رواية راحت روحي من محجر عيوني -11
جمال:- افا عليك يا اخوي ان شا الله بعرف شو الاخبار و برد لك خبر..
سلطان:- استعيل هاا
جمال: حاضرين ..
طلعت عهود من حجرتها.. و سارت لامها..جافتها اتصيح و حالتها حاله..حضنت امها.. و باستها فوق راسهاا
عهود"تمسح دموع امها": سامحيني و الله ما اقصد اني اضايج بج بس صدقيني سند هو الي بغى الطلاق..شو اسوي له..
ام ناصر:- يا بنتي كل شي قسمه و نصيب ابرايه الطلاق ولا زواج بس لا تتفاولون ع اعماركم بالموت ..اخاف عليكم..
عهود"تحضنها" لا اتخافين ما بموت لاني احبج و ما بهدج..
ام ناصر"تضحك" الله يخليكم لي .. و يشفي عليا..
عهود" ويه قومي صلي العصر .عشان نطلع انزورها..
ام ناصر" سايره حجرتها" ان شا الله ..اتزهبي انتي بعد..
مايد و سند في القهوه يشيشوووووون..
سند: للحين اتحبك..
مايد: استعيلت في طلاقها..
سند: ما اقدر اعيش ويا وحده و هي حياتها و فكرها مع شخص ثاني..
مايد "منفعل" ليش سويت جي انا مب قايلنك انا و عهود مستحيل نرتبط فـ بعض..
سند: حتى و لـو هاي البنيه خلاص متعلقه فيك اتموت في شي اسمه مايد الشحي..ياخي شو مسوي لها انت..
مايد:- انت دومك مستعيل البنيه اندمجت معاك.. اكيد بعد الزواج.."قلبه يتقطع"بتحبـــــك ..
سند": ما اظن مايد انا خلاص..عهود انتهت من حياتي..و ما عاد احسب حساب شو بتكون علاقتك معاها..
مايد: انت عارف ان ما بتغير شي..
سند: بدور لي وحده تخلص لي شرات عهود مخلصه لك.. صعب فـ هالزمان اتلاقي وحده اتحب شراتها..
**
وصلوا جريب المغرب..دشوا حجرة عليااااا..لاحظت عهود ان عليا صارت احسن من قبل.. يعني صارت تبتسم لتعليقاتهم..و ضحكتهم..بس بعدها مب رايمه ترمس..
كانوا يالسين يسولفون..دش الدكتور و طلب عهود..
طلعت عهود برع..
عهود:- خير دكتور..؟؟
د.فهد:- ابا اعرف ليش ريل عليا ما ايزورها..
عهود: مب انتو منعتوه..
د.فهد: بس ها ما يمنع ع الاقل يتابع حالتها..انا ما اقول شي طيب ان عليا اجوفه.. بس ان شا الله بعد ما علياا اترد شرات قبل.. بنخليها اتواجه ناصر..
عهود:- اللــــــــه كريم..مشكور د.فهد ما اتقصر..
د.فهد:- بس اباج اتقولين لي كيف علاقتهم فـ بعض..قبل..
يلست عهود تحكي لـ دكتور كل شي..
بعدها رجعوا البيت بـ وقت متاخر..
بعد ما دشوا البيت..
ناصر"يطالع تلفزيون" شخبارهاا علياا..
عهود طنشته و دشت حجرتها..
ناصر" يرمس امه" شو بلاها هاي.. وارمه..
ام ناصر"تفسخ العبايه" و الله عليا احسن عن قبل.. الحمدلله باجي ترمس ..و خلاص..
ناصر: يعني صارت تاكل و تشرب و تيلس ولا كله راقده..
ام ناصر: باجر ببدون ياكلونها و بشلون عنها المغدي.. بس الحمدلله تيلس..
ناصر"يرن موبايله" الحمدلله..
و طلع برع يرمس مع سعاد..
**
ناصر:- شوووووووو بعد بتيلسين شهرين زياده..
سعاد"شويه و بتصيح" انا ابا ارد الامارات امايه مب راضيه..
ناصر: انتي بعدج ما كملتي شهر و بعد بتيلسن شهرين..؟؟!!
سعاد: شو اســــــووي حبيبي اهلي ضغطوا علي..
ناصر: و الله لو قلتي لي تعال قطر و اطلب ايدي بيييج ..
سعاد"مستانسه" عمري ادريبك ما اتقصر بس بعد راعي ظروفي شويه "و برقه" ها لو كنت صج اتحبنـي..
ناصر: الله يصبرني بس لا تتفاجئييييين اذا جفتيني واقف عند بيت اهلج في قطر..
سعاد"تضحك" ادريبك اتسويها.."تتنهد" شحالها اختك..؟
ناصر: اتولي زعلانه ما اترمسني من زمان..مدري شو بلاها..
سعاد: احس محد عندك فديتك و الله ليتني كنت جريبه منك اخفف عنك..
ناصر: فيج الخير و اللــــــــه ..هاي هي الحرمه .. ولا بلاش.
و تموا يسولفون ساعات..
و بنفس اللحظه..عهود يالسه عند النت تكتب رساله لـ مايد..
رن موبايلها جافت رقم..استغربت..فردت عليه..
عهود:- الــــــــــووو
جمال: السلام عليكم..
عهود"مستغربه" عليكم السلام ..خير ان شا الله.
جمال:- بسم الله..تونا انسلم..
عهود:- منو معاي..
جمال:- شرطة راس الخيمه..
عهود:- نعم بغيتوا منوووو..؟؟
جمال:- بغينـا عهود الزعابي..
عهود"زيغانه" نعم خير شو مسويه..انتو اكيد غلطانين بالرقم..
جمال"ميود عمره من الضحك" مب انتي عهود الزعابي..
عهود"بصوت واطي" هي نعم.انا عهود..
جمال"اونه معصب عليها يصرخ" ليش تنكـــــــرين عيل هــــــــــاااااااا.. و بعدين انتي شو مسويه..
عهود"شويه و بتصيح" شو مسويه..؟؟
جمال:- راعي الدكــــــان مشتكي ليش مب دافعه الحساب هااااااا
عهود: أي دكان انت شو اتخربط..
جمال"يصرخ" احترمـــــــــــي نفسج انتي يالسه ترمسين مع الشرطه مب ولد الييران..
عهود"تهمس" اســـــــفه..
جمال" ما قدر ايود عمره من الضحك" هههههههههههههااااااااااي ههههههههههههههههههه قصينا عليها ويوويوويويوويويوووويوي
عهود ساكته مب عارفه شو السالفه..بس بعدين عرفت انه مقلب..فصكرت التلفون بويهه..اتخيلت شكلها كيف كانت مستحيه.. و خايفه ..يلست تضحك على عمرها بس منو ها الخديه مب صوت سلطان هااا
**
و بعد يومين ...سلطان يرمس جمال..
سلطان:- ها شو سويت جمال عرفت شي..؟؟
جمال:- و الله اتصلت بـ عهود.. بس صكت التلفون بويهي و ما قامت اترد..
سلطان"منفعل" انتي غبي شفيك اترمس حرمة ريال انا اقصد تتصل بـ ناصر..
جمال:- تراني اتصلت بـ ناصر قال انهم ابخـير و هو مانع زوجته اترمسك...
سلطان"محرج":- شووووووووو و الله ها بخلي ويه شرات الهمبرجر ..ولد......
جمال:- ها ها لا اتغلط ع الريال ابوه متوفي..
سلطان"ماسك اعصابه" ماعليه برجع بعد شهرين و بجوف كيف بمنعها انها اترمس خالها.."سكت شويه" الا انت منو امرك تتصل بـ عهود هـا..
جمال: قلت بعرف الاخبار منها..بس بعد ما قصيت عليها"وخبره السالفه"
سلطان" يضحك" و الله انت شي..لك ويه اترمس الحرمه .. وهي رافضتنك..من قبل..صج ويهك لووووح.
جمال: عادي بخطبها احينه و بتوافق..
سلطان: كيـــــــف..!!
جمال: ليش ما تدري انها تطلقت ..
سلطان"مصدوم"
جمال:- و الله تطلقت من جم اسبوع..و احينه برجع اخطبها..
سلطان: بلعن خيرك..هاي مالتي ..تراني قلت و الحمدلله ما جذبت هاي لغايه و ما بتحملها ريلهاا..
جمال"يضحك" ههههههههااااا صدقك..الا متى بترد بعد شهرين هـا..
سلطان:- ليش هالسؤال..!!
جمال: عشان اتكون شاهد لملجتي انا و عهود..
سلطان"يصرخ عليه": جماااااااااال
جمال"ميت ضحك" هههههههههههههاااااااا
سلطان: صج ويهك لوووووح راغوك تبا يروغونك بعد مره..
جمال: اسولف يا ريال انا صج خطبت خـلاص وحده من الاهل و ان شا الله بتريا الزواج لي ما اتي من السفر..
سلطان:- قول و اللــــــــه.. و الهرم ولا اتقول مبرووووووووك و اللــــــــــه ..احينه ارتحت..
جمال: قلت بغصص فيك شويه..بس ابروحك اتحاتي اهلك ..عشان جي قلتلك..
سلطان:- فديت خشمك و الله..مبروك مبرووك..
واتصكر التلفون بويه سلطان ..
جمال"يطالع التلفون" خسك الله سلطووووووون خلصت الرصيد توني محطي بطاقتين..شو ايي وراك غير الفقر..يا الشيطاااااااان..
**
بدت عليااااا ..اتقوم من مكانها.. و تتحرك و تاكل ابروحها.. و تبتسم ..يوم د.فهد يضحكها .. او تسمع تعليقات امهاا..
بس كان كل همها ان ترجع تتكلم..كانت اتحاول بس تتعب..
كانت اتفكر ..بـ ناصر و كيف خانها.. اتذكرت يوم دشت عليه الحجرة...اتبشره بحملهـاا بس هو الي صدمها.. يوم سمعته يوعد وحده بالزواج..
نزلت دموعها تذكر هالموقف..بس بعدين مسحتها.. و عرفت ان مافي شي بالدنيا يستاهل كل ها.. الحمدلله دام انها تقدر تحمل مره ثانيه..خلاص بتتطلق من ناصر .. و بتتريا نصيبها..
دش عليها د.فهد و كانت امها برع تتمشى في حديقة المستشفى..
ابتسمت له..يوم جافته ياي صوبها.. و قامت من الكرسي و يلست ع الشبريه..
د.فهد: كان فـ خاطري تطلعين مع ماماتج تتمشين اتغيرين جـو.."سالها" اتحسين انج تبين ترمسين ..
هزت راسها بمعنى نعم..
د.فهد: انزين مب مشتاقه لـ راس الخيمه و اهلهاااااا
بعد هزت راسها بمعنى نعـم..
فهد:- و ريلــــــــج..
هزت راسها علياا بقوه..و تمت اطلع اصوات اتحاول تتكلم بس ما قدر ياخذ منها شي..
فهد: انا مب قادر افهم شو تبين اتقولين..بامكاني اعطيج ورقه و قلم ..بس انا اباج انتي ترمسين..انا ادري انج ما تبين ريلج.. بس لازم تنطقين و اتخبرينه هالجمله..تقدرين..
من غير ما اتحس علياا بعمرها..مسكت ايد الدكتور.. و حاولت تتكلم بس بعد ماشي فايده..
د.فهد"يطمنها" لا اتخـافين انا بكون معاج.. و صدقيني الي تبينه بيصير..
ابتسمت له عليا و بين من ملامح ويها انها ارتاحت لكلامه..
د.فهد: شو رايج اخذج الحديقه عند امج..
عليا اتهز راسها انها ما تباا..
د.فهد:- اطلعي من الغرفه.. بتحسين بالحياه مره ثانيه..بجربين..
عليا متردده بس مد الدكتور ايده..فمسكتها و هي مستحيه.. و طلع بها برع الحجره.. و طلب من الممرضه تاخذها برع في الحديقه..
**
الجزء الثاني عشر
مرت الايام و الاسـابيع.. و حياة عهود شرات ما هي ما تغيرت.. دراسه و ايميلات و متابعه اخبار مايد الشحي..
و في يوم فكرت اتروح مركز المنار عشان تشتري هديه لـ عليااااا.. و سحبت معاها امها..لان كانت طلعاتها مع سعاد..
لكن الحينه ودرتها بسبب خيانتها....و في طريجهم للمركز..رن موبايلها..
عهود:- ابيه دكتور فهد..
ام ناصر:- ردي جوفي شو يبا..
عهود: السلام عليكم..
الدكتور: و عليكم السلام اشحالج عهود..
عهود: الحمدلله ابخير..شحالك انت..
الدكتور:- الحمدلله ربي يسلمج..اسمحلي ع الازعاج بس بغيت اعرف اذا ممكن اطلب من ناصر ايي يزور علياااا
عهود:- هي ممكن لان اخوي هالايام ماخذ اجازه و تقدر اترمسه..
الدكتور:- قلت بتصل به قبل..بس فكرت اخبرج قبل لا اتصل به..
عهود: ان شا الله عليا احسن عن قبل..
الدكتور:- الحمدلله..بس نباها ترمس..و هي الظاهر ما عندها اراده لها الشيء فقلت اصدمها بـ ناصر بخليهم يتقابلون.. يمكن اتكون لها ردت فعل.. و اترمس..
عهود"متاثره من الي صار بـ علياا" ان شا الله خير بس ها ما بكون شي سلبي لهاا
الدكتور:- لا ما اعتقد لانها صارت قويه و و ان شا الله ما ينعكس هالشيء..
عهود: ان شا الله خير..
الدكتور:- عيل يالله اسمحيلي .
عهود: مسموح مع السلامه.."وصكرت التلفون."
ام ناصر:- شو يبا اخوج..
عهود:- هي..
ام ناصر:- ليش عليا ما تبا اتجوف ريلها شو السبب
عهود: امايه وصلنا المنار ..بعد ما انخلص بخبرج عن سوالف ولدج الي اتبيض الويه..
دشوا كذا محل..
ام ناصر: يالله يمه طاحت اريولي من المشي..
عهود"تضحك" من زمان ما مشيتي يالله رياضه..
ام ناصر:تيلس ع الكراسي الموجوده في نص الطريج" انتي روحي دشي محلاتج و يوم بتخلصين تعالي تعبت يا بوج..
عهود: هـا اخر محل باجي الشنطه ابا لون وردي يمكن بجوفه بها المحل..ثواني و بنخلص..
سارت عهود و دشت محل بدون اسم .. يلست اتلف و ادور .. وجافت الشنطه الي اتناسب البدله و الجوتي و الشيله الي خذتهم..
شرتها و حاسبت راعي المحل و طلعت..و هي طالعه طاحت عيونها بعيون مايــــــد ..تمت اطالعه و يطالعها..
"جفته و عيني دمعت و نار في يوفي ولعت.. ودعت روحي ودعت و قال الهوى قسم ونصيب"
حست بقلبها ايدق ابقوه.. و مايد ما شل عيونها منهااا..
حست ان هالمركز فاضي ما فيه الا هي و مايد..ليش الدنيا فرقت بينهم.. ليش الظروف عاندتهم.. انا احبه ..احب هالانسان..احبـــــــــــــــه..
عهود و كانها قامت من حلم.. بعد ما طافها مايد.. انتبهت انه معاه وحده و ماسكين ايد بعض..
هاي زوجته.. غبيه هي خسرت سند شو استفادت..احينه مستحيل يكون لهااا ابـــــــــد ..
سارت صوب امها.. بعد ما مسحت دموعها طالعت صوب مايد اخر نظره.. جافته يطالعها..
عهود: امايه يلاا انروح خلصت..
ام ناصر: بلاج يمه..؟؟!!
عهود: ماشي بس شويه تعبانه يلاا انروح..
ام ناصر: الله يرفع هالبلاوي عنـا ..
عهود اطالع وراها جافت مايد اختفى و الحرمه الي معاه اكيد زوجته..
**
ناصر: الـووو
الدكتور: معاك دكتور فهد من مستشفى الامراض النفسيه متابع حالة زوجتك..
ناصر"يتنهد" هلا بك يا الدكتور خير ان شا الله..
الدكتور :- نباك اتجابل زوجتك..نبا انجوف ردت فعلها..
ناصر"متافف" متى هـا ..؟؟
الدكتور: تقدر اتيي باجر..بس اباك اترمسها ع اساس انك مشتاق لهاا و من هاي السوالف ما نبا كلام عتاب و لوم..
ناصر:- خير ان شا الله..بس لازم باجر ..
الدكتور: هي اذا ما عندك مانع البنيه حالتها وايد زينه بس باجي النطق..و عرفت من اختك ما عندك أي اشغال..
ناصر"يدعي ع عهود" اوكى خلاص باجر اكون عندكم..
الدكتور:- الصبح..
ناصر:- ان شا الله ..
الدكتور:- حياك و مع السلامه.
ناصر: مع السلامه..
بهاللحظه دشوا عهود و ام ناصر البيت..
ناصر: وين كنتـوا..
ام ناصر: سرنا نشتري اغراض حق علياا باجر بنزورها..
ناصر"يطالع عهود" انتي منو امرج اتقولين الدكتور اني فاضي هالايام..
عهود"تتطنز": شو عليا ما وحشتك..يا راعي الواجب و الاصول..
عصب ناصر و اجدم منها عشان يضربها.. بس ام ناصر وقفت من بينهم..
ناصر"امعصب": خليني أأدبها هاي صار لسانها اطول عنها..
ام ناصر: يا يمه عورتوا قلبي بسكم مشاكـل لا اله الا الله..
ناصر: ما عليه عهود انا اراويج باجر بسير دبي بس باخذ امايه و انتي خلج في البيت..
شلت عهود اغراضها و دشت حجرتها من غير ما اترد عليه..
ام ناصر: هذي اختك الوحيده ليش اتعاملها جي..
ناصر: انا الي ليش اعاملها جي ما اتجوفين حركاتها و طولت لسانها.
ام ناصر:- بعد بتم اختك..
ناصر"داش حجرته" انزين انزين..
ام ناصر: الله يهداااااكم..يا عيال..
**
اجلبت عهود ع فراشها... محتاره تتصل بـ مايد او لا..عمرها ما فكرت ادق له بعد ما طلقها سند..بس احينه بعد ما جافته..ما اتروم اتيود عمرها..
كانت تضرب ارقام موبايله و عند آخـر رقم..ترجع و اتغير رايها.. تمت حوالي ربع ساعه ع هالحال..
اخرتها..اتصلـت..ما توقعت انه يرد عليها بها السرعه..
مايد:- وحشتيني يا اغلى و اطهر من عرفت..
عهود" مصدومه من كلام مايد ما توقعت ..يسمعها هالكلام..
مايد:-.. سامحني اذا بحقك اخطيت .. أنا كان كل همي أسعد وجودك
هذي دموعي على الخد ابكيت .. أنا بس مجرد صاحب يصونك
يحبك يعــــــــزك بالحيــــــــــل .. وكان يتمنى يعيش ملك بكونك
ظروفه امنعته واسقته الويل .. معذور يوم الأمل صار فراق
(( ظبية المزيونة))
تمت عهود ساكته و دموعها صارت ع خدهـا.. كانت مغمضه عيونهاااا.. تسمع بكل كلمه ينطقها مايد.. كانت اتحس بكل دقه بقلبها ..تعزف الحان مع الحروف الي يتنطق بها مايد..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك