رواية لعبة الاقدار -3
نواف:البنت عاجبتني وداخله مزاجي ليش عندك مانع ..
تركي:اي عندي اولا مابيك تتزوج الحين اصبرخل تخلص الجامعه وبعدين يحلها الف حلال..
نواف:خلاص البنت صارت لي وبعدين الورث آخر شي افكر فيه.
تركي بعصبية: طيب يانواف حسابي معاك بعدين..
نواف وبرود:على فكرة نسايبنا بلندن مرسلم عليهم...
تركي:يصير خير...
تركي سكر وهو معصب قام رجع راسه على الكرسي وغمض عينه وهو يفكر بهدوء.
التفت عليه ايلي:تركي شو بيك متضايق هيك ..ايه مافي شي بيستاهل زعلك...
تركي:الا يايلي هذا الشي يستاهل..اخوي الكريم بيتزوج.
ايلي وهو فرحان:مبروك ...ولك المفروض تنبسط منشانه مو تضايق.
تركي:ايلي انت ماتفهم ان ابوي قبل ما يموت كان شايل الشغل كله فوق راسه وماخلانا نساعده فيه عشان ننتبه لدراستنا وكان دايما يتمنى واحد منا يجيب الدكتوراه ولما مات الله يرحمه وصى انه نواف أخوي مايستلم ورثه الا لما يتزوج ويخلص الدراسه لانه طول عمره كان متهور وكسلان،وانا طبعا بعد ماتوفى الوالد اشتغلت بالشركة وكان عندي شهادة ماجستير في التسويق والتجارة وكنت ادرس الدكتوراه وحاولت اني اوفق بين الشغل والدراسه لني ماقدرت تركتها وتفرغت للشغل.
ايلي:اها..من شان هيك انت متضايق..طيب شو الحل هلأ مع أخوك؟
تركي بنظرة غير مفهومه:بفك الخطبة بطريقتي الخاصة.
ايلي التفت على صديقة هو بيعرف هالنظرة معناته انه ناوي على شي بس شو مابينعرف..
تركي التفت يطالع من النافذه ويتذكر عيون دايماً في باله مستحيل ينساها ،عيون مشدودة تسحر من يشوفها وضحكة بريئة كانت دايماً تجننه ،ملامح هيفاء كانت على طول بباله ملامح صعب من يشوفها ينساها..ليش يانواف من بين بنات الناس مالقيت الا هيفاء..تنهد وهو يفكر بطريقة يحل بها المشكلة فجـــــاءة تذكر شي خالتي واهلها بلندن..هنا بدا الحظ يبتسم له.ابتسم ابتسامه خبيثه ولقى النور اللي بيوصله للطريق.
نرجع حق فواز اللي عرف من فهد ان العنود تسير بنت عمته ومعناته ان الحين يقدر ينتقم منها بسهولة ..وفي نفس الوقت كانت العنود قاعده في مكانها المفضل فوق السطح تسمع حق راشد الماجد وتقرى في رواياتها الرومانسية والجو كان مرة بارد مع انها لابسة جاكيت فوق البيجاما الا ان البرد ذبحها وانفها صار احمر من البرد فقامت سكرت الووك مان وخذت روايتها ونزلت تحت ولما دخلت الغرفة لقت ان الساعة الحين 8 ونص الصبح وهيفاء لساتها نايمة وهي ماقدرت تنام تحاول تغمض عينها ممكن النوم ايجيها لكن ماقدرت تحس انه مخها يشتغل لكن ماتعرف من ايش؟
قعدت ترتب الغرفة وتنظفها عشان تظيع الوقت ولما خلصت نزلت تحت حصلت فهد وحمد لساتهم على سهرهم قاعدين يلعبون مباراة بالبلاي ستيشون البست حجابها وقعدت تطالعهم وهم يناقرون على اللعبه.
حمد:الا اقول فهد..
فهد وهو مركز على اللعبه:امممم؟
حمد:انت من وين عرفت فواز؟
العنود لما سمعت كلام حمد وسمعته يتكلم عن فواز عرفت انه يقصد اللي كان مع فهد امس.
فهد:اهو معاي بالجامعه بس تعرفت عليه بعد ماتقلوا اللي معاي بالغرفة وجا فواز بداله..بس الله وكيلك اول ايام كان ماينطاق.
حمد وهو يطقطق على الجهاز بسرعة:ليـــــــــه؟
فهد:كان مره شايف نفسه ومتكبر ولا فوق هذا كله البنات الاجنبيات اللي بالجامعه ميتات عليه...بس بعد ماعرفته طلع "جدع ابن جدع"..
حمد:ايه والله انه رجال وفيه الخير..
العنود بينها وبين نفسها "أي خير انت وياه..الاخو مغازل اختك وانت تقول فيه الخير".
العنود تسأل اخوها:حمد بغيت اسألك عن قهوة جوري اذا حلوة ولا لاْ؟
حمد:وليه حضرتك تسألين ..ان شالله ناوية تروحين لها؟
العنود:وش فيها..اذا حلوه أبغى اعزم البنات عليها..
حمد وفهد مع بعض:لاااااااااااااااااااااااا..
العنود وهي منصدمه من صراخهم:يمه خوفتوني شفيكم منتوا بصاحيين..
فهد وقف اللعبه والتفت عليها:هالقهوه بالذات ممنوع عليكم تدخلونها ..فاهمه؟
العنود وهي زعلانه:يعني شمعنى هالقهوة؟
حمد:لانها مليانه شباب خليجين والبنت المحترمة ماتروح هالاماكن..
العنود:طيب خلاص فهمنا..حشا كلتوني ..
رجعوا العيال للعبة والعنود خذت المجلة تقرا فيها ولما حست بالزهق قامت للمطبخ تسويلها شي تاكله ،سون سانويش جبن وكوباية عصير برنقال وراحت للغرفة لما دخلت الغرفة شافت تيلفون هيفاء يضوي ويطفي ولما شافت الرقم "توأم روحي"فعرفت انه نواف فراحت بتصحيها الا التلفون يطفي..لكن هيفاء حست فيها فبطلت عين وحده:مين اللي كان متصل؟
العنود:هذا نواف..
هيفاء وهي تغمض عينها:ماراح اكلمه الحين...وانتي شعندك صاحيه؟
العنود تتنهد:ماجاني نوم..بعدين انتي لايكون بتنومين يالله قومي خلصي علينا الساعه صارت 9..
هيفاء وهي قايمه تفرك عيونها:طيب انا قايمه..لكن اسمعي اليوم ماعلي منك انا بروح لهارودز..
العنود:اقول انطمي بس اصلا من غير ماتقولين انا كنت ناوية اروح.
هيفاء:جزاتي اني كنت ابعزمك على الشوكلات بار بس تدرين انتي مو وجه عزومه..
العنود ببراءه:لكن انا ماقلت شي..
هيفاء:انتي ماقلتي شي اجل مين اللي قال "انطمي بس"..
العنود بصدمه مصطنعه:انا ..انا ماقلت شي حرام عليك..
هيفاء سفهتلها وراحت للحمام عشان تغير ملابسها وتستعد..والعنود راحت تتمكيج لغاية ماهيفاء تخلص تبديل عشان تروح تبدل..ولما خلصوا البنات طقوها مشي لغاية هارودز لكن هالمرة راحت معاهم مها وهيفاء مب عاجبها الوضع..
هيفاء وهي معصبة على مها:يعني قلوا عليك خلق الله عشان تجين معانا..
مها وهي مناحسه:ايه قلوا ولا حصلت الا انتي انزين.
هيفاء عطتها نظرة نارية:اقول اسكتي لاعطيك كف يطيرك للشقة..
مها وعيونها مليانه دموع تلتفت للعنود عشان تنقذها:العنود شوفيها..مادري ايش فيها اذا رحت معكم؟
العنود :مافيها شي يابعد عمري ..بعدين هذي اختك وخبالها..يعني ماتعرفينها..
هيفاء وهي تشهق:عنييييييد..هين وش عندك توزين اختي علي..
العنود:مافيها شي ياهيفاء اذا راحت معانا،وبعدين هي رايحه تبي تشتري سكايتينج عشان الحديقة انتي ايش بيضرك؟
هيفاء:مالي خلق بزران وحنه..
العنود ومها اسفهولها وكملوا مشي.ولما اوصلوا وتشروا وخلصوا اطلعوا من هارودز للهايد بارك لان الاهل مجتمعين هناك ..
وهم داخلين من بوابة الحديقة الا وحده بايدها ايسكريم دعمت العنود ولطختها ولطخت نفسها بعد..
البنت:آسفة مكان قصدي..
العنود بابتسامة:لا معليه ماصار شي..
البنت وهي تدور على منديل تنظف بيه ملابسها ومومحصله..فقامت العنود وعرضت عليها انها تروح معهم لمكان ماهلها موجودين وتنظف ملابسها هناك.
البنت:لا ياختي احس فيه احراج..
العنود:لا حرج ولاشي الابالعكس نتعرف عليك بالمره..
البنت :مشكوره ياعمري..
هيفاء وهي تناظر البنت من راسها لساسها لان البنت مو عاجبتها بالمره ماتدري ليه قلبها ناقزها منها كان شكلها فري بالمره ماكانت لابسه حجاب ولابسه لبس ضيق..يعني شكلها مايطمن.
بعد ماوصلوا عند اهلهم على طول مها لبست الزلاجيات وراحت تتزلج ومحمد معاها والعنود والبنت قاعدين ينظفون ملابسهم بمناديل معطره..وبعدها قعدوا مع بعض يسولون ومنها اعرفوا ان البنت اسمها سارة ومن الكويت ومن عمر العنود.
العنود:اجل انتو اول مرة تجون لندن؟
سارة:لا ..احنا دايما هنيه..
هيفاء من غير نفس:طيب اهلك وينهم ماشوفهم معك بالحديقة..
سارة:اصلا انا اروح وارجع مثل مابي..
تو العنود بترد الا تلفونها يرن:الــــــــو؟
حمد:هلا العنود..
العنود:اهلين حمد..
حمد:ها وينكم؟
العنود: احنا بالحديقة..
حمد :طيب ايش رايك تجيونا بالسينما انا عازمكم على فلم رووووووعه..
العنود استغربت هالشي من حمد وخافت انه يكون مقلب من مقالبه: غرررررريبه وش عندك عازمنا..مو من عادتك؟
حمد:طييييب على راحتك ماتبين اجل خلاص عفني بالحديقة؟
العنود بسرررعه:حمد..حمد..خلاص اوكي احنا جاينكم على الاقل احسن من مقابل الاشجار..
حمد:خلاص اجل احنا ناطرينكم..
بعد ماخذت منه مكان السينما..التفت على البنات تقولهم
مت هيفاء واستانست:الله ونــــــاسه..طيب يالله خل نروح..
سارة:خلاص انتو روحوا وان ان شالله اشوفكم بعدين..
العنود مارضت:لا مايسير تروحين ..لازم تيجين معانا يله انا عازمتك..
هيفاء ظلت ساكته لانه ماتبيها تروح معهم وكان ودها لو العنود تسكت ولا تعزم.
سارة:طيــب بس هالمرة لكن المرة الجاية انا اللي بعزمكم اوكي؟
العنود:اوووووووكي..
راحوا البنات للسينما وحصلوا فهد وحمد هناك ناطرينهم ومعهم التذاكر ولما شافوا سارة مع البنات وقفوا مبلمين مايعرفون منهي .
هيفاء قامت بالتقديم:شباب هذي رفيقتنا الجديدة اسمها سارة..والعنود عزمت عليها تجي معانا..التفتت على سارة وهي تاشر على الشباب..هذول اخوي فهد وولد خالي حمد.
فهد:العنود ترى ماقصينالها تذكرة لانكم ماقلتولي..
العنود لا عادي انا بقصلها..
حمد هز راسه:اوكي انتي قصي التذكرة ولحقينا وهي تدخل ببطاقتك.
العنود:اوكي ماراح اطول..
العنود وهي تنطر عند شباك التذاكر الا تسمع صوت ايجي من وراها.
فواز:حتى هنا لاحقتني؟
العنود التفت عليه وهي مصدومه:انت!
فواز بسخرية:ايه انا ليه فيه احد غيري..
العنود ببرود:اصلا من قال ان انا لا حقتك انا جايه مع اخوي..وبعدين بليس لاتكلمني.
فواز:اذا انتي جايه مع اخوك..اجل انا جاي مع منو..
العنود:وش قصدك
فواز:قصدي ان اخوك اللي عزمني.
العنود بسخرية:لو دارية كان وفرت على نفسي وماجيت..
فواز ببرود: الا قولي لوانتي كنتي موجودة كان خربتي علينا الفلم..
العنود بعصبية:مادامني بخرب الفلم ليه حضرتك ماتعطينا مقفاك..
فواز هنا تم ساكت وهو يناظرها بغضب حتى العنود خافت من الكلام اللي قالته هي شلون تجرأت وقالت مثل هالكلام ،تموا الاثنين ساكتين يناظرون بعض.
في الاخير فواز لف وطلع من السينما .
……………
ايـــــــــــــش تتوقعون راح يصير بعد هالموقف؟
وســـــارة اذا عرفت ان فواز كان موجود بالسينما ايش راح تسوي؟
وهيفـــــاء ياترى ايش اللي ناطرها؟
الجــــ الخامس ـــزء
فواز بكلام العنود اللي قالته جرحت كرامته وقرر ساعته انه بيرويها من فواز هذا اللي تكلمه وراح يردلها الصاع صاعين راح اطلع الحين باللي بقى عندي من كرامه..بس التفت شاف العنود راح تدخل السينما
معها بنتين ماشافهم ..تذكر ان فهدوحمد يستنونه هذه فرصته لازم يستغلها..راح فوازلقاعة عرض الفيلم وشاف فهد واقف ينطره
فهد:وينك ادق عليك ماترد ..
فواز:لا انشغلت مع واحد من الربع..
فهد:انزين يلا اندش الفيلم مع اني مب مقتنع فيه
فواز:ليه..مب انت اللي مختاره وانا ابغي اشوف فيلمGuess howفهد:الاخ حمد يبغى يشوف Zoro2
فواز:هههههههههه معليه نمشيها عشانه الا معك حدمن الاهل
فهد:أي موجودين بس قاعدين لحالهم
فواز:أي نزين يالله ندخل
دخل فهدوفوازوقعدوا لمكان ما حمد قاعد فواز يدور بعيونه على العنود شافها قاعدة قدامه بينه وبينها صف..
بدا الفيلم وفواز نفسه يشوف وجه العنود عشان يخزها بنظرات ويلاعنها ..العنودكانت مندمجه مع الفيلم بس تلفت يمين ويسار عشان تشوف وين اخوها تبي منه يشتري فوشار وبيبسي
التفتت وراها طاحت عيونها على فوازيطالعها بنظرات سخريه كانه يضحك على حركاتها العنود انحرجت واغطست في الكرسي من الاحراج حست بعيون تراقبها ماقدرت تنتبه للفيلم كانت سرحانه التفتت عليها هيفاء تهمس لها العنود انتفضت
هيفاء:العنود وش فيك ..ترتجفين.
العنود:هاه ولاشى بس التفتي شوفي من قاعد مع اخوانا
التفت هيفاء وشافته
هيفاء:أي المزيون وش فيه
العنودبعصبيه:مزيون طل انتي مب شايفه نظراته وهو يطالعني كانه بيذبحني
هيفاء:ههههههه تحبين تخلين من الحبه قبه
العنود:ههههه سخيفه
ساره شافتهم يلتفتون التفت معهم وانصدمت شافت فواز حبيبها مب قادره تصدق ومع مين مع اخوان رفيقاتها
لا صدق الدنيا صغيره ..ياحياتي يافواز ..فواز حس نفسه يبي ينحاش وش هالمصيبه..اللي طاحت على راسي
ساره هذا وقتها بتجين تعفسين الدنيا ..لايكون قاعده مع العنود
كل شي الا هذا ..لازم يتصرف..التفت فوازعلى فهد
فواز:فهد من هذه اللي قاعده جنب اهلك..؟
فهد وهو عاقد حواجبه:ايه هذه رفيقة البنات..ليه؟
فواز:لا كل سنه اشوفها في لندن..
فوازحس بنفسه يعرق ياربي وش يسوي خلاص البنت شافته
خايف تقول حق العنود علاقتنا ..
فواز:فهد عن اذنك عندي مشوارضروري لازم اقضيه
فهد:وش هالمشوار الضروري اللي يخليك متوتر ..لا يكون واحده من بناتك مهددتك..
فواز:لا أي بنات ..بعدين مافي بنت تهددني..يلا عن اذنك
فهد:اذنك معك
طلع فواز من السينما وهويفكر بطريقه تبعد ساره من العنود قبل ماينفضح قدامها وتخرب خطته خذا جواله ودق عليها لازم يفهمها بطريقته تبعد عن العنود..
فواز:الو..مرحبا ساره
ساره تكلم بصوت واطي عشان مايسمعونها:هلا يابعد طوايفي انت
فواز:هلا حبيبتي..
ساره طلعت من القاعه وراحت للممرالسينما عشان تكلمه على راحتها
ساره:شفت صدفه احلى من الف ميعاد
فوازوهو متنرفز:أي صدفه انت الثانيه ..
ساره:حرام عليك وش سويت لك فوازعشان تقولي جذي
فواز:اسمعيني ساره زين من وين تعرفتي على البنات اللي كنت قاعده معهم
ساره:اليوم تعرفت عليهم في الحديقه
فوازحس براحه:انزين تدرين انهم خوات ربعي
ساره:وخير يعني ..ياحلوه حبيبي اذا بيني وبينك رابط
فواز:حبيبتي اسمعيني ابيك تفكين علاقتك معهم
ساره:شنو..ليش حبيبي..
فواز:لاتساليني ليش سوي اللي انا اقوله وبس ..واذا تبيني اكمل علاقتي
معك طيعي كلامي..
ساره:مادام هذا اللي تشوفه خلاص..انت تامر امر..انا بقطع علاقتي معهم
بس ماقدر اطنشهم اذا شفتهم..
فوازببرود :اللي يسمعك يقول تعرفينهم من سنه ..!
ساره بخوف:خلاص حبيبي كل شى ولاتزعل..
فواز يبتسم:أي كذا ابيك حبيبتي تسمعين كلامي..بعدين انا مابي ربعي يشوفونك وياخذونك مني.
ساره:ياحلوك حياتي تغار..
فواز:ههههههه اذا ماغار عليك من اغار عليه..يلا عمري اخليك..باااي
ساره:يلا باااااااااااي..سكرت ساره وطلعت من السينما بدون ماتودعهم
خايفه يشوفها فواز تكلمهم..ويحمق عليها..
في السينما كانت متوتره العنود تحس نظرات فواز تخرق ظهرها ماقدرت تركز على الفيلم ..هيفاء حست ان ساره تاخرت لفت على العنود..
هيفاء:العنود..ساره سكنت داخل ولا طلعت..
العنود:اكيد انها في الحمام..
هيفاء التفت وراها تدورعليها مالقتها شافت مقعدين قرب فهد فاضي ..
هيفاء: العنود قومي نقعد قرب فهد ..
العنود برعب:انتي صاحيه نقعد مع رفيقه..
هيفاء:هههههه من جدك ارتاحي رفيقه راح ..
العنود:صدق..التفت لقت مقعد فواز فاضي..وقربه واحد ثاني..
هيفاء:يلا قومي..ابي اشوفهم من وجههم واضح عليهم متاثرين بالفيلم..
العنود:وساره نخليها ورانا..
هيفاء:البنت شكلها مب جايه..وزين جات منها..
العنود:انزين..يالله..
قعدوا العنود وهيفاء قرب فهد..فهد طالعهم مستغرب..
فهد:وشفيكم غيرتوا مكانكم..؟
هيفاء:لابس وحشتونا..الفيلم بدونكم مب حلو
فهد يطالعها بسخريه:لا الله يخليكم ما نبي شوقكم خلوه لكم
هيفاء رافعه حواجبها باستغراب:افا..يابو سلمان تقول هالكلام حق حبيبتك هيوف..
حمد يطالعهم:ههههههههه حتى في السينما تناقرون ..
فهد:اسكت انت ماتعرف هذه نسره..
هيفاء تطالعه بنص عيون وصدت منه..
الوحيده اللي كانت مش معهم العنود كانت في عالم ثاني..مستغربه من مشاعرها المتضاربه ماتدري ليش يوم عرفت ان فواز راح حست بخيبة
امل ونفس الوقت ارتاحت بس ليش حست بحزن لانه ماهتم لها وراح
ولاعبرلها ياربي..انا ليش اهتم فيه بالطقاق اللي يطقه..
هيفاء تحس بلوعه ووجع باسفل بطنها قعدت تلوى يمين شمال
في كرسيها ..حست بتعب موطبيعي يالله ماكلت شى عشان ياجيها
هالالم ..هيفاء نزلت وجهها وهي تالم ..ماقدرت تحمل بينت على
ملامحها انها تتالم ..وطلعت منها اهه الم ..بدون ماتدري..
التفتوا كلهم ..عليها..
فهد مستغرب:هيفاء وش فيك ..عسى ماشر..
هيفاء:بطني ..بطني فهد ..حاسه بمغص يذبحني..
فهد:انزين روحي الحمام..
هيفاء:مابي ابي اروح البيت ..اخذ حبة مهدئ..تخفف علي..
العنود:خلاص بروح معك البيت..
فهد:لا انتي اقعدي مع اخوك..انا بوديها..
حمد:سلامتك هيفاء ماتشوفين شر..
هيفاء بابتسامه صفراء:الله يسلمك الشر مايجيك..
وقفت هيفاء وهي تعنزعلى فهد وهو ماسكها من كتفه ..مشوا ليمه لقوا تاكسي
يوصلهم الشقه ..لما وصلوا الشقه حست انها بتنهار..رقت الدرج وفتحت
لهم الباب..خالتها ام حمد بوجها البشوش..
ام حمد:هلا حبايبي..وشفيكم جاين بدري..
اختبص وجهها لمه شافت هيفاء تعنز على فهد وجهها اصفر باين عليه التعب..
ام حمدحطت ايديها على صدرها:يماهيفاء وش فيك حبيبتي..
مسكتها ام فهد وحطتها على الكنبه اللي في الصاله وهيفاء حطه ايديها على بطنها..
فهد:لا خالتي بس هيفاء تعبت علينا وحنا في السينما ..تقول ان بطنها يعورها
ام حمد حطت راس هيفاء في حضنها ..
ام حمد:هيفاء يمه وشفيك حبيبتي..قولي لي..
هيفاء:مادري ياخالتي جاني الم ذابحني في بطني..
ام حمد:اكيد من اكل المطاعم هواللي سممك..
هيفاء:ماظنتي خالتي..
فهد:خالتي الا وين امي..؟
ام حمد:امك ياحبيبي ..راحت السوق عشان اختك مها تحن عليها..تبي اغراض..
فهدبتفكير:اهها..انزين انا بخليكم بروح المقهى اللي في هالشارع اذا بغيتوا شى
كلموني..
ام حمد:مع السلامه..
راح فهد وام حمد قامت لغرفتها وردت معها حبه..عطتها هيفاء..
ام حمد:يما هيفاء اكلي هذه اخر حبه عندي.. بتريحك ان شاءالله..
هيفاء بخمول:مشكوره خالتي..
ام حمد رفعت اصبعها:بس هاه..ترى تنوم ..
هيفاء:معليه يكون احسن بعد..
ام حمد هزت كتف هيفاء: قومي روحي غرفتك نامي..
رقت هيفاء الدرج في الغرفه كلت حبة المهدئ وصلت صلاة العصرعشان
قام وقتها..اول ماخلصت الصلاة حست بدوخه مالقت الا نفسها على السرير
نايمه..
تركي صايرله من وصل من السفر يوم ونص واليوم راح كله وهو نايم
لانه مانام في الطايره الا كم ساعه وقرر اليوم الثاني يروح حق خالته
يسلم عليها ونفس الوقت يتقصى الاخبار بعد الخطوبه اذا البنت تبيه
والا ماخذته عشان فلوسه..الصحيح ان اخوه ماينعاب بس مع ذلك
لازم اتاكد..اذاهي تستاهله..اولا..راح فتح الكبت اللي كان مليان بدل
ماركات واللي اغلبيتها بدل رسميا ..اضطر ياخذ بدله رسميه من ارماني
بلوزقطنيه لون رصاصي على حوافها تطريزاسود ونيك..مع بنطلون
اسود..كانت البلوزه ضيقه من صوب كتوفه العراض ووسييعه من صوب
خصره..كان شكله جنان يحسس اللي حوله برهبه..خذا جاكيته الاسود الجلد احتمال اذا نزل مطر..طلع تركي من الشقه وركب سيارته البورش..
تركي وهويسوق رفع موبايله ودق على فهد عشان يقول حق
خالته انه بيجي يسلم عليها ..
تركي:الو..مرحبا..
فهد:مرحبتين..من معي..
تركي:ماعرفتني..
فهد:لا الشيخ ماعرفتك
تركي:افا اناحماك ماعرفتني..
فهد:حمااي بس انا مب متزوج..اكيد غلطان..
تركي وهو يضحك:لامتاكد ..وغصب عليك تاخذ بنتي..
فهدابتسم:تركي يارجل خوفتني ..بعدين بنتك هذه الشينه خلها لك
(لان تركي يومهم صغار دايما يقول حق فهد انه بياخذ بنته)
تركي:احمد ربك انك تاخذ بنت تركي الضاوي.هذا شرف كبير لك
فهد:يااخي موكفانا ان اختي بتاخذ اخوك هالنزعه..اخذ بنتك تبلشني فيها
تركي:أي صح مبروك اسمحلي ماعرفت الا امس..كنت مسافر
فهد:الله يبارك فيك..ندرى انك معذور
تركي:فهد ليت لوسمحت تقول حق خالتي اني بجي اسلم عليها
فهد:صار انا بسبقك للشقه وبسويلك درب..اي وعلى فكره ترى احنا
ساكنين في شقة عمتي ..على بعد شارعين من شقتنا..
تركي:ليه..؟
فهد:سالفه طويله بقولها لك بعدين..
تركي:خلاص يالله مع السلامه..
فهد:مع السلامه
هيفاء قامت من النوم وهي تحس بخمول وتعب واوجاع اللي ببطنها خفت شوي لانها كلت الحبوب وبطنها فاضي راحت الحمام غسلت
وجهها عشان تنشط شوي بس رجع لها الالم من جد وجديد ياربي..
وش اسوي ..نزلت هيفاء تحت تدور على امها ولا خالتها..لقت خالتها
قاعده على الكنبه ومحمد منسدح في حضنها نايم ..قعدت هيفاء جمبها
ام حمد:ها حبيبتي احسن الحين..
هيفاء:اخف خالتي قولي كم ساعه نمت..
ام حمدتبتسم:ساعه ونصف..
هيفاء:معقوله وانا علبالي يوم كامل خالتي حاسه بوجع..
ام حمد:بسم الله عليك ماخفف عليك الدواء..
هيفاء:لا والله... وش عنده الاخ نايم هنا في الصاله ..
ام حمد تبتسم:قاعد يلعب سوني يوم تعب طاح على حضني ونام..
هيفاء:انزين ماعندك حبوب تخفف علي حاسه انه هالمغص ماراح يخف كذا ولا كذا..
ام حمد:لاوالله حبيبتي..
هيفاء:خلاص انا بكلم فهد يمر وياخذني الصيدليه اخذ حبوب مهدئه
طلعت هيفاء من الصاله عشان تكلم فهد وقفت بالممر..الاالباب ينفتح ويدخل
فهد ويدور على امه
هيفاء بابتسامه كبيره:الطيب عند ذكره..
فهد طنش لها:امي وين..ماجت
هيفاء:فهدانا تعبانه ابي اروح الصيدليه الله يخليك وصلني
فهد:لا موفاضيلك بعدين
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك