رواية قمر خالد -23
مريم: ان شالله احبك مثل ما تبي بس لحين الناس وقت
سعود يبتسم: ههههههه على رايج ..
مريم : لا صج... انا شوي حبيتك .. بس يبيلي خمس دقايق زود عشان اتاكد من حبي لك
سعود:هههههههه دريت انج راعيه نكت ..
مريم: خلول ماغيره
سعود: صبحه قالت لي ...
مريم: اوريها مرت الخال..
يودت على حلجها .. شقاعده تقول هالخبله .. صج اني خبله
سعود تم يضحك عليها : الله عليج ههههه يعلني افداج .. يالله حبيبتي .. اشوفج على خير
مريم باحباط: بتروح.. تو الناس وقت..
سعود: الساعه 11:30 شنو وقت .. هيئتج ماتبين تفارجيني ..
مريم استحت : ... مو حرام ... ريلي .
سعود: الله عليج ههههههه ... يالله حبيبتي .. اخليج اللحين
مريم قامت وياه.. قبل لا طلع سعود باس يد مريم وخذ رقم تلفونها عشان يتصل فيها ..
نورة اللي كانت تلاعب اليهال ومستانسه حيل عليهم ما تبي تفارجهم .. عبيد ولد لطيفه راح عنها برع البيت وراحت وراه.. يوم طلعت له شافت ريال رافعه واهو يضحكه يرميه بالسما ويرد بيده .. ونزله على الارض اول ما شاف عبيد نورة راح لعندها عن خليل وخليل يطالعه التفت للبنت اللي راح لها ..
كانت نورة كاشفه ويهها واهي تطالع خليل اللي انعجبت فيه بشريط فيديو عرس قُمر.. خليل ابتسم لها وللياهل وراح عنها.. نورة استحت ونزلت عيونها للارض ودخلت ويا عبيد ..اول ما دخلت شافت وضحه بويهها تبي تطلع ابتسمت لها وضحه وطلعت.. طالعتها نورة لوين رايحه وشافت خليل واقف لها.. اول ما شافها عطاها ورد وقال لها شي ضحكها وبعد شوي ردت وضحه داخل..
وضحه: ها نوارة .. اشوفج عاجبتج السكه
نورة بحيا: لا بس ويا اليهال..
وضحه: تحبين اليهال ؟
نورة: وايد ..
وضحه: طالعه على خليل . يحب اليهال موت .. وشكلي بعد بييب له اثنين بدال الواحد
نورة حست بالغيره من وضحه بس : الله يقومج بالسلامه ويسهل عليج
وضحه: ااااااااامين
دخلن وضحه ونورة مع بعض.. ام خليفه قالت لمروة تاخذ حلاو توديه لابوها لانه يحبه.. وتذكره مرة وحده بالدوا.. مروة يوم راحت كانت متغشيه عن المكياج اللي بويهها ولابسه كعب عالي.. كانت تمشي وما تشوف الطريج زين .. دعمت بواحد
مروة: اعوذ بالله شنو هذا
مسكها الريال بقوة عورت يدها : حاسبي ماتشوفين
مروة خلت عن الريال ووقفت ترفع غشاها : انزين لا تاكلنا .. رفعت غشوتها لان الصوت اليف عليها علبالها جاسم عمها: جسوم ..
انصدمت .. ماكان جاسم .. كان واحد ثاني .. يشبه سعود المعرس شويه .
مروة: مسامحه ...
مطلق اللي تم يطالع هالجمال اللي اول مرة يشوفه بحياته.. شبيه الريم والغزلان هالبنت.. من تكون يا ترى: لا عادي بس مو منج من هالنعال.
مروة تطالعه بكل غرور: نعم؟
مطلق بابتسامه ساحرة: الله ينعم عليج من نعالج يالزينه اهو اللي فقدج توازنج
مروة: انزين انزين.. بلا سوالف بطاله
مطلق: الله عليج بعد بطاله هههههههههههههههه
مروة: اشفيك مو صاحي انت
مطلق: هههههههه عسل عسل هاللسان بعد شوي
مروة بحتقار: انت مو صاحي .. احترم الفاظك تعرف انت قاعد تكلم منو
مطلق: اكلم حوريه نازله من السما عشان تخاويني من بعد ليله وحيده من دون هالويوه الحسنه
مروة تعجبت من جراته : انت منو
مطلق : انا مطلق بن عبدالعزيز بن ظاحي .. بس اذا تبيني اصير خاتم .. حاظرن لج يا لزينه
مروة بصدمه: مطلقوووووووووو ما غيرك
مطلق مستغرب: لا يكون معرفه سابقه .. قط كلمتج بالتلفون ..
مروة: تخسي الا انت انا اكلمك .. انا مروة بنت عمك يالفاقد ..
مطلق انصدم: عمي ... أي عم
مروة: بنت سعد .. يالمخبل
مطلق بجراه اكبر: احلى واحلى .. ما كنت ادري ان منبتنا يطلع ورد وجوري ... الا ما اقول يسلم لي هالزين كله
مروة : صج ما تستحي .. بعلم عليك عند ابوي الحين
مطلق: وانذبح عشانج ... احلى موته
مروة انصدمت منه لكن غواها .. حلو ووسيم ويتغزل بجراءة.. طالعته نظره احتقار: شباب اخر زمن
وراحت عنه.. مطلق تم يطالعها واهي تمشي واهي تلتفت له.. باس يده وهف البوسه لها واهي استعجبت منه .. صج قليل ادب ..
على الساعه 12:30 فضى الجو من المعازيم ... قعدن الحريم بالصاله واهن هلكانات... شيخه اللي استغلت الهدوء طلعت بره بالليوان الجبير.. تاخذ نفس عن الجو المشحون داخل .. كانت لابسه عباتها لانهم بعد شوي بيردون النزهه .. توها بتدخل الا تشوف واحد قاعد على احد العتبات اللي عند ديوانيه الرياييل الفاضيه .. شيخه طالعته زين وعرفت انه طلال .. كان لابس الطقيه وحامل الشماغ على جتفه ومنزل راسه .. راحت لعنده شيخه تخاويه شوي
شيخه: هووووووووووووو يالربع
طلال رفع راسه وابتسم: هلا شويخ.. شتسوين هني
شيخه: اتشمس .. ابي اصير برونزيه
طلال ابتسم ونزل راسه: زين ..
شيخه: علامك طلال .. احد صافقك
طلال: ياريت
شيخه تبتسم: والله .. ترى زاهبه تبيني اطرقك ..
طلال ما رد عليها .. وقلبها توجس..
شيخه: طلال ... لا يكون تبي تنحاش من سالفه التشري.. لا تمد لي براطمك لاني مو راحمتك ..
طلال: خليني لحالي لو سمحتي .. ماابي اسمع هذرة..
شيخه انصدمت وانحرجت شوي .. قامت عنه تمشي داخل البيـت.. طلال حس ان شيخه زعلت وان اسلوبه مو عدل ووقفها
طلال: شيخه انتظري ماكان قصدي
شيخه ما سمعته وراحت عنه..
طلال لحقها ووقف جدامها : يالله شواخ... مو قصدي .
شيخه شوي وتبجي : لا ماعليه ماحصل شي بس مابكلمك مرة ثانيه
طلال: مو قصدي جذي
شيخه : لا اكيد مو قصدك انا اللي يبت لروحي اللي ياني .. عن اذنك
طلال: لا .. قبل لا ترضين لا تروحين
شيخه: خلني اروح ..
طلال: انزين بعطيج سنكرز
شيخه: ماابي..(تطالع مخابيه )... اصلا ما عندك
طلال: خخخخخخخخخخخخ شدراج ..
شيخه طالعته : لان ماكو مخابي بدشداشتك .. وين بتخشه بخشمك
طلال: ههههههههههههههههههههههههههههههههههه يا شيخه
تمت تطالعه من تحت الغشوى واهو يضحك.. تحس بمشاعر غريبه تجاهه بس ما تدري شنو سببها.. وفجاه طاحت الغشوى.. وبين شكلها الرعبوب.. طلال تم يطالعها واهي ما رفعت الغشوى.. ظلوا على حالهم جذي فترة وشيخه استحت عنه وراحت .. طلال ظل واقف مكانه وشكل شيخه ما فارج خياله.. جمالها ملاح مثل وسيمه.. وروحها حلوة مثلها بعد.. بس يا رب.. انا قلبي وهبته لغيري خلاص.
اهل المعرس اول من تحرك من العوايل رادين الرميثيه .. ومطلق اللي كان راكب سيارته الخاصه تم يطالع مروة اللي تطالعه بنص عيون تم يتبسم وسكر الدريشه وراح ورى سياره اخوه ..من بعدهم.. تحركت عايله بو ناصر عشان يردون النزهه.. ناصر اللي تعبت نورة من كثر المراسيل بينه وبين نوفه خذ منها وعد انها تتصل فيه بس يردون واهو خلاص عقد قرارة انه يكلم امه عن نوفه وانها تخطبها له ..يوم وصلوا للبيت شيخه راحت راسا دارها ورقدت ونورة وراها.. ناصر بدل هدومه ونزل تحت ياكل له شي ..شاف ابوه قاعد واهو يتبسم
ناصر: دوم هالابتسامه ما تفارج يابو ناصر
بو ناصر: الله يخليك يا وليدي .. مرتاح حيل .. هم 10 سنين طاح بيوم واحد .. الحمد لله
ناصر : الحمد لله
خاوى ابوه شوي واهم يسلفون وعلى الساعه 1:30 قام بو ناصر يرقد
ناصر يوقف ابوه: يوبا بغيتك بسالفه
قعد بو ناصر مكانه: خير ..
ناصر :ألخير بويهك يا يوبا.... يوبا انا عزمت اكمل نص ديني ..
بو ناصر: ما تحس انك صغير شوي
ناصر: يوبا انا بدخل ال21 جريب .. وانا ماابي عرس .. ابي بس ملجه والعرس من بعدها .. عن لاتضيع البنت مني ..
بو ناصر: من هي البنت
ناصر :بنت بو خليفه .... نوفه
بو ناصر: نوفه؟ .. امك قالت لي انها تبي مروة
ناصر: لا يوبا.. انا ابي نوفه ...
بو ناصر: يصير خير.. بنت سعد من احسن ما يكون ومن حظنا لو كانت من نصيبك بس انت اصبر شوي وانا اللي بكلم عمك على الموضوع
ناصر حب راسه ابوه وشكره وراح بعدين داره واول ماانسدح ياه الرقاد بس ظل ناطر نوفه اللي بتتصل فيه .. بعد نص ساعه دزت له مسج.. ( ما حبيت ارفض طلبك جدامك ..بس سامحني يالغالي .. استحي (.. ناصر عصب شوي من المسج وخلاه.. قعد يفكر في السالفه وشوي شوي هدت اعصابه.. اوريها.. دامني بخطبها بخليها تستخف.. (على راحتج.. وزهبي حالج لعرس ثاني.. عرسنا ..(نوفه استخفت من الفرحه وشوي تتصل في ناصر بس ضبطت روحها ودزت له المسج (امييييييييين يارب العالمين(.. وكانت اخر مسج تدزها نوفه ومن بعدها راحت في سبات عميـــــــق.. طلال كان اخر من بقى صاحي.. يفكر في حياته اللي اعتفست باللي قالته وسيمه.. ما تخيل انها يمكن تضيع من يده جذي.. واهو يوافق على الشي ويتقبله .. ومن صوب ثاني شيخه اللي طاريه على باله وما يدري شصاير فيه.. شيخه بعمر قمر بالضبط ..انولدن بنفس الشهر .. دخل طلال بيتهم وبدل هدومه واستسلم للرقاد ..
جاسم بعد ظل ساهر واهو يتخيل عرسه من لولوة.. ما قدر يصبر اكثر على فرقاها.. لازم يكلمها ولا يكلم ام خليل.. بس من له من يقدر يساعده.. مريم ماكو غيرها.. قام من الدار اللي كان يرقد فيها ببيت بو خليل وراح لدار مريم.. طق على الباب .. مريم كانت تتكلم ويا سعود بالتلفون وراحت عند الباب
مريم: منو
جاسم: هاذا انا جاسم
مريم: جاسم ... لحظه شوي (تكلم سعود) سعود انا اخليك الحين جسوم عند داري ماادري شيبي
سعود: اووووووووووف حزته هاذا
مرمي: ههههههههههههههههه ماعليه بيشوف شنو يبي وبتصل فيك مرة ثانيه يالله باي
سعود: لاتطولين حياتي
سكرت عن سعود وردت على الباب: ههلا جسوم اشفيك ..
جاسم: مريم كلمتي امج عن لولوة
مريم : اوووووووووف لا ما قلت لها نسيت ...
جاسم: انزين مريم بطلب منج طلب قوليلي تم
مريم:تم
جاسم: عطيني رقم تلفون لولوةاللحين .
مريم: هاااااااااااا
جاسم: تكفين مريم مااقدر اصبر اكثر لازم اكلمها بموت والله بموت
مريم :بس ياجاسم
جاسم: والله ما بطوله بس ابي اتكلم وياها عن الموضوع تكفين مريوم
مريم: ماادري
جاسم: تكفين مريم ارحميني شوي
كسر خاطرها وعطته: بس تقول لها السالفه لا تطول اكثر ..
جاسم بابتسام : لج وعدي ..
عطته مريم الرقم وجاسم طار من عندها وردت اهي داخل تدق على سعود ..
سعود: شيبي جاسم
مريم : شيبون الرياييل بعد العرس ..
سعود : ههههههههههههههههههههههههههههههه
جاسم راح داره واهو يرتجف .. خسك الله من حظ ارتجف عشان بتصل في بنيه..طالع الساعه.. اللحين 2 .. اكيد راقده.. بس بجرب حظي .. دق الرقم .. وظل يرن .. يرن .. يرن .. ليما انرفع
لولوة: الو
جاسم: ..............................
لولوة: الوووو
جاسم:...........لولوة
لولوة خافت: نعم.
جاسم :الله ينعم عليج . .. انا ..... جاسم
لولوة: ........................
جاسم: الو لولوة
لولوة: من وين لك رقم تلفوني
جاسم: الله يخليج.. خليني اقلج سبب اتصالي وبعدين قولي اللي تبين تقولينه .. موافقه
لولوة: اسمع..
جاسم: لولوة.. انا من يوم شفتك وانا مو متهني بحياتي.. احس بالنقص.. نقص وجودج.. انا ظنيت ان اللي احسه لج شعور عادي كونج بنت بغايه الجمال .. بس يا لولوة انا انهزمت جدامج.. وقلبي تعلق فيج .. وماابيج تضيعين من يدي ..
لولوة تبتسم وميته مستحى من كلامه .. الحمد لله ان حاله مثل حالها ..
جاسم: ومثل ما تعرفين انا وصلت لعمر يخليني افكر بتكوين حياه وعايله انا فاقدها من اكثر من 18 سنه .. وانا مااقدر احصل بنت احسن عنج تكون شريجتي بهاذي الحيا...
لولوة: .................
جاسم: لذا بغيت استاذنج .. عشان ايي واطلب يدج من اهلج .. اذا كنتي موافقه ..
لولوة: ............
جاسم: يا لولوة بس قولي موافقه ولا ........... غير موافقه
لولوة: .......................... موافقه
جاسم طار من الفرحه: موافقه
لولوة: أي..............
جاسم: الف مبروك لولوة .. باجر بعد صلاه المغرب انا واخوي وولده بنييكم .. نتقدم لج ..
لولوة: .......... حياكم الله ..
جاسم: الله يحيج .. يالله اخليج اللحين .. تصبحين على خير
لولوة\: وانت من اهل الخير ... جاسم
جاسم: لبيه ..
لولوة: اخيرا حسيت على دمك ..
جاسم: هههههههههههههههههههههههههههه من زمان حاس يا حياتي من زمااااان
لولوة ضحكت وسكرت التلفون عنه واهي متونسه حيل من اللي يصير وياها ..
وبالفعل.. جاسم كلم اخوه بو خليل اللي بارك له على اللي يبيه ويوم عرف انها ارفيجه قمر رحب بهذ الشي.. وطلب من خالد انه ايي وياهم واييب قمر بعد ..
خالد: حبيبتي اليوم بنروح مكان ونبيج اتيين ويانا
قمر: وين ..
خالد : مكان... بس صدقيني بتتونسين حيل منه
قمر: وين تكفى قول لي حبيبي ..
خالد : خخخخخخخخخخخخ مو قايل لج..
قمر بدلع: كيفك ..
خالد واهو يتسند على مقدمه السرير : اكيد كيفي ..
قمر تطالعه بنظره
خالد: احبج
قمر: انا اكثر.. .
على المغرب تحركت سيارة خالد حامل فيها ابوه ومريم وام خليل وقمر .. وسيارة جاسم فيها بو خليفه وخليفه ونوفه اخت قمر وسيارة خليل لروحه.. قمر لاحظت الدرب اللي رايحين فيه وتهيأ لها انها تعرفه ..
خالد يطالعها: عرفتي وين رايحين؟
قمر: يتهيا لي ..
خالد: اللحين بنوصل
مريم قعدت تدلي خالد اللي متقدم القبيله وين بيت لولوة .. ويوم وصلوا قمر عرفت انهم ياين بيت ارفيجتها لولوة بس ليش
قمر: ما بتقول ليش يعني
خالد: ههههههههههههههههه ياحبي وانرفزج
قمر: هئ هئ عاد حبيببي قول لي
خالد: اللحين حبيبي بس نطري شوي ..
لولوة عن طرفها خبرت امها وابوها.. وكان كل شي مزهب لييه اهل جاسم.. كانت ترتجف من الخوف والتوتر.. اتصلت فيها مريم
لولوة: الووو
مريم: يالحسوده يالحقوده ماانتظرتي اعرس الا وعرستي من طرف ثاني
لولوة: مريم الله يهداج بموت والله بموت
مريم: هههههههههههههههههههههه وتتغشمرين علي ويا ويهج .. صج ما تستحين .ههههههههههههه بوريج اللحين
لولوة: الله يهديج بس .. وصلتوا
مريم : أي احنا على باب بيتكم .. يالله قولي لاهلج
لولوة: اوكيه باي
مريم :بايات
سدت لولوة عن مريم ونزلت لامها تخبرها وانطق الجرس.. راح عمها بو فلاح فتح الباب وسلم على الرياييل واولهم كان بو خليل.. لولوة يتيمه الاب لذا زايد وخالها حسن وعمها بو فلاح اهم اللي استقبلوا الرياييل .. دخلن الحريم البيت والريايييل بالميلس الخارجي للبيت.. طبعا بيت لولوة كان اصغر عن بيت بو خليفه ولا بيت بو خليل .. بس كان حلو وفخم .. قعدن الحريم بالميلس الداخلي ..
ام خليل لانها اكبر وحده اهي اللي تكلمت: الله يبارك فيج يالعروس ..
لولوة بحيا: مشكورة خالتي
مريم : اشفيج لولوو مختبصه جذي ما هقيتج خوافه
لولوة: انا ابي اعرف منو عطى جاسم رقم تلفوني ..
مريم: ومن غيري يعني والله تبيني شوف عمي يموت شوي شوي من دونج
لولوة استحت.. قمر اللي ما صدقت عمرها يوم قالت لها مريم سبب ييتهم وخذت ارفيجه عمرها بالاحضان وتحمدت الله ليش انهن راح ينجمعن ويا بعض من بعد ما تفارجوا ..
في ميلس الرياييل
بو خليل: يا بو فلاح .. احنا يايين اليوم نخطب بنتكم لولوة لاخونا جاسم.. جاسم يتيم الابوين بس تربى من قبل كل اخوانه وابوه الله يرحمه.. تقي بصلاته ويخاف ربه .. وناوي يكمل باجي حياته ويا بنتكم .. فشرايكم انتو
زايد إلى ما شال عيونه عن خالد واهو يفكر .. هذا زوج قمر ..
بو فلاح : والله يابو خليل هاذي الساعه المباركه .. وعايله بن ظاحي معروفه امبين الناس وامبين الخلايق بكرامه الاصل وطيب العود.. بس البنت بعد لازم نشاورها ..
بوخليل: ماكو خلاف يابو فلاح .. بس متى بتردون علينا
بوفلاح : تبون اليوم ولا باجر
جاسم اللي تكلم من بعد ما انشدت اعصابه: اليوم أي باجر يالطيب..
بو فلاح: هههههههههههههههههههههه ان شالله ياوليدي
بو خليل طالع جاسم نظره قفطته على طواله اللسان: خذوا راحتكم يا بو فلاح ..
بوفلاح: عن اذنكم شوي (يصد لزايد) زايد قوم وياي
قام زايد ويا عمه وراحن لميلس البنات.. طقوا الباب وطلعت لهن لولوة
لولوة: خير زايد
زايد: لولوة. نبي نقلج شي تعالي ويانا
لولوة:....... ان شالله
راحت لولوة وياهم للصاله وقعدت..
بو فلاج: يابنيتي.. جاسم بن ظاحي ياي يطلب القرب منج على سنه الله ورسوله.. وانا من طرفي اشوف الريال ما ينعاب.. ولد اصول ومن منبتن زين وينعزم به الراي .. فشرايج انتي
لولوة تطالع اخوها زايد اللي يطالعها بنظرة حنونه: شرايك زايد
زايد: رايي من راي عمي بو فلا ح ..
لولوة: ............ الشور شوركم يا عمي
بو فلاح: يعني موافقه
لولوة استحت واكتفت بهز راسها
بوفلاح: الف مبروك عليج يا بنت حسين .. الله يتمم علي خير..
يات ام زايد: هاشصار
بو فلاح: يببي ياام زايد .. لولوة وافقت..
ام زايد باعلى صوتها: كلولولولولولولوللوللوللوللوش الف مبروك يابنيتي
جاسم من سمع الكلولولش نقز من مكانه: وافقت
الكل ضحك عليه من نقزته وبوخليفه: جسوم يالميهل علامك اول واحد يتزوج.. احشم الناس
جاسم يطالع خال لولوة ويستسمح منه: مسامحه
بو علي: مسموح يا وليدي .. احنا كنا مثلك واكثر ولا شنو يا عيال
خليل: أي والله .. انا بغيت ارقص
بو خليل: انا لله وانا اليه راجعون
خالد ضحك على اخوه وعلى عمه.. نفس الطينه.. جاسم تم يتحقرص بمكانه من الوناسه وشوي يقوم يرقص.. دخل زايد وبو فلاح: الف مبروك عليكم ..
بو خليل قام وتوايه ويا بو فلاح: الله يبارك فيك يالطيب..
زايد راح يبارك لجاسم :ألف مبروك جاسم .. منك المال ومنها العيال.. وخلها بعيونك .. يوهرة البيت لولوة
جاسم: ما طلبت يا طويل العمر
تحاظنوا وخالد بارك لجاسم :الف مبروك بو محمد واخيرا بنشوف حمود
جاسم: الله يبارك في حياتك يا بو وليد .. عقبال ولدك ولود
خالد: خله ايي قبل هههههههههههههه
زايد يسمع كلام خالد واهو يبتسم.. باين عليه يحب قمر .. الله يهنيه فيها ..
خليل: مبروك يا جاسم .. الف الف مبروك .. والله انك صج حاقد على سعود.. ماانتظرت يوم وانت خطبت..
جاسم: لا عيل انقع روحي مثلك ويا وضحه
خليل: لاتيب طاري حرمتي .. تنقز عينها يالميهود
ضحكوا على سوالف خليل
بو خليل :يالله دام البنت وافقت اللحين خلونا نتفق على كل شي..
بو فلاح: الراي رايكم ..
جاسم :الله يخليك انا افكر ان يكون ملجه وبعد 3 شهور الزواج ..
بو فلاح: حلو .. بس البنت لها شروطها ..
جاسم: سم
بو فلاح: سم الله عدوك .. تبي تكمل دراستها .. وتبي تسكن لحالها ..
جاسم: ما طلبت.. اصلا انا عايش في بيت لروحي ..
بو فلاح : مهرها راح يكون 10 الاف دينار ..
بو خليل: ما طلبت يا اخوي .. لها اللي تبيه ..
بو فلاح: على بركه الله
من بعد الاتفاق قاموا الرياييل
يتبع ,,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك