام فؤاد: اوووف الله يرجك من بنت كذا وقفتي قلبي هذا الموضوع
جوري: ياخالتي الموضوع مو صغير مثل ماانتي متصوره تخيلي نخطب لسعود وهو ماعنده ادنى فكره
ام فؤاد: طيب طيب انا بجيكم الحين حبيبتي
جوري: عفيه خالتي لاتتأخرين
ام فؤاد: من عيووني
جوري: باي
سكرت جوري وانسدحت : يالله امي شفيها مو معقوله تسويها
رن جوال جوري وكان خالها مساعد متصل
جوري وهي ترد : ياهلا والله بحبيبي اللي مااتحمل غيابه كل هالغيبه تغلي ولاانا شوقي بزياده
اسماء: تكلميين منو يادبه هااا
جوري: اووه هذا خالي مساعد شفيك
مساعد: الوووو
جوري: هاااه وياك وياااك
مساعد: وجعاااه ان شاء الله شفيه رقمك مشغول
جوري: كنت اكلم خالتي امال
مساعد: غريبه شعندك؟
جوري: اووه مادريت ياخالي باللي صاير
مساعد: كالعاده انا لي الله اخر من يعلم يلا بالتفصيل الممل احكي لي
وقالت جوري كل شئ من طقطق للسلام عليكم
مساعد: عدل زين تسوي فيه اختي
جوري: وش اللي عدل ياخالي انت الثاني
مساعد: شوفي اخوك ذا دلووع قولي لي وين بيلقى احسن واحلى من دينا هااا
دينا جوهره ماتتعوض ..
مايشوف حال بنته المسكينه
جوري: شرايك تجي تتغدى عندنا من زمان ماشفناك ومنها تكون موجود لو لاسمح الله صارت مشكله
مساعد: من عيوني هو سعود رجع من الشركه ولا؟
جوري: ليه انت مو بالشركه؟
مساعد: لا طلعت اسدد فاتورة جوالي
جوري: لسه مارجع
مساعد: طيب الحين بجيكم
جوري: تكفى مر البقاله خالي وخذ لي بيبسي
مساعد: لاااا شرايك اجيب لك كرتون مو افضل؟
جوري: يالييت تسوي في بنت اختك خيير
مساعد: اووه لا انا اقول بجيب لك كرتون بيبسي وكرتون جلكسي
شقلتي
جوري: يابعد عمري يامساعد ويلوموني بحبك يااحلى خال
مساعد: انقلعي قلعك الله يامال العافيه
جوري: اوووه ليييش
مساعد: انا توني مسدد فاتورتي الف ونص مفلس حدددي
جوري: زعلت رووح ماابي شئ
مساعد: زعلي وحطي ريشه بعد على راسي
جوري: اهئ اهئ باااااي
مساعد: بايوو ياحلوو
سكر مساعد وهو يضحك ومر البقاله واخد جالكسي وبيبسي لبنت اخته وصديقته جوري
وراح للبيت وبعد عشر دقايق وصلت ام فؤاد
ام سعود تفاجأت ليه الاثنين جايين بوقت واحد
وش السالفه .. بس ام فؤاد هدتها وقالت لها انهم جايين بتغدوا معاهم
ام سعود: هههه السالفه كذا؟ اجل ليه مامريتوا على اختي انتصار بطريقكم
سكتت ام فؤاد .. هذا اللي ناقص تجي وتسمع اللي بنقوله.. مهما كان صحيح هي اختهم الثالثه بس بعد دينا بنتها وبتزعل لما تعرف ان سعود مايبيها...
ام فؤاد: انتصار فاضيه تترك ديمووه وهاني ورامي تعرفين لطيفه تعبانه ياحليلها
ام سعود: اي يحليها تعبت هالمره الله يقومها بالسلامه
مساعد: اوووووه يلا بلا رسميات ومجاملات وين الغدا
نزلت جوري لهم ولما شافت الكيسه اللي بيد خالها نطت عليه وحضنته
مساعد: اااي رقبتي راسي خشمي وااع بعدي عني
جوري وهي تبعد وتضحك: ههههههه مشكوور يااعز خال
مساعد: الله يسلمك يلا يلا الغدا جوعاااان حدي..
ام سعود: طيب ننتظر وصول سعود وفارس
اسماء: فارس من ساعه هنا وينه
ام سعود: طرشته يجيب من السوبر ماركت كم غرض هالسواق الجديد مايفهم والله
مساعد: خلاص ننتظره اجل..
وجلست العايله مع بعض ووصل فارس وسعود وتغدوا سوا
قامت من فراشها بتعب وطلعت للصاله لقت ريان يدخن سجاره عصبت اولا لانها ماتحب ريحته اصلا ولانها حامل وتلوع كبدها منه ولانها تخاف على ريان منه
لطيفه وهي تسحب السجاره وتطفيها بالطفايه: كم مره قلت لك ريان مااحبه
ريان وهو يلتفت لها: لي قمتي حبيبتي روحي ارتاحي
لطيفه: مليت من النوم خلاص..وين هاني ورامي؟
ريان: هاني مع ديموه ورامي بغرفته
لطيفه وهي تقوم: بروح اشوف رامي فديته ماذاكرت له امس ماقدرت بشوف وش كاتبين له بكراس الملاحظات
ريان: براحتك..ترى شريت غدا من برا تلاقيه باالفرن
لطيفه وهي تبتسم : ربي لاخلاني منك يالغالي
ريان وهو يرد لها الابتسامه: ولامنك ياام رامي
دخلت لولدها لقته واقف مقابل المرايه وبشعره جل وجالس يعدله ويسويه سبايكي
لطيفه وهو تروح لعنده: يؤؤ من متى هالحركات
رامي: ماما كل الاولاد المدرسه يسوون كذا اسمه سبايكي
لطيفه: اي عارفه اسمه سبايكي بس انت صغير ماما خلي هالحركات للكبار
رامي: انا مو صغير وكل ربعي يسوون مثل كذا..وبعدين انا ابي جوال
لطيفه: لا مافيه جوال انت ماتحتاجه بهالسن
رامي وهو يرمي المشط ويجلس عالسرير: اووه ليش
كل اصحابي عندهم وانا لا
لطيفه وهي تتخصر: وتبي n70 ولا الشيطان يابعدي
رامي: لا ابي الخياله 2
لطيفه: اعوذ بالله من هالجيل
رامي: هاا شقلتي
لطيفه: انا مالي دعوه قول لابوك
طلع رامي اللي متغير هاليومين وجلس قرب ابوه
رامي: بابا
ريان: هلا
رامي: ابي جوال
ريان: ليه وش الطاري
رامي: بابا كل اصحابي معاهم جوالات وانا لا مايصير ابي اصير مثلهم وابي اخر نوع باالسوق
ريان وهو يبتسم ويطالع ولده: والله وكبرت يارامي وصرت تتشرط بعد
رامي: بابا مو احنا عندنا فلوس واغنياء لازم نصرفها ونشتري احسن الاشياء
ريان وهو يحط يده على ركبة ولده: لا غلط يابابا..صحيح احنا عندنا فلوس والحمدلله بس بعد التبذير حرام,, مو الله سبحانه وتعالي يقول بالقران ان المبذرين كانوا اخوان الشياطين...ترضى تكون شيطان؟
رامي: لا
ريان: خلاص بابا انت الحين صغير مو محتاج للجوال عندك تلفون البيت استخدمه اذا تبي تكلم اصحابك..لما تطلع من ابتدائي اوعدك اشتري لك احلى جوال واطلع لك احلى رقم بس الحين لا .. شرايك؟
رامي وهو يفكر: وش الفرق الحين وبعدين انت بتشتريه كذا ولا كذا
ريان: كلامك صح بس ماابي الناس تقول هذولا عندهم فلوس كل شئ يبيه ولدهم اخذوه له ابيهم يقولون ريان ربى ولده عدل لين صار رجااال عاقل مدرك صح؟
رامي وهو يحضن ابوه: صح بس انت وعدتني تشتريه مو تنسى يبه
ريان: اي قول يبه مو بابا يادب
رامي: هههههه هذي ماما علمتني كذا
ريان وهو يضم ولده اكثر لحضنه: امك دبه مثلك...
ماجد رفع سماعه التلفون وهو خلاص حاسم امره ولاتراجع...
عمته سعاد عاالخط الثاني: هلا مجود هلا حبيبي شدعوه يالقاطع
ماجد: هههه هلا والله عمتي شلوونك وحشتيني
سعاد: اي قص علي يالقاطع ولا يقول ازور عمتي وجدتي اشوفهم
ماجد: اممم اعذريني ياعمتي انشغلت بالدراسه
سعاد: الله يوفقك ياولد اخوي ها كم باقي عليك وتخلص هالتمريض ماصارت
ماجد: هههههه باقي بس التطبيق شهرين واتوظف ان شاء الله
سعاد: الله يوفقك يايمه...
ماجد: عمتي ابيك بموضوع
سعاد: قول حبيبي امر
ماجد: امممم اوووه مو عارف
سعاد: هههههه كأني عرفت..اممم ليكون اللي بالي بالك
ماجد: اي ابي اتزوج
سعاد وهي طايره من الفرح: جد؟ كلوووووووش كلووووش
ماجد: عمتي ههههههه فضحتينا
سعاد: خلني اعبر عن اللي داخلي بس من بنت الحلال ولا تبيني ادور لك؟
ماجد: عمتي انا في بالي بنت هي اخت صاحبي محترمين مرره وعلاقتي بأخوها حيل قويه انتي تعرفينهم بعد
سعاد: هذا خويك فارس ولا واحد غيره
ماجد: الا هووو ماغيره
سعاد: اي ياحييهم ناس محترمين مره ونعم مااخترت ياولد اخوي وتبي جوري صح؟
ماجد وهو منحرج: اي هذي جوري
سعاد: الا كم عمرها خبري فيها بالثنويه
ماجد: ويي خبرك عتيق ياعمتي صارت بالجامعه
سعاد: ياحليلها..
ماجد: ها شرايك؟
سعاد بارتباك: اممم بس امك ياماجد...
ضاقت الدنيا بماجد يوم جابت عمته اللي بحسبة امه هالموضوع...
سبحان الله الناس تفرح تهلهل لما ينذكر طاري امهم الا ماجد المسكين
اللي امه .. شنقول عنها ماتستحق كلمة ام.. من تطلقت من ابوه رمته وتزوجت واحد غيره وجابت بنت يمكن عمرها بعمر جوري...
بس ولامره شافها ولاعرفها.. بس يسمع كلام عنها
وعايش ببيت مع ابوه وتجي تزوره كثير عمته اللي مو متزوجه رغم ان عمرها قريب 40 وجدته
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك