رواية راحت روحي من محجر عيوني -3
سلطان:- لاحــــــوول حرام الواحد يعبر عن مشاعره
الجزء الرابع
عهود "اتكلم عليا و هي داشه البيت" شو ها خالج جريء
عليا: لا تزعلين عهود ترا يعتبرج شرات اخته عشان جي ماخذ راحته معاج.
عهود: يعني انا كبر امج..
عليا"تضحك"هههههه يا الخبـله..
سكتوا يوم جافوا ناصر واقف عند باب الصاله..
عليا: هلا ناصر..
ناصر:- حد بييكم..
عليا: ربيعة عهود معزومه ع العشىىى
ناصر"يسال عهود" منو سعاد..
عليا"محتره" انت شدراك باسمهاا..
ناصر ايير علياا " تعالي تعالي اباج ابسالفه..
ودت عهود الاكل المطبخ .. و سارت حجرتها ..تتعدل و تتكشخ عشان سعاد بتييها بعد ساعه يمكن..
و حجرة ناصر..
عليا: خيـــــر
ناصر: وحشتيـــــني .
عليا: لاااااااا
ناصر: ليش ما اتصلي ايبج من بيت اهلج جي خليتي سلطان اييبج..تدرين ما احبه يسولف معاج..
عليا: ليش عمري..ها خالي
ناصر:- بس اصغر عنج بسنه و احس وايد ماخذ راحته معاج..
عليا:- حليله سلطان..عيوني ع بالي كنت في نادي الامارات اطالع المباره..
ناصر:- من زمان خلصنا انزين..
سعاد:"اطالع حجرة عهود" متى غيرتي حجرتج وايد حلوه..
عهود:- تقريبا من شهرين..
سعاد: اخوج ناصر داخل..
عهود: ليش دوم تسالين عنه..
سعاد: تبين الصراحه..
عهود: اكيد و شو احلى من الصراحه..
سعاد:- تدرين انا احبج وايد لانج ربيعتيه..و مرات اضايج من ناصر يوم تشكين منه عشان جي ما احبه..
عهود: بس ناصر طيوب صدقيني..
سعاد:- المهم شو بغيتيني..
عهود: ابا ارمس مايد الشحي بالتلفون..
سعاد"مستغربه": عندج رقمه..
عهود: لاا اباج اتساعديني..
سعاد"اتفكر" اتعرفين وين يشتغل ..
عهود: هي في المطار..
سعاد: هني في راس الخيمه..
عهود: هي شو بلاج..
سعاد: يا الحماره جان قلتي من زمان..كنت خليتج اجابلينه و ترمسين وياه بعد..
عهود"تترجاها":- يلا انجابله باجر دخيلج..
سعاد: و ناصر اخوج..
عهود"خيبة امل" اوووووووف ناصر دوم واقف بطريجي..
سعاد:عهود انا عندي خطه ما اباج تفهميني غلط شو رايج اجرب من ناصر اخوج.
عهود: شوووووووو شو قصدج
سعاد: اووه قلتلج لا تفهميني غلط و بعدين اخوج اكبر عني بوايد لا اتروح افكارج بعيده..ابرايج كنت بساعدج..
عهود: انزين كملي ..
سعاد: خليني اجرب من اخوج و بها الطريجه كل مره بييبج بيتنا و بنطلع وين ما تبين شو قلتي..؟؟
عهود"تسالها" كيف يعني تجربين منه و عليااا..و بعدين ناصر وايد يحب علياا
سعاد: جفتي دوم تفهميني غلط..انا اقصد اعامله شرات اخوي..صدقيني انا مب من النوع الي يخرب ع الغير شو بلاج عهود ما اتعرفين اختج سعاد..
عهود: خلاص خلاص ع راحتج..المهم اجوف مايد الشحي..
سعاد: انتي خليني هالايام اجرب من اخوج..و بعدين جوفي كيف بكون ميود ع قولتج جريب منج..
عهود"تحضن سعاد" فديتج ربيعتيه..
اتعشوا و خلصواا..و طلبت عهود من ناصر يوصل سعاد..ناصر.بغا علياا اتيي معاه بس عليا قالت انها تعبانه و مب رايمه..
و في السياره ناصر و عهود يوصلون سعاد..فكر ناصر يطالع من الجامه ..رفع عيونه انصدم ان سعاد يالسه اطالعه..
ناصر في خاطره "لاحول من وين عرفتها عهود..""
عهود: سعاد باجر عليـج محاضره فاضيه ولا..
سعاد"من غير ما اتشل عيونها من ناصر":- لا حبيبتي ما عندي..انتي عندج..
عهود: هي عندي ..
سعاد: وين تشتغل ناصر..
ناصر"متفاجيء " بالداخليه ليش...؟؟
سعاد"برقه":- بس اسال الله يعينك..
ناصر"يطالعها " بالعكس وايد مرتاح بوظيفتي..
عهود: هي عشان شفتات من جي مرتاح..
سعاد: عسى دوم مرتاح..
اضايجت عهود من سعاد لانها اتحسها بالغت حبتين..
بعد ما وصلوا بيت سعاد..
سعاد:- تفضلـــــواا..
عهود: مشكوره الغاليه..
سعاد: اوكى مع السلامه ناصر..
ناصر: الله يحفظج..
بعد ما دشت سعاد البيت..ناصر يرمس عهود..
ناصر:- ربيعتج باين عليها حبوبه..
عهود:- وايد احبهـا..
ناصر: حبيها بس احذري منهاا ..
عهود: ليش..
ناصر: من غير ليش..
كثرت زيارات سعاد لبيت عهود عشان بس ناصر يوصلها.. و عهود ابد ما قطعت رسايلها بمايد الشحي..
اتفقت عهود مع سعاد يرحون يوم الاربعاء المطار..عشان يجوفون مايد بعد ما يخلصون من آخر محاضرة..
و في السياره..
عهود:- انا خايفه.
سعاد: جوفي وصلنا المطار بندش المطعم بنتصل به..و انا بسير بعيد عنكم اوكى..
عهود: لا و الله بتخليني ابروحي..
سعاد: ما اظن بياكلج يلاااا ..
دشوا المطعم ..اتصلت سعاد بالقسم الخاص الي يداوم فيه مايد..
سعاد: اخ مايد الشحي..
مايد: امري الشيخه..؟؟!!
سعاد: ممكن اتيي فوق المطعم اباك في سالفه..
مايد: أي مطعم !! انا في الدوام..
سعاد:- ما عليه تراني في مطعم المطار ممكن اتيي فوق شويه..
مايد:- امممم منو معاي..
سعاد"اطالع عهود المرتبكه" بعدين بتعرف الحين ممكن اتيي لاني مستعيله..
مايد: فالج طيب..ثواني و اكون عندج..
سعاد"واقفه اترمس عهود" يلااا باي الحين بييج..
عهود: تمي معاي اخاف منه بموت
سعاد: مب فاضيه لج عندي مكالمه مهمه وايد وايد..اذا خلصتي دقي لي اوكى..
عهود: تعالي وين رايحه..
بس سعاد طلعت من المطعم..يلست عهود اطالع ساعتها مرتبكه الحين شو اتقوله ..حست بالندم لانها سمعت كلام سعاد الخبله..
رفعت عهود راسها يوم ياااه صوت مايد ..
مايد"مستغرب":- عهود !!
عهود"مرتبكه" انا ..هي انا عهود..
يلس مايد ع الكرسي مجابلنها..
مايد: ما توقعت اجوفج هني انتي شدراج اني موجود هني..
عهود: انا اعرف عنك كل شي..
مايد: و الـلــــــــه..
نزلت عهود راسها مستحيه..وحست ان ويها صار شرات الطماطه.
مايد: عندج مشاكل..
عهود"تهمس:- لااا
مايد"يستفسر":- ها عيل..
عهود:- ابا اجوفك..
مايد: عشان شو..
عصبت عهود فردت عليه من غير تفكير..
_انا مب يايه اطر منك كل كلمه شو تبين و شو تبين..
طالعها مايد مستغرب ما توقع ان عهود جي بترد عليه..
مايد"يبتسم: ليش عصبتي ما قلتج شيء..
عهود"يخبل يوم يبتسم" بس ابا اجوفك عندك مانع..
مايد"يضحك" حبيبي عندي دوام..
عهود في خاطرها اللـه قال حبيبي..
عهود:- شو قلت..؟؟
مايد طلب لها عصير و كيكه..
مايد:"يطالع ساعته" اسمحيلي ما اروم اتم وايد وايد بس اكيد بنجابل مره ثانيه صح..
عهود"طايره من الوناسه" انت تبا اجوفني مره ثانيه..
مايد: اذا ما عندج مانع..ترا ابا اعرف وايد اشيااا..
عهود: لحظه انت شدراك ان اسمي عهود ..
مايد: ولا تزعلين يا اسيرة الهم..
عهود:متلومه" لا نادني عهود عشان ما احس اني بعالم النت..
يلست سعاد ع الكرسي تحت الشير..اتصلت بنـاصـر..
كانت بتصكر بس سمعت صوته..
ناصر:- الـووووو
سعاد: شحالك ناصر..
ناصر"سكت شويه" منو معاي..؟؟
سعاد:- انا سعـاد
ناصر: اهلا سعاد خير عهود فيها شي..
سعاد: لا ما بلاها شي بس بغيت اسولف معاك احس بعمري مضايجه..
ناصر: خير شو بلاج..
سعاد: الظاهر انك مشغول..خلاص بتصل بوقت ثاني..
ناصر: و الله ارمسي شو مضايجنج..
سعاد: محد عندي يسمعني قلت يمكن تتعطف علي..
و يلست اتسولف مع ناصر..لي ما اتخلص عهود من مايد..
بعد عشر دقايق طلعت عهود ادور سعاد..اشرت لها سعاد ..و صكرت عن ناصر..
عهود"تمسك ايد سعاد" يودينـي عن اطيح..
سعاد: شو مستانسه..
عهود: و الله فديتج سعاد تدرين يبا يجابلني مره ثانيه اونه الحين ما عنده وقت
سعاد:- زين و الله شي تطور..
عهود: كنتي اترمسين منو..؟؟
سعاد"مرتبكه" لا اتحاتين ارمس ربيعتي لي ما اتيين ..
عهود: مشكوره سعاد يلااا عن نتاخر عن البيت..
تتوقعون بتكرر لقاء مايد و عهود.. و ممكن حد يجوفهم ..؟؟
و اتظنون ممكن سعاد اتاثر ع ناصر .و تقدر تكسبه . ...؟؟
و ممكن تتغير مشاعر ناصر صوب عليا .. ولا بتم مخلص لها ...؟؟
الجزء الخامس
دشت عهود طايره من الوناسه..فتحت شنطتها و طلعت رقم مايد يلست اتبوس الورقه..اخيرا برمسه ..كانت تجلب ع الشبريه يوم دشت عليهاا عليااا
عليا: شفيج بسم الله عليج..؟؟
عهود: ماشي ..اممممم "فكرت اتخبر عليا بس غيرت رايها" تدرين نجحت في الامتحان..
علياا:- مبروك..الا بسالج..؟
عهود: امري..
عليا: ممكن اتقولين لسعاد اذا ييت البيت اتخلي حد من اهلي يوصلنا ابصراحه مصختها كل مره ناصر يوصلها شو عيبتها السالفه..
عهود"مرتبكه" ليش شو صار.
علياا:- ولا شي بس انا ما اباها يوصلها و ربيعتج ما ارتاح لها..
عهود: تطمني حتى ناصر ما يرتاح لهاا ع العموم معاج حق اتغار ع ريلج"وتغمز بعيونها"..
فرتها عليا بالمخده و طلعت من حجرتها..
عهود اترمس عمرها يا رب تحملين عشان تكتمل فرحتكم انتي و و اخوي ناصر..
فكرت لو عبدالله بعده حي جان زوجته سعاد..دمعت عيونها يوم تذكرت عبدالله اخوها..
وقت المغرب كانت علياا و عهود في مركز اللولو..يشرون اغراض البيت..
بعد ما خلصوا فكروا يمشون جمعية راس الخيمة يكملون اغراض البيت.. و من هناك يمر عليهم ناصر....
عبروا الشارع...و قبل لا يدشون الجمعيه اتفاجاو بسلطان خال علياا طالع من الجمعية بنفس الوقت..مع رفيجه..
وقف ربيعه بعيد شويه..سلطان يدق قلبه يوم يجوف عهود..
سلطان:- انا مب قايلنج قولي اذا تبين تطلعين مكان و معاج احم احم..
استحت عهود وردت لورا..بس كانت تسمع سلطان شو يقول..
عليا:- ناصر يابني عيل انا ليش متزوجتنه.
سلطان"يطالع عهود":- يلاا يلاا اركبوا السياره.
عليا:- اقولك ناصر بيينا و بعدنا ما كملنا اغراض البيت..
انتبهت عهود ان رفيج سلطان يطالعها فصدت الصوب الثاني..بطلت عيونها يووم سمعت سلطان يقول علياا..
سلطان"يساسر علياا" زوجينـــــي عهود داشه خاطري..
عليا:- انت بتكمل طريجك ولا الم عليك خلق الله..
سلطان: ول ما احيد امج مصريه..
كانت عهود مضايجه بس مب من كلام سلطان بالعكس كانت اجوف دمه خفيف الي كان يضايجها..نظرات رفيج سلطان..
انتبهت ان سلطان و عليا يالسين يرمسون فسوت مالـت ع رفيجه..اتفاجات يوم يرد عليها و يسوي مالت..
عهود في خاطرها ها باين عليه قليل ادب..فاجدمت من علياا
عهود: عليا يلااا بنتاخر..
سلطان: ليش مستعيله حبوبه..
عليا: اووه سلطان بسك..
سلطان :اوكى اذا ما ياكم ناصر دقي لي انزين..يلاااا جماال.
عهود في خاطرها هااا يعني اسمه جمال مسود الويه سعاد بتعرف دواك..
عليا: ان شا الله يحفظك..
دشوا الجمعية..يشرون اغراض للبيت..
ناصر:- انزلي من السياره..
سعاد:- اخاف اكون جريبه من البحر و الدنيا ليل..
ناصر: افا اتخافين و انا معاج..
سعاد"مسويه روحها مستحيه":- زين انا خوافه شسوي.
ناصر:- تعالي ما بتخافين..
نزلت سعاد من السياره و يلست ع البحر جريب من ناصر..
سعاد: الجو رهيب..
ناصر: يمكن عشان انتي موجوده.
سعاد: تتطنز صح..
ناصر: و الله ارمسج جد..
سعاد: ناصر..
ناصر:- عيونه.
سعاد: ما اتفكر اتييب عيال..
ناصر: كل بامر اللــــــــــه ..و بعدين ما احب انسولف بها الموضوع ممكن..
سعاد: من عيوني و الله..
ناصر: كلميني عنج..انا موليه ما كنت منتبه لوجودج خلال الفتره الي طافت موليه..
سعاد: شو تبا اتعرف..انا حاضره..؟؟
عليا واقفه ع الشارع تتصل بموبايل ناصر بس محد ايرد..
عليا: اخوج ما يرد اكيد نزل مكان ولا حد عنده من الربع.
عهود: يلاا نركب تاكسي..
عليا: بتصل لسلطـان...
عهود: اذا رفيجه معاه ما بنسير شكله ما يستحي..
عليا"تضحك" شو سواا
عهود:- ماشي سخافه..
شويه ووصل سلطان..بعد ما ركبوا السياره..
سلطان"محرج" كنت عارف ان ريلج ما بييج..
عليا: مدري ليش ما يرد علي..
سلطان: مدري كيف متحملتنه..
عهود في خاطرها ها ما يستحي حشم انزين انا اخته..
سلطان:- عهود
عهود: نعم.
سلطان: شحالج..الغاليـه..
عهود"شويه بتضحك" طيبه..
سلطان: ها ماشي عزيمه اليوم..
عليا: لا ماشي ..
سلطان: ما اتفكرون تعزموني عفانا الله انا خالج..
عهود:- حياك البيت بيتك ..
سلطان:- خلاص عيل نازل معاكم الحين.
عليا"تحاول تتصل بناصر" ويه انت ما صدقت..ويه ها ما يرد..
سلطان:- بلاج ويه ويه..
وصلوا البيت..نزلت علياا كان بالها منشغل بناصر,,و نزلت عهود..
سلطان:- صج ما تستحون قلتلكم بنزل سويتوا لي طاف..
نقعت عهود من الضحك ما قدرت اتيود عمرها..
عليا:- اووه انا افكر بـ ناصر ليش ما يرد عليه..يلااا تعال دش..
سلطان: جمال يترياني مره ثانيه ابا عهود ادق و تعزمني..
عهود"متلومه" ان شا الله
و دشوا البيت..
بعد ساعتين دش ناصر البيت محرج..علياا تترياه في الصاله..و عهود تكتب رساله لـ مايد الشحي..و اتخبره عن سلطان..
وقفت عليا يوم جافت ناصر داش الصاله..
ناصر: انتي وينــــــج ..؟؟
عليا:- انا و الا انت اتصل بك ما اترد..
ناصر: زين يوم اتصلتي عرفت انكم خلصتوا سرت عند اللولو ما جفتكم وين سرتوا..
عليا"محرجه": لا و الله و ليش ما اترد علي اتصلت بك اكثر عن مره ..
ناصر: كنت عند الشباب..
عليا"تصرخ علي" و الشباب كانوا معاك بعد يوم ييت تاخذني من عند مركز اللولو..
ناصر"مغير السالفه": منو يابج البيت..؟؟
عليا"منفعله":- ما يخصـــــــــــــك..
سمعت عهود صوت عليا و ناصر واصل لي حجرتها..فتحت باب الحجره اتوايق..اول مره اجوف عليا جي محرجه ع اخوها..
ناصر: ارمسي معاي بالزيـن ..
عليا: انت وايد تغيرت حركاتك..
ناصر:- شو اتشكين فينـي..منو يابج البيت..
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك