رواية قناع حبيبي -1

الكاتبة ::: حنان خالد
زين اصغر بنوته فالعايله 19 سنه ودلوعتهم بنت ناعمه وهادئه وفي نفس الوقت لها حركات خبال خخخ عنيده لابعد درجه
وهي بنت رومانسيه حالمه لابعد درجه تحب تكتب خواطر و اشعار عن حياتها وتعشق قصص الحب الي تخليها دايما تتخيل فارس احلامها على انه يكون شخص غير عن كل الشباب تبي في شي يميزه عن غيره مميز في شكله في صفاته وحتى في حبه لها باختصار كانت بنت خياليه
همس اخت زين الكبيره 25 سنه رسامه ماهره تمارس الرسم كهواية بس تشتغل دكتورة اطفال شعرها بني طويل خذته عن ابوها عكس زين الي شعرها كستنائي على امها سمرتها حلوه صايره حنطيه وملامحها حلوه كثير عينها واسعه ولونها بني غامق وشفايفها كبار وبدور اختها المتوسطه 23 سنه كانت دايما تسخر منها وتقولها كانها شيماء علي بعد العمليه مع ان شفايف همس راكبه مع ملامحها كثير بس بدور كانت تغار من كل من بالنسبة لعلاقة همس معا اختها زين علاقة اخويه كلها حب وثقتها فيها كبيره وتعتبرها بيت اسرارها عكس علاقتها مع اختها المتوسطه بدور كانت ماتحتك بها كثير ليش ان بدور تغار منها كثير لانها دلوعة البيت
راح اقولكم عن اختهم بدور اكثر بالمواقف الجايه ان شاء الله

همس وهي مندمجه بالرسمه صرخت مره وحده: لااااا ياربي كيف نسيت كان لازم اشتريها قبل لا ابتدي

زين الي كانت منسدحه على سرير اختها ومندمجه تقرا روايه جديده فزعت من صوت اختها: شفيييييج خرعتييني !!

همس وهي شوي وبتبكي: كنت ابي اشتري فرشاه للتحديد امس ونسيت شوفي الرسمه الحين بتنشف وبتخترب

زين ببرود : طيب روحي الحين اشتري سالفه هي !!

همس : ااااه احر ماعندي ابرد ماعندج اقولج بتخترب وسكتت شوي تدرين عندي فكره اكتب لج المواصفات الي ابيها وتروحين تجيبينها واقعد انا اعدلها لي ماترجعين اوكي؟

زين: وشنو باحصل بالمقابل

همس : يمه منج ماتسوين الشي الا بمقابل

زين : من اختي وغمزت لها

همس : هههههههه خلاص خلاص اممم تذكرة سينما لفلم

زائد راح اروح معاجThe Time Traveler's Wife

زين شهقت هذا الفلم من متى تنتظره وما كانت لاقيه حد تروح معاه لان ساره بنت خالها ماتحب السينما وهي الوحيده الي ترتاح لها

زين :هييييييييه ابشري احلى فرشاه لاحلى هموووس باروح ابدل لي ماتكتبين لي المواصفات

همس: قامت تضحك على خبال اختها صحيح انك شمعة البيت يا زيون

وقف راسي سيارته عند المكتبه ونزل

راسي انسان معقد عنيد متعجرف لابعد درجه ويا ويله الي يتحداه او يكسر كلمته صدق انه وسيم واي بنت ممكن تطيح بغرامه ملامحه عربيه اصيله اسمر وشعره اسود يوصل لي اخر رقبته مموج بس ناعم جسمه معضل شوي وله خصر يعني باختصار اي بنت تتمناه بس للاسف وسامته تغطي عليها اخلاقه

وفي هاللحظات وصلت سيارة زين عند المكتبه نزلت بسرعه ماكانت مهتمه كثير بشكلها لانها كانت مستعجله تبي تجيب هالشغله وترد لاختها وعلى الرغم من هذا كانت تلفت الانظار ببرائتها وجهها وملامحها الحلوه خصوصا عيونها الناعسة وخصله من شعرها الكستنائي طايحه على وجهها اتجهت لجهة فرش الرسم وهي تدور: قياس 13 قياس 13 وينك يا .... ااااااااها حصلتك

توها بتاخذ الفرشاه الا يد غطت على يدها انتفضت زين من الفزعه والتفت على الى واقف وراها كان اطول منها توصل لي كتفه وكان لازم ترفع راسها عشان تشوف وجهه له سكسوكه في نص ذقنه و فم قاسي مايدل على الرحمه شواربه خفيفه ومعدله انف طويل مثل الخنجر بس عينه كانت مغطيه بنظاره سودا وتساءلت بينها وبين نفسها(الحمدلله والشكر الحين ليش لابس النظاره الي يقول الشمس ماليه المكان)اكانت تدري باللي تخبيه هالنظاره وانتبهت ان الفرشاه الي تبيها صارت في يده وكانت الاخيره

زين:لو سمحت انا خذتها قبلك(عشان اختها بتقاتل هع هع )

وطلع صوته كأن جاي من بعيد كان عميق وهادىء ووو .... خطير :بس صارت لي..

وسكت

زين حست بدقاات قلبها تتزايد و بشي بداخلها ماتدري شنو هو بس الي تعرفه ان صفةالعناد الي تتميز فيها بدت تظهر واذا عاندت ماتترك الشي الا محصلته

زين : شوف لا تحلم اتحرك من هنا الا معاي هالفرشاه

راسي بهدوؤ وهو بدا يتحرك كانه بيمشي : خلاص خلك واقفه هنا لي باجر

ومشى عنها

زين قهرها من قلب وصارت لازم تتصرف بأي طريقه وبدون شعور صرخت : اااااه حرااامي لحقوني يا ناس سرقني لحقوني

والناس الي كان يشتري دفتر رسم لولده واللي يجرب الاقلام التفتو كلهم على زين وهي للحين مستمره بالكذب

مسكوو راسي اثنين من السيكوريتيه وسألو زين يا أخت شنو سارق منج

قربت زين من راسي والضحكه ماليه فمها وسحبت الفرشاه من يده بحركة سريعه وهي ماشيه بخطوات سريعه : سرق فرشاتي

جاو بيلحقونها عالمقلب السخيف بس بحركه وحده من يده وقفهم راسي بمعناة خلوها

دفعت بسرعة مبسوطة كانها حققت انجاز عظيم وماكانت تدري شتركت وراها في قلب ذاك الانسان الغامض

الجزء الثاني

وصلت البيت والابتسامه ماليه فمها شافتها امها : خير زيونه اشوفك مبسوطه فرحيني معاج

زين : لا بس هموس كانت تبي فرشاة رسم ورحت جبتها لها

امها بابتسامه : وهذا الي مفرحك ؟؟

زين :ايي هههههه بس صادني موقف تقاتلت لي ماحصلتها وشرحت لامها كل الموقف الي صار لها

خلوني اكلمكم عن شخصية ام زين تقدرون تقولون الام المثاليه الي تكون صديقة بناتها وفي نفس الوقت الام الجاده بناتها مايخبون عنها شي ابد لانها دايما تكون الام النصوحه الي تدلهم على طريق الصح الا بدور الي من ايام الثاانوي تعرفت على بنات مستواهم الاخلاقي في الارض نسوها تربية امها واحترامها للكل

ام زين بعد ماسمعت سالفة بنتها قالت وهي تضحك على حماس زين : طيب يا بنتي العنيده روحي عطي اختك اغراضها وفكي الناس من عنادك

في غرفة مظلمه ماتنيرها الا شمعتين كان جالس على كرسيه مثل النمر متمعن باللوحه الي قدامه بس تفكيره كان بعيد ..كان يفكر بالبنت الي شافها اليوم ماكان يفكر فيها على انه انعجب فيها هو كره النسوان من زوجته الاوليه كان يفكر في هذي البنت لانها اول وحده تعانده وتكسب حتى على اسخف الاشيا ماكان احد يضاهيه في عناده

كان رايح يشتري كم فرشاه عشان يكمل رسمته بس هالبنت نسته كل شي

مابقى شي على معرض الرسم وهذا مو اول معرض له اسم راسي مشهور بكل البلاد صحيح ان يحب الرسم وماله شغل غيره لكن عنده نسبة اسهم كبيره اكثر من النص في احد اكبر الشركات فالبحرين لان كان مالك شركه لحاله بس قرر يستقيل قبل سنتين وهو للحين مادخل ال 28 ويستقل وقته في هوايته الي هي الرسم كان ابداعه سبب شهرته رسوماته كانت خليط بين المعاناه والجراه الحب والكراهيه كلها تجتمع في رسمة وحده باختصار كان " فنان "

مسك فوق عينه باصابعه مكان الندبه البارزه كانت تمتد من حاجبه اليمين الي تحت عينه يعني تغطي منطقة الجفن كامله وناظر نفسه بالمرايه :ماكون راسي لو ماخليتك بين يدي وحركتك مثل ماابي والايام بيناا

مرت الايام وزين نست السالفه الي صارت بالمكتبه

وبيوم كانو مجتمعين كل خالاتها والجده في بيت ابو زين وراح اعرفكم عليهم

الجده فاطمه :مره طيبه ماعندها الا ثلاث بنات تحب احفادها مووت بس تحب تحش بالناس خخخ

احلام بنتها الكبيره(زوجها احمد):ماعندها بنات عندها طلال 29 سنه متزوج وعنده عمر 10 شهد عمرها 3 سنوات

راشد 25 سنه يدرس طيران اخر سنتين ويتخرج

وعلي 19 سنه انولد قبل ساره بشهرين ويصير اخوها بالرضاعه

سعاد المتوسطه:وهي ام زين وهمس وبدور

لولوه بنتها الصغيره(عصام زوجها):وعندها لبنا 21 سنه ساره 19 سنه ووليد 3 سنوات جابته متاخر بعد بنتين

الجده فاطمه وهي تضحك على لبنا وهي تسولف لهم عن وحده معاهم بالكلاس فالجامعه :الله يقطع سوالفك يا بنووه (اسم الدلع للبنا )ماتخلين حد في حاله

لبنا كانت متعلقه بجدتها كثير لان يوم عمرها سنتين وامها جابت ساره الي كانت تعاني من الربو هالشي خلاها تنشغل بالمستشفيات هي وزوجها وكانو يتركون لبنا عند جدتها لان لولوه ماكانت تحب بناتها يتربون على ايد الخدم

زين وهي جالسه جنب صديقة عمرها واختها ساره :لا لا ماعجبني هذا المحل كل ملابسه صناعه صينيه اسبوع واحد وتخترب

ساره : اي صديقتي قالت لي بس ماصدقت بس صج ملابسه لو تشوفينها واااو لكن لبسيهم مرتين ولا الغشاشين كاتبين صناعه اوروبيه

زين : اي صح على طاري الفساتين من وين قررتي تاخذين حق حفلة زواج يارا

(صديقتهم ) شوفي وهي تأشر على فستانها الاصفر الناعم و معاه حزام ينحط عالخصر لونه وردي فاتح انا باروح المحل الي اشتريت منه هذا الفستان عنده اشيا حلوه تعجبني الوانهم ولان عنده لحفلات عاديه وحفلات اعراس وكل شي يعجبج وبصراحه تمللت من الاسود ابغى اغير هالمره

ساره :اي صحيح ان الاسود ملك الالوان لكن حلو التغيير بعد شرايج نروح باجر السيتي نشوف لنا كم محل لان مافي وقت تصميم الله يهداها قايله قبل شهر وهالايام الخيايط زحمه

زين :اوكي صار

وقاطعتهم همس وهي توقف في نص المجلس : احم احم لو سمحتو ابي اعلن خبر

الكل سكت ينتظر شبتقول همس

الا بدور وهي تلعب باظافرها :انشالله بس مو سالفه بايخه من سوالفج

ام زين : بدور ووجع استحي على ويهج اختج الكبيره تتكلم تسمعينها اونتي ساكته

بدور تفشلت وسكتت

همس وهي فرحانه: يشرفني ادعوكم كاول ناس لحضورمعرضي التجريبي قبل لا اعرضه باول معرض لي

ركب الكل معاها لغرفتها كانت عامله زاويه من غرفتها مثل معارض الرسم كل لوحه احلى من الثانيه

عمتهم لولوه وهي تاشر على لوحة : ماشاء الله عليج همس ماتوقعتج جذي مبدعه خلاص باييج يوم ترسميني

ضحكو على لولوه والكل كان مندمج باللوحات والسوالف

الا وحده كانت واقفه بعيد عند الرسمه الي سببت لها تفكير دام اسبووع تحاول تنساها ولا تعرف شنو الي ذكرها فيها الحين

تذكرت وقفها مع الرجال ولا شعوريا بدا قلبها يدق قووته وهو ماسك يدها خشونة صوته الي اختلطت فيه نبره دافيه سرعان مااخفاها ورى قناع من اللامبالاه

كان ودها تعرف الي مخبيته النظاره الشمسيه

: لا حووووول صار لي ساعه اناديج زينووووووو

كانت ساره بنت عمها تهزها من كتوفها : اصحي يابنت ترى الرسمه عاديه ماجوف فيها شي يخليج تندمجين لهالدرجه وتنسين نفسك

اليوم الي بعده الساعه ثلاث العصر زين وساره كان يتمشون بالسيتي من محل لمحل يدورون فساتين لحفلة زواج صديقتهم يارا ( يارا في نفس عمر زين وساره يعرفون بعض من ايام الثانوي بآخر سنه دراسه تقدم ليارا شخص يصير ولد صديق ابوها والحين هو مدرسها بالجامعه وخطيبها وبعد اقل من شهر بيصير زوجها

ساره : زيون شوفي هذا الفستان حلو و لا ؟ اي احلى علي اللون البنفسجي ولا هذا التركواز

زين : اممم احس التركواز يناسبج اكثر روحي جربيه وانا باجرب هذا الاحمر

بعد نص ساعه طلعو من المحل بدون مايشترون شي

زين : اووف مافي ولا شي عدل .. امم صبري مريوم ( وحده معاهم بالجامعه) قالت لي عن محل فوق اسمه (...) جايبين فساتين جديده امشي نشوف

في الاخير استقرت زين على فستان فوشي بنوتي قصير لي فوق الركبه وفي قصه عن الصدر كان بسيط بس كل شي حلو على زين

اما ساره فاختارت فستان ليموني طويل حمالاته كرستال ذهبي وفتحة الصدر واسعه وفتحة الظهر على شكل اكس

وهما طالعين من المحل ....

زين : ناخذ عشى قبل لا نرجع البيت ؟

ساره : اي يلا مت من الجوع من العصر واحنا بالسوق

Subway زين طلبت لها من

وساره خذت لها من مطعم صيني (تحب الاكل البنت )

زين وهي حامله كيسة الاكل التفتت مره وحده صدمت بشخص وراها وهو آخر شخص توقعت تشوفه طاحت الكيس من يدها

هذا هو اي نفس الشخص الي شافته بالمكتبه يالله شكثر وسيم كان لابس قميص اسود مصكره بأهمال وازراره الثلاث الاوليه مفتوحه رفعت عينها بسرعه

راسي كان واقف جامد بلا حركه ماتوقع يشوفها هنا هو مايحب يطلع من البيت واذا طلع مايروح الا البحر او الاماكن الهادئه فما بالك بالمجمعات بس اصدقائه غصبوه يجي معاهم يغير جو وكان بيطلع من المحللما اصطدم بهالبنت الي كل مايروح مكان شكله بيشوفها

زين سرحت بمكان ثاني (يالله ليييش .... كنت بانساه انا متأكده اني كنت بانساه ...)

لاحظت انه لابس النظاره السودا بعد ... اكيد في شي مخبيه ورى هالعين مستحيل يكون عمي ولا معاه الي يساعده ولا اظنه من نوع الشباب الي النظاره الشمسيه ماتفارق عينهم الا اذا بينامون .. الحمدلله والشكر كل واحد يخبي جكارته ورى النظاره ...

وفجأة كأن احد صفعها اوتعت انها سرحانه وان الرجال مشى من زمان وظلت واقفه لحالها التفتت مره ثانيه للمطعم وبأبتسامه غبيه : ممكن اطلب ..

طلعت هي وساره من المجمع وقررت وهما يتعشون بتخبر ساره بكل شي ماكانت عارفه الشخص الي لا حقها ولحسن حظه ان سيارته بنفس الطابق الي موقفه فيه زين سيارتها

راسي بأبتسامه شيطانيه : هذي فرصتي

طلعت زين من المجمع ولاحقتها سيارة راسي

لي ماوصلت للبيت وتأكد راسي ان هذا بيتهم مشى

راسي : نهايتك قربت ...

شو اللي يقصده راسي بهالكلام وشو الي راح يسويه بزين ؟؟

الجزء الثالث

زين : قلت لج نروح بيتنا احسن شوفي والله فشله من متى ماييت بيتكم والحين يوم ييت الساعه طافت ال 9 ونص

ساره : امشي بس الي يقول يايه بيت ناس غرب يلا خلنا نروح الصاله الفوقيه

زين : مادري ....

ساره سحبتها من يدها : امشي زييين

تعشوو وهي تقولها عن سالفة الرجل المقنع ( خلاص بدت تسميه الرجل المقنع لانها ولا مره شافت عينه )

ضحكت عليها ساره لان تعرف زين بنت خياليه والاشيا المميزه دايماً ترسخ في مخها عالساعه 1 رجعت بيتهم الي كان فالحي المقابل لبيت ساره

بعد اسبوع من التخطيط واتخاذ قراره قرر ان اليوم المناسب الي ينفذ فيه خطته عالساعه سبع المسا لبس ثوب ابيض وغتره بيضا وتأكد ان النظاره مغطيه عينه عدل لبس جزمته السودا وانتو بكرامه وتوجه للبيت الي يظنه بيت زين

في بيت ابو ساره

محمد ( ابوساره) كان جالس معا ام ساره ووليد في حظنها في غرفة الجلوس

محمد : الا وين البنات من بعد الغدا ماشفتهم

لولوه (ام ساره ) : ساره بغرفتها ولبنا في بيت صديقتها

فجأة ولا الجرس يرن

راحت الخدامه تفتح الباب ورجعت لأبو ساره : بابا هذا في رجال يبي انتا

ابو ساره مستغرب مو متوقع احد يجيه اليوم : خير ان شاء الله دخليه المجلس

دخل بوساره وشاف راسي واقف بنص الغرفه

بو ساره : السلام عليكم

راسي : وعليكم السلام والرحمه

بو ساره : تفضل ...

راسي : زاد فضلك ... قبل ماابتدي بالموضوع حبيت اعرفك بنفسي انا راسي محمد ال ... وجاي ابي اكلمك بموضوع اذا سمح لك وقتك

بو ساره مستغرب من هالرجال الي من اول مادخل وهو ماشال النظاره من عينه صحيح يوم قال اسمه عرفه مباشرة لان راسي من اغنى الشخصيات فالبلد بس هو اول مره يلتقي به شخصياً

بو ساره : آمر يا ولدي شاللي اقدر اساعدك فيه

يتبع ,,,,

👇👇👇